1. Ebɛn awerɛkyekyesɛm na Abraham nyae fii nkɔmbɔ a ɔnye Jehovah bɔe no mu?

 TSETSE mber no mu no, Nyankopɔn nam ɔbɔfo bi do nye Abraham twetwee nkɔmbɔ bi. Ɔkaa kyerɛɛ Abraham dɛ ɔrekɛsɛɛ Sodom na Gomorrah. Ɔwɔ mu dɛ nna Abraham gye Nyankopɔn dzi paa, naaso nna ɔyɛ dzen ma no dɛ ɔbɛtse dza Nyankopɔn pɛ dɛ ɔyɛ no ase. Dɛm ntsi obisaa Nyankopɔn dɛ: ‘Ana edze atseneneefo nye ndzebɔnyɛfo nyinara bɔbɔ mu asɛɛ hɔn? Ana asaase nyinara Ɔtsɛmbuafo no nnkɛyɛ dza ɔtsen bi a?’ Naaso Jehovah nyaa ne nyɛnko a ɔpɛ n’asɛm yi ho abotar na ɔboaa no ma osuaa biribi. Ɔno nye dɛ: Nyankopɔn rennsɛɛ nyimpa atseneneefo da. Dɛm asɛm yi kyekyee Abraham no werɛ, na obotum aboa hɛn na wɔakyekye hɛn werɛ ndɛ so.—Gen. 18:​23-33

2. Ebɛnadze na ɔma yenya awerɛhyɛmu dɛ Jehovah bu atsɛntsenenee na ɔda ehumbɔbɔr edzi?

² Ebɛnadze na ɔma yenya awerɛhyɛmu dɛ Jehovah bu atsɛntsenenee aber nyina na ɔda ehumbɔbɔr edzi? Siantsir nye dɛ, yenyim dɛ ‘Jehovah dze ɔhwɛ akoma mu.’ (1 Sam. 16:7) Nokwasɛm nye dɛ, onyim “nyimpa mba nyinara hɔn akoma mu.” (1 Ahe. 8:39; 1 Mber. 28:9) Dɛm nokwasɛm yi ka akoma paa. Jehovah nyim nyansa sen hɛn koraa. Dɛm ntsi mbrɛ osi bu atsɛn no, yennkotum atse ase ara da. Ɔsɛ fata paa dɛ ɔsomafo Paul kaa Jehovah Nyankopɔn ho asɛm dɛ: ‘Yerunntum nntse n’atsɛmbu ase nnwie da!’—Rom. 11:33.

3-4. Ɔtɔ da a ebɛn nsɛm na yebotum ebisa hɛnho, na ebɛnadze na yebosusu ho wɔ adzesua yi mu? (John 5:​28, 29)

³ Naaso ɔtɔ da a, bi a nsɛmbisa bi a ɔtse dɛ dza Abraham bisae no bi botum aba hɛn tsirmu. Yebotum mpo ebisa hɛnho dɛ: ‘Nyimpa binom a Jehovah sɛɛ hɔn tse dɛ hɔn a nna wɔwɔ Sodom na Gomorrah no, enyidado bi wɔ hɔ ma hɔn dɛ wobenya  owusoɛr anaa? “Hɔn a wɔnntsen” a wɔbɔsoɛr no, hɔn mu binom botum aka ho anaa?’—Andw. 24:15.

⁴ Ntseasee a yɛwɔ wɔ owusoɛr no ho no, hom mma yɛnkaakaa hɛnho kakra. Ndaansa yi ara na yenyaa nkyerɛkyerɛmu fofor faa hɔn a wobenya ‘nkwa wusoɛr’ nye hɔn a wobenya ‘atsɛmbu wusoɛr’ no ho. a (Kenkan John 5:​28, 29.) Dɛm nkyerɛkyerɛmu yi ama no ho ebehia dɛ yɛyɛ nsesa wɔ ntseasee bi a yɛwɔ no mu. Yebosusu dɛm nkyerɛkyerɛmu afofor no ho wɔ adzesua yi nye dza odzi hɔ no mu. Mbrɛ Jehovah si bu atsɛntsenenee no, yebedzi kan ahwɛ dza yennyim fa ho, na ɔno ekyir no yaahwɛ dza yenyim fa ho.

