BIBLE no ka dɛ aber a wokum Jesus wɔ dua do no, nna ndzebɔnyɛfo beenu ka noho. Nna baako wɔ ne nyimfa na kor so wɔ ne bankum. Nyimpa piinara nyim dɛm asɛm yi. (Matt. 27:35-38) Naaso nyimpa binom nngye asɛm a Bible no ka dɛ aber a Jesus wui no, wɔfaa no fun no, wosiesiei na wokesiee no wɔ ɔbodan mu no nndzi.​—Mark 15:42-46.

Binom a wɔnngye Nsɛmpa no nndzi ka dɛ, orunntum mmba dɛ obi a wokum no no, wɔbɛpen ma woeesie no wɔ kwan a enyidzi wɔ mu do, tse dɛ wobesie no wɔ ɔbodan mu. Mbom wɔkyerɛ dɛ, obotum aba dɛ ndzebɔnyɛfo a nna woku hɔn no, wonnsie hɔn tse dɛ mbrɛ wosie nyimpa afofor no. Nsɛnkyerɛwnyi bi a wɔfrɛ no Ariel Sabar kaa siantsir a binom wɔ dɛm adwen no ho asɛm wɔ Smithsonian magazine mu dɛ: “Nna hɔn a wɔyɛ nyimpa bɔn paa no na woku hɔn wɔ dua do. Ntsi abemfo bi ka dɛ sɛ obi susu dɛ nna Romefo no bɛma kwan ma woesie hɔn a wɔtse dɛm no wɔ enyidzi kwan do a, ɔnntɔ asomu.” Sɛ nna wobu ɔdzebɔnyɛfo bi kumfɔ a, nna Romefo no pɛ dɛ wogu n’enyim ase pɔtɔɔ. Dɛm ntsi, mpɛn pii no, nna wogyaa nyimpa a wɔtse dɛm no hɔn fun wɔ ndua no do ma mbowa bedzi hɔn nam. Ɔno ekyir no, bi a wɔbɔkɔ akɔtow dza mbowa edzi ma wɔaka no egu amona kor bi mu.

Naaso, hɔn a wotutu famu hwehwɛ tsetse ndzɛmba mu ehu biribi fofor. Dza woehu no fa Jewfo binom a wokum hɔn no ho. Afe 1968 mu no, wokohun ɔbarimba bi ne mbiew. Wokum dɛm ɔbarimba no wɔ mfeha a odzi kan no mu. Wokohun mbiew no wɔ Jewfo ebusua bi hɔn ɔbodan mu wɔ beebi a ɔbɛn Jerusalem. Nna mbiew no wɔ adakaba bi mu. Nna mbiew no mu kor yɛ nantsir biew. Hɔn a wotutu famu no hun dɛ prɛgow a ne tsentsen yɛ sɛntsimita 11.5 (inches 4.5) na wɔdze bɔɔ ne nan dua mu. Sabar kaa dɛ: “Nna nantsir biew no yɛ ɔbarimba bi a wɔfrɛ no Yehochanan dze. Na ɔboaa hɛn ma yenyaa biribi a ɔkyerɛ dɛ dza Nsɛmpa no ka fa Jesus ho dɛ wosiee no wɔ ɔbodan mu no botum ayɛ nokwar.” Ɔda edzi dɛ, “Yehochanan ne nantsir biew no yɛ adanse a ɔkyerɛ dɛ, wɔ Jesus n’aber do no sɛ nna wɔbɔ obi dua mu a, Romefo no tum ma Jewfo no kwan ma wosie no.”

Sɛ nkorɔfo hwɛ Yehochanan ne nantsir biew no a, ɔmma hɔn adwen nnhyia wɔ kwan a wɔfaa do sɛɛn Jesus wɔ dua do no ho. Naaso, dza wɔnngye ho kyim nye dɛ, ndzebɔnyɛfo a wokunkum hɔn no, binom wɔ hɔ a wosiee hɔn na wɔammfa hɔn annkɔto amona bi a wosie nyimpa pii wɔ mu no mu. Ɔda edzi kofee dɛ, asɛm a Bible no ka dɛ wosiee Jesus wɔ ɔbodan papabi mu no yɛ nokwar. Adanse a ɔwɔ hɔ foa dza Bible ka no do.

Dza ɔkyɛn ne nyinara no, nna Jehovah aka ato hɔ dɛ wobesie Jesus wɔ sikanyi bi ne nda mu. Na obiara nnyi hɔ a obotum ayɛ biribi dze esiw asɛm a Nyankopɔn aka no kwan dɛ ɔbɛba mu.​—Isa. 53:9; 55:11.