1. Ebɛn asɛm na yebotum ebisa hɛnho?

SƐ ƆYƐ na edwendwen nsɛm a obesisi daakye no ho a, ana ebɔ hũ? Dɛm nsɛm no mu bi nye ator som a wɔbɛsɛɛ no, Gog a ofi Magog a ɔbɔtow ahyɛ Nyankopɔn no nkorɔfo do, nye Har-Mageddon kõ no. Ana ibisa woho dɛ, ‘Sɛ dɛm aber no du a, ana mubotum ekura m’emudzi mu na meegyina nsɛm a ɔyɛ hũ a obesisi yi nyinara ano?’ Sɛ adwen biribi a ɔtse dɛm ho pɛn a, ɔnodze asɛm a Jesus kãe a ɔwɔ kyerɛwsɛm a adzesua yi gyina do no mu no bɔboa wo papaapa. Jesus kãa kyerɛɛ n’esuafo no dɛ: “Mma hom akoma nntutu: hom ngye Nyankopɔn ndzi, hom ngye mo so ndzi.” (John 14:1) Gyedzi a no mu yɛ dzen bɔboa hɛn ma yɛdze akokodur eegyina dza obesisi daakye no ano.

2. Yebesi dɛn ahyɛ hɛn gyedzi dzen, na ebɛnadze na yebosusu ho wɔ adzesua yi mu?

² Sɛ yesusu mbrɛ yesi yɛ hɛn adze wɔ nsɔhwɛ a yehyia no ndɛ no ho a, obotum ahyɛ hɛn gyedzi dzen ma yeegyina nsɔhwɛ a yebehyia no daakye no ano. Sɛ yɛyɛ dɛm a, yebohu mbea ahorow wɔ hɛn asetsena mu a ɔwɔ dɛ yenya gyedzi kɛse. Nsɔhwɛ biara a yebotum egyina ano no bɛma hɛn gyedzi ayɛ dzen. Iyi bɔboa hɛn ma yeetum egyina nsɔhwɛ ano daakye. Adzesua yi mu no, yɛbɔhwɛ tsebea ahorow anan bi a Jesus n’esuafo no hyiae a ɔmaa ɔdaa edzi dɛ nna wohia gyedzi kɛse. Iyi da nkyɛn a, yɛbɔhwɛ mbrɛ yebesi egyina nsɛndzendzen a ɔtse dɛm ano ndɛ nye mbrɛ obesi esiesie hɛn ama nsɔhwɛ a yebehyia no daakye no.

3. Dɛ mbrɛ wɔakã wɔ Matthew 6:30, 33 no, ebɛn gyedzi ho asɛm na Jesus maa no mu daa hɔ?

³ Ebusua tsir biara pɛ dɛ ɔma n’ebusua dza wobedzi, dza wɔbɛhyɛ nye beebi a wɔbɛda, na ɔyɛ no kwan do. Naaso dɛm mber  bɔn yi mu no, ɔnnyɛ aber nyina na iyi ne yɛ da famu. Dɛ nhwɛdo no, hɛn nuanom binom ahwer hɔn edwuma. Wɔayɛ dza wobotum biara, naaso wonnyaa edwuma fofor. Hɔn mu bi so apow ndwuma ahorow bi a Christianfo runntum nnyɛ. Wɔ tsebea yi nyina mu no, ɔwɔ dɛ yenya gyedzi a no mu yɛ dzen dɛ Jehovah bɔhwɛ ma hɛn ebusua nsa aaka dza yehia. Jesus kyerɛkyerɛɛ dɛm asɛm yi mu kofee kyerɛɛ n’esuafo no wɔ ne Bepɔw do Asɛnka no mu. (Kenkan Matthew 6:30, 33.) Sɛ yɛgye dzi ankasa dɛ Jehovah nnkeyi hɛn tokyen a, yebotum ahwehwɛ Ahenman no nye tsenenee kan. Sɛ yehu mbrɛ Jehovah si boa hɛn ma hɛn nsa ka hɛn honam afamu ndzɛmba a, yebohu dɛ ɔwɔ hɔ ankasa, na iyi bɛhyɛ hɛn gyedzi dzen.

