ADZESUA ASƐM 32
Suasua Jehovah Na Da Ntseasee Edzi
‘Hom mma nyimpa nyina nhu hom ntseasee.’—PHIL. 4:5.
NDWOM 89 Tsie Nyankopɔn Asɛm Na Nya Nhyira
DZA YERUBOSUSU HO a
Ndua ebien yi mu hɛndze na epɛ dɛ wɔdze wo toto ho? (Hwɛ nkyekyɛmu 1)
1. Ebɛn kwan do na Christianfo yɛ hɔn adze tse dɛ dua? (Hwɛ mfonyin no so.)
WƆKA asɛm bi dɛ: “Dua a ɔkontom no, mframa nntum mmbu no.” Dɛm asɛm yi ma yehu dɛ sɛ dua bi botum egyina mframa ano aber a orummbu a, ɔsɛ dɛ dua no tum kontom. Dɛ Christianfo no, sɛ yebotum dze enyigye akɔ do asom Jehovah a, ɔsɛ dɛ yɛyɛ krado dɛ sɛ mber dan a, yɛbɛdan hɛnho, anaa ɔkwan bi do no, sɛ hɛn tsebea sesa a, ɔsɛ dɛ yɛkontom tse dɛ dua a yɛaka ho asɛm no. Yɛbɛyɛ no dɛn? Sɛ hɛn nsɛm tsebea sesa na yɛgye to mu, na yɛkyerɛ obu ma afofor hɔn adwenkyerɛ nye hɔn gyinaesi a, ɔkyerɛ dɛ yɛwɔ ntseasee.
2. Ebɛn su ahorow na sɛ yenya a ɔbɔboa hɛn ma sɛ hɛn tsebea sesa a, yaagye ato mu? Ebɛnadze na yebosusu ho wɔ adzesua yi mu?
2 Dɛ Jehovah n’asomfo no, yɛpɛ dɛ yɛyɛ nyimpa a yɛwɔ ntseasee. Afei so, yɛpɛ dɛ yɛbrɛ hɛnho adze na yɛda tsema edzi. Adzesua yi mu no, yɛbɔhwɛ mbrɛ su ahorow yi boaa Christianfo binom aber a hɔn nsɛm tsebea sesae no. Yɛbɛsan ahwɛ mbrɛ dɛm su ahorow yi bɔboa hɛn so. Naaso hom mma yendzi kan nhwɛ dza Jehovah na Jesus ayɛ a ɔkyerɛ dɛ wɔwɔ ntseasee paa na yensua biribi mfi mu.
JEHOVAH NA JESUS DA NTSEASEE EDZI
3. Ebɛnadze ntsi na yebotum aka dɛ Jehovah wɔ ntseasee?
3 Bible no frɛ Jehovah “Ɔbotan no,” osiandɛ ɔbotan tsim hɔ pintsinn na onnhinhim. (Deut. 32:4) Naaso, Jehovah san da ntseasee edzi. Sɛ nsɛm ahorow bi sisi na Jehovah hu dɛ ɔsɛ dɛ ɔyɛ nsesa ahorow bi ama dza ɔpɛ no aba mu a, ɔyɛ dɛm. Jehovah bɔɔ nyimpa wɔ no su do. Dɛm ntsi, hɛn so sɛ hɛn tsebea sesa a, yɛyɛ nsesa ahorow. Ɔmmfa ho tsebea biara a yebehyia no, Jehovah ama hɛn afotu pii wɔ Bible mu a obotum aboa hɛn ma yeesi gyinae pa. Dza Jehovah nankasa ɔayɛ nye afotu a ɔdze ama wɔ Bible mu no ma yehu dɛ, ɔmmfa ho dɛ Jehovah yɛ “Ɔbotan no,” ɔda ntseasee edzi.
