1. Ber a odzi kan a ekãa Bible no mu asɛm kyerɛɛ binom no, bi a ebɛnadze na wɔyɛe a ɔyɛɛ wo nwanwa?

ANA ekaa da a odzi kan a ebɛgyee dzii dɛ ehu nokwar no? Nna ntseasee wɔ Bible mu nokwar no a irusũa no mu, kyerɛ dɛ, nna no mu da hɔ ankasa! Nna wo yamu a nkyɛ obiara bɛgye dza esũa no ato mu. Nna egye dzi dɛ Bible no mu asɛm no bɛma nkorɔfo enya asetsena a akomatɔyamu wɔ mu ndɛ, nye daakye ho enyidado soronko. (Ndw. 119:105) Dɛm ntsi edze ahokẽka kãa nokwasɛm a ehu no ho asɛm kyerɛɛ w’ebusuafo nye w’anyɛnkofo nyinara. Naaso wɔyɛɛ hɔn adze dɛn? Hɔn mu piinara enntsie dza ekãe no, na iyi yɛɛ wo nwanwa.

2-3. Nyimpa piinara yɛɛ hɔn adze dɛn wɔ dza Jesus yɛe no ho?

² Sɛ afofor enntsie asɛmpa a yɛkã no a, ɔnnsɛ dɛ ɔyɛ hɛn mu biara nwanwa. Jesus mpo, ɔwɔ mu dɛ ɔyɛɛ anwanwadze a nna ɔda edzi dɛ Nyankopɔn ka noho dze, naaso nyimpa pii poow no. Dɛ nhwɛdo no, Jesus nyaan Lazarus; anwanwadze a nna hɔn a wɔsoɛr tsia Jesus no mpo runntum nngye ho kyim. Ne nyina ekyir no, Jewfo akandzifo no anngye Jesus annto mu dɛ ɔno nye Messiah no. Nna wɔpɛ dɛ woku Jesus nye Lazarus nyina mpo!​—John 11:47, 48, 53; 12:9-11.

³ Nna Jesus nyim dɛ nyimpa piinara renngye no nnto mu dɛ ɔno nye Messiah no. (John 5:39-44) Jesus kãa kyerɛɛ John Onumanyi no n’esuafo no mu binom dɛ: “Nyia mennkɛyɛ no fintsidua no, nhyira aka no.” (Matt. 11:2, 3, 6) Ebɛnadze ntsi na nyimpa piinara poow Jesus?

4. Ebɛnadze na yebosusu ho wɔ adzesua yi mu?

⁴ Wɔ adzesua yi nye dza odzi hɔ no mu no, yɛbɔhwɛ siantsir ahorow ntsi a Jesus n’aberdofo piinara anngye no enndzi.  Yɛbɛsan ahwɛ siantsir a ndɛ nyimpa piinara nntsie asɛm a yɛkã no. Dza ohia papaapa no, yɛbɔhwɛ siantsir a ɔsɛ dɛ yenya gyedzi a ɔyɛ dzen wɔ Jesus mu ama yaakɔ do edzi n’ekyir.

5. Ebɛnadze ntsi na bi a nna binom wɔ adwen dɛ Jesus runntum nnyɛ Messiah a wɔhyɛɛ no ho nkɔm no?

⁵ Nyimpa piinara poow Jesus osian beebi a onyinii ntsi. Wɔgyee too mu dɛ nna Jesus yɛ kyerɛkyerɛfo a onyim nkyerɛkyerɛ na ɔyɛ anwanwadze. Naaso hɔn enyi do dze, nna wohu no dɛ ɔyɛ kapentanyi hianyi bi ne ba. Afei so nna ofi Nazareth; kurow a bi a nna wosusu dɛ ɔnnyɛ kurow tsitsir biara. Nathanael a ekyir yi mpo ɔbɛyɛɛ Jesus no suanyi no, ber a odzi kan a ohyiaa Jesus no, ɔkãa dɛ: “Aso biribi pa bi botum efi Nazareth aba da?” (John 1:46) Bi a nna Nathanael mmbu kurow a nna Jesus tse mu dɛm aber no dɛ ɔyɛ kurow tsitsir biara. Anaadɛ bi a nna nkɔnhyɛ a ɔwɔ Micah 5:2 a ɔkã dɛ wɔbɔwo Messiah no wɔ Bethlehem na nnyɛ Nazareth no wɔ n’adwen mu.

