1. Dɛ mbrɛ Matthew 24:9 kyerɛ no, ebɛnadze ntsi na sɛ wiadze no tan hɛn a ɔnnsɛ dɛ ɔyɛ hɛn nwanwa?

JEHOVAH bɔɔ hɛn dɛ yɛndɔ afofor na hɔn so wɔndɔ hɛn bi. Dɛm ntsi, sɛ obi tan hɛn a, ɔyɛ hɛn yaw na bi mpo a, yɛbɔbɔ hũ. Dɛ nhwɛdo no, akyerɛbaa bi a wɔfrɛ no Georgina a ɔwɔ Europe kãa dɛ: “Aber a midzii mfe 14 no, osiandɛ nna morosom Jehovah ntsi, me maame bɛtaan me. Metsee nka dɛ oeyi me tokyen, na mibenyaa adwen dɛ gyama meyɛ nyimpa bɔn.” * Onua bi a wɔfrɛ no Danylo kãa dɛ: “Aber a nsordaafo bobɔɔ me, wɔhyehyɛɛ me ahorba, na wohunahunaa me osiandɛ meyɛ Jehovah Adasefo no mu kor ntsi no, m’akoma tui, na metsee nka dɛ woegu m’enyim ase.” Ɔtan a ɔtse dɛm no yɛ yaw, naaso ɔnnyɛ hɛn nwanwa. Osiandɛ, Jesus kãe too hɔ dɛ wɔbɛtan hɛn.​—Kenkan Matthew 24:9.

2-3. Ebɛnadze ntsi na wɔtan Jesus n’ekyirdzifo?

² Wiadze no tan Jesus n’ekyirdzifo. Ebɛnadze ntsi a? Osiandɛ, tse dɛ Jesus no, ‘yemmfi wiadze.’ (John 15:17-19) Ntsi ɔwɔ mu dɛ yɛdze enyidzi ma wiadze etumfo dze, naaso yɛnnsom hɔn anaa ndzɛmba a ogyina hɔ ma hɔn no. Jehovah nkotsee na yɛsom no. Yɛgye to mu dɛ Nyankopɔn na ɔwɔ ho kwan dɛ odzi nyimpa do tum; dɛm ho kwan yi, Satan nye “n’asefo” soɛr tsia dzendzenndzen. (Gen. 3:1-5, 15) Yɛkã Nyankopɔn n’Ahendzi no ho asɛm dɛ ɔno nye adasamba hɛn enyidado kortsee, na ɔrennkyɛr ɔbɛsɛɛ hɔn a wɔsoɛr tsia no no nyinara. (Dan. 2:44; Nyi. 19:19-21) Dɛm asɛm no yɛ asɛmpa ma ahobrɛadzefo, naaso ɔyɛ asɛm bɔn ma ndzebɔnyɛfo.​—Ndw. 37:10, 11.

³ Afei so, osiandɛ yɛdze Nyankopɔn ne tsenenee gyinapɛn bɔ hɛn bra ntsi wɔtan hɛn. Dɛm gyinapɛn yi nye wiadze no n’abrabɔ  gyinapɛn a asɛɛ na aprɔw no nnhyia koraa. Dɛ nhwɛdo no, ɔbrakyew a ɔkɔr do wɔ Sodom na Gomorrah ma ntsi Nyankopɔn sɛɛ hɔn no, ndɛ nyimpa piinara yi hɔn enyim gye ndzeyɛɛ a ɔtse dɛm no to mu! (Jude 7) Osiandɛ yɛdze Bible mu gyinapɛn a ɔfa dɛm ndzeyɛɛ yi ho bɔ hɛn bra ntsi nyimpa piinara dzi hɛnho fɛw, na wɔkã dɛ yɛyɛ amambɔefo!​—1 Pet. 4:3, 4.

