1-2. Siantsir a ɔsɛ dɛ yɛma Nyikyerɛ nwoma no ho hia hɛn no, no mu kor nye dɛn?

 FA NO dɛ obi dze mfonyin ahorow bi ama wo dɛ hwɛ bi. Aber a erohwɛ mfonyin ahorow no, ihun nyimpa pii a nna innyim hɔn. Naaso, mfonyin kor bi dze, w’enyi bɔɔ do no ara na igyinae. Ebɛnadze ntsi a? Osiandɛ, ihun woho wɔ dɛm mfonyin no mu. Afei, nna epɛ dɛ ekaa ber a hom twaa mfonyin no, beebi a hom twaae, nye hɔn a wɔwɔ mfonyin no mu no nyina. Ebɛnadze ntsi na ebɛyɛ iyinom nyinara? Asɛm no ara nye dɛ, dɛm mfonyin no fa woho!

² Tse dɛ dɛm mfonyin no, Nyikyerɛ nwoma no so ho hia hɛn paa. Ebɛnadze ntsi na yɛreka dɛm? Annyɛ yie koraa no, yɛwɔ siantsir ebien. Odzi kan, wɔkyerɛɛw dɛm Bible mu nwoma yi maa hɛn. Nyiyimu a odzi kan no ka dɛ: “Jesus Christ ne nyikyerɛ a Nyankopɔn dze maa no dɛ ɔnkyerɛ no nkowaa dza otwar dɛ ɔbɛba ntsɛm.” (Nyi. 1:1) Ntsi, wɔannkyerɛw nsɛm a ɔwɔ nwoma no mu no amma nyimpa biara kɛkɛ, mbom wɔkyerɛwee maa hɛn a yɛyɛ Nyankopɔn n’asomfo no. Osiandɛ yɛyɛ Nyankopɔn n’asomfo ntsi, sɛ yehu dɛ yɛroboa ma nkɔnhyɛ ahorow a ɔwɔ nwoma a no mu nsɛm yɛ enyigye yi mu no aaba mu a, ɔnnsɛ dɛ ɔyɛ hɛn nwanwa koraa. Tse dɛ mfonyin a yɛkaa ho asɛm no, yehu hɛnho wɔ mu.

3-4. Dɛ mbrɛ Nyikyerɛ nwoma no ma yehu no, ebɛn aber na nkɔnhyɛ ahorow a ɔwɔ mu no bɛba mu? Na ɔsɛ dɛ iyi ma yɛyɛ dɛn?

³ Siantsir a otsia ebien no nye ber a nsɛm a ɔwɔ Nyikyerɛ nwoma no mu no bɛba mu. Ɔsomafo John kaa dɛ Ewuradze ne da no mu na dɛm nsɛm no baa mu. (Nyi. 1:10) Naaso, aber a John kyerɛɛw dɛm nsɛm yi wɔ afe 96 H.B. no, nna “Ewuradze  ne da no” nnyii ne tsir koraa. (Matt. 25:14, 19; Luke 19:12) Bible nkɔnhyɛ ma yehu dɛ, aber a wosii Jesus Hen wɔ sor wɔ 1914 mu no na Ewuradze ne da no hyɛɛ ase. Ofi dɛm aber no, nkɔnhyɛ a ɔfa Nyankopɔn no nkorɔfo ho wɔ Nyikyerɛ nwoma no mu no hyɛɛ ase dɛ ɔreba mu. Ntsi, yɛwɔ “Ewuradze ne da no” mu ndɛ!

⁴ Osiandɛ yɛtse mber a ɔtse dɛm mu ntsi, no ho hia paa dɛ yɛyɛ aso tsie dɛm afotusɛm a ofi ɔdɔ mu a Nyikyerɛ 1:3 dze ma hɛn no. Hɔ ka dɛ: “Nhyira nye onyii no a ɔkenkan, nye hɔn a wotsie nkɔnhyɛsɛm no, na wɔdze dza wɔakyerɛw no wɔ mu no sie: na ber no abɛn.” Nokwasɛm nye dɛ no ho hia paa dɛ ‘yɛkenkan’ nkɔnhyɛsɛm no, ‘yetsie’ na yedzi do. Nsɛm a ɔsɛ dɛ yedzi do no, no mu bi nye dɛn?

