ADZESUA ASƐM 23
NDWOM 28 Nyia Jehovah Bɛfa No Nyɛnko
Jehovah To Nsa Frɛ Hɛn Dɛ Yɛmbɔsoɛ Ne Ntamadan Mu
“Me ntamadan so besi hɔn nkyɛn; na mebɛyɛ hɔn Nyankopɔn.”—EZEK. 37:27.
DZA YEBOSUA
Jehovah ato nsa afrɛ hɛn dɛ yɛmbɔsoɛ ne ntamadan mu, na ɔhwɛ hɛn yie so. Yɛbɔhwɛ mbrɛ yebesi akyerɛ dza ɔayɛ ama hɛn yi ho enyisɔ kɛse.
1-2. Ebɛn hokwan na Jehovah ama n’asomfo anokwafo enya?
SƐ OBI bisa wo dɛ Jehovah yɛ ebɛnadze ma wo a, ebɛn mbuae na edze bɛma no? Bi a ebɛka akyerɛ no dɛ: ‘Jehovah yɛ m’Egya, me Nyankopɔn, nye me Nyɛnko.’ Bi mpo a ewɔ abɔdzin afofor a edze frɛ Jehovah. Naaso, ihu Jehovah dɛ obi a ibotum akɔsoɛ no a?
2 Anyɛnkofa a ɔda Jehovah nye n’asomfo anokwafo ntamu no, Ɔhen David dze totoo ebusuabɔ a ɔda fiewura bi nye nkorɔfo a wɔabɔsoɛ no no ntamu ho. Ɔhen David bisaa dɛ: ‘Ao Jehovah, woana na ɔbɔsoɛ wo ntamadan mu? Woana na ɔbɛtsena wo bepɔw krɔnkrɔn no do?’ (Ndw. 15:1) Dɛm asɛm a Jehovah maa wɔkyerɛwee yi ma yehu dɛ yebotum abɔsoɛ Jehovah ne ntamadan mu, kyerɛ dɛ, yebotum abɛyɛ n’anyɛnkofo. Hwɛ hokwan kɛse ara a ɔtse dɛm!
JEHOVAH PƐ DƐ YƐBƆSOƐ NE NTAMADAN MU
3. Woana na odzii kan bɔsoɛɛ Jehovah ne ntamadan mu, na Jehovah nye obi a ɔbɔsoɛɛ no no nyina tsee nka dɛn?
3 Ansaana Jehovah robɔ biribiara no, nna nankotsee na ɔwɔ hɔ. Naaso odur beebi no, ɔbɔɔ n’Abakan no na ɔdze no baa ne ntamadan no mu. Jehovah n’enyi gyee paa dɛ ɔtoo nsa frɛɛ ne Ba no dɛ ɔmbɔsoɛ ne ntamadan no mu. Bible no ma yehu dɛ nna Jehovah pɛ ne Ba no n’asɛm paa. Jesus a nna ɔyɛ Jehovah no hɔhoe a odzi kan no so ‘dzii ehurusi wɔ Jehovah n’enyim daa.’—Mbɛ. 8:30.
4. Ekyir yi, woananom na Jehovah maa wɔbɔsoɛɛ ne ntamadan mu?
4 Ɔno ekyir no, Jehovah bɔɔ abɔfo no na ɔtoo nsa frɛɛ hɔn so dɛ wɔmbɔsoɛ ne ntamadan mu. Bible no frɛ abɔfo no ‘Nyame ne mba,’ na ɔka hɔn ho asɛm dɛ ɔyɛ hɔn dɛw dɛ wɔnye Jehovah tse. (Job 38:7; Dan. 7:10) Hɔn a wɔnye Nyankopɔn tse wɔ sor no, mfe pii twaa mu a nna hɔn nkotsee na wɔyɛ n’anyɛnkofo. Naaso ekyir yi, ɔbɔɔ nyimpa wɔ asaase do; nna hɔn so, wobotum abɔsoɛ ne ntamadan no mu. Ber rokɔ do no, nyimpa binom tse dɛ Enoch, Noah, Abraham, na Job bɔsoɛɛ Jehovah ne ntamadan mu. Bible no ka dɛm asomfo anokwafo yi ho asɛm dɛ nna wɔyɛ Nyankopɔn n’anyɛnkofo, na ‘wɔnye nokwar Nyankopɔn no nantsewee.’—Gen. 5:24; 6:9; Job 29:4; Isa. 41:8.
