1. Osiandɛ yɛka Jehovah n’ahyehyɛdze no ho ntsi, ebɛn nhyira na yenya?

 ƆYƐ hɛn dɛw paa dɛ yɛka Jehovah n’ahyehyɛdze no ho wɔ wiadze a no mu ayɛ dzen yi mu. Yɛ ara na wiadze yi mu reyɛ dzen. Naaso Jehovah ama hɛn enuanom a wofi hɔn akoma mu boa hɛn, na iyi ama koryɛ wɔ hɛn ntamu. (Ndw. 133:1) Ɔaboa hɛn ma yeenya ebusua a enyigye wɔ mu. (Eph. 5:33–6:1) Afei so, ɔma hɛn nyansa a yɛdze gyina ɔhaw ano mbrɛ ɔbɛyɛ a hɛn akoma bɔtɔ hɛn yamu.

2. Ebɛnadze na ɔsɛ dɛ yɛyɛ, na ebɛnadze ntsi a?

² Naaso, ɔsɛ dɛ yɛyer hɛnho paa ama yeetum akɔ do asom Jehovah. Ebɛnadze ntsi na yɛreka dɛm? Osiandɛ hɛn nuanom binom botum ayɛ hɛn adze ma wɔayɛ hɛn yaw. Anaa mfom bi a yeedzi botum ama hɛn abaw mu eebu, nkanka ber a yɛkɔ do dzi dɛm mfom no ara mpɛn pii no. Ne nyinara mu no, ɔsɛ dɛ yɛkɔ do som Jehovah (1) ber a hɛn nua Christiannyi bi ayɛ biribi ma wɔaayɛ hɛn yaw no, (2) ber a hɛn kun anaa hɛn yer edzi hɛn hweambɔ, na (3) ber a hɛnankasa yeedzi mfom bi ma hɛn abaw mu eebu no. Adzesua yi mu no, yebosusu tsebea ebiasa yi mu biara ho. Afei so, yɛbɔhwɛ dza yebotum esua efi nyimpa bi a Bible no ka no ho asɛm dɛ ɔkɔr do soom Jehovah aber a ohyiaa tsebea a ɔtse dɛm no hɔ.

KƆ DO SOM JEHOVAH BER A WO NUA CHRISTIANNYI BI AYƐ BIRIBI MA WƆAYƐ WO YAW NO

3. Ebɛn ɔhaw na Jehovah n’asomfo hyia?

³ Dza obotum ama wɔayɛ dzen ama hɛn. Hɛn nuanom Christianfo binom da suban bi edzi a otum hyɛ hɛn ebufuw. Binom so tum dzi hɛn hweambɔ anaa wɔnye hɛn nndzi no yie. Afei so, asafo mu mpanyimfo so botum edzi mfom. Dɛm nsɛm ahorow yi nyina botum ama binom enya adwen dɛ ɔnnyɛ Nyankopɔn  n’ahyehyɛdze nye yi. Ntsi dɛ nkyɛ wɔnye hɔn nuanom bɔbɔ mu dze ‘koryɛ asom’ Nyankopɔn no, wɔdze hɔn adwen si bɔn a hɔn nuanom ayɛ etsia hɔn no do na wogyaa adzesua kɔ mpo. (Zeph. 3:9) Ehwɛ a, wɔyɛ dɛm a oye? Yɛrobɔhwɛ Bible mu nyimpa bi a ohyiaa tsebea ahorow a ɔtsetse dɛm nye esuadze a yebotum enya efi n’asɛm no mu.

4. Ebɛn ɔhaw ahorow na ɔsomafo Paul hyiae?

⁴ Bible mu nhwɛdo. Nna ɔsomafo Paul nyim dɛ bɔn wɔ no nuanom Christianfo no ho. Dɛ nhwɛdo no, aber a ɔbɛyɛɛ osuanyi no, nna enuanom binom a wɔwɔ asafo no mu no suro no, osiandɛ nna wɔnngye nndzi dɛ ɔyɛ osuanyi papa. (Andw. 9:26) Ekyir yi, binom so kekaa nsɛmbɔn faa no ho dze sɛɛ ne dzin. (2 Cor. 10:10) Paul hun asafo mu panyin bi a osii gyinae bi a ɔbɛyɛ dɛ ɔhaaw enuanom no. (Gal. 2:​11, 12) Afei so, Mark a nna ɔbɛn Paul paa no dzii no hweambɔ. (Andw. 15:​37, 38) Nkyɛ Paul botum ama tsebea ahorow a ohyiae yi mu biara ato no fintsidua ma oeegyaa dɛ ɔnye dɛm enuanom no bɔbɔ. Naaso ɔannyɛ dɛm. Mbom onyaa no nuanom no ho adwen pa na ɔkɔr do soom Jehovah. Ebɛnadze na ɔboaa no ma n’abaw mu emmbu?

