1. Ebɛnadze na Jehovah aka akyerɛ n’asomfo dɛ wɔnyɛ? (Hwɛ mfonyin no so.)

 SƐ YƐPƐ awerɛkyekyer na akwankyerɛ a, woana na yebotum akɔ ne nkyɛn? Yenyim dɛ Jehovah Nyankopɔn na yebotum akɔ ne nkyɛn. Jehovah nankasa aka akyerɛ hɛn dɛ yɛmbɔ no mpaa. Bible no ka dɛ, ‘mma yenngyaa mpaabɔ da,’ ntsi yenyim dɛ ɔpɛ dɛ yɛbɔ no mpaa aber nyina. (1 Thess. 5:17) Dɛm ntsi, yebotum abɔ Jehovah mpaa dze ahwehwɛ no hɔ akwankyerɛ wɔ biribiara a yɛbɛyɛ wɔ hɛn asetsena mu no ho a hwee rinnsiw hɛn kwan. (Mbɛ. 3:5, 6) Jehovah ne yamu ye na ɔwɔ hɛnho adagyer paa, ɔno ntsi ɔama hɛn kwan dɛ yebotum abɔ no mpaa mpɛn dodow biara a yɛpɛ.

2. Ebɛnadze na yebosusu ho wɔ adzesua yi mu?

² Hɛn enyi sɔ hokwan a Jehovah dze ama hɛn dɛ yɛmbɔ no mpaa no paa. Naaso, osian ndzɛmba pii a ogu hɛn do ntsi, obotum ayɛ dzen ama hɛn dɛ yebenya ber dze abɔ mpaa. Ɔnnyɛ ɔno nko, bi so a yɛbɛtse nka dɛ ɔsɛ dɛ yɛma hɛn mpaabɔ tu mpon. Naaso enyigyesɛm nye dɛ, yebotum enya nkuranhyɛ na akwankyerɛ pii efi Bible no mu. Adzesua yi mu no, yɛbɔhwɛ nhwɛdo bi a Jesus yɛe, na ɔno bɔboa hɛn ma yeehu mbrɛ yebesi agye ber abɔ mpaa. Afei so, yɛbɔhwɛ ndzɛmba enum bi a no ho hia a yebotum aka ho asɛm wɔ hɛn mpaabɔ mu, nye mbrɛ ɔbɔboa ma hɛn mpaabɔ etu mpon.

3. Nna ebɛnadze na Jesus nyim fa mpaabɔ ho?

³ Nna Jesus nyim dɛ mpaabɔ ho hia Jehovah paa. Jesus nye n’Egya tsenaa mfe pii ansaana ɔreba asaase yi do. Dɛm aber no, ohun mbrɛ n’Egya sii buaa mbarimba na mbaa anokwafo bi hɔn mpaabɔ. Dɛ nhwɛdo no, aber a Jehovah buaa mpaa a  Hannah, David, Elijah nye nyimpa anokwafo binom fii hɔn akoma mu bɔe no, nna Jesus nye no wɔ hɔ. (1 Sam. 1:10, 11, 20; 1 Ahe. 19:4-6; Ndw. 32:5) Dɛm ntsi, ɔnnyɛ nwanwa dɛ, Jesus kaa kyerɛɛ n’esuafo no dɛ wɔmfa ahotodo mbɔ Jehovah mpaa aber nyina!​—Matt. 7:7-11.

4. Ebɛnadze na yesua fi mpaa a Jesus bɔe no mu?

⁴ Jesus nankasa so bɔɔ Jehovah mpaa, na dza ɔyɛe no maa n’esuafo no hun dɛ ɔsɛ dɛ hɔn so wɔyɛ dɛmara. Aber a Jesus reyɛ no som edwuma no nyina, nna ɔtaa bɔ Jehovah mpaa. Naaso mpɛn pii no, nna onnyi adagyer, na ɔyɛ so a nna nyimpa pii dzi n’ekyir. Ne dɛm ntsi nna ɔsɛ dɛ ɔpɛ ber anaa ɔgye mber na ɔdze bɔ mpaa. (Mark 6:31, 45, 46) Nna ɔsoɛr anapatutuutu mbrɛ ɔbɛyɛ a nankotsee bɔkɔ akɛhyɛ beebi na ɔabɔ mpaa. (Mark 1:35) Annyɛ yie koraa no, da kor bi so, ansaana Jesus ribesi gyinae kɛse bi no, ɔbɔɔ mpaa anafua mu no nyina. (Luke 6:12, 13) Afei so, anafua a adze rebɛkye ma Jesus ewu no, ɔbɔɔ mpaa mpɛn dodow bi. Dɛm mpaabɔ no mu no, ɔdze n’adwen sii mbrɛ obesi ewie edwuma a ɔbɛyɛe wɔ asaase do no ne fa a ɔyɛ dzen paa no do.​—Matt. 26:39, 42, 44.

