1. Ɔtɔ da a Jehovah n’asomfo anokwafo binom tse nka dɛn?

 YENYIM dɛ Jehovah gye n’asomfo nyina to mu, na iyi ma hɛn enyi gye paa! Bible no ka dɛ: ‘Jehovah n’enyi gye ne man ho.’ (Ndw. 149:4) Naaso, ɔtɔfabi a Jehovah n’asomfo binom hɔn abaw mu bu araa ma wobisa hɔnho dɛ, ‘Ntsi, Jehovah gye me to mu anaa?’ Jehovah n’asomfo anokwafo a wɔtsenaa ase wɔ tsetse mber mu no, nna ɔtɔ da a hɔn mu binom so tse nka dɛmara.—1 Sam. 1:​6-10; Job 29:​2, 4; Ndw. 51:11.

2. Woananom na Jehovah gye hɔn to mu?

² Bible no ma yehu no pefee dɛ nyimpa a bɔn wɔ hɔnho mpo, Jehovah botum agye hɔn ato mu anaa wobotum enya n’enyim adom. Ebɛn kwan do? Ɔno nye dɛ yɛbɛgye Jesus Christ edzi na yaama woenuma hɛn. (John 3:16) Sɛ yɛyɛ dɛm a, yɛma nkorɔfo hu dɛ yeenu hɛnho wɔ hɛn bɔn ho, na yɛahyɛ Nyankopɔn bɔ dɛ yɛbɛyɛ dza ɔpɛ. (Andw. 2:38; 3:19) Sɛ yɛyɛ dɛm ndzɛmba yi dze kyerɛ dɛ yɛpɛ dɛ yɛnye Jehovah nya ebusuabɔ a, ɔma n’enyi gye paa. Sɛ yɛkɔ do yɛ dza yebotum biara dɛ yebedzi bɔ a yɛahyɛ Jehovah dɛ yɛbɔsom no no do a, ɔbɛgye hɛn ato mu na ɔnye hɛn benya anyɛnkofa a no mu yɛ dzen.—Ndw. 25:14.

3. Ebɛn nsɛmbisa na yebosusu ho wɔ adzesua yi mu?

³ Naaso, ebɛnadze ntsi na ɔtɔ da a Nyankopɔn n’asomfo binom tse nka dɛ ɔnngye hɔn nnto mu? Ebɛn kwan na Jehovah fa do ma n’asomfo hu dɛ ɔgye hɔn to mu? Na ebɛnadze na Christiannyi bi botum ayɛ ama gyedzi a ɔwɔ dɛ Nyankopɔn gye no to mu no ayɛ kɛse?

SIANTSIR A BINOM TSE NKA DƐ JEHOVAH NNGYE HƆN NNTO MU

4-5. Sɛ yɛtse nka dɛ yɛnnsɛ hwee mpo a, ebɛn awerɛhyɛmu na ɔsɛ dɛ yenya?

⁴ Hɛn mu binom wɔ hɔ a, ofitsi hɛn mbofrase besi ndɛ nyina, yɛtse nka dɛ mfaso biara nnyi hɛn do. (Ndw. 88:15) Onua bi a wɔfrɛ no Adrián kaa dɛ: “Besi ndɛ nyina metse nka dɛ mfaso biara  nnyi moho. Mekaa dɛ aber a nna meyɛ abofra no, nna me mpaabɔ ara nye dɛ m’ebusuafo bɔkɔ Paradise. Naaso wɔ m’afamu dze, nna muhu moho paa dɛ memmfata dɛ mobɔkɔ hɔ bi.” Tony so, n’awofo a wɔtsetsee no no, nna wɔnnyɛ Jehovah Adasefo. Ɔkaa dɛ: “M’awofo annka annkyerɛ me da dɛ wɔdɔ me anaa mannyɛ biribi ma wɔannka annkyerɛ me da dɛ mayɛ adze. Iyi maa minyaa adwen dɛ biribiara nnyi hɔ a meyɛ a ɔbɔsɔ hɔn enyi da.”

