1. Dɛ mbrɛ 1 Peter 5:2 ka no, ebɛn edwuma na ɔhyɛ asafo mu mpanyimfo nsa?

 JEHOVAH dze no nguan a wɔsom bo ma no no ahyɛ asafo mu mpanyimfo nsa dɛ wɔnhwɛ hɔn do. Dɛm mbarimba yi fi hɔn akoma mu yɛ edwuma na hɔn enyi sɔ hokwan a Jehovah dze ama hɔn dɛ wɔmboa hɔn nuanom Christianfo no. Afei so, wɔyer hɔnho dɛ wɔbɛyɛ ‘nguanhwɛfo a wɔnyɛn’ Nyankopɔn no nguan no yie. (Jer. 23:4; kenkan 1 Peter 5:2.) Ɔyɛ hɛn dɛw paa dɛ yɛwɔ mbarimba a wɔtse dɛm wɔ asafo no mu!

2. Ebɛn ɔhaw na asafo mu mpanyimfo binom botum ehyia?

² Sɛ asafo mu mpanyimfo reyɛ edwuma a ɔhyɛ hɔn nsa no a, ɔyɛ a wohyia ɔhaw pii. Adze kor nye dɛ, dwuma a mpanyimfo no dzi wɔ asafo no mu no nnda famu koraa. Tony yɛ asafo mu panyin bi a ɔwɔ United States. Nna ɔyɛ obi a ɔgye edwuma pii gu no do, naaso ekyir yi obohun dɛ, ɔsɛ dɛ ɔgye to mu dɛ ɔnnyɛ biribiara na obotum ayɛ. Ɔkaa dɛ: “Aber a COVID-19 bae no, megyee edwuma pii guu mo do. Mereyɛ asafo nhyiamu ho nhyehyɛɛ no, nna mereyɛ asɛnka so ho ntotoe. Naaso nna edwuma no dɔɔ so araa ma ntsi meyɛ a munnwie da. Owiee ase no, nna minnya ber nnkenkan Bible no, minnya ber nnsua adze na meenya ber abɔ mpaa mpo.” Asafo mu panyin bi so a ɔwɔ Kosovo a wɔfrɛ no Ilir so hyiaa ɔhaw fofor bi. Aber a ɔkɔr beebi a akodzi rokɔ do no, nna ɔyɛ dzen ma no dɛ obedzi akwankyerɛ a asafo no dze ama no ekyir. Ɔkaa dɛ: “Aber a Bethel kaa kyerɛɛ me dɛ monkɔboa enuanom a wɔwɔ beebi a akodzi no mu ayɛ dzen paa no, nna mibehia akokodur paa. Nna musuro, na metsee nka dɛ akwankyerɛ a Bethel dze ama me dɛ memfa nkɔboa enuanom no rennyɛ edwuma.” Nna ɔyɛ dzen ma asɛmpatserɛwnyi bi a wɔfrɛ no Tim a ɔwɔ Asia no dɛ ɔbɛyɛ ndzɛmba a ɔsɛ dɛ odzi ho dwuma da biara no. Ɔkaa dɛ: “Ɔtɔ da a nna metse nka dɛ maberɛ paa, ntsi nna ɔyɛ dzen ma me dɛ mobɔboa enuanom no.” Asafo mu mpanyimfo a worihyia ɔhaw a ɔtsetse dɛm no, ebɛnadze na obotum aboa hɔn?

