1. Sɛ wɔka dɛ yɛmma hɛn enyi nda hɔ a, ɔkyerɛ dɛn? (2 Timothy 4:5)

 SƐ YEHYIA ɔhaw wɔ hɛn asetsena mu a, obotum ama aayɛ dzen ama hɛn dɛ yɛbɔkɔ do edzi Jehovah nye n’ahyehyɛdze no nokwar. Yebesi dɛn egyina ɔhaw a ɔtsetse dɛm no ano? Ɔsɛ dɛ yɛma hɛn enyi da hɔ, yɛweɔn na yegyina gyedzi no mu pintsinn. (Kenkan 2 Timothy 4:5.) Sɛ yɛamma ndzɛmba annhaw hɛn, yesusu ndzɛmba ho yie, na yɛyer hɛnho dɛ yebohu Jehovah n’adwen wɔ ndzɛmba ho a, ɔno kyerɛ dɛ yɛrema hɛn enyi ada hɔ. Sɛ yɛyɛ dɛm a, yɛremma mbrɛ yesi tse nka wɔ ndzɛmba ho no nnhaw hɛn.

2. Ebɛnadze na yebosusu ho wɔ adzesua yi mu?

² Adzesua a odzi iyi enyim mu no, yesusuu ɔhaw ebiasa bi a yebotum ehyia no ho. Nna dɛm ɔhaw yi mu biara mmfi asafo no mu. Adzesua yi mu so, yɛbɔhwɛ ɔhaw ebiasa bi so a obotum ama aayɛ dzen ama hɛn dɛ yɛbɔkɔ do edzi Jehovah nokwar. Dɛm ɔhaw yi dze, ɔyɛ dza yebotum ehyia wɔ asafo no mu. Ɔhaw a yɛrebɛka ho asɛm no nye (1) aber a yɛtse nka dɛ onua bi nye hɛn enndzi no yie, (2) aber a Jehovah atsea hɛn, nye (3) aber a ahyehyɛdze no ayɛ nsesa bi na ɔyɛ dzen ma hɛn dɛ yɛbɛgye ato mu. Sɛ yehyia ɔhaw a ɔtsetse dɛm a, yebesi dɛn ama hɛn enyi ada hɔ na yaanntwe hɛnho emmfi Jehovah nye n’ahyehyɛdze no ho?

3. Sɛ yɛtse nka dɛ hɛn nua bi nye hɛn enndzi no yie a, annhwɛ a yɛbɛyɛ hɛn adze dɛn?

³ Aso onua bi ayɛ adze ma ahaw wo pɛn? Bi mpo a nna ɔyɛ onua a ɔwɔ ɔsom hokwan. Bi a nna nnyɛ n’adwen nye dɛ ɔreyɛ adze ma ahaw wo. (Rom. 3:23; Jas. 3:2) Naaso dza ɔyɛe no haaw wo. Obotum aba dɛ asɛm yi ntsi nna eda a nnda. Bi a ibisaa  woho dɛ, ‘Sɛ ahyehyɛdze yi yɛ Nyankopɔn dze ampa a, nkyɛ onua yi botum ayɛ me dɛm adze yi?’ Satan so dze, adwen a ɔpɛ dɛ yenya ara nye no. (2 Cor. 2:11) Adwen a ɔtse dɛm no botum ama yaatwe hɛnho efi Jehovah nye n’ahyehyɛdze no ho. Dɛm ntsi sɛ yɛtse nka dɛ onua bi nye hɛn enndzi no yie a, yebesi dɛn ama hɛn enyi ada hɔ na yaamma Satan ennya hɛn?

