AFE biara, hɔn a woetu hɔn no, wɔgye hɔn mu pii ba asafo no mu bio. Hwɛ ‘dɛw kɛse ara a ɔba sor’ ber a obi asan aba asafo no mu no! (Luke 15:7, 10) Sɛ wotuu wo na wɔagye wo a, nya awerɛhyɛmu dɛ Jesus, abɔfo no, nye Jehovah nyinara enyi agye dɛ asan aba asafo no mu. Naaso, aber a erobɔ mbɔdzen dɛ ibesiesie enye Jehovah ntamu anyɛnkofa no, bi a ibehyia nsɛndzendzen bi. Nsɛndzendzen no mu bi nye dɛn, na ebɛnadze na obotum aboa wo ma eegyina ano?

Hɛn nuanom pii wɔ hɔ a, aber a wɔagye hɔn aba asafo no mu mpo no, hɔn tsibowa kɔ do bu hɔn fɔ. Sɛ dɛm na etse nka a, bi a ebɛtse Ɔhen David ase. Aber a Jehovah dze David no bɔn kyɛɛ no ekyir mpo no, ɔkãa dɛ: “M’emumuyɛ ato me.” (Ndw. 40:12; 65:3) Sɛ obi san ba Jehovah nkyɛn mpo a, bi a mfe pii no, ne tsibowa bɔkɔ do ebu no fɔ anaa ɔbɛtse nka dɛ n’enyim egu ase. Wotuu Isabelle fii asafo no mu no, odzii bɔbor mfe 20 ansaana ɔreba. * Ɔkãa dɛ, “Nna ɔyɛ dzen ma me dɛ mebɛgye ato mu dɛ Jehovah botum dze mo bɔn akyɛ me.” Sɛ ema w’abaw mu bu a, obotum asɛɛ enye Jehovah ntamu ebusuabɔ no bio. (Mbɛ. 24:10) Mma mma biribi a ɔtse dɛm nnto wo koraa.

Afofor so wɔ hɔ a, ndzɛmba a ɔbɛma wɔnye Jehovah esiesie hɔn ntamu no, ɔhaw hɔn dɛ worunntum nnyɛ ne nyinara. Aber a wɔgyee Antoine no, ɔkãa dɛ, “Nna metse nka dɛ ndzɛmba a musũaa dɛ Jehovah Dasefo no, mo werɛ efir ne nyinara.” Osiandɛ binom tse nka dɛm ntsi, bi a ɔbɛyɛ dzen ama hɔn dɛ wɔdze hɔnho nyinara bɛhyɛ Nyankopɔn no som mu dwumadzi ahorow mu.

Hom mma yɛnyɛ dɛm mfatoho yi. Fa no dɛ ehum gyampaturdu bi asɛɛ obi ne dan a ɔda n’akoma do. Sɛ ɔdwen mber a ɔbɛgye nye edwumadzen a ɔwɔ  dɛ ɔyɛ ansaana oetum esiesie dan no a, annhwɛ a n’abaw mu bobu. Dɛmara na sɛ ayɛ bɔn a no mu yɛ dur ma asɛɛ enye Jehovah ntamu anyɛnkofa no a, bi a ebɛtse nka dɛ ɔbɛgye edwumadzen ana eetum esiesie enye Jehovah ntamu. Naaso ɔnnkaa wo nko, Jehovah bɔboa wo.

Jehovah to nsa frɛ hɛn dɛ: “Hom mbra ma yɛnkekã ɛ.” (Isa. 1:18) Ayer woho ayɛ dza ibotum biara dɛ enye Jehovah besiesie hom ntamu. Jehovah dɔ wo dɛ abɔ mbɔdzen a ɔtse dɛm. Ɔwodze dwen ho hwɛ o: Dza ayɛ yi ama Jehovah enya biribi tsitsir a obegyina do dze akyerɛ dɛ Satan yɛ ɔtorfo!—Mbɛ. 27:11.

Jehovah a asan aba ne nkyɛn no yɛ anamɔn a etu a ɔkyerɛ dɛ epɛ dɛ etwe bɛn no, na noara so bɔ anohoba dɛ ɔbɔtwe abɛn wo. (Jas. 4:8) Naaso nnyɛ hu a afofor bohu dɛ asan aba asafo no mu na ohia. Mbom pii wɔ hɔ a ɔwɔ dɛ eyɛ. Ɔsɛ dɛ ekɔ do hyɛ ɔdɔ a ewɔ ma w’Egya nye wo Nyɛnko Jehovah no mu dzen. Ibesi dɛn ayɛ dɛm?

Fa botae a ibotum edu ho sisi w’enyi do. Bi a mfitsiase nkyerɛkyerɛ a isũae faa Jehovah nye n’anohoba a ɔfa daakye ho no, ekaa ne nyinara. Naaso ndzɛmba a nna eyɛ dɛ Christiannyi no, ɔsɛ dɛ ehyɛ ase yɛ no bio; bi nye asɛnka edwuma no a edze woho bɛhyɛ mu nye wo nuanom a enye hɔn bɔbɔ daa. Ma yɛnhwɛ dza ibotum ayɛ no bi.