DZA YENNYIM

5. Mber bi a etwa mu no, ebɛn asɛm na yɛkae faa hɔn a Jehovah sɛɛ hɔn wɔ Sodom na Gomorrah no ho?

⁵ Hɔn a Jehovah bu hɔn atsɛn dɛ wɔnntsen no, mber bi a etwa mu no, yɛkaa dza ɔto hɔn ho asɛm wɔ hɛn nwoma ahorow mu. Yɛkaa dɛ, nyimpa binom a Jehovah sɛɛ hɔn tse dɛ hɔn a nna wɔwɔ Sodom na Gomorrah no, worinnya owusoɛr. Naaso aber a yɛbɔɔ asɛm yi ho mpaa na yesuaa ho adze kɔr ekyir no, yeebohu dɛ yerunntum nnka nnsi no pi dɛ enyidado biara nnyi hɔ mma hɔn. Ebɛnadze ntsi a?

6. Nyimpa a wɔnntsen a Jehovah buu hɔn atsɛn no, hɔn mu bi nye woananom, na ebɛnadze na yennyim fa dza ɔtoo hɔn no ho?

⁶ Hom mma yɛnhwɛ nsɛmbisa ahorow bi a ɔnye dza yɛreka ho asɛm yi dzi nsɛ. Bible mu kyerɛwtohɔ ahorow pii ka atsɛmbu a Jehovah dze baa nyimpa a wɔnntsen do no ho asɛm. Binom nye hɔn a Nsuyirii no kunkum hɔn wɔ Noah n’aber do, aman esuon a Jehovah maa Israelfo no sɛɛ hɔn wɔ Anohoba Asaase no do, nye Assyria nsordaafo 185,000 a Jehovah maa no bɔfoe kor kunkum hɔn wɔ da kor anafua bi no. (Gen. 7:23; Deut. 7:​1-3; Isa. 37:​36, 37) Dɛm asɛm yi mu biara mu no, Bible no ka no pefee dɛ Jehovah buu dɛm nkorɔfo yi atsɛn na ɔsɛɛ hɔn koraa a enyidado biara nnyi hɔ mma hɔn dɛ wobenya owusoɛr anaa? Oho, ɔnnka biribiara dɛm. Ebɛnadze ntsi na yebotum aka dɛm?

7. Hɔn a wowuwui wɔ Nsuyirii no mu nye hɔn a Israelfo no sɛɛ hɔn wɔ Canaan asaase do no, ebɛnadze na yennyim fa hɔn ho? (Hwɛ mfonyin no.)

⁷ Hɔn a yeedzi kan aka hɔn ho asɛm no, yennyim mbrɛ Jehovah sii buu hɔn mu biara atsɛn. Dɛmara so na yennyim dɛ hɔn a Jehovah sɛɛ hɔn no, wonyaa hokwan dɛ wobosua Jehovah ho adze na wɔasesa anaadɛ woennya hokwan a ɔtse dɛm. Aber a Bible no reka Nsuyirii no ho asɛm no, ɔkaa dɛ nna Noah yɛ “tsenenee sɛnkafo.” (2 Pet. 2:5) Naaso Bible no nnka dɛ aber a Noah reyɛ adaka no, ɔbɔɔ mbɔdzen dɛ ɔbɛka asɛm no akyerɛ obiara a nna ɔwɔ asaase do dɛm aber no. Dɛmara so na ndzebɔnyɛfo a Israelfo no sɛɛ hɔn wɔ Canaan asaase do no, dɛ wonyaa hokwan dɛ wobosua Jehovah no ho adze na wɔasesa hɔn akwan o, dɛ woennya no dɛm o, yennyim.

8. Nkorɔfo a Jehovah sɛɛ hɔn wɔ Sodom na Gomorrah no, ebɛnadze na yennyim fa ho?

⁸ Na nyimpa a Jehovah sɛɛ hɔn wɔ Sodom na Gomorrah no so ɛ? Nna ɔtseneneenyi bi a wɔfrɛ no Lot tse hɔn mu. Naaso Bible no ka dɛ Lot kaa dza nna oribesi no ho asɛm kyerɛɛ hɔn nyinara anaa? Oho. Ɔda edzi dɛ nna wɔyɛ ndzebɔnyɛfo, naaso nna hɔn nyinara nyim papa nye bɔn anaa? Sɛ ebɛkaa a, nna kurow no mu hɔ mbanyimfo pɛ dɛ wɔhyɛ ahɔho a wɔaba Lot ne nkyɛn no na wɔnye hɔn da. Bible no ka dɛ nna “mbofra” mpo ka dɛm nkorɔfo yi ho. (Gen. 19:4; 2 Pet. 2:7) Ehwɛ a, yebotum aka paa dɛ Jehovah a ɔyɛ ehumbɔbɔr Nyankopɔn no sɛɛ dɛm nkorɔfo yi a hɔn mu biara nnyi owusoɛr ho enyidado anaa? Jehovah maa  Abraham hun dɛ atseneneefo a wɔwɔ kurow no mu hɔ nndu du mpo. (Gen. 18:32) Iyi ma yehu dɛ nna wɔyɛ ndzebɔnyɛfo. Dɛm ntsi ɔyɛ no kwan do dɛ Jehovah sɛɛ hɔn. ‘Hɔn a wɔnntsen a wɔbɔsoɛr no,’ yebotum aka esi no pi dɛ dɛm nkorɔfo yi mu biara nnka ho anaa? Oho, yerunntum nnka dɛm koraa!