3. Sɛ yesusu dza Ɔtsɛmbuafo Gideon yɛe no ho a, ɔbɔboa hɛn dɛn?

 ³ Asafo mu mpanyimfo botum esuasua dza Ɔtsɛmbuafo Gideon yɛe no. (Heb. 6:12; 11:32) Ɔgyee Nyankopɔn no nkorɔfo fii hɔn atamfo nsamu na ɔboaa hɔn so. (Atsɛ. 2:16; 1 Mber. 17:6) Tse dɛ Gideon no, Jehovah eyi asafo mu mpanyimfo dɛ wɔnhwɛ n’asomfo do wɔ mber a no mu yɛ dzen paa yi mu. (Andw. 20:28; 2 Tim. 3:1) Hɛn nyina botum esuasua Gideon. Nna ɔbrɛ noho adze, ɔgye to mu dɛ nnyɛ biribiara na obotum ayɛ, na otsie Jehovah so. Nna ɔwɔ dɛ omia n’enyi paa ansaana oetum ayɛ edwuma a wɔdze ahyɛ ne nsa no. Hɛn nyina botum akyerɛ dza mpanyimfo yɛ no ho enyisɔ. Yebotum ayɛ hɛn afamudze biara dze aboa hɛn nuanom yi a wɔyɛ edwumadzen wɔ asafo no mu no.​—Heb. 13:17.

4. Ebɛnadze na Gideon yɛe dze kyerɛɛ dɛ ɔbrɛ noho adze na ɔgye to mu dɛ nnyɛ biribiara na obotum ayɛ?

⁴ Nna Gideon yɛ obi a ɔbrɛ noho adze na ɔgye to mu dɛ nnyɛ biribiara na obotum ayɛ. b Jehovah no bɔfoe bi kaa kyerɛɛ Gideon dɛ, Jehovah eyi no dɛ ɔnkɛgye Israelfo no mfi Midianfo a hɔnho yɛ dzen no nsamu. Naaso, Gideon fii ahobrɛadze mu kaa dɛ: “M’ebusua na ɔyɛ mbɔbɔr dodow wɔ Manasseh mu, na emi na musuar dodow wɔ m’egya fie.” (Atsɛ. 6:15) Nna ɔtse nka dɛ ɔmmfata dɛ ɔbɛyɛ dɛm edwuma no, naaso Jehovah dze, nna onyim dɛ obotum ayɛ. Jehovah boaa Gideon ma otumii yɛɛ edwuma a wɔdze hyɛɛ ne nsa no pɛpɛɛpɛ.

5. Ebɛn aber na obotum ayɛ dzen ama asafo mu mpanyimfo dɛ wɔbɛbrɛ hɔnho adze na wɔaagye ato mu dɛ nnyɛ biribiara na wobotum ayɛ?

⁵ Asafo mu mpanyimfo yɛ dza wobotum biara dɛ wɔbɛbrɛ hɔnho adze wɔ biribiara mu, na wɔgye to mu dɛ nnyɛ biribiara so na wobotum ayɛ. (Mic. 6:8; Andw. 20:18, 19) Wɔmmfa dza wotum yɛ anaa dza wɔayɛ no nndwa hɔn anomu. Dɛmara so na sɛ wodzi mfom a, wɔnnka dɛ mfaso biara nnyi hɔn do. Naaso dza yɛaka ho asɛm yi, ɔnnyɛ aber nyina na ne yɛ yɛ mberɛw ma asafo mu mpanyimfo. Dɛ nhwɛdo no, asafo mu panyin bi botum agye dwumadzi pii abɔ do, naaso bi a orunntum nnyɛ ne nyina. Anaaso dɛ, sɛ ɔpanyin bi yɛ biribi na wɔka ho asɛm anaa wɔkamfo no a, obotum ayɛ dzen ama no dɛ ɔbɛda ahobrɛadze edzi. Sɛ asafo mu mpanyimfo hyia tsebea a ɔtsetse dɛm a, ebɛnadze na wobotum esua efi Gideon hɔ a ɔbɔboa hɔn?

6. Nna Gideon gye to mu dɛ nnyɛ biribiara na obotum ayɛ. Ebɛnadze na asafo mu mpanyimfo botum esua efi mu? (Hwɛ mfonyin no so.)