⁵ Sɛ ɔtɔ da na yɛtse nka dɛ yɛnnsɛ hwee a, ɔsɛ dɛ yɛkaa dɛ Jehovah nankasa na ɔtwee hɛn baa ne nkyɛn. (John 6:44) Suban pa a yɛwɔ a hɛnankasa mpo nnhu no, Jehovah hu ne nyinara na onyim dza ɔwɔ hɛn akoma mu. (1 Sam. 16:7; 2 Mber. 6:30) Dɛm ntsi sɛ Jehovah ka dɛ yɛsom bo ma no a, ɔnnyɛ ndaadaa.—1 John 3:​19, 20.

6. Bɔn a ɔsomafo Paul yɛe ansaana ɔrebɛyɛ Christiannyi no, nna ɔtse nka dɛn wɔ ho?

⁶ Hɛn mu binom wɔ hɔ a, ansaana yerubosua nokwar no ho adze no, bi a yɛyɛɛ ndzɛmba ahorow bi. Na obotum aba dɛ ndɛ na ndɛ nyina ɔma hɛn tsibowa bu hɛn fɔ. (1 Pet. 4:3) Christianfo anokwafo mpo, ɔtɔ da a wɔyer hɔnho dɛ wɔbɔko etsia hɔn mberɛwyɛ ahorow. Woara so ɛ, ɔyɛ a etse nka dɛ Jehovah remmfa wo bɔn nnkyɛ wo anaa? Sɛ dɛm a, ka w’akoma to wo yamu, osiandɛ Jehovah n’asomfo anokwafo binom so tsee nka dɛmara. Dɛ nhwɛdo no, aber a ɔsomafo Paul dwendween ne mberɛwyɛ ahorow ho no, ɔtsee nka dɛ n’asɛm yɛ mbɔbɔr. (Rom. 7:24) Nokwasɛm nye dɛ, dɛm aber no nna Paul enu noho wɔ no bɔn ho na woenuma no. Naaso ɔkaa noho asɛm dɛ, ɔno nye “asomafo no mu ekumaba” nye ndzebɔnyɛfo mu “otsitsir.”—1 Cor. 15:9; 1 Tim. 1:15.

7. Ebɛn adwen na ɔsɛ dɛ yenya wɔ bɔn a yɛayɛ etwa mu no ho?

⁷ Hɛn sor Egya no ahyɛ hɛn bɔ dɛ, sɛ yefi hɛn akoma mu nu hɛnho wɔ hɛn bɔn ho a, ɔdze bɛkyɛ hɛn. (Ndw. 86:5) Dɛm ntsi sɛ yɛayɛ bɔn bi na yeefi hɛn akoma nyina mu enu hɛnho a, ɔsɛ dɛ yenya awerɛhyɛmu dɛ dza Jehovah aka no yɛ nokwar, ɔdze akyɛ hɛn koraa.—Col. 2:13.

8-9. Sɛ yɛtse nka dɛ dza yɛreyɛ no suar dodo dɛ ɔbɛma Jehovah agye hɛn ato mu a, ebɛnadze na obotum aboa hɛn ma yeedzi dɛm ɔhaw no do?

⁸ Hɛn nyinara, yɛpɛ dɛ yɛyɛ dza yebotum biara dze som Jehovah yie. Naaso enuanom binom tse nka dɛ dza wɔyɛ wɔ Jehovah no som mu no suar dodo, ɔno ntsi Jehovah nngye hɔn nnto mu. Akyerɛbaa bi a wɔfrɛ no Amanda kaa dɛ: “Mpɛn pii no, nna m’adwen yɛ me dɛ, sɛ meyɛ pii aber nyina a, ɔno na ɔkyerɛ dɛ mereyɛ dza mubotum nyina ama Jehovah. Osian iyi ntsi, mpɛn pii no dza munntum nnyɛ mpo nna morobɔ mbɔdzen dɛ mebɛyɛ. Naaso sɛ menntum annyɛ a, nna m’abaw mu ebu, na afei so nna ɔma metse nka dɛ mama Jehovah ne nsa esi famu.”

