1-2. Dɛ mbrɛ 1 Timothy 6:20 kyerɛ no, nna ebɛnadze na ɔwɔ dɛ Timothy yɛ?

MPƐN pii no, yɛdze hɛn ndzɛmba a ɔsom bo no ma afofor dɛ wɔnhwɛ do mma hɛn. Dɛ nhwɛdo no, bi a yɛdze hɛn sika bɔkɔ akɔto sikakorabea. Sɛ yɛdze sika no kɔto hɔ a, yɛhwɛ kwan dɛ wɔbɔhwɛ do yie amma wɔaannyew anaa binom ennkowia. Ntsi sɛ wɔkã dɛ wɔdze biribi a ɔsom bo ahyɛ obi ne nsa dɛ ɔnhwɛ do a, yɛtse ase.

² Kenkan 1 Timothy 6:20. Ɔsomafo Paul maa Timothy hun dɛ ne nsa aka biribi a ɔsom bo​—Nyankopɔn ne tsirmpɔw ma adasamba ho nyimdzee a odzi mũ. Afei so, wɔdze ho kwan fofor hyɛɛ Timothy ne nsa dɛ ‘ɔnkã asɛm no’ na ɔnyɛ “asɛmpakafo edwuma no.” (2 Tim. 4:2, 5) Paul hyɛɛ Timothy nkuran dɛ ɔnkora dza wɔdze ahyɛ ne nsa no do. Dɛ mbrɛ nna ɔtse wɔ Timothy n’afamu no, hɛn so wɔdze ndzɛmba a ɔsom bo ahyehyɛ hɛn nsa. Ɔyɛ ebɛn ndzɛmba a? Na ebɛnadze ntsi na ɔwɔ dɛ yɛbɔ ndzɛmba a ɔsom bo a Jehovah dze ama hɛn no ho ban?

3-4. Ebɛnadze na ɔma nokwasɛm a ɔwɔ Bible mu no som bo?

³ Jehovah efi ayamuyie mu ama yeenya nokwasɛm a ɔsom bo a ɔwɔ n’Asɛm Bible mu no ho nyimdzee a odzi mũ. Dɛm nokwasɛm yi som bo osiandɛ ɔkyerɛ hɛn mbrɛ yebesi nye Jehovah enya ebusuabɔ a no mu yɛ dzen, na ɔkyerɛ hɛn dza yɛyɛ a ɔbɛma yenya enyigye ankasa wɔ asetsena mu. Sɛ yɛgye dɛm nokwasɛm yi to mu na yɛdze bɔ hɛn bra a, yɛdze hɛnho fi ator nkyerɛkyerɛ nye ɔbrakyew a ɔdze nyimpa yɛ nkowaa no ho.​—1 Cor. 6:9-11.

⁴ Siantsir fofor ntsi a nokwasɛm a ɔwɔ Nyankopɔn n’Asɛm mu no som bo nye dɛ, Jehovah da no edzi kyerɛ nyimpa ahobrɛadzefo a ‘wɔpɛ onnyiewiei nkwa’ no. (Andw. 13:48) Nyimpa a wɔtse dɛm no, ɔkwan a Jehovah fa do ma hɛn nsa ka dɛm nokwasɛm no, wɔgye to mu. (Matt. 11:25; 24:45) Nokwasɛm a ɔwɔ  Bible mu no, sɛ yeennya mboa a, hɛnankasa runntum nntse ase. Na dɛ mbrɛ nokwar no si som bo no, yerunntum mmfa biribiara nntoto ho.​—Mbɛ. 3:13, 15.

5. Ebɛn ho kwan na Jehovah dze ama hɛn?

⁵ Jehovah dze ho kwan bi ama hɛn; ɔnye dɛ yɛnkyerɛkyerɛ afofor nokwasɛm a ɔfa noho nye ne tsirmpɔw ho. (Matt. 24:14) Jehovah n’asɛm no a yɛkã kyerɛ afofor no ho hia papaapa osiandɛ, ɔboa nkorɔfo ma wɔba bɛka Jehovah n’ebusua no ho. Iyi ma wonya ho kwan dɛ wɔbɛtsena ase daa. (1 Tim. 4:16) Dɛ yetum yɛ pii wɔ asɛnka edwuma no mu anaadɛ yenntum nnyɛ pii no, yɛroboa edwuma tsitsir a wɔreyɛ wɔ hɛn aber yi do no. (1 Tim. 2:3, 4) Hwɛ ho kwan a yeenya dɛ yɛroboa Nyankopɔn wɔ dɛm edwuma yi mu!​—1 Cor. 3:9.