9. Ebɛn asɛm na ɔfa Solomon ho a yennyim?

⁹ Naaso Bible no ka atseneneefo bi a ekyir yi wɔbɛyɛɛ Jehovah no do asoɔdzen ho asɛm. Dɛm nkorɔfo yi mu kor nye Ɔhen Solomon. Nna onyim Jehovah yie na onyim dza ɔyɛ a ɔbɛma ɔagye no ato mu. Afei so, Jehovah hyiraa no paa. Naaso ekyir yi ɔkɔsoom abosom. Bɔn a Solomon yɛe no maa Jehovah no bo fuuw paa, na iyi maa Israelman no hun amandze mfe pii. Ɔyɛ nokwar, Kyerɛwnsɛm no ka dɛ aber a Solomon wui no, wosiee no wɔ beebi a ‘wosiee n’egyanom no.’ Hɔn a wosiee hɔn wɔ dɛm bea no mu bi nye Ɔhen David a ɔdze nokwardzi soom Jehovah no. (1 Ahe. 11:​5-9, 43; 2 Ahe. 23:13) Yembisa dɛ, beebi a wosiee Solomon no kyerɛ dɛ obenya owusoɛr anaa? Bible no nnka. Naaso bi a binom benya adwen dɛ ‘nyia oewu no, woebu no bem wɔ no bɔn ho.’ (Rom. 6:7) Naaso iyi nnkyerɛ dɛ hɔn a woewuwu nyinara benya owusoɛr. Asɛm no ara nye dɛ, sɛ obi wu a, ɔno ara kɛkɛ nnkyerɛ dɛ obenya hokwan atsena ase bio. Nokwasɛm nye dɛ, owusoɛr no yɛ akyɛdze a ofi hɛn sor Egya a ɔwɔ ɔdɔ no hɔ. Dɛm ntsi ɔdze dɛm akyɛdze yi ma hɔn a ɔpɛ dɛ ɔma hɔn hokwan ma wɔsoom no afebɔɔ no. (Job 14:​13, 14; John 6:44) Solomon benya dɛm akyɛdze yi bi anaa? Hɛn dze yennyim, Jehovah na onyim. Naaso yenyim dɛ Jehovah bɛyɛ dza ɔtsen.

DZA YENYIM

10. Jehovah tse nka dɛn wɔ ɔsɛɛ a ɔdze ba nyimpa do no ho? (Ezekiel 33:11) (Hwɛ mfonyin no so.)

¹⁰ Kenkan Ezekiel 33:11. Jehovah ma yehu mbrɛ osi tse nka wɔ hɔn a obu hɔn atsɛn no ho. Jehovah maa ɔsomafo Peter kaa asɛm bi a ɔnye dza nkɔnhyɛnyi Ezekiel kae no dzi nsɛ. Ɔkaa dɛ: ‘Jehovah mmpɛ dɛ obiara bɛsɛɛ.’ (2 Pet. 3:9) Dɛm asɛm yi kyekye hɛn werɛ. Afei so, ɔma yehu dɛ Jehovah rennsɛɛ nyimpa bi korakora gyedɛ oehu dɛ ɔwɔ siantsir papa bi. Ehumbɔbɔr ahyɛ Jehovah ma, na aber biara a ohu dɛ ohia dɛ ɔda no edzi no, ɔyɛ no dɛm.

