1. Ebɛn gyinae tsitsir na ɔsɛ dɛ obiara si?

 NDƐ, no ho hia dɛ obiara si gyinae tsitsir bi. Ɔsɛ dɛ obiara si gyinae dɛ ɔbɛtaa Jehovah Nyankopɔn a ɔfata dɛ odzi amansan yi do tum no ekyir anaadɛ ɔbɛtaa ne tamfo kɛse Satan Abɔnsam ekyir. Obiara runntum nnka dɛ ɔno a onngyina Nyankopɔn n’afa, ɔno so a onngyina Satan n’afa. Gyinae a obiara besi no na ɔbɛkyerɛ dɛ obenya nkwa daakye anaa wɔbɛsɛɛ no. (Matt. 25:31-33, 46) “Ahohia kɛse no” mu no, wɔbɛhyɛ nkorɔfo nsew. Iyi na ɔbɛkyerɛ dɛ wobenya nkwa anaa wɔbɛsɛɛ hɔn.​—Nyi. 7:14; 14:9-11; Ezek. 9:4, 6.

2. (a) Ebɛnadze na Hebrewfo 10:35-39 hyɛ hɛn nkuran dɛ yɛnyɛ? (b) Nyikyerɛ nwoma no besi dɛn aboa hɛn?

² Kenkan Hebrewfo 10:35-39. Sɛ esi gyinae dɛ ibegyina Jehovah no tumdzi ekyir a, ɔnodze esi gyinae pa. Ekyingye biara nnyi ho dɛ, epɛ dɛ eboa afofor ma hɔn so wosi gyinae a ɔtse dɛmara. Ibotum dze nsɛm a ɔwɔ Nyikyerɛ nwoma no mu no aboa hɔn. Nyikyerɛ nwoma no ma yehu dza ɔbɔto hɔn a wɔsoɛr tsia Jehovah no. Ɔsan so ma yehu nhyira a hɔn a wɔdze nokwardzi taa Jehovah no tumdzi ekyir no benya daakye. No ho hia dɛ yesua dɛm nokwasɛm ahorow yi. Sɛ yɛyɛ dɛm a, ɔbɔboa hɛn ma hɛn bo a yeesi dɛ yɛbɔkɔ do ara asom Jehovah no, yaahyɛ mu dzen. Ɔno da nkyɛn a, yebotum dze dza yeesua no aboa afofor ma wɔaabɔsom Jehovah na wɔaakɔ do ara asom no.

3. Ebɛn nsɛmbisa na yebosusu ho wɔ adzesua yi mu?

³ Yebosusu nsɛmbisa a odzidzi do yi ho wɔ adzesua yi mu. Ebɛn nhyira na hɔn a wɔtaa Nyankopɔn no tumdzi ekyir no benya no daakye? Na hɔn a wɔtaa abowa kɔkɔɔ a Nyikyerɛ nwoma no ka ho asɛm ekyir no so ɛ, ebɛn asɛm na ɔbɔto hɔn?

4. Woananom na ɔsomafo John hun dɛ wɔnye Jesus wɔ sor no?

⁴ Enyido-adzehu bi a ɔsomafo John nyae mu no, ohun nyimpakuw ebien bi a wɔtaa Jehovah no tumdzi ekyir. Dɛm ekuw ebien yi nyinara nyaa onnyiewiei nkwa. Kuw a odzi kan no dodow yɛ 144,000. (Nyi. 7:4) Woyii hɔn fii asaase do dɛ wɔnkɛka Jesus ho ma wɔnyɛ Ahenman wɔ sor. Wɔnye Jesus bɔbɔ mu edzi asaase yi do tum. (Nyi. 5:9, 10; 14:3, 4) John hunii wɔ enyido-adzehu no mu dɛ wɔnye Jesus gyina Zion Bepɔw a ɔwɔ ɔsor no enyim.​—Nyi. 14:1.