6. Hɔn a woemmbu ho kwan a wɔwɔ no dɛ ɔsom bo no, ebɛn asɛm too hɔn?

⁶ Timothy n’aber no, Christianfo binom emmbu ho kwan a nna wɔwɔ dɛ wɔnye Nyankopɔn bɔbɔ mu ayɛ edwuma no dɛ ɔsom bo. Osiandɛ nna Demas dɔ wiadze no ntsi, ho kwan a nna ɔwɔ dɛ ɔnye Paul bɔ mu yɛ edwuma no ogyaa mu too hɔ. (2 Tim. 4:10) Obotum aba dɛ Phygelus na Hermogenes gyaa ɔsom edwuma no osiandɛ nna wosuro dɛ wobehyia ɔsoɛrtsia dɛ mbrɛ Paul hyiae no. (2 Tim. 1:15) Hymenaeus, Alexander, nye Philetus bɛyɛɛ awaafo na wogyaa Jehovah no som. (1 Tim. 1:19, 20; 2 Tim. 2:16-18) Obotum aba dɛ nna dɛm nkorɔfo yi nyina yɛ Christianfo a wɔbɔ hɔnho mbɔdzen, naaso wɔammfa hɔn adwen ennsi ndzɛmba a nna ɔsom bo papaapa no do.

7. Mbrɛ ɔbɛyɛ a Satan ne nsa bɛka hɛn no, ebɛn mbɔdzen na ɔrobɔ?

⁷ Ebɛn mbɔdzen na Satan robɔ dɛ ɔbɛma ndzɛmba a ɔsom bo a Jehovah dze ama hɛn no efi hɛn nsa? Hom mma yensusu akwan a Satan fa do daadaa hɛn no bi ho. Ɔnam TV, sene, intanɛt, dawurbɔ nkrataa, nwoma nye magazine ahorow do kamfo nsusui nye ndzeyɛɛ bi a ɔmmfata kyerɛ hɛn. Dza ɔrohwehwɛ ara nye dɛ yebedzi nsusui nye ndzeyɛɛ a ɔtse dɛm ekyir, na nkakrankakra yeegyaa dɛ yɛbɔsom Jehovah. Bio so, ɔnam etsipɛmfo nhyɛdo nye ɔsoɛrtsia do bɔ mbɔdzen dɛ yebegyaa asɛnka edwuma no yɛ. Afei so, ɔbɔ mbɔdzen dɛ ɔbɛdaadaa hɛn ma yeetsie awaafo hɔn ator nkyerɛkyerɛ a wɔkã dɛ ɔyɛ “nyimdzee” no ama yeefi nokwar no mu.​—1 Tim. 6:20, 21.

8. Ebɛnadze na isũa fi onua bi a wɔfrɛ no Daniel n’asɛm no mu?

⁸ Sɛ yɛannyɛ ahwɛyie a, nkakrankakra nokwar no a yɛwɔ no befi hɛn nsa. Hom mma yensusu Daniel * n’asɛm no ho. Nna ɔyɛ obi a ɔpɛ video game. Ɔkãa dɛ: “Aber a mehyɛɛ ase  bɔɔ video game no nna medzi mfe du. Ahyɛse no dze nna game a mobɔ no asɛm biara nnyi ho. Naaso nkakrankakra, mehyɛɛ ase bɔɔ video game a esumansɛm nye basabasayɛ wɔ mu.” Owiee ase no, nna da biara ɔdze bɛyɛ ndɔnhwer 15 bɔ video game. Ɔtoaa do dɛ: “Mo mu dze nna minyim dɛ game a ɔtse dɛm a mobɔ nye mber tsentsen a medze bɔ no rotwe me fi Jehovah ho. Naaso nna me tsibowa nnkã hwee nnkyerɛ me bio osiandɛ afei dze nna metse nka dɛ Bible mu ngyinadosɛm mmfa moho.” Sɛ yɛannhwɛ yie a, enyigyedze botum ama aayɛ mberɛw dɛ yebegyaa nokwar no mu. Sɛ ɔba no dɛm a, bi a ndzɛmba a ɔsom bo a Jehovah dze ama hɛn no befi hɛn nsa koraa.

