1-2. Ebɛn kwan na sɛ yɛfa do sua Bible no a ɔbɔboa hɛn ma yaatse ase yie paa? Fa mfatoho kyerɛkyerɛ mu.

 FA NO dɛ epɛ dɛ etɔ dan bi. Nkyɛ ebɛnadze na ebɔhwɛ wɔ ho ansaana atɔ? Ebɔhwɛ dan no ho mfonyin kɛkɛ na atɔ anaa? Ekyingye biara nnyi ho dɛ, ebɔkɔ akɔhwɛ dan no nye mbrɛ no mu nyina tse. Bi mpo a, ebɛpɛ dɛ inya dan no ne plan na ehwɛ kwan a wɔfaa do sii no. Ekyingye biara nnyi ho dɛ iyi bɔboa wo ma eehu dan no ho biribiara ansaana atɔ.

² Sɛ yɛrekenkan Bible no so a, yebotum ayɛ biribi a ɔtse dɛm. Bible ho ɔbemfo bi kaa dɛ, Bible no mu nsɛm tse dɛ “dan kɛse tsentsen bi a wɔatow ne fapem ma wɔakɔ famu paa.” Sɛ dɛm na ɔtse dze a, nna ɔno yebesi dɛn ehu Bible no mu yie? Sɛ ekenkan Bible no enyido enyido, na annyɛ ho nhwehwɛmu annkɔ ekyir a, ɔnodze ‘Nyankopɔn asɛm mu mfitsiasesɛm’ no nkotsee na ibohu. (Heb. 5:12) Tse dɛ mfatoho a yɛyɛe faa dan a epɛ dɛ etɔ ho no, sɛ ekenkan Bible no na ebɛtse ase a, ɔsɛ dɛ “ekɔ mu” kyerɛ dɛ, ɔsɛ dɛ ehwehwɛ mu yie ama eetum atse ase. Kwan kor a sɛ efa do sua Bible no a ɔbɔboa wo ma aatse ase nye dɛ ebɔhwɛ mbrɛ dza erekenkan no nye nsɛm afofor a ɔwɔ Bible mu no hyia no. Dza Bible no kyerɛkyerɛ a egye dzi nye siantsir a egye dzi no, bɔ mbɔdzen dɛ ebɛtse ase yie.

3. Ɔsomafo Paul hyɛɛ no nuanom Christianfo nkuran dɛ wɔnyɛ dɛn, na ebɛnadze ntsi a? (Ephesusfo 3:​14-19)

³ Nsɛm bi wɔ Bible mu a, ɔyɛ dzen dɛ yɛbɛtse ase. Naaso sɛ yɛyɛ nsɛm a ɔtse dɛm no mu nhwehwɛmu kɔ ekyir a, ɔbɔboa  hɛn ma yaatse Bible no ase yie. Ɔsomafo Paul hyɛɛ no nuanom Christianfo nkuran dɛ wɔnyer hɔnho nsua Nyankopɔn n’Asɛm no mbrɛ ɔbɛyɛ a wobotum ‘ehu nokwar no ne tɛtɛr, ne tsentsen, no krɔn nye mbrɛ no mu dɔ no.’ Sɛ wɔyɛ dɛm a, ɔbɛma ‘wɔagye ndwow na woetsintsim’ wɔ gyedzi no mu. (Kenkan Ephesusfo 3:​14-19.) Dɛmara na ɔsɛ dɛ hɛn so yɛyɛ. Hom mma yensusu kwan a yebotum afa do ahwehwɛ Nyankopɔn n’Asɛm no mu akɔ ekyir mbrɛ ɔbɛyɛ a yɛbɛtse ase yie no ho.

4. Ebɛnadze na yebotum ayɛ ama yaatwe abɛn Jehovah kɛse? Ma ho nhwɛdo.

⁴ Hɛn Christianfo dze, yɛmmpɛ dɛ Bible mu mfitsiasesɛm no ara dɔɔ so ma hɛn. Hɛn enyi gye ho dɛ yebosua ‘Nyankopɔn adze a no mu dɔ no’ na sunsum krɔnkrɔn no so boa hɛn ma yɛyɛ dɛm. (1 Cor. 2:​9, 10) Ibotum dze esi w’enyi do dɛ ibosua ndzɛmba a no mu dɔ no na ɔbɔboa wo ma aabɛn Jehovah kɛse. Dɛ nhwɛdo no, ibotum esua mbrɛ osii daa ɔdɔ edzi kyerɛɛ n’asomfo wɔ tsetse mber mu no ho adze akɔ ekyir, na ɔno bɛma ehu dɛ ɔdɔ woara so. Afei so, ibotum esua kwan a Jehovah kyerɛɛ dɛ Israelfo no mfa do nsom no no ho adze, na edze atoto kwan a Christianfo fa do som no ndɛ no ho. Anaadɛ ibotum esua nkɔnhyɛ ahorow a Jesus maa ɔbaa mu aber a nna ɔreyɛ no som edwuma wɔ asaase do no ho adze akɔ ekyir.