5. Ebɛn akatua na 144,000 no mufo a wɔaka wɔ asaase do no benya no ndaansa yi ara?

⁵ Ofi asomafo no aber do besi ndɛ Nyankopɔn apaw nyimpa pii a wɔbɛyɛ 144,000 no mufo. (Luke 12:32; Rom. 8:17) Naaso ɔbɔfo bi kaa kyerɛɛ John dɛ, obodu nda a odzi ekyir no mu no, nna hɔn a wɔasera hɔn a wɔbɔkɔ sor no, hɔn mu kakraabi pɛ na wɔwɔ asaase do. Dɛm nkorɔfo yi benya hɔn “nsɔwano” a otwa tun a ɔkyerɛ dɛ Jehovah agye hɔn ato mu ansaana ahohiahia kɛse no ahyɛ ase. (Nyi. 7:2, 3; 12:17) Afei, wɔ ahohiahia kɛse no mu no, wɔbɛfa hɔn akɔ sor ma wɔaakɛka 144,000 no mufo a woedzi kan wɔ sor no ho. Wɔnye Jesus bɔbɔ mu edzi adze wɔ Nyankopɔn n’Ahendzi no mu.​—Matt. 24:31; Nyi. 5:9, 10.

6-7. (a) Ebɛn kuw fofor na John hunii, na ebɛnadze na yenyim fa hɔnho? (b) Ebɛnadze ntsi na ɔsɛ dɛ nkaafo no na “nyimpadodow kɛse” no nyina ma asɛm a ɔwɔ Nyikyerɛ tsir 7 no ho hia hɔn?

⁶ John hun hɔn a wɔbɔkɔ sor ekyir no, ɔsanee hun “nyimpadodow kɛse” bi so. Dɛm kuw yi nntse dɛ kuw a no mufo yɛ 144,000 no, osiandɛ obiara nntum nnkan hɔn. (Nyi. 7:9, 10) Wɔyɛ ebɛn nkorɔfo? John nyaa iyi ho mbuae dɛ: “Woyi nye hɔn a wofi ahohia kɛse no mu no, na wɔahor hɔn ntar, na ayɛ fitaa wɔ Eguambaa no bɔgyaa mu.” (Nyi. 7:14) Sɛ dɛm “nyimpadodow kɛse” yi twa ahohiahia kɛse no a, wɔdze enyigye bɛtsena asaase do na wobenya nhyira pii.​—Ndw. 37:9-11, 27-29; Mbɛ. 2:21, 22; Nyi. 7:16, 17.

⁷ Sɛ yɛwɔ enyidado dɛ yɛbɔkɔ sor, anaa yɛbɛtsena asaase do a, ana yehu hɛnho wɔ Nyikyerɛ tsir 7 no mu? Nyew! Ɔsɛ dɛ yehu hɛnho wɔ mu. Ɔbɛyɛ enyigye mber ama Nyankopɔn n’asomfo a wɔwɔ ekuw ebien nyinara mu no! Hɛn enyi bɛgye paa dɛ yegyinaa Nyankopɔn no tumdzi ekyir. Ebɛnadze bio na Nyikyerɛ nwoma no ma yehu fa ahohiahia kɛse no ho?​—Matt. 24:21.

8. Ebɛnadze na ɔbɛhyɛ ahohiahia kɛse no ase, na nyimpa pii bɛyɛ hɔn adze dɛn?

⁸ Dɛ mbrɛ yehunii wɔ adzesua a odzi iyi enyim mu no, ɔnnkɛkyɛr wiadze etumfo no bɔsoɛr etsia Babylon Kɛse no a ogyina hɔ ma ator som ahenman no. (Nyi. 17:16, 17) Iyi na ɔbɛhyɛ ahohiahia kɛse no ase. Aso iyi bɛma nyimpa pii abɔsom Jehovah anaa? Dabida! Mbom Nyikyerɛ tsir 6 no ma yehu dɛ, hɔn a wɔnnsom Jehovah no bɔkɔ akɔhwehwɛ bambɔ efi etumfo nye wiadze eguadzi nhyehyɛɛ a wɔdze toto mbepɔw ho no hɔ. Osiandɛ dɛm nkorɔfo yi rinngyina Jehovah n’Ahendzi no ekyir ntsi, Jehovah bobu hɔn dɛ wɔyɛ n’atamfo.​—Luke 11:23; Nyi. 6:15-17.

9. Ahohiahia kɛse no mu no, ebɛn kwan do na ɔbɛda edzi dɛ Jehovah n’asomfo yɛ soronko fi hɔn a wɔnnsom Nyankopɔn no ho? Na iyi bɔkɔ ekowie dɛn?