4. Aber a Joseph no nuanom nye no enndzi no yie no, ebɛnadze na ɔboaa no ma n’enyi daa hɔ, na ebɛnadze na yebotum esua efi dza ɔyɛe no mu? (Genesis 50:19-21)

⁴ Mma wo bo mmfuw. Joseph yɛ aberantsɛba no, no nuanom mpanyimfo no nye no enndzi no yie. Nna wɔtan no, na binom mpo dze nna wɔpɛ dɛ woku no. (Gen. 37:4, 18-22) Owiee ase no, wɔtɔɔn no ma ɔkɛyɛɛ akowaa wɔ beebi. Dza Joseph no nuanom yi yɛe ntsi, Joseph hyiaa ɔhaw akɛseakɛse bɛyɛ mfe 13. Sɛ nna Joseph hwɛ mbrɛ ndzɛmba rotow kɔ no a, nkyɛ obotum enya adwen dɛ Jehovah nndɔ no. Afei so nkyɛ obotum mpo aka dɛ odur beebi a ohia Jehovah no mboa paa no, Jehovah eyi ne baako ahyɛ ne nsa. Naaso Joseph no bo emmfuw. Mbom ɔmaa n’enyi daa hɔ na ɔamma dza osii no ho asɛm annhaw no pii. Aber a Joseph nyaa hokwan a nkyɛ obotum ayɛ bi dze etua no nuanom no kaw no, ɔannyɛ dɛm, mbom ɔkyerɛɛ dɛ ɔdɔ hɔn na ɔdze hɔn bɔn kyɛɛ hɔn. (Gen. 45:4, 5) Adze a ɔboaa Joseph ma ɔyɛɛ dɛm nye dɛ osusuu ndzɛmba ho yie. Ɔammfa n’adwen ennsi ɔhaw no do mbom ɔdze n’adwen sii dza Jehovah pɛ do. (Kenkan Genesis 50:19-21.) Ebɛnadze na yebotum esua efi mu? Sɛ wɔnye wo enndzi no yie a, mma wo bo mmfuw Jehovah anaa nnya adwen dɛ oeyi wo baako ahyɛ wo nsa. Mbom dwendwen ndzɛmba a Jehovah reyɛ dze aboa wo ma etum egyina ɔhaw no ano no ho. Afei so, sɛ afofor nye hɛn enndzi no yie a, ɔsɛ dɛ yɛbɔ mbɔdzen da ɔdɔ edzi kyerɛ hɔn na yebu hɛn enyi gu hɔn mberɛwyɛ do.​—1 Pet. 4:8.

5. Aber a Miqueas tsee nka dɛ wɔnye no enndzi no yie no, ebɛnadze na ɔboaa no ma n’enyi daa hɔ?

⁵ Hom mma yɛmfa asafo mu panyin bi a ofi South America n’asɛm no dɛ nhwɛdo. Wɔfrɛ no Miqueas. b Ɔkaa dɛ ber bi ɔtsee nka dɛ enuanom binom a wɔwɔ ɔsom hokwan nye no enndzi no yie koraa. Ɔkaa dɛ: “Asɛm no haaw me paa na ogyaa me adwendwen. Nna meda a mennda. Mubohun dɛ biribiara nnyi hɔ a mubotum ayɛ ntsi musuu paa. Nna memmfaa tsebea a ɔtse dɛm mu da.” Naaso ɔmmfa ho dza Miqueas faa mu no nyinara ekyir no, ɔmaa n’enyi daa hɔ, na ɔbɔɔ mbɔdzen dɛ ɔremma asɛm no nnhyɛ no do. Ɔbɔɔ Jehovah mpaa mpɛn pii, na ɔserɛɛ no dɛ ɔmfa no sunsum krɔnkrɔn no mboa no na ɔmma no ahoɔdzen a ɔdze begyina ɔhaw a orihyia no ano. Ɔyɛɛ asɛm no ho nhwehwɛmu wɔ asafo nwoma ahorow mu, na iyi boaa no paa. Ebɛnadze na yebotum esua efi mu? Sɛ etse nka dɛ onua bi nye wo enndzi no yie a, mma asɛm no nnhaw wo pii. Afei so mma wo bo mmfuw wo nua no anaa innya no ho adwen bɔn. Bi a innyim tsebea a onua no wɔ mu a ntsi ɔkaa dɛm asɛm no anaa ɔyɛɛ n’adze dɛm no. Dɛm ntsi bɔ Jehovah mpaa na serɛ no dɛ ɔmboa wo ma tse onua no ase. Sɛ eyɛ dɛm a, ɔbɔboa wo ma ehu dɛ wo nua no annhyɛ da ara dɛ ɔreyɛ biribi ma aahaw wo, na iyi bɛma edze no bɔn akyɛ no. (Mbɛ. 19:11) Ma ɔntsena w’adwen mu dɛ Jehovah nyim dza erefa mu no, na ɔbɛma wo ahoɔdzen ma eetum dze egyina ano.​—2 Mber. 16:9; Ɔsɛnk. 5:8.

