1-2. Ebɛnadze na ɔsɛ dɛ obi yɛ ansaana woenuma no?

 MFE enum a abɛsen kɔ no, nyimpa bɔbor ɔpepem kor na wonumaa hɔn ma wɔbɛyɛɛ Jehovah Adasefo. Hɔn mu pii wɔ hɔ a, wɔdze nokwar no kyerɛkyerɛɛ hɔn wɔ hɔn “mbofrabermu” tse dɛ osuanyi Timothy a nna ɔwɔ tsetse Christianfo hɔn aber do no. (2 Tim. 3:​14, 15) Binom so wɔ hɔ a, wɔhyɛɛ ase dɛ worusua Jehovah ho adze no, nna hɔn enyi efir, na binom mpo dze, nna wɔabɔ nkɔkora na mberwa. Dɛ nhwɛdo no, Jehovah Adasefo nye maame bi suaa Bible no, na aber a wonumaa no no, nna oedzi mfe 97!

² Sɛ eyɛ Bible suanyi anaa w’awofo a wɔyɛ Adasefo no na wɔnye wo rusua Bible no a, erodwen enuma ho anaa? Sɛ edze biribi a ɔtse dɛm esi w’enyi do a, ɔno dze yɛma wo mbo! Naaso, ansaana wobonuma wo no, ɔsɛ dɛ ihyira woho do ma Jehovah. Adzesua yi bɔboa wo ma eehu dza ahodohyira kyerɛ. Afei so, ɔbɛma ehu siantsir a ɔnnsɛ dɛ ema biribiara bɔ wo hu aber a epɛ dɛ ihyira woho do ma Nyankopɔn na wonuma wo no.

EBƐNADZE NYE AHODOHYIRA?

3. Nkorɔfo a nna woehyira hɔnho do ama Jehovah a Bible no ka hɔnho asɛm no, hɔn mu binom nye woananom?

³ Bible mu no, sɛ wɔka dɛ woehyira biribi do a, dza ɔkyerɛ nye dɛ woeyi adze kor no esi hɔ ama dwumadzi krɔnkrɔn bi. Dɛ nhwɛdo no, nna Israelman no ehyira hɔnho do ama Jehovah. Naaso nna Israelfo no mu binom wɔ hɔ a, nna woehyira hɔnho do ama Jehovah wɔ kwan tsitsir bi do. Tse dɛ Aaron dɛm yi, nna ɔhyɛ asɔfokyɛw a sika tɛrba a ɔhyerɛn bɔ do. Nna sika tɛrba a ɔhyerɛn no kyerɛ ‘ahodohyira asɛnkyerɛdze krɔnkrɔn.’ Sika tɛrba a nna ɔbɔ Aaron n’asɔfokyɛw do no ma yehu dɛ nna woeyi no esi hɔ dɛ ɔnsom Jehovah wɔ kwan soronko do. Nna ɔno kyerɛ dɛ ɔbɔsom dɛ Israel sɔfopanyin. (Lev. 8:9) Nazirifo no so, nna  woehyira hɔnho do ama Jehovah wɔ kwan soronko do. Wonyaa kasafua “Nazirinyi” fii Hebrew kasafua nazirʹ mu. Dza dɛm kasafua yi kyerɛ nye “Nyia Woeyi No Esi Hɔ” anaadɛ “Nyia Oehyira Noho Do.” Sɛ yɛhwɛ Moses Mbra no mu a, nna ahyɛdze pɔtsee bi wɔ hɔ a ɔsɛ dɛ Nazirifo no dzi do.—Nka. 6:​2-8.

4. (a) Sɛ ihyira woho do ma Jehovah a, nna ebɛnadze tsitsir na esi gyinae dɛ ebɛyɛ? (b) Sɛ wɔka dɛ ‘pa’ woho ekyir a, ɔkyerɛ dɛn? (Hwɛ mfonyin no so.)