4-5. Ebɛnadze na ɔboaa ebusua bi a nna hɔn honam afamu ehiadze ayɛ hɔn dadwen no?

⁴ Hom mma yɛnhwɛ mbrɛ Jehovah sii boaa ebusua bi a wɔwɔ Venezuela ber a nna hɔn ehiadze ayɛ hɔn dadwen no. Wɔfrɛ dɛm ebusua yi Castro. Mber bi mu no, nna wɔyɛ ekuadwuma wɔ hɔn ankasa hɔn asaase do, na wɔdze sika a wonya no hwɛ hɔnho. Naaso, nsɛmbɔndzifo bi a wokitsakitsa akodze kɛgyee hɔn asaase no fii hɔn nsamu. Wɔfrɛ ebusua tsir no Miguel. Ɔkãa dɛ: “Seseiara, obi n’asaase ketseaba bi na yɛakɛserɛ a yɛyɛ ekuadwuma wɔ do. Anapa biara, mobɔ Jehovah mpaa dɛ ɔmma hɛn dza yebehia wɔ da no mu.” Ɔwɔ mu dɛ asetsena mu yɛ dzen ma Castro ebusua yi, naaso wɔwɔ gyedzi kɛse paa wɔ hɛn sor Egya a ɔwɔ ɔdɔ no mu dɛ ɔbɛma hɔn nsa aka hɔn daa daa ehiadze. Dɛm ntsi, ebusua yi mma asafo nhyiamu mmpa hɔn tsir do, na wɔkɔ asɛnka so daa. Wɔdze Ahendzi ho ndzɛmba dzi kan, na Jehovah dze hɔn ehiadze ma hɔn.

⁵ Miguel na ne yer Yurai dze hɔn adwen esi mbrɛ Jehovah esi ahwɛ hɔn no do wɔ mber a no mu yɛ dzen yi mu. Ɔtɔ da a, Jehovah nam hɔn nuanom agyedzifo do ma wonya ndzɛmba a wohia no bi. Ɔtɔ da so a wɔboa Miguel ma onya edwuma bi yɛ. Mber afofor bi mu so, Jehovah nam atoyerɛnkyɛm ber mu mboa a Bethel dze ma no do ma ebusua yi hɔn nsa ka ndzɛmba bi a wohia. Jehovah ennyi hɔn tokyen da. Iyi ama ebusua no hɔn gyedzi ayɛ kɛse. Hɔn babaa panyin a wɔfrɛ no Yoseline kãa tsebea bi a wɔkɔr mu a Jehovah boaa hɔn no ho asɛm. Ɔno ekyir no ɔdze kaa ho dɛ: “Sɛ mohwɛ mbrɛ Jehovah sii boaa hɛn no a, ɔhyɛ me nkuran papaapa. Muhu Jehovah dɛ me nyɛnko a mubotum dze moho ato no do.” Yoseline dze kaa ho dɛ: “Nsɔhwɛ a hɛn ebusua no afa mu no esiesie hɛn yie ama nsɔhwɛ akɛse a yebehyia daakye no.”

