Dɛm kyerɛwsɛm no yɛ enyika papaapa. Hɔ kã dɛ: “Sɛ ihu ɔbɔbɔfo ne haw, na atsɛmbu na pɛrpɛr enyidan enyiber mu wɔ ɔmansin biara mu a, mma mma dɛm adze no nnyɛ wo nwanwa: na obi a ɔbɔ abɔso no do no, noara ɔrohwɛ; na abɔso bi wɔ hɔ sen hɔn.”​—Ɔsɛnk. 5:8.

Sɛ yɛdze nyimpa adwen susu kyerɛwsɛm yi ho a, dza yɛbɛkã ara nye dɛ ɔfa nyimpa tumdzi ho, na ɔrema yeehu dza ɔkɔ do wɔ nyimpa aban mu. Naaso sɛ yesusu ho yie paara a, yebohu dɛ dza kyerɛwsɛm no rekã ho asɛm no, ɔkɔ ekyir sen nyimpa tumdzi ho asɛm kɛkɛ; ɔma yehu nokwasɛm bi fa Jehovah ho, na ɔsɛ dɛ ɔno hyɛ hɛn nkuran na ɔkyekye hɛn werɛ.

Dza Ɔsɛnkafo 5:8 rekã nye dɛ, otumfo bi wɔ hɔ a osisi ehiafo nye hɔn a hɔn asɛm yɛ mbɔbɔr no, na ɔnye hɔn nndzi no yie. Naaso ɔsɛ dɛ dɛm otumfo no kaa dɛ, obi wɔ hɔ a ɔbɔ abɔso no do, kyerɛ dɛ, obi wɔ hɔ a ɔwɔ tum sen no, na dɛm nyimpa no rohwɛ no. Afei so, abɔso a wɔkorɔn sen ɔno so wɔ hɔ, kyerɛ dɛ, etumfo afofor so wɔ hɔ a wɔkorɔn mpo kyɛn dɛm nyimpa no. Dza ɔyɛ awerɛhow nye dɛ, wɔ nyimpa tumdzi mu dze, bi a dɛm etumfo yi mu biara rinndzi no tum yie, ntsi ɔsɛ dɛ hɔn a wonnyi kamafo nye hɔn a wɔyɛ mbɔbɔr no kɔ do hu amandze osian dɛm etumfo yi hɔn nsisi nye hɔn etsirmɔdzensɛm no ntsi.

Naaso, sɛ yɛrefa atseetsee mu na yɛtse nka dɛ enyidado nyinara asã mpo a, yebotum enya awerɛhyɛmu dɛ Jehovah a ɔkorɔn sen obiara no, ‘noara rohwɛ dɛm etumfo’ a wodzi tum wɔ wiadze no, ntsi ɔsɛ dɛ iyi kyekye hɛn werɛ. Yebotum dze hɛn asɛm ato Nyankopɔn enyim, na yaadan hɛn adzesoa ato no do. (Ndw. 55:22; Phil. 4:6, 7) Yenyim dɛ ‘Jehovah dze n’enyi kɔ asaase nyina do aprɔw, dɛ ɔbɛkyerɛ no ho ne dzen wɔ hɔn a hɔn akoma dzi mu wɔ no ho no hɔn afamu.’​—2 Mber. 16:9.

Ntsi ɔyɛ nokwar, Ɔsɛnkafo 5:8 ma yɛkaa dza ɔkɔ do wɔ wiadze tumdzi mu no; ɔno nye dɛ, sɛ obi ridzi tum a, ber nyina obi wɔ hɔ a ɔwɔ tum sen no. Naaso dza ohia paara no, dɛm kyerɛwsɛm no botum aboa hɛn ma yaakaa dɛ Jehovah na ɔkorɔn sen obiara, kyerɛ dɛ, ɔno nye Otumfo Pumpunyi no. Sesei dze, ɔnam ne Ba Jesus Christ do ridzi tum; Jesus na ɔyɛ Ahendzi no do Hen. Adze nyina do Tumfo Nyankopɔn no rohwɛ biribiara a ɔrokɔ do, ɔyɛ pɛrpɛr, n’akwan nyina so dzi mũ, na dɛmara na ne Ba no so tse.