1. Ebɛn asɛm na Jesus kãa kyerɛɛ afarfo baanan bi, na ebɛnadze na wɔyɛe wɔ ho?

NNA Jesus n’esuafo Peter, Andrew, James, na John yɛ afarfo. Obotum aba dɛ ɔyɛɛ hɔn nwanwa ber a Jesus kãa kyerɛɛ hɔn dɛ: “Hom mbedzi m’ekyir, na mebɛyɛ hom nyimpa enufo” * no. Dɛm esuafo yi yɛɛ hɔn adze dɛn? Bible no kã dɛ: “Ntsɛmara wɔdaan asawu no gyae na wobedzii n’ekyir.” (Matt. 4:18-22) Dɛm gyinae a wosii no sesaa hɔn asetsena hɔn nkwa nda nyina. Dɛ nkyɛ wɔbɔkɔ po ekeyi nam no, nna ‘wobeyi nyimpa’ mbom. (Luke 5:10) Dɛmara so na ndɛ, Jesus to nsa frɛ nyimpa a wɔwɔ akoma pa na wɔdɔ nokwar no dɛ wɔmbɛyɛ edwuma a ɔtse dɛm. (Matt. 28:19, 20) Jesus ne nsato a ɔnye dɛ yɛmbɛyɛ hɔn a woyi nyimpa no, ana agye ato mu?

2. Sɛ yerisi gyinae dɛ yɛbɛyɛ Jesus n’esuafo a, ebɛnadze ntsi na ɔwɔ dɛ yɛfa no enyibersɛm? Ebɛnadze na ɔbɔboa hɛn ma yeesi gyinae a ɔtse dɛm?

² Bi a wɔnye wo esũa Bible no ber tsentsen bi na ayɛ nsesa wɔ w’abrabɔ mu ma ntsi, epɛ dɛ isi gyinae dɛ ebɛyɛ ɔdawurbɔfo. Sɛ w’adwen nnsi wo pi wɔ nsa a Jesus ato afrɛ wo no ho a, mma w’abaw mu mmbu. Bi a, w’adwen a onnsi wo pi no da no edzi dɛ inyim dɛ gyinae a ɔtse dɛm no ho hia. Ɔwɔ mu, Bible no kã dɛ Peter nye hɔn a wɔka noho no gyaa hɔn asawu no guu hɔ “ntsɛmara.” Naaso ɔno nnkyerɛ dɛ Peter nye no nua no ennsusu ho ansaana worisi dɛm gyinae no. Wohun Jesus na wɔgyee no dzii dɛ ɔno nye Messiah no, abosoom esia twaa mu ana worisi gyinae a ɔtse dɛm. (John 1:35-42) Bi a dɛmara na wo so  esũa pii afa Jehovah na Jesus ho, na epɛ dɛ ekɔ do twe bɛn Jehovah. Naaso, onnyi dɛ isi gyinae a ɔtse dɛm aber a ennsese kaw a ɔwɔ mu no. Ebɛnadze na ɔboaa Peter, Andrew, nye nyimpa afofor ma wosii gyinae dɛ wɔbɛyɛ Jesus n’esuafo?

3. Ebɛn su ahorow na ɔbɛma enya ɔpɛ a no mu yɛ dzen dɛ ebɛgye Jesus ne nsato no ato mu?

³ Jesus n’esuafo a wodzi kan no, nna wɔyɛ nsiyɛfo, wonyim edwuma yie, wɔwɔ akokodur, na afei so, wotum hyɛ hɔnho do yɛ ndzɛmba a ɔsɛ dɛ wɔyɛ. Ekyingye biara nnyi ho dɛ dɛm su ahorow yi ara na ɔboaa hɔn ma wɔbɛyɛɛ nyimpa enufo. Adzesua yi mu no, yɛbɔhwɛ mbrɛ ibesi enya dɛm su ahorow yi mbrɛ ɔbɛyɛ a ibotum abɛyɛ Christ no suanyi a otu mpon.