5. Ebɛnadze na yebotum ayɛ dze esuasua Jesus?

⁵ Dza Jesus yɛe no ma yehu dɛ, sɛ yennyi adagyer koraa mpo a, ɔsɛ dɛ yɛgye ber bɔ Jehovah mpaa. Dɛ mbrɛ Jesus yɛe no, noho behia dɛ yenya ber na yɛbɔ mpaa. Yebotum asoɛr anapatutuutu abɔ mpaa, anaadɛ yebotum abɔ no ewimbir ansaana yɛakɛda. Sɛ yɛyɛ dɛm a, yɛma Jehovah hu dɛ hɛn enyi sɔ hokwan kɛse a ɔdze ama hɛn dɛ yɛmbɔ no mpaa no. Akyerɛbaa bi a wɔfrɛ no Lynne kaa dɛ, da a ohun dɛ Jehovah ama hɛn hokwan dɛ yɛmbɔ no mpaa no, n’enyi gyee paa. Ɔkaa dɛ: “Aber a muhun dɛ mubotum abɔ Jehovah mpaa aber biara no, ɔboaa me ma muhun dɛ ɔyɛ me Nyɛnko a ɔbɛn me paa. Dɛm ntsi nna mepɛ dɛ mutu mpon wɔ me mpaabɔ mu.” Hɛn mu pii nye hɛn akyerɛbaa yi yɛ adwen paa. Dze besi ha yi, hom mma yɛnhwɛ ndzɛmba enum bi a no ho hia a yebotum aka ho asɛm wɔ hɛn mpaabɔ mu.

6. Dɛ mbrɛ Nyikyerɛ 4:10, 11 ma yehu no, Jehovah fata dɛ ɔgye ebɛnadze?

⁶ Yi Jehovah ayɛw. Ɔsomafo John nyaa enyido-adzehu bi, na ohun mpanyimfo 24  dɛ wɔrosom Jehovah wɔ sor. Nna woriyi Nyankopɔn ayɛw na wɔreka dɛ ɔfata dɛ ɔgye “enyimnyam nye enyidzi nye tum.” (Kenkan Nyikyerɛ 4:10, 11.) Bible no ma yehu dɛ abɔfo anokwafo no so wɔ ndzɛmba pii a wobotum egyina do eyi Jehovah ayɛw na wɔahyɛ no enyimnyam. Wɔnye Jehovah wɔ sor na wonyim no yie. Ndzɛmba a Jehovah yɛ no ma abɔfo no hu no su ahorow. Na sɛ wɔhwɛ Jehovah no ndwuma a, okenyan hɔn ma woyi no ayɛw.​—Job 38:4-7.

7. Ebɛn ndzɛmba na yebotum eyi Jehovah ayɛw wɔ ho?

⁷ Hɛn so, sɛ yɛrobɔ mpaa a, ɔsɛ dɛ yeyi Jehovah ayɛw. Siantsir a yɛdɔ Jehovah, nye enyisɔ a yɛwɔ wɔ ndzɛmba a ɔyɛ ma hɛn no ho no, yebotum aka ho asɛm aber a yɛrobɔ mpaa no. Sɛ irusua Bible no a, ɔyɛ a hwehwɛ Jehovah no su ahorow bi a w’enyiwa gye ho paa no. (Job 37:23; Rom. 11:33) Afei, ka mbrɛ dɛm su ahorow no ma etse nka no ho asɛm kyerɛ no. Ɔno da nkyɛn a, mbrɛ Jehovah boa hɛn nye hɛn nuanom Christianfo a wɔwɔ wiadze nyina no so, yebotum eyi no ayɛw wɔ ho. Jehovah ma hɛn dza yehia na ɔbɔ hɛnho ban aber nyina.​—1 Sam. 1:27; 2:1, 2.