11. Woananom na worinnya owusoɛr, na yesi dɛn hu?

¹¹ Hɔn a worinnya owusoɛr no, ebɛnadze na yenyim fa hɔn ho? Hɔn mu kakraabi na Bible no ka hɔn ho asɛm. b Jesus maa ɔdaa edzi dɛ Judas Iscariot rinnya owusoɛr. (Mark 14:21; hwɛ John 17:12 na no ho nkyerɛkyerɛmu no so.) Siantsir nye dɛ, nna onyim paa dɛ Jehovah Nyankopɔn nye ne Ba no mmpɛ dza ɔreyɛ no, naaso ɔhyɛɛ da ara yɛe. (Hwɛ Mark 3:29 na no ho nkyerɛkyerɛmu no.) Afei so, Jesus kaa dɛ nyamesom mpanyimfo a wɔtaan n’enyi no rinnya owusoɛr. (Matt. 23:33; hwɛ John 19:11 nye kasafua “nyimpa” no ho nkyerɛkyerɛmu no.) Bio so, ɔsomafo Paul bɔɔ kɔkɔ dɛ awaafo a wonnu hɔnho no rinnya owusoɛr.—Heb. 6:​4-8; 10:29.

12. Ebɛnadze na yenyim fa mbrɛ Jehovah si da ehumbɔbɔr edzi no ho? Ma ho nhwɛdo.

¹² Naaso, ebɛnadze na yenyim fa ehumbɔbɔr a Jehovah da no edzi no ho? Ebɛnadze na Jehovah ayɛ dze ada no edzi dɛ ‘ɔmmpɛ dɛ obiara bɛsɛɛ’? Hom mma yɛnhwɛ mbrɛ Jehovah daa ehumbɔbɔr edzi kyerɛɛ nyimpa binom a wɔyɛɛ bɔn akɛse no. Sɛ yɛhwɛ Ɔhen David a, ɔyɛɛ bɔn akɛse toatoaa do. No mu bi nye dɛ ɔfaa banyin bi ne yer, na ɔmaa wokum banyin no so kaa ho. Naaso David nuu noho, dɛm ntsi Jehovah huu no mbɔbɔr na ɔdze no bɔn kyɛɛ no. (2 Sam. 12:​1-13) Ɔhen Manasseh so yɛɛ ndzɛmba bɔn pii wɔ n’asetsena mu. Ɔmmfa  ho bɔn akɛse a ɔyɛe nyina ekyir no, onuu noho na Jehovah so huu no mbɔbɔr na ɔdze no bɔn kyɛɛ no. (2 Mber. 33:​9-16) Dɛm ahemfo beenu yi hɔn asɛm no ma yehu dɛ aber biara a Jehovah hu dɛ ɔsɛ dɛ ɔda ehumbɔbɔr edzi no, ɔyɛ dɛm. Jehovah benyan nkorɔfo a wɔtse dɛm, osiandɛ wɔgyee too mu dɛ wɔayɛ bɔn akɛse na wonuu hɔnho.

13. (a) Ebɛnadze ntsi na Jehovah huu Ninevehfo no mbɔbɔr? (b) Ekyir yi, ebɛn asɛm na Jesus kae faa Ninevehfo no ho?

¹³ Afei so, yenyim dɛ Jehovah daa ehumbɔbɔr edzi kyerɛɛ Ninevehfo no. Nyankopɔn kaa kyerɛɛ Jonah dɛ: “Hɔn emumuyɛ afow aba m’enyim.” Naaso aber a wonuu hɔnho no, Jehovah huu hɔn mbɔbɔr na ɔdze hɔn bɔn kyɛɛ hɔn. Nna Jehovah wɔ ehumbɔbɔr paa sen Jonah. Jonah no bo fuwii naaso Nyankopɔn maa ohun dɛ Ninevehfo no ‘nntum nnhu hɔn nsa nyimfa anaa hɔn nsa bankum’ kyerɛ dɛ, wonnyim papa nye bɔn mu nsonsonee. (Jonah 1:​1, 2; 3:10; 4:​9-11) Ekyir yi, Jesus dze dɛm asɛm yi kyerɛkyerɛɛ Jehovah n’atsɛntsenenee nye ehumbɔbɔr a ɔda no edzi no mu. Jesus kaa dɛ Ninevehfo a wonuu hɔnho no “bɔsoɛr wɔ atsɛmbu no mu.”—Matt. 12:41.

14. ‘Atsɛmbu wusoɛr’ no bɛkyerɛ dɛn ama Ninevehfo no?

