HƐN nuanom pii a mber bi etwa mu no, wotui fii hɔn man mu dɛ wɔrekɛpɛ sika wɔ aman afofor do no asan aba hɔn man mu. Ɔdɔ a wɔwɔ ma Jehovah nye hɔn nyɛnko nyimpa no aka hɔn ma woetu akɔ mbea ahorow a wohia Ahendzi adawurbɔfo pii. (Matt. 22:37-39) Ebɛn ndzɛmba na wɔdze bɔɔ afɔr na ebɛn nhyira na woenya? Hom mma yɛnkɔ Cameroon a ɔwɔ Africa anee afamu na yɛnkɔhwɛ enuanom binom hɔn suahu.

Onua bi a wɔfrɛ no Onésime tui fii Cameroon kɔr amanandze wɔ afe 1998. Ɔkɛtsenaa hɔ mfe duanan. Da kor bi, wɔ Christianfo nhyiamu ase no, ɔkasafo bi yɛɛ mfatoho bi faa asɛnka edwuma no ho. Ɔkasafo no kãa dɛ, “Fa no dɛ anyɛnkofo beenu bi repa nam, naaso ɔsor beebi a hɔn mu biara gyina. Sɛ kor hu dɛ ne nyɛnko repa nam pii sen no a, ana orimmfi beebi a ɔwɔ no nnkɔ beebi a ne nyɛnko no repa nam pii no?”

Dɛm mfatoho no maa Onésime nyaa adwen dɛ, ɔbɛsan akɔ Cameroon, beebi a nyimpa piinara wɔ ɔpɛ dɛ wobosũa Bible no na ɔaakɔboa adawurbɔfo a wɔwɔ hɔ no. Naaso nna ɔwɔ ɔhaw kakra. Sɛ ɔhwɛ mfe pii a ɔdze atsena amanandze no a, sɛ ɔsan kɔ no kurow mu a, ana obotum ayɛ n’adze dɛ mbrɛ kurow mu hɔfo no yɛ no? Mbrɛ ɔbɛyɛ a obotum ehu no, odzii kan kɛtsenaa hɔ abosoom esia. Afei, wɔ afe 2012 no, otui kɛtsenaa hɔ koraa.

Onésime kãa dɛ: “Wimu tsebea a ɔyɛ hyew nye mbrɛ ha asetsena tse no, nna ɔsɛ dɛ musũa mbrɛ mibesi atsena mu. Wɔ Ahendzi Asa do no, nna ɔsɛ dɛ musũa mbrɛ mibesi atsena ngua a ɔwɔ hɔ a no do bawee no do.” Ɔdze serew kãa dɛ, “Naaso, dodow a medze m’adwen sii dwumadzi no do no, dodow no ara na mo werɛ fiir ngua tofotofo a ɔwɔ Ahendzi Asa afofor do no.”

Afe 2013 no, Onésime waar Géraldine, nna Géraldine akɛtsena France mfe akron, naaso ɔasan aba Cameroon. Osian Jehovah no som a awarfo yi dze dzii kan wɔ hɔn asetsena mu ntsi, ebɛn nhyira na woenya? Onésime kãa dɛ: “Yɛbɔɔ mu kɔr Ahendzi Asɛmpakafo Skuul na yɛkɔsomee wɔ Bethel. Afe a otwaa mu no, Bible esuafo 20 na wɔbɔɔ esu wɔ hɛn asafo mu. Seseiara dze, metse nka dɛ maba bea pa a nyimpa piinara wɔ ɔpɛ dɛ wobosũa Bible no.” (Mark 1:17, 18) Géraldine dze kaa ho dɛ: “Nhyira a menya no, mannso ho daa mpo da.”

Nna Judith etu akɔ United States, naaso nna ɔwɔ ɔpɛ dɛ ɔbɛtserɛw no som edwuma mu. Ɔkãa dɛ: “Aber biara a mobɔkɔ akɛsera ebusuafo wɔ Cameroon no, sɛ mirifi hɔ a nna musu, osiandɛ, nna ɔsɛ dɛ medan nyimpa a menye hɔn ahyɛ ase rusũa Bible no gya.” Naaso, Judith twentweɔɔn n’ananadze dɛ obotu akɛtsena Cameroon. Edwuma a ɔyɛ no, nna n’akatua mu yɛ dur araa ma  otum tua ne papa a ɔwɔ Cameroon no n’ayarsa ho kaw. Naaso, ahotodo a Judith wɔ wɔ Jehovah mu ntsi, osii gyinae dɛ ɔbɛsan akɔ n’ekyir. Ɔkãa dɛ, ɔyɛ a nna n’enyi egyina asetsena pa a nna ɔwɔ mu wɔ United States no. Ntsi ɔbɔɔ mpaa serɛɛ Jehovah dɛ ɔmboa no ma oeetum atsena hɔ. Nkuranhyɛ a ɔmansin do hwɛfo bi nye ne yer dze maa no no boaa no papaapa.