6. Ebɛnadze na nkyɛ ɔsɛ dɛ ɔma hɔn a wɔwɔ Jesus n’aber do no hu dɛ ɔno nye Messiah no?

⁶ Kyerɛwnsɛm no kã dɛn? Nkɔnhyɛnyi Isaiah hyɛɛ nkɔm too hɔ dɛ Jesus n’atamfo rennhaw hɔnho dɛ wobohu Messiah no n’ebusuasantsen. (Isa. 53:8) Naaso nna iyi ho nkɔnhyɛ pii wɔ hɔ. Sɛ dɛm nkorɔfo yi gyee ber yɛɛ nhwehwɛmu hun asɛm no mu nokwar a, nkyɛ wobohu dɛ wɔwoo Jesus wɔ Bethlehem, na ɔyɛ Ɔhen David n’asenyi. (Luke 2:4-7) Ntsi, beebi a Micah 5:2 kãa dɛ wɔbɔwo Jesus no, hɔ ara na wɔwoo no. Dɛm dze a, nna ɔhaw no nye dɛn? Nna nkorɔfo per hɔnho bu atsɛn. Nna wonnyim nokwasɛm a ɔwɔ asɛm no mu. Osian iyi ntsi, wɔanngye Jesus enndzi.

7. Ndɛ, ebɛnadze ntsi na nyimpa piinara mmpɛ Jehovah no nkorɔfo asɛm?

⁷ Ana ɔhaw a ɔtse dɛmara wɔ hɔ ndɛ? Nyew. Jehovah no nkorɔfo mu piinara nnyɛ adzefo anaa hɔn a wɔagye dzin. Dɛm ntsi nyimpa pii susu dɛ wɔyɛ nyimpa a “wonnsũaa nwoma na wɔyɛ ntsetsekwaa.” (Andw. 4:13) Nyimpa binom adwen nye dɛ ɔnnsɛ dɛ Nyankopɔn no nkorɔfo dze Bible no kyerɛkyerɛ nkorɔfo, osiandɛ wɔnnkɔr asɔfodzi skuul ahorow a wɔagye dzin no bi. Afofor so kã dɛ Jehovah Adasefo hɔn som no yɛ “Americafo hɔn som.” Naaso nokwasɛm nye dɛ sɛ efa Jehovah Adasefo esuon a, hɔn mu kor pɛ na ɔwɔ United States. Bio so, binom wɔ hɔ a afofor akã akyerɛ hɔn dɛ Jehovah Adasefo nngye Jesus nndzi. Mfe pii nye yi na wɔafrɛ Adasefo no “Communistfo,” “America akwanserafo,” nye hɔn a wɔma nkorɔfo soɛr tsia aban. Osiandɛ dɛm nkorɔfo yi nnyim nokwasɛm a ɔwɔ nsɛm yi mu anaa wɔnngye nokwasɛm no nnto mu ntsi, wɔmmpɛ dɛ wɔbɛyɛ Jehovah Adasefo.

8. Dɛ mbrɛ Asomafo Ndwuma 17:11 kyerɛ no, hɔn a wɔpɛ dɛ wohu Nyankopɔn n’asomfo a wɔwɔ hɔ ndɛ no, ebɛnadze na ɔsɛ dɛ wɔyɛ?

⁸ Ebɛnadze na ɔbɔboa obi ma oeekura ne gyedzi mu? Ɔwɔ dɛ nkorɔfo hwehwɛ nokwar a ɔwɔ asɛm no mu. Dɛm na Asɛmpa kyerɛwfo Luke sii no bo dɛ ɔbɛyɛ. Ɔdze yɛɛ no botae dɛ ɔbɔhwehwɛ nsɛm a ɔkyerɛwee no “ne nyina pɛpɛɛpɛ” fi n’ahyɛse. Nsɛm a nna nkorɔfo atse afa Jesus ho no, nna ɔpɛ dɛ hɔn a wɔbɛkenkan Luke Asɛmpa no ‘hu dɛm nsɛm no no nokwar.’ (Luke 1:1-4) Nna Jewfo a wɔwɔ tsetse Beroea no yɛ hɔn adze tse dɛ Luke. Aber a odzi kan a wɔtsee asɛmpa a ɔfa Jesus ho no, wɔdze totoo Hebrew Kyerɛwnsɛm no ho hwɛe hun dɛ nsɛm no yɛ nokwar anaa. (Kenkan Asomafo Ndwuma 17:11.) Dɛm pɛpɛɛpɛ na ɔsɛ dɛ nkorɔfo yɛ ndɛ. Ɔwɔ dɛ  wɔbɔ mbɔdzen hwehwɛ nokwar a ɔwɔ asɛm no mu. Ɔsɛ dɛ wɔdze dza Nyankopɔn no nkorɔfo akyerɛkyerɛ hɔn no toto dza Kyerɛwnsɛm no kã no ho. Afei so, ɔsɛ dɛ wosũa dza Jehovah no nkorɔfo ayɛ wɔ hɛn aber yi do no ho adze. Wɔ kwan bi do no, sɛ wɔyɛ “nhwehwɛmu a ɔkɔ ekyir” a, wɔremma kwan ma nyimpa mu nyiyimu anaa atsetsesɛm nnsɛɛ hɔn adwen.