6. Ebɛnadze ntsi na ɔsɛ dɛ yɛgye to mu dɛ Jehovah dɔ hɛn ntsi na ɔtsea hɛn no? (Hebrewfo 12:5, 6, 11)

⁶ Sɛ wɔtsea hɛn a obotum ama hɛn werɛ ahow paa. Naaso sɛ yɛdze hɛn adwen nyina si mbrɛ yesi tse nka no do a, ɔbɛma yeenya adwen dɛ wɔnye hɛn enndzi no yie anaa asotwe no n’ano yɛ dzen dodow. Sɛ yɛyɛ dɛm a, obotum  ayɛ dzen ama hɛn dɛ yɛbɛgye asɛm a no ho hia paa yi ato mu. Ɔno nye dɛ Jehovah dɔ hɛn ntsi na ɔtsea hɛn. (Kenkan Hebrewfo 12:5, 6, 11.) Sɛ yɛdze hɛn adwen nyina si mbrɛ yesi tse nka no do a, nna yɛrema kwan ma Satan eenya hɛn. Satan mmpɛ dɛ yɛgye ntsea a Jehovah dze ma hɛn no to mu. Na dza ɔkyɛn dɛm mpo no, ɔpɛ dɛ yɛtwe hɛnho fi Jehovah ho, na yefi asafo no mu. Sɛ wɔdze ntsea ama wo a, ibesi dɛn ama w’enyi akɔ do ara ada hɔ?

7. (a) Dɛ mbrɛ yehu wɔ mfonyin no mu no, aber a Peter gyee ntsea too mu no, ekyir yi ebɛn kwan do na Jehovah dze no dzii dwuma? (b) Ebɛnadze na isua fi dza Peter yɛe no mu?

⁷ Sɛ wɔtsea wo a, gye to mu na yɛ nsesa a no ho hia. Jesus tseen Peter n’adwen wɔ esuafo nkaa no enyim. Na asɛm no nye dɛ nnyɛ pɛn kor na ɔyɛɛ dɛm. (Mark 8:33; Luke 22:31-34) Obotum aba dɛ iyi maa Peter n’enyi wuu paa! Naaso Peter anntwe noho emmfi Jesus ho. Peter gyee ntsea a Jesus dze maa no no too mu na osuaa biribi fii mfom a odzii no mu. Osiandɛ Peter anntwe noho emmfi Jesus ho ntsi, ekyir yi Jehovah hyiraa no na ɔdze asodzi akɛse hyehyɛɛ ne nsa wɔ asafo mu. (John 21:15-17; Andw. 10:24-33; 1 Pet. 1:1) Ebɛnadze na yebotum esua efi dza Peter yɛe no mu? Sɛ wɔtsea hɛn na yaammfa hɛn adwen ennsi mbrɛ yesi tse nka no do, na mbom yɛgye to mu na yɛyɛ nsesa biara a ohia a, ɔbɔboa hɛn, na afofor so benya do mfaso. Sɛ yɛyɛ dɛm a, Jehovah dze hɛn bedzi dwuma kɛse wɔ n’ahyehyɛdze no mu na hɛn nuanom so benya hɛn do mfaso.

8-9. Aber a wɔtseaa Bernardo no, ahyɛse no ɔtsee nka dɛn, na ebɛnadze na ɔboaa no ma ɔsesaa n’adwen?

