Ansaana mebɛka dza osii wɔ ɔno ekyir no, ma menka mbrɛ ɔyɛe a mehyɛɛ ber nyina som edwuma no ase no ho asɛm.

Wɔwoo me 1942 wɔ Curaçao. Ɔyɛ supɔw bi a ɔwɔ Caribbean, na hɔ yɛ fɛw paa. Me papa fi Suriname, na edwuma na ɔdze no kɔr Curaçao. Me papa ka hɔn a wodzii kan bɔɔ hɔn esu ma wɔbɛyɛɛ Jehovah Adasefo wɔ Curaçao no ho. a Ɔbɛyɛɛ Ɔdasefo no, mfe ebien ekyir na wɔwoo me. Nna yɛyɛ mbofra beenum. Hɛn papa nye hɛn suaa adze dapɛn biara. Ɔwɔ mu, nna ɔtɔ da a, yɛmmpɛ dɛ yesua adze. Aber a midzii mfe 14 no, me papa maa hɛn ebusua no tui kɔr Suriname mbrɛ ɔbɛyɛ a obotum ahwɛ ne maame a nna ne mfe akɔ enyim no.

Yɛkɔr Suriname no, mefaa mbabun bi a nna wɔwɔ asafo no mu no nyɛnko. Nna wɔyɛ nkorɔfo a wɔdze nsi rosom Jehovah. Nna woenyin sen me kakra, naaso nna wɔyɛ daa akwampaafo. Sɛ nna wɔreka suahu a woenya wɔ asɛnka edwuma no mu ho asɛm a, nna ihu dɛ hɔn enyi agye tam! Sɛ yɛpon asafo nhyiamu a, nna menye m’anyɛnkofo yi bɔ Bible mu nkɔmbɔ. Ɔtɔ da a, nna yɛkɛtsena paado aber a nworaba wɔ wimu no bɔ Bible mu nkɔmbɔ. Dɛm anyɛnkofo yi boaa me ma muhun dza nna mepɛ dɛ meyɛ wɔ m’asetsena mu. Nna mepɛ dɛ medze me ber nyina som Jehovah. Dɛm ntsi aber a midzii mfe 16 no, mobɔɔ esu. Ekyir yi aber a midzii mfe 18 no, mebɛyɛɛ daa kwampaafo.

Aber a mebɛyɛɛ kwampaafo no musuaa ndzɛmba pii. Dɛm ndzɛmba a musuae no aboa me paa wɔ ber nyina som edwuma no mu. Adze a odzi kan a musuae nye dɛ no ho hia dɛ metsetse afofor. Aber a mehyɛɛ akwampaa edwuma no ase no, asɛmpatserɛwnyi bi a wɔfrɛ no Willem van Seijl faa me dɛ ne ba. b Ɔkyerɛɛ me ndzɛmba pii a ɔbɔboa me ma maayɛ dwumadzi a ɔhyehyɛ me nsa wɔ asafo no mu no yie. Dɛm aber no, nna minnyim  koraa dɛ saana ntsetsee a ɔdze rema me no bɔboa me. Afe a odzi hɔ no ara na mebɛyɛɛ kwampaafo tsitsir. Ofi hɔ no, mokɔboaa kuw ahorow bi a nna atsew no ho. Nna dɛm ekuw no hyɛ Suriname kwaabibir no mu tuu. M’enyi sɔ ntsetsee a enuanom dze maa me no, osiandɛ nna ɔyɛ ne ber mu dze paa! Ofi dɛm aber no mara so mayɛ dza mubotum biara dɛ mebɛgye ber dze atsetse afofor.