⁹ Sɛ yɛtse nka dɛ dza yɛreyɛ no suar dodo dɛ ɔbɛma Jehovah agye hɛn ato mu a, ebɛnadze na obotum aboa hɛn ma yeedzi dɛm ɔhaw no do? Ɔsɛ dɛ yɛkaa dɛ Jehovah wɔ ntseasee na ɔnnyɛ katsee. Ɔnnhwɛ kwan dɛ yɛbɛyɛ biribi a ɔbor hɛn ahoɔdzen do. Biribiara a yɛyɛ ma Jehovah no, n’enyi sɔ; dza ohia ara nye dɛ yebefi hɛn akoma nyina mu ayɛ. Afei so, ɔsɛ dɛ yɛdwendwen Bible mu nhwɛdo a ɔfa nyimpa binom a wofii hɔn kra nyina mu soom Jehovah no ho. Dɛ nhwɛdo no, ma yensusu Paul ho. Ɔyeer noho soom Jehovah mfe pii, otwaa akwansin mpempem pii kɛkaa asɛmpa no, na ɔtsetseew asafo ahorow. Naaso aber a ne tsebea sesae na onntum nnyɛ asɛnka edwuma no pii dɛ mbrɛ ɔpɛ no, nna ɔno kyerɛ dɛ Nyankopɔn nngye no nnto mu bio anaa? Oho, ɔnntse dɛm. Paul kɔr do yɛɛ dza obotum, na Jehovah so hyiraa no. (Andw. 28:​30, 31) Hɛn so, ɔtɔ da a tsebea bi botum ama dza yɛyɛ ma Jehovah no asesa. Naaso ɔsɛ dɛ yɛkaa dɛ dza ohia Jehovah paa nye adwen a yɛdze  yɛ no. Dze besi ha yi, hom mma yɛnhwɛ akwan ahorow a Jehovah fa do dze kyerɛ dɛ ɔgye hɛn to mu.

EBƐN AKWAN NA JEHOVAH FA DO DZE KYERƐ N’ASOMFO DƐ ƆGYE HƆN TO MU?

10. Yebesi dɛn “atse” dɛ Jehovah reka akyerɛ hɛn dɛ ɔgye hɛn to mu? (John 16:27)

¹⁰ Ɔnam Bible no do. Jehovah n’enyi gye ho dɛ ɔbɛka akyerɛ n’asomfo dɛ ɔdɔ hɔn na ɔgye hɔn to mu. Kyerɛwnsɛm no ma yehu mber ebien bi a Jehovah kaa kyerɛɛ Jesus dɛ ɔyɛ no Dɔba, na ɔgye no to mu. (Matt 3:​17, 17:5) W’enyi bɛgye ho dɛ ebɛtse dɛ Jehovah reka akyerɛ wo dɛ ɔgye wo to mu anaa? Ɔwɔ mu dɛ Jehovah nye hɛn nnkasa tsenn dze, naaso ɔnam n’Asɛm Bible no do kasa kyerɛ hɛn. Sɛ yɛkenkan Jesus ne nsɛm a ɔwɔ Nsɛmpa no mu no a, “yɛbɛtse” dɛ Jehovah reka akyerɛ hɛn dɛ ɔgye hɛn to mu. (Kenkan John 16:27.) Jesus suasuaa n’Egya no suban pɛpɛɛpɛ. Ɔmaa n’ekyirdzifo anokwafo a nna wɔtɔ sin no hun dɛ ɔgye hɔn to mu. Ntsi sɛ yɛkenkan nsɛm a ɔtse dɛm wɔ Nsɛmpa no mu a, ɔbɛyɛ tse dɛ mbrɛ Jehovah reka akyerɛ hɛn dɛ ɔgye hɛn to mu.—John 15:​9,15.