⁸ Hom mma yɛnhwɛ asɛm bi a ɔtoo onua bi a ɔwɔ Mozambique. Wɔfrɛ no Bernardo. Wɔgyee hokwan a nna ɔwɔ dɛ asafo mu panyin no fii ne nsamu. Aber a asɛm no sii no, Bernardo tsee nka dɛn? Ɔkaa dɛ: “Mobo fuuw paa osiandɛ nna m’enyi nngye ntsea a wɔdze ama me no ho.” Nna ɔhaw no dɛ annhwɛ a na enuanom no enya noho adwen bɔn. Ɔtoaa do dɛ: “Muhun dɛ ntsea a wɔdze maa me no yɛ no kwan do, na minyaa Jehovah na n’ahyehyɛdze no mu gyedzi bio. Naaso ɔgyee me abosoom kakra.” Ebɛnadze na ɔboaa Bernardo ma onyaa dza osii no ho adwen pa?

⁹ Bernardo sesaa n’adwen. Ɔkyerɛɛ mu dɛ: “Aber a meyɛ asafo mu panyin no, nna metaa dze Hebrewfo 12:7 boa enuanom ma wohu dɛ Jehovah dɔ hɛn ntsi na ɔtsea hɛn no. Ntsi mibisaa moho dɛ, ‘Woananom na ɔsɛ dɛ wɔdze dɛm kyerɛwsɛm yi yɛ edwuma?’ Jehovah n’asomfo nyina, kyerɛ dɛ, mara so meka ho bi.”  Afei so, Bernardo yɛɛ ndzɛmba ahorow bi a ɔbɛma ɔasan enya Jehovah nye n’ahyehyɛdze no mu ahotodo. Ɔdze mber pii kenkaan Bible no na ɔdwendween dza ɔkenkanee no ho yie. Ɔwɔ mu, nna ɔhaw no dɛ bi a enuanom da ho ara wɔ adwen a ɔmmfata wɔ noho dze, naaso ɔnye hɔn bɔɔ mu kɔr asɛnka. Afei so, nna ɔkɔ asafo nhyiamu, na ɔkɔ so a, ɔma mbuae. Mber bi ekyir no, ɔsanee nyaa hokwan dɛ asafo mu panyin. Sɛ biribi ntsi wɔatsea wo dɛ mbrɛ wɔtseaa Bernardo no a, mma mmfa w’adwen nnsi mbrɛ isi tse nka no do, mbom gye afotu no to mu na yɛ nsesa biara a ohia no. c (Mbɛ. 8:33; 22:4) Nya awerɛhyɛmu dɛ, sɛ eyɛ dɛm a, Jehovah behyira wo dɛ idzi no nokwar na etaa n’ahyehyɛdze no ekyir.