Adze a otsia ebien a musuae nye dɛ ɔsɛ dɛ mema m’asetsena ba famu na mototo me ndzɛmba yie. Bosoom n’ahyɛse biara nna menye onua a menye no yɛ akwampaa edwuma no tsena hɔ na yɛhwɛ ndzɛmba a yebehia wɔ bosoom no mu. Yewie a, nna hɛn mu kor etwa kwan tsentsen kɔ Suriname n’ahenkurow mu akɔtotɔ ndzɛmba a yebehia no. Nna ɔsɛ dɛ yɛhwɛ sika kakra a wɔdze ma hɛn no do yie na yɛkyekyɛ ndzɛmba a yɛatotɔ no mu ama woeetum nye hɛn etwa bosoom no. Beebi a yɛwɔ no, sɛ ɔba no dɛ hɛn ndzɛmba sa a, nna obiara nnyi hɔ a ɔbɔboa hɛn. Sɛ nna yebenya obi a ɔbɔboa hɛn mpo a, nyimpa kor anaa ebien bi pɛ. Dɛm aber no, musuaa mbrɛ mebɛma m’asetsena aba famu nye mbrɛ mibesi atoto me ndzɛmba yie. Megye dzi dɛ ɔno na aboa me paa ma metum akɔ do dze me ber nyina asom Jehovah no.

Adze a otsia ebiasa a musuae nye dɛ sɛ eka asɛmpa no kyerɛ nkorɔfo wɔ kasa a wɔdze twaa hɔn funuma mu a, ɔboa paa. Nna mutum ka Dutch, Borɔfo, Papiamento na Sranantongo kasa (wɔsan frɛ no Sranan). Sranantongo yɛ kasa tsitsir a wɔka wɔ Suriname. Naaso wɔ kwaabibir mu hɔ no, mubohun dɛ sɛ yɛka asɛmpa no kyerɛ nkorɔfo wɔ kasa a wɔdze twaa hɔn funuma mu a, ɔka hɔn akoma paa. Naaso awerɛhosɛm nye dɛ hɔn kasaa no mu bi wɔ hɔ a, nna munntum nnka. Kor nye Saramaccan. Nkasafua a wɔdze dzi dwuma no, bi wɔ hɔ a, sɛ erobɔ a, ɔsɛ dɛ ema wo ndze do anaa ema wo ndze ba famu. Nna ɔnnda famu dze, naaso ɔyɛ me dɛw paa dɛ musuae. Medze mfe pii aka asɛmpa no akyerɛ nkorɔfo osiandɛ mutum ka kasa a wɔdze twaa hɔn funuma.

Ɔtɔ da a nna mutum ka asɛm bi na sɛ ekyir yi muhu dza ɔkyerɛ ankasa a, ɔma meyɛ basaa. Nna mowɔ Bible suanyi bi a ɔka Saramaccan kasa. Da kor bi nna mepɛ dɛ mibisa no dɛ noho tse dɛn, osiandɛ nna minyim dɛ ne yafun yɛ no yaw. Naaso saana asɛm a mibisaa no no, dza nna ɔkyerɛ nye dɛ onyinsen anaa! Nokwasɛm nye dɛ asɛm a mibisaa no no maa ɔyɛɛ basaa. Mamma nsɛm a ɔtsetse dɛm no emmbu m’abaw mu. Mbom beebiara a mokɔree no, meyɛɛ dza mubotum biara dɛ mebɛka asɛmpa no akyerɛ hɔn a wɔwɔ hɔ no wɔ hɔn kurow mu kasa mu.

Mebɛyɛɛ ɔmansin do hwɛfo wɔ 1970. Dɛm afe no mu no, miyii slide program a wɔato dzin “Visiting the World Headquarters of Jehovah’s Witnesses” no kyerɛɛ ekuw ahorow a nna atsew no ho wɔ kwaabibir no mu no. Sɛ yebotum akɔ hɔ a, nna gyedɛ menye enuanom mbarimba binom fa hɛmba tsentsen bi na yetwa kwan fa esutsen ahorow a ɔda kwaabibir mu no do. Ndzɛmba a yɛdze kɔ no bi nye generator, tank kakraba bi a hɛn petrol gu mu, nkandzea a wɔdze kresiin gu mu nye mfir a yɛdze beyi slide program no. Sɛ yekodu hɔ a, nna ɔsɛ dɛ yɛsoasoa ndzɛmba no nyina na yɛdze twa kwan kɔ beebi a yɛbɛyɛ dwumadzi no. Adze kor a mekaa paa nye dɛ nna hɔn a wɔwɔ dɛm mbea no enyi gye dwumadzi no  ho paa. Nna ɔyɛ me dɛw paa dɛ moroboa nkorɔfo ma woeesua Jehovah ho adze na woeehu n’ahyehyɛdze no ne fa a ɔwɔ asaase do no ho nsɛm pii. Muhun dɛ me berɛ annyɛ gyan, osiandɛ edwumadzen a meyɛe no boaa nkorɔfo beberee ma wobohun Jehovah.

