ADZESUA ASƐM 45
Dza Jehovah Yɛ Dze Boa Hɛn Ma Yɛyɛ Asɛnka Edwuma No
“Wobohu ara dɛ [saana] nkɔnhyɛnyi bi aba hɔn mu.”—EZEK. 2:5.
NDWOM 67 “Ka Asɛm No”
DZA YERUBOSUSU HO a
1. Sɛ yɛreyɛ asɛnka edwuma no a, ebɛnadze na ɔsɛ dɛ yɛhwɛ kwan, na ebɛn awerɛhyɛmu na ɔsɛ dɛ yenya?
SƐ YƐREYƐ asɛnka edwuma no a, ɔsɛ dɛ yɛhwɛ kwan dɛ nkorɔfo bɔsoɛr etsia hɛn. Obotum aba dɛ daakye yebehyia dza ɔkyɛn dɛm mpo. (Dan. 11:44; 2 Tim. 3:12; Nyi. 16:21) Naaso, ɔsɛ dɛ yenya awerɛhyɛmu dɛ Jehovah bɔboa hɛn. Ebɛnadze ntsi na ɔsɛ dɛ yenya awerɛhyɛmu a ɔtse dɛm? Siantsir nye dɛ, ofi tsetse nyina Jehovah boa n’asomfo ma wotum yɛ edwuma a ɔdze hyɛ hɔn nsa no. Sɛ edwuma no yɛ dzen mpo a, ɔboa hɔn ma wotum yɛ. Dɛ nhwɛdo no, hom mma yɛnhwɛ nsɛm bi a osisii wɔ nkɔnhyɛnyi Ezekiel n’asetsena mu. Ezekiel kaa asɛm no kyerɛɛ Jewfo a nna wɔwɔ ndɔmmumfa mu wɔ Babylon no.
2. Jehovah kaa dɛn faa hɔn a nna ɔsɛ dɛ Ezekiel ka asɛm no kyerɛ hɔn no ho, na ebɛnadze na yebosusu ho wɔ adzesua yi mu? (Ezekiel 2:3-6)
2 Nna woananom na ɔsɛ dɛ Ezekiel ka asɛm no kyerɛ hɔn? Jehovah kaa hɔnho asɛm dɛ wɔyɛ “enyiammbɔho,” “akomadzen” nye “etuatsewfo.” Nna wɔtse dɛ nsoɛ na hɔnho yɛ hu dɛ nyankomaketsembowa (scorpions). Ɔnnyɛ nwanwa dɛ Jehovah kaa kyerɛɛ Ezekiel mpɛn pii dɛ: “Mma nnsuro”! (Kenkan Ezekiel 2:3-6.) Ezekiel tumii yɛɛ edwuma a nna ɔhyɛ ne nsa no osiandɛ (1) Jehovah na ɔsomaa no, (2) Nyankopɔn no sunsum krɔnkrɔn no hyɛɛ no dzen na (3) Nyankopɔn ne nsɛm hyɛɛ ne gyedzi dzen. Ebɛn kwan do na dɛm ndzɛmba ebiasa yi boaa Ezekiel? Ebɛn kwan do na ɔboa hɛn so ndɛ? Yebosusu iyinom ho wɔ adzesua yi mu.