 ⁶ Ma afofor mboa wo. Sɛ obi gye to mu dɛ nnyɛ biribiara na obotum ayɛ a, ɔma afofor boa no. Nna dɛm na Gideon tse, ntsi ɔmaa afofor boaa no. (Atsɛ. 6:27, 35; 7:24) Dɛmara na asafo mu mpanyimfo so yɛ. Tony a yeedzi kan aka noho asɛm no kaa dɛ: “Osian mbrɛ wosii tsetsee me no ntsi, nna metaa gyegye ndwuma bobɔ do, naaso ebɔhwɛ no nna menntum ennwie. Nna ɔtse dɛ mbrɛ menngye nnto mu dɛ nnyɛ biribiara na mubotum ayɛ. Ntsi meyɛɛ dɛ yebosua dɛm suban no ho adze wɔ hɛn ebusua som ase, na mekaa kyerɛɛ me yer so dɛ sɛ oehu suban bi a ɔtse dɛm wɔ moho a, ɔnka nkyerɛ me. Afei so, mohwɛɛ video a wɔato dzin Tse Dɛ Jesus No, Tsetse Afofor, Nya Hɔn Mu Ahotodo, Na Fa Dwumadzi Hyehyɛ Hɔn Nsa wɔ jw.org.” Iyinom ekyir no, Tony maa afofor boaa no. Ebɛnadze na ofii dza ɔyɛe no mu bae? Ɔkaa dɛ: “Seseiara, biribiara rokɔ do kamakama wɔ asafo no mu. Afei so, minya mber pii yɛ ndzɛmba a ɔma mebɛn Jehovah kɛse.”

7. Sɛ asafo mu mpanyimfo yɛ biribi na wɔka ho asɛm a, ebɛnadze na wɔbɛyɛ dze akyerɛ dɛ worusuasua Gideon? (James 3:13)

⁷ Sɛ eyɛ biribi na wɔka ho asɛm a, mma wo bo mmfuw. Adze fofor so a obotum ayɛ dzen ama mpanyimfo dɛ wɔbɛbrɛ hɔnho adze nye aber a wɔayɛ biribi na wɔaka ho asɛm no. Ha yi so, yebotum esua biribi efi dza Gideon yɛe no mu. Nna Gideon nyim dɛ ɔnnyɛ aber nyina na ɔyɛ n’adze pɛpɛɛpɛ. Ntsi aber bi a Ephraimfo nye no bɛhamee no, ɔnye hɔn kasaa bɔkɔɔ. (Atsɛ. 8:1-3) Gideon no bo emmfuw hɔn, mbom ɔbrɛɛ noho adze tsiee hɔn na ɔnye hɔn anntwe no tann dɛ ɔno na n’asɛm yɛ dɛw. Dza ɔyɛe no maa asɛm no dwee fɔmm. Sɛ mpanyimfo yɛ biribi na wɔka ho asɛm kyerɛ hɔn a, ɔnnsɛ dɛ hɔn bo fuw mbom ɔsɛ dɛ wɔyɛ dzinn tsie. Sɛ wɔyɛ dɛm a, ɔkyerɛ dɛ wonyim nyansa na worusuasua Gideon. (Kenkan James 3:13.) Iyi bɛma asomdwee atsena asafo no mu.