9. Aber a Jesus annyɛ “asɛnkyerɛdze a ofi sor” no, ebɛn asɛm sii?

⁹ Nna nyimpa binom enyi nnsɔ mbrɛ osi ma Jesus kyerɛkyerɛ ma ɔka akoma no. Nna wɔhwɛ kwan dɛ ɔbɛyɛ pii aka ho. Wɔkãa kyerɛɛ no dɛ “ɔnyɛ asɛnkyerɛdze a ofi sor” mfa nkyerɛ dɛ ɔno nye Messiah no. (Matt. 16:1) Obotum aba dɛ asɛm a ɔwɔ Daniel 7:13, 14 a wɔanntse ase no ntsi na wɔkãa dɛ ɔnyɛ dɛm no. Naaso, nna Jehovah ne ber nnsoe dɛ dɛm nkɔnhyɛ no benya ne mbamu. Nna ɔsɛ dɛ dza Jesus dze akyerɛkyerɛ hɔn no ara ma wohu dɛ ɔno nye Messiah no. Naaso aber a ɔannyɛ asɛnkyerɛdze a nna wɔrohwɛ kwan dɛ ɔbɛyɛ no, wɔpoow no.​—Matt. 16:4.

10. Asɛm a Isaiah kyerɛwee faa Messiah no ho no, ebɛn kwan do na Jesus maa onyaa ne mbamu?

¹⁰ Kyerɛwnsɛm no kã dɛn? Nkɔnhyɛnyi Isaiah kyerɛɛw Messiah no ho asɛm dɛ: “Ɔrenntsẽa mu, eso ɔremma ne ndze do, anaaso ɔremma wɔnntse ne ndze wɔ ɔbrɔn mu.” (Isa. 42:1, 2) Aber a Jesus reyɛ no som edwuma no, ɔanntwetwe adwen ammba noho do. Oennsisi asɔrdan akɛse, ɔannhyɛ ntar soronko bi a nna asɔfo no hyɛ, anaa ɔannhwehwɛ dɛ wɔdze ɔsom mu abɔdzin akɛse bɛfrɛ no. Aber a nna woridzi Jesus n’asɛm no, ɔannyɛ asɛnkyerɛdze bi annkyerɛ Ɔhen Herod mbrɛ ɔbɛyɛ a ɔbɔsɔ n’enyi. (Luke 23:8-11) Ɔwɔ mu dɛ Jesus yɛɛ asɛnkyerɛdze ahorow dze, naaso nna edwuma a no ho hia no tsitsir nye dɛ ɔbɛkã asɛmpa no. Ɔkãa kyerɛɛ n’esuafo no dɛ: “Dɛm ntsi na mifiir edzi” bae.​—Mark 1:38.