4. Sɛ nkorɔfo tan hɛn a, ebɛn su na ɔhyɛ hɛn dzen?

⁴ Sɛ nkorɔfo tan hɛn na wɔhyehyɛ hɛn ahorba a, ebɛnadze na obotum aboa hɛn ma yeegyina ano? Ohia dɛ yenya gyedzi a no mu yɛ dzen dɛ Nyankopɔn bɔboa hɛn. Tse dɛ kokyɛm no, hɛn gyedzi “botum edum ɔbɔn no n’egyenndua a ogya wɔ ano no.” (Eph. 6:16) Naaso, ɔnnyɛ gyedzi nko na yehia, na mbom yehia ɔdɔ so. Ebɛnadze ntsi a? Osiandɛ ɔdɔ “no bo nnhaw no.” Mbom no ɔgye ndzɛmba a ɔyɛ yaw nyina to mu, na ogyina ano so. (1 Cor. 13:4-7, 13) Hom mma yɛnhwɛ mbrɛ ɔdɔ a yɛwɔ ma Jehovah, ɔdɔ a yɛwɔ ma hɛn mfɛfo asomfo, nye ɔdɔ a yɛwɔ ma hɛn atamfo mpo no si boa hɛn ma yegyina enyitan ano.

5. Ebɛn kwan do na ɔdɔ a nna Jesus wɔ ma n’Egya no hyɛɛ no dzen?

⁵ Adze rebɛkye ma Jesus n’atamfo eku no no, ɔkãa kyerɛɛ n’ekyirdzifo anokwafo no dɛ: “Modɔ Egya no, [ntsi] dɛ mbrɛ Egya no hyɛɛ me no, dɛmara na meyɛ.” (John 14:31) Ɔdɔ a nna Jesus wɔ ma Jehovah no hyɛɛ no dzen ma otumii gyinaa nsɔhwɛ a nna ɔda n’enyim no ano. Dɛmara na hɛn so, ɔdɔ a yɛwɔ ma Jehovah no botum aboa hɛn.

6. Dɛ mbrɛ Romefo 5:3-5 kyerɛ no, Jehovah n’asomfo tse nka dɛn wɔ gyina a wobegyina ɔtan a wiadze no dze tan hɔn no ano no ho?

⁶ Ofi tsetse nyina, ɔdɔ a Jehovah n’asomfo wɔ ma no no na ɔboa hɔn ma wogyina ɔtaa ano. Dɛ nhwɛdo no, aber a Jewfo asɛndziibea kunyin a ɔwɔ tum no hyɛɛ asomafo no dɛ mma wɔnnkã asɛmpa no, ɔdɔ a wɔwɔ ma Nyankopɔn no kaa hɔn ma ‘wotsiee Nyankopɔn asɛm mbom kyɛɛn nyimpa dze.’ (Andw. 5:29; 1 John 5:3) Ndɛ so, ɔdɔ a no mu yɛ dzen a hɛn nuanom wɔ ma Jehovah no boa hɔn ma wogyina pintsinn aber a aban ahorow a wɔwɔ tum na hɔn tsirmu yɛ dzen soɛr tsia hɔn no. Yɛmma iyi mmbu hɛn abaw mu, mbom yebu no dɛ ɔyɛ ho kwan a yeenya a yɛdze begyina ɔtan a wiadze no dze tan hɛn no ano.​—Andw. 5:41; kenkan Romefo 5:3-5.

7. Sɛ hɛn ebusuafo soɛr tsia hɛn a, ɔsɛ dɛ yɛyɛ hɛn adze dɛn?

⁷ Obotum aba dɛ ɔsoɛrtsia a ofi hɛnankasa hɛn ebusuafo hɔ no botum ayɛ nsɔhwɛ kor a no mu yɛ dzen paara a ɔsɛ dɛ yegyina ano. Sɛ yɛhyɛ ase dɛ yerusũa nokwar no a, bi a hɛn ebusuafo binom bɛkã dɛ wɔadaadaa hɛn. Bi a binom so bosusu dɛ hɛn adwen asɛɛ. (Fa toto Mark 3:21 ho.) Bi mpo a wɔbɛyɛ hɛn ayakayakadze anaa wɔbɛkã asɛm ma wɔaayɛ hɛn yaw. Ɔnnsɛ dɛ ɔsoɛrtsia a ɔtse dɛm no yɛ hɛn nwanwa. Osiandɛ Jesus kãa dɛ: “Nyimpa n’atamfo bɛyɛ ne fifo.” (Matt. 10:36) Naaso, ɔmmfa ho mbrɛ hɛn ebusuafo nye hɛn bedzi biara no, yerummbu hɔn dɛ wɔyɛ hɛn atamfo. Mbom no, ber a ɔdɔ a yɛwɔ ma Jehovah reyɛ kɛse no, nna ɔdɔ a yɛwɔ ma nyimpa no so reyɛ kɛse. (Matt. 22:37-39) Naaso hɛn gyinapɛn a ogyina Bible mu mbra nye ngyinadonsɛm do no, yerummbu do da mmfa nnsɔ nyimpa enyi.