4. Ma nhwɛdo a ɔkyerɛ dɛ Jehovah da ntseasee edzi. (Leviticus 5:7, 11)
4 Jehovah da ntseasee edzi na n’akwan so dzi mu. Sɛ ɔnye nyimpa ridzi a, ɔnnyɛ katsee. Dɛ nhwɛdo no, sɛ yɛhwɛ mbrɛ ɔnye Israelfo no dzii no a, yebohu dɛ ɔwɔ ntseasee. Nna Israelfo no bi yɛ ehiafo na binom so yɛ esikafo. Dɛm ntsi nna Jehovah nnhwɛ kwan dɛ hɔn afɔrbɔdze bɛyɛ kor. Tsebea horow bi mu no, ɔmaa kwan ma obiara bɔɔ afɔr dɛ mbrɛ n’ahoɔdzen botum.—Kenkan Leviticus 5:7, 11.
5. Ma nhwɛdo a ɔkyerɛ dɛ Jehovah brɛ noho adze na ɔda tsema edzi.
5 Ahobrɛadze na tsema a Jehovah wɔ no kenyan no ma ɔda ntseasee edzi. Dɛ nhwɛdo no, Jehovah kyerɛɛ dɛ ɔbrɛ noho adze aber a nna ɔpɛ dɛ ɔsɛɛ nyimpa bɔn a wɔwɔ Sodom no. Jehovah nam abɔfo bi do kaa kyerɛɛ ɔtseneneenyi Lot dɛ onguan nkɔ bepɔw bi do. Naaso nna Lot suro dɛ ɔbɔkɔ hɔ. Ntsi ɔserɛɛ Jehovah dɛ ɔmma ɔnye n’ebusua nkɔ Zoar. Nna ɔyɛ kurow ketseketse bi a Jehovah ayɛ dɛ ɔbɛsɛɛ no aka Sodom ho. Nkyɛ Jehovah botum ahyɛ Lot ketsee dɛ ondzi akwankyerɛ a ɔdze ama no no do pɛpɛɛpɛ. Naaso ɔannyɛ dɛm, mbom ɔmaa Lot kɔr Zoar na ɔannsɛɛ kurow no. (Gen. 19:18-22) Mfe ɔhaha pii ekyir no, Jehovah daa tsema edzi kyerɛɛ Nineveh kurow no. Ɔsomaa nkɔnhyɛnyi Jonah dɛ ɔnkɛka ɔsɛɛ a ɔdze reba Nineveh kurow no do nye nyimpa bɔn a wɔwɔ mu no ho asɛm nkyerɛ hɔn. Ninevehfo no nuu hɔnho, na hɔnho yɛɛ Jehovah mbɔbɔr ma ɔno ntsi ɔannsɛɛ kurow no.—Jonah 3:1, 10; 4:10, 11.
6. Ebɛnadze na Jesus yɛe a ɔma yehu dɛ osuasuaa mbrɛ Jehovah si da ntseasee edzi no?
6 Jesus so suasuaa mbrɛ Jehovah si da ntseasee edzi no. Wɔsomaa no baa asaase do dɛ ɔmbɛka asɛmpa no nkyerɛ “Israel fie nguan a wɔayew no.” Naaso ɔdaa ntseasee edzi aber a nna oridzi n’asodzi no ho dwuma no. Ber bi, maame bi a nna ɔnnyɛ Israelnyi serɛɛ Jesus dɛ ɔnsa ne babaa a nna ‘sunsum fi rehaw no paa’ no yarba. Jesus daa tsema edzi kyerɛɛ maame no na ɔsaa ne ba no yarba. (Matt. 15:21-28) Ma yɛnhwɛ biribi fofor so a Jesus yɛe. Aber a Jesus reyɛ no som edwuma no, ɔkaa dɛ: ‘Obiara a ɔbɛpa me no, mo so mebɛpa no.’ (Matt. 10:33) Naaso aber a Peter paa no mpɛn ebiasa no, Jesus ammpa no. Ebɛnadze ntsi a? Osiandɛ Jesus hun dɛ Peter enu noho na ɔwɔ gyedzi so. No wusoɛr ekyir no, ohyiaa Peter na ɔbɛyɛ dɛ ɔmaa onyaa awerɛhyɛmu dɛ ɔdze no mfomdo no akyɛ no, na ɔda ho ara dɔ no.—Luke 24:33, 34.