4. Nna ebɛnadze ntsi na Peter kɔ po keyi nam?

⁴ Nna Peter kɔ po keyi nam dze hwɛ n’ebusua, naaso nna ɔnnyɛ edwuma a ɔyɛ no kɛkɛ. Nna Peter n’enyi gye apoyɛ ho papaapa. (John 21:3, 9-15) Afei so, n’enyi bɛgyee ho dɛ obonu nyimpa. Jehovah boaa Peter ma ɔbɛyɛɛ obi a otu mpon wɔ edwuma a ɔtse dɛm mu.​—Andw. 2:14, 41.

5. Sɛ yɛhwɛ asɛm a ɔwɔ Luke 5:8-11 no a, nna ebɛnadze ntsi na Peter suro? Ebɛnadze na obotum aboa hɛn ma yeedzi nsusui a ɔtse dɛm do?

⁵ Yɛkã asɛm no osiandɛ yɛdɔ Jehovah, iyi nye adze tsitsir a ɔka hɛn ma yɛyɛ dɛm edwuma yi. Sɛ yɛtse nka dɛ yɛmmfata a, ɔdɔ a yɛwɔ ma Jehovah no botum aboa hɛn ma yeedzi nsusui a ɔtse dɛm do. Aber a Jesus too nsa frɛɛ Peter dɛ ɔmbɛyɛ obi a onu nyimpa no, ɔkãa kyerɛɛ no dɛ: “Mma nnsuro.” (Kenkan Luke 5:8-11.) Nna Peter nnsuro dza obotum ato no ber a ɔabɛyɛ Jesus no suanyi no. Mbom, nam beberee a Jesus boaa hɔn ma wɔpae no na ɔmaa osuroi. Anwanwadze a Jesus  yɛe yi maa Peter tsee nka dɛ ɔmmfata dɛ ɔnye Jesus bɛyɛ edwuma. Bi a woara so, sɛ edwen dza ɔsɛ dɛ eyɛ ama aayɛ Jesus no suanyi ho a, ɔma ebɔ hũ. Sɛ dɛm a, hyɛ ɔdɔ a ewɔ ma Jehovah, Jesus, nye wo nyɛnko nyimpa no mu dzen, na iyi bekenyan wo ma aagye Jesus ne nsato no ato mu, na aabɛyɛ obi a onu nyimpa.​—Matt. 22:37, 39; John 14:15.

6. Ebɛnadze bio na okenyan hɛn ma yɛkã asɛm no?

⁶ Dza okenyan hɛn ma yɛkã asɛm no, hom mma yensusu no mu bi so ho. Yɛpɛ dɛ yedzi Jesus n’ahyɛdze a ɔnye dɛ ‘hom nkɔ nkɛyɛ esuafo’ no do. (Matt. 28:19, 20) Afei so, yɛkã asɛm no osiandɛ yehu nkorɔfo dɛ “wɔahaw na wɔapetse,” na ohia papaapa dɛ wosũa nokwasɛm a ɔfa Ahendzi no ho. (Matt. 9:36) Jehovah pɛ dɛ nyimpa nyina nya nokwar no ho nyimdzee a odzi mũ na ɔgye hɔn nkwa.​—1 Tim. 2:4.

7. Ebɛn kwan do na Romefo 10:13-15 ma yehu dɛ asɛnka edwuma no ho hia?

⁷ Asɛnka edwuma no gye nkorɔfo nkwa. Sɛ yesusu dɛm asɛm yi ho a, ɔbɛka hɛn ma yaakã asɛm no. Hɔn a wɔkɔ po no, nam a wonu no, wɔtɔn anaa wɔdze yɛ edziban dzi. Naaso hɛndze, “yenu” nyimpa mbrɛ ɔbɛyɛ a wobenya nkwa.​—Kenkan Romefo 10:13-15; 1 Tim. 4:16.

8-9. Ebɛnadze na ɔsɛ dɛ farnyi hu, na ebɛnadze ntsi a?