5. Bible mu asɛm bi wɔ hɔ a ebɛpɛ dɛ eyɛ mu nhwehwɛmu kɔ ekyir anaa?

⁵ Nyimpa binom a wɔyer hɔnho sua Bible no, wobisaa hɔn Bible mu nsɛm a no mu dɔ a wɔpɛ dɛ wosua ho adze kɔ ekyir. Yebohu nsɛm a wɔkae no bi wɔ adakaba a wɔato dzin “ Nsɛm Bi A Ibotum Esua Ho Adze.” Sɛ edze Watch Tower Publications Index anaa Buukuu A Jehovah Adasefo Dze Yɛ Nhwehwɛmu no yɛ nsɛm a ɔtsetse dɛm ho nhwehwɛmu a, w’enyi bɛgye paa. Sɛ eyɛ Bible mu nsɛm a no mu dɔ ho nhwehwɛmu kɔ ekyir a, ɔbɛhyɛ wo gyedzi dzen na aboa wo ma eenya “Nyankopɔn no ho nyimdzee.” (Mbɛ. 2:​4, 5) Dze besi ha yi, hom mma yɛnhwɛ Bible mu nsɛm a no mu dɔ a yebotum ayɛ mu nhwehwɛmu akɔ ekyir no mu bi.

6. (a) Ebɛn nsonsonee na ɔwɔ nhyehyɛɛ nye botae mu? (b) Ebɛnadze ntsi na yebotum aka dɛ Jehovah no botae ma nyimpa na asaase no bɛtsena hɔ daa? (Ephesusfo 3:11)

⁶ Ɔwodze, ma yɛnhwɛ dza Bible no ka fa Nyankopɔn no botae ho. Hyɛ no nsew dɛ, ɔsor nhyehyɛɛ na ɔsor botae koraa. Nhyehyɛɛ tse dɛ kwan pɔtsee bi a ibotum afa do akɔ beebi a epɛ dɛ ekɔ. Sɛ kwan no siw a, irunntum nnkodu beebi a epɛ dɛ ekɔ no. Naaso yebotum dze botae atoto beebi pɔtsee a yɛpɛ dɛ yɛkɔ no ho. Yebotum afa akwan ahorow pii do ekodu beebi a yɛpɛ dɛ yɛkɔ no. Iyi kyerɛ dɛ, sɛ kwan a yɛnam do no siw mpo a, yebotum afa kwan fofor do ekodu hɔ. Enyigyesɛm nye dɛ, Jehovah dze no nkakrankakra ama yeehu ne ‘daa tsirmpɔw’ anaa no botae wɔ Bible no mu. (Hwɛ Ephesusfo 3:11 ho nkyerɛkyerɛmu no.) ‘Jehovah wɔ botae ma biribiara a ɔyɛ,’ dɛm ntsi obotum afa kwan biara do ama no botae aaba mu. (Mbɛbusɛm 16:4) Na dza Jehovah yɛ biara so bɛtsena hɔ daa. Ntsi Jehovah no botae nye dɛn, na ebɛn nsesa na ɔayɛ ama no botae aba mu?

7. Aber a hɛn awofo a wodzi kan no yɛɛ asoɔdzen no, ebɛnadze na Jehovah yɛe dze sesaa kwan a ɔbɛfa do ama no botae aba mu no? (Matthew 25:34)

⁷ Nyankopɔn maa hɛn awofo a wodzi kan no hun botae a ɔwɔ ma hɔn. Nna ɔsɛ dɛ ‘wɔwo, na wɔdɔr, na wɔhyɛ asaase ma, na wonya asaase do mbowa nyinara do tum.’ (Gen. 1:28) Aber a Adam na Eve yɛɛ Jehovah no do asoɔdzen no, wɔnye hɔn asefo nyina bɛyɛɛ nyimpa a bɔn wɔ hɔnho. Naaso eyi amma Jehovah no botae annsesa. Mbom ɔsesaa kwan a ɔbɛfa do ama dɛm botae no aba mu no. Hɔ no ara na ɔyɛɛ nhyehyɛɛ dze Ahendzi bi sii hɔ wɔ sor. Nna dɛm Ahendzi no bɛma no botae ma adasamba na asaase yi aba mu. (Kenkan Matthew 25:34.) Jehovah ne ber a ɔsɛ mu no, ofi ɔdɔ mu maa n’Abakan no baa asaase yi do bɛkaa dɛm Ahendzi no ho asɛm na ɔdze no nkwa yɛɛ werdam dze gyee hɛn fii bɔn na owu mu. Ɔno ekyir no, Jehovah nyaan Jesus ma ɔsanee kɔr sor na ɔkɛyɛɛ Nyankopɔn n’Ahendzi no do Hen. Naaso ndzɛmba pii wɔ hɔ a yebotum esua afa Nyankopɔn no botae ho.