8. Ndzɛmba a yebotum ada Jehovah ase wɔ ho no, bi nye dɛn? (1 Thessalonicafo 5:18)

⁸ Da Jehovah ase. Yɛwɔ ndzɛmba pii a yebotum ada Jehovah ase wɔ ho aber a yɛrobɔ mpaa no. (Kenkan 1 Thessalonicafo 5:18.) Adze papa biara a yɛwɔ no, yebotum ada Jehovah ase wɔ ho. Adze yi, ne nkyɛn na akyɛdze pa nyina fi ba. (Jas. 1:17) Dɛ nhwɛdo no, asaase a ɔyɛ fɛw a Jehovah dze ama hɛn kwa nye ndzɛmba ahorow a ɔyɛ nwanwa a ɔabɔ no, yebotum ada no ase wɔ ho. Afei so, yebotum ada Jehovah ase dɛ yɛtse nkwa mu. Ɔnnyɛ ɔno nko, yebotum so ada no ase dɛ ɔama hɛn ebusua, anyɛnkofo nye enyidado papabi. Bio so, yɛpɛ dɛ yɛda Jehovah ase dɛ ɔama yɛnye no enya anyɛnkofa a no mu yɛ dzen.

9. Ebɛnadze ntsi na ɔsɛ dɛ yɛkyerɛ ndzɛmba a Jehovah yɛ ma hɛn no ho enyisɔ?

⁹ Ndzɛmba ahorow a Jehovah ayɛ ama hɛn no, sɛ yebotum akaa na yaada no ase wɔ ho a, ɔbɛgye mbɔdzembɔ. Siantsir nye dɛ, ndɛ nyimpa pii nnkyerɛ ndzɛmba ho enyisɔ. Mpɛn pii no, nkorɔfo dze hɔn adwen si dza wobenya do. Naaso dza wɔbɛyɛ dze akyerɛ dza woenya no ho enyisɔ dze, wɔnndwen ho koraa. Sɛ yesuasua suban a ɔtse dɛm a, ɔbɛma hɛn so aber biara a yɛbɔbɔ mpaa no, dza yehia nkotsee na yɛbɛka ho asɛm akyerɛ Jehovah. Mbrɛ ɔbɛyɛ a yerunnsuasua su a ɔtse dɛm no, ɔsɛ dɛ yɛkɔ do kyerɛ biribiara a Jehovah yɛ ma hɛn no ho enyisɔ.​—Luke 6:45.

10. Ebɛn kwan do na enyisɔ a akyerɛbaa bi kyerɛe no boaa no ma otumii gyinaa ɔhaw a ohyiae no ano? (Hwɛ mfonyin no so.)

¹⁰ Sɛ yɛkyerɛ dza yɛwɔ no ho enyisɔ a, obotum aboa hɛn ma yeegyina ɔhaw ahorow a yehyia no ano. Ma yensusu akyerɛbaa bi a wɔfrɛ no Kyung-sook ho nhwɛ. b Ɔbɛdaa edzi dɛ oenya cancer bi a ɔyɛ hu wɔ no horɔhorɔ (lung) mu. Dza ɔkae nye dɛ: “Asɛm no bubuu  me paa. Ɔyɛɛ me dɛ mahwer biribiara, na mobɔɔ hu.” Ebɛnadze na ɔboaa akyerɛbaa yi ma otumii gyinaa ɔhaw a ohyiae no ano? Ɔkaa dɛ, anafua biara ansaana ɔbɛda no, nna ɔkɛtsena ne dan no sor na ɔbɔ mpaa dzendzenndzen. Nna ɔhwɛ ndzɛmba enum a Jehovah ayɛ ama no wɔ da no mu, na ɔda no ase wɔ ho. Dɛm a ɔyɛe no boaa no ma n’akoma tɔɔ ne yamu, na ɔmaa ɔdɔ a ɔwɔ ma Jehovah no so yɛɛ kɛse. Akyerɛbaa no hun mbrɛ Jehovah si boa n’asomfo anokwafo a wohyia ɔhaw a no mu yɛ dzen no. Afei so, ohun dɛ ndzɛmba a Jehovah dze ama hɛn no dɔɔ so kyɛn ɔhaw a yehyia no. Dɛ mbrɛ Kyung-sook yɛe no, hɛn so sɛ yerihyia ɔhaw bi mpo a, yɛwɔ ndzɛmba pii a yebotum ada Jehovah ase wɔ ho. Sɛ yɛrobɔ mpaa na yɛda Jehovah ase a, obotum aboa hɛn ma yeegyina ɔhaw a yehyia no ano na yaakɔ do dze enyigye asom no.