⁸ Jesus n’aber do no, nna ɔwɔ dɛ Israelnyi a ɔyɛ farnyi no hu nam pɔtsee a ɔpɛ dɛ onu. (Lev. 11:9-12) Nkyii so, ɔwɔ dɛ ohu beebi a obenya nam a ɔtse dɛm. Esunam taa boa hɔnho ano wɔ nsu no ne fã beebi a oye ma hɔn nye beebi a wobenya edziban pii so edzi. Ber a farnyi dze kɔ nsu do no, aso no ho hia? Asɛmpatserɛwnyi bi a ɔtse Pacific supɔw bi do hun dɛ ber pɔtsee bi wɔ hɔ a ɔyɛ ber pa a wɔdze pa nam. Onua bi a ɔwɔ supɔw no do no too nsa frɛɛ no dɛ ɔnye no nkɔ po. Asɛmpatserɛwnyi no kãa dɛ, “Nyoo matse. Ɔkyena anapa ndɔnkron menye wo bɔkɔ.” Onua no kãa dɛ, “Innyim dza erekã. Nnyɛ ber a oye ma hɛn na yɛkɔ po, na mbom ber a oye a yebotum apa nam.”

⁹ Dɛmara na hɔn a wɔyɛ nyimpa enufo no yɛe wɔ tsetse Christianfo no hɔn aber do. Wɔkɔr beebi a nna wobenya nyimpa akã asɛm no akyerɛ hɔn. Nnyɛ ɔno nko, wɔkɔr hɔ wɔ ber a hɔn nsa bɛka hɔn. Dɛ nhwɛdo no Jesus n’ekyirdzifo no kãa asɛmpa no wɔ asɔrfi nye nhyiamudan mu, efiefi mu, nye guado. (Andw. 5:42; 17:17; 18:4) Hɛn so, ɔsɛ dɛ yehu ber nye bea a yebohu nyimpa a wɔwɔ hɛn asaasesin no mu na yaakã asɛmpa no akyerɛ hɔn. Ɔsɛ dɛ yɛyɛ nsesa wɔ hɛn mber nhyehyɛɛ mu ama yeetum akã asɛmpa no akyerɛ nkorɔfo wɔ ber nye bea a hɛn nsa bɛka hɔn.​—1 Cor. 9:19-23.

10. Ebɛn edwindadze ahorow na Jehovah n’ahyehyɛdze no dze ma hɛn?

¹⁰ Ɔsɛ dɛ farnyi biara nya edwindadze a ɔfata na ohu mbrɛ obesi dze ayɛ edwuma yie. Dɛmara na ɔsɛ dɛ hɛn so yenya edwindadze a ɔfata a yebotum dze ayɛ edwuma. Jesus dze ahyɛdze a no mu da hɔ maa n’esuafo a ɔbɛma woehu mbrɛ wobesi enu nyimpa. Ɔkyerɛɛ hɔn ndzɛmba a wɔmfa, bea a wɔnkɛkã asɛm no, nye asɛm a wɔnkã. (Matt. 10:5-7; Luke 10:1-11) Ndɛ, Jehovah n’ahyehyɛdze no ma hɛn Edwindadze Etsitsir A Yɛdze Kyerɛkyerɛ a ɔboa hɛn ma yɛyɛ asɛnka edwuma no yie. * Nnyɛ ɔno nko, wɔkyerɛ hɛn mbrɛ yebesi dze dɛm edwindadze etsitsir yi akyerɛkyerɛ. Dɛm ntsetsee yi boa hɛn ma yɛdze ahotodo kã asɛm no. Afei so, ɔboa hɛn ma yehu mbrɛ yebesi ayɛ akyerɛkyerɛfo pa.​—2 Tim. 2:15.

11. Hɔn a wonu nyimpa no, ebɛnadze ntsi na ɔsɛ dɛ wonya akokodur?

¹¹ Ɔsɛ dɛ afarfo nya akokodur. Ɔtɔ da a, wohyia tsebea a ɔyɛ hũ wɔ po do. Wɔtaa yɛ edwuma anafua na ehum so tum tu wɔ po do ber a wɔnnhwɛ kwan. Dɛmara na hɔn a wonu nyimpa so, ɔsɛ dɛ wonya akokodur. Sɛ yɛhyɛ ase kã asɛm no na yɛma afofor hu dɛ yɛyɛ Jehovah Adasefo a, hɛn ebusuafo botum asoɛr etsia hɛn, hɛn anyɛnkofo botum edzi hɛnho fɛw, na bi a nyimpa binom so rinntsie asɛm a yɛdze nam no. Iyinom nyina yɛ ɔsoɛrtsia a ɔtse dɛ ehum. Naaso, onnyi dɛ ɔyɛ hɛn nwanwa, osiandɛ Jesus kãa dɛ ɔbɔsoma n’ekyirdzifo akɔ beebi a nkorɔfo bɔsoɛr etsia hɔn.​—Matt. 10:16.