5. Ebɛnadze na ɔboaa Paul ma ɔammpa abaw wɔ no nuanom ho? (Colossaefo 3:​13, 14) (Hwɛ mfonyin no so.)

⁵ Nna Paul dɔ no nuanom Christianfo no. Ɔdɔ a nna ɔwɔ ma afofor no boaa no ma ɔammfa n’adwen ennsi hɔn mfom do, mbom ɔdze sii suban pa a nna wɔda no edzi no do. Afei so, ɔdɔ a nna ɔwɔ no boaa no ma ɔdze asɛm a ɔkyerɛwee wɔ Colossaefo 3:​13, 14 no yɛɛ edwuma. (Kenkan.) Ma yɛnhwɛ mbrɛ ɔdɔ a nna ɔwɔ no boaa no ma ɔnye Mark siesiee hɔn ntamu. Paul n’asɛmpatserɛw akwantu a odzi kan no mu no, Mark gyaa no hɔ. Naaso dza osii no nyina mu no, Paul ammfa asɛm no annhyɛ no mu. Ekyir yi, aber a Paul kyerɛɛw krataa kɛhyɛɛ Colossae asafo no nkuran no, ɔkamfoo Mark dɛ ɔyɛ ne nyɛnko dwumayɛnyi a ‘ɔakyekye no werɛ pii.’ (Col. 4:​10, 11) Aber a wɔdze Paul too efiadze wɔ Rome no, ɔhyɛɛ da ara bɔɔ Mark ne dzin kaa dɛ ɔmbra mbɔboa no. (2 Tim. 4:11) Ɔda edzi dɛ Paul ammpa abaw wɔ no nuanom ho. Ebɛnadze na yebotum esua efi Paul hɔ?

6-7. Yebesi dɛn akɔ do adɔ hɛn nuanom ɔmmfa ho dɛ wodzi mfom no? (1 John 4:7)

⁶ Esuadze a ɔwɔ mu. Jehovah pɛ dɛ yɛkɔ do dɔ hɛn nuanom. (Kenkan 1 John 4:7.) Ntsi sɛ hɛn nuanom binom nye hɛn enndzi no yie dɛ mbrɛ ɔsɛ dɛ Christianfo nye hɔnho dzi a, ɔnnsɛ dɛ yenya adwen dɛ wɔahyɛ da ara na wɔreyɛ biribi ma wɔaayɛ hɛn yaw. Mbom no, ɔsɛ dɛ yenya awerɛhyɛmu dɛ hɔn so robɔ hɔnho mbɔdzen dɛ wɔdze Bible mu afotusɛm bɛyɛ edwuma.  (Mbɛ. 12:18) Hɔn a wɔsom Nyankopɔn nokwar mu no tum dzi mfom, naaso ɔdɔ hɔn nyina. Sɛ yɛyɛ bɔn a, ɔnntow hɛn nnkyen, na dɛmara so na ɔmmfa hɛnho ebufuw nnhyɛ no mu. (Ndw. 103:9) Ohia paa dɛ yesuasua hɛn Egya a ɔdze bɔn kyɛ no, na hɛn so yɛdze afofor hɔn bɔn kyɛ hɔn!—Eph. 4:32–5:1.