Bɔ Jehovah mpaa daa. W’Egya Jehovah nyim dɛ sɛ ema wo tsibowa kɔ do bu wo fɔ a, ɔbɛyɛ dzen ama wo dɛ ebɔbɔ no mpaa. (Rom. 8:26) Naaso, ‘kɔ do kura asɔryɛ mu,’ na kã anyɛnkofa a epɛ dɛ enye Jehovah nya no ho asɛm kyerɛ no. (Rom. 12:12) Andrej kãa dɛ: “Nna metse nka dɛ mafɛr na me tsibowa kɔr do buu me fɔ. Naaso nna aber biara a mobɔbɔ mpaa no, metse nka dɛ moho atɔ me, na m’asomu so adwe me.” Sɛ innhu dza ebɔbɔ ho mpaa a, Ɔhen David ne mpaa a ɔbɔe ber a onuu noho a ɔayɛ ho kyerɛwtohɔ wɔ Ndwom 51 nye 65 no bɔboa wo.

Sũa Bible no dabaa. Dɛm a ebɛyɛ no bɛhyɛ wo gyedzi dzen, na ɔbɛma ɔdɔ a ewɔ ma Jehovah no so ayɛ kɛse. (Ndw. 19:7-11) Felipe kãa dɛ: “Nna minnyi nhyehyɛɛ a medze sũa adze na medze kenkan Bible no dabaa, ɔno ntsi me gyedzi bɛyɛɛ mberɛw, na meyɛɛ Jehovah do asoɔdzen. Nna memmpɛ dɛ asɛm a ɔtse dɛm to me bio, ntsi medze yɛɛ mo botae dɛ mobɔkɔ do esũa adze dze ahyɛ me gyedzi dzen.” Woara so botum ayɛ dɛmara. Ibotum ebisa onua bi a noho akokwaa ma ɔaaboa wo ma eehu nsɛm a ibotu dze ayɛ w’ankorankor adzesua.

Enye wo nuanom mbɔ. Hɔn a wɔagye hɔn no bi wɔ hɔ a, wɔtse nka dɛ enuanom renngye hɔn fɛw do. Larissa kãa: “Nna mefɛr, na metsee nka dɛ mama enuanom no hɔn nsa esi famu. Ɔkyɛɛr paa ana dɛm atsenka no rifi hɔ.” Nya awerɛhyɛmu dɛ asafo mu mpanyimfo no nye enuanom a hɔnho akokwaa no wɔ ɔpɛ dɛ wɔbɔboa wo ma aasan nye Jehovah enya ebusuabɔ a no mu yɛ dzen. (Hwɛ adakaba a wɔato dzin “ Dza Asafo Mu Mpanyimfo Botum Ayɛ.”) Hɔn enyi agye dɛ asan aba, na wɔpɛ dɛ osi wo yie!—Mbɛ. 17:17.

Ebɛnadze na ɔbɔboa wo ma enye asafo no aabɔ pampee? Kɔ asafo nhyiamu dabaa, na enye wo nuanom mbɔ mu nkɔ asɛnka daa. Iyi besi dɛn aboa wo? Felix kãa dɛ: “Nna enuanom no rohwɛ kwan dɛ mebɛsan aba. Iyi maa metsee nka dɛ moho hia hɔn. Hɔn nyinara boaa me ma metsee nka dɛ masan abɛka enuanom ho, na Jehovah dze mo bɔn akyɛ me, na mubotum akɔ do asom.”—Hwɛ adakaba a wɔato dzin “ Dza Ibotum Ayɛ.”

Aber a erobɔ mbɔdzen dɛ ibesiesie enye Jehovah ntamu no, Satan bɔkɔ do ara dze nsɔhwɛ a ɔtse dɛ “ehum gyampaturdu” aba w’asetsena mu dze abrɛ wo gyedzi adze. (Luke 4:13) Kɔ do yɛ dza ibotum biara bɔ wo dan no ho ban, kyerɛ dɛ, kɔ do hyɛ wo gyedzi mu dzen.

Jehovah abɔ no nguan anohoba dɛ: “Mobɔhwehwɛ dza ɔyewee no, na medze dza wɔpaam no no asan aba, na makyekyer dza wobubui no, na mahyɛ dza ɔyaree no dzen.” (Ezek. 34:16) Nyimpa pii a wɔnye Jehovah ntamu ebusuabɔ sɛɛ no, Jehovah aboa hɔn ma wɔaasan nye no enya ebusuabɔ pa. Ntsi nya awerɛhyɛmu dɛ ɔpɛ dɛ ɔboa wo ma ekɔ do nye no nya ebusuabɔ a no mu yɛ dzen papaapa.