Dɛm aber no nyina nna meyɛ sigyanyi ntsi nna mutum yɛ pii wɔ ɔsom edwuma no mu. Naaso odur beebi no nna mepɛ dɛ mowar. Dɛm ntsi medze too Jehovah n’enyim dɛ ɔmboa me ma minnya ɔbaa a mubotum nye no ayɛ ber nyina som edwuma no wɔ kwaabibir mu hɔ. Bɛyɛ afe kor ekyir no, mihyiaa akyerɛbaa bi a wɔfrɛ no Ethel na yɛyɛɛ nhyehyɛɛ dɛ yɛbɔwar. Nna noara so yɛ kwampaafo tsitsir a ɔbɔ no ho mbɔdzen paa. Sɛ ɔba no dɛ ndzɛmba nnkɔ yie mpo a, ɔmmpa abaw wɔ Jehovah no som mu. Ethel yɛ abofra nyina nna ɔpɛ dɛ ɔyɛ dɛ ɔsomafo Paul. Nna ɔpɛ dɛ otu noho ma yɛ ɔsom edwuma no dɛ mbrɛ Paul yɛe no. Yɛwaree wɔ September 1971 na menye no toaa do yɛɛ ɔmansin edwuma no.

Aber a Ethel yɛ abofra no nna n’awofo nnyi asetsena mu ndzɛmba pii. Dɛm ntsi wɔannyɛ dzen ama no dɛ ɔnye me bɛyɛ ɔmansin edwuma no wɔ kwaabibir mu hɔ. Dɛ nhwɛdo no, sɛ nna yɛrokɔsom asafo ahorow a wɔhyɛ kwaabibir no mu tuu no a, nna ndzɛmba kakraabi na yɛdze kɔ. Sɛ yekodu hɔ a, esutsen a ɔwɔ hɔ no mu na yeguar na yɛhor hɛn ndzɛmba. Yesuaa dɛ yebedzi edziban biara a enuanom no dze bɛma hɛn no. Nna nam a wɔdze ma hɛn no bi nye ketsew bi a wɔfrɛ no iguana nye nsu mu nam bi a wɔfrɛ no piranha. Afei so, nna yedzi biribiara a wɔdze bɛbrɛ hɛn no, dɛ ɔyɛ haban mu nam anaa nsu mu nam no. Sɛ yeennya kyɛnse enndzidzi mu a, nna yedzidzi mpuwa n’ahataw do. Ɔtɔ ber bi mpo a, yennya atser ntsi yɛdze hɛn nsa na yɛdze dzidzi. Menye Ethel ehu dɛ ndzɛmba a yɛdze abɔ afɔr wɔ Jehovah no som mu no ama ebusuabɔ a ɔwɔ hɛn ntamu no mu ayɛ dzen dɛ ahoma a ɔbɔ ho ebiasa. (Ɔsɛnk. 4:12) Suahu a ɔtsetse dɛm no som bo ma hɛn na yɛremmfa nnsesa biribiara!