8-9. Ebɛnadze na ɔboaa akyerɛbaa kor bi ma ogyinaa pintsinn ɔmmfa ho ɔsoɛrtsia a no mu yɛ dzen a ohyiae no?

⁸ Georgina a yɛakã no ho asɛm no bɔɔ mbɔdzen gyinaa pintsinn ɔmmfa ho ɔsoɛrtsia a no mu yɛ dzen a ne maame dze baa no do no. Georgina kãa dɛ: “Menye me maame nyina na yɛhyɛɛ ase dɛ yɛnye Adasefo no rusũa Bible no. Naaso abosoom esia ekyir, aber a nna mepɛ dɛ  mokɔ asafo nhyiamu no, me maame no suban sesae koraa. Mubohun dɛ nna ɔnye awaafo dzi nkitaho, na sɛ ɔnye me rekasa a, ɔkekã hɔn atorsɛm no bi kyerɛ me. Afei so nna ɔhyehyɛ me ahorba, ɔtwetwe me tsinhwi, omia mo kɔn, na ɔtow mo nwoma gu. Midzii mfe 15 no mobɔɔ esu. Me maame yɛe araa dɛ ɔbɛma meegyaa dɛ morosom Jehovah, ntsi ɔdze me kɔtoo beebi a wɔboa mbofra a wɔwɔ suban bɔn ma wɔsesa; nna mbofra a wɔwɔ hɔ no bi nom ndubɔn na binom so dzi nsɛmbɔn. Sɛ ɔba no dɛ obi a nkyɛ ɔsɛ dɛ ɔdɔ wo na ɔhwɛ wo no soɛr tsia wo a, ɔyɛ a ɔyɛ dzen papaapa dɛ ibegyina ano.”

⁹ Ebɛnadze na ɔboaa Georgina ma ogyinaa tsebea no ano? Ɔkãa dɛ: “Da a mekenkaan Bible mũ no nyinara wiei no, dɛm da no ara na me maame hyɛɛ ase dɛ ɔrosoɛr etsia me. Dɛm aber no na mebɛgyee dzii dɛ mehu nokwar no, na metsee nka dɛ mabɛn Jehovah kɛse. Nna mobɔ no mpaa dabaa, na otsiee me so. Ber a nna mowɔ beebi a me maame dze me kɔtoe no, nna akyerɛbaa bi ma mokɔ ne fie ma yɛbɔ mu sũa Bible no. Dɛm aber no nyinara, sɛ nna mokɔ Ahendzi Asa do a, enuanom a wɔwɔ hɔ no hyɛ me nkuran. Wɔfaa me dɛ hɔn busuanyi. Mubohun kofee dɛ, ɔmmfa ho mbrɛ hɛn asoɛrtsiafo no tse biara, Jehovah noho yɛ dzen kyɛn hɔn koraa.”

10. Ebɛn ahotodo na yebotum enya wɔ Jehovah, hɛn Nyankopɔn no mu?

¹⁰ Ɔsomafo Paul kyerɛɛw dɛ, biribiara “runntum nntsew hɛn efi Nyankopɔn dɔ no a ɔwɔ hɛn Ewuradze Christ Jesus mu no ho.” (Rom. 8:38, 39) Ɔwɔ mu, bi a yebohu amandze mber kakra dze, naaso Jehovah wɔ hɛn afã aber nyina dɛ ɔbɛkyekye hɛn werɛ na ɔaahyɛ hɛn dzen. Afei so, dɛ mbrɛ Georgina n’asɛm no ma yehu no, Jehovah nam hɛn nuanom a yɛnye hɔn wɔ asafo no mu no do boa hɛn.

