1-2. Ɔsɛnkafo 11:6 fa Ahendzi asɛnka edwuma no ho dɛn?

AMAN ahorow bi mu no, sɛ nyimpa binom tse asɛmpa no a, ɔyɛ a hɔnho per hɔn dɛ wobosũa pii aka ho. Ebɔhwɛ no, nna dza wɔrepɛ atse ara nye no! Aman ahorow bi mu so, nkorɔfo nngye Nyankopɔn anaa Bible no nndzi. Beebi a etse no, nkorɔfo yɛ hɔn adze dɛn wɔ asɛmpa no ho? Ɔmmfa ho mbrɛ nkorɔfo si yɛ hɔn adze wɔ asɛmpa no ho no, Jehovah hwɛ kwan dɛ yɛbɔkɔ do akã asɛm no kesi dɛ ɔbɛkã dɛ yeewie.

² Asɛnka edwuma no bɛba ewiei wɔ ber a Jehovah ahyɛ mu, ɔno ekyir no “ewiei no bɛba.” (Matt. 24:14, 36) Naaso kesi dɛ dɛm aber no bɔso no, yebesi dɛn dze asɛm a ɔnye dɛ “mma nnyi wo nsa mmfi ho” * no ayɛ edwuma?​—Kenkan Ɔsɛnkafo 11:6.

3. Ebɛnadze na yebosusu ho wɔ adzesua yi mu?

³ Adzesua a odzi iyi enyim mu no, yɛhwɛɛ ndzɛmba anan bi a ɔsɛ dɛ yɛyɛ ama yaakɔ do etu mpon dɛ “nyimpa enufo.” (Matt. 4:19) Adzesua yi mu no, yɛbɔhwɛ akwan ebiasa a yebotum afa do ahyɛ hɛn bo a yeesi dɛ yɛbɛkã asɛm no mu dzen, ɔmmfa ho nsɛndzendzen biara a yebehyia no. Yebohu siantsir a no ho hia dɛ (1) yɛkɔ do dze asɛnka edwuma no dzi kan wɔ hɛn asetsena mu, (2) yenya abotar, na (3) yɛkɔ do nya gyedzi a no mu yɛ dzen.

4. Ebɛnadze ntsi na ɔsɛ dɛ yɛkɔ do dze hɛn adwen si edwuma a Jehovah dze ama hɛn dɛ yɛnyɛ no do?

⁴ Jesus maa n’ekyirdzifo no hun suban a nyimpa bɛda no edzi, nye nsɛm a obesisi wɔ nda a odzi ekyir no mu. Nna onyim  dɛ dza ɔbɔkɔ do no botum ama n’ekyirdzifo no eeyi hɔn adwen efi asɛnka edwuma no do. Iyi ntsi, ɔkãa kyerɛɛ n’esuafo no dɛ wɔnkɔ do “nweɔn.” (Matt. 24:42) Noah n’aber do no, ndzɛmba pii twetwee nkorɔfo hɔn adwen fii kɔkɔbɔ a ɔdze mae no do. Ndɛ so, ndzɛmba kor no ara botum atwetwe hɛn adwen. (Matt. 24:37-39; 2 Pet. 2:5) Dɛm ntsi, ɔsɛ dɛ yɛkɔ do dze hɛn adwen si edwuma a Jehovah dze ama hɛn dɛ yɛnyɛ no do.