9. Dɛ mbrɛ 1 Timothy 1:18, 19 kyerɛ no, Paul dze Timothy totoo woana ho?

⁹ Kenkan 1 Timothy 1:18, 19. Paul dze Timothy totoo sordaanyi ho na ɔhyɛɛ no nkuran dɛ ɔnkɔ do ‘nkõ ɔkõ pa no.’ Nnyɛ honam afamu ɔkõ na Paul kãa ho asɛm no, mbom ɔyɛ sunsum afamu dze. Ebɛn akwan do na Christianfo tse dɛ nsordaafo a woridzi akõ? Dɛ Christ no nsordaafo no, ebɛn su ahorow na ɔwɔ dɛ yɛda no edzi? Hom mma yɛnhwɛ esuadze enum a yebotum enya efi Paul ne mfatoho no mu. Dɛm esuadze yi bɔboa hɛn ma yaakɔ do akora nokwar no do.

10. Sɛ wɔkã nyamesompa a ɔkyerɛ dɛn, na ebɛnadze ntsi na yehia?

¹⁰ Bɔ nyamesompa ho mbɔdzen. Sordaanyi papa no, odzi nokwar. Ɔbɔkõ dzendzenndzen agye obi a ɔdɔ no anaa biribi a ɔsom no bo. Paul hyɛɛ Timothy nkuran dɛ ɔmbɔ nyamesompa ho mbɔdzen. Dza nyamesompa kyerɛ nye dɛ, obi befi nokwardzi mu dze noho atakyer Nyankopɔn ho. (1 Tim. 4:7) Mpɛn dodow a ɔdɔ a yɛwɔ ma Nyankopɔn reyɛ kɛse no, mpɛn dodow no ara na ɔpɛ a yɛwɔ dɛ yɛbɔkora nokwar no do no bɛyɛ kɛse.​—1 Tim. 4:8-10; 6:6.

11. Ebɛnadze ntsi na no ho hia dɛ yɛhyɛ hɛnho do?

¹¹ Hyɛ woho do na yɛ dza ɔtsen. Sɛ sordaanyi bi botum ayɛ krado ama ɔkõ a, ɔsɛ dɛ aber biara osiesie noho yie. Timothy kɔr do nye Nyankopɔn nyaa ebusuabɔ a no mu yɛ dzen osiandɛ ɔdze Paul n’afotu a ɔnye dɛ onguan akɔndɔ bɔn, ɔnda suban pa edzi na ɔngye ber nye ne mfɛfo Christianfo mbɔ no yɛɛ edwuma. (2 Tim. 2:22) Nna iyi hwehwɛ dɛ ɔhyɛ noho do. Hɛn so, ohia dɛ yɛhyɛ hɛnho do ama yeetum akõ etsia akɔndɔ bɔn. (Rom. 7:21-25) Bio so ohia dɛ yɛhyɛ hɛnho do ama yeetum eyi nyimpasu dadaw no egu na yaahyɛ fofor no. (Eph. 4:22, 24) Nkyii so, sɛ ɔba no dɛ yɛaberɛ mpo a, no ho behia dɛ yɛbɔ hɛnho mbɔdzen kɔ asafo nhyiamu.​—Heb. 10:24, 25.

12. Yebesi dɛn etu mpon wɔ akwan a yɛdze Bible no dzi dwuma mu?

¹² Ɔsɛ dɛ sordaanyi sũa mbrɛ ɔdze n’akodze bedzi dwuma. Sɛ noho botum akokwaa a, ɔsɛ dɛ ɔtaa yɛ dɛm. Dɛmara na hɛn so, ɔsɛ dɛ yetu mpon wɔ kwan a yɛdze Nyankopɔn n’Asɛm no dzi dwuma no mu. (2 Tim. 2:15) Yebotum esũa dza ɔbɔboa hɛn ma yeetu mpon no ho adze wɔ asafo nhyiamu ase. Naaso sɛ yebotum aboa nkorɔfo ma wɔaagye edzi dɛ nokwasɛm a ɔwɔ Bible mu no som bo ankasa a, ɔsɛ dɛ yɛyɛ hɛn da biara da Bible akenkan no. Ɔsɛ dɛ yɛdze Nyankopɔn n’Asɛm no hyɛ hɛn gyedzi dzen. Naaso iyi kɔ ekyir kyɛn Bible no a yɛbɛkenkan no kɛkɛ. Iyi hwehwɛ dɛ yɛbɔdwendwen dza yɛkenkan no ho na yɛyɛ nhwehwɛmu wɔ hɛn nwoma ahorow mu ama yeetum atse Kyerɛwnsɛm no ase yie na yɛdze aayɛ edwuma. (1 Tim. 4:13-15) Sɛ yɛyɛ dɛm a yebotum dze Nyankopɔn n’Asɛm no akyerɛkyerɛ nkorɔfo. Bio so, iyi kyerɛ dɛ ɔnnsɛ dɛ yɛkenkan Bible mu asɛm bi kyerɛ hɔn kɛkɛ, mbom no, ɔsɛ dɛ yɛboa hɛn etsiefo no mbrɛ ɔbɛyɛ a wobotum  atse kyerɛwsɛm no ase na woeehu mbrɛ osi fa hɔnankasa hɔnho. Sɛ yɛkɔ do kenkan Bible no daa a, yebotum etu mpon wɔ kwan a yɛdze Nyankopɔn n’Asɛm a ofi sunsum mu kyerɛkyerɛ nkorɔfo no mu.—2 Tim. 3:16, 17.