11. Ndɛ, ebɛn adwen a ɔnntsen na nyimpa binom wɔ?

¹¹ Ana ɔhaw a ɔtse dɛmara wɔ hɔ ndɛ? Nyew.  Ndɛ, nyimpa piinara pɛ asɔrdan akɛse a wɔdze ndzɛmba a no bo yɛ dzen esiesie mu hyerɛpɛɛ, asɔfo a wokitsa abɔdzin akɛse, nye nyamesom mu afahyɛ ahorow a onngyina Bible no do. Naaso hɔn a wɔkɔ nsɔr ahorow a ɔtsetse dɛm no nnsũa Nyankopɔn nye ne tsirmpɔw no ho adze ahen biara. Hɔn a wɔba hɛn Christianfo nhyiamu ahorow ase no sũa dza Jehovah hwehwɛ fi hɛn hɔ nye mbrɛ wobesi abɔ hɔn bra ma ɔnye n’apɛdze eehyia. Afei so, hɛn Ahendzi Asa ho tsew, ɔnnyɛ akɛseakɛse na yennsiesiee mu hyerɛpɛɛ. Bio so, hɔn a wodzi ndzɛmba enyim no nnhyɛ ntar soronko bi, na dɛmara so na wɔmmfa abɔdzin akɛse nntoto hɔn ho do. Nkyii so, yɛdze hɛn nkyerɛkyerɛ nye hɛn gyedzi gyina Nyankopɔn n’Asɛm no do pintsinn. Ɔno mpo no, ndɛ nkorɔfo piinara mmpɛ dɛ wɔnye hɛn bɔsom osiandɛ wosusu dɛ ɔkwan a yɛfa do som no nnsɔ enyi tse hɔn dze no. Afei so, nnyɛ dza yɛkyerɛkyerɛ no na wɔrepɛ etsie.

12. Dɛ mbrɛ wɔakyerɛkyerɛ mu wɔ Hebrewfo 11:1, 6 no, ebɛnadze na ɔsɛ dɛ yɛdze hɛn gyedzi gyina do?

¹² Ebɛnadze na ɔbɔboa hɛn ma yeekura hɛn gyedzi mu? Ɔsomafo Paul kãa kyerɛɛ Christianfo a nna wɔwɔ Rome no dɛ: “Gyedzi no fi otsie mu, na otsie nam Christ asɛm do na ɔba.” (Rom. 10:17) Dɛm ntsi Kyerɛwnsɛm no a yebosũa no na ɔbɛma hɛn gyedzi ayɛ kɛse, na nnyɛ dɛ yebedzi nyamesom afahyɛ ahorow a wɔayɛ no kamakama naaso onngyina Kyerɛwnsɛm do no. Ɔsɛ dɛ yenya gyedzi a no mu yɛ dzen a ogyina Nyankopɔn ho nokwar nyimdzee do, osiandɛ “gyedzi nnyi mu a, obi nntum nnsɔ n’enyi.” (Kenkan Hebrewfo 11:1, 6.) Dɛm ntsi, no ho nnhia dɛ yebohu asɛnkyerɛdze soronko bi efi sor ana yaagye edzi dɛ yeehu nokwar no. Bible mu nkyerɛkyerɛ a ɔhyɛ gyedzi dzen no ara a yɛbɔhwehwɛ mu akɔ ekyir no bɔboa hɛn ma yaagye edzi dɛ yeehu nokwar no, na yeeyi hɛn adwen mu a ɔyɛ hɛn konsee no efi hɔ.

13. Ebɛnadze na ɔmaa nyimpa piinara kasae tsiaa Jesus?

¹³ Wɔ Jesus n’aber do no, ɔyɛɛ John Onumanyi no n’esuafo no nwanwa dɛ nna  Jesus n’esuafo no nndzi mbuada. Jesus kyerɛkyerɛɛ mu dɛ nna no ho nnhia dɛ wobedzi mbuada ber tsentsen a ɔda ho ara tse ase no. (Matt. 9:14-17) Ɔno mpo no, Phariseefo nye nyimpa afofor a wɔsoɛr tsia Jesus no kasae tsiaa no dɛ onndzi hɔn amambra nye hɔn amandze ahorow no do. Aber a Jesus saa ayarfo yarba wɔ Ahomgyeda no, hɔn bo fuwii. (Mark 3:1-6; John 9:16) Nna wɔdze tuw hɔnho dɛ wodzi Ahomgyeda Mbra no do pɛpɛɛpɛr, naaso ber kor no ara mu no nna wodzi gua so wɔ asɔrfi hɔ. Aber a Jesus kasae tsiaa dza nna wɔreyɛ no, hɔn bo fuuw dzendzenndzen. (Matt. 21:12, 13, 15) Afei so, hɔn a Jesus kãa asɛmpa no kyerɛɛ hɔn wɔ nhyiamudan mu wɔ Nazareth no, aber a ɔdze nsɛm bi a hɔn enyi nngye ho a nna esisi wɔ Israel abakɔsɛm mu yɛɛ ntotoho dze daa no edzi dɛ wɔyɛ pɛsɛankonyafo a wonnyi gyedzi no, hɔn bo fuuw kɛsenara. (Luke 4:16, 25-30) Nyimpa piinara anngye Jesus enndzi, osiandɛ ɔannyɛ dza nna wosusu dɛ ɔbɛyɛ no.​—Matt. 11:16-19.