5. Ebɛnadze na yebotum esua efi nkɔnhyɛ a ɔwɔ Ezekiel 37:26, 27 no mu?
5 Ofi tsetse dze besi ndɛ, Jehovah akɔ do ato nsa afrɛ n’anyɛnkofo dɛ wɔmbɔsoɛ ne ntamadan mu. (Kenkan Ezekiel 37:26, 27.) Ezekiel no nkɔnhyɛ no ma yehu dɛ Nyankopɔn pɛ paa dɛ ɔnye n’asomfo anokwafo nya anyɛnkofa a no mu yɛ dzen. Ɔahyɛ hɔn bɔ dɛ, ɔnye hɔn “bedzi asomdwee ho ahyɛmu.” Dɛm nkɔnhyɛ no ma yehu dɛ, ber bi bɛba a hɔn a wɔwɔ enyidado dɛ wɔbɔkɔ sor nye hɔn a wɔwɔ enyidado dɛ wɔbɛtsena asaase yi do no bɔbɔ mu ayɛ “kuw kor,” na wɔdze koryɛ aatsena ne ntamadan no mu. (John 10:16) Ndɛ nye dɛm aber no!
BEEBI A YƐWƆ BIARA NYANKOPƆN HWƐ HƐN
6. Obi besi dɛn abɔsoɛ Jehovah ne ntamadan mu, na henfa na ne ntamadan no wɔ?
6 Bible no ma yehu dɛ tsetse no, nna nkorɔfo yɛ ntamadan da mu. Nna ntamadan no bɔ hɔn ho ban fi nsu, ewia na dza ɔkeka ho ho. Sɛ hɔho bi kɔsoɛ obi wɔ ne ntamadan mu a, nna ɔhwɛ kwan dɛ ntamadan no wura no bɔhwɛ no kama. Sɛ yehyira hɛnho do ma Jehovah a, nna ɔkyerɛ dɛ yɛabɔsoɛ ne ntamadan mu. (Ndw. 61:4) Ndzɛmba a ɔboa hɛn ma yɛnye Jehovah ne ntamu yɛ papa no, woebu do wɔ ntamadan no mu. Afei so, yeenya anyɛnkofo a hɔn so wɔabɔsoɛ Jehovah. Naaso Jehovah ne ntamadan no nnyi beebi pɔtsee bi. Bi a etu kwan akɔ ehyiadzi wɔ ɔman bi do ma ehyia nkorɔfo a hɔn so ɔyɛ hɔn dɛw dɛ wɔwɔ Nyankopɔn ne ntamadan mu. Mbrɛ ɔtse nye dɛ, Jehovah ne ntamadan no wɔ beebiara a n’asomfo anokwafo wɔ.—Nyi. 21:3.
7. Ebɛnadze ntsi na yebotum aka dɛ Jehovah n’asomfo anokwafo a woewuwu no nyina da ho ara wɔ ne ntamadan no mu? (Hwɛ mfonyin no so.)
7 Na Jehovah n’asomfo anokwafo a woewuwu no so ɛ? Yebotum aka dɛ wɔda ho ara wɔ Jehovah ne ntamadan no mu anaa? Nyew! Ebɛnadze ntsi na yebotum aka dɛm? Osiandɛ Jehovah kaa dɛm nkorɔfo yi na obu hɔn dɛ wɔda ho ara tse ase. Jesus kaa dɛ: ‘Dɛ Nyankopɔn nyan ewufo no, Moses mpo akyerɛ wɔ mbrɛ ɔkaa Haban no ho asɛm no. Hɔ no, ɔfrɛɛ Jehovah dɛ Abraham Nyankopɔn nye Isaac Nyankopɔn nye Jacob Nyankopɔn. Na Nyankopɔn nnyɛ ewufo Nyankopɔn: ɔyɛ atseasefo Nyankopɔn: osiandɛ ɔno n’afamu no hɔn nyina tse ase.’—Luke 20:37, 38, Ahyɛmu Fofor.