12. Dɛ mbrɛ Joshua 1:7-9 ma yehu no, ebɛnadze na ɔbɛma yenya akokodur?

¹² Ibesi dɛn enya akokodur? Odzi kan, ɔsɛ dɛ egye dzi dɛ ndɛ na ndɛ nyina, Jesus fi sor kyerɛ asɛnka edwuma no kwan. (John 16:33; Nyi. 14:14-16) Afei, anohoba a Jehovah abɔ dɛ ɔbɔhwɛ wo no, ɔsɛ dɛ ehyɛ gyedzi a ewɔ wɔ mu no mu dzen. (Matt. 6:32-34) Sɛ ema wo gyedzi kɔ do yɛ dzen a, ibenya akokodur kɛse. Peter nye n’anyɛnkofo daa gyedzi kɛse edzi ber a wogyaa hɔn edwuma hɔ kedzii Jesus n’ekyir no. Dɛmara na wo so edaa gyedzi kɛse edzi ber a emaa w’ebusuafo na w’anyɛnkofo hun dɛ ahyɛ ase nye Jehovah Adasefo rusũa adze, na enye hɔn kɔ asafo nhyiamu! Ekyingye biara nnyi ho dɛ ayɛ nsesa kɛse wɔ w’abrabɔ mu mbrɛ ɔbɛyɛ a edze Jehovah ne tsenenee  gyinapɛn bɔbɔ wo bra. Nna iyi so hwehwɛ dɛ inya gyedzi na akokodur. Ber a ekɔ do yɛ ndzɛmba a ɔbɛma enya akokodur no, ibotum enya ahotodo dɛ ‘Jehovah wo Nyankopɔn dzi w’ekyir wɔ beebiara a ebɔkɔ.’​—Kenkan Joshua 1:7-9.

13. Ebɛn kwan do na mpaabɔ na nsɛm a yɛbɔdwendwen ho no botum aboa hɛn ma yeenya akokodur?

¹³ Ebɛnadze bio na ibotum ayɛ ama eenya akokodur? Bɔ mpaa serɛ Jehovah dɛ ɔmma wo akokodur. (Andw. 4:29, 31) Jehovah betsie mpaa a ebɔ no, na orinngya wo da. Ɔayɛ krado dɛ aber biara ɔbɔboa wo. Bio so, ibotum adwendwen akwan ahorow a Jehovah faa do gyee binom wɔ tsetse mber mu no ho. Mbrɛ Jehovah esi aboa wo ma egyina nsɛndzendzen ano, na ɔama wo ahoɔdzen ma etum ayɛ nsesa wɔ w’abrabɔ mu no so, ibotum adwendwen ho. Nokwasɛm nye dɛ, Nyia odzii no nkorɔfo enyim ma wɔfaa Po Memen no mu no botum aboa wo ma aabɛyɛ Christ no suanyi. (Ex. 14:13) Ibotum enya gyedzi tse dɛ mbrɛ ɔdwontofo no nyae no. Ɔdwontofo no kãa dɛ: ‘Jehovah dzi m’afã; murunnsuro: Ebɛnadze na nyimpa botum ayɛ me?’​—Ndw. 118:6.