⁷ Hom mma yɛnkaa dɛ aber a ewiei no rebɛn no, no ho behia dɛ yɛkɔ do ara bɛn hɛn nuanom kɛse. Ɔsɛ dɛ yɛhwɛ kwan dɛ ɔtaa a wɔdze ba hɛn do no, no mu botum ayɛ dzen. Osian hɛn gyedzi ntsi, wobotum akyer hɛn ekogu efiadze. Sɛ ɔba no dɛm a, dɛm aber no paa na yebehia hɛn nuanom. (Mbɛ. 17:17) Hom mma yɛnhwɛ dza ɔtoo asafo mu panyin bi a wɔfrɛ no Josep a a ɔwɔ Spain. Osiandɛ ɔnye enuanom binom annkɔ sogya ntsi, wɔkyeer hɔn koguu efiadze. Ɔkaa dɛ: “Aber a nna yɛwɔ efiadze hɔ no, nna hɛn nyinara gu fakor. Ntsi nna ɔrennyɛ dzen dɛ onua bi bɛyɛ biribi ma wo bo efuw. Sɛ nna yebotum atsena abɔ mu a, nna ɔsɛ dɛ yefi hɛn akoma mu dze bɔn a yɛyɛ tsia hɛnho no kyɛ. Dɛm a yɛyɛe no boaa hɛn ma yɛyɛɛ kor, na ɔbɔɔ hɛnho ban so. Nna nyimpa a wɔnnsom Jehovah so etwa hɛnho ehyia wɔ efiadze hɔ. Mber bi, mipirae wɔ me nsa ma wɔkyekyeree, ntsi nna munntum mmfa me nsa no nnyɛ hwee. Naaso nna enuanom no mu kor na ɔhor me ndzɛmba, na ɔyɛɛ ndzɛmba bi so boaa me. Dɛm aber no na mubohun dɛ enuanom no dɔ me paa.” Iyi ma yehu dɛ, dɛm aber yi paa na ɔsɛ dɛ yesiesie akasakasa biara a ɔbɔsoɛr wɔ yɛnye hɛn nuanom ntamu no!

KƆ DO SOM JEHOVAH ABER A WO HOKAFO EDZI WO HWEAMBƆ

8. Ebɛn ɔhaw na awarfo hyia?

⁸ Dza obotum ama wɔayɛ dzen ama hɛn. Awar biara nnyi hɔ a ɔhaw nnyi mu. Bible no ka no pefee dɛ awarfo “benya ɔhaw wɔ honam mu,” kyerɛ dɛ, hɔnho behiahia hɔn. (1 Cor. 7:28) Ebɛnadze ntsi a? Mbrɛ ɔtse nye dɛ, awarfo beenu no nyina yɛ nyimpa a bɔn wɔ hɔnho. Afei so, ɔsor obiara no suban, dza ɔpɛ nye dza ɔmmpɛ. Obotum so aba dɛ, ɔsor hɔn mu biara n’amambra nye mbrɛ wosii tsetsee no. Ber rokɔ do no, bi a okun no anaa ɔyer no bɛda suban bi edzi. Bi a woennhu dɛm suban no anaa dɛm suban no annda edzi ansaana wɔrowar. Iyinom mu biara botum dze ɔhaw aba. Ntsi sɛ ɔhaw ba a, dɛ nkyɛ hɔn mu biara bɛgye ato mu dɛ mfom bi a odzii na wɔakɛfa ɔhaw no aba na woeedzi ho dwuma no, ebɔhwɛ no nna wɔrobɔ hɔnho sombo. Wobotum mpo enya adwen dɛ sɛ wɔtsetsew mu anaa wogyaa awar a, ɔbɛma hɔnho atɔ hɔn. Naaso ehwɛ a, ɔyɛ nokwar a? b Hom mma yɛnhwɛ basia bi a Bible no ka no ho asɛm. Ohyiaa ɔhaw a no mu yɛ dzen paa wɔ n’awar mu, naaso ɔkɔr do dzii Jehovah nokwar.

9. Ebɛn ɔhaw na Abigail hyiae wɔ n’awar mu?

⁹ Bible mu nhwɛdo. Bible no ka Abigail no kun Nabal ho asɛm dɛ n’asɛm yɛ dzen na ne ndzeyɛɛ muo. (1 Sam. 25:3) Nna iyi botum ayɛ dzen ama Abigail dɛ ɔnye banyin a ɔtse dɛm bɛtsena. Ehwɛ a, nna Abigail botum afa kwan bi do adze noho efi awar a ɔtse dɛm ho? Aber a no kun hyehyɛɛ David a nna ɔbɛyɛ Israelhen daakye nye ne mbarimba no ahorba no, David yɛɛ dɛ ɔrokɔ ekoku no. Nna iyi yɛ hokwan a nkyɛ ɔbɛma Abigail adze no ho efi awar a ɔtse dɛm ho. (1 Sam. 25:​9-13) Nna nkyɛ Abigail botum eguan na ɔama David kwan ma oekoku Nabal. Naaso ɔdze noho gyee asɛm no mu, na ɔnye David kasae ma oennkoku Nabal.  (1 Sam. 25:​23-27) Ebɛnadze na okenyaan no ma ɔyɛɛ dɛm?