7. Dɛ mbrɛ Philippifo 4:5 ma yehu no, ebɛn adwen na yɛpɛ dɛ fofor nya wɔ hɛnho?
7 Dze besi ha yi, yeehu dɛ Jehovah Nyankopɔn na Jesus Christ nyina da ntseasee edzi. Na hɛn so ɛ? Jehovah pɛ dɛ hɛn so yɛda ntseasee edzi. (Kenkan Philippifo 4:5.) Bible nkyerɛase bi ka dɛ: “Ma nkorɔfo nhu dɛ etse asɛm ase.” Ntsi yebotum ebisa hɛnho dɛ: ‘Ana nkorɔfo nyim me dɛ meyɛ obi a metse asɛm ase, monntwe nsɛm mu tann, na megye afofor hɔn adwenkyerɛ to mu? Anaa wonyim me dɛ meyɛ katsee, me tsirmu yɛ dzen anaa m’asɛm yɛ dzen? Ana ɔyɛ a mohwɛ kwan dɛ afofor bɛyɛ ndzɛmba dɛ mbrɛ meyɛ no pɛpɛɛpɛ? Anaa sɛ ɔbɛyɛ yie a mitsie hɔn adwenkyerɛ?’ Mbrɛ yesi da ntseasee edzi no na ɔbɛkyerɛ mbrɛ yeesuasua Jehovah na Jesus ekodu. Hom mma yɛnhwɛ tsebea ebien bi a no ho behia dɛ yɛda ntseasee edzi. Ɔno nye aber a hɛn tsebea asesa nye ber a afofor hɔn gyinaesi anaa mbrɛ wosi tse nsɛm ase no nye hɛn dze nnhyia.
SƐ WO TSEBEA SESA A, DA NTSEASEE EDZI
8. Sɛ wo tsebea sesa a, ebɛnadze na obotum aboa wo ma aada ntseasee edzi? (Hwɛ ase hɔ asɛm no so.)
8 Sɛ hɛn tsebea sesa na yɛwɔ ntseasee a, yɛbɛgye ato mu. Nsesa a ɔtse dɛm no botum dze ahokyer a yɛnnhwɛ kwan abɔto hɛn do. Dɛ nhwɛdo no, yarba bi botum abɔ hɛn awerɛfir mu. Anaadɛ ɔman a yɛtse mu no ne sikasɛm botum ayɛ basaa, anaa wɔbɛsesa aban a ɔwɔ do no prɛko pɛr, na iyi botum aka hɛn asetsena paa. (Ɔsɛnk. 9:11; 1 Cor. 7:31) Sɛ asafo no sesa hɛn dwumadzi mpo a, obotum ayɛ dzen ama hɛn dɛ yɛbɛgye ato mu. Dɛ mbrɛ tsebea no tse biara no, ndzɛmba anan bi botum aboa wo ma aada ntseasee edzi na ayɛ nsesa ma ɔnye tsebea fofor a akɔ mu no ehyia. Ndzɛmba anan no nye: (1) gye to mu dɛ ndzɛmba asesa, (2) fa w’adwen si ndzɛmba a ibotum ayɛ no do, (3) dwendwen ndzɛmba pa a woesi wɔ w’asetsena mu no ho, na (4) yɛ ndzɛmba boa afofor. b Ma yɛnhwɛ dza enuanom binom yɛe a ɔma yehu dɛ sɛ hɛn tsebea sesa na yɛyɛ dɛm ndzɛmba anan yi a, obotum aboa hɛn paa.
