Sɛ yɛbɔsɔ Jehovah n’enyi a, ɔsɛ dɛ yenya gyedzi. Naaso, Bible no ka dɛ “nnyɛ nyimpa nyina na wɔwɔ gyedzi.” (2 Thess. 3:2) Aber a ɔsomafo Paul kaa dɛm asɛm yi no, nna ɔreka “nyimpabɔnfo nye emumuyɛfo” a wɔsoɛr tsia no no ho asɛm. Naaso asɛm a ɔkae faa gyedzi ho yi so fa nkorɔfo afofor so ho. Adanse pefee a ɔwɔ hɔ a ɔma yehu dɛ Nyame bi wɔ hɔ na ɔno na ɔbɔɔ ndzɛmba nyina no, binom hyɛ da ara bu hɔn enyi gu do na wɔnngye nnto mu. (Rom. 1:20) Bi a binom bɛka dɛ wɔgye dzi dɛ obi wɔ hɔ a ɔwɔ tum paa. Naaso ɔnnyɛ biribi a ɔtse dɛm a obi bɛgye edzi no na ɔbɛma ɔasɔ Jehovah n’enyi.

Ɔsɛ dɛ yɛgye dzi paa dɛ Jehovah wɔ hɔ, na otua hɔn a wɔwɔ no mu gyedzi kɛse no ‘kaw.’ (Heb. 11:6) Gyedzi ka sunsum aba no ho, ntsi sɛ obi botum enya gyedzi a ɔtse dɛm a, obehia Nyankopɔn no sunsum krɔnkrɔn. Na sɛ obi benya sunsum krɔnkrɔn no bi a, ɔsɛ dɛ ɔserɛ Jehovah ma ɔma no bi. (Luke 11:​9, 10, 13) Adze tsitsir a sɛ yɛyɛ a ɔbɛma yeenya sunsum krɔnkrɔn no nye dɛ, yɛbɛkenkan Nyankopɔn n’Asɛm no a ɔmaa wɔdze no sunsum krɔnkrɔn kyerɛwee no. Afei, sɛ yɛkenkan wie a, yebotum adwendwen dza yɛakenkan no ho na yaabɔ mbɔdzen dɛ yɛdze bɛyɛ edwuma. Sɛ yɛyɛ dɛm a, yɛbɛma Jehovah kwan ma ɔdze no sunsum no aboa hɛn wɔ hɛn asetsena mu, na iyi bɔboa hɛn ma yeenya gyedzi a ɔbɛma yɛasɔ Jehovah n’enyi.