Werdam afɔr a Jesus dze no bɔgyaa tuae no, ɔno nkotsee na wobotum egyina do dze hɛn bɔn akyɛ hɛn. (Eph. 1:7) Naaso Bible no ka dɛ: “Bɔn a kan no wɔyɛe no ɔama etwa mu, wɔ Nyankopɔn n’abotar mu,” kyerɛ dɛ, bɔn a wɔyɛe ansaana Jesus rubotua werdam no. (Rom. 3:25) Nna Jehovah besi dɛn dze bɔn akyɛ aber mpo a nna wonntuaa werdam no, na ber kor no ara so wɔakɔ do afata dɛ Nyankopɔn a obu atsɛntsenenee?

Mbrɛ ɔtse nye dɛ, ofi ber a Jehovah kaa dɛ ɔbɛma ‘asenyi’ bi abɛgye hɔn a wotsie no no nyinara nkwa no, wɔ n’enyi do no, nna ɔtse dɛ mbrɛ oetua werdam no ewie. (Gen. 3:15; 22:18) Nna Nyankopɔn nyim paa dɛ sɛ ne ber a ɔahyɛ no so a, no Dɔba no befi ne pɛ mu etua werdam no. (Gal. 4:4; Heb. 10:​7-10) Aber a Jesus wɔ asaase do no, Jehovah maa no tum a nna otum dze bɔn kyɛ ansaana orutua werdam no. Jesus tumii dze nkorɔfo a nna wɔwɔ gyedzi no hɔn bɔn kyɛɛ hɔn, osiandɛ nna onyim dɛ no werdam afɔr no botum apata ama dɛm nkorɔfo no hɔn bɔn.—Matt. 9:​2-6.