HƐN nyina gye to mu dɛ “nda a odzi ekyir” yi mu no, Jehovah rekyerɛ n’asomfo kwan, na ɔrema hɔn dza wohia ama wɔaakɔ do atwe abɛn no. (2 Tim. 3:1) Naaso, ɔyɛ hɛn mu biara n’asodzii dɛ ɔyɛ setsie ma Jehovah. Yebotum dze tsebea a yɛwɔ mu ndɛ no atoto Israelfo dze no ho aber a nna wɔnam sar no do no. Nna ɔsɛ dɛ wɔyɛ biribi ber a wɔatse totorobɛnto bi ne ngyegyee no.

Jehovah maa Moses dze dwetɛ yɛɛ ntotorobɛnto ebien a ɔdze ‘bɛfrɛ mboanofo no aba, na ɔdze bɛma woeetutu nseraban no akɔ.’ (Nka. 10:2) Nna asɔfo no bɛhɛn ntotorobɛnto no wɔ akwan ahorow do dze akyerɛ dza ɔsɛ dɛ ɔman no yɛ. (Nka. 10:3-8) Ndɛ, Nyankopɔn ma no nkorɔfo akwankyerɛ wɔ akwan ahorow pii do. Hom mma yensusu dɛm akwan yi mu ebiasa ho. Yɛdze iyi bɔtoto mbrɛ nna Israelfo no si yɛ hɔn adze ber a wɔatse ntotorobɛnto ne ngyegyee ho. Dɛm akwan ebiasa no nye ber a wɔato nsa afrɛ Nyankopɔn no nkorɔfo dɛ wɔnkɔ nhyiamu akɛse, ber a wɔdze ntsetsee rema asafo mu mpanyimfo, nye ber a akwankyerɛ ahorow a wɔdze ama asafo no, wɔreyɛ nsakyer wɔ mu no.

Sɛ Jehovah pɛ dɛ “mboanofo no nyinara” hyia mu wɔ ehyiadzibuw no ano wɔ boka afamu a, nna wɔma asɔfo no hɛn ntotorobɛnto ebien no nyinara. (Nka. 10:3) Nna ebusuakuw no nyinara akyer nsera wɔ ehyiadzibuw no ho. Nna wɔakyekyɛ hɔn mu nseraban anan anan. Ntsi, sɛ wɔhɛn ntotorobɛnto no wɔ dɛm kwan yi do a, nna ɔman mũ no nyinara tse dɛm ngyegyee soronko yi. Ebusuakuw a hɔn nseraban no bɛn ehyiadzibuw no ano no, nna wobotum edu hɔ wɔ minitsi kakraabi ntamu. Hɔn a nna hɔn nseraban no wɔ ekyir papaapa no, bi a ɔbɛgye mber na mbɔdzembɔ pii ana woeedu hɔ. Naaso, dɛ wɔwɔ ekyir o, dɛ wɔbɛn o, nna Jehovah pɛ dɛ hɔn nyina hyia mu na wotsie ne nkyerɛkyerɛ.

Nyankopɔn no nkorɔfo a yɛwɔ hɔ ndɛ no, yennhyia mu wɔ ehyiadzibuw bi ano, naaso wɔto nsa frɛ hɛn ma yɛkɔ nhyiamu akɛse. Dɛm nhyiamu no bi nye ɔmantɔw ehyiadzi nye ehyiadzi etsitsir bi. Wɔdze akwankyerɛ na nsɛm a no ho hia ma hɛn wɔ dɛm nhyiamu yi ase. Ehyiadzi kor no ara na Jehovah no nkorɔfo a wɔwɔ wiadze mfɛndzanan nyina no nya do mfaso. Ntsi, hɔn a wɔkɔ nhyiamu akɛse a ɔtse dɛm nyina no ka enuayɛkuw kɛse bi a wɔwɔ enyigye ho. Binom twa kwan tsentsen kyɛn afofor. Naaso, hɔn a wɔkɔ nhyiamu akɛse a ɔtse dɛm nyina no hu dɛ, mfaso wɔ do dɛ wɔkɔree.

