1. Ebɛnadze na Jehovah ayɛ ama hɛn mu biara?

JEHOVAH na ɔatwe hɛn mu biara aba ne nkyɛn. (John 6:44) Dwen asɛm yi ho hwɛ. Jehovah tɔɔ no bo adze hwehwɛɛ nyimpa ɔpepepem pii a wɔwɔ wiadze yi mu no, ɔwo na ɔtwee wo, osiandɛ ohun dɛ ewɔ akoma pa a ibotum dze asom no. Iyi ma esom bo ma no. (1 Mber. 28:9) Jehovah nyim wo, ɔtse wo ase, na ɔdɔ wo so. Ana iyi mma innya akomatɔyamu?

2. Ebɛn ntotoho na Jesus yɛe dze kyerɛɛ dɛ Jehovah dwen no nguan no mu biara ho?

² Jehovah dwen woho papaapa, na dɛmara na ɔdwen wo nuanom Christianfo no so ho. Dza ɔbɔboa hɛn ma yaatse asɛm no ase no, Jesus dze Jehovah totoo oguanhwɛfo ho. Sɛ oguanhwɛfo bi wɔ nguan ɔha na sɛ kor yew a, ebɛnadze na ɔbɛyɛ? ‘Obegya eduokron akron no hɔ, na ɔaakɔ nkokwaa do akɔhwehwɛ dza ɔatɔ gon no.’ Sɛ oguanhwɛfo no hu oguan no a, ɔrommbor no dɛ ɔyewee. Mbom obedzi ehurusi. Esuadze a ɔwɔ mu nye dɛn? Nguan no mu biara no ho hia Jehovah. Jesus kãa dɛ: “Ɔnnyɛ hom Egya a ɔwɔ sor ne pɛ dɛ mbofra nkakraba yi mu baako bɛyew.”​—Matt. 18:12-14.

3. Ebɛnadze na yebosusu ho wɔ adzesua yi mu?

³ Ɔda edzi pefee dɛ yɛmmpɛ dɛ yɛbɛyɛ biribiara dze ebu hɛn nuanom hɔn abaw mu da. Ebɛnadze na yɛbɛyɛ amma yaannto hɛn nuanom fintsidua? Na sɛ obi yɛ biribi ma ɔhaw hɛn a, ebɛnadze na yebotum ayɛ? Yebenya dɛm nsɛmbisa yi ho mbuae wɔ adzesua yi mu. Naaso odzi kan no, woananom  na Matthew tsir 18 kã hɔnho asɛm dɛ “mbofra nkakraba” no? Hom mma yɛnhwɛ hɔnho nsɛm kakra.

4. Woananom nye “mbofra nkakraba yi”?

⁴ “Mbofra nkakraba yi” yɛ Jesus n’esuafo; mpanyin na mbofra nyinara. Ɔmmfa ho mfe a woedzi no, wɔtse dɛ “mbofraba” wɔ kwan bi do, osiandɛ wɔwɔ ɔpɛ dɛ wɔbɛgye nkyerɛkyerɛ efi Jesus hɔ. (Matt. 18:3) Ɔwɔ mu obotum aba dɛ ɔsor beebi a obiara fi, hɔn amambra, mbrɛ wosi dwen nsɛm ho, nye mbrɛ wosi yɛ hɔn adze, naaso hɔn nyinara wɔ Christ no mu gyedzi. Na Christ so dɔ hɔn papaapa.​—Matt. 18:6; John 1:12.

5. Sɛ obi to Jehovah n’asomfo no mu kor fintsidua anaa ɔyɛ biribi dze haw no a, ɔtse nka dɛn?

⁵ “Mbofra nkakraba yi” nyina som bo ma Jehovah. Dza ɔbɛma yɛatse mbrɛ Jehovah si tse nka ma hɔn no ase no, hom mma yɛnhwɛ mbrɛ yɛyɛ hɛn adze wɔ mbofra ho. Wɔsom bo ma hɛn. Na yɛpɛ dɛ yɛbɔ hɔnho ban osiandɛ wonnyi ahoɔdzen, suahu, nye nyansa dɛ mpanyimfo. Mbrɛ ɔtse nye dɛ sɛ obi yɛ biribi dze haw obi a, ɔyɛ hɛn yaw, na sɛ nyia wɔyɛɛ adze no tsiaa no no yɛ abofra a, ɔyɛ hɛn yaw dodoodow ma mpo hɛn bo fuw. Dɛmara na Jehovah so pɛ dɛ ɔbɔ hɛnho ban. Dɛm ntsi sɛ obi to n’asomfo no mu kor fintsidua anaa ɔyɛ biribi dze haw no a, ɔyɛ no yaw dodoodow ma mpo no bo fuw!​—Isa. 63:9; Mark 9:42.