6. Sɛ irihyia sikasɛm mu ahokyer a, ibesi dɛn enya gyedzi kɛse?

⁶ Ana irihyia sikasɛm mu ahokyer? Sɛ dɛm a, ɔkyerɛ dɛ asetsena mu ayɛ dzen ama wo. Naaso, ɔmmfa ho dɛ asetsena mu ayɛ dzen ama wo no, ibotum dze mber a ewɔ mu yi ahyɛ wo gyedzi mu dzen. Bɔ mpaa na kenkan asɛm a Jesus kãe wɔ Matthew 6:25-34 no, na dwendwen ho. Enuanom binom a wɔwɔ hɔ ndɛ hɔn suahu ma yehu dɛ, Jehovah dze hɔn a wɔyɛ pii wɔ no  som mu no hɔn ehiadze ma hɔn. Ibotum agye ber na aadwendwen iyi ho. (1 Cor. 15:58) Sɛ eyɛ dɛm a, ibenya ahotodo kɛse dɛ, dɛ mbrɛ wo sor Egya no aboa dɛm enuanom yi no, ɔbɔboa wo so. Onyim dza ihia, na onyim mbrɛ obesi ama wo nsa aaka. Sɛ ihu mbrɛ Jehovah si boa wo wɔ w’asetsena mu no a, wo gyedzi bɛyɛ kɛse ma eetum egyina nsɔhwɛ akɛse a ibehyia daakye no ano.​—Hab. 3:17, 18.

7. Dɛ mbrɛ Matthew 8:23-26 kyerɛ no, ebɛn kwan do na “ehum kɛse bi” sɔɔ esuafo no hɔn gyedzi hwɛe?

⁷ Aber a ehum kɛse bi bɔɔ Jesus nye n’esuafo no wɔ po do no, Jesus dze dza osii no boaa esuafo no ma wohun beebi a ɔwɔ dɛ wonya gyedzi kɛse. (Kenkan Matthew 8:23-26.) Nna ehum no ano yɛ dzen araa ma asorɛkye a obui no dze nsu baa hɛmba no mu. Naaso dɛm aber no, nna Jesus hyɛ beebi ada hatsee. Aber a Jesus n’esuafo a wɔabɔ hũ no nyaan no fii nda mu na wɔkãa kyerɛɛ no dɛ ɔngye hɔn no, Ewuradze kãa kyerɛɛ hɔn dɛ: “Ebɛnadze ntsi na hom yɛ ehufo, hom a hom gyedzi suar?” Nkyɛ ɔwɔ dɛ esuafo a wɔabɔ hũ no nya gyedzi dɛ Jehovah botum abɔ Jesus nye hɔn a wɔka noho no hɔnho ban amma hweeara annyɛ hɔn. Esuadze a ɔwɔ mu ma hɛn nye dɛn? Gyedzi a no mu yɛ dzen botum aboa hɛn ma yeegyina tsebea biara ano, dɛ ɔyɛ “ehum kɛse” ankasa anaa ɔhaw kɛse bi.

8-9. Ebɛn kwan do na Anel hyiaa ne gyedzi ho nsɔhwɛ, na ebɛnadze na ɔboaa no?

⁸ Hom mma yensusu hɛn akyerɛbaa sigyanyi bi a wɔfrɛ no Anel a ɔwɔ Puerto Rico n’asɛm no ho. Ogyinaa nsɔhwɛ kɛse bi ano, na ɔno boaa no ma ne gyedzi yɛɛ dzen. Nna no nsɔhwɛ no yɛ “ehum kɛse” ankasa. Anel no nsɔhwɛ no hyɛɛ ase wɔ afe 2017 ber a ehum kɛse bi a wɔfrɛ no Hurricane Maria sɛɛ ne fie no. Afei so, ehum no maa n’edwuma fii ne nsa. Anel kãa dɛ: “Mber a no mu yɛ dzen a ɔtse dɛm mu no, dadwen hyɛɛ mo do. Naaso mubohun dɛ ɔwɔ dɛ mobɔ mpaa na medze moho to Jehovah do, na onnyi dɛ mema dadwen no hyɛ mo do.”

