1. Sɛ yebenya nkwa wɔ Jehovah ne da no mu a, ebɛnadze na ɔsɛ dɛ yɛyɛ?

 SƐ BIBLE no ka ‘Jehovah ne da’ ho asɛm a, ɔkyerɛ aber a Jehovah sɛɛ n’atamfo na ɔgye no nkorɔfo nkwa. Tsetse mber mu no, Jehovah sɛɛ aman binom. (Isa. 13:1, 6; Ezek. 13:5; Zeph. 1:8) Hɛn aber yi do so, ‘Jehovah ne da’ no bɛhyɛ ase aber a wɔato ahyɛ Babylon Kɛse no do, na ɔbɛba ewiei wɔ Har-Magedon. Sɛ yebotum enya nkwa dɛm “da” no a, ndɛ na ɔsɛ dɛ yesiesie hɛnho tweɔn. Jesus ama yeehu dɛ ɔnnsɛ dɛ yɛyɛ krado da kor bi pɛ ma “ahohiahia kɛse” no, mbom ɔsɛ dɛ ‘yɛyɛ krado da biara.’​—Matt. 24:21; Luke 12:40.

2. Ebɛnadze ntsi na nsɛm a ɔwɔ 1 Thessalonicafo no botum aboa hɛn?

² Aber a ɔsomafo Paul kyerɛɛw ne krataa a odzi kan kɛmaa Thessalonicafo no, ɔdze Jehovah ne da no totoo ndzɛmba ahorow bi ho dze boaa hɔn mbrɛ ɔbɛyɛ a wobesiesie hɔnho ama dɛm atsɛmbu da kɛse no. Nna Paul nyim dɛ nnyɛ dɛm aber no ara na Jehovah ne da no bɛba. (2 Thess. 2:1-3) Naaso, otuu enuanom no fo dɛ wonsiesie hɔnho mma dɛm da no tse dɛ mbrɛ adze kye ara a na ɔreba. Hɛn so yebotum dze dza ɔkae no ayɛ edwuma. Ma yɛnhwɛ nkyerɛkyerɛmu a ɔdze mae wɔ nsɛm a odzidzi do yi ho: (1) mbrɛ Jehovah ne da no besi aba, (2) hɔn a wɔbɛsɛɛ hɔn, na (3) mbrɛ yebesi esiesie hɛnho ama yeenya nkwa.

3. Ebɛn kwan do na Jehovah ne da no bɛba dɛ mbrɛ owifo ba anadwe? (Hwɛ mfonyin no so.)

³ Ɔbɛba “dɛ mbrɛ owifo ba anadwe.” (1 Thess. 5:2) Mfatoho ebiasa a Paul dze kyerɛkyerɛɛ Jehovah ne da a ɔreba no mu no, iyi nye dza odzi kan. Sɛ ewifo ruwia adze a, wɔyɛ no ntsɛntsɛm, na wɔtaa wia adze so anadwe ber a hɔn a worukowia hɔn no enyi nnda. Dɛmara na Jehovah ne da no so bɛyɛ, ɔbɛba awerɛfir mu aber a nyimpa pii hɔn enyi nnda. Nokwasɛm nye dɛ, mbrɛ  ndzɛmba bɔkɔ ntsɛntsɛm no, annhwɛ a ɔbɛyɛ hɛn a yɛyɛ nokwar Christianfo no mpo nwanwa. Naaso sɛ wɔsɛɛ ndzebɔnyɛfo no a, hɛndze wɔrennsɛɛ hɛn.

4. Ebɛn kwan do na Jehovah ne da no bɛba dɛ mbrɛ awoko ba ɔbaa a onyinsen do?

⁴ Ɔbɛba “dɛ mbrɛ awoko ba ɔbaa a onyinsen do.” (1 Thess. 5:3) Ɔbaa a n’awoo abɛn no, onnyim ber pɔtsee a awoo bɛka no. Naaso onyim dɛ ɔnnyɛ dɛn ara a dɛm ber no bɔso. Sɛ ne ber no so a, awoo ka no awerɛfir mu, ɔtse yaw na hwee nnsiw n’awo no ho kwan. Dɛmara na Jehovah ne da no so tse. Yennyim da na dɔn a ɔbɛhyɛ ase, naaso yɛgye dzi paa dɛ ɔbɛba ara. Yenyim so dɛ, atsɛmbu a Nyankopɔn dze reba ndzebɔnyɛfo do no bɛba awerɛfir mu, na worunntum nnguan.