14. Ebɛnadze na yesũa fi Masae na Tomoyo hɔn asɛm no mu?

¹⁴ Adze fofor a obotum aboa hɛn ma yeenya akokodur nye dɛ yɛbɔhwɛ mbrɛ Jehovah esi aboa nkorɔfo a wofi awosu mu fɛr adze, naaso wɔabɛyɛ nkorɔfo a wɔwɔ akokodur no. Hom mma yensusu hɛn akyerɛbaa a wɔfrɛ no Masae n’asɛm no ho nhwɛ. Nna ɔfɛr adze, ntsi nna ɔtse nka dɛ orunntum nnkɔ asɛnka da. Nkorɔfo a onnyim hɔn a ɔnye hɔn bɛkasa no, nna ɔtse nka dɛ ɔtse dɛ mbrɛ ɔrofow fasu tsentsenntsen bi. Dɛm ntsi, nna osusu dɛ orunntum nnyɛ asɛnka edwuma no da. Naaso, ɔbɔɔ mbɔdzen soronko dɛ ɔbɛhyɛ ɔdɔ a ɔwɔ ma Nyankopɔn nye ne nyɛnko nyimpa no mu dzen. Ɔdwendween mbrɛ mber a yɛwɔ mu yi gye ntsɛmpɛ fa no ho, na ɔbɔɔ mpaa serɛɛ Jehovah dɛ ɔmboa no ma onnya ɔpɛ a no mu yɛ dzen mfa nkã asɛm no. Ekyir yi, odzii suro a nna ɔwɔ no do na ɔbɛyɛɛ daa kwampaaefo mpo. Jehovah botum aboa adawurbɔfo a wɔyɛ afofor no ma ‘woeenya akokodur.’ Hom mma yensusu akyerɛbaa bi so a wɔfrɛ no Tomoyo n’asɛm no ho nhwɛ. Aber a ɔhyɛɛ asɛnka ase fofor no, fiewura bi tseaa mu guu no do dɛ: “Memmpɛ Jehovah Adasefo enyim ahwɛ!” nna ɔkaa n’abow no bɔɔ mu. Tomoyo ammbɔ hũ, mbom ɔkãa kyerɛɛ nyia ɔnye no nam no dɛ: “Etsee asɛm a fiewura no kãe? Nna onnyi dɛ mekã asɛm biara, nankasa ehu dɛ meyɛ Jehovah Adasefo no mu kor. Ɔyɛ me enyigye papaapa!” Yɛrekasa yi, Tomoyo yɛ daa kwampaaefo.

15. Sɛ asɛnka edwuma no yɛ dzen ma hɛn a, yebesi dɛn ayɛ hɛn adze tse dɛ afarfo? Ebɛnadze ntsi na iyi ho hia ma Christianfo?

¹⁵ Afarfo a wotum pa nam pii no, wɔhyɛ hɔnho do yɛ ndzɛmba a ɔsɛ dɛ wɔyɛ, na wɔnnyɛ mbɔtohɔ. Dɛ nhwɛdo no, wɔsoɛr ntsɛm, wɔyɛ edwuma kesi dɛ wobowie, na sɛ wimu tsebea nnyɛ mpo a, wɔkɔ do yɛ hɔn edwuma. Sɛ yebotum egyina mu ekodu ewiei na yeewie edwuma a wɔdze ahyɛ hɛn nsa no a, ohia dɛ hɛn so, yɛhyɛ hɛnho do na yɛyɛ ndzɛmba a ɔsɛ dɛ yɛyɛ no.​—Matt. 10:22.

16. Ebɛnadze na ɔbɔboa hɛn ma yaahyɛ hɛnho do na yaayɛ ndzɛmba a ɔsɛ dɛ yɛyɛ no?

¹⁶ Dɛ yɛbɛhyɛ hɛnho do na yaayɛ ndzɛmba a ɔsɛ dɛ yɛyɛ no, ɔnnyɛ su a wɔdze woo hɛn. Yefi awosu mu pɛ dɛ yɛfa ɔkwan a ɔyɛ mberɛw do yɛ adze. Naaso, ndzɛmba a ohia papaapa a ɔwɔ dɛ yɛyɛ no, ɔtɔ da a, ne yɛ nnda famu. Dɛm ntsi, ɔsɛ dɛ yehu mbrɛ yebesi ahyɛ hɛnho  do. Jehovah nam no sunsum krɔnkrɔn no do boa hɛn ma yɛyɛ dɛm.​—Gal. 5:22, 23.