⁹ Anel kãa biribi fofor so a ɔboaa no ma otumii gyinaa no nsɔhwɛ no ano. Ɔno nye setsie a ɔyɛe no. Ɔkãa dɛ: “Akwankyerɛ a asafo no dze mae a medze yɛɛ edwuma no maa m’akoma tɔɔ me yamu. Jehovah nam enuanom do boaa me. Wɔhyɛɛ me nkuran na wɔmaa me nsa kaa m’ehiadze.” Ɔtoaa do dɛ: “Jehovah maa me nsa kaa dza mihia no ma ɔboor do, na iyi hyɛɛ me gyedzi dzen papaapa.”

10. Sɛ ihyia “ehum kɛse” bi wɔ w’asetsena mu a, ebɛnadze na ibotum ayɛ?

¹⁰ Aso irihyia “ehum kɛse” bi wɔ w’asetsena mu? Bi a osian atoyerɛnkyɛm ntsi irihyia sikasɛm mu ahokyer. Anaadɛ obotum ayɛ ɔhaw bi a ɔtse dɛ ehum. Bi a yarba bi a no mu yɛ dzen abɔ wo ma eretseetsee anaa innhu dza ennyɛ mpo. Ɔtɔ da a, dadwen botum ahyɛ wo do, naaso onnyi dɛ ema ɔno siw wo kwan dɛ edze woho bɔto Jehovah do. Bɔ no mpaa dzendzenndzen na twe bɛn no. Hyɛ wo gyedzi mu dzen na dwendwen mboa a Jehovah dze  maa wo mber bi a etwa mu no ho. (Ndw. 77:11, 12) Ibotum enya ahotodo dɛ orinngyaa wo ndɛ, na orinngyaa wo ɔkyena so.

11. Ebɛnadze ntsi na ɔwɔ dɛ yesi hɛn bo dɛ yɛbɛyɛ setsie ama hɔn a wodzi ndzɛmba enyim no?

¹¹ Ebɛnadze fofor bio na obotum aboa wo ma eegyina nsɔhwɛ ano? Dɛ mbrɛ Anel kãe no, ɔyɛ setsie a ebɛyɛ no. Hɔn a Jehovah na Jesus wɔ hɔn mu ahotodo no, ɔwɔ dɛ woara so inya hɔn mu ahotodo. Ɔtɔ da a, hɔn a wɔapaw hɔn dɛ wondzi ndzɛmba enyim no dze akwankyerɛ bi bɛma a yɛbɛtse nka dɛ ntseasee nnyi mu. Naaso, sɛ yɛyɛ setsie a, Jehovah behyira hɛn. Bible no na Jehovah n’asomfo anokwafo hɔn nhwɛdo ahorow ma yehu dɛ, sɛ yɛyɛ setsie a, Jehovah bɛgye hɛn nkwa. (Ex. 14:1-4; 2 Mber. 20:17) Ɔwɔ dɛ yɛdwendwen nhwɛdo ahorow a ɔtse dɛm ho. Sɛ yɛyɛ dɛm a, hɛn bo a yeesi dɛ yɛbɛyɛ setsie ama asafo akwankyerɛ ndɛ na daakye no, yɛbɛhyɛ mu dzen. (Heb. 13:17) Iyi bɔboa hɛn ma yɛdze akokodur eegyina ehum kɛse a ɔnnkɛkyɛr obotu no ano.​—Mbɛ. 3:25.