8. Sɛ wɔkamfo asafo mu mpanyimfo a, ɔsɛ dɛ wɔyɛ dɛn?

⁸ Fa nkamfo no nyina ma Jehovah. Aber a wɔkamfoo Gideon dɛ oedzi Midianfo do konyim no, ɔdze nkamfo no nyina maa Jehovah. (Atsɛ. 8:22, 23) Ebɛnadze na mpanyimfo botum ayɛ dze esuasua Gideon? Sɛ wotum yɛ biribi a, ɔsɛ dɛ wɔdze ho nkamfo no nyina ma Jehovah. (1 Cor. 4:6, 7) Dɛ nhwɛdo no, sɛ ɔpanyin bi tum kyerɛkyerɛ yie na wɔkamfo no a, ɔnnsɛ dɛ ɔgye nkamfo no fa. Mbom ɔsɛ dɛ ɔma nyimpa no hu dɛ ɔyɛ Bible no, nye ntsetsee a oenya efi Jehovah n’ahyehyɛdze no hɔ na wɔaboa no. Ɔyɛ a, ɔsɛ dɛ asafo mu mpanyimfo bisa hɔnho dɛ, ‘Medze me nkyerɛkyerɛ hyɛ Jehovah enyimnyam anaa medze ma obiara hu dɛ mara so m’ano atsew?’ Yɛnhwɛ dza ɔpanyin bi a wɔfrɛ no Timothy yɛe. Ɔbɛyɛɛ ɔpanyin fofor no, nna ne yamu a nkyɛ da biara ɔma ɔkasa. Ɔkaa dɛ: “Nna nsɛm akɛse na medze hyɛ me kasa ase, na mfatoho akɛse nkotsee so na medze dzi dwuma. Ntsi nna dɛm nsɛm akɛse no nkotsee na enuanom ka ho asɛm. Awerɛhosɛm nye dɛ, dɛ nkyɛ ɔkasa no bɛhyɛ Jehovah enyimnyam anaa ɔbɔtwe adwen akɔ Bible no do no, nna wɔkamfo emi mbom.” Naaso ekyir yi, Timothy hun dɛ ɔsɛ dɛ ɔsesa kwan a ɔfa do kyerɛkyerɛ no, amma wɔammfa nkamfo no amma no. (Mbɛ. 27:21) Ebɛnadze na ofii mu bae? Ɔtoaa do dɛ: “Afei, nna nkorɔfo ka kyerɛ me dɛ sɛ mema ɔkasa a, no mu nsɛm no boa hɔn ma wotum gyina ɔhaw na nsɔhwɛ ano, na ɔma wɔbɛn Jehovah kɛse. Sɛ metse dɛ enuanom reka nsɛm a ɔtse dɛm a, ɔma m’enyi gye paa. Naaso mber bi etwa mu no nna ɔnntse dɛm.”

9. Nna ebɛn tsebea na obotum ama wɔayɛ dzen ama Gideon dɛ obetsie Jehovah na ɔada akokodur edzi? (Hwɛ mfonyin a ɔwɔ Ɔweɔn-Aban yi enyim no.)

⁹ Gideon bɛyɛɛ ɔtsɛmbuafo no, nna ohia paa dɛ otsie Jehovah na ɔda akokodur edzi. Jehovah  dze dwumadzi bi a ɔyɛ hu hyɛɛ ne nsa dɛ ɔnkɛsɛɛ afɔrmbukyia a ne papa som Baal wɔ do no. (Atsɛ. 6:25, 26) Ɔno ekyir no, Gideon boaboaa nsordaafo bi ano dɛ wɔnye hɔn atamfo rokɔko. Naaso Jehovah maa ɔtseew nsordaafo dodow no do mpɛn ebien. (Atsɛ. 7:2-7) Ekyir koraa no, Jehovah kaa kyerɛɛ Gideon dɛ ɔnkɔto nhyɛ n’atamfo no do esuom.​—Atsɛ. 7:9-11.

10. Ebɛn tsebea na obotum ama wɔayɛ dzen ama asafo mu panyin bi dɛ ɔbɛyɛ setsie?

¹⁰ Ɔsɛ dɛ asafo mu mpanyimfo yɛ “asoɔmberɛw.” (Jas. 3:17) Asafo mu panyin a ɔyɛ asoɔmberɛw anaa otsie Jehovah no, aber biara ɔayɛ krado dɛ ɔdze dza Bible no ka nye akwankyerɛ biara a ofi Nyankopɔn n’ahyehyɛdze no hɔ no bɛyɛ edwuma. Sɛ ɔpanyin bi yɛ dɛm a, enuanom hwɛ na wosuasua no. Naaso nnyɛ aber nyina na obotum ayɛ mberɛw ama no dɛ ɔbɛyɛ setsie. Sɛ yɛbɛyɛ nhwɛdo a, adze rekye na adze resa nyina, akwankyerɛ fofor ba ara na ɔba. Ntsi obotum ayɛ dzen ama asafo mu panyin bi dɛ ɔdze dɛm akwankyerɛ no nyina bɛyɛ edwuma. Akwankyerɛ no bi mpo wɔ hɔ a, n’adwen botum ayɛ no dɛ wɔdze yɛ edwuma a ɔrennyɛ yie, anaa nyansa nnyi mu. Anaadɛ bi a, asafo no bɛka dɛ onkedzi dwuma bi a obotum ama wɔaakyer no ato mu. Ebɛnadze na asafo mu mpanyimfo botum ayɛ dze esuasua Gideon wɔ nsɛm a ɔtsetse dɛm mu?

