Ebɛnadze ntsi na papa no a wɔfrɛ no “Osimesi” no kaa dɛ sɛ ɔwar Ruth a ‘ɔbɛsɛɛ’ n’egyapadze no? (Ruth 4:1, 6)

Bible mber mu no, sɛ nna okun bi annwo ba biara na owu a, nna wɔyɛ egyapadze a ɔwɔ no dɛn? Aso nna ne dzin bɛyew efi n’ebusua mu? Nsɛm bi a ɔwɔ Moses Mbra no mu no ma yenya nsɛmbisa yi ho mbuae.

Sɛ nna banyin bi wu anaa sɛ ohia ntsi banyin bi tɔn n’asaase a, nna wɔyɛ n’asaase no dɛn? Nna onuabanyin anaa busuanyi bi a ɔbɛn botum apon asaase no, kyerɛ dɛ, nna obotum asan atɔ asaase no. Sɛ ɔba no dɛm a, nna egyapadze no rimmfi ebusua no mu.​—Lev. 25:23-28; Nka. 27:8-11.

Nna dɛm nhyehyɛɛ yi besi dɛn aboa ma obi a oewu no ne dzin annyew wɔ n’ebusua mu? Mbrɛ ɔbɛyɛ a ne dzin rennyew no, nna wɔma obi a oewu no no nuabanyin bi war kunafo no. Nna ɔba a wɔbɔwo no no bɛfa obi a oewu no ne dzin nye egyapadze a ogyaa no ekyir no. Iyi bi na osii wɔ Ruth n’asɛm no mu no. Afei so, nna dɛm nhyehyɛɛ pa yi ma kunafo no so ne nsa ka dza ohia.​—Deut. 25:5-7; Matt. 22:23-28.

Ma yɛnhwɛ dza osii wɔ Naomi n’afamu. Nna no kun nye Elimelech. Aber a Naomi no kun nye hɔn mbabanyin beenu nyinara wuwui no, nna onnyi banyin biara a ɔbɔhwɛ no. (Ruth 1:1-5) Aber a Naomi sanee kɔr Judah no, ɔkaa kyerɛɛ n’asew Ruth dɛ ɔnkɛka nkyerɛ Boaz na ɔntɔ asaase a nna Elimelech wɔ no. Nna Boaz yɛ Elimelech no busuanyi a ɔbɛn no. (Ruth 2:1, 19, 20; 3:1-4) Naaso, nna Boaz nyim dɛ obi wɔ hɔ a ɔbɛn Elimelech paa kyɛn ɔno Boaz. Bible no frɛ dɛm nyimpa no “Osimesi.” Osiandɛ nna ɔyɛ obusuanyi a ɔbɛn paa ntsi, nna ɔno nye obi a odzi kan a obotum aka dɛ ɔbɔtɔ egyapadze no anaa ɔronntɔ.​—Ruth 3:9, 12, 13.

Ahyɛse no dze, nna “Osimesi” no pɛ dɛ ɔtɔ asaase no. (Ruth 4:1-4) Nna onyim dɛ ɔbɔbɔ kaw kakra dze, naaso ɔdween ho hun dɛ, Naomi noara ɔabɔ aberwa, ntsi ɔnnyɛ adze a obotum awo ba ma abofra no abɛfa Elimelech n’egyapadze no. Sɛ ɔba no dɛm a, nna obenya asaase no aka egyapadze a ɔwɔ no ho. Iyi dze, nna oetwa fufu ma wɔatɔ nkwan mu!

Naaso aber a Osimesi bohun dɛ Ruth wɔ hɔ a ɔsɛ dɛ ɔwar no no, ɔsesaa n’adwen. Ɔkaa dɛ: “Murunntum mommpon mma moho, ɔno bɛyɛ na masɛɛ mankasa m’egyapadze.” (Ruth 4:5, 6) Ebɛnadze ntsi na ɔsesaa n’adwen?

Sɛ nna Osimesi no anaa obi fofor biara war Ruth na ɔwo babanyin a, nna wɔdze Elimelech n’asaase no bɛma babanyin no dɛ n’egyapadze. Naaso nna iyi besi dɛn ‘asɛɛ’ Osimesi ‘n’egyapadze’ no? Bible no nnka ho asɛm dze, naaso obotum aba no dɛ siantsir a odzidzi do yi ntsi a.

• Odzi kan, nna ɔbɛyɛ tse dɛ mbrɛ ne sika bɛhyew egu. Osiandɛ sɛ nna ɔtɔ Elimelech n’asaase no a, ewiei koraa no asaase no befi ne nsa ekedzi babanyin a Ruth bɔwo no no hɔ.

• Otsia ebien, nna ɔnoara na ɔbɔhwɛ Naomi na Ruth nyinara.

• Otsia ebiasa, sɛ nna Osimesi nye Ruth wo mba afofor ka ho a, nna dɛm mbofra no nye mba biara a nna Osimesi wɔ dada no bɛkyɛ Osimesi n’egyapadze no.

• Otsia anan, sɛ nna Osimesi no ankasa nnyi ba biara a, ɔno n’egyapadze no nye Elimelech nedze no nyinara bɔkɔ ekedzi abofra a Ruth bɔwo no no hɔ. Nna iyi bɛkyerɛ dɛ, sɛ Osimesi wu a, obi a n’egyapadze no bɔkɔ ekedzi no hɔ no nnyɛ obi a ne dzin da no do, mbom nna ɔbɛyɛ obi a Elimelech ne dzin da no do. Nna Osimesi nnyɛɛ n’adwen dɛ ɔdze n’egyapadze bɔtow kyakya dze aboa Naomi. Sɛ ɔka mboa nkotsee dze a, nkyɛ Boaz ntɔ egyapadze no mfa. Boaz gyee pen dɛ ɔbɔtɔ, osiandɛ nna ɔpɛ dɛ ɔsan ma “owufo no ne dzin do wɔ n’egyapadze do.”​—Ruth 4:10.

Yetum hu dɛ dza nna osi Osimesi n’enyiwa do araa nye dɛ ɔbɔbɔ ne dzin na n’egyapadze ho ban. Nna ɔdwen nankotsee noho. Naaso hwɛ o, Osimesi ne dzin a nna ɔrobɔ ho ban dzendzenndzen no, ndɛ yennyim mpo. Nnyɛ ɔno nko, hokwan kɛse a nkyɛ obenya no kedzii Boaz mbom hɔ. Boaz nyaa hokwan bɛyɛɛ Messiah no ne nana. Pɛsɛankonya ntsi, Osimesi ammpɛ dɛ ɔboa hɔn a nna wohia mboa no. Hwɛ nhyira ara a ɔbɔɔ no! Ɔnnyɛ awerɛhow bi a?​—Matt. 1:5; Luke 3:23, 32.