5. Ebɛn kwan do na Asomafo Ndwuma 1:6-8 ma yehu beebi a asɛnka edwuma no mu bɛtserɛw ekodu?

⁵ Ndɛ, no ho hia papaapa dɛ yɛkɔ do dze hɛn adwen si Ahendzi asɛnka edwuma no do. Jesus hyɛɛ nkɔm dɛ, no wu ekyir no, n’ekyirdzifo bɔkɔ do akã asɛm no, na wɔbɛyɛ edwuma no akyɛn dza ɔyɛe ber a nna ɔwɔ asaase do no. (John 14:12) Jesus no wu ekyir no, n’esuafo no mu binom sanee kɔr po. No wusoɛr ekyir no, ɔyɛɛ anwanwadze maa dɛm esuafo yi nyaa nam pii. Iyi ekyir no, Jesus maa wɔtsee ase dɛ, asɛnka na esuafoyɛ edwuma a wɔbɛyɛ no ho hia kyɛn edwuma fofor biara. (John 21:15-17) Aka ber tsiabaa bi ma Jesus akɔ sor no, ɔkãa kyerɛɛ n’esuafo no dɛ, asɛnka edwuma a ɔahyɛ ase no, nnyɛ Israel nko na wɔbɛyɛ mbom no mu bɛtserɛw akɔ nsaase pii do. (Kenkan Asomafo Ndwuma 1:6-8.) Mfe bi ekyir no, Jesus maa ɔsomafo John nyaa enyido-adzehu bi, na ɔkyerɛɛ no dza obesi wɔ “Ewuradze ne da no mu.” * Ndzɛmba a John hunii no, no mu kor yɛ enyido-adzehu a ɔyɛ nwanwa. Nna ɔbɔfo bi kitsa “onnyiewiei asɛmpa bi” rekɛkã akyerɛ “aman, nye mbusuakuw nye kasa nye nkorɔfo.” (Nyi. 1:10; 14:6) Ɔda edzi kofee dɛ, ndɛ Jehovah ne pɛ nye dɛ yɛbɛyɛ asɛnka edwuma a wɔreyɛ wɔ wiadze nyina no bi, kesi dɛ ɔbɛba ewiei.

6. Yebesi dɛn dze asɛnka edwuma no edzi kan wɔ hɛn asetsena mu?

⁶ Sɛ yɛdwendwen dza Jehovah reyɛ dze  aboa hɛn no ho a, ɔbɛma yɛakɔ do dze asɛnka edwuma no edzi kan wɔ hɛn asetsena mu. Dɛ nhwɛdo no, ɔnam nwoma a wotsintsim nye dza wɔdze gu elɛktrɔnek mfir do, dza wɔyɛ no audio nye video, nye dwumadzi ahorow a wɔdze fa intanɛt do ma hɛn sunsum afamu edziban. Dwen iyi ho hwɛ o: Wɔ hɛn wɛbsaet no do no, ibenya nsɛm pii wɔ kasa bɔbor 1,000 mu! (Matt. 24:45-47) Wiadze no mu no, amanyɛsɛm, nyamesom, nye sika a afofor wɔ anaadɛ wonnyi bi no ama nyimpa mu akyekyɛ. Naaso Nyankopɔn n’asomfo bɔbor ɔpepem awɔtwe na wɔdze koryɛ abɔ mu rosom wɔ wiadze nyina. Dɛ nhwɛdo no, Fida, April 19, 2019 no, Adasefo a wɔwɔ wiadze nyinara bɔɔ mu susuu da biara da asɛm no ho. Dɛm da no ewimbir no, nyimpa a hɔn dodow si 20,919,041 hyiaa mu dzii Jesus no wu ho Nkaadzi afahyɛ no. Sɛ yɛhwɛ ho kwan a yeenya dɛ yehu dɛm anwanwadze yi wɔ hɛn aber yi do, nye ho kwan a yɛwɔ dɛ yenya mu kyɛfa no a, ɔka hɛn ma yesi hɛn bo dɛ yɛbɔkɔ do akã Ahendzi ho asɛmpa no.

7. Ebɛn kwan do na Jesus no nhwɛdo no botum aboa hɛn ma yaakɔ do dze asɛnka edwuma no edzi kan wɔ hɛn asetsena mu?

⁷ Adze fofor a ɔbɛma yɛakɔ do dze asɛnka edwuma no edzi kan wɔ hɛn asetsena mu nye dɛ, yebosũasua nhwɛdo a Jesus yɛe no. Ɔamma biribiara ennsiw no kwan dɛ obedzi nokwar no ho dase. (John 18:37) Ɔamma Satan ammfa “wiadze ahenman nyina nye no mu enyimnyam” no anndaadaa no. Dɛmara so na ɔammpen do ber a nna nyimpa binom pɛ dɛ wɔkyer no ɔhen no. (Matt. 4:8, 9; John 6:15) Ɔamma honam afamu ahonyadze a obenya no anngye n’adwen. Dɛmara so na ɔamma ɔsoɛrtsia a no mu yɛ dzen a ohyiae no ammbɔ no hũ. (Luke 9:58; John 8:59) Sɛ yehyia hɛn gyedzi ho nsɔhwɛ, na yɛma ɔsomafo Paul n’afotu yi tsena hɛn adwen mu a, yebotum akɔ do dze asɛnka edwuma no edzi kan wɔ hɛn asetsena mu. Ɔhyɛɛ Christianfo nkuran dɛ wonsũasua Jesus no nhwɛdo no ‘amma wɔaammberɛ anntɔ bitsi’!​—Heb. 12:3.