JEHOVAH NA ƆSOMAA EZEKIEL
3. Ebɛn asɛm na Jehovah kae a bi a ɔhyɛɛ Ezekiel nkuran, na ebɛn kwan do na Jehovah maa ohun dɛ ɔka noho?
3 Jehovah kaa kyerɛɛ Ezekiel dɛ: “Morosoma wo.” (Ezek. 2:3, 4) Obotum aba dɛ dɛm asɛm yi hyɛɛ Ezekiel nkuran paa. Ebɛnadze ntsi a? Aber a Jehovah somaa Moses na Isaiah dɛ no nkɔnhyɛfo no, dɛm asɛm kor yi ara na ɔkaa kyerɛɛ hɔn. Ɔda edzi dɛ Ezekiel kaa dɛm asɛm yi. (Ex. 3:10; Isa. 6:8) Afei so, nna Ezekiel nyim dza Jehovah yɛe dze boaa dɛm nkɔnhyɛfo yi ma wotumii yɛɛ dwumadzi a ɔyɛ dzen a ɔdze hyehyɛɛ hɔn nsa no. Ntsi aber a Jehovah kaa kyerɛɛ Ezekiel mpɛn ebien dɛ: “Morosoma wo” no, nna ɔwɔ awerɛhyɛmu dɛ Jehovah bɔboa no. Sɛ dza yɛaka ho asɛm yi da nkyɛn a, yehu asɛm ‘Jehovah n’asɛm baa mo hɔ’ mpɛn pii wɔ Ezekiel no nwoma no mu. (Ezek. 3:16) Yɛsan hu asɛm ‘Jehovah n’asɛm baa mo hɔ bio’ so mpɛn pii. (Ezek. 12:26) Ɔda edzi dɛ Ezekiel nyaa awerɛhyɛmu dɛ Jehovah na ɔasoma no. Afei so, nna Ezekiel ne papa yɛ ɔsɔfo. Ntsi obotum aba dɛ ɔkyerɛkyerɛɛ no ma ohun dɛ ofi tsetse nyina Jehovah ma no nkɔnhyɛfo nya awerɛhyɛmu dɛ ɔtaa hɔn ekyir. Isaac na Jacob nyina Jehovah kaa kyerɛɛ hɔn mu biara dɛ: “Menye wo nam.” Dɛmara so na ɔkaa kyerɛɛ Jeremiah dɛ: “Mowɔ wo nkyɛn.”—Gen. 26:24; 28:15; Jer. 1:8.
4. Ebɛn awerɛkyekyesɛm na Jehovah kaa kyerɛɛ Ezekiel dze hyɛɛ no nkuran ma ɔyɛɛ no som edwuma no?
4 Nna Israelfo piinara bɛyɛ hɔn adze dɛn wɔ nsɛm a Ezekiel reka no ho? Jehovah kaa kyerɛɛ Ezekiel dɛ: ‘Israel fifo dze, worinntsie wo, osiandɛ wɔmmpɛ dɛ wotsie me.’ (Ezek. 3:7) Sɛ Israelfo no enntsie Ezekiel a, nna ɔkyerɛ dɛ woenntsie Jehovah nankasa. Dɛm nsɛm yi maa Ezekiel nyaa awerɛhyɛmu dɛ sɛ Israelfo no enntsie no mpo a, ɔnnkyerɛ dɛ oenntum annyɛ n’edwuma dɛ nkɔnhyɛnyi. Jehovah sanee maa Ezekiel awerɛhyɛmu dɛ sɛ atsɛmbusɛm a ɔreka no ba mu a, Israelfo no ‘bohu ara dɛ saana nkɔnhyɛnyi bi aba hɔn mu’ pɛn. (Ezek. 2:5; 33:33) Ɔda edzi dɛ dɛm nsɛm yi kyekyee Ezekiel no werɛ na ɔhyɛɛ no nkuran ma ɔyɛɛ no som edwuma no.
JEHOVAH NA ƆASOMA HƐN NDƐ
Dɛ mbrɛ wɔdze yɛɛ Ezekiel no, obotum aba dɛ nkorɔfo bɔsoɛr etsia hɛn anaa worinntsie hɛn, naaso yenyim dɛ Jehovah taa hɛn ekyir (Hwɛ nkyekyɛmu 5-6)
5. Dɛ mbrɛ Isaiah 44:8 kyerɛ no, ebɛnadze na ɔhyɛ hɛn dzen?
5 Hɛn so yenyim dɛ Jehovah na ɔasoma hɛn, na iyi hyɛ hɛn dzen. Jehovah edzi hɛn nyi dɛ ɔfrɛ hɛn ‘n’adasefo.’ (Isa. 43:10) Hwɛ hokwan kɛse ara a ɔtse dɛm! Dɛ mbrɛ Jehovah kaa kyerɛɛ Ezekiel dɛ: “Mma nnsuro” no, dɛmara na ɔka kyerɛ hɛn so dɛ: “Mma hom nnsuro.” Ebɛnadze ntsi na ɔnnsɛ dɛ yesuro hɔn a wɔsoɛr tsia hɛn no koraa? Siantsir nye dɛ, hɛn so Jehovah na ɔasoma hɛn na ɔtaa hɛn ekyir dɛ mbrɛ ɔyɛe maa Ezekiel no.—Kenkan Isaiah 44:8.