8. (a) Ebɛnadze tsitsir na Bible no ka ho asɛm? (b) Dɛ mbrɛ Ephesusfo 1:​8-11 ka no, ebɛnadze paa na ɔda Jehovah n’akoma do dɛ ɔbɛyɛ? (Hwɛ mfonyin a ɔwɔ Ɔweɔn-Aban yi enyim no.)

⁸ Asɛntsitsir a Bible no ka ho asɛm nye dɛ, Jehovah nam n’Ahendzi a Christ dzi do Hen no do bɛma no botae aba mu wɔ asaase do. Na iyi bɛma ne dzin ho atsew. Jehovah rennsesa no botae da. Ɔahyɛ bɔ dɛ ɔbɛma dza ɔaka nyina aba mu pɛpɛɛpɛ. (Isa. 46:​10, 11; Heb. 6:​17, 18) Nyankopɔn ne ber a ɔsɛ mu no, ɔbɛma asaase no adan Paradise. Na Adam na Eve hɔn asefo a bɔn biara nnyi hɔnho na wɔyɛ dza ɔtsen no dze enyigye bɛtsena ‘ase daa.’ (Ndw. 22:26) Naaso nnyɛ iyi nkotsee na Jehovah abɔ ne tsirmu dɛ ɔbɛyɛ ama hɛn. Dza ɔda n’akoma do paa nye dɛ, ɔbɛka n’abɔdze a ɔwɔ sor na asaase do nyina abɔ mu. Sɛ ɔba no dɛm a, abɔdze a wɔtse ase nyina bɛbrɛ hɔnho adze ahyɛ Jehovah no tumdzi ase. (Kenkan Ephesusfo 1:​8-11.) Sɛ ehwɛ kwan a Jehovah fa do ma no botae ba mu no a, ɔyɛ nwanwa paa na ɔka akoma.

9. Sɛ yɛkenkan Bible no a, ebɛn kwan do na ɔboa hɛn ma yehu dza obesi daakye?

⁹ Hom mma yɛnhwɛ nkɔm a Jehovah hyɛe wɔ Eden ture no mu no. Dɛm nkɔnhyɛ no wɔ Genesis 3:15. b Ɔma yehu nsɛm ahorow a nna obesisi a ɔbɛma dza Nyankopɔn abɔ ne tsirmu no aba mu. Naaso nna mfe mpempem pii  botwa mu ansaana iyi aba mu. Dɛ nhwɛdo no, Nyankopɔn kaa kyerɛɛ Abraham dɛ asenyi bi befi n’ebusua mu abɛyɛ Christ no, naaso nna ɔbɛgye mfe pii ansaana iyi aba mu. (Gen. 22:​15-18) Ɔno ekyir wɔ afe 33 H.B. no, wɔkaa Jesus ne nantsir dɛ mbrɛ nna wɔaka ato hɔ no. (Andw. 3:​13-15) Nkɔnhyɛ no ne fa a otwa tun nye dɛ wɔbɛpɛkyɛw Satan ne tsir. Ofi ndɛ kesi dɛ mfe 1,000 no bɛba n’ewiei no na dɛm nkɔnhyɛ yi bɛba mu. (Nyi. 20:​7-10) Sɛ ɔtan a ɔda Satan ne nhyehyɛɛ nye Jehovah n’ahyehyɛdze no ntamu no reba ewiei a, dza obesi no, Bible no aka ho nsɛm pii akyerɛ hɛn.

10. (a) Ebɛn nsɛm na ɔrennkyɛr obesisi? (b) Yebesi dɛn esiesie hɛnho? (Hwɛ ase hɔ asɛm no.)