11. Ebɛnadze na asafo mu mpanyimfo bɛyɛ dze akyerɛ dɛ wɔyɛ setsie?

¹¹ Sɛ akwankyerɛ ba a, tsie no yie na fa yɛ edwuma. Nyankopɔn kyerɛɛ Gideon kwan a ɔmfa do nsɛɛ ne papa n’afɔrmbukyia no. Afei, Jehovah kyerɛɛ no beebi fofor dɛ onsi afɔrmbukyia wɔ hɔ mma no, na ɔkyerɛɛ no abowa a ɔmfa mbɔ afɔr wɔ do. Gideon annkasakasa akwankyerɛ a wɔdze maa no no ho. Odzii do pɛpɛɛpɛ. Ndɛ so, Jehovah n’ahyehyɛdze no dze nkrataa a nkaabɔ na akwankyerɛ ahorow wɔ mu ma asafo mu mpanyimfo. Dɛm akwankyerɛ ahorow yi bɔ hɛnho ban na ɔma yɛbɛn Jehovah. Ntsi sɛ asafo mu mpanyimfo dzi do pɛpɛɛpɛ a, ɔma yɛpɛ hɔn asɛm paa, na ɔboa obiara wɔ asafo no mu.​—Ndw. 119:112.

12. Sɛ nsesa bi ba a, mpanyimfo besi dɛn dze asɛm a ɔwɔ Hebrewfo 13:17 no ayɛ edwuma?

¹² Sɛ nsesa ba a, yɛ krado dɛ ebɛgye ato mu. Sɛ ebɛkaa a, Jehovah kaa kyerɛɛ Gideon dɛ ɔntsew no nsordaafo no do koraa. (Atsɛ. 7:8) Bi a obisaa noho dɛ: ‘Ebɛnadze ntsi koraa na ɔsɛ dɛ metsew do? Na sɛ manntsew do a ɔbɛyɛ dɛn?’ Naaso mbrɛ ɔtse biara no, odzii akwankyerɛ no do. Dɛ mbrɛ Gideon yɛe no, ndɛ so sɛ asafo no yɛ nsesa wɔ akwankyerɛ bi mu a, mpanyimfo no dze yɛ edwuma. (Kenkan Hebrewfo 13:17.) Dɛ nhwɛdo no, wɔ 2014 mu no, Akwankyerɛ Kuw no yɛɛ nsesa wɔ mbrɛ asafo ahorow si tua Ahendzi Asa na Ehyiadzi Asa a wosisi ma hɔn no ho kaw no mu. (2 Cor. 8:12-14) Nkan no, nna ahyehyɛdze no bɔ asafo ahorow bosa ma wɔdze sisi asafo adan, na ekyir yi woetua. Naaso ofi 2014 no, ɔnntse dɛm bio. Mbom sɛ asafo bi wɔ sika o, sɛ onnyi bi o, sɛ no ho hia dɛ wosi asafo adan bi ma hɔn a, wɔdze ntoboa a asafo ahorow nyina yi boa wiadze nyina som  edwuma no na wɔdze si. Aber a José tsee nsesa yi ho asɛm no, nna ɔnngye nndzi dɛ obotum ayɛ edwuma. Ntsi ɔkaa dɛ: ‘Hɛn man yi mu ha dze, menngye nndzi dɛ ɔbɛyɛ yie. Worunntum nnsi Ahendzi Asa kor mpo.’ Naaso ekyir yi, José sesaa n’adwen wɔ akwankyerɛ yi ho. Ɔbaa no dɛn? Narankasa kaa dɛ: “Asɛm a ɔwɔ Mbɛbusɛm 3:5, 6 no boaa me ma muhun dɛ ɔsɛ dɛ megye Jehovah dzi. Na dza woefi mu aba no so dze, ɔsɛ w’enyi! Sesei, yerisisi Ahendzi Asa pii, na yeehu akwan ahorow so a yebotum afa do eyi ntoboa dze aboa adansi edwuma a ɔrokɔ do wɔ wiadze nyina no.”