11. Aber a Jesus sanee kɔr sor no, nna ebɛnadze ntsi na n’esuafo no hia akokodur na wɔdze ayɛ asɛnka edwuma no?

¹¹ Serɛ Jehovah ma ɔmma wo akokodur a edze bɛyɛ asɛnka edwuma no. Jesus kaa kyerɛɛ n’esuafo no dɛ wobedzi noho dase ‘wɔ Jerusalem, nye Judea nyina, nye Samaria, dze ekodu asaase ano noho.’ Na ber a nna wɔaka kakra ma ɔaasan akɔ sor no, ɔsanee sii do dua kyerɛɛ hɔn. (Andw. 1:8; Luke 24:46-48) Naaso aber a Jesus kɔr sor no, wɔannkyɛr koraa na Jewfo mpanyimfo no kyeer ɔsomafo Peter nye ɔsomafo John dze hɔn kɔr Sanhedrin bagua no enyim. Wɔhyɛɛ hɔn dɛ wongyaa asɛnka edwuma no, na wohunahunaa hɔn mpo. (Andw. 4:18, 21) Ɔbaa no dɛm no, Peter na John yɛɛ hɔn adze dɛn?

12. Dɛ mbrɛ Asomafo Ndwuma 4:29, 31 ma yehu no, ebɛnadze na esuafo no yɛe?

¹² Aber a Jewfo nyamesom mpanyimfo no hunahunaa Peter na John no, wɔkaa kyerɛɛ hɔn dɛ: “Sɛ ɔtsen wɔ Nyankopɔn enyim dɛ yetsie hom kyɛn Nyankopɔn a, hom mbua atsɛn: na hɛndze, yerunntum gyedɛ yɛka dza yeehu na yɛatse” no. (Andw. 4:19, 20) Aber a wogyaa Peter na John no, esuafo no bɔɔ Jehovah mpaa dzendzenndzen dɛ ɔmboa hɔn ma wontum nyɛ dza ɔpɛ. Wɔbɔɔ mpaa dɛ: “Ma wo nkowaa mfa ndam nyina nka w’asɛm.” Jehovah so buaa mpaa a wofii hɔn akoma mu bɔe no.​—Kenkan Asomafo Ndwuma 4:29, 31.

13. Ebɛnadze na yebotum esua efi dza Jin-hyuk yɛe no mu?

¹³ Hɛn so, sɛ aban mpanyimfo hyɛ hɛn dɛ yengyaa asɛnka edwuma no a, ɔsɛ dɛ yesuasua dza esuafo no yɛe no na yɛkɔ do ka asɛm no. Ma yɛnhwɛ Onua Jin-hyuk n’asɛm yi. Osiandɛ nna ɔmmpɛ dɛ ɔkɔ sogya ntsi, wɔdze no kɔtoo efiadze. Aber a wɔdze no kɔr hɔ no, edwuma a wɔdze hyɛɛ ne nsa nye dɛ, daduanyi biara a wɔdze nankotsee akɛhyɛ efiadze dan bi mu no, ɔmma no edziban nye ndzɛmba ahorow bi a obehia. Naaso, wɔkaa kyerɛɛ no dɛ mma ɔnye adaduafo no mmbɔ biribi a ɔmmfa n’edwuma no ho nkɔmbɔ; nna Bible mu nkɔmbɔ so ka ho. Dɛm ntsi ɔbɔɔ Jehovah mpaa dɛ, ɔmma no akokodur nye nyansa mbrɛ ɔbɛyɛ a obotum dze hokwan biara a obenya no aka asɛmpa no. (Andw. 5:29) Ɔkaa dɛ: “Jehovah tsiee mpaa a mobɔe no, na ɔmaa me akokodur nye nyansa ma mutumii hyɛɛ Bible adzesua pii ase. Nna dɛm Bible adzesua no mu biara dzi minitsi enum pɛ, na menye hɔn yɛ wɔ hɔn abow no ano, aber a medze ndzɛmba rekɛma hɔn no. Sɛ odu anafua so a, nna mekyerɛw nkrataa a sɛ adze kye a medze bɛma hɔn a menye hɔn da efiadze hɔ no.” Hɛn so, ɔsɛ dɛ yenya awerɛhyɛmu dɛ Jehovah bɔboa hɛn ma yaayɛ asɛnka edwuma no. Dɛ mbrɛ Jin-hyuk yɛe no, yebotum abɔ Jehovah mpaa na yaaserɛ no dɛ ɔmma hɛn akokodur nye nyansa.