10. Ebɛn nsesa na Jehovah yɛe a bi a nna ɔyɛ dzen ma Israel mbarimba binom dɛ wɔbɛgye ato mu?

¹⁰ Sɛ Jehovah n’ahyehyɛdze no yɛ nsesa a, annhwɛ a obotum ayɛ dzen dɛ yɛbɛgye ato mu. Sɛ yɛannhwɛ no yie a, obotum mpo ama yaatwe hɛnho efi Jehovah ho. Dɛ nhwɛdo no, hom mma yɛnhwɛ nsesa bi a Jehovah yɛe aber a ɔdze Moses Mbra no mae no. Dɛm nsesa yi kaa Israelfo binom. Mbra no mu no, nna asɔfo no nkotsee na wɔwɔ hokwan dɛ wodzi dwuma ahorow bi. Naaso ansaana Mbra no reba no, nna mbusua tsir na wodzi dɛm dwuma no. Nna hɔn na wosi afɔrmbukyia na wogyina hɔn mbusua ananmu bɔ afɔr ma Jehovah. (Gen. 8:20, 21; 12:7; 26:25; 35:1, 6, 7; Job 1:5) Naaso, wɔ Mbra no mu no, Jehovah kaa dɛ asɔfo a wofi Aaron n’ebusua mu na ɔsɛ dɛ wɔbɔ afɔr. Iyi ntsi nna mbusua tsir nnyi hokwan dɛ wɔyɛ dɛm ndzɛmba no bio. Aber a Mbra no hyɛɛ ase dɛ ɔreyɛ edwuma no, sɛ nna ebusua tsir bi mmfi Aaron n’ebusua mu na ɔyɛ noho dɛ ɔsɔfo a, nna wobotum eku no. d (Lev. 17:3-6, 8, 9) Aso obotum aba dɛ dɛm nsesa yi ntsi na Korah, Dathan, Abiram, nye mpanyimfo 250 no soɛree tsiaa Moses na Aaron no? Yerunntum nnka nnsi no pi. (Nka. 16:1-3) Naaso mbrɛ ɔtse biara no, Korah nye hɔn a wɔka no ho no enndzi Jehovah nokwar. Sɛ Jehovah n’ahyehyɛdze no yɛ nsesa ahorow bi na ɔyɛ dzen ma wo dɛ ebɛgye ato mu a, ebɛnadze na ibotum ayɛ?

11. Kohathfo a wɔyɛ Levimba no, ebɛnadze na yesua fi dza hɔn mu binom yɛe no mu?

¹¹ Fi w’akoma nyina mu gye nsesa biara a Jehovah n’ahyehyɛdze no bɛyɛ no to mu. Aber a Israelfo no nam sar no do no, nna Kohathfo no wɔ hokwan soronko bi. Aber biara a nna ɔsɛ dɛ Israelfo no tu fi beebi a wɔwɔ no kɔ beebi fofor no, nna ɔsɛ dɛ Kohathfo no bi soa ahyɛmudaka no dze dzi ɔman no enyim. (Nka. 3:29, 31; 10:33; Josh. 3:2-4) Nna ɔyɛ hokwan kɛse paa! Naaso aber a Israelfo no kɛtsenaa Anohoba Asaase no do no, ndzɛmba sesae. Dɛm aber yi dze, nna no ho rinnhia dɛ Kohathfo no taa soa ahyɛmudaka no dɛ mbrɛ nna wɔyɛ no. Dɛm ntsi ansaana Solomon rebɛyɛ ɔhen no, nna Kohathfo no mu bi yɛ adwontofo nye abowano ahwɛfo. Afei, nna binom so hwɛ adzekoradan do. (1 Mber. 6:31-33; 26:1, 24) Naaso biribiara nnyi Bible no mu a ɔkyerɛ dɛ Kohathfo no hwinhwinii, anaa wɔkaa dɛ wɔmfa hokwan akɛse nhyehyɛ hɔn nsa osian hokwan soronko a nna nkan no wɔwɔ no ntsi. Ebɛnadze na yebotum esua efi mu? Fi w’akoma nyina mu gye nsesa biara a Jehovah n’ahyehyɛdze no bɛyɛ no to mu. Sɛ biribi ntsi hokwan a ewɔ no sesa mpo a, gye to mu. Dwumadzi fofor biara a wɔdze bɛhyɛ wo nsa no, fa enyigye yɛ. Kaa dɛ nnyɛ dwumadzi a ɔhyɛ wo  nsa no na ɔkyerɛ dɛ esom bo ma Jehovah. N’enyi sɔ setsie a eyɛ ma no no koraa kyɛn dwumadzi a ɔhyɛ wo nsa no.​—1 Sam. 15:22.