13. Dɛ mbrɛ Hebrewfo 5:14 ma yehu no, ebɛnadze ntsi na ɔsɛ dɛ yɛda nhumu edzi?

¹³ Da nhumu edzi. Ɔsɛ dɛ sordaanyi tum hu esian a obesi na okwetsir esian no. Ɔsɛ dɛ hɛn so yehu tsebea ahorow a obotum ahaw hɛn ama yaayɛ hɛn adze ntsɛm eyi no akwa. (Mbɛ. 22:3; kenkan Hebrewfo 5:14.) Dɛ nhwɛdo no, ɔsɛ dɛ yɛpaw ndzɛmba a hɛnankasa yɛyɛ dze gyegye hɛn enyi nye dza yɛhwɛ no nyansa mu. TV do dwumadzi ahorow nye sene a woyi no taa kamfo ɔbrakyew. Nyankopɔn kyir ndzeyɛɛ a ɔtsetse dɛm, na ekyingye biara nnyi ho dɛ hɔn a wɔdze hɔnho hyɛ mu no hyia ɔhaw na hɔn ndzeyɛɛ no ka afofor so. Dɛm ntsi, yɛpow enyigyedze biara a nkakrankakra ɔbɛma yɛahwer ɔdɔ a yɛwɔ ma Jehovah no.​—Eph. 5:5, 6.

14. Ebɛn kwan do na nhumu boaa Daniel?

¹⁴ Daniel a yeedzi kan akã noho asɛm no hun dɛ ɔnnyɛ papa dɛ ɔbɔbɔ video game a esumansɛm nye basabasayɛ wɔ mu. Ntsi, ɔyɛɛ nhwehwɛmu wɔ Watchtower Library do hwehwɛɛ nsɛm a ɔbɔboa no ma oeetum edzi ne haw no do. Dɛm a ɔyɛe no kaa no dɛn? Ogyaa video game a ɔnnyɛ papa no bɔ. Afei, ogyaa game a nna ɔbɔ wɔ intanɛt do no, na hɔn a ɔnye hɔn bɔ no so ogyaa hɔn ekyir dzi. Daniel kãa dɛ, “Dɛ nkyɛ mobɔbɔ video game no, nna menye m’anyɛnkofo a wɔwɔ asafo no mu no bɔ fɛkuw. Afei nna meyɛ ndzɛmba nketsenketse dze gyegye m’enyi.” Ndɛ, Daniel som dɛ ɔkwampaaefo nye asafo mu panyin.

15. Ebɛnadze ntsi na atorsɛm a awaafo kekã no yɛ hũ?

¹⁵ Dɛ mbrɛ Timothy yɛe no, hɛn so, ɔsɛ dɛ yɛda nhumu edzi na yehu ɔhaw a obotum efi awaafo hɔn ator nkyerɛkyerɛ mu aba no. (1 Tim. 4:1, 7; 2 Tim. 2:16) Dɛ nhwɛdo no, bi a wɔbɔbɔ mbɔdzen dɛ wɔbɛkã atorsɛm afa hɛn nuanom ho, anaadɛ wɔbɛma yenya adwen a ɔmmfata wɔ Jehovah n’ahyehyɛdze no ho. Atorsɛm a ɔtse dɛm botum ama hɛn gyedzi asɛɛ. Ntsi, ɔnnsɛ dɛ yɛgye atorsɛm a ɔtsetse dɛm no dzi. Ebɛnadze ntsi a? Osiandɛ hɔn a wɔkekã nsɛm a ɔtse dɛm no yɛ “nyimpa a wɔaprɔw adwen mu, na nokwar abɔ hɔn.” Dza dɛm nkorɔfo yi pɛ ara nye “ekyingye nye nokotwa,” kyerɛ dɛ wɔnye hɛn beyiyi nsɛm  ano na wɔnye hɛn aatwe manso. (1 Tim. 6:4, 5) Wɔpɛ dɛ yɛgye hɔn ndaadaa no to mu na yɛhwer ahotodo a yɛwɔ wɔ hɛn nuanom mu no.