5. Ebɛn kwan do na ahohiahia kɛse no tse dɛ adzekyee kan?

⁵ Ɔbɛba dɛ adzekyee kan. Mfatoho a otsia ebiasa a Paul dze dzii dwuma no mu no, ɔsanee dze Jehovah ne da no totoo ewifo a worukowia adze anadwe ho. Naaso, dɛm aber yi dze ɔbɛyɛ dɛ Paul dze Jehovah ne da no totoo adzekyee kan ho. (1 Thess. 5:4) Sɛ ewifo ruwia adze anadwe a, otum ba no dɛ wɔdze hɔn adwen nyina si dza wɔreyɛ no do araa ma wonnhu mpo dɛ mber rokɔ. Ntsi hɔn enyi bɛba hɔnho do no, nna adze akye hɔn ma hɔnho ada hɔ. Dɛ mbrɛ adzekyee kan ma ewifo ho da hɔ no, dɛmara na ahohiahia kɛse no so bɛma hɔn a wɔkɔ do yɛ sum mu ndzɛmba, anaa hɔn a wɔyɛ ndzɛmba a Jehovah kyir no ho ada hɔ. Ɔnnsɛ dɛ yesuasua hɔn a wɔtse dɛm no. Mbom ɔsɛ dɛ yɛtwe hɛnho fi ndzɛmba a Jehovah kyir no ho, na yɛkɔ do ‘yɛ papa, yɛyɛ dza ɔtsen, na yedzi nokwar wɔ adze nyina mu’ dze yɛ krado tweɔn Jehovah ne da no. (Eph. 5:8-12) Paul sanee yɛɛ mfatoho ebien bi a odzi nsɛ faa hɔn a wɔbɛsɛɛ hɔn no ho.

6. Ebɛnadze na nyimpa pii yɛ a ɔkyerɛ dɛ wɔadeda? (1 Thessalonicafo 5:6, 7)

⁶ “Hɔn a wɔda.” (Kenkan 1 Thessalonicafo 5:6, 7.) Hɔn a worinnya nkwa wɔ Jehovah ne da no mu no, Paul dze hɔn totoo hɔn a wɔadeda ho. Wonnyim dza ɔrokɔ do na mber rokɔ so a, wonnhu. Dɛm ntsi sɛ biribi tsitsir bi si a, wonnhu mpo na akantam wɔayɛ ho biribi. Ndɛ so, nyimpa pii wɔ hɔ a wɔtse dɛ hɔn a wɔadeda. (Rom. 11:8) Ndzɛmba a ɔrokɔ do a ɔkyerɛ dɛ yɛtse “nda a odzi ekyir” no mu, na ɔrennkyɛr koraa na ahohiahia kɛse no aba no, wɔnngye nndzi. Sɛ nsɛm akɛse bi sisi wɔ wiadze no mu a, otum pusuw binom ma wɔkyerɛ Ahendzi ho asɛmpa a yɛka no ho enyigye kakra. Naaso hɔn mu pii wɔ hɔ a, ebɔhwɛ no nna enyigye a wonyae no atsew kɔ, na wɔasan akɔ hɔn dadaw mu. Hɔn a wɔgye dzi dɛ atsɛmbu da bi reba mpo no, ɔyɛ hɔn dɛ ɔnnyɛ ndɛ na ɔkyena asɛm a. (2 Pet. 3:3, 4) Naaso, adze rekye na adze resa no, yehu dɛ no ho hia paa dɛ yɛdze Nyankopɔn n’afotu a ɔka dɛ yɛnweɔn na yɛmma hɛn enyi nda hɔ no yɛ edwuma.

