Nkɔnhyɛ ahorow a wɔakã ho asɛm wɔ ha no, no mu bi kã nsɛm a osisii wɔ ber kor mu ho asɛm. Nsɛm yi nyina ma yehu dɛ yɛtse “ewiei ber no” mu.​—Dan. 12:4.

• Kyerɛwnsɛm Nyi. 11:7; 12:13, 17; 13:1-8, 12

  Nkɔnhyɛ “Abowa no” edzi nkorɔfo do tum wɔ asaase do bɔbor mfe 3,000. Wɔ ewiei mber yi mu no, wɔbɔɔ ne tsir a otsĩa esuon no ma opirae. Naaso ekyir yi, wɔsaa no kur no, na “wiadzefo nyina” dzii n’ekyir. Satan nam abowa yi do tu hɔn a wɔasera hɔn a wɔaka no “hɔn do sa.”

  Ne Mbamu Noah n’aber do Nsuyirii n’ekyir no, aban ahorow a wɔsoɛr tsia Jehovah edzi nkorɔfo do tum. Mfe ɔhaha pii ekyir no, tum a nna Britain Ahenman no wɔ no, ɔhweer no mu pii wɔ Wiadze Kõ I no mu. Britain bɛyɛɛ dzen bio ber a United States dze noho kɛbataa noho no. Satan nam n’amambu ahyehyɛdze no nyina do rosoɛr tsia Nyankopɔn no nkorɔfo wɔ ewiei mber yi mu.

• Kyerɛwnsɛm Dan. 11:25-45

  Nkɔnhyɛ Etsifi afamu hen na anaafo afamu hen nye hɔnho dzi akõ dze per tum wɔ ewiei mber no mu.

  Ne Mbamu Germany na Anglo-America tumdzi no dzii akõ. Afe 1945 no, Soviet Union nye aman a wɔka noho no bɛyɛɛ etsifi afamu hen. Afe 1991, Soviet Union aban no gui. Iyi ekyir no, Russia nye aman a wɔka noho no bɛyɛɛ etsifi afamu hen no.

• Kyerɛwnsɛm Isa. 61:1; Mal. 3:1; Luke 4:18

  Nkɔnhyɛ Jehovah somaa no “bɔfoe” ma ‘obesiesiee kwan’ mu ansaana wɔdze Messiah Ahendzi no risi hɔ. Dɛm ‘bɔfo’ yi hyɛɛ ase kãa ‘nsɛmpa kyerɛɛ abɔbɔfo.’

  Ne Mbamu Ofi afe 1870 no, Onua C. T. Russell nye hɔn a nna wɔka noho no yɛɛ edwumadzen dze kyerɛkyerɛɛ Bible mu nokwasɛm ahorow mu. Afe 1881 no, wobohun dɛ ohia papaapa dɛ Nyankopɔn no nkorɔfo kã asɛm no. Wotsintsiim nsɛm bi tse dɛ “Yehia Nyimpa 1,000 Ma Wɔaakã Asɛm No” nye “Wɔasera Hɔn Dɛ Wɔnkã Asɛm No.”

• Kyerɛwnsɛm Matt. 13:24-30, 36-43

  Nkɔnhyɛ Ɔbarimba bi duaa ewifua wɔ n’ahaban mu, nna ɔtamfo bi so koduaa nworahaban forae. Nworahaban no fifirii na ɔhyɛɛ ewifua no do. Odur twaber no, wɔboaboaa nwora no ano fii ewifua no ho.

  Ne Mbamu Ofi afe 1870 no, nsonsonee a ɔda nokwar Christianfo nye ator Christianfo ntamu no bɛdaa edzi kofee. Wɔboaboaa nokwar Christianfo hɔn ano baa asafo no mu na wɔtseew hɔnho fii ator Christianfo ho.

• Kyerɛwnsɛm Dan. 2:31-33, 41-43

  Nkɔnhyɛ Ohonyi bi a wɔdze ndadze ahorow ayɛ, n’anansa yɛ dadze na awendɛtse.

  Ne Mbamu Awendɛtse no gyina hɔ ma ɔmamfo a Anglo-America dzi hɔn do tum a wɔsoɛr anaa wɔtsew etũa tsia tumdzi a ɔtse dɛm no. Dɛm nkorɔfo yi ma ɔyɛ dzen ma Anglo-America Wiadze Tumdzi no dɛ obedzi n’akoko do asɛm na ɔaayɛ n’adze dɛ dadze.

• Kyerɛwnsɛm Matt. 13:30; 24:14, 45; 28:19, 20

  Nkɔnhyɛ Wɔboaboaa “ewifua no” ano guu “san do,” na wɔdze “akowaa nokwafo nye nyansafo” no sii “fikuw” no do. Wɔhyɛɛ ase kãa ‘ahenman no ho asɛmpa wɔ wiadze nyina.’

  Ne Mbamu Afe 1919 no, wɔpaaw akowaa nokwafo no dɛ ɔnhwɛ Nyankopɔn no nkorɔfo do. Ofi dɛm aber no, Bible Esuafo no kɔr do yɛɛ asɛnka edwuma no dzendzenndzen. Ndɛ, Jehovah Adasefo rekã asɛm no wɔ nsaase bɔbor 200 do, na wotsintsim Bible ho nwoma wɔ kasa bɔbor 1,000 mu.