Da kor bi a yɛkɔsoom kuw bi a atsew no ho wɔ kwaabibir no mu na yɛresan hɛn ekyir no, asɛm bi  sii. Ɔno na midzii kan kaa ho asɛm no. Aber a hɛmba no kɛhyɛɛ nsu no mu no, annkyɛr na opuei. Dza ɔboaa hɛn paa nye dɛ nna yɛhyehyɛ life jacket na yeemmfi hɛmba no mu anntɔ nsu no mu. Naaso nsu kɔr hɛmba no mu. Hɔ no ara na yehuee hɛn edziban no guu nsu no mu na yɛdze nkyɛnse a nna hɛn edziban no wɔ mu no sesaaw nsu a wɔaba hɛmba no mu no.

Nna yennyi edziban biara wɔ hɛnho, ntsi yɛyɛɛ hɛn adwen dɛ yebeyi nam a wɔwɔ nsu no mu no bi. Naaso yɛyɛɛ araa nna yennya bi. Ntsi dza yɛyɛe nye dɛ yɛbɔɔ Jehovah mpaa na yɛkaa kyerɛɛ no dɛ ɔmma hɛn edziban a yebedzi wɔ da no mu. Yɛbɔɔ mpaa no wiee ara na onua kor toow no nkɔba no too nsu no mu. Yɛnkɔhwɛ a, ɔapa nam kɛse bi. Nna nam no so araa ma hɛn beenum no nyina botum awe ma yaamee.

Yɛwaree no mfe enum ekyir na hɛn nsa kaa akyɛdze bi. Nna hɛn enyi nnda koraa. Ɔno nye dɛ nna Ethel nyinsen. Metsee asɛm no ɔyɛɛ me dɛw basaa. Naaso, nna minnyim mbrɛ dɛm nsesa yi bɛka hɛn asetsena. Nna menye Ethel pɛ paa dɛ sɛ nkyɛ ɔbɛyɛ yie a, yɛyɛ ber nyina som edwuma no. Yɛwoo hɛn abakan Ethniël wɔ afe 1976. Mfe ebien na fa ekyir na yɛwoo Giovanni so.

Nna mboa ho hia paa wɔ Suriname. Dɛm ntsi Bethel a ɔwɔ hɔ no kaa dɛ mubotum atsetse me mba no na ber kor no ara so maayɛ ɔmansin edwuma no. Amansin a meyɛɛ mu edwuma aber a hɛn mba no susuar no, nna asafo ahorow a ɔwɔ mu no nndɔɔ so. Nna iyi boa me, osiandɛ nna ɔma mutum dze ndaawɔtwe ebien som dɛ ɔmansin do hwɛfo na medze nda a wɔaka wɔ bosoom no mu so som dɛ kwampaafo wɔ asafo a yɛwɔ mu no mu. Sɛ ɔyɛ na morokɔsom asafo ahorow a ɔbɛn beebi a yɛwɔ no a, nna menye Ethel na mbofra no kɔ. Naaso sɛ nna morokɔ kwaabibir no mu akɔsom asafo ahorow a ɔwɔ hɔ no, anaa makɔhwɛ ehyiadzi do a, ɔnodze nna mankotsee na mokɔ.

Nna ɔsɛ dɛ mototo me ndzɛmba yie paa ama meetum edzi asodzi a ɔhyehyɛ me nsa nyina ho dwuma. Nna mohwɛ hu dɛ dapɛn biara yɛbɛyɛ ebusua som. Sɛ nna ɔba no dɛ morokɔsom asafo ahorow no wɔ kwaabibir no mu a, nna Ethel nye mbofra no yɛ ebusua som. Naaso aber biara a hokwan wɔ hɔ no, nna yɛbɔ mu yɛ adze dɛ ebusua. Afei so nna menye Ethel nye mbofra no taa yɛ ndzɛmba ahorow bi dze gyegye hɛn enyi. Nna yedzi agor anaa yetu mpasar kɔ mbea ahorow a hɔ yɛ fɛw. Mpɛn pii no nna misi pe siesie moho ma asafo mu dwumadzi ahorow a ɔhyehyɛ me nsa no. Me yer Ethel so aboa me paa. Ɔtse dɛ ɔyer a wɔaka noho asɛm wɔ Mbɛbusɛm 31:15 no. Nna ɔsoɛr  ahanamakye yɛ edziban ama yeetum edzidzi na yaayɛ daa asɛm no ansaana mbofra no akɔ skuul. Meda Jehovah ase paa dɛ ɔama me ɔbaa a ɔtse dɛm. Ɔaboa me ma metum edzi asodzi a ɔhyehyɛ me nsa wɔ Jehovah no som mu nyina ho dwuma!