14. Ebɛnadze ntsi na Jesus kasae tsiaa amandze ahorow a ɔnnye Kyerɛwnsɛm no nnhyia no?

¹⁴ Kyerɛwnsɛm no kã dɛn? Jehovah nam nkɔnhyɛnyi Isaiah do kãa dɛ: “Susuampa dɛ ɔman yi twe bɛn me, na wɔdze hɔn ano ɔnye hɔn anofamfa dzi me nyi, na hɔn akoma dze woeyi efi me nkyɛn kɔ ekyirkyir, na hɔn suro a wosuro me yɛ nyimpa ahyɛdze a wɔdze akyerɛkyerɛ hɔn no.” (Isa. 29:13) Nna ɔyɛ no kwan do dɛ Jesus kasae tsiaa amandze ahorow a ɔnnye Kyerɛwnsɛm no nnhyia no. Hɔn a nna wobu mbra ahorow a nyimpa ahyehyɛ nye amandze ahorow no kyɛn Kyerɛwnsɛm no poow Jehovah nye nyia ɔsomaa no dɛ Messiah no.

15. Ndɛ, ebɛnadze ntsi na nyimpa piinara mmpɛ Jehovah Adasefo asɛm?

¹⁵ Ana ɔhaw a ɔtse dɛmara wɔ hɔ ndɛ? Nyew. Nyimpa piinara fa Jehovah Adasefo ho ebufuw osiandɛ wɔnye hɔn nndzi afahyɛ ahorow a onngyina Kyerɛwnsɛm no do tse dɛ awodadzi nye Borɔnya. Afofor so fa Jehovah Adasefo ho ebufuw osiandɛ wɔmmfa hɔnho nnhyehyɛ ɔman afahyɛ ahorow mu anaa wonndzi eyiyɛ ho amandze a ɔnnye Nyankopɔn n’Asɛm no nnhyia no do. Hɔn a dza yɛakã ho asɛm yi ntsi wɔmmpɛ Jehovah Adasefo asɛm no, bi a wɔgye dzi papaapa dɛ wɔrosom Nyankopɔn wɔ kwan pa do. Naaso sɛ wɔgye wiadze no amandze ahorow to mu kyɛn dɛ wɔbɛgye Bible mu nkyerɛkyerɛ a no mu da hɔ no ato mu a, worunntum nnsɔ Nyankopɔn enyi.​—Mark 7:7-9.

16. Dɛ mbrɛ Ndwom 119:97, 113, 163-165 kyerɛ no, ebɛnadze na ɔsɛ dɛ yɛyɛ, na ebɛnadze na ɔnnsɛ dɛ yɛyɛ?

¹⁶ Ebɛnadze na ɔbɔboa hɛn ma yeekura hɛn gyedzi mu? Ɔsɛ dɛ yenya ɔpɛ a no mu dzen dɛ yebedzi Jehovah ne mbra nye ne ngyinadonsɛm do. (Kenkan Ndwom 119:97, 113, 163-165.) Sɛ yɛdɔ Jehovah a, yɛbɔpow amandze biara a ɔnnsɔ n’enyi. Yɛremma biribiara nnsiw hɛn kwan dɛ yɛbɔdɔ Jehovah.

17. Nna ebɛnadze na nyimpa piinara a wɔwɔ Jesus n’aber do no rohwɛ kwan dɛ ɔbɛyɛ a ɔannyɛ ma ntsi wɔpoow no no?

¹⁷ Nna nyimpa binom a wɔwɔ Jesus n’aber do no pɛ dɛ wɔsesa aban a ɔwɔ do no. Nna wɔrohwɛ kwan dɛ Messiah no bɛgye hɔn efi Rome tumdzi no nhyɛdo ase. Naaso aber a nna wɔpɛ dɛ wɔkyer Jesus yɛ no ɔhen no, ɔannyɛ. (John 6:14, 15) Nna asɔfo no nye nyimpa binom so suro dɛ Jesus bɛsesa aban a ɔwɔ do no. Sɛ ɔba no dɛm a nna Romefo no hɔn bo bofuw na wɔaagye tum a wɔdze ama asɔfo no efi hɔn nsamu. Osiandɛ nna amanyɛsɛm ho nsɛm a ɔtsetse dɛm haw Jewfo no ntsi, hɔn mu piinara poow Jesus.