13. (a) Nna ebɛn awerɛhyɛmu na Gideon wɔ? (b) Ebɛnadze na asafo mu mpanyimfo botum ayɛ dze esuasua Gideon? (Hwɛ mfonyin no so.)

¹³ Nya akokodur na yɛ dza Jehovah pɛ. Adze a Jehovah kaa kyerɛɛ Gideon dɛ ɔnyɛ no, nna ɔyɛ hu paa, ntsi nna osuro. Naaso otsiei. (Atsɛ. 9:17) Jehovah kaa Gideon n’akoma too ne yamu. Iyi maa onyaa awerɛhyɛmu koraa dɛ Nyankopɔn taa n’ekyir, na ɔbɔboa no ma ɔaagye no nkorɔfo. Asafo mu mpanyimfo a wɔwɔ aman a wɔdze nsa ato hɛn dwumadzi do no suasua Gideon. Sɛ asɛnka anaa asafo nhyiamu a wɔbɛyɛ no bɛma wɔakyer hɔn, anaa ɔbɛma hɔn edwuma efi hɔn nsa, anaa ɔbɛma wɔabor hɔn mpo a, wɔdze akokodur dzi dɛm ndzɛmba yi enyim. c Ahohiahia kɛse no mu no, sɛ akwankyerɛ a asafo mu mpanyimfo dze bɛyɛ edwuma no botum dze hɔn nkwa ato esian mu mpo a, ɔsɛ dɛ wonya akokodur na wɔdze yɛ edwuma. Dɛm akwankyerɛ no bi botum afa atsɛmbusɛm a yɛbɛka no ho, nye akwankyerɛ a obotum agye hɛn nkwa aber a Gog a ofi Magog ato ahyɛ hɛn do no.​—Ezek. 38:18; Nyi. 16:21.

14. Nna ebɛnadze ntsi na Gideon n’edwuma no nnda famu?

¹⁴ Nna edwuma a ɔhyɛ Gideon ne nsa dɛ ɔtsɛmbuafo no nnda famu koraa. Aber a Gideon na no nsordaafo no kɔtoo hyɛɛ Midianfo hɔn do esuom no, woguanee. Ntsi Gideon na no nsordaafo no tsiiw hɔn fi Jezreel Bɔnsa no mu araa dze kodur Jordan Esutsen no ho. Ɔbɛyɛ dɛ, nna kwaa etwa Jordan ho nyina ehyia, ntsi nna ɔbɛyɛ dzen ama Gideon na no nsordaafo no. (Atsɛ. 7:22) Aso Gideon sanee wɔ  Jordan Esutsen no ho? Oho! Aber a Gideon na ne mbarimba 300 no dur esutsen no ho no, ɔwɔ mu dɛ nna wɔaberɛ dze, naaso wotwae na wɔkɔr do tsiiw Midianfo no. Wotsiiw hɔn araa dze kesii dɛ wokunkum hɔn nyinara.​—Atsɛ. 8:4-12.

15. Ebɛn aber na obotum ayɛ dzen ama asafo mu panyin bi dɛ obedzi n’asodzi ho dwuma?

¹⁵ Ɔtɔ da a edwuma a ogu asafo mu panyin bi do wɔ asafo no mu, nye n’ebusua a ɔbɔhwɛ hɔn no botum ama ɔaaberɛ paa. Ebɛnadze na asafo mu mpanyimfo botum ayɛ dze esuasua Gideon wɔ tsebea a ɔtse dɛm mu?

16-17. Ebɛnadze na ɔboaa Gideon ma otumii kɔr do yɛɛ n’edwuma no, na ebɛn awerɛhyɛmu na asafo mu mpanyimfo botum enya? (Isaiah 40:28-31) (Hwɛ mfonyin no so.)

