Dɛm kyerɛwsɛm no kã Christianfo su ahorow akron ho asɛm. Ɔkã dɛ: “Sunsum no aba nye ɔdɔ, dɛw, asomdwee, penkyɛr, ayamuyie, papayɛ, gyedzi, ɔdwe, ahohyɛdo.” Naaso, nnyɛ dɛm su ahorow yi nkotsee na ɔyɛ su pa a Nyankopɔn no sunsum no botum aboa hɛn ma yeenya.

Yesi dɛn hu? Ansaana ɔsomafo Paul rebɛkã sunsum no aba ho asɛm no, ɔkyerɛɛw dɛ: ‘Honam ndwuma no nye yinom: ndwamanyɛ, efifidze, ahoɔdɛw, abosonsɔr, abayisɛm, ɔtan, mansotwe, ahoɔyaw, ebufuw, etutuwpɛ, mpaapaamu, ekuwbɔ, enyitan, asabow, asakasakagor, nye dza ɔtsetse dɛm.’ (Gal. 5:19-21) Ntsi, nkyɛ Paul botum akã ndzɛmba afofor so a ɔka “honam ndwuma” ho. Binom nye dza wɔakã ho asɛm wɔ Colossaefo 3:5 no. Dɛmara so na ber a ɔbobɔɔ su pa akron edzin wiei no, ɔkãa dɛ: “Mbra bi nnyi hɔ tsia yinom.” Ntsi, su pa a sunsum krɔnkrɔn botum aboa hɛn ma yaada no edzi no, Paul annkã ne nyina.

Sɛ yɛdze sunsum no aba toto kan no n’aba a Paul kyerɛwee kɛmaa Ephesus asafo no ho a, yɛbɛtse asɛm yi ase. Paul kyerɛɛw dɛ: “Kan no n’aba wɔ papayɛ nye tsenenee nye nokwar nyina mu.” (Eph. 5:8, 9) Ampa, “papayɛ,” nye tsenenee na nokwar ka “kan no n’aba” ho, naaso, papayɛ san so yɛ “sunsum no aba” ne fã.

Dɛmara so na Paul hyɛɛ Timothy nkuran dɛ ‘ondzi tsenenee, nyamesompa, gyedzi, ɔdɔ, abotar, nye ɔdwe ekyir’​—su pa ahorow esia. (1 Tim. 6:11) Dɛm su ahorow yi mu ebiasa pɛr (gyedzi, ɔdɔ, na ɔdwe) na wɔakã ho asɛm dɛ ɔyɛ “sunsum no aba” ne fã. Naaso, nna ohia so dɛ Timothy da tsenenee, nyamesompa, na abotar edzi. Nna onyim dɛ obehia sunsum krɔnkrɔn no mboa ama ɔaada su ahorow yi edzi.​—Fa toto Colossaefo 3:12 na 2 Peter 1:5-7 ho.

Ntsi, Galatiafo 5:22, 23 no nnkã su ahorow a ɔsɛ dɛ Christianfo da no edzi no nyinara ho asɛm. Nyankopɔn no sunsum no botum aboa hɛn ma yeenya su akron a wɔakã ho asɛm dɛ ɔyɛ “sunsum no aba” no. Naaso, su ahorow pii wɔ hɔ a ɔsɛ dɛ yɛda no edzi ama yaabɛyɛ Christianfo a hɛnho akokwaa, na ‘yaahyɛ nyimpa fofor no a wɔabɔ no wɔ Nyankopɔn ne pɛ do wɔ tsenenee nye ahotsew mu no.’​—Eph. 4:24.