14. Sɛ yerihyia ɔhaw a, ebɛnadze na ɔbɔboa hɛn ma yeetum egyina ano? (Ndwom 37:3, 5)

 ¹⁴ Serɛ Jehovah dɛ ɔmboa wo ma gyina ɔhaw a irihyia no ano. Hɛn mu pii rihyia ɔhaw ahorow. Ɔhaw no bi nye yarba, adwendwen, hɛn dɔfo bi a oewu, ebusua mu nsɛnsɛm, ɔsoɛrtsia na pii a ɔkeka ho. Ndzɛmba bi tse dɛ, yarba a ɔtserɛw ntsɛntsɛm nye akodzi ahorow a ɔkɔ do no ama asɛm no asɛɛ koraa. Sɛ irihyia ɔhaw a ɔtse dɛm a, fi w’akoma nyina mu ka dza erefa mu no ho asɛm kyerɛ Jehovah. Ka ho asɛm kyerɛ no tse dɛ mbrɛ ereka akyerɛ wo nyɛnko berɛbo bi. Nya awerɛhyɛmu dɛ, sɛ ebɔ mpaa a ɔtse dɛm a, Jehovah bɔboa wo ma eetum egyina ano.​—Kenkan Ndwom 37:3, 5.

15. Sɛ ‘yɛkɔ ahohia mu’ a, ebɛn kwan do na mpaabɔ botum aboa hɛn ma yeegyina ano? Ma ho nhwɛdo.

¹⁵ Sɛ ‘yɛkɔ ahohia mu,’ na yɛkɔ do bɔ mpaa a, ɔno bɛma yeetum egyina ano. (Rom. 12:12) Jehovah nyim dza n’asomfo refa mu no, na ‘otsie hɔn sufrɛ.’ (Ndw. 145:18, 19) Hɛn akyerɛbaa kwampaafo bi a oedzi mfe 29 a wɔfrɛ no Kristie hun dɛ asɛm yi yɛ nokwar. Yarba bi a ɔnnhwɛ kwan bɔɔ no. Iyi maa adwendwen hyɛɛ no do paa. Ekyir yi, obohun dɛ yarba huhuuhu bi so abɔ ne maame. Kristie kaa dɛ: “Mobɔɔ Jehovah mpaa dzendzenndzen dɛ ɔmma me ahoɔdzen a mubotum dze egyina ɔhaw a mirihyia no ano da biara. Afei, asafo nhyiamu na ankorankor adzesua so, manntoto no adze da.” Ɔtoaa do dɛ: “Mpaa a mobɔe no na ɔboaa me ma mutumii gyinaa ɔhaw no ano. Nna megye dzi dɛ Jehovah ka moho aber nyina, na iyi kyekyee mo werɛ paa. Ɔwɔ mu dɛ ɔhaw no emmfi hɔ amonmu hɔ ara dze, naaso Jehovah buaa mpaa a mobɔe no, na ɔmaa m’asomu dwee me na m’akoma so tɔɔ me yamu.” Ɔsɛ dɛ aber nyina yɛma ɔtsena hɛn adwen mu dɛ, Jehovah “nyim mbrɛ oyiyi nyamesurofo fi nsɔhwɛ mu.”​—2 Pet. 2:9.