6. Dɛ mbrɛ 1 Corinthfo 1:26-29 kyerɛ no, wiadze no bu Jesus n’esuafo dɛn?

⁶ Ebɛn kwan fofor do na Jesus n’esuafo no tse dɛ “mbofra nkakraba”? Yembisa dɛ, woananom na wiadze no bu hɔn dɛ hɔnho hia? Ɔyɛ hɔn a wɔwɔ sika, wɔagye dzin, na wɔwɔ tum no a. Dza ɔnye iyi bɔ ebira no, wiadze no bu Jesus n’esuafo a wɔyɛ “mbofra nkakraba” no dɛ hɔnho nnhia na mfaso biara nnyi hɔn do. (Kenkan 1 Corinthfo 1:26-29.) Naaso Jehovah dze ommbu hɔn dɛm.

7. Ebɛn kwan do na Jehovah pɛ dɛ yɛnye hɛn nuanom dzi?

⁷ Jehovah dɔ hɛn a yɛyɛ n’asomfo no nyinara, dɛ yɛbaa nokwar no mu akyɛr anaa yɛbaa mu nnkyɛree no. Hɛn nuanom nyinara ho hia Jehovah, na dɛmara na ɔsɛ dɛ hɔnho hia hɛn so. Yɛpɛ dɛ ‘yɛdɔ enuanom nyina’ na nnyɛ dɛ yɛbɔdɔ binom na yeegya bi. (1 Pet. 2:17) Ɔsɛ dɛ yenya ɔpɛ dɛ yɛbɛyɛ dza yebotum biara dɛ yɛbɔbɔ hɔnho ban na yaada no edzi dɛ yɛdwen hɔnho. Sɛ yehu dɛ yɛayɛ biribi ma ahaw onua bi a, ɔnnsɛ dɛ yebu hɛn enyi gu do na yenya adwen dɛ onua no ma asɛm haw no dodow na ɔsɛ dɛ ogyaa mu ma ɔka. Ebɛnadze ntsi na binom ma asɛm haw hɔn? Osian beebi a enuanom binom fi ntsi wobu hɔnho tootooba. Enuanom binom so baa nokwar no mu nnkyɛree ntsi wonnyim mbrɛ wobesi ebu hɔn enyi egu afofor hɔn sintɔ do. Ɔmmfa ho dza yɛakã ho asɛm yi mu biara no, ɔsɛ dɛ yesiesie asɛm biara a obesi yɛnye enuanom ntamu no. Ɔno da nkyɛn a, ɔsɛ dɛ obi a ɔma asɛm taa haw no no hu dɛ ɔnnyɛ suban pa, na ɔsɛ dɛ ɔyɛ ho biribi. Ɔsɛ dɛ ɔyɛ dɛm mbrɛ ɔbɛyɛ a n’asomu bɔdwe no na ɔnye no nuanom eenya ebusuabɔ pa.

8. Nna ebɛn suban na nyimpa pii da no edzi a onyaa Jesus n’esuafo no do nkantando?

⁸ Ebɛnadze na ɔmaa Jesus kãa “mbofra nkakraba yi” ho asɛm no? Nna n’esuafo no ebisa no asɛm bi dɛ: “Woana na ɔyɛ kɛse wɔ sor Ahenman no mu?” (Matt. 18:1) Nna Jewfo pii a wɔwɔ hɔ dɛm aber no pɛ dɛ afofor hu dɛ hɔnho hia papaapa. Ɔbemfo bi kãa dɛ: “Osian enyimnyam, enyidzi, dzin, obu nye enyimpa a nna nyimpa binom rohwehwɛ ntsi wɔdze hɔn nkwa twaa do.”