⁴ Sɛ ihyira woho do ma Jehovah a, nna esi gyinae dɛ ebɛyɛ Jesus Christ no suanyi, na ebɛma Nyankopɔn n’apɛdze a ebɛyɛ no ho ehia wo paa wɔ w’asetsena mu. Sɛ ihyira woho do dɛ Christiannyi a, ɔno bɔhwehwɛ dɛ eyɛ dɛn? Jesus kaa dɛ: ‘Sɛ obi pɛ dɛ odzi m’ekyir a, ma ɔmpa noho ekyir.’ (Matt. 16:24) Greek asɛmfua a wɔkyerɛɛ ase ‘ma ɔmpa noho ekyir’ no, wobotum so akyerɛ ase dɛ “ɔnnsɛ dɛ ɔyɛ dza noara pɛ.” Iyi hwehwɛ dɛ, dɛ Jehovah no somfo a ehyira woho do ama no no, ɔsɛ dɛ etwe woho fi biribiara a Jehovah n’enyi nngye ho no ho. (2 Cor. 5:​14, 15) Ndzɛmba ahorow a ɔsɛ dɛ etwe woho fi ho no, bi nye “honam ndwuma” tse dɛ ndwamanyɛ. (Gal. 5:​19-21; 1 Cor. 6:18) Sɛ etwe woho fi ndzɛmba a ɔtsetse dɛm ho a, ɔbɛma woho akyer wo anaa? Sɛ edɔ Jehovah na egye dzi paa dɛ ne mbra bɛma woho atɔ wo a, ɔrennyɛ dzen mma wo dɛ ebɛyɛ dɛm. (Ndw. 119:97; Isa. 48:​17, 18) Onua bi a wɔfrɛ no Nicholas kaa iyi ho asɛm dɛ: “Ibotum ehu Jehovah ne mbra tse dɛ ndadze a wɔdze esisi efiadze mbobow ano a, ɔmma inntum mmpue nnkɛyɛ dza epɛ. Anaadɛ wɔayɛ tse dɛ ngyata buw bi a wɔdze ndadze ayɛ a ɔbɔ woho ban fi ngyata a wɔwɔ mu no ho amma woemmpira wo.”

5. (a) Ibesi dɛn ehyira woho do ama Jehovah? (b) Ebɛn nsonsonee na ɔda ahodohyira na enuma ntamu? (Hwɛ mfonyin no so.)

⁵ Ibesi dɛn ehyira woho do ama Jehovah? Ɔsɛ dɛ ifi w’akoma mu bɔ Jehovah mpaa dze hyɛ no bɔ dɛ ɔno nkotsee na ebɔsom no, na edze dza  ɔpɛ bedzi kan wɔ w’asetsena mu. Sɛ eyɛ dɛm a, ɔkyerɛ dɛ erehyɛ Jehovah bɔ dɛ ebɔkɔ do ara efi “w’akoma nyina mu nye wo kra nyina mu, nye w’adwen nyina mu, nye w’ahoɔdzen nyina mu” adɔ no. (Mark 12:30) Sɛ irihyira woho do a, obiara nnhu; ɔyɛ ɔwo na Jehovah nkotsee hom ntamu asɛm. Naaso enuma dze, wɔyɛ no wɔ bagua mu na ɔma nkorɔfo hu dɛ ehyira woho do ama Jehovah. W’ahodohyira no yɛ bɔ a enyiber wɔ mu a ahyɛ Jehovah. Ɔsɛ dɛ edze si w’enyi do dɛ ibedzi dɛm bɔhyɛ no do, na dɛmara na Jehovah so pɛ dɛ eyɛ.—Ɔsɛnk. 5:​4, 5.

EBƐNADZE NTSI NA ƆSƐ DƐ IHYIRA WOHO DO MA JEHOVAH?