5. Ebɛn kwan do na Nyikyerɛ nwoma no ma yehu siantsir a ɔsɛ dɛ yɛsom Jehovah wɔ kwan a ɔfata do?

⁵ Tsir a odzi kan wɔ Nyikyerɛ nwoma no mu no ma yehu dɛ, dza ɔkɔ do wɔ asafo no mu nyinara Jesus n’enyi tua. (Nyi. 1:12-16, 20; 2:1) Nkrasɛm a Jesus maa wɔdze kɛmaa asafo ahorow esuon a nna wɔwɔ Asia Kuma no na ɔma yehu dɛ n’enyi tua dza ɔkɔ do no ampa. Dɛm nkrasɛm no mu no, ɔdze akwankyerɛ ahorow pɔtsee bi maa tsetse Christianfo no mbrɛ ɔbɛyɛ a ɔbɔboa hɔn ma wɔaayɛ ndzɛmba a ɔbɛma Jehovah agye hɔn som ato mu. Nsɛm a Jesus kaa kyerɛɛ asafo ahorow no fa Nyankopɔn n’asomfo a wɔwɔ hɔ ndɛ no so ho. Ebɛnadze na yebotum esua efi mu? Ɔno nye dɛ, hɛn Kandzifo Christ Jesus nyim mbrɛ yɛnye Jehovah ntamu ebusuabɔ no tse no ho asɛm paa. Jesus na ɔhwɛ hɛn do, ntsi yɛrokɔ ba nyina, n’enyi tua hɛn. Onyim ndzɛmba a ɔsɛ dɛ yɛyɛ ama Jehovah agye hɛn som ato mu. Ɔnodze, ebɛn akwankyerɛ na Jesus dze ama a otwar dɛ yɛdze yɛ edwuma ndɛ?

6. Dɛ mbrɛ asɛm a Jesus kae wɔ Nyikyerɛ 2:3, 4 ma yehu no, nna Ephesus asafo no hɔn haw ankasa nye dɛn? (b) Ebɛnadze na yesua fi asɛm yi mu?

⁶ Kenkan Nyikyerɛ 2:3, 4. Ɔnnsɛ dɛ yɛma ɔdɔ a yɛwɔ ma Jehovah no tsew kɔ. Asɛm a Jesus kaa kyerɛɛ Ephesus asafo no ma yehu dɛ, wohyiaa nsɛndzendzen pii, naaso ne nyina mu no, wɔammpa abaw. Mbom wɔkɔr do soom Jehovah na wogyinaa pintsinn. Naaso, awerɛhosɛm nye dɛ, wɔmaa ɔdɔ a nna wɔwɔ ma Jehovah no yewee. Nna no ho hia paa dɛ wɔkɔhwehwɛ dɛm ɔdɔ no n’ekyir kwan, annyɛ dɛm a, nna Jehovah renngye hɔn som nnto mu. Ndɛ so, ɔsɛ dɛ yɛkɔ do ara gyina ɔhaw ano pintsinn. Naaso adwen a yɛdze gyina ɔhaw ano no na ohia Jehovah. Hɛn Nyankopɔn no dze, nnyɛ ndzɛmba a yɛyɛ no nko na ohia no, na mbom siantsir a yɛyɛ dɛm ndzɛmba no so ho hia no. Adwen a yɛdze som no no ho hia no paa, osiandɛ ɔpɛ dɛ yegyina ɔdɔ kɛse a yɛwɔ ma no nye enyisɔ a yɛwɔ ma no no do som no.​—Mbɛ. 16:2; Mark 12:29, 30.

7. (a) Dɛ mbrɛ Nyikyerɛ 3:1-3 ma yehu no, nna ebɛn ɔhaw na ɔwɔ Sardis asafo no mu? (b) Ebɛnadze na yesua fi hɔn asɛm no mu?