9. Nna ebɛnadze na ɔsɛ dɛ Jesus n’esuafo no yɛ?

 ⁹ Nna Jesus nyim dɛ ɔsɛ dɛ n’esuafo no yer hɔnho dɛ wobotutu akansi sunsum a osian Jewfo amambra ntsi agye ndwow wɔ hɔn akoma mu no egu. Jesus kãa kyerɛɛ hɔn dɛ: “Nyia ɔyɛ hom mu kɛse, wɔmma ɔnyɛ dɛ ekumaba, na nyia ɔyɛ otsitsir no, ɔnyɛ dɛ nyia ɔsom.” (Luke 22:26) Sɛ yɛda no edzi dɛ yɛyɛ “ekumaba” a, ‘yebobu hɛn nyɛnko akyɛn hɛnankasa hɛnho.’ (Phil. 2:3) Sɛ yɛyer hɛnho da suban a ɔtse dɛm edzi a, bi a yɛronnto afofor fintsidua.

10. Ebɛn afotu na Paul dze mae a ɔsɛ dɛ yɛdze yɛ edwuma?

¹⁰ Hɛn nuanom no mu biara kyɛn hɛn wɔ kwan bi do. Sɛ yɛdze hɛn adwen si suban pa a wɔwɔ no do a, ɔrennyɛ dzen dɛ yebohu dɛ asɛm yi yɛ nokwar. Ɔsɛ dɛ yɛdze afotu a ɔsomafo Paul dze maa Corinthfo no yɛ edwuma. Ɔkãa dɛ: “Woana na ɔyɛ wo dɛ ɔsor wo nko? Na ebɛnadze na ewɔ a wɔammfa amma wo? Na sɛ inyae a, ɔyɛ dɛn na ehyehyɛ woho dɛ gyama ennya?” (1 Cor. 4:7) Ɔwɔ dɛ yɛyɛ ahwɛyie wɔ biribiara a ɔbɛma yɛatwe adwen aba hɛnho do anaa ɔbɛma yeenya adwen dɛ yɛkyɛn afofor no ho. Dɛ nhwɛdo no, sɛ onua bi tum ma ɔkasa ma otu mpon anaa sɛ ɔyɛ mberɛw ma akyerɛbaa bi dɛ ɔbɛyɛ Bible adzesua a, ɔwɔ dɛ ɔkaa dɛ ɔdze ho nkamfo no bɛma Jehovah.

11. Ebɛn esuadze na yenya fi ɔhen bi nye n’akowaa ho mfatoho a Jesus yɛe no mu?

¹¹ Aber a Jesus bɔɔ n’ekyirdzifo no kɔkɔ dɛ mma wɔnnto afofor fintsidua wiei no, ɔyɛɛ mfatoho bi faa ɔhen bi nye n’akowaa ho. Ɔhen no dze kaw kɛse bi a nna n’akowaa no nnkotum etua da no kyɛɛ no. Ekyir yi dɛm akowaa no hun ne nyɛnko akowaa bi a ɔdze no kaw kakraabi na ɔammpen do dɛ ɔdze bɛkyɛ no. Owiee ase no, ɔhen no dze akowaa tsirmɔdzennyi no too efiadze. Esuadze no nye dɛn? Jesus kãa dɛ: “Dɛmara na mo sor Egya bɛyɛ ama hom, sɛ hom emmfi hom akoma mu ammfa obiara no nua no bɔn emmfir no a.”​—Matt. 18:21-35.

12. Sɛ obi fom hɛn na yaammfa annkyɛ no a, ebɛnadze na obotum efi mu aba?

¹² Dza akowaa no yɛe no annhaw nankotsee, mbom ɔhaaw afofor so. Odzi kan, akowaa no dze etsirmɔdzen yɛɛ adze ma ɔhaaw ne nyɛnko akowaa no. Ɔdze no ‘kɔtoo efiadze kesi dɛ obotua dza ɔdze no no.’ Otsĩa ebien, ɔhaaw nkowaa nkaa no a wohun dza ɔyɛe no. Aber a “no wurankowaa no hun dza esi no, ɔyɛɛ hɔn yaw.” Dɛmara na hɛn so hɛn ndzeyɛɛ ka afofor. Sɛ obi fom hɛn na yaammfa annkyɛ no a, ebɛnadze na obotum efi mu aba? Odzi kan, sɛ yɛammfa no mfom annkyɛ no, yɛannkasa noho anaa yaannda ɔdɔ edzi annkyerɛ no a, yɛbɛhaw no. Otsĩa ebien, sɛ enuanom a wɔwɔ asafo no mu no hu dɛ yɛnye onua no ntamu nnyɛ papa a, wɔbɛyɛ basaa.

