Adasefo binom nam abaɛfor kwan a wɔfa do nye afofor dzi nkitaho no do nye hɔn ebusuafo nye hɔn mfɛfo Adasefo dzi nkitaho. Naaso, Christiannyi a noho akokwaa no bɛma dɛm afotu yi atsena n’adwen mu. Ɔnye dɛ: “Ɔbadwembanyi hu mbusu, na osuma noho: na mbatam dze, wotwa mu, na wohu ho amandze.”​—Mbɛ. 27:12.

Yenyim dɛ Jehovah pɛ dɛ ɔbɔ hɛnho ban. Dɛm ntsi, yɛnye hɔn a wɔdze mpaapaamu ba, hɔn a woetu hɔn efi asafo no mu nye hɔn a wɔkyerɛkyerɛ ator nkyerɛkyerɛ no mmbɔ. (Rom. 16:17; 1 Cor. 5:11; 2 John 10, 11) Bi a nyimpa binom a wɔwɔ asafo no mu no mmfa Bible mu mbra nnyɛ edwuma. (2 Tim. 2:20, 21) Dɛm ntsi, sɛ yɛrefa anyɛnkofo a, yɛma iyi tsena hɛn adwen mu. Naaso, sɛ yɛrefa anyɛnkofo wɔ intanɛt do dwumadzi a wɔdze dzi nkitaho do a, ɔbɛyɛ dzen dɛ yebotum afa anyɛnkofo papa.

Sɛ binom atsew ekuw a wɔdze mɛsegye mona hɔnho, na ekuw no mufo dɔɔ sõ a, no ho hia papaapa dɛ yɛyɛ ahwɛyie wɔ hɔn a yɛfa hɔn nyɛnko wɔ dɛm ekuw no mu ho. Christianfo binom dze hɔnho akɛhyɛ ekuw a no mufo dɔɔ sõ dɛm mu, na dza woefi mu aba no nnyɛ koraa. Onua bi anaa akyerɛbaa bi besi dɛn ayɛ ahwɛyie ber a ɔwɔ kuw bi a no mufo yɛ ɔhaha pii anaa mpempem pii mu no? Ɔbɛyɛ dzen dɛ obohu kuw no munyi biara no suban ankasa nye mbrɛ ɔnye Jehovah ntamu ebusuabɔ no tse. Ndwom 26:4 kã dɛ: “Mennye nyimpa huhuw nntsenae; nkyii so merennye ndabrabafo nnkɔ mu.” Iyi ma yehu dɛ, hɔn a yenyim hɔn nkotsee na ɔsɛ dɛ yɛnye hɔn dzi nkitaho wɔ intanɛt do dwumadzi a wɔdze dzi nkitaho no do. Anaa ɔnntse dɛm?

Kuw a no mufo nndɔɔ sõ mpo no, sɛ Christiannyi bi wɔ mu a, ɔsɛ dɛ ɔyɛ ahwɛyie wɔ mber dodow a ɔnye afofor dzi nkitaho nye dza wɔbɔ ho nkɔmbɔ no ho. Ɔnnsɛ dɛ yɛtse nka dɛ ɔmmfa ho asɛm biara a wɔdze bɛba no ɔsɛ dɛ yɛkã bi, anaa ber tsentsen a yɛdze bedzi nkitaho no nnyɛ hwee. Paul bɔɔ Timothy kɔkɔ wɔ nyimpa binom a wɔyɛ “anobɛrbɛr nye agyesɛm” ho. (1 Tim. 5:13) Ndɛ so, yebotum afa elɛktrɔnek efir do ada suban a ɔtse dɛmara edzi.

Christiannyi a noho akokwaa biara nnyi hɔ a ɔbɛkã anaa obetsie ne mfɛfo agyedzifo ho nsɛmbɔn. Afei so, orinntsie anaa ɔrennkã ne mfɛfo hɔn kukua mu nsɛm nnkyerɛ afofor. (Ndw. 15:3; Mbɛ. 20:19) Bio so, okwetsir dɛ obogugu nsɛm mu anaa ɔbɛkã asɛm a onnyi ngyinado biara. (Eph. 4:25) Yenya sunsum afamu edziban nye amandzɛɛbɔ a yebotum dze hɛnho ato do wɔ hɛn jw.org wɛbsaet no do nye JW Broadcasting^® dwumadzi a ɔba bosoom biara no mu.

Adasefo binom fa intanɛt do dwumadzi a wɔdze dzi nkitaho no do dze tɔn adze, wɔdze tɔ adze, na wɔdze bɔ hɔn ndzɛmba ho dawur anaa wɔnam do ma nkorɔfo nya edwuma. Biribi a ɔtse dɛm no yɛ eguadzi ho asɛm na ɔnye ɔsom a yɛdze ma Jehovah no nnyi hwee yɛ. Christianfo a wɔmmpɛ dɛ “sika enyiber” ba hɔn akwan mu no, wokwetsir dɛ wɔbɛyɛ biribiara a ɔbɛma wɔafa hɛn enuayɛkuw no do enya hɔnho.​—Heb. 13:5.

Intanɛt do dwumadzi a wɔdze dzi nkitaho a binom dze serɛserɛ sika dze kɔboa enuanom a woehia hɔn anaa atoyerɛnkyɛm ato hɔn no so ɛ? Mpɛn pii no, yefi ɔdɔ mu dze mboa ma hɛnho na yɛhyehyɛ hɛnho nkuran. (Jas. 2:15, 16) Naaso, sɛ yɛfa intanɛt do kuw a no mufo dɔɔ sõ do yɛ dɛm a, bi a ɔbɛyɛ dzen ama Bethel anaa asafo no dɛ ɔdze mboa bɛma hɔn a wɔtse dɛm no. (1 Tim. 5:3, 4, 9, 10, 16) Nokwasɛm nye dɛ, hɛn mu biara nnyi hɔ a ɔbɛyɛ biribi ma akɛyɛ dɛ ɔwɔ asodzi soronko wɔ Nyankopɔn no nguan ho.

Yɛpɛ dɛ yɛyɛ adze a ɔbɛhyɛ Nyankopɔn enyimnyam. (1 Cor. 10:31) Ntsi, sɛ isi gyinae dɛ edze intanɛt do dwumadzi a wɔdze dzi nkitaho anaa abaɛfor dwumadzi fofor biara bedzi dwuma a, susu esian a ɔwɔ mu no ho na yɛ ahwɛyie.