6. (a) Ebɛn asɛm na Jehovah aka a ɔma yehu dɛ ɔbɔboa hɛn? (b) Ebɛnadze na ɔhyɛ hɛn nkuran na ɔkyekye hɛn werɛ?
6 Jehovah ma hɛn awerɛhyɛmu dɛ ɔbɔboa hɛn aber biara. Dɛ nhwɛdo no, ansaana Jehovah rebɛka dɛ: “Hom nye m’adasefo” no, nna oedzi kan aka dɛ: ‘Sɛ irutwa esu a, menye wo nam; sɛ efa esutsen mu a, ɔremmfa wo: sɛ enam ogya mu a, ennkɛhyew; eso ogyaframee rennhyew wo.’ (Isa. 43:2) Ɔtɔfabi a, yehyia nsɛndzendzen a ɔtse dɛ esutsen nye ɔsoɛrtsia a ɔtse dɛ ogya wɔ asɛnka mu. Naaso osiandɛ Jehovah boa hɛn ntsi yɛkɔ do yɛ asɛnka edwuma no. (Isa. 41:13) Dɛ mbrɛ nyimpa pii enntsie Ezekiel n’asɛm no, ndɛ so nyimpa pii nntsie asɛm a yɛka no. Ɔsɛ dɛ yɛkaa dɛ sɛ nkorɔfo enntsie asɛm a yɛka no mpo a, ɔno nnkyerɛ dɛ yɛannyɛ hɛn edwuma yie dɛ Nyankopɔn n’Adasefo. Yenyim dɛ sɛ yɛkɔ do dze nokwardzi ka asɛmpa no a, Jehovah bɛgye hɛn ato mu. Iyi kyekye hɛn werɛ na ɔhyɛ hɛn dzen. Ɔsomafo Paul kaa dɛ: ‘Obiara benya nankasa n’akatua dɛ mbrɛ nankasa n’edwuma tse.’ (1 Cor. 3:8; 4:1, 2) Akyerɛbaa bi a ɔdze mfe pii asom dɛ kwampaafo kaa dɛ: “Sɛ ɔyɛ na mekaa dɛ Jehovah hyira mbɔdzen a yɛbɔ no do a, ɔma m’enyi gye paa.”
NYANKOPƆN NO SUNSUM KRƆNKRƆN NO HYƐƐ EZEKIEL DZEN
Ezekiel hun Jehovah no sor tseaseanam no wɔ enyido-adzehu mu. Dza ohunii no maa ɔgyee dzii paa dɛ Jehovah bɔboa no ma oeewie no som edwuma no (Hwɛ nkyekyɛmu 7)
7. Aber biara a nna Ezekiel bɔdwendwen enyido-adzehu a onyae no ho no, nna ɔboa no dɛn? (Hwɛ mfonyin a ɔwɔ Ɔweɔn-Aban yi enyim no.)
7 Ezekiel hun dɛ tum kɛse wɔ Nyankopɔn no sunsum krɔnkrɔn no mu. Onyaa enyido-adzehu bi na ohun dɛ sunsum krɔnkrɔn no roboa abɔfo bi a wɔwɔ tum, na oripia Nyankopɔn no sor tseaseanam no. (Ezek. 1:20, 21) Aber a Ezekiel nyaa enyido-adzehu no, ɔyɛɛ n’adze dɛn? Ɔkaa dɛ: “Muhunii no, medze m’enyi bɔɔ famu.” Enyido-adzehu no yɛɛ Ezekiel nwanwa araa ma ɔdze n’enyim butuuw famu. (Ezek. 1:28) Ɔda edzi dɛ aber biara a nna Ezekiel bɔdwendwen dɛm enyido-adzehu yi ho no, nna ɔhyɛ no dzen dɛ Nyankopɔn bɔboa no ma oeewie no som edwuma no.
8-9. (a) Ahyɛdze a Jehovah dze maa Ezekiel no boaa no dɛn? (b) Ebɛnadze fofor na Jehovah yɛe dze hyɛɛ Ezekiel dzen mbrɛ ɔbɛyɛ a obotum aka asɛm no akyerɛ hɔn a nna wɔmmpɛ dɛ wotsie no?