13. Ebɛnadze na isũa fi akyerɛbaa kwampaaefo bi n’asɛm no mu?

¹³ Sɛ yɛdze hɛn nuanom hɔn mfom kyɛ hɔn a, ɔboa hɛnankasa na ɔboa afofor so. Dɛm na osii wɔ ɔkwampaaefo bi a wɔfrɛ no Crystal * n’afamu. Akyerɛbaa bi a ɔnye no wɔ asafo mu yɛɛ adze ma ɔyɛɛ no yaw. Crystal kãa dɛ: “Nna otum kã nsɛm ma ɔyɛ me yaw tse dɛ mbrɛ wɔdze sekan awɔ me. Nna memmpɛ mpo dɛ menye no bɔkɔ asɛnka. Iyi maa nsi na enyigye a medze yɛ asɛnka edwuma no kɔr famu.” Nna Crystal tse nka dɛ sɛ no bo fuw a, ɔyɛ no kwan do. Naaso ɔammfa akyerɛbaa no ho ebufuw annhyɛ no mu na ɔammfa n’adwen ennsi mbrɛ osi tse nka no  do. Ofi ahobrɛadze mu dze Bible mu afotu a ɔwɔ asɛm a wɔato dzin “Fi W’akoma Mu Fa Kyɛ” a ɔwɔ October 15, 1999 Ɔweɔn-Aban mu no yɛɛ edwuma. Ɔdze akyerɛbaa no no mfom kyɛɛ no. Crystal toaa do dɛ: “Seseiara, mehu dɛ hɛn nyinara yɛrobɔ mbɔdzen dɛ yɛbɛhyɛ nyimpa su fofor no, na Jehovah so fi ne pɛ mu dze kyɛ hɛn da biara. Metse nka dɛ adzesoa kɛse bi efi mo do. Masan enya enyigye.”

14. Dɛ mbrɛ Matthew 18:21, 22 kyerɛ no, obotum aba dɛ nna ɔsomafo Peter ne haw nye dɛn? Ebɛnadze na isũa fi mbuae a Jesus dze maa no no mu?

¹⁴ Yenyim dɛ ɔsɛ dɛ yɛdze afofor hɔn mfom kyɛ hɔn; ɔno nye adze a ohia dɛ yɛyɛ. Naaso bi a ɔbɛyɛ dzen ama hɛn dɛ yɛbɛyɛ dɛm. Obotum aba dɛ ɔtɔ da a nna ɔsomafo Peter tse nka dɛm. (Kenkan Matthew 18:21, 22.) Ebɛnadze na obotum aboa hɛn? Odzi kan, dwendwen mpɛn dodow a Jehovah dze wo mfom akyɛ wo no ho. (Matt. 18:32, 33) Yɛmmfata dɛ ɔdze hɛn bɔn bɛkyɛ hɛn naaso ɔdze kyɛ hɛn kwa. (Ndw. 103:8-10) Afei so ‘ɔsɛ dɛ hɛn so yɛdodɔ hɛnho.’ Dɛm ntsi nnyɛ dɛ epɛ a na edze bɔn bɛkyɛ. Bɔnfakyɛ tse dɛ kaw bi a yɛdze hɛn nuanom a ɔwɔ dɛ yetua ma hɔn. (1 John 4:11) Otsĩa ebien, dwendwen dza obefi hɛn nuanom hɔn mfom a yɛdze bɛkyɛ hɔn no mu aba no ho. Yɛbɔboa nyia ɔafom hɛn no, yɛbɛma koryɛ atsena asafo no mu, yɛbɔbɔ ebusuabɔ a yɛnye Jehovah wɔ no ho ban na yɛbɛtse nka dɛ adzesoa kɛse bi efi hɛn do. (2 Cor. 2:7; Col. 3:14) Afei bɔ Nyia ɔkã kyerɛ hɛn dɛ yɛmfa bɔn nkyɛ no mpaa. Mma mma kwan ma Satan nnsɛɛ asomdwee a ɔwɔ enye wo nuanom ntamu no. (Eph. 4:26, 27) Yehia Jehovah no mboa ama yeetum ayɛ dɛm.