11. Sɛ yerihyia ɔhaw mpo a, ɔno nnkyerɛ dɛ Jehovah nngye hɛn nnto mu. Ebɛnadze ntsi a? (James 1:12)

¹¹ Ɔnam ndzɛmba a ɔyɛ ma hɛn no do. Jehovah n’enyi gye ho paa dɛ ɔbɔboa hɛn ma hɛn nsa aaka ndzɛmba a yehia wɔ asetsena mu. Naaso dɛ mbrɛ Jehovah maa kwan ma Job kɔr ahokyer mu no, bi a ɔtɔ da a hɛn so, Jehovah bɛma kwan ma yaafa ahokyer mu. (Job 1:​8, 11) Sɛ yehyia ɔhaw a, ɔno nnkyerɛ dɛ Nyankopɔn nngye hɛn nnto mu. Mbom ɔma yenya hokwan dze kyerɛ mbrɛ yesi dɔ Nyankopɔn, nye ahotodo a yɛwɔ wɔ no mu no. (Kenkan James 1:12.) Aber a yerihyia ɔhaw mpo no, yebohu paa dɛ Jehovah dɔ hɛn na ɔpɛ dɛ ɔboa hɛn ma yetum gyina ɔhaw no ano.

12. Ebɛnadze na yebotum esua efi Dmitrii n’asɛm no mu?

¹² Yɛnhwɛ onua bi a wɔfrɛ no Dmitrii a ɔwɔ Asia. N’edwuma fii ne nsa, na abosoom pii twaa mu a nna onnyaa bi. Naaso ɔdze noho too Jehovah do, na osii gyinae dɛ ɔbɛyɛ pii wɔ asɛnka edwuma no mu. Abosoom pii ekyir no, nna onyaa edwuma nnyɛe. Ɔhaw a nna orihyia no annso hɔ ara. Yarba bi so bɔɔ no ma ɔkaa mpa mu. Osiandɛ nna onntum nnkɔ mmba ntsi, nna ɔtse nka dɛ ɔmmfata dɛ okun na egya. Afei so, nna n’adwen yɛ no dɛ gyama Jehovah nngye no nnto mu bio. Ɔwɔ mu ara na ewimbir bi ne babaa kyerɛɛw asɛm a ɔwɔ Isaiah 30:15 wɔ krataa do dze kɛmaa no wɔ ne mpa ho. Asɛm a ɔkyerɛɛw nye: “Kommyɛ na awerɛhyɛmu mu na hom  ahoɔdzen befir.” Afei ne babaa no kaa kyerɛɛ no dɛ: “Dada sɛ eyɛ basaa a, kaa dɛm kyerɛwsɛm yi.” Ɔbaa no dɛm no, Dmitrii daa Jehovah ase, osiandɛ ohun dɛ onntum nnkɔ mmba nyina ekyir no, Jehovah maa n’ebusua no nyaa dza wobedzi, dza wɔbɛhyɛ nye beebi a wɔbɛda. Ɔkaa dɛ: “Dza nna ohia ara nye dɛ mebɛyɛ komm na maakɔ do dze mo werɛ ahyɛ Nyankopɔn mu.” Sɛ irihyia ɔhaw bi a ɔtse dɛm a, nya awerɛhyɛmu dɛ Jehovah dwen woho na ɔbɔboa wo ma eetum egyina ano.

13. Woananom na Jehovah fa hɔn do ma yehu dɛ ɔgye hɛn to mu, na ɔyɛ no dɛn?

¹³ Ɔnam hɛn nuanom Christianfo do. Sɛ Jehovah pɛ dɛ yehu dɛ ɔgye hɛn to mu a, ɔdze fa hɛn nuanom do. Dɛ nhwɛdo no, obotum ekenyan hɛn nuanom ma wɔaaka nsɛm a ɔhyɛ nkuran akyerɛ hɛn ber a yehia paa no. Aber a adwendwen hyɛɛ hɛn akyerɛbaa bi a ɔwɔ Asia do no, ohun dɛ Jehovah nam enuanom no do rehyɛ no nkuran. Dza ɔkɛfaa adwendwen no bɔtoo no do nye dɛ, n’edwuma fii ne nsa, na yarba bi a no mu yɛ dzen so bɔɔ no. Afei so, no kun a nna ɔyɛ asafo mu panyin no kɛyɛɛ bɔn kɛse bi ma hokwan a ɔwɔ no fii ne nsa. Ɔkaa dɛ: “Nna menntse dza orisisi no ase koraa. Nna ɔyɛ me dɛ gyama mayɛ bɔn bi, na Jehovah nngye me nnto mu bio.” Hɛn akyerɛbaa no bɔɔ mpaa serɛɛ Jehovah dɛ ɔmma onhu dɛ ɔda ho ara gye no to mu. Ebɛnadze na Jehovah yɛe wɔ mpaa a akyerɛbaa no bɔe no ho? Akyerɛbaa no kaa dɛ: “Asafo mu mpanyimfo nye me kasae, na wɔmaa minyaa awerɛhyɛmu dɛ Jehovah da ho ara dɔ me.” Mber bi ekyir no, ɔsanee bɔɔ mpaa serɛɛ Jehovah dɛ ɔmma onhu dɛ ɔda ho ara gye no to mu. Ɔtoaa n’asɛm no do dɛ: “Dɛm da no ara, me nsa kaa krataa bi fii enuanom binom a menye hɔn wɔ asafo mu no hɔ. Aber a mekenkaan awerɛkyekyesɛm a nna ɔwɔ krataa no mu no, mubohun dɛ Jehovah etsie me mpaabɔ no.” Ɔyɛ ampa dɛ, mpɛn pii no Jehovah nam nkuranhyɛsɛm a hɛn nuanom ka  kyerɛ hɛn no do ma yehu dɛ ɔgye hɛn to mu.—Ndw. 10:17.