⁷ Kenkan Nyikyerɛ 3:1-3. Ɔsɛ dɛ yɛkɔ do ara ma hɛn enyi da hɔ. Nna Sardis asafo no mufo hɔn haw nntse dɛ Ephesusfo dze no. Nkan no, nna wɔdze nsi nye ahokeka som Nyankopɔn paa, naaso ekyir yi, ne nyina tɔɔ nsu mu. Dɛm ntsi Jesus kaa kyerɛɛ hɔn dɛ ‘wɔnweɔn.’ Ebɛnadze na yebotum esua efi dza ɔtoo hɔn no mu? Jehovah dze, no werɛ rimmfir mbɔdzen a yɛabɔ wɔ no som mu no da. (Heb. 6:10) Naaso, ɔnnsɛ dɛ yenya adwen dɛ yɛayɛ pii wɔ Jehovah no som mu mber bi a abɛsen kɔ, ntsi seseiara dze, yɛregye hɛn ahom. Ɔwɔ mu, bi a yenntum nnyɛ pii wɔ Jehovah no som mu tse dɛ nkan no dze, naaso ɔsɛ dɛ yɛbɔ mbɔdzen yɛ dza yebotum biara wɔ “Ewuradze edwuma mu,” na yɛma hɛn enyi da  hɔ kesi ewiei.​—1 Cor. 15:58; Matt. 24:13; Mark 13:33.

8. Sɛ yɛhwɛ asɛm a Jesus kaa kyerɛɛ Laodicea asafo no wɔ Nyikyerɛ 3:15-17 no a, ebɛnadze na yebotum esua efi mu?

⁸ Kenkan Nyikyerɛ 3:15-17. Ɔsɛ dɛ yɛyer hɛnho wɔ Nyankopɔn no som mu na yefi hɛn akoma nyinara mu som no. Asɛm a Jesus kaa kyerɛɛ Laodicea asafo no ma yehu ɔhaw fofor bi a nna hɔn so wɔwɔ. Ɔkaa dɛ wɔyɛ “abɔtrɔbɔdwe.” Dɛm asɛm no kyerɛ dɛ, nna wɔnnyɛ nwin, na hɔn so a wɔnnyɛ hyew wɔ hɔn som mu. Osian iyi ntsi, Jesus kaa kyerɛɛ hɔn dɛ hɔn asɛm yɛ mbɔbɔr san so yɛ awerɛhow. Nna ɔsɛ dɛ wɔdze nsi a no mu yɛ dzen som Jehovah. (Nyi. 3:19) Ebɛnadze na yesua fi mu? Sɛ yehu dɛ nsi a yɛdze rosom Nyankopɔn no rokɔ famu a, ɔsɛ dɛ yɛkeka hɛnho, na yɛma ndzɛmba pa a Jehovah na n’ahyehyɛdze no dze ma hɛn nyina ho hia hɛn. (Nyi. 3:18) Ɔnnsɛ dɛ yedzi asetsena mu ndzɛmba ekyir na yepia ɔsom a yɛdze ma Jehovah no to nkyɛn beebi.

9. Dɛ mbrɛ afotu a Jesus dze maa asafo a nna ɔwɔ Pergamum na Thyatira ma yehu no, ebɛnadze na ɔsɛ dɛ yɛhwɛ yie wɔ ho?

⁹ Ɔnnsɛ dɛ yetsie awaafo hɔn nkyerɛkyerɛ. Nna binom dze mpaapaamu reba Pergamum asafo no mu, ntsi Jesus twuuw hɔn enyim. (Nyi. 2:14-16) Hɔn a nna wɔwɔ Thyatira asafo no mu so, nna binom atwe hɔnho efi Satan ne ndzɛmba a no mu dɔ no ho, ntsi Jesus kamfoo hɔn na otuu hɔn fo dɛ ‘wonsuo’ nokwar no ‘mu dzen.’ (Nyi. 2:24-26) Nna Christianfo binom a wɔayɛ mberɛw wɔ asafo ahorow yi mu no ama kwan ma wɔdze ator nkyerɛkyerɛ adaadaa hɔn, ntsi nna ɔsɛ dɛ dɛm Christianfo yi yɛ nsesa. Ndɛ so ɛ, ebɛnadze na ɔwɔ dɛ yɛyɛ? Ɔnnsɛ dɛ yetsie nkyerɛkyerɛ biara a ɔnye Jehovah no nsusui nnhyia no. Awaafo yɛ hɔn adze dɛ “hɔn a wɔwɔ nyamesompa” naaso “wɔpow n’ahoɔdzen no.” (2 Tim. 3:5) Sɛ yesua Nyankopɔn n’Asɛm no yie a, yebohu awaafo hɔn nkyerɛkyerɛ na yaatwe hɛnho efi ho ntsɛmara.​—2 Tim. 3:14-17; Jude 3, 4.