8 Jehovah dze ahyɛdze yi maa Ezekiel dɛ: “Onyimpa ba, gyina wo nan do, ma menye wo nkasa.” Asɛm a Jehovah kaa kyerɛɛ Ezekiel, nye Nyankopɔn no sunsum no maa onyaa ahoɔdzen a ɔdze bɔsoɛr efi famu. Ezekiel kaa dɛ: “Sunsum no bɛhɛɛn mo mu, na ɔmaa migyinaa me nan do.” (Ezek. 2:1, 2) Ekyir yi, Nyankopɔn ne “nsa,” kyerɛ dɛ, no sunsum krɔnkrɔn no boaa Ezekiel wɔ no som edwuma no nyina mu. (Ezek. 3:22; 8:1; 33:22; 37:1; 40:1) Nyankopɔn dze no sunsum no boaa Ezekiel ma ɔyɛɛ edwuma a ɔhyɛ ne nsa no. Ɔno nye dɛ ɔbɛka asɛmpa no akyerɛ hɔn a “hɔn momapɔw do ayɛ dzen na hɔn akoma epirim” no. (Ezek. 3:7) Jehovah kaa kyerɛɛ Ezekiel dɛ: ‘Mayɛ w’enyim dzendzen dɛ hɔn enyim, na wo momapɔw do dzendzen dɛ hɔn momapɔw do. Dɛ dɛnkyɛmbo a ɔyɛ dzen sen twerɛbo na mayɛ wo momapɔw: mma nnsuro hɔn, eso mma hɔn enyim mmbɔ wo hu.’ (Ezek. 3:8, 9) Nna ɔtse dɛ mbrɛ Jehovah reka akyerɛ Ezekiel dɛ: ‘Mma mma nkorɔfo no hɔn asoɔdzen no mma w’abaw mu mmbu, na mebɛhyɛ wo dzen.’
9 Iyi ekyir no, Nyankopɔn no sunsum no dze Ezekiel kɔr beebi a ɔsɛ dɛ ɔka asɛm no. Ezekiel kaa dɛ: ‘Jehovah ne nsa yɛɛ dzen wɔ mo do.’ Ɔgyee nkɔnhyɛnyi no ndaesuon ansaana ɔretse asɛm a ɔsɛ dɛ ɔka kyerɛ nkorɔfo no ase, mbrɛ ɔbɛyɛ a obotum dze ahotodo aka. (Ezek. 3:14, 15) Ekyir yi, Jehovah kaa kyerɛɛ no dɛ ɔnkɔ asaase tɛrtɛr no do. Hɔ na ‘sunsum bɛhɛɛn no mu.’ (Ezek. 3:23, 24) Afei dze, nna Ezekiel ayɛ krado dɛ ɔbɛhyɛ no som edwuma no ase.
NDƐ SO NYANKOPƆN NO SUNSUM NO HYƐ HƐN DZEN
Ebɛnadze na ɔboaa Ezekiel ma ɔyɛɛ no som edwuma no, na ebɛnadze na ɔboa hɛn so ndɛ? (Hwɛ nkyekyɛmu 10)
10. Sɛ yebotum ayɛ asɛnka edwuma no a, ebɛn mboa na yehia, na ebɛnadze ntsi a?
10 Sɛ yebotum ayɛ asɛnka edwuma no a, ebɛn mboa na yehia? Mbrɛ ɔbɛyɛ a yebenya dɛm asɛmbisa yi ho mbuae no, hom mma yɛnhwɛ dza ɔtoo Ezekiel no. Ansaana ɔrehyɛ no som edwuma no ase no, Nyankopɔn no sunsum no maa no ahoɔdzen a nna ohia no. Ndɛ so, Nyankopɔn no sunsum no boa hɛn dɛ mbrɛ ɔboaa Ezekiel no. Sɛ nnyɛ Nyankopɔn no sunsum a ɔboa hɛn a, nkyɛ yerunntum nnyɛ asɛnka edwuma no. Ebɛnadze ntsi a? Siantsir nye dɛ Satan ko tsia hɛn na ɔpɛ dɛ yegyaa asɛnka edwuma a yɛreyɛ no. (Nyi. 12:17) Nyimpa enyi do no, ɔtse dɛ mbrɛ Satan no ho yɛ dzen ntsi yerunntum nye no nnko. Naaso, yɛnam asɛnka edwuma no do ridzi no do konyim! (Nyi. 12:9-11) Ebɛnadze ntsi na yɛreka dɛm? Sɛ yɛdze hɛnho hyɛ asɛnka edwuma no mu a, yɛkyerɛ dɛ yennsuro Satan n’ehunahuna no. Aber biara a yɛbɛka asɛmpa no akyerɛ obi no, yedzi Satan no do konyim. Ɔmmfa ho ɔsoɛrtsia a yehyia no, yɛkɔ do yɛ asɛnka edwuma no. Ebɛnadze na iyi ma yehu? Ɔma yehu dɛ sunsum krɔnkrɔn no hyɛ hɛn dzen na Jehovah so gye hɛn to mu.—Matt. 5:10-12; 1 Pet. 4:14.