¹⁴ Ebɛn “atsɛmbu” mu na Ninevehfo no “bɔsoɛr no”? Jesus kaa dɛ wɔbɔsoɛr wɔ atsɛmbu wusoɛr mu. (John 5:29) Nna ɔreka ne Mfrenhyia Apem Tumdzi no ho asɛm. Dɛm aber no, “hɔn a wɔtsen nye hɔn a wɔnntsen” bɔsoɛr. (Andw. 24:15) Dɛm aber no bɛyɛ atsɛmbu wusoɛr ama hɔn a wɔnntsen no. Iyi kyerɛ dɛ Jehovah na Jesus dze hɔn enyi bedzi hɔn ekyir na wɔaahwɛ mbrɛ wobesi ayɛ hɔn adze. Afei so wɔbɔhwɛ dɛ wɔdze nkyerɛkyerɛ a wɔdze bɛma hɔn no bɔbɔ hɔn bra anaadɛ wɔremmfa mmbɔ hɔn bra. Iyi kyerɛ dɛ sɛ wonyan Ninevehnyi bi na ɔaannsom Jehovah nokwar mu a, Jehovah remma ɔnnkɔ do nntsena ase. (Isa. 65:20) Naaso hɔn a wɔbɔkɔ do asom Jehovah nokwar mu no dze, wobenya hokwan atsena ase daa!—Dan. 12:2.

15. (a) Hɔn a Jehovah sɛɛ hɔn wɔ Sodom na Gomorrah no, ebɛnadze ntsi na ɔnnsɛ dɛ yɛka bio dɛ hɔn mu biara rinnya owusoɛr? (b) Ɔsɛ dɛ yɛtse asɛm a ɔwɔ Jude 7 no ase dɛn? (Hwɛ adakaba a wɔato dzin “ Nna Jude Repɛ Akyerɛ Dɛn?”)

¹⁵ Aber a Jesus reka Sodom na Gomorrahfo ho asɛm no, ɔkaa dɛ obeye ama hɔn wɔ “atsɛmbu da no mu” akyɛn hɔn a wɔpoow no na woenntsie ne nkyerɛkyerɛ no. (Matt. 10:​14, 15; 11: 23, 24; Luke 10:12) Nna Jesus repɛ akyerɛ dɛn? Bi a yebenya adwen dɛ dza nna Jesus reka no nnyɛ biribi a obesi ankasa, mbom no nna ɔbɛyɛ dɛ orugugu nsɛm mu. Naaso ɔnntse dɛm koraa. Osiandɛ aber a ɔkaa dɛ Ninevehfo no “bɔsoɛr wɔ atsɛmbu no mu” no, nna ɔrepɛ akyerɛ dɛ biribi a ɔtse dɛm besi ankasa. “Atsɛmbu Da” ho asɛm a ɔkae faa Sodom na Gomorrah ho no, ɔno ara bi na ɔkae faa Ninevehfo so ho. Sodom na Gomorrahfo nye Ninevehfo no nyina yɛɛ ndzɛmba bɔn. Naaso Ninevehfo no dze, wonyaa hokwan sesae. Afei so, kaa dza Jesus kae faa ‘atsɛmbu wusoɛr’ no ho no. Ɔkaa dɛ ‘hɔn a wɔyɛɛ dza omuo no’ so bɔsoɛr. (John 5:29) Iyi ma yehu dɛ, ɔbɛyɛ dɛ enyidado bi wɔ hɔ ma nyimpa binom a nna wɔwɔ Sodom na Gomorrah no. Obotum aba dɛ hɔn mu binom botum enya owusoɛr, na yebenya hokwan akyerɛkyerɛ hɔn Jehovah nye Jesus Christ ho adze.

16. Dza Jehovah begyina do dze enyan obi no, ebɛnadze na yenyim fa ho? (Jeremiah 17:10)

¹⁶ Kenkan Jeremiah 17:10. Dza yenyim fa Jehovah n’atsɛmbu ho no, dɛm kyerɛwsɛm yi boa hɛn ma no mu da hɔ. Ɔno nye dɛ Jehovah nye nyia ‘ɔhwehwɛ akoma mu, na ɔsɔ nyimpa ne tsirmu adwen hwɛ’ aber nyina. Dɛm ntsi wɔ owusoɛr a ɔbɛba daakye no mu no, dɛ mbrɛ Jehovah yɛ no aber nyinara no, ‘obotua obiara kaw dɛ mbrɛ n’akwan tse.’ Sɛ Jehovah hu dɛ ɔsɛ dɛ ɔda ehumbɔbɔr edzi a, ɔbɛda no edzi naaso sɛ ohu dɛ no ho nnhia dɛ ɔyɛ dɛm a, ɔrennyɛ. Dɛm ntsi, ɔnnsɛ dɛ yenya adwen dɛ nyimpa bi rinnya owusoɛr, gyedɛ yenyim dɛ Bible no aka biribi a ɔtse dɛm.