12. Dɛ mbrɛ Luke 18:1-8 ma yehu no, sɛ wɔnye hɛn enndzi no yie a, ebɛnadze na yebotum ayɛ dze akyerɛ dɛ yɛwɔ gyedzi?

¹² Nna Jesus nyim dɛ, sɛ wɔnye n’esuafo no enndzi no yie a, obotum asɔ hɔn gyedzi ahwɛ. Ɔyɛɛ mfatoho bi dze boaa hɔn ma wohun mbrɛ wobesi egyina tsebea a ɔtse dɛm ano. Wɔayɛ dɛm mfatoho no ho kyerɛwtohɔ wɔ Luke nwoma no mu. Jesus kãe wɔ mfatoho no mu dɛ, okunafo bi kɔr do serɛɛ ɔtsɛmbuafo a ɔnntsen bi dɛ ondzi n’asɛm mma no. Nna ɔwɔ ahotodo dɛ sɛ ɔkɔ do ara serɛ ɔtsɛmbuafo no a, ɔbɔboa no. Ewiei koraa no, ɔtɛmbuafo no tsiee okunafo no no ntotɔserɛ no. Esuadze a ɔwɔ mu nye dɛn? Jehovah dze ɔtsen. Dɛm ntsi Jesus kãa dɛ, ana “Nyankopɔn nnkedzi ama ne mpamufo a wosũ frɛ no adzekyee nye adzesaa” no? (Kenkan Luke 18:1-8.) Afei Jesus toaa do dɛ: “Sɛ nyimpa Ba no ba a, obohu gyedzi [a ɔtse dɛm] wɔ asaase do anaa?” Sɛ wɔnye hɛn enndzi no yie a, ɔwɔ dɛ yenya abotar na yɛkɔ do ara dze hɛn ehiadze to Jehovah n’enyim dze kyerɛ dɛ yɛwɔ gyedzi kɛse tse dɛ okunafo no. Sɛ yɛwɔ gyedzi a ɔtse dɛm a, yebotum enya ahotodo dɛ ɔnnkɛkyɛr Jehovah bedzi hɛn asɛm ama hɛn. Afei so, ɔwɔ dɛ yenya gyedzi dɛ mpaabɔ wɔ tum. Ɔtɔ da a, Jehovah bobua hɛn mpaabɔ wɔ akwan ahorow bi do a hɛn enyi nnda.

13. Ebɛn kwan do na mpaabɔ boaa ebusua bi ber a wɔnye hɔn enndzi no yie no?

¹³ Hom mma yɛnhwɛ asɛm a ɔtoo akyerɛbaa bi a wɔfrɛ no Vero a ɔwɔ Democratic Republic of the Congo. Nsordaafo kuw bi kɔtowee hyɛɛ kurow a nna Vero, no kun a ɔnnyɛ Ɔdasefo nye hɔn babaa a oedzi mfe 15 wɔ mu no do, ntsi nna ɔwɔ dɛ woguan fi hɔ. Wɔrokɔ no, wɔkɔtoo nsordaafo no bi dɛ wogyinagyina kwan no mu na wɔkãa dɛ woboku hɔn. Aber a wɔkãa dɛm no ara na Vero hyɛɛ ase dɛ orusu, naaso ne babaa no kaa n’akoma too ne yamu na ɔbɔɔ mpaa ma opuee n’ano. Ɔkɔr do bɔɔ Jehovah  ne dzin wɔ ne mpaabɔ no mu. Aber a ɔbɔɔ mpaa no wiei no, sordaanyi panyin no bisaa no dɛ, “Basiaba, woana na ɔkyerɛɛ wo mpaa bɔ?” Oyii no ano dɛ, “Me maame a; ɔdze mpaabɔ ho nhwɛdo a ɔwɔ Matthew 6:9-13 no na ɔdze kyerɛɛ me.” Panyin no kãa dɛ, “Basiaba, enye w’awofo nkɔ asomdwee mu, na Jehovah wo Nyankopɔn no mbɔ woho ban!”