7. Ebɛn kwan do na hɔn a Nyankopɔn bɛsɛɛ hɔn no tse dɛ hɔn a wɔabow?

⁷ “Hɔn a wɔbow.” Paul dze hɔn a Nyankopɔn bɛsɛɛ hɔn no totoo akɔwensafo ho. Sɛ obi bow a, osiandɛ n’enyi nnda hɔ ntsi sɛ biribi rokɔ do a onntum nnyɛ ho hwee, na iyi ma onntum nnsisi gyinae pa. Dɛmara na hɔn a wɔyɛ ndzɛmba bɔn no so tse. Wɔmmfa kɔkɔbɔ a Nyankopɔn dze ama no nnyɛ hwee. Wɔyɛ ndzɛmba a ɔdze hɔn bɔkɔ ɔsɛɛ mu. Naaso hɛn a yɛyɛ Christianfo no dze, wotu hɛn fo dɛ yɛnweɔn na yɛmma hɛn enyi nda hɔ. (1 Thess. 5:6) Bible ho ɔbemfo bi kaa dɛ obi a n’enyi da hɔ no, “n’adwen mu da hɔ na ɔdze abotar susu ndzɛmba ho kɔ ekyir ansaana ɔayɛ biribi, na iyi ma otum si gyinae pa.” Ebɛnadze ntsi na ɔsɛ dɛ yɛma hɛn adwen mu da hɔ na yenya abotar? Sɛ yɛyɛ dɛm a, ɔbɛma yɛremmfa hɛnho nnhyehyɛ amanyɛsɛm nye nsɛnsɛm a ɔrokɔ do wɔ wiadze yi mu no mu. Aber a Jehovah ne da no rebɛn no, ndzɛmba pii botum asɔ hɛn ahwɛ dɛ yɛmfa hɛnho nhyehyɛ amanyɛsɛm nye nsɛnsɛm a ɔrokɔ do no mu. Naaso ɔnnsɛ dɛ yɛma hɛn akoma tu wɔ dza ɔsɛ dɛ yɛyɛ ho. Siantsir nye dɛ, Nyankopɔn dze no sunsum krɔnkrɔn no bɔboa hɛn ma yeenya abotar na yɛdze adwen a no mu da hɔ so esisi gyinae pa.​—Luke 12:11, 12.

8. Ebɛn ntotoho na 1 Thessalonicafo 5:8 yɛ a, ɔma yehu su ahorow a yehia ama yeetum akɔ do aweɔn na hɛn enyi ada hɔ? (Hwɛ mfonyin no so.)

⁸ Ɔsɛ dɛ ‘yɛhyɛ akatabo na dadzekyɛw no.’ Paul dze hɛn totoo sogyafo a woesiesie hɔnho na wɔayɛ krado ama ɔko no ho. (Kenkan 1 Thessalonicafo 5:8.) Sogyanyi dze, wɔhwɛ kwan dɛ aber biara ɔbɛyɛ krado ama ɔko. Dɛmara na ɔtse wɔ hɛn so hɛn afamu. Ɔsɛ dɛ yɛhyɛ gyedzi nye ɔdɔ dɛ akatabo, na yɛhyɛ nkwagye ho enyidado no dɛ dadzekyɛw dze kyerɛ dɛ yɛayɛ krado rotweɔn Jehovah ne da no. Dɛm su ebiasa yi bɔboa hɛn paa.

9. Ebɛn kwan do na gyedzi a yɛwɔ no bɔ hɛnho ban?

⁹ Nna akatabo bɔ sogyanyi n’akoma ho ban. Hɛn so, gyedzi nye ɔdɔ bɔ hɛn asɛnkyerɛdze kwan do akoma no ho ban, na ɔboa hɛn ma yɛkɔ do som Nyankopɔn na yedzi Jesus n’ekyir. Gyedzi a yɛwɔ no ma yenya awerɛhyɛmu dɛ, sɛ yɛdze hɛn akoma nyinara hwehwɛ Jehovah a, obotua hɛn kaw. (Heb. 11:6) Ɔbɔboa hɛn ma sɛ yehyia ɔhaw mpo a, yaakɔ do ara edzi hɛn Kandzifo Jesus n’ekyir. Sɛ yebotum ahyɛ hɛn gyedzi dzen na yeegyina ɔhaw a yehyia no ano a, adze kor a obotum aboa hɛn nye dɛ yebosuasua hɛn nuanom binom a wohyiaa ɔsoɛrtsia anaa sikasɛm mu ahokyer naaso wɔkɔr do dzii Jehovah nokwar no. Afei so,  sɛ yesuasua hɔn a wɔmaa hɔn asetsena baa famu mbrɛ ɔbɛyɛ a wɔdze Ahendzi no bedzi kan wɔ hɔn asetsena mu no a, ɔbɔboa hɛn ma yɛremmfa hɛn adwen nyinara nnsi sika anaa ahonyadze a yebenya no do. b