11. Nna ebɛn kwan do na ɔdɔ a Jesus kãa ho asɛm wɔ John 15:12, 13 no bɔboa n’esuafo no? Ma ho nhwɛdo.

¹¹ Anafua a adze rebɛkye ma Jesus ewu no, ɔkaa n’esuafo no dɛ wɔndodɔ hɔnho. (Kenkan John 15:12, 13.) Nna onyim dɛ ɔdɔ a pɛsɛankonya nnyi mu a wɔbɛda no edzi no bɔboa hɔn ma wɔaayɛ kor na woeetum egyina ɔtan a wiadze no bɛtan hɔn no ano. Hom mma yensusu dza asafo a nna ɔwɔ Thessalonica no yɛe no ho nhwɛ. Ber a wɔtseew asafo no, enuanom no hyiaa ɔtaa. Naaso, enuanom a nna wɔwɔ hɔ no kuraa hɔn emudzi mu na wɔdaa ɔdɔ edzi dze yɛɛ nhwɛdo. (1 Thess. 1:3, 6, 7) Paul hyɛɛ hɔn nkuran dɛ wɔnkɔ do nda ɔdɔ edzi ma ‘ɔmbor do pii’ mpo. (1 Thess. 4:9, 10) Nna ɔdɔ bɛka  hɔn ma wɔaakyekye hɔn a wɔahaw no werɛ na wɔaaboa hɔn a wɔyɛ mberɛw no. (1 Thess. 5:14) Wotsiee akwankyerɛ a Paul dze maa hɔn no, osiandɛ wɔ ne krataa a otsĩa ebien a ɔkyerɛwee wɔ bɛyɛ afe kor ekyir no, nna obotum akã dɛ: “Dɔ a hom nyina dze dodɔ homho nkorkor no adɔɔ sõ.” (2 Thess. 1:3-5) Ɔdɔ a nna wɔwɔ ma hɔnho no boaa hɔn ma wogyinaa nsɛndzendzen nye ɔtaa a wohyiae no ano.

12. Aber a nna ɔkõ rokɔ do wɔ ɔman bi mu no, ebɛn kwan do na enuanom no daa ɔdɔ edzi kyerɛɛ hɔnho?

¹² Hom mma yɛnhwɛ dza ɔtoo Danylo a yeedzi kan akã noho asɛm no nye ne yer. Aber a akodzi a nna ɔrokɔ do wɔ hɔn man no mu tserɛwee kodur kurow a wɔwɔ mu no, nna wɔda ho ara kɔ asafo nhyiamu, wɔfa kwan biara a wobotum do kã asɛm no na wɔnye enuanom kyɛ edziban biara a wɔwɔ. Da kor bi, nsordaafo a wokitsakitsa akodze kɔr Danylo no do wɔ ne fie. Danylo kãa dɛ: “Wɔhyɛɛ me dɛ menkã dɛ mennyɛ Ɔdasefo bio. Aber a mannyɛ no, wɔboor me, na wɔyɛɛ dɛ mbrɛ wɔrotow itur no abɔ me, naaso wɔtowee faa me tsir do. Wɔrokɔ no, wohunahunaa hɛn, na wɔkãa dɛ wɔbɛsan aba abɔto me yer mbɔndar. Naaso, ntsɛmara na enuanom no yɛɛ nhyehyɛɛ ma yɛkɔfoow keteke kɔr kurow fofor do. Ɔdɔ a enuanom no daa no edzi kyerɛɛ hɛn no, mo werɛ nnkefir da. Yekodur kurow no mu so, enuanom a wɔwɔ hɔ no maa hɛn edziban, na wɔboaa me ma minyaa edwuma nye beebi a yɛbɛtsena! Dɛm ntsi, Adasefo afofor a osian ɔkõ no ntsi woguanee no, hɛn so yetumii gyee hɔn baa hɛn fie.” Suahu a ɔtsetse dɛm no ma yehu dɛ ɔdɔ a yɛwɔ ma hɛnho dɛ Christianfo no tum boa hɛn ma yegyina enyitan ano.