¹⁰ Ɔwodze dwendwen nsɛm akɛse a Bible no aka dɛ obesisi no ho. Odzi kan, amanaman no bɛpaa mu aka “asomdwee nye ahotɔ” ho asɛm! (1 Thess. 5:​2, 3) Sɛ amanaman no tow hyɛ ator som nyina do a, prɛko pɛ ahohiahia kɛse no bɛhyɛ ase. (Nyi. 17:16) Ɔno ekyir no, ɔbɛyɛ dɛ asɛnkyerɛdze kɛse besi na wobohu “nyimpa Ba no dɛ ɔreba wɔ sor nsuwusiw do, wɔ ahoɔdzen nye enyimnyam kɛse mu.” (Matt. 24:30) Afei, Jesus bobu adasamba atsɛn, na ɔdze nyimpa a wɔyɛ hɔnho tse dɛ nguan no egyina nkyɛn na ɔdze hɔn a wɔyɛ hɔn adze dɛ mpɔnkye no so egyina nkyɛn. (Matt. 25:​31-33, 46) Dɛm aber no, Satan bɔkɔ do asoɛr etsia Jehovah. Osiandɛ ɔtan Nyankopɔn no nkorɔfo kɔkɔɔkɔ ntsi, obepiapia amanaman a wɔaka hɔnho abɔ mu a Bible no frɛ hɔn Gog a ɔwɔ Magog asaase do no ma wɔaato ahyɛ Nyankopɔn no nkorɔfo do. (Ezek. 38:​2, 10, 11) Sɛ odu beebi a, wɔbɛfa hɔn a wɔasera hɔn a wɔaka wɔ asaase do no akɔ sor ma wɔaakɛka Jesus nye ɔsor abɔfodɔm no ho ma wɔaako Har–​Magedon ko no. Iyi na ɔdze ahohiahia kɛse no bɛba n’ewiei. c (Matt. 24:31; Nyi. 16:​14, 16) Ɔno ekyir no, Christ ne Mfrenhyia Apem Tumdzi no bɛhyɛ ase edzi asaase do tum.—Nyi. 20:6.

11. Ebɛn nhyira na erohwɛ kwan dɛ wo nsa bɛka daakye? (Hwɛ mfonyin no so.)

¹¹ Afei dze, dwendwen dza obesi wɔ Mfrenhyia Apem no n’ewiei no ho hwɛ. Bible no ka dɛ, hɛn Bɔfo no ‘dze mber a onnyi ewiei  ahyɛ hɛn akoma mu.’ (Ɔsɛnk. 3:11) Dwendwen mbrɛ eyi besi ama enye Jehovah ntamu ayɛ kama no ho hwɛ. Bɛn Yehowa nwoma no krataafa 319 ka asɛm bi a ɔka akoma paa. Ɔka dɛ: “Sɛ yɛtsena ase mfe ɔhaha pii, mfe mpempem, anaa mfe ɔpepepem pii mpo a, dza yebosua afa Jehovah Nyankopɔn ho dze, piigyan. Ɔno mpo no, yebohu dɛ yɛwɔ ndzɛmba pa pii a ɔsɛ dɛ yesua fa Jehovah ho. . . . Yɛkɔ Paradise a, mbrɛ hɔ besi ayɛ dɛw no dze, yerunntum nnka mpo. Yebenya hokwan ayɛ ndzɛmba ahorow pii, na biribiara nnyi hɔ a ɔbɛyɛ dɛw akyɛn hokwan a yebenya abɛn Jehovah daa no.” Naaso dɛm aber no nnyae mmbaa yi, sɛ yerusua Nyankopɔn n’Asɛm no a, ebɛnadze bio na yebotum agye ber dze ayɛ ho nhwehwɛmu?

12. Yebesi dɛn ama hɛn enyi do ahwɛ sor? Ma ho nhwɛdo.

¹² Nyankopɔn n’Asɛm no ma yehu beebi a Jehovah tse ho asɛm kakra. Ɔkaa dɛ: “Ɔtse sor noho.” (Isa. 33:5) Bible no san so ma yehu ndzɛmba a ɔyɛ nwanwa fa Jehovah nye n’ahyehyɛdze no fa a ɔwɔ sor no ho. (Isa. 6:​1-4; Dan. 7:​9, 10; Nyi. 4:​1-6) Dɛ nhwɛdo no, yebotum esua anwanwadze a Ezekiel hunii aber a ‘ɔsor buebuei, na ohun Nyankopɔn ho enyido-adzehu’ no ho adze.—Ezek. 1:1.