9. Ebɛnadze na awarfo bi a wɔyɛ asɛmpatserɛwfo yɛe a ɔboaa hɔn ma wotumii gyinaa ɔhaw bi a nna wɔnnhwɛ kwan no ano?
9 Gye to mu dɛ ndzɛmba asesa. Wɔdze Emanuele nye Francesca kɔr ɔman bi do dɛ asɛmpatrɛwfo. Naaso aber a wokodur hɔ no, annkyɛr na COVID-19 yarba no yii ne tsir. Dɛm aber no, nna mbrɛana wɔahyɛ ase rusua hɔ kasa no. Afei so nna wonnyim enuanom no yie. Naaso osian yarba no ntsi, nna ɔnnsɛ dɛ wɔbɛn afofor. Awerɛhosɛm nye dɛ, awerɛfir mu ara na Francesca ne maame wui. Nna noho per no dɛ ɔbɔkɔ fie akɔhwɛ n’ebusuafo, naaso osian yarba no ntsi nna orunntum nnkɔ. Ebɛnadze na ɔboaa no ma otumii gyinaa ɔhaw yi nyina ano? Odzi kan no, Emanuele na Francesca bɔɔ mu bɔɔ mpaa serɛɛ Jehovah dɛ ɔmma hɔn nyansa ma wɔmfa ngyina ɔhaw no ano da biara na amma ɔhaw no annhyɛ hɔn do. Jehovah nam n’ahyehyɛdze no do buaa hɔn mpaabɔ no, na ɔmaa hɔn nsa kaa ndzɛmba a ɔbɔboa hɔn ma woeegyina hɔn tsebea no ano wɔ ber a nna wohia no paa no mu. Dɛ nhwɛdo no, asɛm bi a onua bi kaa wɔ video bi mu no hyɛɛ hɔn nkuran paa. Onua no kae wɔ video no mu dɛ: “Sɛ yɛgye to mu ntsɛm dɛ hɛn tsebea asesa a, ɔno bɛma wɔayɛ mberɛw ama hɛn dɛ yɛbɛsan enya enyigye a nna yɛwɔ no dada no. Na ɔno bɛma yɛdze ho kwan fofor a yeenya no edzi dwuma wɔ kwan pa do.” c Otsia ebien, wɔdze sii hɔn enyi do dɛ wɔbɛyer hɔnho edzi dase wɔ fon do, na wɔnye obi hyɛɛ Bible adzesua ase mpo. Otsia ebiasa, wɔgyee mboa a enuanom no fii ɔdɔ mu dze maa hɔn no too mu, na hɔn enyi gyee paa. Dɛ nhwɛdo no, nna akyerɛbaa bi dwen hɔnho paa ma ɔno ntsi nna ɔkyerɛw Bible mu asɛm bi dze mona hɔn da biara, na ɔyɛɛ dɛm araa afe kor. Hɛn so, sɛ hɛn tsebea sesa na yɛgye to mu a, dza yetum yɛ no bɛma hɛn enyi agye.