13. Ebɛn kwan do na sunsum krɔnkrɔn boa hɛn ma yɛkɔ do som Jehovah aber mpo a nkorɔfo tan hɛn no?

¹³ Jesus kãa kyerɛɛ n’ekyirdzifo dɛ wɔndɔ hɔn atamfo. (Matt. 5:44, 45) Ana ɔyɛ mberɛw dɛ yɛbɛyɛ iyi? Dabida! Naaso Nyankopɔn no sunsum krɔnkrɔn no botum aboa hɛn ma yaayɛ iyi. Osiandɛ ɔdɔ, abotar, ayamuyie, ɔdwe nye ahohyɛdo ka Nyankopɔn no sunsum no aba no ho. (Gal. 5:22, 23) Dɛm su ahorow yi boa hɛn ma yegyina enyitan ano. Hɔn a nna wɔsoɛr tsia hɛn no mu pii asesa adwen a nna wɔwɔ wɔ hɛnho no, osiandɛ hɔn kunnom, hɔn yernom, hɔn mba, anaa hɔn efipamfo daa dɛm su yi edzi kyerɛɛ hɔn. Afei so hɔn mu piinara abɛyɛ hɛn nuanom. Ntsi, sɛ ɔyɛ dzen ma wo dɛ ebɔdɔ hɔn a wɔtan wo osiandɛ erosom  Jehovah no ntsi a, bɔ mpaa serɛ sunsum krɔnkrɔn. (Luke 11:13) Na nya gyedzi dɛ setsie a ebɛyɛ ama Nyankopɔn aber nyinara no nye adze a no ho hia kyɛn biara a ɔsɛ dɛ eyɛ.​—Mbɛ. 3:5-7.

14-15. Ebɛn kwan do na Romefo 12:17-21 boaa Yasmeen ma ɔdaa ɔdɔ edzi kyerɛɛ no kun ɔmmfa ho ɔsoɛrtsia a no mu yɛ dzen a ɔdze baa no do no?

¹⁴ Hom mma yensusu Yasmeen a ɔwɔ Middle East n’asɛm no ho nhwɛ. Aber a ɔbɛyɛɛ Jehovah Adasefo no mu kor no, no kun nyaa adwen dɛ wɔadaadaa no, ntsi ɔbɔɔ mbɔdzen biara dɛ ɔbɛma oegyaa dɛ ɔrosom Nyankopɔn. No kun no hyehyɛɛ no ahorba, na ɔkãa kyerɛɛ n’ebusuafo, ɔsɔfo bi nye ɔkɔmfo bi dɛ wonhunahuna no, na wɔmbɔ no sombo dɛ ɔdze mpaapaamu reba n’ebusua mu. Na ber bi mpo a nna wɔreyɛ asafo nhyiamu no, no kun no kɔree kɛhyehyɛɛ enuanom no ahorba! Mpɛn pii no nna Yasmeen sũ, osiandɛ nna wɔnye no nndzi no yie.

¹⁵ Wɔ Ahendzi Asa do no, nna enuanom no kyekye Yasmeen no werɛ na wɔhyɛ no dzen. Asafo mu mpanyimfo hyɛɛ no nkuran dɛ ɔmfa asɛm a ɔwɔ Romefo 12:17-21 no nyɛ edwuma. (Kenkan.) Yasmeen kãa dɛ: “Nna ɔyɛ dzen ma me dze, naaso meserɛɛ Jehovah dɛ ɔmboa me, na meyɛɛ dza mubotum biara dɛ medze dza Bible no kã no bɛyɛ edwuma. Dɛm ntsi, sɛ nna mo kun hyɛ da ara yɛ gyaadze hɔ fĩ a misiesie hɔ, ɔhyehyɛ me ahorba a, menye no kasa bɔkɔɔ, na sɛ ɔyar a mohwɛ no.”

16-17. Ebɛnadze na isũa fi Yasmeen no nhwɛdo no mu?

¹⁶ Mfaso pii fii mbɔdzen a Yasmeen bɔɔ dɛ ɔbɛda ɔdɔ edzi akyerɛ no kun no mu bae. Ɔkãa dɛ: “Afei dze mo kun benyaa mo mu ahotodo kɛse, osiandɛ nna onyim dɛ mebɛkã nokwar aber nyina. Sɛ ɔba no dɛ yɛrekã ɔsom ho asɛm a, afei dze nna ofi obu mu tsie me, na ɔgyee too mu dɛ ɔbɛma yɛatsena asomdwee mu. Ndɛ, ɔkã kyerɛ me dɛ memfa enyigye nkɔ asafo nhyiamu. Seseiara, hɛn ebusua asetsena ayɛ kama, na yɛwɔ asomdwee mapa. Mohwɛ kwan dɛ mo kun so bosũa nokwar no na ɔaabɛka moho ma yaabɔ mu asom Jehovah.”