18. Ebɛn Bible mu nkɔnhyɛ a ɔfa Messiah no ho na nyimpa piinara buu hɔn enyi guu do?

 ¹⁸ Kyerɛwnsɛm no kã dɛn? Ɔwɔ mu dɛ nkɔnhyɛ pii kãa dɛ Messiah no bɛyɛ Ɔkofo konyimdzifo dze, naaso nkɔnhyɛ afofor so daa no edzi dɛ obedzi kan ewu ama hɛn bɔn ana. (Isa. 53:9, 12) Ɔnodze nna ebɛnadze ntsi na Jewfo no rohwɛ kwan dɛ Messiah no bɛgye hɔn? Nyimpa pii a nna wɔwɔ Jesus n’aber do no buu hɔn enyi guu nkɔnhyɛ biara a nna ɔremma wonnya hɔn haw n’ano edur amonmu hɔ ara no do.​—John 6:26, 27.

19. Ndɛ, ebɛn ndzɛmba na nkorɔfo hwɛ kwan dɛ yɛbɛyɛ a yɛnnyɛ ma ntsi wonntsie asɛm a yɛkã no?

¹⁹ Ana ɔhaw a ɔtse dɛmara wɔ hɔ ndɛ? Nyew. Ndɛ, nyimpa pii nngye hɛn nnto mu osiandɛ yɛmmfa hɛnho nnhyehyɛ amanyɛsɛm mu. Wɔhwɛ kwan dɛ yɛbɔtow aba. Naaso yenyim dɛ sɛ yeyi nyimpa bi dɛ ondzi hɛn do a, ɔkyerɛ dɛ yɛapow Jehovah. (1 Sam. 8:4-7) Bi a afofor so bɛkã dɛ ɔsɛ dɛ yesisi skuul adan nye ayarsabea, na yɛyɛ adɔyɛ. Osiandɛ yɛyer hɛnho kã asɛmpa no, na yɛmmfa hɛn adwen nnsi wiadze no ne haw a yebeyi efi hɔ do ntsi, wonntsie asɛm a yɛkã no.

20. Sɛ yɛhwɛ asɛm a Jesus kãe wɔ Matthew 7:21-23 no a, ebɛnadze ankasa na ɔsɛ dɛ yɛdze hɛn adwen si do?

²⁰ Ebɛnadze na ɔbɔboa hɛn ma yeekura hɛn gyedzi mu? (Kenkan Matthew 7:21-23.) Adze tsitsir a ɔsɛ dɛ yɛdze hɛn adwen si do nye edwuma a Jesus hyɛɛ hɛn dɛ yɛnyɛ no. (Matt. 28:19, 20) Ɔnnsɛ dɛ yɛma kwan ma amanyɛsɛm nye asetsena mu nsɛnsɛm twetwe hɛn adwen da. Yɛdɔ afofor na sɛ wohyia ɔhaw a yɛtse nka ma hɔn, naaso yenyim dɛ kwan kor a oye papaapa a yebotum afa do aboa hɔn nye dɛ yɛbɛkyerɛkyerɛ hɔn Nyankopɔn n’Ahendzi no ho adze, na yaaboa hɔn ma wɔnye Jehovah eenya ebusuabɔ pa.

21. Ebɛnadze na ɔsɛ dɛ yesi hɛn bo dɛ yɛbɛyɛ?

²¹ Adzesua yi mu no, yeehu ndzɛmba anan a ɔmaa Jesus yɛɛ fintsidua maa nyimpa piinara a nna wɔwɔ n’aber do no anaa wɔpoow no. Na ndɛ so dɛm ndzɛmba no ama nyimpa binom nntsie asɛm a Jesus n’ekyirdzifo kã no. Naaso ana dɛm ndzɛmba yi ara na ɔsɛ dɛ yekwetsir ama yaakɔ do edzi Jesus n’ekyir? Oho. Wɔ adzesua a odzi hɔ mu no, yɛbɔhwɛ ndzɛmba afofor anan bi so aka ho. Ɔmbra dɛ yebesi hɛn bo dɛ yɛremma biribiara nnsiw hɛn kwan dɛ yebedzi Jesus n’ekyir, na yaakɔ do enya gyedzi a no mu yɛ dzen!