8. Sɛ obi wɔ abotar a, ɔbɛyɛ dɛn? Ebɛnadze ntsi na ohia dɛ yenya abotar ndɛ?

⁸ Sɛ obi wɔ abotar a, ɔbɔtweɔn ekesi dɛ tsebea bi bɛsesa. Dɛ yɛrohwɛ kwan dɛ tsebea bi a ɔnnyɛ befi hɔ o, dɛ yɛrohwɛ kwan dɛ hɛn akoma do adze bi a yɛdze ber tsentsen atweɔn bɛba mu o, no ho hia dɛ yenya abotar. Nna nkɔnhyɛnyi Habakkuk rohwɛ kwan dzendzenndzen dɛ nsɛmbɔn a ɔrokɔ do wɔ Judah no bɛba ewiei. (Hab. 1:2) Nna Jesus n’esuafo no susu dɛ Ahendzi no bɛba “amonmu hɔ ara” na wɔaabɛgye hɔn efi Rome tumdzi ase. (Luke 19:11) Hɛn so, yɛrohwɛ kwan dɛ Nyankopɔn n’Ahendzi no bɛba ebeyi ndzɛmba bɔn nyinara efi hɔ, na ɔdze wiadze fofor a atseneneefo bɛtsena mu no aba. (2 Pet. 3:13) Naaso, ɔsɛ dɛ yenya abotar na yɛtweɔn kesi dɛ ber a Jehovah ahyɛ no bɔso. Ma yɛnhwɛ akwan ahorow a Jehovah fa do kyerɛkyerɛ hɛn ma yenya abotar no mu bi.

9. Ebɛn nhwɛdo ahorow na ɔma yehu dɛ Jehovah wɔ abotar?

⁹ Jehovah ayɛ abotar ho nhwɛdo a ɔkyɛn biara ama hɛn. Ɔmaa Noah mber pii ma ɔdze paam adaka no na ɔyɛɛ edwuma dɛ “tsenenee sɛnkafo.” (2 Pet. 2:5; 1 Pet. 3:20) Ber a Jehovah kãa dɛ ɔbɛsɛɛ nyimpa ndzebɔnyɛfo a wɔwɔ Sodom na Gomorrah no, Abraham kɔr do bisaa no nsɛm pii wɔ adzeyɛ yi ho, naaso Jehovah nyaa abotar tsiee no. (Gen. 18:20-33) Israelman no a woenndzi Jehovah nokwar no so, ɔkɔr do nyaa hɔnho abotar kɛse mfe pii. (Neh. 9:30, 31) Ndɛ so, yetum hu dɛ Jehovah wɔ abotar, osiandɛ ɔma nyimpa a ɔpɛ dɛ wɔbɛyɛ n’anyɛnkofo no nyina mber pii mbrɛ ɔbɛyɛ  a wɔbɛba “mfehoekyir mu.” (2 Pet. 3:9; John 6:44; 1 Tim. 2:3, 4) Nhwɛdo a Jehovah ayɛ no boa hɛn ma yehu siantsir a ɔsɛ dɛ yenya abotar na yɛkɔ do kã asɛm no na yɛkyerɛkyerɛ afofor. Afei so, ɔnam mfatoho bi a ɔwɔ n’Asɛm mu no do kyerɛkyerɛ hɛn ma yenya abotar ho esuadze.