10. Ɔmmfa ho nsɛndzendzen a Abigail hyiae no, ɔbɛyɛ dɛ ebɛnadze na ɔboaa no ma ɔkɔr do tsenaa n’awar ho?

¹⁰ Nna Abigail dɔ Jehovah, na ne mbra a ɔfa awar ho no so, ɔanntoto no famu. Ekyingye biara nnyi ho dɛ, asɛm a Nyankopɔn kae aber a ɔdze Eve maa Adam dɛ ne yer no, nna onyim paa. (Gen. 2:24) Afei so, nna Abigail nyim dɛ Jehovah bu awar dɛ ɔyɛ krɔnkrɔn. Nna ɔpɛ dɛ ɔyɛ dza Nyankopɔn pɛ, na ɔbɛyɛ dɛ iyi na okenyaan no ma ɔyɛɛ dza obotum biara dɛ ɔbɔbɔ ne fiefo ho ban a no kun so ka ho. Ɔyɛɛ ntsɛm nye David kɛkasae ma oennkoku no kun Nabal. Mfom a ɔnnyɛ ɔno na odzii mpo no, ɔpaa ho kyɛw. Ɔda edzi dɛ nna Jehovah dɔ ɔbaa kokodurnyi a ɔnnhwehwɛ dza nankotsee pɛ no. Ebɛnadze na yernom na kunnom botum esua efi dza Abigail yɛe no mu?

11. (a) Ebɛnadze na Jehovah hwɛ kwan dɛ awarfo bɛyɛ? (Ephesusfo 5:33) (b) Dza Carmen yɛɛ dze bɔɔ n’awar ho ban no, ebɛnadze na esua efi mu? (Hwɛ mfonyin no so.)

¹¹ Esuadze a ɔwɔ mu. Sɛ awarfo rihyia nsɛndzendzen wɔ hɔn awar mu mpo a, Jehovah pɛ dɛ wɔkɔ do tsena. Sɛ Nyankopɔn hu dɛ awarfo robɔ mbɔdzen dɛ wobesiesie ɔhaw a wohyia wɔ hɔn awar mu na wofi hɔn akoma mu da ɔdɔ nye obu edzi kyerɛ hɔnho a, ɔma n’enyi gye paa. (Kenkan Ephesusfo 5:33.) Hom mma yɛnhwɛ hɛn akyerɛbaa bi a wɔfrɛ no Carmen n’asɛm no. Ɔwaree no, mfe esia ekyir na ɔhyɛɛ ase nye Jehovah Adasefo suaa Bible no, na ekyir yi wonuma no. Carmen kaa dɛ: “Mo kun n’enyi anngye gyinae a misii no ho. Nna ɔnye Jehovah rotwe kora. Nna ɔhyehyɛ me ahorba, na nna ɔka kyerɛ me dɛ obegyaa me.” Naaso ne nyina mu no, Carmen ammpa abaw. Ɔkɔr do tsenaa n’awar no ho. Ɔdze mfe pɔrpɔr 50 yɛɛ dza obotum biara dɛ ɔbɔdɔ no kun na oebu no so. Carmen toaa do dɛ: “Ber rokɔ do no, mebɛtsee mo kun ase yie na mubohun kwan pa a mubotum afa do nye no akasa. Osiandɛ minyim dɛ Jehovah bu awar dɛ ɔyɛ krɔnkrɔn ntsi, meyɛɛ dza mubotum biara dɛ mobɔbɔ m’awar ho ban. Modɔ Jehovah paa, ntsi mannda anndwen ho da dɛ mibegyaa mo kun.” c Sɛ ihyia ɔhaw wɔ w’awar mu a, nya awerɛhyɛmu dɛ Jehovah bɔboa wo ma eetum egyina ano.