Yɛyɛɛ dza yebotum biara dze boaa hɛn mba no ma wɔdɔɔ Jehovah na hɔn enyi gyee asɛnka edwuma no ho. Nna yɛpɛ dɛ hɛn mba no yɛ ber nyina som edwuma no. Naaso nna yɛmmpɛ dɛ yɛhyɛ hɔn, mbom nna yɛpɛ dɛ hɔnankasa si dɛm gyinae no. Nna yɛtaa ka enyigye a ɔwɔ ber nyina som edwuma no mu no kyerɛ hɔn. Ɔhaw ahorow a ɔwɔ mu no so, yɛmaa wohunii. Afei so, yɛmaa wohun mbrɛ Jehovah esi aboa hɛn nye nhyira a ɔama hɛn ebusua no nsa aka. Iyi da nkyɛn a, yɛhwɛe hun dɛ hɛn mba no bɛfa enuanom a wɔdze Jehovah no som dzi kan wɔ hɔn asetsena mu no nyɛnko.

Biribiara a nna yehia ama yeetum atsetse hɛn mba no, Jehovah dze maa hɛn. Ɔwɔ mu, mara so meyɛɛ m’afamu dze dɛ ɔwofo. Suahu a minyae aber a nna monnwaree na meyɛ kwampaafo tsitsir wɔ kwaabibir no mu no boaa me ma nna mutum sie sika a yɛdze bɔtotɔ ndzɛmba a yebehia no. Ɔwɔ mu dɛ yɛyɛɛ dza yebotum biara dze, naaso ɔtɔ da a, nna ndzɛmba mu yɛ dzen kakra. Naaso Jehovah enngyaa hɛn. Mber a ɔtse dɛm mu no ɔboaa hɛn. Dɛ nhwɛdo no, ofi 1986 kesi 1992 no, basabasayɛ bi kɔr do wɔ Suriname. Dɛm aber no, nna ndzɛmba nketsenketse bi mpo wɔ hɔ a, ɔtɔ da a ɔyɛ dzen dɛ ibenya bi. Ne nyina mu no, Jehovah maa hɛn nsa kaa dza yehia.​—Matt. 6:32.

Sɛ yɛhwɛ hɛn asetsena mu a, yehu dɛ Jehovah ahwɛ hɛn yie paa na ɔama yeenya enyigye na akomatɔyamu. Hɛn mba no so ama hɛn enyi agye paa. Ɔyɛ hɛn dɛw dɛ yeetum atsetse hɔn ma wɔrosom Jehovah. Hɛn enyi agye paa dɛ hɔn so wɔdze ber nyina som edwuma sii hɔn enyi do. Ethniël na Giovanni enya hokwan akɔ skuul a ndɛ wɔfrɛ no Ahendzi Asɛmpakafo Skuul no bi. Merekasa yi wɔnye hɔn yernom dze enyigye rosom wɔ Suriname Bethel.

Seseiara mabɔ akɔkora na me yer so abɔ aberwa naaso yɛda ho ara reyɛ dza yebotum wɔ Jehovah no som mu. Yɛrosom dɛ akwampaafo etsitsir. Nokwasɛm nye dɛ, ndɛ na ndɛ nyina minnyim mbrɛ wosi guar nsu. Asɛm no nye dɛ minnya ber mpo mmfa nnsua, osiandɛ minnyi adagyer! Naaso munnuu moho da. Sɛ mutwa m’enyi hwɛ m’ekyir a, muhu dɛ ber nyina som edwuma a medze sii m’enyi do dɛ mebɛyɛ aber a nna musuar no nye gyinae a ɔsen biara a mesi wɔ m’asetsena mu.