10. Ebɛn nsesa ahorow na akyerɛbaa bi yɛe aber a ne tsebea sesae no?
10 Fa w’adwen si ndzɛmba a ibotum ayɛ no do, na dwendwen ndzɛmba pa a woesi wɔ w’asetsena mu no ho. Christina yɛ hɛn akyerɛbaa Romanianyi bi a ɔtse Japan. Nna ɔwɔ asafo bi a wɔka Borɔfo kasa mu, naaso wɔdze hɔn kɛkaa asafo a wɔka Japan kasa ho, na iyi maa n’abaw mu bui. Naaso ɔammfa n’adwen ennsi dza woesi no do. Mbom ɔyɛɛ dɛ, ɔbɛyɛ dza obotum biara wɔ asafo fofor a ɔakɔ mu no mu, na ɔaayɛ pii wɔ asɛnka edwuma no mu. Mbrɛ ɔbɛyɛ a obotum ayɛ dɛm no, ɔkaa kyerɛɛ maame bi a ɔnye no ayɛ edwuma pɛn dɛ ɔmboa no ma onsua Japan kasa no yie. Maame no peen do dɛ ɔdze Bible nye Ibotum Enya Enyigye Daa! nwomaba no bɔboa no ma oeesua kasa no yie. Maame no boaa Christina ma ɔtsee Japan kasa no yie. Naaso annso hɔ ara o, maame no so n’enyi bɛgyee nokwar no ho. Iyi ma yehu dɛ, sɛ hɛn tsebea sesa na yɛdze hɛn adwen si dza yebotum ayɛ no do na yɛdwendwen ndzɛmba pa a woesi wɔ hɛn asetsena mu no ho a, obotum dze nhyira a yɛnnhwɛ kwan aba.
11. Ebɛnadze na awarfo bi a wohyiaa sikasɛm mu ahokyer no yɛe dze gyinaa ɔhaw no ano?
11 Yɛ ndzɛmba boa afofor. Awarfo bi tse ɔman bi a wɔabra hɛn som edwuma no mu. Aber a ɔman no ne sikasɛm yɛɛ basaa no, ɔmaa hɔn so hɔn sikasɛm yɛɛ basaa. Ebɛn nsesa na wɔyɛe? Dza odzi kan no, wɔmaa hɔn asetsena baa famu. Afei so, wɔammfa hɔn adwen ennsi hɔn haw no do, mbom wɔyɛɛ dɛ wɔdze hɔnho bɛhyɛ asɛnka edwuma no mu dze aboa afofor. (Andw. 20:35) Okun no kaa dɛ: “Asɛnka edwuma no a yɛdze hɛnho hyɛɛ mu dzendzenndzen no boaa hɛn ma yɛammfa hɛn adwen ennsi hɛn haw no do, mbom yɛdze sii Jehovah n’apɛdze a yɛbɛyɛ no do.” Sɛ hɛn tsebea sesa a, ɔwɔ dɛ yɛkaa dɛ, adze a no ho hia paa nye dɛ yɛbɔboa afofor. Adze tsitsir a yebotum ayɛ dze aboa afofor nye dɛ yɛdze hɛnho bɛhyɛ asɛnka edwuma no mu.
12. Ebɛn kwan do na dza ɔsomafo Paul yɛe no botum aboa hɛn ma yaadandan ɔkwan a yɛfa do ka asɛmpa no mu ma ɔnye hɛn etsiefo tsebea ehyia?
12 Sɛ yɛwɔ asɛnka mu a, ɔsɛ dɛ yɛdandan kwan a yɛfa do ka asɛm no mu. Siantsir nye dɛ yehyia nkorɔfo a ɔsor hɔn gyedzi, mbrɛ wosi yɛ hɔn adze, nye beebi a wofi. Yebotum esuasua ɔsomafo Paul wɔ hɛn asɛnka edwuma no mu. Nna ɔdandan ne nsɛm mu ma ɔnye hɔn a ɔka asɛmpa no kyerɛ hɔn no tsebea hyia. Jesus yii ɔsomafo Paul dɛ “amanamamfo somafo.” (Rom. 11:13) Ɔkaa asɛmpa no kyerɛɛ Jewfo, Greekfo, hɔn a wonyim nwoma, hɔn a wonnyim nwoma, aban mpanyimfo nye ahemfo. Mbrɛ ɔbɛyɛ a Paul botum aka asɛmpa no ma aka nyimpa ahorow a wɔtse dɛm no hɔn akoma no, ɔyɛɛ noho ‘adze nyina maa nyimpa nyina.’ (1 Cor. 9:19-23) Paul emmbu n’enyi enngu nyimpa a wɔtse dɛm no hɔn amambra, beebi a wofi, nye dza wɔgye dzi do, mbom ɔdandaan kwan a ɔfa do ka asɛm no mu ma ɔnye hɔn tsebea hyiae. Hɛn so, sɛ asɛmpa a yɛka no botum aka nkorɔfo hɔn akoma a, ɔsɛ dɛ yɛhwehwɛ akwan ahorow a yebotum afa do aka ma ɔnye hɔn tsebea ehyia.