Hɔn a wɔwɔ mbea a atsew no ho a ɔmmbɛn beebi a wɔyɛ nhyiamu akɛse yi no, ana hɔn so botum enya do mfaso? Osian abaɛfor mfir ntsi, hɔn a wɔtsetse mbea a ɔtse dɛm no nya dwumadzi kor no ara do mfaso, na wɔtse nka mpo dɛ wɔwɔ nhyiamu akɛse a ɔtse dɛm ase. Dɛ nhwɛdo no, Akwankyerɛ Kuw no  n’ananmusinyi bi kɛseraa Bethel a ɔwɔ Benin no. Wɔdze dwumadzi no mu kor faa intanɛt do maa enuanom a wɔwɔ Niger kurow Arlit mu no ma wonyaa do mfaso. Arlit yɛ kurow a wotu famu egudze wɔ mu a ɔwɔ Sahara Anhweatɔw no do. Enuanom mbarimba na mbaa nye hɔn a hɔn enyi gye asɛm no ho a wohyiaa mu no yɛ 21. Ɔwɔ mu dɛ nna wɔwɔ ekyirkyir dze, naaso wɔtsee nka dɛ wɔka nhyiamu kɛse a nna etsiefo hɔn dodow yɛ 44,131 no ho. Onua kor kyerɛɛw dɛ: “Yɛda hom ase papaapa dɛ hom dze dwumadzi no faa intanɛt do maa hɛn. Ɔmaa yehun ɔdɔ kɛse a hom wɔ ma hɛn.”

Sɛ Israel sɔfo hɛn totorobɛnto kor a, nna ɔsɛ dɛ “mbapɔmba no, Israel mpempem mu etsitsir no” hyia mu wɔ ehyiadzibuw no ano. (Nka. 10:4) Nna wobotum etsie nsɛm a Moses dze bɛma hɔn wɔ hɔ no na wɔaagye ntsetsee efi no hɔ. Nna iyi bɔboa hɔn ma woeedzi asodzi a ɔhyehyɛ hɔn nsa no ho dwuma yie wɔ hɔn mbusuakuw mu. Sɛ nna eka dɛm mbapɔmba yi ho a, nkyɛ ennkɛyɛ dza ibotum biara dɛ ebɔkɔ hɔ na eenya asɛm a wɔbɛkã no do mfaso?

Ndɛ, asafo mu mpanyimfo nnyɛ “mbapɔmba.” Afei so, wonndzi Nyankopɔn no nguankuw a wɔhwɛ hɔn do no do abakoma. (1 Pet. 5:1-3) Naaso, wɔyer hɔnho papaapa hwɛ nguankuw no. Dɛm ntsi, sɛ wɔto nsa frɛ hɔn dɛ wɔnkɛgye ntsetsee fofor wɔ beebi tse dɛ Ahendzi Som Skuul a, wɔgye do ntsɛm. Skuul a ɔtse dɛm mu no, asafo mu mpanyimfo sũa mbrɛ wobesi akɔ do ahwɛ asafo no do yie. Osian ntsetsee a ɔtse dɛm a wɔdze ma asafo mu mpanyimfo ntsi, wɔnye hɔn a wɔwɔ asafo no mu nyina twe bɛn Jehovah kɛse. Sɛ eyɛ asafo mu panyin na ennkɔr skuul a ɔtse dɛm bi mpo a, irinya mfaso fi hɔn a wɔakɔ bi no hɔ.

Odu mber ahorow bi mu a, nna Israel asɔfo no hɛn ewubɔ, kyerɛ dɛ, wɔhɛn ntotorobɛnto no ma ngyegyee no kɔ sor ba famu. Iyi yɛ nkaabɔ a ɔkyerɛ dɛ Jehovah pɛ dɛ ɔman mũ no nyina tu. (Nka. 10:5, 6) Sɛ ɔman mũ no nyina rutu a, nna wɔyɛ no esiado esiado, naaso, nna ɔyɛ edwumadzen ankasa. Ɔtɔ da a, nna Israelfo binom mmpɛ dɛ wobotu akɔ beebi fofor. Ebɛnadze ntsi a?