KƆ DO ARA SOM JEHOVAH BER A EDZI MFOM BI MA W’ABAW MU EBU

12. Sɛ yɛyɛ bɔn kɛse bi a, ebɛn ɔhaw na yebotum akɔ mu?

¹² Dza obotum ama wɔayɛ dzen ama hɛn. Sɛ yɛyɛ bɔn kɛse bi a, obotum ama hɛn abaw mu eebu paa. Bible no ma yehu dɛ, bɔn a yɛyɛ no botum ama yaatse nka dɛ ‘yeebubu na  yɛabotow.’ (Ndw. 51:17) Onua bi a wɔfrɛ no Robert dze mfe pii yeer noho bɛyɛɛ asafo mu somfo. Naaso ɔyɛɛ bɔn kɛse bi, na iyi maa ɔtsee nka dɛ ɔama Jehovah ne nsa esi famu. Ɔkaa dɛ: “Me tsibowa haaw me paa. Ekyir yi mpo dze, nna megye moho a ɔnngye. Musuu pii na mobɔɔ Jehovah mpaa. Mber bi mpo dze, nna m’adwen yɛ me dɛ gyama Nyankopɔn rinntsie me mpaabɔ da. Ebɛnadze koraa ntsi na ɔsɛ dɛ otsie me? Adze yi ara mama ne nsa esi famu.” Sɛ yɛyɛ bɔn bi a, obotum aba dɛ hɛn abaw mu bobu paa ma yaatse nka dɛ Jehovah remmfa hɛn nnyɛ hwee bio, na yebotum mpo enya adwen dɛ no ho nnhia dɛ yɛbɔkɔ do asom no. (Ndw. 38:4) Sɛ dɛm na ɔtse wɔ w’afamu a, ɔwodze hwɛ obi a Bible no ka no ho asɛm dɛ ɔkɔr do dze nokwardzi soom Jehovah ɔmmfa ho dɛ ɔyɛɛ bɔn kɛse no.

13. Ebɛn bɔn kɛse na ɔsomafo Peter yɛe, na ebɛn mfom na odzii ansaana ɔrebɛyɛ dɛm bɔn no?

¹³ Bible mu nhwɛdo. Anafua a adze rebɛkye ma woeeku Jesus no, ɔsomafo Peter dzii mfomdo ahorow bi toatoaa do na iyi maa ɔyɛɛ bɔn kɛse. Odzi kan no, Peter gyee noho dzii dodo. Ɔkae tuu noho dɛ sɛ asomafo nkaa no guan gya Jesus hɔ mpo a, ɔnodze orinngya no hɔ da. (Mark 14:​27-29) Bio so, aber a nna wɔwɔ Gethsemane ture no mu no, Peter enntum annweɔn. (Mark 14:​32, 37-41) Afei, aber a nyimpadɔm bi dze sekan na mpotsibaa baa Jesus do dɛ wɔrebɛkyer no no, Peter gyaa no hɔ. (Mark 14:50) Ewiei koraa no, Peter kaa no mpɛn ebiasa dɛ onnyim Jesus na ɔkaa ntam dzii nsew mpo dze kaa ho. (Mark 14:​66-71) Ber a Peter hun dɛ ɔayɛ bɔn kɛse no, ebɛnadze na ɔyɛe? No werɛ howee na osuu pii, na ɔbɛyɛ dɛ ne tsibowa haaw no. (Mark 14:72) Ɔwodze hwɛ mbrɛ Peter no ho besi ayeraw no aber a ndɔnhwer kakraabi ekyir no, ohun dɛ woeku Jesus no. Bi a iyi maa ɔtsee nka dɛ mfaso biara nnyi no do!

14. Ebɛnadze na ɔboaa Peter ma ɔkɔr do soom Jehovah? (Hwɛ mfonyin no.)

¹⁴ Ndzɛmba pii boaa Peter ma ɔkɔr do soom Jehovah ɔmmfa ho dɛ odzii mfom mpo no. Bi nye dɛ, ɔanntsew noho emmfi no nuanom ho; ɔkɔr esuafo nkaa no nkyɛn na wɔkyekyee no werɛ. (Luke 24:33) Afei so, aber a Jesus nyanee fii ewufo mu no, ɔkɔr Peter ne nkyɛn, na ɔbɛyɛ dɛ ɔkɛhyɛɛ no dzen. (Luke 24:34; 1 Cor. 15:5) Ekyir yi, dɛ nkyɛ Jesus botwuw Peter n’enyim wɔ mfom a odzii ho no, ɔannyɛ dɛm. Mbom ɔkaa kyerɛɛ no dɛ ɔdze dwumadzi akɛse bɛhyehyɛ ne nsa. (John 21:​15-17) Nna Peter nyim paa dɛ ɔayɛ bɔn kɛse, naaso ɔkɔr do yeer noho dɛ ɔbɛyɛ dza ɔtsen. Ebɛnadze ntsi a? Osiandɛ nna ɔgye dzi paa dɛ no Wura Jesus mmpaa abaw wɔ no ho, na mbom ɔda ho ara dɔ no. Afei so, Peter no nuanom a ɔnye hɔn som no kɔr do  ara hyɛɛ no nkuran. Ebɛnadze na yebotum esua efi Peter n’asɛm no mu?