10. Asɛm a Jesus kaa kyerɛɛ hɔn a nna wɔwɔ Pergamum na Thyatira asafo no mu no, ebɛnadze bio na yebotum esua efi mu?

¹⁰ Ɔsɛ dɛ yɛtwe hɛnho fi ɔbrakyew biara ho na ɔnnsɛ dɛ yɛsosɔw do. Nna ɔhaw fofor bi so wɔ Pergamum na Thyatira asafo no mu. Hɔn a nna wɔsosɔw ndwamanyɛ do no, Jesus ammfa hɔnho annkyɛ hɔn koraa, ɔkasaa hɔn. (Nyi. 2:14, 20) Ebɛnadze na yebotum esua efi mu? Ɔno nye dɛ, sɛ yɛdze mfe pii asom Jehovah anaadɛ  yɛwɔ ɔsom hokwan ahorow pii na yɛdze hɛnho hyɛ ɔbrakyew mu a, ɔnnsɛ dɛ yenya adwen dɛ Jehovah bobu n’enyi egu do. (1 Sam. 15:22; 1 Pet. 2:16) Sɛ hɔn a wɔnnsom Jehovah no hɔn bra sɛɛ dɛn ara mpo a, n’asomfo dze ɔhwɛ kwan dɛ yɛbɛma hɛn abrabɔ ho atsew.​—Eph. 6:11-13.

11. Dze besi ha yi, ebɛnadze ne yeesua? (Hwɛ adakaba a wɔato dzin “ Dza Yesua Fi Mu Ndɛ” no so.)

¹¹ Dze besi ha yi, ebɛnadze na yeesua? Yeehu siantsir a ɔwɔ dɛ yɛma hɛn som sɔ Jehovah n’enyi. Sɛ yɛreyɛ biribi a Jehovah kyir a, ɔsɛ dɛ yɛyɛ nsakyer ntsɛmara mbrɛ ɔbɛyɛ a Jehovah bɛgye hɛn som ato mu. (Nyi. 2:5, 16; 3:3, 16) Jesus kaa biribi fofor bi so ho asɛm wɔ nkrasɛm a ɔdze maa asafo ahorow no mu. Ɔyɛ ebɛnadze?

12. Ebɛn asɛm na Jesus kaa kyerɛɛ Christianfo a nna wɔwɔ Smyrna na Philadelphia asafo no mu no, na ebɛnadze ntsi na dɛm asɛm no ho hia hɛn ndɛ? (Nyikyerɛ 2:10)

¹² Afei, hom mma yensusu nkrasɛm a Jesus dze maa asafo a nna ɔwɔ Smyrna na Philadelphia no ho. Ɔkaa kyerɛɛ Christianfo a nna wɔwɔ asafo ebien yi mu no dɛ ɔnnsɛ dɛ wosuro ɔsoɛrtsia, osiandɛ sɛ wɔdze nokwardzi gyina mu a, Jehovah botua hɔn kaw. (Kenkan Nyikyerɛ 2:10; 3:10) Ebɛnadze na yesua fi asɛm yi mu? Ɔsɛ dɛ yɛtse ase dɛ, ɔnyɛ dɛn ara a yebehyia ɔsoɛrtsia, na sɛ ɔba no dɛm a, ɔsɛ dɛ yɛyɛ krado dɛ yebegyina ano. (Matt. 24:9, 13; 2 Cor. 12:10) Ebɛnadze ntsi na dɛm nkaakaasɛm yi ho hia?

13-14. Ebɛnadze na dza wɔaka ho asɛm wɔ Nyikyerɛ tsir 12 no akɛfa abrɛ Nyankopɔn no nkorɔfo?

¹³ Nyikyerɛ nwoma no ma yehu dɛ wɔbɔsoɛr etsia Nyankopɔn no nkorɔfo wɔ “Ewuradze ne nda no mu,” na dɛm ber no ara so na yɛwɔ mu yi. Nyikyerɛ tsir 12 no ma yehu dɛ, aber a Nyankopɔn n’Ahendzi no hyɛɛ ase dɛ oridzi tum wɔ sor no ara pɛ na ɔko sii wɔ sor. Jesus Christ, anaa Michael nye n’abɔfoe nye Satan na n’abɔfo bɔn no koe. (Nyi. 12:7, 8) Dza ofii ɔko yi mu bae nye dɛ, Nyankopɔn n’atamfo yi dzii ɔkogu pɔtɔɔ ma wɔtoow hɔn guu asaase do, na hɔn na wɔhyɛ ɔhaw na atseetsee a ɔrokɔ do wɔ asaase do no ekyir. (Nyi. 12:9, 12) Ebɛnadze na dza ɔkɔr do yi akɛfa abrɛ Nyankopɔn no nkorɔfo?