6. Ebɛnadze na okenyan obi ma ohyira noho do ma Jehovah?

⁶ Adze tsitsir a ɔsɛ dɛ okenyan wo ma ihyira woho do ma Jehovah nye ɔdɔ a ewɔ ma no no. Ɔnnsɛ dɛ ɔdɔ a ewɔ ma Jehovah no gyina mbrɛ isi tse nka no nkotsee do. Mbom ɔsɛ dɛ ogyina ‘nokwar nyimdzee’ nye ‘sunsum mu ntseasee’ do. Iyinom nye ndzɛmba a isuae faa Jehovah ho a ɔmaa ebɔdɔɔ no kɛse. (Col. 1:9) Bible no a irusua no ama abɛgye edzi dɛ, (1) Jehovah yɛ Obi a ɔwɔ hɔ ankasa, (2) ɔno na ɔmaa wɔkyerɛɛw Bible no, na (3) ɔnam n’ahyehyɛdze no do ma dza ɔpɛ yɛ hɔ.

7. Ansaana yebehyira hɛnho do ama Nyankopɔn no, ebɛnadze na ɔsɛ dɛ yɛyɛ?

⁷ Hɔn a woehyira hɔnho do ama Jehovah no, ɔsɛ dɛ wɔtse mfitsiase nkyerɛkyerɛ a ɔwɔ Nyankopɔn n’Asɛm mu no ase, na wɔdze Nyankopɔn ne mbra so bɔ hɔn bra. Afei so, wɔyer hɔnho ka dza woesua no ho asɛm kyerɛ nkorɔfo dɛ mbrɛ hɔn tsebea bɛma hɔn kwan. (Matt. 28:​19, 20) Bio so, ɔdɔ a wɔwɔ ma Jehovah no ayɛ kɛse, na dza ɔda hɔn akoma do  paa nye dɛ wɔbɔsom Jehovah nkotsee. Dɛm na ɔtse wɔ w’afamu anaa? Sɛ ewɔ ɔdɔ a ɔtse dɛm a, irummbu ahodohyira na enuma dɛ ɔyɛ biribi a ereyɛ dze asɔ wo Bible kyerɛkyerɛfo anaa w’awofo enyi; na dɛmara so na irummbu no dɛ w’anyɛnkofo reyɛ dɛm ntsi na woara so ereyɛ bi.

8. Sɛ yɛkyerɛ ndzɛmba a Jehovah dze ama hɛn no ho enyisɔ a, ebɛn kwan do na ɔbɔboa hɛn ma yeehyira hɛnho do ama no? (Ndwom 116:​12-14)

⁸ Sɛ edwendwen ndzɛmba pa a Jehovah ayɛ ama wo no ho a, ɔbɛka w’akoma ma eesi gyinae dɛ ibehyira woho do ama Jehovah. (Kenkan Ndwom 116:​12-14.) Bible no ka Jehovah ho asɛm dɛ, ɔno na “akyɛdze pa nye adom adze a odzi mu nyina fi” no hɔ. Sɛ Bible no ka dɛm a, ɔyɛ no kwan do. (Jas. 1:17) Akyɛdze a ɔsen biara a ɔdze ama hɛn nye ne Ba Jesus a ɔmaa ɔdze no nkwa bɔɔ afɔr maa hɛn no. Ɔwodze, dwendwen mbrɛ dɛm akyɛdze yi si ka akoma no ho hwɛ! Werdam no ntsi, ibotum nye Jehovah enya ebusuabɔ a no mu yɛ dzen. Afei so, Jehovah ama enya enyidado dɛ ibotum atsena ase daa. (1 John 4:​9, 10, 19) Woho do a ibehyira ama Jehovah no yɛ kwan kor a edze bɛkyerɛ dɛ w’enyi sɔ ɔdɔ kɛse a ɔada no edzi akyerɛ wo, nye nhyira afofor a ɔama enya no. (Deut. 16:17; 2 Cor. 5:15) Sɛ ehwɛ Ibotum Enya Enyigye Daa! buukuu no adzesua 46 asɛm a otsia 4 no a, ibohu ndzɛmba a Jehovah ayɛ ama wo a ibotum akyerɛ ho enyisɔ no bi. Afei so, ibohu video a ne tsentsen yɛ minitsi ebiasa a wɔato dzin Fa Dza Ewɔ No Bɔ Afɔr Ma Jehovah wɔ hɔ.