15. Ebɛn awerɛhyɛmu na Jehovah pɛ dɛ yenya? (Ndwom 86:5; Romefo 8:​38, 39) (Hwɛ mfonyin no so.)

¹⁵ Esuadze a ɔwɔ mu. Jehovah pɛ dɛ yɛgye dzi dɛ ɔdɔ hɛn na ɔayɛ krado dɛ ɔdze hɛn bɔn bɛkyɛ hɛn. (Kenkan Ndwom 86:5; Romefo 8:​38, 39.) Sɛ yɛyɛ bɔn a, hɛn tsibowa bu hɛn fɔ. Sɛ yɛtse nka dɛm a, ɔnnyɛ bɔn koraa. Naaso ɔnnsɛ dɛ yenya adwen dɛ Jehovah nndɔ hɛn bio anaa ɔremmfa hɛn bɔn nnkyɛ hɛn. Mbom no, ɔsɛ dɛ yɛhwehwɛ mboa ntsɛmara. Robert a yeedzi kan aka no ho asɛm no kaa dɛ: “Meyɛɛ bɔn osiandɛ nna megye moho dzi dɛ nsɔhwɛ biara a mibehyia no, mubotum egyina ano.” Obohun dɛ ɔsɛ dɛ ɔnye asafo mu mpanyimfo ka ne tsebea no ho asɛm. Ɔkaa dɛ: “Aber a mutuu dɛm anamɔn no, hɔ no ara na muhun dɛ Jehovah nam mpanyimfo no do rema meehu dɛ ɔdɔ me. Na muhun dɛ mpanyimfo no so dɔ me. Wɔboaa me ma mubohun dɛ Jehovah nntow me nnkyenee.” Hɛn so, sɛ yɛyɛ bɔn na yefi hɛn akoma mu nu hɛnho, yɛhwehwɛ mboa, na yɛyer hɛnho dɛ yɛrennyɛ dɛm bɔn no bio a, yebotum enya awerɛhyɛmu dɛ Jehovah bɔdɔ hɛn paa, na ɔdze hɛn bɔn so bɛkyɛ hɛn. (1 John 1:​8, 9) Awerɛhyɛmu a ɔtse dɛm no bɔboa hɛn ma sɛ yedzi mfom mpo a, yerinngyaa Jehovah som.

16. Ebɛnadze ntsi na esi wo bo dɛ ebɔkɔ do ara asom Jehovah?

¹⁶ Jehovah n’enyi sɔ mbɔdzen a yɛrobɔ dɛ yɛbɔsom no wɔ ewiei mber a no mu yɛ dzen yi mu no paa. Sɛ yedzi mfom anaa afofor yɛ biribi tsia hɛn ma hɛn abaw mu bu a, Jehovah bɔboa hɛn ma yeetum akɔ do asom no wɔ nokwar mu. Sɛ hɛn nuanom yɛ biribi tsia hɛn mpo a, yebotum dze akyɛ hɔn na yaakɔ do ara adɔ hɔn. Sɛ yehyia ɔhaw wɔ hɛn awar mu na yɛyɛ dza yebotum biara siesie ɔhaw no a, ɔkyerɛ dɛ yɛdɔ Nyankopɔn paa na yebu awar nhyehyɛɛ a ɔayɛ no so. Afei, sɛ yɛyɛ bɔn a, ɔsɛ dɛ yɛhwehwɛ Jehovah hɔ mboa, yɛgye to mu dɛ ɔdɔ hɛn na ɔdze hɛn bɔn no bɛkyɛ hɛn na yɛkɔ do som no. Yebotum enya awerɛhyɛmu dɛ sɛ ‘yɛammbrɛ wɔ papayɛ mu’ a, Jehovah behyira hɛn pii.—Gal. 6:9.