16. Ndzɛmba a obotum atwetwe hɛn adwen bɛn na ɔsɛ dɛ yekwetsir?

¹⁶ Mma biribiara nntwetwe w’adwen. Dɛ “Christ Jesus sordaanyi pa” no, nna ɔnnsɛ dɛ Timothy ma honam afamu ndzɛmba nye botae fofor biara twetwe n’adwen, mbom nna ɔsɛ dɛ ɔdze n’adwen si ɔsom edwuma no do. (2 Tim. 2:3, 4) Dɛ mbrɛ Timothy yɛe no, onnyi dɛ yɛma ɔpɛ a yɛwɔ dɛ yebenya honam afamu ndzɛmba pii no twetwe hɛn adwen. “Ahonya ndaadaa” botum ama yaahwer ɔdɔ a yɛwɔ ma Jehovah, enyisɔ a yɛwɔ ma Bible, nye ɔpɛ a yɛwɔ dɛ yɛbɛkã Bible mu nokwasɛm akyerɛ afofor no. (Matt. 13:22) Ɔsɛ dɛ yɛma hɛn asetsena ba famu na yɛkɔ do dze hɛn mber nye hɛn ahoɔdzen ‘hwehwɛ Ahendzi no kan.’​—Matt. 6:22-25, 33.

17-18. Sɛ yebotum abɔ ebusuabɔ a yɛnye Jehovah wɔ no ho ban a, ebɛnadze na yebotum ayɛ?

¹⁷ Yɛ krado dɛ ebɛyɛ biribi ntsɛmara. Dza sordaanyi bɛyɛ dze abɔ noho ban no, ɔsɛ dɛ odzi kan dwen ho. Ndzɛmba a Jehovah dze ahyɛ hɛn nsa no, sɛ yebotum abɔ ho ban a, ɔsɛ dɛ yetu anamɔn ntsɛm ber a yeehu ɔhaw bi. Ebɛnadze na ɔbɔboa hɛn ma yeetum etu ho anamɔn ntsɛm? Dɛ mbrɛ yɛbɛyɛ hɛn adze ber a yeehu biribi a ɔyɛ hũ no, ɔsɛ dɛ yedzi kan dwen ho.

¹⁸ Ma yɛnyɛ mfatoho yi. Sɛ wɔreyɛ dwumadzi ahorow bi a, ɔyɛ a wɔtaa kyerɛ hɔn a wɔaba dwumadzi no ase no beebi a wobotum afa epue. Wɔyɛ dɛm ansaana dwumadzi no mpo ahyɛ ase. Ebɛnadze ntsi a? Wɔdze dɛm nkaabɔ no to gua ama sɛ esian bi si a hɔn a wɔwɔ dwumadzi no ase no eehu beebi a wobotum afa epue. Dɛmara na hɛn so ɔsɛ dɛ yedzi kan dwendwen dza yɛbɛyɛ ber a yɛdze intanɛt ridzi dwuma, yɛrohwɛ sene anaa TV do dwumadzi bi na ndwamansɛm, basabasayɛ anaa awaafo nsɛm epue wɔ mu no. Sɛ yesiesie hɛnho ma dza obotum esi a, yɛbɔbɔ ebusuabɔ a yɛnye Jehovah wɔ no ho ban na hɛnho aatsew wɔ Jehovah n’enyi do.​—Ndw. 101:3; 1 Tim. 4:12.

19. Sɛ yɛbɔ ndzɛmba a ɔsom bo a Jehovah dze ahyɛ hɛn nsa no ho ban a, ebɛn nhyira na yebenya?

¹⁹ Ndzɛmba a ɔsom bo a Jehovah dze ahyɛ hɛn nsa no, ɔsɛ dɛ yɛbɔ ho ban. Bi nye nokwasɛm a ɔwɔ Bible mu a ɔsom bo no, nye ho kwan a yɛwɔ dɛ yɛdze kyerɛkyerɛ afofor. Sɛ yɛbɔ ho ban a yebenya tsibowa pa na asetsena a enyigye wɔ mu. Afei so, hɛn enyi bɛgye dɛ yɛaboa nkorɔfo ma woehu Jehovah. Jehovah bɔboa hɛn ma yeetum akora dza wɔdze ahyɛ hɛn nsa no do.​—1 Tim. 6:12, 19.