14. Ebɛn kwan bio na Jehovah fa do ma yehu dɛ ɔgye hɛn to mu?

¹⁴ Kwan kor so a Jehovah fa do ma yehu dɛ ɔgye hɛn to mu nye dɛ, sɛ yehia afotu a ɔfa hɛn nuanom do dze ma hɛn. Dɛ nhwɛdo no, wɔ tsetse Christianfo hɔn aber do no, Jehovah maa ɔsomafo Paul kyerɛɛw nkrataa 14 kɛmaa no nuanom Christianfo no. Afotu a Paul kyerɛwee kɛmaa no nuanom no, ɔkaa ne nsɛm pen pen, naaso ɔmaa wohun dɛ ɔdɔ hɔn. Ebɛnadze ntsi na Jehovah maa Paul dze dɛm afotu no mae? Siantsir nye dɛ Jehovah yɛ Egya pa, na ɔtsea ne mba a ‘ɔdɔ hɔn no.’ (Mbɛ. 3:​11, 12) Dɛm ntsi sɛ obi dze afotu a ogyina Bible do ma hɛn a, ɔsɛ dɛ ɔno ma yehu dɛ Nyankopɔn gye hɛn to mu, na ɔnnyɛ dɛ Nyankopɔn mmpɛ hɛn asɛm. (Heb. 12:6) Ebɛn ndzɛmba bio na ɔma yehu dɛ Jehovah gye hɛn to mu?

NDZƐMBA AFOFOR A ƆMA YEHU DƐ JEHOVAH GYE HƐN TO MU

15. Woananom na Jehovah dze no sunsum krɔnkrɔn no ma hɔn, na ebɛnadze ntsi na iyi ma yenya awerɛhyɛmu?

¹⁵ Jehovah dze no sunsum krɔnkrɔn no ma hɔn a ɔgye hɔn to mu no. (Matt. 12:18) Yebotum ebisa hɛnho dɛ, ‘Nyankopɔn no sunsum aba no, metum ada bi edzi wɔ m’asetsena mu anaa?’ Sesei, ihu dɛ ewɔ abotar paa kyɛn aber a ibohun Jehovah no anaa? Mbrɛ ɔtse nye dɛ, sɛ eda Nyankopɔn no sunsum aba no edzi paa a, ɔno bɛma ehu dɛ Jehovah gye wo to mu!—Hwɛ adakaba a wɔato dzin “ Sunsum No Aba Nye . . . ”