¹⁷ Yasmeen no nhwɛdo no ma yehu dɛ, ɔdɔ wɔ hɔ yi “ɔsoa adze nyina; . . . onya adze nyina ho enyidado; ɔsɔw adze nyina.” (1 Cor. 13:4, 7) Ɔtan n’ano botum ayɛ dzen na wɔaasɛɛ ndzɛmba, naaso tum a ɔdɔ wɔ dze, wɔnnkã. Ɔdɔ ma hɔn a wɔtan hɛn no mpo tum sesa hɔn suban. Na ɔma Jehovah n’enyi gye. Naaso, sɛ asoɛrtsiafo kɔ do tan hɛn mpo a, yebotum akɔ do enya enyigye. Ebɛn kwan do?

18. Ebɛnadze ntsi na hɛn enyi botum agye ber a wɔtan hɛn no?

¹⁸ Jesus kãa dɛ: “Nhyira akã hom ber a nyimpa  bekyir hom.” (Luke 6:22) Naaso ɔnnyɛ hɛn pɛ dɛ wɔbɛtan hɛn. Na ɔnnyɛ hɛn enyigye so dɛ, osian hɛn gyedzi ntsi yebehyia ɔtaa. Ebɛnadze ntsi na hɛn enyi botum agye ber a wɔtan hɛn no? Ma yɛnhwɛ siantsir ebiasa bi. Odzi kan, sɛ yegyina ɔtan ano a, yenya Nyankopɔn n’enyimpa. (1 Pet. 4:13, 14) Otsĩa ebien, hɛn gyedzi bɛyɛ dza osi pi na ɔyɛ dzen. (1 Pet. 1:7) Afei, otsĩa ebiasa, yebenya akatua a ɔkyɛn biara a yerunntum mmfa nntoto biribiara ho​—onnyiewiei nkwa.​—Rom. 2:6, 7.

19. Aber a wɔhwee asomafo no, ebɛnadze ntsi na hɔn enyi gyee?

¹⁹ Jesus no wusoɛr ekyir no, annkyɛr na asomafo no nyaa enyigye a ɔkãa ho asɛm no. Aber a wɔhwee hɔn na wɔhyɛɛ hɔn dɛ wongyaa asɛmpa no kã no, hɔn enyi gyee. Ebɛnadze ntsi a? Osiandɛ wɔtsee nka dɛ “woebu hɔn bi dɛ wɔsɛ dɛ wɔbɔ hɔn adapaa wɔ [Jesus ne] dzin no ntsi.” (Andw. 5:40-42) Nna ɔdɔ a wɔwɔ ma hɔn Wura no mu yɛ dzen kyɛn suro a wosuro hɔn atamfo no. Na wɔkɔr do kãa asɛmpa no a “woenngyaa,” wɔyɛɛ dɛm dze kyerɛɛ dɛ wɔdɔ hɔn Wura no. Ndɛ, hɛn nuanom piinara kɔ do dze nokwardzi som ɔmmfa ho nsɛndzendzen a wohyia no. Wonyim dɛ Jehovah no werɛ nnkefir hɔn ndwuma, nye ɔdɔ a wɔda no edzi wɔ ne dzin no ho no.​—Heb. 6:10.

20. Ebɛnadze na yebosusu ho wɔ adzesua a odzi hɔ no mu?

²⁰ Ber tsentsen a dɛm nhyehyɛɛ bɔn yi wɔ hɔ no, wiadze no bɔkɔ do atan hɛn. (John 15:19) Naaso, ɔnnsɛ dɛ yɛma iyi bɔ hɛn hũ. Dɛ mbrɛ yebohu wɔ adzesua a odzi hɔ no mu no, Jehovah bɛma n’anokwafo ‘etsim na ɔaahwɛ hɔn do.’ (2 Thess. 3:3) Dɛm ntsi hom mma yɛnkɔ do ndɔ Jehovah, hɛn nuanom, nye hɛn atamfo mpo. Sɛ yɛdze dɛm afotu yi yɛ edwuma a, yɛbɔkɔ do ayɛ kor na hɛn gyedzi aayɛ dzen, yɛdze ayɛyi bɛbrɛ Jehovah, na yɛbɛda no edzi dɛ ɔdɔ wɔ tum koraa kyɛn ɔtan.