⁹ Aber a hɔn a wɔwɔ ator som mu nnhu dza wɔnnyɛ no, Jehovah n’asomfo anokwafo dze ɔbɛda edzi dɛ wɔyɛ soronko koraa wɔ ahohiahia kɛse no mu. Dɛm aber no hɔn nkotsee nye nyimpa a wɔbɔsom Jehovah Nyankopɔn, na  wɔrenntaa “abowa no” n’ekyir. (Nyi. 13:14-17) Osiandɛ wɔbɔkɔ do edzi Jehovah nokwar ntsi, ɔbɛhyɛ Jehovah n’atamfo no ebufuw. Iyi bɛma aman a wɔaka hɔnho abɔ mu no atow ahyɛ Nyankopɔn no nkorɔfo a wɔwɔ wiadze nyina do. Iyi na Bible no ka ho asɛm dɛ Gog a ofi Magog bɔtow ahyɛ Nyankopɔn no nkorɔfo do no.​—Ezek. 38:14-16.

10. Dɛ mbrɛ wɔaka ho asɛm wɔ Nyikyerɛ 19:19-21 no, sɛ wɔtow hyɛ Jehovah n’asomfo do a, ebɛnadze na ɔbɛyɛ?

¹⁰ Sɛ wɔtow hyɛ Jehovah no nkorɔfo do a, ebɛnadze na Jehovah bɛyɛ? Ɔka dɛ: “M’ebufuhyew bɛdzɛw.” (Ezek. 38:18, 21-23) Asɛm a ɔwɔ Nyikyerɛ tsir 19 no ma yehu dza ɔbɔkɔ do. Jehovah bɔsoma Jesus dɛ ɔmbɔbɔ n’asomfo ho ban na ɔnko ntsia hɔn atamfo. Dɛm aber no, “dɔm a wɔwɔ sor,” kyerɛ, abɔfo anokwafo nye 144,000 no bɛka Jesus ho ma wɔaako etsia Gog a ofi Magog. (Nyi. 17:14; 19:11-15) Ebɛnadze na obefi dɛm ɔko yi mu aba? Wɔbɛsɛɛ ahyehyɛdze nye nyimpa biara a ɔsoɛr tsia Jehovah no korakora!​—Kenkan Nyikyerɛ 19:19-21.

11. Ebɛn adze tsitsir na Nyikyerɛ nwoma no ka ho asɛm?

¹¹ Twa ho mfonyin hwɛ dɛ wɔasɛɛ Nyankopɔn n’atamfo, na n’asomfo anokwafo a wɔwɔ asaase do dze woenya hɔn tsir edzidzi mu! Ehwɛ a, wɔbɛtse nka dɛn? Ɔbɛyɛ enyigye mber ankasa! Sɛ wɔsɛɛ Babylon Kɛse no a, hɔn a wɔwɔ sor dze enyigye bɔbɔ ose. Naaso, biribi fofor bɔkɔ do a ɔnodze ɔbɛma enyigye no ayɛ kɛse koraa. (Nyi. 19:1-3) Ɔno nye “Eguambaa no n’ayeforhyia no.” Nokwasɛm nye dɛ, iyi nye adze tsitsir a Nyikyerɛ nwoma no ka ho asɛm.​—Nyi. 19:6-9.

12. Dɛ mbrɛ Nyikyerɛ 21:1, 2 kyerɛ no, ebɛn aber na Eguambaa no n’ayeforhyia no bɔkɔ do?

¹² Ebɛn aber na Eguambaa no n’ayeforhyia no bɔkɔ do? Ansaana Har-Magedon ko no bɛhyɛ ase no, nna 144,000 no mufo nyina wɔ sor. (Kenkan Nyikyerɛ 21:1, 2.) Eguambaa no n’ayeforhyia no bɔkɔ do wɔ Har-Magedon ko no ekyir, aber a wɔasɛɛ Nyankopɔn n’atamfo nyinara no.​—Ndw. 45:3, 4, 13-17.

13. Ebɛnadze na ɔbɔkɔ do wɔ Eguambaa no n’ayeforhyia no ase?

¹³ Ebɛnadze na ɔbɔkɔ do wɔ Eguambaa no n’ayeforhyia no ase? Dɛ mbrɛ awar ka ɔbarimba na ɔbaa bi bɔ mu no, dɛmara so na Eguambaa no n’awar no bɛka Ɔhen Jesus Christ nye 144,000 a wɔka hɔnho asɛm dɛ ne “yer” no abɔ mu. Dɛm dwumadzi tsitsir yi na ɔbɛhyɛ mfe 1,000 a Jesus na 144,000 no dze bedzi tum wɔ asaase do no ase.​—Nyi. 20:6.