16. Woananom na Jehovah ma wɔka asɛmpa no, na iyi ma etse nka dɛn? (1 Thessalonicafo 2:4)

¹⁶ Hɔn a Jehovah gye hɔn to mu no, n’enyi gye ho dɛ ɔbɛma wɔaka asɛmpa no. (Kenkan 1 Thessalonicafo 2:4.) Akyerɛbaa bi a wɔfrɛ no Jocelyn kaa asɛmpa no kyerɛɛ nkorɔfo. Hom mma yɛnhwɛ mbrɛ osii boaa no. Da kor anapa bi a ɔsoɛree fii ne mpa do no, nna ɔayɛ basaa. Ɔkaa dɛ: “Metsee nka dɛ m’ahoɔdzen nyina asa na biribiara nnyi hɔ a mubotum ayɛ. Naaso nna meyɛ daa kwampaafo, na nna dɛm da no ka nda a medze kɔ asɛnka no ho. Ntsi mobɔɔ mpaa na mokɔr asɛnka.” Anapa no ara a Jocelyn hyɛɛ asɛnka ase no, ohyiaa maame bi a ɔtsew n’enyim. Nna wɔfrɛ no Mary, na ɔpeen do dɛ ɔnye no nsua Bible no. Abosoom bi ekyir no, Mary kaa dɛ aber a Jocelyn kɔbɔɔ n’abow mu no, nna ɔrobɔ Nyankopɔn mpaa dɛ ɔmboa no. Ebɛnadze na Jocelyn suae fii dɛm asɛm no mu? Ɔkaa dɛ: “Dza osii no maa metsee nka dɛ bɛka dɛ Jehovah reka akyerɛ me dɛ, ‘Megye wo to  mu.’” Nokwasɛm nye dɛ ɔnnyɛ obiara na obetsie asɛmpa no. Naaso sɛ yɛyɛ dza yebotum biara dɛ yɛbɛka asɛmpa no akyerɛ nkorɔfo a, yebotum enya awerɛhyɛmu paa dɛ Jehovah n’enyi bɛgye.

17. Asɛm a Vicky kae faa werdam no ho no, ebɛnadze na isua fi mu? (Ndwom 5:12)

¹⁷ Hɔn a Jehovah gye hɔn to mu no na ɔma wonya werdam no no do mfaso. (1 Tim. 2:​5, 6) Naaso, sɛ yɛwɔ gyedzi wɔ werdam no mu na woenuma hɛn, na yɛda ho ara tse nka dɛ Jehovah nngye hɛn nnto mu so ɛ? Kaa dɛ, ɔtɔ da a mbrɛ yesi tse nka no botum adaadaa hɛn. Naaso Jehovah dze, yebotum agye no edzi aber biara. Obu hɔn a wɔgye werdam no dzi no dɛ wɔtsen, na ɔahyɛ bɔ dɛ obehyira hɔn. (Kenkan Ndwom 5:12; Rom. 3:26) Werdam no a Vicky dwendween ho no boaa no paa. Da kor bi, aber a ɔdwendween werdam no ho kɔr ekyir no, ɔkaa dɛ: “Jehovah enya moho abotar akyɛr ara yie. . . . Naaso nna dza mereka akyerɛ no ara nye dɛ: ‘Wo dɔ no runntum nnso mo do. Afɔr a wo Ba no bɔe no runntum mmpepa mo bɔn.’” Naaso aber a ɔdwendween werdam a Jehovah dze ama hɛn no ho no, ohun dɛ Jehovah dɔ no. Hɛn so, sɛ yɛdwendwen werdam no ho a, yebohu dɛ Jehovah dɔ hɛn na ɔgye hɛn to mu.

18. Sɛ yɛkɔ do dɔ hɛn sor Egya no a, ebɛn awerɛhyɛmu na yebotum enya?

¹⁸ Bi a yɛbɔbɔ mbɔdzen dɛ yɛdze dza yeesusu ho wɔ adzesua yi mu no bɛyɛ edwuma. Naaso ɔtɔ da a hɛn abaw mu botum ebu ma yeenya adwen dɛ gyama Jehovah nngye hɛn nnto mu. Sɛ etse nka dɛm a, kaa dɛ Jehovah gye ‘hɔn a wɔkɔ do dɔ no no’ to mu. (Jas. 1:12) Ntsi kɔ do ara twe bɛn Jehovah, na kwan a ɔfa do kyerɛ dɛ ɔgye wo to mu no, fa w’adwen si do. Afei so, mma mma wo werɛ mmfir da dɛ Jehovah nye “hɛn mu biara ntamu kwan nnwar koraa.”—Andw. 17:27.