10. Ebɛn kwan do na ɔdɔ a yɛwɔ ma Nyankopɔn nye hɔn a yɛka asɛm no kyerɛ hɔn no boa hɛn ma yɛkɔ do yɛ asɛnka edwuma no?

¹⁰ Sɛ yebotum akɔ do aweɔn na hɛn enyi ada hɔ a, ɔdɔ so ho hia paa. (Matt. 22:37-39) Sɛ yɛreyɛ asɛnka edwuma no na yehyia ɔhaw mpo a, ɔdɔ a yɛwɔ ma Nyankopɔn no boa hɛn ma yɛkɔ do ka asɛm no. (2 Tim. 1:7, 8) Afei so, osiandɛ yɛdɔ hɔn a wɔnnsom Jehovah no ntsi, yɛkɔ do ka asɛm no kyerɛ hɔn, na yɛyer hɛnho yɛ hɛn asaasesin mu edwuma. Ɔyɛ mpo a yɛkyerɛw hɔn nkrataa anaa yɛfrɛ hɔn wɔ fon do dzi hɔn dase. Yɛgye dzi dɛ da kor da kor, hɔn a yɛka asɛm no kyerɛ hɔn no botum asesa na wɔaabɔsom Jehovah.​—Ezek. 18:27, 28.

11. Sɛ yɛdɔ hɛn nuanom a, ɔbɔboa hɛn dɛn? (1 Thessalonicafo 5:11)

¹¹ Afei so, yɛdɔ hɛn nuanom a yɛnye hɔn som no. Adze kor a yɛyɛ dze kyerɛ dɛ yɛdɔ hɔn nye dɛ, ‘yɛhyɛ hɛnho nkuran nkorkor, na yɛboa hɛnho nkorkor.’ (Kenkan 1 Thessalonicafo 5:11.) Sogyafo a woridzi ako no bɔ mbɔdzen dɛ wɔbɛma hɔn enyi eku hɔn mfɛfo ho. Dɛmara na hɛn so yɛhyehyɛ hɛnho nkuran ama yeetum egyina hɛn haw ano. Naaso obotum aba dɛ akodzi no rokɔ do no, sogyanyi bi botum epira no nua aber a ɔannhyɛ da. Dɛmara na hɛn so yɛrennhyɛ da ara dɛ yɛreyɛ biribi dze ahaw hɛn nuanom anaa dze etua bɔn bi a wɔayɛ hɛn no do kaw. (1 Thess. 5:13, 15) Sɛ yɛda obu edzi kyerɛ enuanom a wodzi ndzɛmba enyim wɔ asafo no mu no a, ɔno so kyerɛ dɛ yɛwɔ ɔdɔ. (1 Thess. 5:12) Aber a Paul kyerɛɛw ne krataa yi no, nna Thessalonica asafo no nndzii afe mpo. Enuanom a nna wodzi ndzɛmba enyim no, obotum aba dɛ nna wonnyi suahu pii na bi a nna wodzi mfom ahorow bi so. Naaso nna ɔsɛ dɛ wɔda obu edzi kyerɛ mbarimba a wɔtse dɛm no. Ɔrennkyɛr na ahohiahia kɛse no aba. Sɛ ɔba a, no ho behia dɛ yetsie hɛn asafo mu mpanyimfo na yɛdze akwankyerɛ a wɔdze bɛma hɛn no yɛ edwuma paa kyɛn  mbrɛ yɛyɛ no ndɛ no. Siantsir nye dɛ, obotum aba dɛ, dɛm aber no, yerunntum nye wiadze nyina edwumayɛbea tsir nye Bethel a ɔwɔ hɛn man mu no nndzi nkitaho. Ntsi ndɛ na no ho hia paa dɛ yɛdɔ asafo mu mpanyimfo na yebu hɔn. Ɔmmfa ho dza obesi biara no, hom mma yɛnkɔ do mma hɛn enyi nda hɔ. Ɔnnsɛ dɛ yɛdze hɛn adwen si asafo mu mpanyimfo hɔn sintɔ do, na mbom dza ɔsɛ dɛ yɛdze hɛn adwen si do nye dɛ, Jehovah nam Christ do dze dɛm mbarimba anokwafo yi reyɛ edwuma.