Bi a nna binom susu dɛ akwankyerɛ no taa ba ntaataado. Afei so, nna wosusu dɛ ɔtaa ba ber a wɔnnhwɛ kwan. Kyerɛwnsɛm no ma yehu dɛ ɔtɔfabi a “mununkum no wɔ hɔ araa fi ewimbir kodu anapa.” Ɔtɔfabi so a, odzi ‘nda ebien, bosoom, anaa afrenhyia’ ana woeetu. (Nka. 9:21, 22) Mpɛn dodow ahen ankasa na ɔman mũ no nyina tui? Nkanee tsir 33 kã mbea bɛyɛ 40 a Israelfo no kyeer nsera wɔ hɔ ho asɛm.

Ɔtɔ da a, nna binom tum nya beebi a nwin wɔ kyer nsera. Sɛ wonya beebi a ɔtse dɛm wɔ “sar kɛse a ɔyɛ hu” no do, na wɔkyer nsera wɔ hɔ a, nna hɔn akoma tɔ hɔn yamu. (Deut. 1:19) Ntsi, nna biribi botum asɔ hɔn ahwɛ ma woeenya adwen dɛ, beebi fofor a wobotu akɔ no nnkɛyɛ bea papa ama hɔn.

Sɛ mbusuakuw no hyɛ ase dɛ worutu a, bi a, nna ɔbɛyɛ dzen ama binom dɛ wobenya abotar atweɔn ma eedu hɔn do. Nna ɔman mũ no nyina tse ntotorobɛnto ne ngyegyee a ɔkɔ sor ba famu no, naaso, nna hɔn nyina runntum mmfi edzi ber kor mu. Dɛm ntotorobɛnto ne ngyegyee a ɔkɔ sor ba famu no kyerɛ dɛ, ebusuakuw ebiasa a wɔakyer nsera wɔ boka afamu no, mekyerɛ Judah, Issachar, na Zebulun no, ɔsɛ dɛ wofi edzi. (Nka. 2:3-7; 10:5, 6) Sɛ wofi edzi a, asɔfo no bɛsan ahɛn ntotorobɛnto no ma ne ngyegyee no akɔ sor aba famu dze akyerɛ dɛ, mbusuakuw ebiasa a wɔakyer nsera wɔ anaafo afamu no, ɔsɛ dɛ hɔn so wofi edzi. Nna asɔfo no bɔkɔ do ayɛ dɛm ekesi dɛ ɔman mũ no nyina befi edzi.

Bi a, nna ɔyɛ dzen ma wo dɛ ebɛgye nsakyer ahorow bi a wɔayɛ wɔ asafo no mu no ato mu. Bi a etsee nka dɛ nsakyer a wɔaba a ennhwɛ kwan no dɔɔ sõ dodow. Anaaso bi a nna w’enyi gye nhyehyɛɛ a ɔwɔ hɔ dada no ho, na wo yamu a nkyɛ, wɔannyɛ nsesa biara wɔ mu. Ɔmmfa ho siantsir a nna etse nka dɛm no, bi a ihun dɛ ɔyɛ dzen ma wo dɛ ibenya abotar, na ɔgyee mber kakra ana eregye nsakyer no ato mu. Naaso, sɛ yɛbɔ mbɔdzen dɛ yɛbɛyɛ setsie a, bi a yebohu dɛ nsakyer no ye ma hɛn, na Nyankopɔn rihyira hɛn.

Moses n’aber do no, Jehovah kyerɛɛ mbarimba, mbaa, na mbofra ɔpepem pii kwan wɔ sar no do. Jehovah annhwɛ hɔn amma hɔn akwankyerɛ a, nkyɛ woennya nkwa. Ndɛ, Jehovah rekyerɛ hɛn kwan wɔ wiadze nda a odzi ekyir a ɔyɛ hũ yi mu. Ɔboa hɛn ma yɛtwe bɛn no na ɔma hɛn gyedzi yɛ kɛse! Dɛm ntsi, ɔmbra dɛ hɛn nyina besi hɛn bo dɛ yɛbɛyɛ setsie dɛ mbrɛ Israelfo anokwafo no yɛe ber a wɔtsee ntotorobɛnto ne ngyegyee no!