Bible no nnka siantsir no. Naaso ɔka nsɛm bi a ɔbɛyɛ dɛ ɔno na ɔmaa wɔannsan annkɔ Nazareth no.

Da kor bi, ɔbɔfo bi kaa kyerɛɛ Mary dɛ obenyinsen na ɔawo babanyin. Aber a ɔbɔfo no kaa asɛm no kyerɛɛ Mary no, nna ɔnye Joseph nyina tse Nazareth. Nazareth yɛ kurow a ɔwɔ Galilee, na hɔ so na Joseph fi. (Luke 1:26-31; 2:4) Ekyir yi, wotui kɔr Egypt, na ber a wofii hɔ no wɔsanee kɔr Nazareth. Hɔ na Jesus nyinii, ntsi na wɔfrɛ no Nazarethnyi no. (Matt. 2:19-23) Ntsi aber biara a wɔbɛka Jesus, Joseph, na Mary nyina ho asɛm no, kurow a ɔba hɛn adwen mu nye Nazareth.

Nna Mary no busuanyi bi wɔ Judah a wɔfrɛ no Elizabeth. Nna Elizabeth no kun nye ɔsɔfo bi a wɔfrɛ no Zechariah, na noara so na ɔwoo John Onumanyi no. (Luke 1:5, 9, 13, 36) Mary kɛseraa Elizabeth wɔ Judah, na abosoom ebiasa ekyir no ɔsanee baa Nazareth. (Luke 1:39, 40, 56) Ntsi nna Mary ekohu Judah nkurow no mu kakra.

Ber bi ekyir no, wɔhyɛɛ dɛ obiara nkɔ no kurow mu ma ‘wɔnkyerɛw ne dzin.’ Dɛm ntsi Joseph twaa kwan fii Nazareth kɔr “David kurow” a wɔfrɛ no Bethlehem mu. Hɔ ara so na wɔhyɛɛ ho nkɔm dɛ wɔbɔwo Messiah no. (Luke 2:3, 4; 1 Sam. 17:15; 20:6; Mic. 5:2) Ɔbɛyɛ dɛ nna Joseph mmpɛ dɛ Mary dze abɔdomaba no twa kwan tsentsen fi Bethlehem san kɔ Nazareth, ntsi wɔtsenaa Bethlehem hɔ ara. Nna ofi hɔ kɔ Jerusalem no tsentsen yɛ bɛyɛ kilomita akron (bɛyɛ akwansin 6). Dɛm ntsi nna ɔbɛyɛ mberɛw ama hɔn dɛ wɔdze abofra no bɔkɔ asɔrfi hɔ na wɔakɔbɔ afɔr dɛ mbrɛ ɔsɛ.​—Lev. 12:2, 6-8; Luke 2:22-24.

Nna ɔbɔfo no edzi kan aka akyerɛ Mary dɛ Jehovah dze “David ahengua no” bɛma ne ba no, na ‘obedzi hen.’ Bi a Joseph na Mary nyaa adwen dɛ oye paa dɛ wɔwoo Jesus wɔ David kurow mu. (Luke 1:32, 33; 2:11, 17) Bi so a nna hɔn adwen yɛ hɔn dɛ ɔbɛyɛ papa dɛ wɔbɛtsena hɔ kakra dze atweɔn dza Nyankopɔn bɛka akyerɛ hɔn dɛ wɔnyɛ no.

Aber a hɔn a wɔhwɛ nworaba mu baa hɔn nkyɛn no, nna yennyim ber tsentsen a wɔdze atsena Bethlehem. Naaso dɛm aber no, nna ebusua no tse fie bi mu. Nna Jesus yɛ “abofraba” na ɔnnyɛ abɔdomaba. (Matt. 2:11) Dɛ nkyɛ wɔbɛsan akɔ Nazareth no, ɔbɛyɛ dɛ wɔtsenaa Bethlehem kyɛree ma ɔbɛyɛɛ dɛ wɔtse hɔn kurow mu.

Herod hyɛɛ dɛ wonkuku ‘mbofra nyina a wɔwɔ Bethlehem a woedzi mfe ebien nye hɔn a wonyae nndzii.’ (Matt. 2:16) Iyi ntsi, Jehovah kaa kyerɛɛ Joseph dɛ ɔnye Mary na Jesus nyina nguan nkɔ Egypt, na wɔtsenaa hɔ araa kesii dɛ Herod wui. Ekyir yi, Joseph nye n’ebusua no tui kɔr Nazareth. Naaso, ebɛnadze ntsi na wɔannsan annkɔ Bethlehem? Siantsir nye dɛ, dɛm aber no nna Herod ne ba otsirmɔdzenfo Archelaus na odzi hen wɔ Judea. Ɔno da nkyɛn a, ɔyɛɛ dɛm dze tsiee kɔkɔbɔ a Nyankopɔn dze maa no no. Nazareth hɔ dze, nna Joseph benya asomdwee dze atsetse Jesus ma ɔaabɛyɛ Nyankopɔn no nokwar somfo.​—Matt. 2:19-22; 13:55; Luke 2:39, 52.

Ɔbɛyɛ dɛ Joseph wui ansaana Jesus ruwu. Na Jesus no wu no so na obue hokwan ama afofor etum akɔ sor. Iyi ntsi, wobenyan Joseph ma ɔaabɛtsena asaase yi do. Hɛn mu pii botum enya hokwan ehyia no na yeebisa no siantsir a ɔnye Mary kɔr do tsenaa Bethlehem aber a wɔwoo Jesus no.