12. Ebɛn kwan do na enyidado a yɛwɔ no bɔ hɛn nsusui ho ban?

¹² Dɛ mbrɛ nna dadzekyɛw bɔ sogyanyi ne tsir ho ban ma sɛ biribi bɔ ne tsir a ommpira no, dɛmara so na nkwagye ho enyidado a yɛwɔ no bɔ hɛn nsusui ho ban. Sɛ hɛn enyidado si pi a, nnyɛ obi na ɔbɛka akyerɛ hɛn dɛ, dza wiadze no kamfo kyerɛ no yɛ nwura. (Phil. 3:8) Enyidado a yɛwɔ no ma hɛn adwen si pi na yenya abotar wɔ ndzɛmba ho. Wallace na Laurinda a wɔsom wɔ Bethel bi a ɔwɔ Africa no hun dɛ dɛm asɛm yi nokwar. Adapɛn ebiasa ntamu no, Wallace ne papa wui na Laurinda ne maame so wui. Dɛm aber no nna COVID-19 gyina mu dzendzenndzen, ntsi hɔn mu biara enntum annkɔ fie annkɛsera n’ebusuafo. Wallace kaa dɛ: “Ɔyɛ a modwendwen owusoɛr ho enyidado no ho. Dɛm a meyɛ no boa me ma memmfa m’adwen nnsi tsebea a nna wɔwɔ mu ana woruwu no do, na mbom medze si mbrɛ hɔn asetsena bɛyɛ wɔ wiadze fofor no mu no do. Sɛ mo werɛ how a, dɛm enyidado yi hyɛ me dzen.”

13. Yebesi dɛn enya sunsum krɔnkrɔn?

¹³ Ɔnnsɛ dɛ ‘yedum sunsum ne gya no.’ (1 Thess. 5:19) Paul dze sunsum krɔnkrɔn a ɔyɛ edwuma wɔ hɛn do no totoo gya ho. Sɛ yɛwɔ sunsum krɔnkrɔn a, ɔboa hɛn ma yɛdze nsi na ahokeka yɛ dza ɔtsen, na ɔhyɛ hɛn dzen ma yɛyɛ edwuma a Jehovah dze ahyɛ hɛn nsa no. (Rom. 12:11) Yebesi dɛn enya sunsum krɔnkrɔn? Ɔsɛ dɛ yɛbɔ mpaa, yesua Nyankopɔn n’Asɛm a ɔdze no sunsum no kaa mbarimba binom ma wɔkyerɛwee no, na yɛnye n’ahyehyɛdze a no sunsum kyerɛ no kwan no nantsew. Sɛ yɛyɛ dɛm a, ɔbɔboa hɛn ma yaada “sunsum no aba” edzi.​—Gal. 5:22, 23.