AYƐ KRADO DƐ IBEHYIRA WOHO DO NA WOENUMA WO ANAA?

9. Ebɛnadze ntsi na ɔnnsɛ dɛ obi dze noho toto afofor ho aber a ɔpɛ dɛ ohyira noho do ma Jehovah no?

⁹ Bi a w’adwen yɛ wo dɛ ennyɛɛ krado dɛ ibehyira woho do ama Jehovah na woenuma wo. Bi a obehia dɛ eyɛ nsesa bi wɔ w’asetsena mu mbrɛ ɔbɛyɛ a ibotum ayɛ ndzɛmba a Jehovah pɛ anaa bi a ibehia ber kakra ama eetum ayɛ ndzɛmba a ɔbɛma wo gyedzi ayɛ dzen. (Col. 2:​6, 7) Ɔsor Bible suanyi biara na mbrɛ osi nya nkɔenyim. Afei so, mbofraba a woedzi mfe kor mpo, ebɔhwɛ no nna ɔnnyɛ hɔn nyinara na wɔayɛ krado dɛ wobehyira hɔnho do ma woenuma hɔn. Dɛm ntsi mma mmfa woho ntoto obi ho, na mbom hwɛ nkɔenyim a enya wɔ Nyankopɔn no som mu no, na hwɛ dza ɔsɛ dɛ eyɛ ka ho.—Gal. 6:​4, 5.

10. Sɛ ihu dɛ ennyɛɛ krado dɛ ibehyira woho do ama Jehovah na woenuma wo a, ebɛnadze na ibotum ayɛ? (Hwɛ adakaba a wɔato dzin “ Nsɛm Yi Kɔ Ma Mbofra A Wɔretsetse Hɔn Wɔ Nokwar No Mu” no so.)

¹⁰ Sɛ ihu dɛ ennyɛɛ krado dɛ ibehyira woho do ama Jehovah mpo a, fa si w’enyi do dɛ ibodu botae a ɔtse dɛm ho. Serɛ Jehovah dɛ ɔmboa wo ma yɛ nsesa biara a ohia dɛ eyɛ wɔ w’asetsena mu. (Phil. 2:13; 3:16) Nya awerɛhyɛmu dɛ Jehovah betsie wo mpaabɔ no na ɔaaboa wo.—1 John 5:14.

SIANTSIR A BINOM TWENTWEƆN HƆN ANANADZE

11. Jehovah besi dɛn aboa hɛn ma yaakɔ do edzi no nokwar?

¹¹ Binom wɔ hɔ a, wɔayɛ krado dɛ wɔpɛ dɛ wohyira hɔnho do na wonuma hɔn naaso wɔtwentweɔn hɔn ananadze. Bi a wobebisa hɔnho dɛ, ‘Sɛ mihyira moho do ma Jehovah na wonuma me, na ekyir yi mekɛyɛ bɔn kɛse bi ma wotu me ɛ?’ Sɛ dɛm na etse nka a, nya awerɛhyɛmu dɛ Jehovah bɔboa wo ma eetum ‘anantsew dɛ mbrɛ ɔfata no na ɔsɔ n’enyi koraa.’ (Col. 1:10) Afei so, ɔbɛhyɛ wo dzen ma aayɛ dza ɔtsen. Ɔaboa nyimpa pii ma woetum ayɛ dza ɔtsen ntsi obotum aboa woara so. (1 Cor. 10:13) Iyi nye adze kor ntsi a nyimpa kakraabi na wotu hɔn fi Christianfo asafo no mu no. Nokwasɛm nye yi, Jehovah boa n’asomfo ma wɔkɔ do dzi no nokwar.