14. Ebɛnadze na obotum asɔ hɛn gyedzi ahwɛ, na ebɛnadze na ɔbɔboa hɛn ma yeetum egyina ano?

¹⁴ Nsɛm a ɔtsetse dɛm no ma yehu dɛ ɔnnsɛ dɛ yɛdze mpaabɔ dzi agor koraa. Naaso sɛ Jehovah emmbua wo mpaabɔ no amonmu hɔ ara, anaa oemmbua no wɔ anwanwa kwan do ɛ? Sɛ ɔba no dɛm a, kɔ do ara bɔ mpaa dɛ mbrɛ okunafo a ɔwɔ Jesus ne mfatoho no mu no yɛe no, na nya ahotodo dɛ Nyankopɔn rinnyi wo tokyen, na ber a ɔsɛ mu no obobua wo mpaabɔ no wɔ kwan bi do. Kɔ do serɛ Jehovah dɛ ɔmfa no sunsum krɔnkrɔn no mboa wo. (Phil. 4:13) Ma ɔntsena w’adwen mu dɛ ɔnnkɛkyɛr Jehovah behyira wo kɛsenara ma ennkɛkaa ɔhaw biara a ihyiae no. Sɛ Jehovah boa wo ma edze nokwardzi gyina nsɔhwɛ biara ano a, ɔno bɛhyɛ wo dzen ma eetum egyina nsɔhwɛ a ibehyia no daakye no ano.​—1 Pet. 1:6, 7.

15. Dɛ mbrɛ Matthew 17:19, 20 kyerɛ no, ebɛn nsɛndzendzen na Jesus n’esuafo no hyiae?

¹⁵ Jesus kyerɛkyerɛɛ n’esuafo no dɛ gyedzi bɔboa hɔn ma woeegyina nsɛndzendzen ano. (Kenkan Matthew 17:19, 20.) Ɔwɔ mu dɛ nna esuafo no etum etutu esunsum fĩ mber bi mu dze, naaso dɛm aber yi dze woenntum. Ebɛnadze ntsi a? Jesus maa wohun dɛ hɔn gyedzi suar ntsi a. Ɔkãa kyerɛɛ hɔn dɛ sɛ wɔwɔ gyedzi kɛse a, nkyɛ wobotum etutu ɔhaw a ɔtse dɛ nkokwaa! Ndɛ, bi a hɛn so yebehyia nsɛndzendzen a ɔtse dɛ mbrɛ yerunntum nnyɛ ho hwee.

16. Ebɛn kwan do na gyedzi boaa Geydi ma ogyinaa awerɛhosɛm a ɔtoo no no ano?

¹⁶ Hom mma yensusu akyerɛbaa bi a wɔfrɛ no Geydi a ɔwɔ Guatemala n’asɛm no ho. Nsɛmbɔndzifo bi kum no kun Edi yayaayaw aber a nna wɔapon asafo nhyiamu ma wɔrokɔ fie no. Ebɛn kwan do na gyedzi a Geydi wɔ no aboa no ma oetum egyina awerɛhosɛm yi ano? Ɔkãa dɛ: “Mpaabɔ boa me ma motow me dadwen nyinara kyen Jehovah do, na iyi ma m’asomu dwe me. Sɛ mohwɛ mbrɛ Jehovah nam m’ebusua nye enuanom a wɔwɔ asafo no mu no do boa me no a muhu dɛ ɔdwen moho. Meyɛ pii wɔ Jehovah no som mu, na iyi ma miyi m’adwen fi yaw no do. Afei ɔboa me ma medze m’adwen si dza mubotum ayɛ no da biara no do, na monndwen dza obesi daakye no ho nnhaw mo ho. Dza mafa mu yi ama mehu dɛ, nsɔhwɛ biara a mibehyia no daakye no Jehovah, Jesus, nye ahyehyɛdze no bɔboa me ma meetum egyina ano.”