10. Mfatoho a ɔfa okuafo ho a ɔwɔ James 5:7, 8 no, ebɛn esuadze na ɔma yenya?

¹⁰ Kenkan James 5:7, 8. Mfatoho a ɔfa okuafo a odua adze ho no ma yenya abotar ho esuadze bi. Nokwasɛm nye dɛ, nduadzewa bi wɔ hɔ a onyin ntsɛntsɛm. Naaso nduadzewa piinara so wɔ hɔ a, ɔgye ber tsentsen ana woeenyin; nkanka dza ɔsow aba no. Israelfo hɔn aber do no, nna abosoom esia na ekuafo dze dua adze. Nna ekuafo dua adze ber a nsu ahyɛ ase rotɔ wɔ ɔbɛsɛber mu, na wotwa hɔn ndɔbaa ber a nsutɔber rokɔ ewiei wɔ esusowber mu. (Mark 4:28) Ɔnnda famu dɛ yebosũasua okuafo no n’abotar no, naaso nyansa wɔ mu dɛ yɛbɛyɛ dɛm.

11. Sɛ yenya abotar wɔ asɛnka edwuma no mu a, ɔbɔboa hɛn dɛn?

¹¹ Dɛ nyimpa a yɛtɔ sin no, ɔyɛ a hɛnho taa per hɛn dɛ yebohu dza obefi edwuma a yɛreyɛ mu aba. Naaso sɛ yɛpɛ dɛ hɛn ture mu nduadzewa sow aba a, ɔwɔ dɛ yɛma hɛn enyi ku ho, yɛdɔw ho na yegugu do nsu. Dɛmara na esuafoyɛ edwuma no so tse, ohia dɛ yɛkɔ do yɛ edwumadzen. Ɔbɛgye mber pii ana yeetum aboa hɛn Bible esuafo ma wɔaada ɔdɔ edzi na woeekwetsir dɛ wɔbɛyɛ enyimhwɛ. Abotar a yɛwɔ no remma hɛn abaw mu mmbu ber a afofor enntsie asɛmpa a yɛkã no. Sɛ afofor kyerɛ asɛmpa no ho enyigye mpo a, ɔsɛ dɛ yenya abotar. Yerunntum nnhyɛ Bible suanyi bi dɛ onnya gyedzi wɔ asɛm a yɛkã no mu. Jesus n’esuafo no mpo, nna ɔtɔ ber bi a ɔyɛ dzen ma hɔn dɛ wɔbɛtse dza ɔkyerɛkyerɛ hɔn no ase. (John 14:9) Hom mma yɛnkaa dɛ yebodua na yeegugu do nsu dze, naaso Nyankopɔn na ɔbɛma enyin.​—1 Cor. 3:6.

12. Ebɛnadze ntsi na ɔsɛ dɛ yɛda abotar edzi ber a yɛpɛ dɛ yɛkã asɛmpa no kyerɛ hɛn ebusuafo a wɔnnyɛ Adasefo no?

 ¹² Bi a ɔbɛyɛ dzen ama hɛn dɛ yɛbɛda abotar edzi ber a yɛpɛ dɛ yɛkã asɛmpa no kyerɛ hɛn ebusuafo a wɔnnyɛ Adasefo no. Tsebea a ɔtse dɛm mu no, ngyinadosɛm a ɔwɔ Ɔsɛnkafo 3:7 no botum aboa hɛn. Hɔ kã dɛ: ‘kommyɛ wɔ n’aber, na ɔkasa wɔ n’aber.’ Suban pa a yɛbɛda no edzi no botum ayɛ adasedzi ama hɛn ebusuafo. Naaso ɔsɛ dɛ yɛyɛ krado dɛ aber biara a ho kwan bobue no, yɛbɛkã asɛmpa no akyerɛ hɔn. (1 Pet. 3:1, 2) Ɔsɛ dɛ yɛdze nsi kã asɛm no na yɛkyerɛkyerɛ afofor. Naaso ɔsɛ dɛ yenya hɛn ebusuafo nye obiara ho abotar.

13-14. Ebɛn abotar na Nyankopɔn n’asomfo binom daa no edzi a yebotum esũasua?