Sɛ Judith kaa dza oetum ayɛ a, ɔkã dɛ: “Wɔ mfe ebiasa ntamu no, mutumii boaa nyimpa baanan ma wɔbɔɔ esu, na iyi maa m’enyi gyee.” Ekyir yi, Judith bɛyɛɛ ɔkwampaaefo tsitsir. Seseiara, ɔnye no kun Sam-Castel rosom wɔ ɔmansin edwuma no mu. Na Judith ne papa n’asɛm no so kesii dɛn? Judith nye n’ebusua no tumii nyaa asopitsi bi wɔ amanandze a hɔ na wɔbɛyɛ ne papa oprehyɛn. Asopitsi no ara peen do dɛ obotua ho kaw no nyina. Enyigyesɛm nye dɛ, wɔyɛɛ oprehyɛn no wiee asomdwee mu.

Onua bi a wɔfrɛ no Victor tui kɔr Canada dɛ ɔrokɔ skuulpɔn. Ɔkenkaan asɛm bi wɔ Ɔweɔn-Aban mu a nna ɔfa nwomasua a ɔkɔ ekyir ho. Ɔno ekyir no, osusuu skuul a nna ɔrokɔ no ho. Ogyaa skuulpɔn no na ɔkɔr skuul a wɔdze ber tsiabaa bi kyerɛ nsaanodwuma. Ɔkãa dɛ: “Ɔno maa minyaa edwuma ntsɛm na mutumii yɛɛ edwuma a nna ɔda m’akoma do no​—akwampaae edwuma no.” Ekyir yi Victor waar Caroline, na wokedzii nda kakra wɔ Cameroon. Wɔkɔr hɔ no, wɔkɔr nserahwɛ wɔ Bethel. Hɔ na enuanom a wɔwɔ hɔ no hyɛɛ hɔn nkuran dɛ wonsusu ho nhwɛ dɛ wobotum abɔsom wɔ Cameroon a. Victor kãa dɛ, “Nna yennyi biribiara a yebotum egyina do akã dɛ ɔno ntsi yɛremmba. Osiandɛ nna yɛama hɛn asetsena aba famu ntsi, yɛgyee nsato no too mu.” Ɔwɔ mu dɛ, nna Caroline n’apɔwmudzen nnyɛ dza odzi mũ dze, naaso wosii gyinae dɛ wobotu akɔ.

Victor nye Caroline soom dɛ daa akwampaaefo ama woeetum aboa nyimpa akomapafo pii a wɔpɛ dɛ wosũa Bible no. Nna woesie sika a wobotum dze ahwɛ hɔnho mber kakra. Mber bi ekyir no, wɔkɔr Canada kɛyɛɛ edwuma abosoom kakra, na ɔno boaa hɔn ma wotumii sanee kɔr Cameroon. Ebɛn nhyira na woenya? Wɔakɔ Ahendzi Asɛmpakafo Skuul, woetum asom dɛ akwampaaefo etsitsir na seseiara wɔboa ma wosisi asafo adan. Victor kãa dɛ, “Asetsena pa a nna yɛwɔ mu a yɛdze bɔɔ afɔr no ama yeenya Jehovah no mboa pii.”

Afe 2002 no, nna Alain kɔ skuulpɔn wɔ Germany. Ɔkenkaan krataaba a wɔato dzin Mmabun​—Dɛn Na Mode Mo Asetena Bɛyɛ? Dza ɔkenkanee no kaa no ma ɔsesaa botae a nna osi n’enyiwa do no. Afe 2006 no, ɔkɔr Asomfo Ntsetsee Skuul na wɔdze no kɔr Cameroon, ne man mu dɛ ɔnkɔsom wɔ hɔ.

Alain kɔr Cameroon no, onyaa edwuma bi a nna ɔdze ne ber fã bɛyɛ. Ekyir yi, onyaa edwuma bi a nna akatua no wɔ sor. Naaso nna ɔhaw no dɛ edwuma no remma onntum nnyɛ pii wɔ asɛnka edwuma no mu. Ntsi ber a wɔtoo nsa frɛɛ no dɛ ɔnkɔsom dɛ ɔkwampaaefo tsitsir no, ɔammpopo ne tsir koraa. Alain n’edwumawura mpo kãa dɛ ɔbɔto n’akatua mu, naaso iyi amma ɔannsesa gyinae a nna oesi no. Ekyir yi, Alain waar Stéphanie a nna ɔno so dze mfe pii atsena France no. Stéphanie tui kɔr Cameroon ekyir no, ebɛn nsɛndzendzen na ohyiae?