11. Ebɛnadze na Nyankopɔn no sunsum no botum aboa hɛn ma yaayɛ, na ebɛnadze na ɔsɛ dɛ yɛyɛ ama hɛn nsa aakɔ do aka Nyankopɔn no sunsum no?
11 Kwan bi do no, Jehovah yɛɛ Ezekiel n’enyim na no momapɔw do dzendzen. Ebɛn awerɛhyɛmu fofor na iyi ma yenya? Nyankopɔn no sunsum no botum aboa hɛn ma yeedzi ɔhaw biara a yehyia wɔ asɛnka mu no do. (2 Cor. 4:7-9) Sɛ dɛm dze a, ebɛnadze na ɔsɛ dɛ yɛyɛ ama hɛn nsa aakɔ do aka Nyankopɔn no sunsum no? Ɔsɛ dɛ yɛkɔ do bɔ Jehovah mpaa serɛ no hɔ sunsum krɔnkrɔn, na yenya awerɛhyɛmu dɛ obetsie hɛn adzeserɛ no. Jesus kaa kyerɛɛ n’esuafo no dɛ, ɔsɛ dɛ wɔkɔ do bisa, wɔhwehwɛ na wɔbɔ mu. Nokwasɛm nye dɛ Jehovah dze ‘sunsum krɔnkrɔn no bɛma hɔn a wobisa no’ no.—Luke 11:9, 13; Andw. 1:14; 2:4.
NYANKOPƆN NE NSƐM NO HYƐƐ EZEKIEL NE GYEDZI DZEN
12. Dɛ mbrɛ Ezekiel 2:9–3:3 ma yehu no, henfa na nwoma mbobɔwee no fi? Nna ebɛnadze na wɔakyerɛw wɔ mu?
12 Nyankopɔn no sunsum no boaa Ezekiel ma ɔdze akokodur kaa asɛm no. Nnyɛ ɔno nkotsee, nsɛm a Nyankopɔn kaa kyerɛɛ no no so hyɛɛ ne gyedzi dzen. Ezekiel nyaa enyido-adzehu, na ohun nwoma mbobɔwee bi dɛ okitsa obi ne nsamu. (Kenkan Ezekiel 2:9–3:3.) Nna nwoma mbobɔwee no fi hen? Ebɛnadze na wɔakyerɛw wɔ mu? Ebɛn kwan do na ɔhyɛɛ Ezekiel ne gyedzi dzen? Hom mma yɛnhwɛ. Nwoma mbobɔwee no fi Nyankopɔn n’ahengua no do. Obotum aba dɛ abɔfo baanan a Ezekiel dzii kan hun hɔn no mu kor na Jehovah nam no do dze nwoma mbobɔwee no brɛɛ no. (Ezek. 1:8; 10:7, 20) Nna Nyankopɔn ne nsɛm na ɔwɔ nwoma mbobɔwee no mu. Nna ɔyɛ atsɛmbunsɛm a ɔsɛ dɛ Ezekiel ka kyerɛ etuatsewfo a wɔwɔ nkowaasom mu no. (Ezek. 2:7) Nwoma mbobɔwee no n’enyim na n’ekyir nyina, nna wɔakyerɛw nsɛm no bi wɔ hɔ.