¹³ Yebotum esũa abotar ho adze efi anokwafo a hɔnho nsɛm wɔ Bible mu no hɔ. Afei so, yebotum enya abotar ho esuadze efi Christianfo anokwafo a wɔwɔ hɛn aber yi do no hɔ. Nna Habakkuk rohwɛ kwan dzendzenndzen dɛ ndzebɔnyɛ nyinara bɛba ewiei. Naaso ɔdaa abotar edzi ber a ɔkãa dɛ: “Mibegyina m’aweɔmbea do.” (Hab. 2:1) Ɔsomafo Paul kãa dɛ ɔpɛ dɛ ‘owie’ no som edwuma no. Naaso ɔdze abotar kɔr do ‘dzii asɛmpa no ho dase.’​—Andw. 20:24.

¹⁴ Hom mma yensusu awarfo bi a wɔkɔr Gilead hɔn asɛm no ho nhwɛ. Wowiei no, wɔdze hɔn kɔr ɔman bi mu a nna Adasefo kakraabi na wɔwɔ hɔ. Afei so, nna ɔman no mu nyimpadodow no ara nnyɛ Christianfo. Nna nyimpa kakraabi na wɔwɔ ɔpɛ dɛ wobosũa Bible no. Naaso, nna hɔn a wɔnye hɔn wiee Gilead a wɔwɔ aman afofor do no bɔ hɔn amandzɛɛ dɛ wɔnye nyimpa pii rusũa adze, na wɔroboa hɔn ma wɔaabɛgye nokwar no. Ɔmmfa ho dɛ nna nyimpadodow no ara a wɔwɔ asaasesin no mu nntsie asɛm no, awarfo yi dze abotar kɔr do yɛɛ asɛnka edwuma no. Mfe awɔtwe ekyir ana hɔn Bible esuafo no mu kor robɔ esu. Iyi maa hɔn enyi gyee. Ebɛnadze na Bible mu nhwɛdo nye hɛn aber do dze yi ma yehu? Dɛm anokwafo yi enngyaa dɛ wɔdze nsi bɛyɛ hɔn edwuma anaadɛ woennyi hɔn nsa emmfi hɔn edwuma ho. Jehovah so hyiraa hɔn wɔ abotar a wɔdaa no edzi no ho. Ɔmbra dɛ yebosũasua “hɔn a wɔnam gyedzi nye abotar do nya anohoba no.”​—Heb. 6:10-12.

15. Ebɛn ɔkwan kor do na gyedzi hyɛ hɛn bo a yeesi dɛ yɛbɛkã asɛm no mu dzen?

¹⁵ Yɛwɔ gyedzi wɔ asɛm a yɛkã no mu, ntsi yɛwɔ ɔpɛ a no mu yɛ dzen dɛ yɛbɛkã akyerɛ nyimpa pii. Yɛsan so wɔ gyedzi wɔ anohoba ahorow a ɔwɔ Nyankopɔn n’Asɛm mu no mu. (Ndw. 119:42; Isa. 40:8) Yeehu dɛ Bible nkɔnhyɛ pii aba mu wɔ hɛn aber yi do. Afei so, yeehu mbrɛ nkorɔfo esi ayɛ nsesa wɔ hɔn abrabɔ mu ber a wɔhyɛɛ ase dze Bible no mu asɛm bɔɔ hɔn bra no. Dɛm adanse yi ma yɛgye dzi papaapa dɛ, ɔsɛ dɛ nyimpa biara tse Ahendzi ho asɛmpa no.

16. Dɛ mbrɛ Ndwom 46:1-3 ma yehu no, ebɛn kwan do na gyedzi a yɛwɔ wɔ Jehovah na Jesus mu no hyɛ hɛn bo a yeesi dɛ yɛbɛkã asɛm no mu dzen?

¹⁶ Bio so, yɛwɔ Jehovah no mu gyedzi osiandɛ asɛm a yɛkã no, ɔno nye ne Farbaa. Afei so, Jesus a ɔayɛ no Ahendzi no do Hen no, yɛwɔ gyedzi wɔ no mu. (John 14:1) Ɔmmfa ho tsebea biara a yehyia no, Jehovah bɔkɔ do ayɛ hɛn guandɔbea nye hɛn ahoɔdzen. (Kenkan Ndwom 46:1-3.) Nkyii so, yɛwɔ ahotodo dɛ Jesus wɔ sor a ɔdze tum na ahoɔdzen a Jehovah dze ama no no rekyerɛ asɛnka edwuma no kwan.​—Matt. 28:18-20.