¹⁶ Fa woho to Jehovah do na ɔbɛhyɛ wo dzen. Nna Gideon gye dzi dɛ Jehovah bɛma no ahoɔdzen ma ɔdze edzi dwuma a ɔdze ahyɛ ne nsa no, na dɛmara so na Jehovah yɛe. (Atsɛ. 6:14, 34) Mber bi, Gideon nye ne mbarimba no tsiiw Midian ahemfo beenu bi a ɔbɛyɛ dɛ nna wɔtse efumpɔnkɔ do. (Atsɛ. 8:12, 21) Ɔwɔ mu dɛ nna Gideon nye ne mbarimba no nam famu dze, naaso Nyankopɔn boaa hɔn ma wɔkyeer ahemfo no na wodzii hɔn do konyim. Asafo mu mpanyimfo so botum dze hɔnho ato Jehovah do, osiandɛ ɔno dze, “ɔnntɔ bitsi, eso ɔmmberɛ.” Sɛ wɔyɛ dɛm a, ɔbɛma hɔn ahoɔdzen ber a no ho ebehia no.​—Kenkan Isaiah 40:28-31.

¹⁷ Onua bi a wɔfrɛ no Matthew yɛ Ayarsabea Ntamu Nkitahodzi Egyinatukuw no munyi. Sɛ oridzi n’asodzi ho dwuma na ohyia nsɛndzendzen a, ebɛnadze na ɔboa no ma otum gyina ano? Ɔkaa dɛ: “Mebohu dɛ asɛm a ɔwɔ Philippifo 4:13 no yɛ nokwar paa. Mpɛn pii no, sɛ meberɛ na metse nka dɛ murunntum nnkɔ do nnyɛ edwuma yi bio a, mobɔ mpaa dzendzenndzen serɛ Jehovah dɛ ɔmma me ahoɔdzen ma muntum nkɔ do mboa enuanom no. Sɛ meyɛ dɛm a, muhu dɛ Jehovah dze no sunsum krɔnkrɔn hyɛ me dzen na ɔno boa me ma mokɔ do yɛ edwuma no.” Dɛ mbrɛ ɔtoo Gideon no, asafo mu mpanyimfo a wofi hɔn pɛ mu yɛ edwumadzen dze hwɛ Jehovah no nguan no so botum ehyia ɔhaw. Naaso ɔsɛ dɛ wohu dɛ ndzɛmba bi wɔ hɔ a wobotum ayɛ, na bi so wɔ hɔ a worunntum nnyɛ. Mbrɛ ɔtse biara no, wobotum enya awerɛhyɛmu dɛ sɛ wɔserɛ Jehovah hɔ mboa a, obetsie hɔn, na ɔahyɛ hɔn dzen ma woeetum akɔ do ayɛ hɔn edwuma no.​—Ndw. 116:1; Phil. 2:13.

18. Ebɛnadze na asafo mu mpanyimfo botum ayɛ dze esuasua Gideon?

¹⁸ Asafo mu mpanyimfo botum esua ndzɛmba pii efi Gideon hɔ. Ɔsɛ dɛ wɔgye to mu dɛ nnyɛ biribiara na wobotum ayɛ, na ɔno remma wɔnngye edwuma pii nngu hɔn do. Dɛmara so na ɔsɛ dɛ wɔbrɛ hɔnho adze aber a wɔayɛ biribi ma wɔaka ho asɛm anaa wɔakamfo hɔn no. Bio so, ɔsɛ dɛ wɔyɛ setsie na wonya akokodur, nkanka aber a wiadze yi n’ewiei rebɛn no. Afei so, ɔsɛ dɛ wonya awerɛhyɛmu dɛ, sɛ ɔyɛ dzen dɛ dɛn ara mpo a, Nyankopɔn bɛhyɛ hɔn dzen ma woeedzi hɔn asodzii ho dwuma. Nokwasɛm nye dɛ, hɛn enyi sɔ edwumadzen a asafo mu mpanyimfo yɛ no paa, na ɔsɛ dɛ ‘yesuo hɔn mu wɔ enyidzi mu.’​—Phil. 2:29.