12. Aber a wɔsesaa Zaina no dwumadzi ma ofii Bethel no, ɔtsee nka dɛn?

¹² Hom mma yɛnhwɛ hɛn akyerɛbaa bi a ɔwɔ Middle East. Wɔfrɛ no Zaina. Wɔsesaa no dwumadzi na iyi maa hokwan bi a nna ɔda n’akoma do no fii ne nsa. Wɔmaa ɔkɛyɛɛ kwampaafo tsitsir. Dɛm aber no nna ɔasom wɔ Bethel bɔbor mfe 23. Ɔkaa dɛ: “Aber a wɔkaa kyerɛɛ me dɛ menkɛyɛ ɔkwampaafo tsitsir no, ɔyɛɛ me hu o. Ɔmaa metsee nka dɛ mfaso biara nnyi mo do. Ntsi mibisaa moho dɛ, ‘Medzi mfomdo bi anaa?’” Dza ɔmaa asɛm no yɛɛ awerɛhow mpo nye dɛ, enuanom binom a wɔnye no wɔ asafo mu kaa kyerɛɛ no dɛ: “Sɛ ebɔɔ woho mbɔdzen a nkyɛ wɔamma eemmfi Bethel.” Asɛm yi maa Zaina no werɛ hoow araa ma nna osu anafua biara. Iyi kɔr do nda kakra. Naaso ɔkaa dɛ: “Mamma dza ɔkɔr do no amma ahotodo a mowɔ wɔ Jehovah n’ahyehyɛdze no mu no annkɔ famu. Afei so, mennya adwen da dɛ Jehovah nndɔ me.” Ebɛnadze na ɔboaa Zaina ma ɔkɔr do maa n’enyi daa hɔ?

13. Ebɛnadze na ɔboaa Zaina ma otumii gyinaa yaw a ɔfaa mu no ano?

¹³ Zaina tumii gyinaa yaw a ɔfaa mu no ano. Ebɛnadze na ɔboaa no? Ɔkenkaan nsɛm a ɔfa ne tsebea no ho wɔ hɛn nwoma ahorow mu, na iyi boaa no ma otumii gyinaa ano. Asɛm bi a ɔkenkanee wɔ February 1, 2001 Ɔweɔn-Aban mu no boaa no paa. Nna n’asɛntsir nye dɛ “Sɛ W’abaw Mu Bu Mpo A, Ibotum Egyina Ano!” Nna asɛm no fa Mark a ɔkyerɛɛw Bible mu nwoma a ne dzin da do no ho. Ɔka dɛ, obotum aba dɛ aber a hokwan a nna Mark wɔ fii ne nsa no, n’abaw mu buu paa. Zaina kaa dɛ, “Mark n’asɛm no boaa me paa na ɔhyɛɛ me nkuran. Nna dza mihia ara nye no.” Adze fofor so a Zaina yɛe nye dɛ ɔanntwe noho emmfi n’anyɛnkofo ho. Ɔnye enuanom bɔɔ mu yɛɛ asɛnka edwuma no, na ɔamma noho annyɛ mbɔbɔr. Obohun dɛ Jehovah no sunsum krɔnkrɔn no na ɔkyerɛ n’ahyehyɛdze no kwan na enuanom a wodzi ndzɛmba enyim no so dwen noho paa. Ɔsanee hun dɛ dza no ho hia ahyehyɛdze no paa nye dɛ Jehovah n’edwuma no bɔkɔ do. Iyi ntsi na ɔtɔ da a wɔyɛ nsesa ahorow no.

