Paul kyerɛɛw dɛ: “Ɔnam mbra do muwui maa mbra, ma maatsena ase mama Nyankopɔn.”​—Gal. 2:19.

Asɛm a Paul kãe yi, nna ɔyɛ asɛntsitsir bi a ɔrema asafo ahorow a ɔwɔ Galatia wɔ Rome no atse ase. Nna Christianfo a wɔwɔ hɔ no mu binom ama akyerɛkyerɛfo atorfo enya hɔn do nkantando. Nna dɛm akyerɛkyerɛfo no kã dɛ, sɛ obi enndzi Moses Mbra no do, nkanka dza ɔfa twatsiatwa ho no a, orinnya nkwa. Naaso Paul dze, nna onyim dɛ Nyankopɔn nnhwɛ kwan dɛ n’asomfo bɔkɔ do ara etwa twatsia. Ɔnye enuanom no susuu asɛm no ho kɔr ekyir na ɔdaa no edzi dɛ nkyerɛkyerɛ a ɔtse dɛm no yɛ ator. Afei ɔhyɛɛ gyedzi a nna wɔwɔ wɔ Jesus Christ no werdam afɔrbɔ no mu no dzen.​—Gal. 2:4; 5:2.

Bible no kã no pen dɛ sɛ nyimpa wu a, onnyim biribiara, na dza ɔkɔ do wɔ asaase do biara so nnka no. (Ɔsɛnk. 9:5) Ber a Paul kãa dɛ: “Muwui maa mbra” no, nna ɔrepɛ akyerɛ dɛ Moses Mbra no nnyi no do tum bio. Mbom, nna ɔwɔ ahotodo dɛ osian gyedzi a ɔwɔ wɔ werdam afɔrbɔ no mu ntsi ‘ɔtse ase ma Nyankopɔn.’

“Mbra no” na ɔmaa Paul ne tsebea sesae. Ebɛn kwan do? Ɔkyerɛkyerɛɛ mu dɛ “wɔnnam mbra ndwuma do na wobu nyimpa bem, na mbom ɔnam Jesus Christ [mu] gyedzi [do].” (Gal. 2:16) Nokwasɛm nye dɛ, Mbra no dzii dwuma tsitsir bi. Paul kyerɛkyerɛɛ mu kyerɛɛ Galatiafo no dɛ: “Mbrato ntsi na wɔdze kaa ho dze kesii dɛ asenyi no a wɔdze anohoba no bɔɔ no no bɛba.” (Gal. 3:19) Asɛm no nye dɛ, Mbra no maa ɔdaa edzi pefee dɛ nyimpa a wonndzi mũ no nnkotum edzi Mbra no do pɛpɛɛpɛr. Afei nna wohia afɔr kortsee a odzi mũ. Dɛm ntsi Mbra no boaa nkorɔfo ma wohun “asenyi no,” kyerɛ, Christ no. Sɛ obi kyerɛ gyedzi wɔ Jesus Christ mu a, Nyankopɔn botum ebu dɛm nyimpa no dɛ ɔtseneneenyi. (Gal. 3:24) Paul baa tsebea a ɔtse dɛm mu osiandɛ nna ɔnam Mbra no do abɛgye Jesus ato mu na oenya no mu gyedzi. Ofi dɛm aber no, Paul ‘wui maa mbra na ɔtsenaa ase maa Nyankopɔn.’ Nna Nyankopɔn na ɔwɔ no do tum na nnyɛ Mbra no.

Paul kãa asɛm a ɔtse dɛmara wɔ krataa a ɔkyerɛwee kɛmaa Romefo no mu. Ɔkãa dɛ: “Enuanom, hom so wɔnam Christ nyimpadua do eku hom ama mbra no . . . Yeewu ama dza nkyɛ ɔdze hɛn mu no ntsi, wɔasan hɛn efi mbra no ho.” (Rom. 7:4, 6) Dɛm kyerɛwsɛm yi nye dza ɔwɔ Galatiafo 2:19 no da no edzi dɛ nna Paul rennkã dɛ oruwu dɛ ɔdzebɔnyɛnyi a wɔnam Mbra no do ebu no kumfɔ. Mbom nna ɔrekã no pefee dɛ ɔadze noho. Nna Mbra no nnkyekyer Paul nye nyimpa afofor a wɔtse dɛ ɔno no bio. Nna wɔnam Christ no werdam no mu gyedzi do enya fahodzi.