KYERƐ OBU MA GYINAE A AFOFOR SI
Sɛ yɛda ntseasee edzi a, yɛbɛkyerɛ obu ama gyinae a afofor si no (Hwɛ nkyekyɛmu 13)
13. Sɛ yɛkyerɛ obu ma gyinae a afofor si a, ebɛn esian na ɔwɔ 1 Corinthfo 8:9 a yebotum atwe hɛnho efi ho?
13 Sɛ yɛwɔ ntseasee a, ɔboa hɛn ma yɛkyerɛ obu ma gyinae a afofor si no. Sɛ yɛbɛyɛ nhwɛdo a, hɛn nuanom mbaa binom enyi gye ho dɛ wɔbɛyɛ makeup, naaso bi a na afofor so enyi nngye ho. Afei so, Christianfo binom enyi gye ho dɛ wɔbɔnom nsa kakra, naaso binom so si gyinae dɛ wɔronnom nsa koraa. Bio so, Christianfo nyina pɛ dɛ wonya apɔwmudzen papa, naaso ɔsor ayarsa a obiara n’enyi gye ho. Dɛm ntsi, sɛ yɛtse nka dɛ ayarsa a yɛpɛ no yɛ papa ma ntsi yɛhyɛ enuanom dɛ wɔmpaw ayarsa a ɔtse dɛm a, yebotum ato enuanom fintsidua na yɛdze mpaapaamu bɛba asafo no mu. Ekyingye biara nnyi ho dɛ yɛrennyɛ dɛm! (Kenkan 1 Corinthfo 8:9; 10:23, 24) Hom mma yensusu nhwɛdo ebien a ɔma yehu dɛ sɛ yɛdze Bible mu afotu yɛ edwuma a obotum aboa hɛn ma yaannyɛ adze ammbor do, na yaama asomdwee atsena asafo no mu.
Sɛ yɛda ntseasee edzi a, yɛbɛkyerɛ obu ama gyinae a afofor si no (Hwɛ nkyekyɛmu 14)
14. Ebɛn Bible mu afotu na ɔsɛ dɛ ɔboa hɛn wɔ hɛn ntarhyɛ na hɛn ahosiesie mu?
14 Ntarhyɛ na ahosiesie. Jehovah mmaa hɛn mbra pɔtsee a ɔfa mbrɛ yensi nsiesie hɛnho ho, mbom ɔama hɛn ho afotu. Ntsi, ɔsɛ dɛ yesiesie hɛnho dɛ mbrɛ ɔfata Nyankopɔn n’asomfo. Sɛ yɛyɛ dɛm a, ɔkyerɛ dɛ yɛwɔ ntseasee, yɛbrɛ hɛnho adze na hɛn ‘enyi da hɔ.’ (1 Tim. 2:9, 10; 1 Pet. 3:3) Dɛm ntsi yennsiesie hɛnho wɔ kwan bi do a ɔtwetwe nkorɔfo adwen ba hɛn do. Bible mu afotu a ɔfa ntarhyɛ na kwan a yɛfa do yɛ hɛn tsir anaa yeyi hɛn tsir no bɔboa asafo mu mpanyimfo amma wɔaannhyehyɛ mbra amma enuanom. Dɛ nhwɛdo no, wɔ asafo bi mu no, nna enuanom mberantsɛ bi twa tsir a wɔaba do no bi. Nna wotwa tsir no ase ma ɔkɔ famu na wogya sor no basaa. Iyi ntsi, nna hɔn asafo mu mpanyimfo pɛ dɛ wɔboa hɔn, naaso nna wobesi dɛn aboa hɔn a wɔrennhyehyɛ mbra mma hɔn? Aber a mpanyimfo no kebisaa