14. Nna ebɛn nsesa na ɔyɛ dzen ma Vlado dɛ ɔbɛgye ato mu, na ebɛnadze na ɔboaa no?

¹⁴ Vlado yɛ asafo mu panyin a oedzi mfe 73 na ɔwɔ Slovenia. Aber a wɔkaa asafo a ɔwɔ mu nye asafo fofor bɔɔ mu na wɔkaa dɛ mma wɔnnkɔ adzesua wɔ hɔn Ahendzi Asa do bio no,  ɔyɛɛ no yaw paa. Ɔkaa dɛ: “Nna hɛn Ahendzi Asa no yɛ fɛw paa, ntsi aber a wɔkaa dɛ mma yɛnnkɔ hɔ bio no, nna menntse ase koraa. Dza ɔyɛɛ me yaw paa nye dɛ nna yesiesiee hɛn Ahendzi Asa no nnkyɛree koraa. Meyɛ kapentanyi, ntsi meka ho ma yɛyɛɛ ngua afofor a ɔwɔ asa do hɔ no. Iyi da nkyɛn a, osiandɛ nna wɔaka hɛn asafo no abɔ mu ntsi, nna ɔsɛ dɛ yɛyɛ nsesa pii. Nna dɛm nsesa yi nnda famu mma hɛn a hɛn mfe akɔ enyim no koraa.” Ebɛnadze na ɔboaa Vlado ma ɔgyee nsesa yi too mu? Ɔkaa dɛ: “Sɛ Jehovah n’ahyehyɛdze no yɛ nsesa na yɛgye to mu a, yenya do mfaso aber nyina. Ɔbɔboa hɛn ma sɛ daakye wɔyɛ nsesa akɛse mpo a, yaagye ato mu.” Aso wɔaka asafo a ewɔ mu no nye asafo fofor abɔ mu, anaa wɔasesa wo dwumadzi? Aso ɔyɛ dzen ma wo dɛ ebɛgye nsesa a ɔtse dɛm no ato mu? Sɛ dɛm a, nya awerɛhyɛmu dɛ Jehovah tse wo ase. Sɛ egye nsesa a ɔtse dɛm to mu na anntwe woho emmfi Jehovah nye n’ahyehyɛdze a ɔdze ridzi dwuma ndɛ no ho a, obehyira wo kɛsenara.​—Ndw. 18:25.

15. Sɛ yehyia ɔhaw wɔ asafo no mu a, yebesi dɛn ama hɛn enyi ada hɔ?

¹⁵ Wiadze yi n’ewiei rebɛn paa, dɛm ntsi yebotum ahwɛ kwan dɛ yebehyia ɔhaw wɔ asafo no mu. Sɛ yehyia ɔhaw a ɔtsetse dɛm a, obotum ayɛ dzen ama hɛn dɛ yebedzi Jehovah nokwar. Iyi ntsi ɔsɛ dɛ yɛma hɛn enyi da hɔ aber nyina. Sɛ etse nka dɛ wo nua bi nye wo enndzi no yie mpo a, mma wo bo mmfuw. Sɛ wɔtsea wo a, mma mmfa w’adwen nnsi mbrɛ isi tse nka no do, mbom gye ntsea no to mu na yɛ nsesa biara a ohia no. Afei so, sɛ Jehovah n’ahyehyɛdze no yɛ nsesa ahorow bi ma ɔka wo a, fi w’akoma nyina mu gye to mu, na fa akwankyerɛ biara a wɔdze bɛma no yɛ edwuma.

16. Sɛ ibotum akɔ do ara enya Jehovah nye n’ahyehyɛdze no mu ahotodo a, ebɛnadze na ɔsɛ dɛ eyɛ?

¹⁶ Sɛ ihyia ɔhaw bi ma ɔyɛ dzen ma wo dɛ ibedzi Jehovah nokwar mpo a, ibotum akɔ do ara enya Jehovah nye n’ahyehyɛdze no mu ahotodo. Naaso sɛ ibotum ayɛ dɛm a, ɔsɛ dɛ ema w’enyi da hɔ, kyerɛ dɛ, ɔnnsɛ dɛ ema ndzɛmba haw wo, ɔsɛ dɛ isusu ndzɛmba ho yie, na eyer woho dɛ ibohu Jehovah n’adwen wɔ ndzɛmba ho. Nyimpa binom a Bible no ka hɔnho asɛm a wohyiaa tsebea a ɔtse dɛ wodze no na wotumii gyinaa ano no, sua hɔnho adze na dwendwen dza wɔyɛe no ho. Bɔ mpaa serɛ Jehovah dɛ ɔmboa wo. Afei so, mma nntwe woho mmfi asafo no ho. Sɛ eyɛ dɛm a, ɔmmfa ho dza obesi biara no, Satan runntum nntwe wo mmfi Jehovah nye n’ahyehyɛdze no ho da!​—Jas. 4:7.