13. Dɛ mbrɛ Hebrewfo 4:​14-16 ma yehu no, etse nka dɛn wɔ dwuma a Jesus ridzi wɔ sor no ho?

¹³ Ɔwodze dwendwen dwuma a Jesus ridzi wɔ sor dɛ hɛn Hen na Ɔsɔfopanyin a ɔtse hɛn ase no ho hwɛ. Yɛnam no do tum kɔ Nyankopɔn “adom ahengua” no enyim wɔ mpaabɔ mu, na yɛhwehwɛ no hɔ mboa wɔ “ber a ɔsɛ mu.” (Kenkan Hebrewfo 4:​14-16.) Dza Jehovah na Jesus ayɛ ama hɛn, nye dza wogu do reyɛ ma hɛn no, ɔnnsɛ dɛ yɛma da kor mpo pa hɛn tsir do a yɛronndwendwen ho. Ɔsɛ dɛ ɔdɔ a wɔwɔ ma hɛn no ka hɛn akoma paa na ɔhyɛ hɛn ma yɛdze nsi na ahokeka som Jehovah.—2 Cor. 5:​14, 15.

14. Adze tsitsir a yebotum ayɛ dze akyerɛ dɛ hɛn enyi sɔ dza Jehovah na Jesus ayɛ ama hɛn nye dɛn? (Hwɛ mfonyin ahorow no so.)

 ¹⁴ Kwan kor a yebotum afa do akyerɛ dɛ hɛn enyi sɔ dza Nyankopɔn na ne Ba no ayɛ ama hɛn nye dɛ yɛbɔbɔ mbɔdzen aboa nkorɔfo ma wɔaabɛyɛ Jehovah n’Adasefo nye Jesus n’esuafo. (Matt. 28:​19, 20) Dɛm na ɔsomafo Paul so yɛe dze kyerɛɛ dɛ n’enyi sɔ dza Nyankopɔn na Christ ayɛ ama no no. Nna onyim dɛ dza Jehovah pɛ nye dɛ ‘ɔgye nyimpa nyina nkwa, na wobenya nokwar no ho nyimdzee a odzi mu.’ (1 Tim. 2:​3, 4) Dɛm ntsi ɔyeer noho yɛɛ asɛnka edwuma no dze boaa nyimpa pii mbrɛ ɔbɛyɛ a ‘ɔbɛgye binom nkwa.’—1 Cor. 9:​22, 23.

15. Dɛ mbrɛ Ndwom 1:2 ma yehu no, ebɛnadze na ɔbɛma hɛn enyi agye?

¹⁵ Ɔdwontofo no kaa nyimpa a ɔwɔ enyigye na woesi no yie ho asɛm dɛ, ‘n’enyi gye Jehovah ne mbra ho’ na “ɔdwen ne mbra ho adzekyee na adzesaa,” na iyi fata paa. (Ndw. 1:​1-3) Joseph Rotherham a ɔkyerɛ Bible ase kɔ kasa fofor mu no kaa dɛm kyerɛwsɛm yi ho asɛm wɔ no buukuu a wɔato dzin Studies in the Psalms mu. Ɔkaa dɛ, ɔsɛ dɛ obi “n’enyi gye Nyankopɔn n’akwankyerɛ ho araa ma ɔhwehwɛ, osua, na ɔgye mber pii dwendwen ho.” Ɔdze kaa ho dɛ, obi a n’enyi gye ho dɛ ɔbɛkenkan Bible no, “sɛ da kor mpo pa ne tsir do na ɔannkenkan Bible no a, ɔtse dɛ mbrɛ ne da no ayɛ gyan.” Sɛ ekenkan Bible no, na eyɛ dza akenkan no ho nhwehwɛmu kɔ ekyir na ihu mbrɛ ɔnye nsɛm afofor hyia a, obotum aboa wo ma w’enyi aagye no sua ho. Sɛ yɛyɛ Nyankopɔn n’Asɛm no mu nhwehwɛmu kɔ ekyir a, hɛn enyi bɛgye paa!

16. Ebɛnadze na yebosusu ho wɔ adzesua a odzi hɔ no mu?

¹⁶ Nokwasɛm a ɔsom bo a Jehovah dze kyerɛkyerɛ hɛn no, ɔnnyɛ dzen dɛ yɛbɛtse ase. Adzesua a odzi hɔ mu no, yɛbɔhwɛ Bible mu nokwar a no mu dɔ no mu kor. Ɔno nye Jehovah no sunsum afamu asɔrfi kɛse a ɔsomafo Paul kaa ho asɛm wɔ ne krataa a ɔkyerɛwee kɛmaa ne mfɛfo Hebrewfo Christianfo no. Sɛ yɛyɛ dɛm asɛm a ɔhyɛ nkuran no ho nhwehwɛmu kɔ ekyir a, ɔbɛma hɛn enyi agye paa.