hɔn mansin do hwɛfo n’adwenkyerɛ no, ɔhyɛɛ hɔn nkuran dɛ wɔnkɛka nkyerɛ enuanom no dɛ, “Sɛ igyina bamba do rekyerɛkyerɛ, na sɛ enuanom adwen kɔ w’ahosiesie do kyɛn dɛ wobetsie dza ereka no a, ɔkyerɛ dɛ asɛm wɔ w’ahosiesie no ho.” Dɛm asɛm kakra a ɔmansin do hwɛfo no kaa kyerɛɛ mpanyimfo no dzii hɔn haw no ho dwuma a nna no ho nnhia dɛ wɔhyehyɛ mbra biara. d
Sɛ yɛda ntseasee edzi a, yɛbɛkyerɛ obu ama gyinae a afofor si no (Hwɛ nkyekyɛmu 15)
15. Sɛ yerisi gyinae afa hɛn ayarsa ho a, ebɛn Bible mu afotusɛm na ɔbɔboa hɛn? (Romefo 14:5)
15 Ayarsa ho nsɛm. Ɔyɛ Christiannyi biara n’asodzii dɛ osi n’ayarsa ho gyinae. (Gal. 6:5) Bible no ama hɛn mbra pɔtsee bi a ɔsɛ dɛ yɛdze yɛ edwuma. Dɛm mbra no nye bɔgya nye esumansɛm a ɔsɛ dɛ yɛtwe hɛnho fi ho. Iyi ntsi, sɛ Christiannyi bi repaw ayarsa a, ɔsɛ dɛ ɔdze dza Bible no ka fa bɔgya nye esumansɛm ho no yɛ edwuma. (Andw. 15:20; Gal. 5:19, 20) Dza wɔaka nyina yɛ ankorankor gyinaesi. Sɛ enuanom binom yar a, hɔn enyi gye ho dɛ wɔbɔkɔ ayarsabea ma adɔktafo ahwɛ hɔn. Naaso binom dze, wɔfa akwan afofor do sa hɔnho yarba. Bi a yebotum enya adwen dɛ ayarsa pɔtsee bi ye kyɛn dza aka no. Naaso, ɔmmfa ho dza onua bi bɛpa biara no, ɔnnsɛ dɛ yɛkasa tsia no. Iyi kyerɛ dɛ, ɔdze fa ayarsa ho no, ɔsɛ dɛ yɛma nsɛm anan yi tsena hɛn adwen mu: (1) Nyankopɔn n’Ahendzi no nkotsee na obotum ama yeenya apɔwmudzen a ɔyɛ papa, na woeyi yarba nyina efi hɔ. (Isa. 33:24) (2) Sɛ onua bi risi ɔkwan a ɔpɛ dɛ wɔfa do sa no yarba ho gyinae a, ɔsɛ dɛ ɔma ‘n’adwen si no pi’ wɔ dza ɔpɛ paa no ho. (Kenkan Romefo 14:5.) (3) Ɔnnsɛ dɛ yɛkasa tsia afofor hɔn gyinaesi anaa yɛyɛ biribi a ɔbɔto hɔn fintsidua. (Rom. 14:13) (4) Sɛ yɛdɔ hɛn nuanom a, yɛremma dza yɛpɛ anaa dza yɛmmpɛ no nnsɛɛ koryɛ nye asomdwee a ɔwɔ asafo no mu, osiandɛ koryɛ na asomdwee a ɔtse dɛm no som bo paa. (Rom. 14:15, 19, 20) Sɛ yɛma dɛm nsɛm anan yi tsena hɛn adwen mu a, yɛnye hɛn nuanom benya anyɛnkofa a no mu yɛ dzen. Afei so, ɔbɛma asomdwee akɔ do atsena asafo no mu.