16. Ebɛnadze ntsi na ɔsɛ dɛ yɛhwehwɛ Jehovah no hɔ mboa ama yeetum atwe hɛnho efi ndzɛmba a ɔbɛma yɛayɛ bɔn no ho?

¹⁶ Serɛ Jehovah dɛ ɔmboa wo ma twe woho fi  ndzɛmba a ɔbɛma ayɛ bɔn no ho. Osiandɛ yɛyɛ nyimpa a bɔn wɔ hɛnho ntsi, ɔyɛ a ɔyɛ dzen ma hɛn dɛ yɛbɔtwe hɛnho efi ndzɛmba a ɔbɛma yɛayɛ bɔn no ho. Satan awe ataa do dɛ ɔbɛma wɔayɛ dzen ama hɛn paa dɛ yɛbɔtwe hɛnho efi ndzɛmba a ɔtse dɛm ho. Adze kor a ɔrobɔ mbɔdzen dɛ ɔdze bɛsɛɛ hɛn adwen nye enyigyedze a ɔmmfata a ɔhyɛ ho nkuran no. Enyigyedze a ɔtse dɛm no botum ama nsusui bɔn ahyɛ hɛn adwen mu ma. Nsusui a ɔtse dɛm no bɛma hɛnho egu fi wɔ Jehovah n’enyim, na obotum ama yaayɛ bɔn kɛse.​—Mark 7:21-23; Jas. 1:14, 15.

17. Sɛ yɛserɛ Jehovah dɛ ɔmboa hɛn ma yɛntwe hɛnho mfi ndzɛmba a ɔbɛma yɛayɛ bɔn ho a, ebɛnadze na ɔsɛ dɛ hɛnankasa so yɛyɛ? (Hwɛ mfonyin no so.)

¹⁷ Sɛ yebotum atwe hɛnho efi ndzɛmba a ɔbɛma yɛayɛ bɔn no ho a, yebehia Jehovah no mboa. Aber a Jesus rekyerɛ n’esuafo no mbrɛ wonsi mbɔ mpaa no, ɔkaa ebisadze bi a wobotum dze ato Jehovah n’enyim wɔ hɔn mpaabɔ mu. Ɔkaa dɛ: “Mma mmfa hɛn nnkɔ nsɔhwɛ mu, na yi hɛn fi ɔbɔn no mu.” (Matt. 6:13) Jehovah dze, ɔayɛ krado dɛ ɔbɔboa hɛn, naaso ɔsɛ dɛ yebisa no hɔ mboa ana. Afei, bɔ mbɔdzen twe woho fi ndzɛmba a obotum ama aayɛ bɔn no ho. Dɛ nhwɛdo no, adwen a ɔmmfata a nkorɔfo pii wɔ wɔ ndzɛmba ho no, ɔsɛ dɛ yɛyer hɛnho paa na yaannkenkan anaa yeenntsie ho asɛm. Ndzɛmba a ɔtsetse dɛm no ebu do ndɛ wɔ Satan no wiadze yi mu. (Ndw. 97:10) Ɔsɛ dɛ yɛdwendwen ndzɛmba papa ho. Sɛ yebotum ayɛ dɛm a, ɔsɛ dɛ yesua Bible no. Afei so, sɛ yɛkɔ asafo nhyiamu na yɛdze hɛnho hyɛ asɛnka edwuma no mu a, yɛbɔbɔ hɛn nsusui ho ban. Jehovah so ahyɛ hɛn bɔ dɛ, ɔremma wɔnnsɔ hɛn nnhwɛ nntra dza yebotum egyina ano.​—1 Cor. 10:12, 13.

18. Ɔdze fa mpaabɔ ho no, ebɛnadze na ɔsɛ dɛ hɛn nyina yɛ?

¹⁸ Yɛtse nda a odzi ekyir no mu, ntsi sɛ yebotum akɔ do edzi Jehovah nokwar a, ndɛ paa na ɔsɛ dɛ hɛn mu biara kɔ do bɔ mpaa. Da biara, gye mber bɔ mpaa na ka w’akoma mu nsɛm kyerɛ Jehovah. Jehovah pɛ dɛ ‘yehue hɛn akoma mu nsɛm gu n’enyim.’ (Ndw. 62:8) Yi Jehovah ayɛw na da no ase wɔ ndzɛmba a ɔayɛ ama wo no ho. Afei so, serɛ no dɛ ɔmboa wo ama eetum dze akokodur ayɛ asɛnka edwuma no. Bio so, serɛ no dɛ ɔmboa wo ma gyina ɔhaw biara a irihyia no ano, na ɔmboa wo ma twe woho fi ndzɛmba a obotum ama ayɛ bɔn no ho. Mma mma biribiara anaa obiara nnsiw wo kwan dɛ ebɔbɔ Jehovah mpaa dabaa. Naaso, yembisa dɛ, ebɛnadze na Jehovah yɛ dze bua hɛn mpaabɔ? Yebosusu asɛmbisa a no ho hia yi ho wɔ adzesua a odzi hɔ no mu.