17. Dɛ mbrɛ kyerɛwtohɔ a ɔwɔ 1 Corinthfo 9:25-27 kyerɛ no, ebɛnadze na ɔsomafo Paul kãa dɛ ɔwɔ dɛ ɔyɛ ama oeetum ahyɛ noho do?

¹⁷ Nna ɔsomafo Paul yɛ obi a otum hyɛ noho do. Naaso, ɔkãa dɛ ɔwɔ dɛ ɔhyɛ no honam “amen,” mbrɛ ɔbɛyɛ a obotum ayɛ dza ɔtsen. (Kenkan 1 Corinthfo 9:25-27.) Ɔhyɛɛ afofor so nkuran dɛ wɔnhyɛ hɔnho do na wɔnyɛ adze nyina “fɛfɛɛfɛw esiado esiado.” (1 Cor. 14:40) Ɔsɛ dɛ yetum hyɛ hɛnho do na yɛkɔ do yɛ Nyankopɔn no som mu ndzɛmba tse dɛ asɛmpa no a yɛbɛkã na yaakyerɛkyerɛ nkorɔfo no.​—Andw. 2:46.

18. Ebɛnadze na sɛ yɛyɛ a, ɔbɛma Jehovah ebu hɛn dɛ yɛrosow aba?

¹⁸ Sɛ farnyi kɔ po na onya nam pii a, ɔkyerɛ dɛ oesi no yie. Naaso, asɛnka edwuma no nntse dɛm. Nnyɛ nyimpadodow a yɛbɔboa hɔn ma wɔaaba Jehovah n’ahyehyɛdze no mu no na ɔbɛkyerɛ dɛ yɛasow aba. (Luke 8:11-15) Sɛ yɛkɔ do kã asɛmpa no kyerɛ afofor na yɛkyerɛkyerɛ hɔn a, Jehovah bu hɛn dɛ yɛrosow aba. Ebɛnadze ntsi a? Osiandɛ yɛayɛ setsie ama ɔno na ne Ba no.​—Mark 13:10; Andw. 5:28, 29.

19-20. Yɛwɔ siantsir tsitsir bi ntsi a ɔwɔ dɛ yɛkã asɛm no ndɛ. Ɔno nye dɛn?

¹⁹ Aman ahorow bi mu no, wɔma kwan ma afarfo kɔ po wɔ abosoom pɔtsee bi mu. Aman a ɔtse dɛm mu no, sɛ ber a afarfo dze kɔ po no reba ewiei a, wohu dɛ edwuma no gye ntsɛmpɛ. Dɛ nkorɔfo a yenu nyimpa no, yɛwɔ siantsir fofor ntsi a ɔwɔ dɛ yɛkã asɛm no ndɛ. Ɔnye dɛ: Wiadze yi n’ewiei rebɛn ntsɛntsɛm! Mber a aka ma yɛdze aayɛ edwuma a ɔgye nkwa yi no, woetwa no tsia koraa. Dɛm ntsi, mma nntwentweɔn w’ananadze anaa enntse nka dɛ ɔsɛ dɛ inya ber a oye ana edze woho aahyɛ edwumason a ɔtse dɛm mu.​—Ɔsɛnk. 11:4.

²⁰ Yɛ biribi fa hyɛ ɔpɛ a ewɔ dɛ ebɛkã asɛm no mu dzen, sũa Bible no mu nsɛm pii, nya akokodur, na hyɛ woho do yɛ ndzɛmba a ɔsɛ dɛ eyɛ no. Enye nyimpa bɔbor ɔpepem awɔtwe a wɔkã asɛmpa no wɔ wiadze nyina no mbɔ mu nyɛ edwuma, na ibenya Jehovah mu enyigye. (Neh. 8:10) Si wo bo dɛ edze wo ber pii bɛyɛ edwuma a ɔtse dɛm kesi dɛ Jehovah bɛkã dɛ yeewie. Adzesua a odzi hɔ mu no, hɛn bo a yeesi dɛ yɛbɔkɔ do ayɛ Ahendzi asɛmpaka edwuma no dɛ nyimpa enufo no, yɛbɔhwɛ akwan ebiasa a yebotum afa do ahyɛ mu dzen.