¹⁴ Nyikyerɛ nwoma no ma yehu adze fofor a Satan yɛe. Osiandɛ onnyi hokwan a obotum asan dze akɔ sor bio ntsi, ɔadan n’ebufuw aba hɔn a wɔnye Jesus bedzi adze wɔ sor no hɔn nkaafo a wɔwɔ asaase do no do. Dɛm nkorɔfo yi na wɔyɛ Nyankopɔn n’Ahendzi no n’ananmusifo na hɔn edwuma nye dɛ ‘wokura Jesus ho dasedzi mu.’ (Nyi. 12:17; 2 Cor. 5:20; Eph. 6:19, 20) Ebɛn kwan do na dɛm nkɔnhyɛ yi aba mu?

15. ‘Adasefo beenu’ a wɔaka hɔnho asɛm wɔ Nyikyerɛ tsir 11 no gyina hɔ ma woananom, na ebɛn asɛm na ɔtoo hɔn?

 ¹⁵ Satan maa Nyankopɔn n’atamfo towee hyɛɛ enuanom a wɔasera hɔn a nna wodzi asɛnka edwuma no enyim no do. Enuanom a wɔtowee hyɛɛ hɔn do no, hɔn a nna wodzi akotsen wɔ mu paa no na Nyikyerɛ nwoma no ka hɔnho asɛm dɛ wɔyɛ ‘adasefo beenu’ a wokunkum hɔn no. * (Nyi. 11:3, 7-11) Afe 1918 mu no, wotwaa asɛm too enuanom a nna wodzi ndzɛmba enyim wɔ ahyehyɛdze no mu no hɔn mu baawɔtwe do, na wɔkaa dɛ wɔnye hɔn nkɔto efiadze mfe pii. Nyimpa enyi do no, nna ɔtse dɛ mbrɛ edwuma a ɔhyɛ enuanom a wɔasera hɔn yi nsa no aba n’ewiei.

16. Ebɛn anwanwasɛm na osii wɔ 1919, na ofi dɛm aber no reba no, ebɛnadze na Satan akɔ do ara ayɛ?

¹⁶ Nkɔnhyɛ a ɔwɔ Nyikyerɛ tsir 11 no sanee kaa dɛ, ber tsiabaa bi ekyir no, ‘adasefo beenu’ no bɛsan aba nkwa mu bio. Ebɛn aber na asɛm yi baa mu? Wɔdze enuanom no koguu efiadze no, anwanwasɛm nye dɛ woennya afe kor mpo na dɛm nkɔnhyɛ yi baa mu. March 1919 mu no, woyii enuanom mbarimba a wɔasera hɔn yi fii efiadze, na wotwaa kweedu a wɔdze bɔɔ hɔn no mu. Woyii hɔn fii efiadze no, annkyɛr koraa na wɔhyɛɛ asɛnka edwuma no ase bio. Naaso Satan kɔr do ara taan Nyankopɔn no nkorɔfo enyi. Ofi dɛm ber no reba no, Satan dze ɔsoɛrtsia a ɔtse dɛ “esutsen” aba Nyankopɔn n’asomfo nyina do. (Nyi. 12:15) Ntsi sɛ Bible tu hɛn fo dɛ ɔsɛ dɛ hɛn mu biara da “abotar nye gyedzi edzi” a, nna ɔyɛ no kwan do.​—Nyi. 13:10.

17. Ɔmmfa ho dɛ Satan retan Nyankopɔn no nkorɔfo enyi no, woenya mboa bi a wɔnnhwɛ kwan. Ɔyɛ ebɛn mboa a?