Stéphanie kãa dɛ: “Mebaa Cameroon no, yarba nketsenketse bi hyɛɛ ase dɛ ɔrehaw me. Nna ndzɛmba pii so nnye mo honam nngye, naaso nna wɔhwɛ me ma minya ahotɔ.” Abotar a awarfo yi nyae dze gyinaa ɔhaw yi ano no maa wonyaa nhyira pii. Alain kãa dɛ: “Ber bi a yɛkɔr asɛnka wɔ ekuraase bi a wɔfrɛ hɔ Katé no, yenyaa nyimpa  pii a nna wɔwɔ ɔpɛ dɛ wobosũa Bible no. Ekyir yi nna yetum nye hɔn sũa adze wɔ fon do. Hɛn Bible esuafo no mu beenu bɔɔ esu na yetumii tseew kuw wɔ hɔ.” Stéphanie dze kaa ho dɛ: “Biribiara nnyi hɔ a ɔyɛ enyigye sen dɛ ebɔboa nkorɔfo ma woeehyira hɔnho do ama Jehovah. Som a yɛsom wɔ ha no ama yeenya enyigye a ɔtse dɛm mpɛn pii.” Sesei, Alain nye Stéphanie rosom wɔ ɔmansin edwuma no mu.

Gisèle bɔɔ esu ber a nna ɔrokɔ eduyɛ ho skuul wɔ Italy no. Hɔn a wɔnye Gisèle sũaa adze no, nna wɔyɛ akwampaaefo awarfo a wɔama hɔn asetsena aba famu, ntsi n’enyi gyee mbrɛ nna wɔama hɔn asetsena aba famu no ho. Nna ɔwɔ ɔpɛ dɛ ɔbɛyɛ pii wɔ asɛnka edwuma no mu, ntsi ber a wɔaka kakra ma oeewie skuul no, ɔbɛyɛɛ daa kwampaaefo.

Nna Gisèle pɛ dɛ ɔsan kɔ Cameroon mbrɛ ɔbɛyɛ a obotum dze ne ber pii asom Jehovah. Naaso, nna ɔwɔ ɔhaw kakra. Ɔkãa dɛ: “Wɔ mbra mu no ho kwan a nna mowɔ dɛ mutum tsena Italy no, nna ɔsɛ dɛ migyaa mu to hɔ. Afei so, nna menye m’ebusuafo nye m’anyɛnkofo a wɔwɔ Italy no ntamu bɛtsetsew.” Iyi nyina ekyir no, wɔ May 2016 no, Gisèle tui kɔr Cameroon. Mber bi ekyir no, ɔwaar Léonce, na Bethel a ɔwɔ Cameroon no nye hɔn susuu ho dɛ sɛ ɔbɛyɛ yie a, wontu nkɔ Ayos, kurow a wohia Ahendzi adawurbɔfo pii wɔ mu.

Nna Ayos asetsena tse dɛn? Gisèle kãa dɛ: “Mpɛn pii no, adapɛn dodow bi wɔ hɔ a, nna yennya enyinam kandzea, ntsi ɔyɛ a nna hɛn fon edundum. Musũaa mbrɛ wosi dze nyena sɔ gya noa edziban. Afei so, nna yɛkɛsaw nsu anafua ber a nyimpa pii nnyi nsu no ano. Sɛ yɛrokɔ a, yɛdze hɛn ndzɛmba gu wheelbarrow mu na yɛfa torchlight a yɛdze bɔhwɛ kwan mu.” Ebɛnadze na ɔboaa awarfo yi ma wotumii tsenaa hɔ? Gisèle kãa dɛ: “Jehovah no sunsum no boaa hɛn ma yetumii gyinaa mu. Afei so, yɛboaa hɛnho dɛ awarfo. Nkyii so, ebusuafo nye anyɛnkofo hyɛɛ hɛn nkuran na ɔtɔ da a nna wɔboa hɛn wɔ sika afamu.”

Ana Gisèle n’enyi agye dɛ ɔsanee kɔr ne man mu? Ɔkãa dɛ, “Nyew! M’enyi agye papaapa! Ahyɛse no, nna yehyia nsɛndzendzen na hɛn abaw mu tum bu, naaso ber a yetumii dzii dɛm ɔhaw ahorow yi do no, menye mo kun tsee nka dɛ dza nna ɔsɛ dɛ yɛyɛ ara na yɛyɛe no. Yɛwɔ Jehovah no mu ahotodo na yɛatwe abɛn no kɛse.” Léonce na Gisèle kɔr Ahendzi Asɛmpakafo Skuul na seseiara wɔrosom dɛ ber tsiabaa mu akwampaaefo etsitsir.

Afarfo a wotum pa nam pii no, wɔda akokodur edzi ɔmmfa ho nsɛndzendzen a wohyia no. Tse dɛ dɛm afarfo no, hɔn a wɔsan kɔ hɔn man mu no fi hɔn pɛ mu dze ndzɛmba ahorow bɔ afɔr ama woeetum aboa akomapafo a hɔn enyi gye Ahendzi asɛm no ho no. Dɛm adawurbɔfo a wɔyɛ edwumadzen yi, ekyingye biara nnyi ho dɛ Jehovah no werɛ rimmfir ɔdɔ a wɔada no edzi wɔ ne dzin ho no. (Neh. 5:19; Heb. 6:10) Sɛ etse amanandze na ɔman a ifi mu no wohia Ahendzi adawurbɔfo pii wɔ hɔ a, ana ibotum asan aba wo man mu? Sɛ eyɛ dɛm a, Jehovah behyira wo papaapa.​—Mbɛ. 10:22.