Anokwafo a woewuwu no mpo, yebotum aka dɛ wɔda ho ara wɔ Nyankopɔn ne ntamadan no mu (Hwɛ nkyekyɛmu 7)
MFASO A YENYA NYE DZA ƆSƐ DƐ YƐYƐ
8. Ebɛn mfaso na hɛn a yɛabɔsoɛ Jehovah ne ntamadan no mu no nya?
8 Yeebohu dɛ obi botum enya beebi ada wɔ ne ntamadan mu, na ɔsan so bɔ no ho ban fi biribiara a obotum epira no no ho. Jehovah ne ntamadan no so bɔ hɔn a wɔabɔsoɛ mu no ho ban fi biribiara a obotum asɛɛ wɔnye ne ntamu anyɛnkofa no, na ɔma wonya daakye ho enyidado. Sɛ yɛkɔ do takyer Jehovah ho na sɛ Satan tu n’enyi si hɛn do dɛ dɛn ara mpo a, dza obotum dze ayɛ hɛn no renntsena hɔ afebɔɔ. (Ndw. 31:23; 1 John 3:8) Jehovah no wiadze fofor no mu no, ɔbɔkɔ do abɔ n’anyɛnkofo anokwafo ho ban efi biribiara a ɔbɛsɛɛ wɔnye ne ntamu no ho. Afei so, obeyi owu efi hɔ korakora.—Nyi. 21:4.
9. Ebɛnadze na Jehovah pɛ dɛ hɔn a wɔabɔsoɛ ne ntamadan mu no yɛ?
9 Ɔyɛ hɛn dɛw paa dɛ yɛabɔsoɛ Jehovah ne ntamadan mu. Nokwasɛm nye dɛ, yebotum nye no enya ebusuabɔ daa. Naaso sɛ yɛpɛ dɛ yɛkɔ do tsena Jehovah ne ntamadan no mu a, ebɛnadze na ɔsɛ dɛ yɛyɛ? Sɛ ekɔ obi ne fie a, ɔsɛ dɛ ihu dza nyimpa no pɛ dɛ eyɛ nye dza ɔmmpɛ. Bi a ɔbɛpɛ dɛ iyi wo mpaboa gu abow no ano ansaana ewura ne dan no mu, na dɛmara so na ɔsɛ dɛ eyɛ. Hɛn so, yɛpɛ dɛ yehu dza Jehovah hwehwɛ fi hɔn a wɔpɛ dɛ wɔkɔ do tsena ne ntamadan no mu no hɔ. Ɔdɔ a yɛwɔ ma Jehovah no kenyan hɛn ma yɛyɛ dza yebotum biara dze ‘sɔ n’enyi koraa.’ (Col. 1:10) Jehovah yɛ hɛn nyɛnko, naaso ɔsan so yɛ hɛn Nyankopɔn nye hɛn Egya, ntsi ɔfata dɛ yedzi no nyi. (Ndw. 25:14) Dɛm ntsi, ɔnnsɛ dɛ hɛn werɛ fir da dɛ yɛdze obu kɛse bɛma Jehovah aber nyina. Obu a ɔtse dɛm no bɔboa hɛn amma yaannyɛ biribi a Jehovah kyir. Yɛpɛ dɛ yɛbrɛ hɛnho adze na yɛnye Nyankopɔn nantsew aber nyina.—Mic. 6:8.
JEHOVAH NYE ISRAELFO NO DZII NO YIE WƆ SAR NO DO
10-11. Mbrɛ Jehovah nye Israelfo no dzii wɔ Sinai sar no do no, ebɛn kwan do na ɔma yehu dɛ Jehovah nnyɛ enyimhwɛ?
10 Jehovah n’anyɛnkofo a wɔabɔsoɛ ne ntamadan no mu no, ɔnye hɔn mu biara dzi no yie. (Rom. 2:11) Sɛ yɛhwɛ mbrɛ Jehovah nye Israelfo no dzii wɔ Sinai sar no do no a, ɔma yehu dɛ Jehovah nye n’asomfo dzi no yie ampa.