17. Sɛ yehyia ɔhaw bi a ɔtse dɛ kokwaa a, ebɛnadze na yebotum ayɛ?

¹⁷ Ana wo dɔfo bi ewu ma iridzi ho awerɛhow? Sɛ dɛm a, gye ber kenkan Bible mu kyerɛwtohɔ a ɔfa nyimpa binom a wonyaan hɔn fii owu  mu no ho. Yɛ dɛm fa hyɛ gyedzi a ewɔ wɔ owusoɛr no mu no dzen. Ana wo busuanyi bi a woetu no efi asafo no mu ntsi iridzi awerɛhow? Sũa adze mbrɛ ɔbɛyɛ a wankasa bohu dɛ kwan a Nyankopɔn fa do dze ntsẽa ma no ye aber nyina. Ɔhaw biara a irihyia no, bu no dɛ ɔyɛ ho kwan a edze bɛhyɛ wo gyedzi mu dzen. Fi w’akoma mu kã dza ɔhaw wo no ho asɛm kyerɛ Jehovah. Mma nntsew woho mmfi wo nuanom ho, mbom enye hɔn mbɔ dzendzenndzen. (Mbɛ. 18:1) Fa woho hyɛ dwumadzi ahorow a ɔbɔboa wo ma eegyina wo tsebea no ano no mu, sɛ dɛm a ebɛyɛ no bɛma esu anaa edzi awerɛhow mpo a. (Ndw. 126:5, 6) Kɔ do kɔ asafo nhyiamu nye asɛnka, na kenkan Bible no dabaa. Afei so kɔ do dwendwen nhyira a Jehovah abɔ anohoba dɛ ɔdze bɛma wo daakye no ho. Sɛ ihu dɛ Jehovah roboa wo ma eegyina wo haw no ano a, gyedzi a ewɔ wɔ no mu no bɛyɛ kɛse.

18. Sɛ ihu dɛ wo gyedzi yɛ mberɛw a, ebɛnadze na ibotum ayɛ?

¹⁸ Sɛ nsɔhwɛ bi a ihyiae anaa irihyia no sesei no ama ada edzi dɛ wo gyedzi yɛ mberɛw a, mma w’abaw mu mmbu. Bu no dɛ ɔyɛ ho kwan a edze bɛhyɛ wo gyedzi mu dzen. Asomafo no serɛɛ Jesus dɛ: “To hɛn gyedzi mu.” Hɛn so yebotum ayɛ biribi a ɔtse dɛm. (Luke 17:5) Afei, dwendwen nhwɛdo a enuanom a yɛakã hɔnho asɛm wɔ adzesua yi mu no yɛe no ho. Tse dɛ Miguel na Yurai no, aber biara a Jehovah bɔboa hɛn no, ɔnnsɛ dɛ yɛma hɛn werɛ fir. Dɛ mbrɛ Vero ne babaa no na Anel yɛe no, ɔsɛ dɛ yɛbɔ Jehovah mpaa dzendzenndzen, tsitsir ber a yerihyia nsɛndzendzen no. Na dɛ mbrɛ Geydi yɛe no, ɔsɛ dɛ yehu dɛ Jehovah botum afa hɛn ebusuafo anaa enuanom do dze mboa a yehia no ama hɛn. Sɛ yɛma Jehovah kwan ma ɔboa hɛn ma yegyina nsɔhwɛ a yerihyia no ndɛ no ano a, ɔno bɛma yenya ahotodo kɛse dɛ ɔbɔboa hɛn ma yeegyina nsɔhwɛ a yebehyia no daakye no ano.

19. Nna ebɛn ahotodo na Jesus wɔ, na ebɛn ahotodo na hɛn so yebotum enya?

¹⁹ Jesus maa n’esuafo no hun mbea ahorow wɔ hɔn asetsena mu a nna wohia gyedzi kɛse. Naaso nna ɔgye dzi dɛ Jehovah bɔboa hɔn ma woeetum egyina nsɔhwɛ a wobehyia no daakye no ano. (John 14:1; 16:33) Nna ɔwɔ ahotodo dɛ gyedzi kɛse a nyimpadodow kɛse bi wɔ no bɛma woenya nkwa wɔ ahohiahia kɛse a ɔreba no mu. (Nyi. 7:9, 14) Ana ebɛka dɛm nyimpadodow kɛse no ho? Sɛ edze ho kwan biara a ibenya no ndɛ no hyɛ wo gyedzi mu dzen a, Jehovah bɔboa wo ma eetum aka hɔnho!​—Heb. 10:39.