‘ASAASE NYINARA ƆTSƐMBUAFO NO BƐYƐ DZA ƆTSEN’

17. Ebɛn enyidado na ɔwɔ hɔ ma hɔn a woewuwu no?

¹⁷ Ofi ber a Adam na Eve kɛkaa Satan ho ma wɔtseew Jehovah Nyankopɔn no do etua no, nyimpa ɔpepem pii na woewuwu. Hɛn ‘tamfo owu’ amen nyimpa pii! (1 Cor. 15:26) Dɛm nkorɔfo no nyinara, obowie hɔn dɛn? Nyimpa kakraabi a hɔn dodow yɛ 144,000 a wɔyɛ Christ n’ekyirdzifo anokwafo no benya owusoɛr akɔ sor na worunnwu da. (Nyi. 14:1) Mbarimba na mbaa anokwafo pii a wɔdɔ Jehovah no bɛka ‘hɔn a wɔtsen a wɔbɔsoɛr’ no ho. Na sɛ wɔkɔ do yɛ dza ɔtsen wɔ Christ ne Mfrenhyia Apem Tumdzi no mu na wotum gyina nsɔhwɛ a otwa tun no ano a, wɔbɛtsena asaase yi do afebɔɔ.  (Dan. 12:13; Heb. 12:1) Afei so, wɔ Mfrenhyia Apem no mu no, wɔbɛma hɔn a ‘wɔnntsen’ no hokwan ma wɔdze asesa hɔn asetsena na wɔaabɔsom Jehovah. Hɔn a wɔnntsen no mu bi nye hɔn a woennya hokwan annsom Jehovah anaa hɔn a ‘wɔyɛɛ dza omuo’ mpo no. (Luke 23:​42, 43) Naaso, nyimpa binom so wɔ hɔ a, wodzii bɔn paa na wɔtseew Jehovah no do etua so. Dɛm nkorɔfo no nnyi enyidado biara osiandɛ Jehovah esi gyinae dɛ orinnyan hɔn.—Luke 12:​4, 5.

18-19. (a) Sɛ Jehovah rubu hɔn a woewuwu no atsɛn a, ebɛnadze ntsi na yebotum enya awerɛhyɛmu dɛ Jehovah bobu atsɛntsenenee? (Isaiah 55:​8, 9) (b) Ebɛnadze na yebosusu ho wɔ adzesua a odzi hɔ no mu?

¹⁸ Yebotum aka dɛ Jehovah bu atsɛntsenenee aber nyina anaa? Nyew! Nna Abraham nyim iyi paa. Nna onyim dɛ Jehovah a ɔyɛ ‘asaase nyinara Ɔtsɛmbuafo no’ nndzi mfom, ne nyansaa mu dɔ na ɔda ehumbɔbɔr edzi. Jehovah atsetse ne Ba no yie na ɔdze ahyɛ ne nsa dɛ ommbu nyimpa nyinara atsɛn. (John 5:22) Jehovah na Jesus nyina nyim dza ɔwɔ nyimpa biara n’akoma mu. (Matt. 9:4) Dɛm ntsi sɛ worubu nyimpa biara atsɛn a, wɔbɛyɛ “dza ɔtsen”!

¹⁹ Dɛm ntsi hom mma yennya ahotodo dɛ Jehovah na onyim dza oye. Ɔsɛ dɛ yɛkaa dɛ yɛmmfata dɛ yebu atsɛn, mbom Jehovah na ɔfata! (Kenkan Isaiah 55:​8, 9.) Dɛm ntsi sɛ ɔba no atsɛmbu mu a, ɔsɛ dɛ yegyaa biribiara hyɛ Jehovah nye ne Ba no nsa. Jesus yɛ Ɔhen a ɔda n’Egya n’atsɛntsenenee nye n’ehumbɔbɔr no bi edzi pɛpɛɛpɛ. (Isa. 11:​3, 4) Naaso, kwan a Jehovah na Jesus bɛfa do ebu nyimpa atsɛn wɔ ahohiahia kɛse no mu no, ebɛn asɛm na yebotum aka afa ho? Ebɛnadze na yenyim fa ho? Na ebɛnadze na yennyim? Yebosusu dɛm nsɛmbisa yi ho wɔ adzesua a odzi hɔ no mu.