• Kyerɛwnsɛm Dan. 12:11; Nyi. 13:11, 14, 15

  Nkɔnhyɛ Abowa bi a ɔwɔ mmbɛn ebien no dzii enyim ma wɔyɛɛ abowa no a wɔbɔɔ no ɔbɔkum no ‘no honyi,’ na ɔmaa ‘abowa no honyi no ahom.’

  Ne Mbamu Anglo-America Wiadze Tumdzi no dzii enyim ma wɔdze Amanaman Apam no sii hɔ. Aman afofor so bɛkaa dɛm ahyehyɛdze yi ho. Ekyir yi, etsifi afamu hen no so bɛkaa Apam no ho. Ɔbɛkaa ho ofi afe 1926 kesi afe 1933. Dɛ mbrɛ nna nkorɔfo gye dzi dɛ Amanaman Apam no botum dze asomdwee aba wiadze no, dɛmara so na nkorɔfo gye dzi dɛ Amanaman Nkabɔmu no botum dze asomdwee aba wiadze. Naaso, iyi yɛ adze a Nyankopɔn n’Ahendzi no nkotsee na obotum dze aba.

• Kyerɛwnsɛm Dan. 8:23, 24

  Nkɔnhyɛ Ɔhen bi a n’enyim yɛ hũ ‘bɛsɛɛ adze nwanwa mu.’

  Ne Mbamu Anglo-America Wiadze Tumdzi no ekuku nyimpa pii na ɔasɛɛ ndzɛmba pii so. Dɛ nhwɛdo no, Wiadze Kõ II no, ɔman bi a ɔyɛ Britain na America hɔn tamfo no, United States toow atopaa ebien a ɔyɛ hũ too dɛm ɔman no mu. Dɛm akodze yi sɛɛ adze a nna bi mmbaa da.

• Kyerɛwnsɛm Dan. 11:31; Nyi. 17:3, 7-11

  Nkɔnhyɛ Abowa “memen” a ɔwɔ mmbɛn du no fii bun no mu bae, na ɔnoara so nye ɔhen a otsĩa awɔtwe. Daniel nwoma no kã dɛm ɔhen yi ho asɛm dɛ ɔyɛ “amamfoyɛ ekyiwadze.”

  Ne Mbamu Amanaman Apam no baa ewiei wɔ Wiadze Kõ II no mu. Ɔkõ no baa ewiei no, wɔdze Amanaman Nkabɔmu no ‘sii hɔ.’ Dɛ mbrɛ nna nkorɔfo gye dzi dɛ Amanaman Apam no botum dze asomdwee aba wiadze no, dɛmara so na nkorɔfo gye dzi dɛ Amanaman Nkabɔmu no botum dze asomdwee aba wiadze. Naaso, iyi yɛ adze a Nyankopɔn n’Ahendzi no na obotum dze aba. Amanaman Nkabɔmu no bɔtow ahyɛ ator som do.

• Kyerɛwnsɛm 1 Thess. 5:3; Nyi. 17:16

  Nkɔnhyɛ Amanaman no bɛpaa mu akã “asomdwee nye ahotɔ” ho asɛm na “mmbɛn du no” nye “abowa no” bɔtow ahyɛ “edwaman no” do na wɔaasɛɛ no. Iyi ekyir no, wɔbɛsɛɛ amanaman no.

  Ne Mbamu Amanaman no bɛkã dɛ wɔdze asomdwee na ahotɔ aba wiadze. Iyi ekyir no, aman a wɔka Amanaman Nkabɔmu no ho no bɛsɛɛ ator som nyina. Iyi na ɔbɛyɛ ahohiahia kɛse no n’ahyɛse. Dɛm ahohiahia yi bɛba ewiei, ber a Jesus bɛsɛɛ Satan no wiadze ne fã a aka no wɔ Har-Magedon no.

• Kyerɛwnsɛm Ezek. 38:11, 14-17; Matt. 24:31

  Nkɔnhyɛ Gog bɔtow ahyɛ Nyankopɔn no nkorɔfo hɔn asaase do. Iyi ekyir no, abɔfo bɔboaboa “mpamufo” no hɔn ano.

  Ne Mbamu Etsifi afamu hen no nye aban afofor a wɔwɔ wiadze yi mu no bɔtow ahyɛ Nyankopɔn no nkorɔfo do. Mber kakra wɔ iyi ekyir no, wɔbɛfa hɔn a wɔasera hɔn a wɔaka wɔ asaase do no akɔ sor.

• Kyerɛwnsɛm Ezek. 38:18-23; Dan. 2:34, 35, 44, 45; Nyi. 6:2; 16:14, 16; 17:14; 19:20

  Nkɔnhyɛ ‘Nyia ɔtse ɔpɔnkɔ fufuw’ do no bedzi “konyim akɔ konyim mu” ber a ɔbɛsɛɛ Gog nye no dɔm no. Wɔbɔtow “abowa no” akyen “ogya nsutaae” no mu, na oeebubu ohonyi kɛse no pɔsɔpɔsɔ.

  Ne Mbamu Jesus, Nyankopɔn n’Ahendzi no do Hen a oridzi tum no bɛgye Nyankopɔn no nkorɔfo. Ɔnye n’afɛ-adzedzifo 144,000 nye n’abɔfo dɔm no bɛsɛɛ aman a wɔaka hɔnho abɔ mu a wɔbɔtow ahyɛ Nyankopɔn no nkorɔfo do no. Iyi na ɔdze Satan no wiadze no bɛba ewiei.