11 Aber a Jehovah gyee Israelfo no fii nkowaasom mu wɔ Egypt no, ɔmaa Israelfo no yɛɛ ntamadan na oyiyii asɔfo ma wɔsoom no wɔ hɔ. Afei so, Jehovah dze ntamadan no ho edwuma no bi hyɛɛ Levifo no nsa. Hɔn a nna wɔsom wɔ ntamadan no mu anaa hɔn a nna wɔbɛn ntamadan no, nna Jehovah hwɛ hɔn yie kyɛn Israelfo nkaa no anaa? Dabi! Jehovah nnyɛ enyimhwɛ.
12. Aber a nna Israelfo no nam sar no do no, ebɛnadze na Jehovah yɛe dze kyerɛɛ dɛ ɔnnyɛ enyimhwɛ? (Exodus 40:38) (Hwɛ mfonyin no so.)
12 Sɛ nna Israelnyi bi som wɔ ntamadan no mu o, sɛ ɔnnsom wɔ mu o, sɛ ɔtse bɛn ntamadan no o, sɛ ɔnntse mmbɛn o, nna obotum abɛyɛ Jehovah ne nyɛnko. Dɛ mfatoho no, mununkum dum na ogya dum a nna ɔwɔ ntamadan no do no, Jehovah hwɛe hun dɛ ɔmamfo no nyina botum ehu. (Kenkan Exodus 40:38.) Sɛ mununkum no dze n’enyi kyerɛ beebi fofor a, nna Israelmba a wɔnntse mmbɛn ntamadan no mpo tum hu. Sɛ ɔba no dɛm a, nna wɔboaboa hɔn ndzɛmba ano na wotutu hɔn ntamadan, na wɔnye Israelfo nkaa no bɔ mu tu dzi mununkum no ekyir. (Nka. 9:15-23) Ntotorobɛnto ebien no ne ngyegyee a nna ɔma Israelfo no hu dɛ ber aso dɛ wotu no, nna Israelnyi biara botum atse. (Nka. 10:2) Ɔda edzi pefee dɛ sɛ obi tse bɛn ntamadan no a, nna ɔno nnkyerɛ dɛ ɔnye Jehovah ntamu yɛ papa kyɛn hɔn a nna wɔnntse mmbɛn ntamadan no. Mbom no, nna Israelnyi biara botum abɛyɛ Jehovah ne nyɛnko na obotum enya awerɛhyɛmu dɛ Jehovah bɛkyerɛ no kwan na ɔbɔbɔ no ho ban so. Ndɛ so, ɔmmfa ho beebiara a yɛtse wɔ asaase yi do no, Jehovah dɔ hɛn, ɔhwɛ hɛn, na ɔbɔ hɛn ho ban so.
Ntamadan no a nna osi nseraban no ne mfinimfin no ma yehu dɛ Jehovah nnyɛ enyimhwɛ (Hwɛ nkyekyɛmu 12)
NDƐ SO, JEHOVAH NYE OBIARA DZI NO YIE
13. Ndɛ, ebɛnadze na Jehovah yɛ dze kyerɛ dɛ ɔnnyɛ enyimhwɛ?
13 Ndɛ, Nyankopɔn n’asomfo binom tse bɛn wiadze nyina edwumayɛbea tsir anaa Bethel a ɔwɔ hɔn man mu no. Binom mpo wɔ hɔ a, wɔyɛ edwuma wɔ dɛm mbea ahorow yi. Ɔno ntsi, dɛm nkorɔfo yi tum dze hɔnho hyɛ dwumadzi ahorow a ɔkɔ do wɔ dɛm mbea ahorow no mu, na wonya hokwan nye hɔn a wodzi ndzɛmba enyim wɔ ahyehyɛdze no mu no bɔ. Binom yɛ amansin do ahwɛfo, akwampaafo etsitsir, asɛmpatserɛwfo, nye dza ɔkeka ho. Yɛrekasa yi, bi a nyimpa kakraabi a wɔyɛ ber nyina som edwuma tsitsir no bi no, ennka ho. Naaso, ka w’akoma to wo yamu osiandɛ Jehovah dɔ n’asomfo a wɔabɔsoɛ ne ntamadan no mu no nyina. Afei so, ɔdwen hɔn ho na ɔhwɛ hɔn. (1 Pet. 5:7) Jehovah ma n’asomfo nyina nsa ka ndzɛmba a ɔbɛma wɔnye ne ntamu ayɛ papa. Afei so, ɔma hɔn akwankyerɛ na ɔbɔ hɔn ho ban.