13. Jehovah kaa kyerɛɛ Ezekiel dɛ ɔnyɛ nwoma mbobɔwee no dɛn? Ebɛnadze ntsi na ɔyɛɛ dɛw wɔ Ezekiel n’anomu?
13 Jehovah kaa kyerɛɛ no nkɔnhyɛnyi no dɛ ɔnwe nwoma mbobɔwee no ‘nhyɛ ne yafun ma.’ Ezekiel tsiee dza Jehovah kae no, na ɔwee nwoma mbobɔwee no nyina. Nna enyido-adzehu no ne fa yi kyerɛ dɛn? Nna ɔsɛ dɛ Ezekiel tse nsɛm a ɔrekɛka akyerɛ nkorɔfo no ase yie. Nna ɔsɛ dɛ ɔgye nsɛm no dzi mbrɛ ɔbɛyɛ a obotum dze ahotodo aka akyerɛ nkorɔfo no. Ezekiel wee nwoma mbobɔwee no ekyir no, biribi a ɔyɛ nwanwa sii. Ezekiel hun dɛ nwoma mbobɔwee no yɛ ‘dɛw dɛ ewo.’ (Ezek. 3:3) Ebɛnadze ntsi a? Ezekiel n’afamu dze, nna hokwan a oenya dze reka Jehovah ho asɛm akyerɛ nkorɔfo no yɛ biribi a ɔyɛ dɛw anaa ɔma n’akoma tɔ ne yamu. (Ndw. 19:8-11) Nna n’enyi sɔ dɛ Jehovah eyi no dɛ no nkɔnhyɛnyi.
14. Ebɛnadze na ɔboaa Ezekiel ma ɔyɛɛ krado dɛ ɔbɛyɛ edwuma a Nyankopɔn dze ahyɛ ne nsa no?
14 Ekyir yi, Jehovah kaa kyerɛɛ Ezekiel dɛ: “Me nsɛm a mebɛka akyerɛ wo nyina gye no w’akoma mu, na fa w’asowa tsie.” (Ezek. 3:10) Nna asɛm a Jehovah reka akyerɛ Ezekiel ara nye dɛ ɔnkyer nsɛm a ɔwɔ nwoma mbobɔwee no mu no ngu ne tsirmu na ɔndwendwen ho. Dɛm a Ezekiel yɛe no hyɛɛ ne gyedzi dzen. Afei so, nwoma mbobɔwee no maa onyaa nsɛm a tum wɔ mu a ɔbɛka akyerɛ nkorɔfo no. (Ezek. 3:11) Aber a Ezekiel tsee Nyankopɔn ne nsɛm no ase na ɔgyee dzii no, nna ɔayɛ krado dɛ ɔbɔkɔ do aka asɛm no kesi dɛ obowie no som edwuma no.—Fa toto Ndwom 19:14 ho.
NDƐ SO NYANKOPƆN NE NSƐM NO HYƐ HƐN GYEDZI DZEN
15. Sɛ yebotum akɔ do ayɛ asɛnka edwuma no a, ebɛnadze na ɔsɛ dɛ yɛma ɔda hɛn ‘akoma’ do?
15 Sɛ yebotum akɔ do ayɛ asɛnka edwuma no a, ɔsɛ dɛ hɛn so yɛkɔ do ma Nyankopɔn ne nsɛm no hyɛ hɛn gyedzi dzen. Ɔsɛ dɛ yɛma nsɛm a Jehovah ka kyerɛ hɛn no da hɛn ‘akoma’ do. Ndɛ, Jehovah nam n’Asɛm Bible no do nye hɛn kasa. Yebesi dɛn ama Nyankopɔn n’Asɛm no aka hɛn nsusui, mbrɛ yesi tse nka nye adwen a yɛdze yɛ asɛnka edwuma no?
16. Ebɛnadze na ɔsɛ dɛ yɛyɛ wɔ Nyankopɔn n’Asɛm no ho, na yebesi dɛn atse ase yie?
16 Sɛ yedzidzi na hɛn nyimpadua no yɛ edziban no ho edwuma a, ɔma yenya ahoɔdzen. Dɛmara so na sɛ yesua Nyankopɔn n’Asɛm no na yɛdwendwen ho a, ɔhyɛ hɛn gyedzi dzen. Ɔsɛ dɛ yɛma esuadze a yenya wɔ nwoma mbobɔwee no ho no tsena hɛn adwen mu. Ɔno nye dɛ Jehovah pɛ dɛ yɛdze n’Asɛm no ‘hyɛ hɛn yafun ma,’ kyerɛ dɛ, ɔpɛ dɛ yɛtse ase yie. Sɛ yebotum ayɛ dɛm a, ɔsɛ dɛ yɛbɔ mpaa, yɛkenkan Bible no na yɛdwendwen ho. Odzi kan, ɔsɛ dɛ yɛbɔ mpaa dze siesie hɛn akoma ma dza Nyankopɔn pɛ dɛ ɔka kyerɛ hɛn no. Sɛ yewie a nna yɛakenkan Bible no ne fa bi. Afei, ɔsɛ dɛ yegyina kakra na yɛdwendwen dza yɛakenkan no ho kɔ ekyir. Sɛ yɛyɛ dɛm a, ebɛnadze na obefi mu aba? Sɛ yɛkɔ do dwendwen dza yɛkenkan no ho a, ɔbɔboa hɛn ma yaatse Nyankopɔn n’Asɛm no ase yie, na iyi bɛma hɛn gyedzi ayɛ dzen.