17. Ma nhwɛdo a ɔkyerɛ siantsir a ɔwɔ dɛ yɛkɔ do kã asɛm no.

¹⁷ Gyedzi ma yenya awerɛhyɛmu wɔ Jehovah mu dɛ obehyira hɛn mbɔdzembɔ do. Ɔtɔ da a, ɔbɛyɛ dɛm wɔ akwan bi do a hɛn enyi  nnda. (Ɔsɛnk. 11:6) Dɛ nhwɛdo no, da biara, nyimpa mpempem pii hu hɛn trɔk na hɛn pon ahorow a yɛhyehyɛ nwoma wɔ do no. Aso iyi yɛ kwan a otu mpon a yɛfa do kã asɛm no? Nyew! Hɛn Ahendzi Som a ɔbae wɔ November 2014 no kãa dɛ, nna kɔlegyenyi bi pɛ dɛ ɔyɛ nhwehwɛmu na ɔkyerɛw biribi fa Jehovah Adasefo ho. Naaso, oennhu Ahendzi Asa biara annkɔ hɔ ennkebisa hɛnho nsɛm. Mbom ohun dɛ enuanom ahyehyɛ nwoma wɔ pon do si no skuul hɔ. Hɔ na onyaa nsɛm dze kyerɛɛw biribi faa Jehovah Adasefo ho. Ekyir yi, ɔbɔɔ esu bɛyɛɛ Jehovah Adasefo no mu kor. Yɛrekasa yi, ɔsom dɛ daa kwampaaefo. Nsɛm a ɔtsetse dɛm no kenyan hɛn ma yɛkɔ do kã asɛm no, osiandɛ ɔma yehu dɛ nkorɔfo da ho ara wɔ hɔ a ɔsɛ dɛ wɔtse Ahendzi ho asɛm no.

18. Ebɛnadze ntsi na yɛwɔ ahotodo dɛ yebowie Ahendzi asɛmpaka edwuma no dɛ mbrɛ Jehovah rohwehwɛ?

¹⁸ Yebotum agye edzi dɛ Ahendzi asɛmpaka edwuma no bɛba ewiei wɔ ber a wɔahyɛ mu. Hom mma yɛnhwɛ dza osii wɔ Noah n’aber do. Jehovah daa no edzi dɛ, sɛ yɛpɛ Obi a odzi ne ber do pɛpɛɛpɛr a, obiara nye no nnsɛ. Bɛyɛ mfrenhyia 120 ansaana Nsuyirii no reba no, Jehovah kyerɛɛ ber a nna obesi. Mfe pii a nna odzi dɛm ber no enyim no, Jehovah kãa kyerɛɛ Noah dɛ ɔmpam adaka. Noah kɔr do yɛɛ edwumadzen a ɔtse dɛm bɛyɛ mfe 40 anaa 50 ansaana Nsuyirii no reba. Ɔmmfa ho dɛ nkorɔfo enntsie Noah no, ɔkɔr do kãa asɛm no kesii dɛ Jehovah kãa kyerɛɛ no dɛ ber aso dɛ ɔdze mbowa no kɔ adaka no mu. Afei, aber a ber no soe no, ‘Jehovah toow no mu.’​—Gen. 6:3; 7:1, 2, 16.

19. Sɛ yeennyi hɛn nsa emmfi asɛnka edwuma no ho a, ebɛnadze na yebotum ahwɛ kwan dɛ yebenya?

¹⁹ Ɔnnkɛkyɛr, Jehovah bɛma yehu dɛ yeewie Ahendzi asɛmpaka edwuma no. Ɔno ekyir no, ɔbɛsɛɛ Satan no wiadze bɔn yi, na ɔdze wiadze fofor a nyimpa asomberɛwfo na wɔbɛtsena mu no aaba. Kesi dɛm ber no, hom mma yensũasua Noah, Habakkuk, nye Jehovah n’asomfo afofor a wonnyii hɔn nsa mmfii asɛnka edwuma no ho no. Hom mma yɛnkɔ do mfa asɛnka edwuma no ndzi kan wɔ hɛn asetsena mu, yennya abotar, na yennya gyedzi kɛse wɔ Jehovah nye n’anohoba ahorow mu.