14. Ebɛnadze bio na Jehovah yɛ dze kyerɛ dɛ ɔnnyɛ enyimhwɛ?
14 Adze fofor so a ɔma yehu dɛ Jehovah nnyɛ enyimhwɛ nye dɛ, ɔhwɛ hu dɛ obiara a ɔwɔ asaase yi do no ne nsa botum aka Bible no bi na wɔakenkan. Kasa ahorow ebiasa na wodzii kan dze kyerɛɛw Bible no. Ɔno nye Hebrew, Aramaic, na Greek. Hɔn a wotum kenkan kasa ahorow a wodzii kan dze kyerɛɛw Bible no, wɔnye Jehovah ntamu yɛ papa kyɛn hɔn a wonntum nnkenkan no anaa? Oho, ɔnntse dɛm koraa.—Matt. 11:25.
15. Ebɛn adanse na ɔma yehu dɛ Jehovah nnyɛ enyimhwɛ? (Hwɛ mfonyin no so.)
15 Sɛ yɛakɔ skuul edu ekyir o, sɛ yɛnnkɔree nndur ekyir o, sɛ yetum kenkan kasa ahorow a wodzii kan dze kyerɛɛw Bible no o, sɛ yenntum nnkenkan o, ɔnnyɛ ɔno na Jehovah begyina do dze ato nsa afrɛ hɛn dɛ yɛmbɛyɛ n’anyɛnkofo. Dɛ nkyɛ Jehovah bɛma hɔn a wɔakɔ skuul edu ekyir no nkotsee atse n’Asɛm no ase no, ɔnnyɛ no dɛm, mbom ɔma obiara a ɔwɔ asaase yi do beebiara no tum tse n’Asɛm no ase. Wɔakyerɛ n’Asɛm Bible no ase akɔ kasa ahorow pii mu. Dɛm ntsi, Bible no botum aboa nyimpa a wɔwɔ wiadze yi mu beebiara, na wobotum so esua mbrɛ wobesi abɛyɛ Jehovah n’anyɛnkofo.—2 Tim. 3:16, 17.
Ebɛn kwan do na Bible no a obiara tum kenkan bi wɔ ne kasaa mu no yɛ adanse a ɔkyerɛ dɛ Jehovah nnyɛ enyimhwɛ? (Hwɛ nkyekyɛmu 15)
KƆ DO ARA TSENA JEHOVAH NE NTAMADAN NO MU
16. Dɛ mbrɛ Asomafo Ndwuma 10:34, 35 ma yehu no, yebesi dɛn akɔ do ara atsena Jehovah ne ntamadan mu?
16 Ɔyɛ hokwan kɛse dɛ Jehovah ato nsa afrɛ hɛn dɛ yɛmbɔsoɛ ne ntamadan mu. Ne yamu yie paa, na no dɔ na n’ahɔhoyɛ su dze, wɔnnka. Afei so, Jehovah nnyɛ enyimhwɛ. Ɔmmfa ho beebi a etse, beebi a akɔ skuul ekodu, ɔman anaa ebusua a ifi mu, mfe a edzi, anaadɛ eyɛ ɔbarimba anaa ɔbaa no, ɔgye hɛn nyinara awaawaa etuu. Naaso, hɔn a wotsie no na wɔyɛ dza ɔpɛ no nkotsee na wobotum abɔsoɛ ne ntamadan no mu.—Kenkan Asomafo Ndwuma 10:34, 35.
17. Henfa bio na yebenya nsɛm a ɔbɔboa hɛn ma yaakɔ do atsena Jehovah ne ntamadan mu?
17 Sɛ yɛhwɛ Ndwom 15:1 no a, yebohu dɛ David bisaa dɛm nsɛm yi: ‘Ao Jehovah, woana na ɔbɔsoɛ wo ntamadan mu? Woana na ɔbɛtsena wo bepɔw krɔnkrɔn no do?’ Jehovah maa David yiyii dɛm nsɛmbisa yi ano. Adzesua a odzi hɔ mu no, yɛbɔhwɛ ndzɛmba pɔtsee bi a sɛ yɛyɛ a, ɔbɛma yɛakɔ do atsena Jehovah ne ntamadan no mu.
NDWOM 32 Gyina Jehovah N’afa!