Sɛ yɛda ntseasee edzi a, yɛbɛkyerɛ obu ama gyinae a afofor si no (Hwɛ nkyekyɛmu 16)
16. Sɛ asafo mu mpanyimfo nye hɔnho ridzi a, ebɛnadze na wobotum ayɛ dze akyerɛ dɛ wɔwɔ ntseasee? (Hwɛ mfonyin ahorow no so.)
16 Ɔsɛ dɛ asafo mu mpanyimfo yɛ nhwɛdo pa dze kyerɛ dɛ wɔwɔ ntseasee. (1 Tim. 3:2, 3) Dɛ nhwɛdo no, sɛ asafo mu panyin bi enyin kyɛn enuanom mpanyimfo a ɔnye hɔn som no a, ɔnnsɛ dɛ onya adwen dɛ n’adwenkyerɛ na ɔsɛ dɛ wɔgye to mu aber nyina. Ɔsɛ dɛ ɔgye to mu dɛ Jehovah no sunsum no botum aka asafo mu panyin biara ma ɔaaka biribi a ɔbɛma mpanyimfo kuw no etum esi gyinae pa. Afei so, sɛ mpanyimfo si gyinae bi a onntsia Bible mbra biara na dodow no ara gye to mu naaso mpanyimfo no mu bi nye hɔn nnyɛ adwen mpo a, ɔsɛ dɛ wofi hɔn akoma mu gye to mu dze kyerɛ dɛ wɔwɔ ntseasee.
SƐ YƐDA NTSEASEE EDZI A, YEBENYA NHYIRA
17. Christianfo a wɔda ntseasee edzi no, ebɛn nhyira na wonya?
17 Sɛ Christianfo da ntseasee edzi a, wonya do mfaso pii. Ɔboa ma yɛnye hɛn nuanom ntamu yɛ papa na asomdwee so tsena asafo no mu. Afei so, ɔmmfa ho dɛ ɔsor mbrɛ yesi yɛ hɛn adze nye hɛn amambra no, hɛn nyina aka abɔ mu kamakama rosom Jehovah, na iyi ma hɛn enyi gye paa. Dza ɔkyɛn ne nyina no, ɔma hɛn akoma tɔ hɛn yamu osiandɛ yenyim dɛ yerusuasua Jehovah, hɛn Nyankopɔn a ɔwɔ ntseasee no.
NDWOM 90 Hom Nhyɛ Homho Nkuran
a Jehovah na Jesus da ntseasee edzi, na wɔpɛ dɛ yesuasua su a ɔtse dɛm no. Sɛ yɛyɛ nkorɔfo a yɛda ntseasee edzi a, ɔbɛyɛ mberɛw ama hɛn dɛ sɛ hɛn tsebea sesa a, yɛbɛgye ato mu. Tsebea no bi botum ayɛ yarba anaa sikasɛm mu ahokyer. Afei so sɛ yɛda ntseasee edzi a, yɛbɛka nsɛm na yaayɛ ndzɛmba a ɔbɛma asomdwee na koryɛ atsena asafo no mu.
b Hwɛ asɛm a wɔato dzin “Sɛ Ndzɛmba Sesa A, Ebɛnadze Na Ebɛyɛ?” a ɔwɔ Nyan! No. 4 2016 mu no.
c Hwɛ video a wɔato dzin Nsɛm Bi A Wobisaa Onua Dmitriy Mikhaylov. Ɔwɔ Hɛn Asɛnka Nye Christianfo Asetsena—Nhyiamu Dwumadzi Nwoma a ɔbaa March-April 2021 no mu, hwɛ ɔfa a ɔnye “Jehovah Dan Ɔtaa Ma Ɔyɛ Dasedzi” no.
d Sɛ epɛ ntarhyɛ na ahosiesie ho nsɛm pii a, hwɛ Ibotum Enya Enyigye Daa! buukuu no adzesua 52.