14-15. Nyikyerɛ tsir 21 no dze 144,000 no toto ebɛnadze ho? (Hwɛ mfonyin a ɔwɔ Ɔweɔn-Aban yi enyim no.)

¹⁴ Nyikyerɛ tsir 21 no dze 144,000 no toto kurow fɛɛfɛw bi ho. Wɔfrɛ dɛm kurow yi “Jerusalem fofor.” (Nyi. 21:2, 9) Kurow no wɔ mfapem 12 a wɔakyerɛw “Eguambaa no n’asomafo duebien no edzin duebien wowɔ do.” Iyi a John hunii no maa n’enyi gyee paa. Ebɛnadze ntsi a? Osiandɛ ohun dɛ wɔakyerɛw ne dzin wɔ fapem kor do. Nna ɔyɛ hokwan kɛse paa!​—Nyi. 21:10-14; Eph. 2:20.

¹⁵ Kurow biara nnyi hɔ a yebotum dze atoto kurow a yɛreka ho asɛm yi ho. Kurow no n’abrɔn yɛ sika mapa, no mbobow 12 no yɛ ahondze pa, na wɔdze aboɔdzen bo ahorow nyina ahyehyɛ kurow no ne fasu na ne fapem, na kurow no ne tsentsen, ne tɛtɛr na no krɔn nyina yɛ pɛ. (Nyi. 21:15-21) Naaso, John hun dɛ wɔaka kurow no adze kor. Hom mma yɛnhyɛ asɛm a ɔsanee kae no nsew. Ɔkaa dɛ: “Mennhu asɔrdan wɔ mu: na Ewuradze  Nyankopɔn, adze nyina do Tumfo no, nye Eguambaa no na wɔyɛ n’asɔrdan. Na kurow no nnhia dɛ ewia anaa bosoom hyerɛn wɔ do: osiandɛ Nyankopɔn enyimnyam hyerɛɛn wɔ do, na ne nkandzea nye Eguambaa no.” (Nyi. 21:22, 23) Hɔn a wɔka bɔ mu yɛ Jerusalem Fofor no bohu Jehovah n’enyim na wɔnye no bɛtsena. (Heb. 7:27; Nyi. 22:3, 4) Iyi kyerɛ dɛ Jehovah na Jesus nye kurow no n’asɔrdan.

16. Ebɛn nhyira na adasamba benya wɔ Mfrenhyia Apem Tumdzi no mu?

¹⁶ Sɛ hɔn a wɔasera hɔn no dwendwen dɛm kurow yi ho a, hɔn enyi gye paa. Naaso, ɔsɛ dɛ hɔn a wɔwɔ enyidado dɛ wɔbɛtsena asaase do no so ma kurow yi ho asɛm hia hɔn. Mfrenhyia Apem Tumdzi no mu no, Jerusalem Fofor no dze nhyira pii bɛbrɛ adasamba wɔ asaase do. John kaa dɛm nhyira yi ho asɛm dɛ ɔtse dɛ “nkwa nsu esutsen.” Afei ‘nkwandua’ wɔ esutsen no n’afa na n’afa na ndua yi n’ahaban na “wɔdze sa amanaman yarba.” (Nyi. 22:1, 2) Dɛm aber no, adasamba nyinara benya dɛm nhyehyɛɛ yi do mfaso. Nkakrankakra no, hɔn a wɔbrɛ hɔnho adze nyinara bɛyɛ nyimpa a wodzi mu. Dɛm aber no yarba, yaw nye awerɛhow befi hɔ koraa.​—Nyi. 21:3-5.