12. Ebɛnadze na obotum aboa hɛn amma yaannkɛyɛ bɔn kɛse?

 ¹² Yɛyɛ nyimpa a bɔn wɔ hɛnho ntsi ndzɛmba bi botum atwetwe hɛn dɛ yɛnkɛyɛ bɔn. (Jas. 1:14) Naaso wankasa na ɔsɛ dɛ isi gyinae wɔ dza ebɛyɛ ho aber a biribi rotwetwe wo dɛ kɛyɛ bɔn no. Nokwasɛm nye dɛ, woara na ɔsɛ dɛ ekyerɛ mbrɛ ibesi abɔ wo bra. Nyimpa binom ka dɛ yerunntum nnyɛ mbrɛ yesi tse nka nye dza yɛyɛ no ho hwee. Naaso dɛm asɛm yi nnyɛ nokwar koraa. Ibotum esua dɛ ebɛhyɛ w’akɔndɔ do. Naaso wo mbɔdzembɔ nyina ekyir no, sɛ biribi da ho ara rotwetwe wo dɛ kɛyɛ bɔn a, ibotum akɔ do ara ahyɛ woho do. Dza obotum aboa wo nye dɛ ebɔbɔ mpaa da biara. Afei so, yɛ nhyehyɛɛ pa a obotum aboa wo ma eesua Nyankopɔn n’Asɛm no da biara. Bio so, kɔ Christianfo nhyiamu, na ka dza egye dzi no ho asɛm kyerɛ nkorɔfo. Sɛ ekɔ do yɛ dɛm ndzɛmba ahorow yi a, ɔbɛhyɛ wo dzen ma aakɔ do edzi Jehovah nokwar. Na dza ɔkyɛn ne nyina no, mma wo werɛ mmfir da dɛ Jehovah bɔboa wo ma eetum ayɛ dɛm.—Gal. 5:16.

13. Ebɛn nhwɛdo pa na Joseph ayɛ ama hɛn?

¹³ Sɛ idzi kan hu nsɔhwɛ a ibotum ehyia nye dza ebɛyɛ wɔ ho a, ɔbɛyɛ mberɛw ama wo dɛ ibedzi bɔ a ahyɛ Jehovah no do. Bible no ka nyimpa binom a ɔbɛyɛ dɛ wɔyɛɛ dɛm no ho asɛm. Nna hɔn so yɛ nyimpa a bɔn wɔ hɔnho tse dɛ hɛnara. Sɛ yɛbɛyɛ nhwɛdo a, Potiphar ne yer bɔɔ mbɔdzen mpɛn pii dɛ ɔbɛma Joseph nye no ada. Naaso nna Joseph nyim dza ɔbɛyɛ dada. Bible no ma yehu dɛ Joseph ‘powee,’ na ɔkaa dɛ: “Ɔbɛyɛ dɛn na mebɛyɛ emumuyɛ kɛse yi, na mayɛ bɔn etsia Nyankopɔn?” (Gen. 39:​8-10) Ɔda edzi dɛ ansaana Joseph ribehyia dɛm nsɔhwɛ no, nna onyim dza ɔbɛyɛ. Dɛm ntsi, aber a ohyiaa nsɔhwɛ no wɔannyɛ dzen amma no koraa dɛ ɔbɛyɛ dza ɔtsen.

14. Ebɛnadze na sɛ yɛyɛ a, ɔbɔboa hɛn ma yaatwe hɛnho efi dza ɔnntsen ho?

¹⁴ Ibesi dɛn esuasua Joseph na aakɔ do edzi Nyankopɔn nokwar aber a ehyia nsɔhwɛ no? Seseiara na ɔsɛ dɛ ihu mbrɛ ibesi ayɛ w’adze wɔ nsɔhwɛ a ibotum ehyia no ho. Sɛ ihyia tsebea biara a obotum ama aayɛ bɔn etsia Jehovah a, ɔsɛ dɛ epow no ntsɛmara na mma nndwendwen ho mpo. (Ndw. 97:10; 119:165) Sɛ eyɛ dɛm a, ɔbɔboa wo ma aayɛ dza ɔtsen aber a ehyia nsɔhwɛ no. Osiandɛ inyim dza ebɛyɛ no dada.