15. Dɛ mbrɛ Colossaefo 3:13 kyerɛ no, sɛ onua bi yɛ biribi ma ɔhaw hɛn a, ebɛnadze na ɔsɛ dɛ yɛyɛ?

¹⁵ Sɛ wo nua Christiannyi bi ayɛ adze ma ahaw wo papaapa so ɛ? Ebɛnadze na ɔsɛ dɛ eyɛ? Yɛ dza ibotum biara dɛ ebɛma asomdwee atsena hom ntamu. Kã ho asɛm kyerɛ  Jehovah wɔ mpaabɔ mu. Serɛ no dɛ onhyira nyimpa a ɔafom wo no, na ɔmboa wo ma hu suban pa a ɔwɔ no; suban a ɔno Jehovah n’enyi gye ho wɔ nyimpa no ho no. (Luke 6:28) Sɛ irunntum mmbu w’enyi nngu mfom no do a, hwehwɛ kwan fofor a ibotum nye no akã ho asɛm. Ɔnnsɛ dɛ inya adwen dɛ wo nua no hyɛɛ da ara dɛ ɔreyɛ biribi etsia wo. (Matt. 5:23, 24; 1 Cor. 13:7) Sɛ enye no rekasa a, bu no dɛ ɔwɔ adwen pa. Na sɛ ɔmmpɛ dɛ ɔnye wo siesie asɛm no so ɛ? Mma mmpa abaw wɔ wo nua no ho; kɔ do ara fa no mfom kyɛ no. (Kenkan Colossaefo 3:13.) Dza ohia papaapa no, mma mmfa no ho ebufuw nnhyɛ wo mu, annyɛ dɛm a obotum asɛɛ ebusuabɔ a enye Jehovah wɔ no. Mma mma biribiara nnto wo fintsidua. Sɛ eyɛ dɛm a, eda no edzi dɛ edɔ Jehovah kyɛn biribi fofor biara.​—Ndw. 119:165.

16. Ebɛnadze na ɔsɛ dɛ hɛn mu biara yɛ?

¹⁶ Yebu ho kwan a yɛwɔ dɛ yɛsom Jehovah dɛ “okuw kor” wɔ “oguanhwɛfo kor” n’ase no dɛ ɔsom bo! (John 10:16) Nhyehyɛe a Wɔayɛ Ma Yɛde Ayɛ Yehowa Apɛde nwoma no ne krataafa 165 kã dɛ: “Seseiara irinya dɛm koryɛ no do mfaso, ntsi ɔsɛ dɛ wo so boa ma ɔtsena hɔ.” Dɛm ntsi “ɔsɛ dɛ yebu hɛn nuanom Christianfo mbarimba na mbaa dɛ mbrɛ Jehovah bu hɔn no.” Wɔ Jehovah n’enyi do no, hɛn nyinara yɛyɛ “mbofra nkakraba” a yɛsom bo ma no. Ana dɛmara na wara so ihu wo nuanom a enye hɔn som no? Biribiara a ebɛyɛ dze aboa hɔn anaa ebɛyɛ dze akyerɛ dɛ edwen hɔnho no, Jehovah hu na n’enyi sɔ.​—Matt. 10:42.

17. Ebɛnadze na yeesi hɛn bo dɛ yɛbɛyɛ?

¹⁷ Yɛdɔ hɛn nuanom a yɛnye hɔn som no papaapa. Dɛm ntsi yeesi hɛn bo dɛ ‘yɛnnkɛfa fintsidua anaa abew biara ato hɛn nua n’akwan mu.’ (Rom. 14:13) Ɔsɛ dɛ yebu hɛn nuanom dɛ wɔkyɛn hɛn, na yenya ɔpɛ dɛ yebefi hɛn akoma mu dze hɔn mfom akyɛ hɔn. Ɔnnsɛ dɛ yɛma kwan ma hɔn ndzeyɛɛ to hɛn fintsidua da. Mbom no hom mma “yentsiw dza ɔyɛ asomdwee, nye dza yɛdze bɔtotow hɛnho do nkorkor.”​—Rom. 14:19.