14. Sɛ yɛbɔkɔ do enya sunsum krɔnkrɔn a, ebɛnadze na ɔnnsɛ dɛ yɛyɛ? (Hwɛ mfonyin no so.)

 ¹⁴ Sɛ Jehovah dze no sunsum krɔnkrɔn no ma hɛn a, ɔsɛ dɛ yɛhwɛ yie paa na ‘yeenndum sunsum ne gya no.’ Hɔn a wɔkɔ do dwen dza ɔtsen ho, na hɔn abrabɔ ho tsew no nkotsee na Nyankopɔn dze no sunsum krɔnkrɔn no ma hɔn. Dɛm ntsi, sɛ yɛdwendwen ndzɛmba bɔn ho na yɛdze hɛnho hyɛ mu a, Jehovah ronnkɔ do mmfa no sunsum no mma hɛn. (1 Thess. 4:7, 8) Afei so, sɛ yɛbɔkɔ do enya sunsum krɔnkrɔn a, ɔnnsɛ dɛ ‘yebu nkɔnhyɛsɛm enyimtsia.’ (1 Thess. 5:20) “Nkɔnhyɛsɛm” a kyerɛwsɛm yi reka ho asɛm no nye nsɛm a Nyankopɔn nam no sunsum no do dze ama hɛn no. Bi nye dza ɔfa Jehovah ne da no nye mber a yɛtse mu yi ho. Ɔnnsɛ dɛ yɛtow hɛn adwen mu wɔ Jehovah ne da no ho na yenya adwen dɛ Har-Magedon remmba wɔ hɛn aber yi mu. Mbom ɔsɛ dɛ yɛma Jehovah ne da a ɔreba no yɛ ntsɛm wɔ hɛn adwen mu, yɛbɔ bra pa, na yɛda “nyamesompa” edzi aber nyina.​—2 Pet. 3:11, 12.

15. Yebesi dɛn atwe hɛnho efi ndaadaasɛm nye atorsɛm a ofi esunsum fi hɔ no ho? (1 Thessalonicafo 5:21)

¹⁵ Ɔrennkyɛr koraa, hɔn a wɔsoɛr tsia Nyankopɔn no, ɔkwan bi do no, wɔbɛpaa mu aka “Asomdwee nye ahotɔ” ho asɛm. (1 Thess. 5:3) Na atorsɛm a ofi esunsum fi hɔ bobu do wɔ asaase yi do, na iyi bɛdaadaa nyimpa pii. (Nyi. 16:13, 14) Hɛn a yɛyɛ Jehovah n’asomfo no so ɛ? Sɛ ‘yɛsɔ adze nyina hwɛ’ a, yɛremma atorsɛm a ɔtse dɛm no ndaadaa hɛn da. (Kenkan 1 Thessalonicafo 5:21.) Greek kasafua a wɔkyerɛɛ ase ‘hom nsɔ nhwɛ’ no, nna wɔdze dzi dwuma aber a wɔrosɔ sika kɔkɔɔ, dadze nye dza ɔkeka ho ahwɛ dɛ bi a ɔyɛ papa a. Iyi kyerɛ dɛ ɔsɛ dɛ yɛsɔ dza yɛtse na yɛkenkan no hwɛ dɛ ɔyɛ nokwar anaa. Nna no ho hia dɛ Thessalonicafo no dze dɛm afotu yi yɛ edwuma. Naaso hɛn paa na ɔsɛ dɛ yɛfa dɛm afotu yi enyibersɛm, osiandɛ ahohiahia kɛse no abɛn pɛɛ. Dɛm ntsi, nnyɛ asɛm biara a nkorɔfo bɛka no na ɔsɛ dɛ yɛgye dzi, mbom ɔsɛ dɛ yɛma hɛn adwen mu da hɔ na yɛdze nsɛm a yɛtse anaa yɛkenkan no toto dza Bible no nye Jehovah n’ahyehyɛdze no ka no ho. Sɛ yɛyɛ dɛm a, yɛremma atorsɛm a ofi esunsum fi hɔ no nndaadaa hɛn da.​—Mbɛ. 14:15; 1 Tim. 4:1.

16. Ebɛn enyidado a osi pi na yɛwɔ, na ebɛnadze na yeesi hɛn bo dɛ yɛbɛyɛ?

¹⁶ Yenyim dɛ Jehovah bɛgye no nkorɔfo nkwa wɔ ahohiahia kɛse no mu. Naaso dɛ ankorankor no, yennyim dza ɔbɔto hɛn ɔkyena. (Jas. 4:14) Naaso, dza yenyim nye dɛ, sɛ yewu ansaana ahohiahia kɛse no ahyɛ ase, anaa sɛ yetwa ahohiahia kɛse no na yɛkɔ do dzi Jehovah nokwar a, ɔbɛma hɛn daa nkwa. Hɔn a wɔasera hɔn no nye Christ bɔbɔ mu edzi adze wɔ sor. Nguan fofor no so bɛtsena ase daa wɔ Paradise asaase no do. Hom mma yɛnkɔ do mfa hɛn adwen nsi enyidado a osi pi a yɛwɔ no do na yɛnyɛ krado ntweɔn Jehovah ne da no!