17. Dɛ mbrɛ Nyikyerɛ 20:11-13 kyerɛ no, woananom na wobenya Mfrenhyia Apem Tumdzi no do mfaso?

¹⁷ Woananom na wobenya dɛm nhyehyɛɛ kamakama yi do mfaso? Hɔn a wobedzi kan enya nhyehyɛɛ yi do mfaso nye nyimpadodow kɛse a wobotwa Har-Magedon, nye mbofra a wɔbɔwo hɔn wɔ wiadze fofor no mu no. Afei so, Nyikyerɛ tsir 20 ka dɛ wobenyan ewufo. (Kenkan Nyikyerɛ 20:11-13.) Wobenyan anokwafo a “wɔtsen” a woewuwu no aba nkwa mu. Dɛmara so na wobenyan hɔn a “wɔnntsen,” kyerɛ dɛ, hɔn a woennya hokwan ennsua Jehovah ho adze no so aba nkwa mu wɔ asaase yi do. (Andw. 24:15; John 5:28, 29) Aso iyi kyerɛ dɛ wobenyan hɔn a woewuwu nyina aba nkwa mu wɔ Mfrenhyia Apem Tumdzi no mu? Dabida. Hɔn a wonyaa hokwan a nkyɛ wobotum dze asom Jehovah naaso wɔhyɛɛ da ara buu hɔn enyi guu hokwan a ɔtse dɛm do no dze, worinnyan hɔn. Nna nkyɛ wobotum enya Paradise asetsena naaso wɔdze hɔn ndzeyɛɛ daa no edzi dɛ wɔmmpɛ.​—Matt. 25:46; 2 Thess. 1:9; Nyi. 17:8; 20:15.

18. Mfrenhyia 1,000 no mbra n’ewiei no, nna nyimpa a wɔwɔ asaase do nyina tsebea tse dɛn?

¹⁸ Mfrenhyia 1,000 no mbra n’ewiei no, nna nyimpa a wɔwɔ asaase do nyina ayɛ hɔn a wodzi mu. Dɛm aber no, nna obiara nnyi hɔ a bɔn a Adam dze woo hɛn no wɔ no ho. (Rom. 5:12) Obodu hɔ no, nna woeyi ɔhaw a Adam no bɔn dze bae no nyina efi hɔ koraa. Sɛ yɛbɛka a, hɔn a wɔwɔ asaase do no ‘benya nkwa,’ kyerɛ dɛ, wɔbɛyɛ nyimpa a wodzi mu wɔ mfe 1,000 no n’ewiei.​—Nyi. 20:5.

19. Ebɛnadze ntsi na nsɔhwɛ a otwa tun no ho hia?

¹⁹ Yenyim dɛ aber a Jesus wɔ asaase do no, Satan sɔɔ no hwɛe, naaso ɔkɔr do dzii Jehovah nokwar. Naaso, sɛ nyimpa ba emudzi mu na wɔma Satan kwan dɛ ɔnsɔ hɔn nhwɛ a, ana wɔbɔkɔ do edzi nokwar dɛ mbrɛ Jesus yɛe no? Sɛ mfe 1,000 no ba ewiei na woyi Satan fi bun no mu a, hɛn mu biara benya hokwan dze ne ndzeyɛɛ akyerɛ dɛ obedzi Jehovah nokwar anaa onnkedzi no nokwar. (Nyi. 20:7) Hɔn a wobedzi nokwar wɔ nsɔhwɛ a otwa tun no mu no benya onnyiewiei nkwa na ewiei koraa no wobenya fahodzi mapa. (Rom. 8:21) Naaso, hɔn a wɔbɛyɛ Jehovah do asoɔdzen no dze, wɔbɛsɛɛ hɔn aka Abɔnsam nye n’esunsum fi no nyina ho korakora.​—Nyi. 20:8-10.

20. Nyikyerɛ nwoma no mu nkɔnhyɛ ahorow a ɔyɛ enyika no ma etse nka dɛn?

²⁰ Yeesusu Nyikyerɛ nwoma no mu nsɛm bi ho kakra. Dze besi ha yi, etse nka dɛn wɔ ho? Sɛ edwen ho na ihu dɛ dɛm nkɔnhyɛ ahorow a ɔyɛ enyika yi fa woho a, ɔmma w’enyi nngye anaa? Aso iyi nnka wo dɛ boa afofor ma wɔmbɛka hɛnho ma yɛnsom Nyankopɔn nokwar mu? (Nyi. 22:17) Seseiara a yeesusu nsɛm a obesisi daakye ho yi, hɛn enyi agye paa na yɛpɛ dɛ yɛka asɛm a ɔsomafo John kae no bi. Ɔkaa dɛ: “Amen. Ewuradze Jesus, bra.”​—Nyi. 22:20.