17. Sɛ yɛkenkan Bible no a, ebɛnadze ntsi na no ho hia dɛ yɛdwendwen ho?
17 Ebɛnadze ntsi na no ho hia dɛ yɛkenkan Bible no na yɛdwendwen ho? Sɛ yɛyɛ dɛm a, ɔbɛma yeenya akokodur ndɛ dze aka Ahendzi ho asɛmpa no. Afei so, ɔbɛma yeenya akokodur dze aka atsɛmbusɛm a n’ano yɛ dzen a bi a yɛbɛka no daakye no. Bio so, sɛ yɛdwendwen Jehovah no su ahorow a ɔka akoma no ho a, ɔbɔboa hɛn ma yɛnye no ntamu ebusuabɔ no mu aayɛ dzen. Iyi bɛma yeenya biribi a ɔyɛ dɛw dɛ ewo, kyerɛ dɛ, hɛn asomu bɔdwe hɛn na hɛn akoma so aatɔ hɛn yamu.—Ndw. 119:103.
DZA OKENYAN HƐN MA YƐKƆ DO YƐ ASƐNKA EDWUMA NO
18. Sɛ ber a wɔdze bobu atsɛn no du a, ebɛnadze na hɔn a yɛkaa asɛm no kyerɛɛ hɔn no bohu, na ebɛnadze ntsi a?
18 Hɛn dze, yɛnntse dɛ Ezekiel, osiandɛ Nyankopɔn mmfaa no sunsum no nnkaa hɛn dɛ yɛnhyɛ nkɔm. Naaso, yɛawe ataa do dɛ Jehovah ne nsɛm a wɔakora do wɔ Bible mu no, yɛbɔkɔ do aka akyerɛ nkorɔfo kesi dɛ ɔbɛka dɛ yeewie. Sɛ ber a wɔdze bobu atsɛn no du a, hɔn a yɛkaa asɛm no kyerɛɛ hɔn no mu biara nnyi hɔ a obotum aka dɛ ɔanntse Nyankopɔn no kɔkɔbɔ no ho asɛm anaa Nyankopɔn buu n’enyi guu no do. (Ezek. 3:19; 18:23) Mbom wobohu dɛ Nyankopɔn na ɔsomaa hɛn dɛ yɛnkɛka asɛm no nkyerɛ hɔn.
19. Ebɛnadze na ɔbɛhyɛ hɛn dzen ma yeetum ayɛ asɛnka edwuma no?
19 Ebɛnadze na ɔbɛhyɛ hɛn dzen ma yeetum ayɛ asɛnka edwuma no? Ndzɛmba ebiasa a ɔhyɛɛ Ezekiel dzen no, dɛm ndzɛmba no ara na ɔhyɛ hɛn so dzen. Yɛkɔ do ka asɛm no osiandɛ Jehovah noara na ɔasoma hɛn, no sunsum krɔnkrɔn no hyɛ hɛn dzen na n’Asɛm no so hyɛ hɛn gyedzi dzen. Jehovah bɔboa hɛn ma yɛdze enyigye ayɛ asɛnka edwuma no na yaayɛ araa dze “ekodu ewiei.”—Matt. 24:13.
NDWOM 65 Kɔ W’enyim!
a Yɛbɔhwɛ ndzɛmba ebiasa bi a ɔboaa nkɔnhyɛnyi Ezekiel ma otumii yɛɛ n’asɛnka edwuma no wɔ adzesua yi mu. Yɛbɔhwɛ mbrɛ Jehovah boaa no nkɔnhyɛnyi no, na iyi bɛma yeenya awerɛhyɛmu kɛse dɛ Jehovah bɔboa hɛn ma yaayɛ asɛnka edwuma no.