¹⁷ Nyikyerɛ tsir 12 no ka dɛ beebi a enyidado biara nnyi no, hɔ na Nyankopɔn no nkorɔfo benya mboa bi efi. Nyikyerɛ nwoma no kyerɛkyerɛ mu dɛ ɔbɛyɛ tse dɛ gyama “asaase” no ebue n’anomu na wɔamen ɔsoɛrtsia a ɔtse dɛ “esutsen no.” (Nyi. 12:16) Dɛm pɛpɛɛpɛ na ɔrokɔ do. Ɔtɔ da a, Satan no wiadze yi mu nhyehyɛɛ ahorow bi tse dɛ kɔɔt ahorow a wɔwɔ ntseasee no twitwa gye Nyankopɔn no nkorɔfo. Jehovah n’asomfo edzi konyim wɔ kɔɔt mpɛn pii na iyi ama woenya fahodzi kakra. Ebɛn kwan do na wɔdze dɛm fahodzi no ridzi dwuma? Wɔyer hɔnho dze hokwan biara a wobenya no yɛ edwuma a Jehovah dze  ahyɛ hɔn nsa no. (1 Cor. 16:9) Edwuma a ɔhyɛ hɔn nsa no bi nye dɛn?

18. Ebɛn edwuma tsitsir na yɛreyɛ wɔ ewiei mber yi mu?

¹⁸ Jesus kae too hɔ dɛ n’ekyirdzifo bɛka “[Nyankopɔn] Ahenman ho asɛmpa” no wɔ wiadze nyina ansaana ewiei no aba. (Matt. 24:14) Sɛ wɔreka asɛmpa yi a, ɔbɔfo bi anaa abɔfo kuw bi a Bible no se wokura “onnyiewiei asɛmpa bi rekɛka akyerɛ hɔn a wɔtsetse asaase do, aman nye mbusuakuw nye kasa nye nkorɔfo” no boa hɔn.​—Nyi. 14:6.

19. Sɛ yɛdze Ahendzi no ho asɛmpa a Jehovah n’asomfo ka ho asɛm no to nkyɛn a, ebɛn asɛm bio na ɔsɛ dɛ wɔka?

¹⁹ Ɔnnyɛ Ahendzi no ho asɛmpa no nkotsee na ɔsɛ dɛ Nyankopɔn n’asomfo ka. Mbom no, edwuma a abɔfo a wɔkaa hɔnho asɛm wɔ Nyikyerɛ tsir 8 kesi 10 reyɛ no so, ɔsɛ dɛ wɔboa. Dɛm abɔfo yi bɔ ɔhaw akɛse bi a ɔbɛba hɔn a wɔmmpɛ Nyankopɔn n’Ahendzi no do ho dawur. Iyi ntsi, Jehovah Adasefo reka atsɛmbusɛm bi, na Bible no dze nsɛm a wɔreka no toto “ɔsorbo nye gya” ho. Iyi ma nkorɔfo hu dza Nyankopɔn dze reba Satan no wiadze bɔn yi do. (Nyi. 8:7, 13) Ɔsɛ dɛ nkorɔfo hu dɛ ewiei no abɛn. Sɛ wohu iyi a ɔbɔboa hɔn ma wɔaayɛ nsesa akɛse wɔ hɔn asetsena mu, ama woeenya nkwa wɔ Jehovah n’ebufuw da no mu. (Zeph. 2:2, 3) Naaso, nnyɛ dɛm asɛm yi na nyimpa pii repɛ etsie. Ntsi, yehia akokodur paa ana yeetum aka. Naaso, wongyina yie, osiandɛ wɔ ahohiahia kɛse no mu no, atsɛmbusɛm a otwa tun a yɛbɛka no n’enyi soso koraa kyɛn dza ndɛ yɛreka yi.​—Nyi. 16:21.

20. Ebɛnadze na yebosusu ho wɔ adzesua ebien a odzi hɔ no mu?

²⁰ No ho hia paa dɛ yedzi “nkɔnhyɛnsɛm” a ɔwɔ Nyikyerɛ nwoma no mu no do, osiandɛ hɛn so yɛroboa ma nsɛm a ɔwɔ mu no aaba mu. (Nyi. 1:3) Naaso, sɛ wɔtan hɛn enyi a, yebesi dɛn dze nokwardzi egyina ano na yaakɔ do ara dze akokodur aka nsɛm yi? Dɛm ndzɛmba ebien yi a Nyikyerɛ nwoma no ka ho asɛm no botum ahyɛ hɛn dzen: Odzi kan, dza ɔbɔto Nyankopɔn n’atamfo. Otsia ebien, nhyira a yebenya daakye aber a yɛkɔ do dzi nokwar no. Yebosusu dɛm nsɛm yi ho wɔ adzesua ebien a odzi hɔ no mu.