15. Ebɛnadze na obi bɛyɛ dze akyerɛ dɛ ɔdze ‘enyiber rohwehwɛ’ Jehovah n’ekyir kwan? (Hebrewfo 11:6)

¹⁵ W’afamu no, bi a ehu dɛ nokwar no ara nye yi na epɛ dɛ ifi w’akoma nyina mu som  Jehovah. Naaso, bi a biribi siw wo kwan dɛ ibehyira woho do ama no na woenuma wo. Sɛ dɛm a, suasua dza Ɔhen David yɛe no. Bɔ mpaa na serɛ Jehovah dɛ: “Nyankopɔn, pɛnsapɛnsa mo mu, na hu m’akoma mu: sɔ me hwɛ na hu m’adwendwen: na hwɛ, sɛ emumuyɛ kwan bi wɔ mo mu a, na gya me fa daa kwan no mu.” (Ndw. 139:​23, 24) Jehovah hyira hɔn a wɔdze ‘enyiber rohwehwɛ n’ekyir kwan’ no nyina. Mbɔdzen a erobɔ dɛ ibehyira woho do na woenuma wo no ma Jehovah hu dɛ w’enyi aber dɛ erohwehwɛ no.—Kenkan Hebrewfo 11:6.

KƆ DO ARA TWE BƐN JEHOVAH

16-17. Hɔn a wɔretsetse hɔn wɔ nokwar no mu no, Jehovah si dɛn twe hɔn ba ne nkyɛn? (John 6:44)

¹⁶ Jesus kaa dɛ, sɛ obi botum abɛyɛ no suanyi a, gyedɛ Jehovah twe no. (Kenkan John 6:44.) Dwendwen mbrɛ dɛm asɛm yi ka akoma na ɔfa woara so woho no ho hwɛ. Obiara a Jehovah twe no ba ne nkyɛn no, ɔyɛ biribi papabi a ohu wɔ no ho ntsi na ɔma ɔyɛ dɛm. Jehovah hu obiara a ɔtse dɛm no dɛ ɔyɛ ‘n’egyapadze soronko’ anaa egyapadze a ɔsom bo ma no. (Deut. 7:6) Na dɛmara so na ohu wo.

¹⁷ Naaso, bi a eyɛ abofra a w’awofo retsetse wo wɔ nokwar no mu. Ntsi bi a ibenya adwen dɛ, w’awofo rosom Jehovah ntsi na woara so erosom no no, na ɔnnyɛ dɛ Jehovah nankasa na ɔatwe wo aba ne nkyɛn. Naaso Bible no ka dɛ: “Hom ntwe mpin Nyankopɔn na ɔbɔtwe epin hom.” (Jas. 4:8; 1 Mber. 28:9) Ntsi sɛ eyɛ ndzɛmba bi a ɔbɛma atwe epin Jehovah a, ɔno so bɔtwe epin wo. Jehovah innhu wo dɛ eka nyimpakuw bi ho kɛkɛ. Mbom ɔtwe hɛn dɛ ankorankor ba ne nkyɛn, na obiara a wɔretsetse no wɔ nokwar no mu no so ka ho. Sɛ obi a ɔtse dɛm no yɛ ndzɛmba a ɔbɛma ɔatwe epin Jehovah a, ɔno so bɔtwe epin no dɛ mbrɛ James 4:8 ma yehu no.—Fa toto 2 Thessalonicafo 2:13 ho.

18. Ebɛnadze na yebosusu ho wɔ adzesua a odzi hɔ no mu? (Ndwom 40:8)

¹⁸ Sɛ ihyira woho do ma Jehovah na wonuma wo a, nna irusuasua suban a Jesus daa no edzi no. Ofi ne pɛ mu gyee too mu dɛ ɔbɛyɛ dza n’Egya ka kyerɛ no dɛ ɔnyɛ biara. (Kenkan Ndwom 40:8; Heb. 10:7) Adzesua a odzi hɔ mu no, yɛbɔhwɛ dza ɔbɔboa wo ma aakɔ do dze nokwardzi asom Jehovah wɔ w’enuma ekyir.