1. Ebɛn aber na obotum ayɛ dzen ama hɛn dɛ yɛbɔsom Jehovah?

EHWƐ a, ebɛn aber na obotum ayɛ dzen ama hɛn papaapa dɛ yɛbɔsom Jehovah? Aso ɔyɛ ber a yerihyia nsɛndzendzen anaa ber a yɛwɔ asomdwee kakra no? Ɔnnyɛ dzen dɛ yɛdze hɛnho bɔto Jehovah do ber a yerihyia nsɛndzendzen. Naaso, ebɛnadze na yɛyɛ ber a yɛwɔ asomdwee wɔ hɛn asetsena mu no? Mber a ɔtse dɛm mu no, aso biribi botum atwetwe hɛn adwen efi Nyankopɔn no som do? Jehovah bɔɔ Israelfo no kɔkɔ dɛ biribi a ɔtse dɛm botum ato hɔn.​—Deut. 6:10-12.

2. Ebɛn nhwɛdo pa na Ɔhen Asa yɛe?

² Ɔhen Asa yɛ ɔbarimba a ɔyɛɛ n’adze nyansa mu na ɔdze noho nyina too Jehovah do. Ɔnnyɛ ber a no mu yɛ dzen mu nko na ɔsoom Jehovah, mbom ɔyɛɛ dɛm wɔ asomdwee ber mu so. Asa n’ahendzi ahyɛse pɛɛ na ɔmaa ‘n’akoma dzii mu wɔ Jehovah ho.’ (1 Ahe. 15:14) Ɔkwan kor a Asa kyerɛɛ dɛ n’akoma dzi mũ nye dɛ, otuu abosonsɔr ase wɔ Judahman mu. Bible no kã dɛ “oyiyii anana afɔrmbukyia, na mbea sorɔnsorɔm no, na odwuruuw edum no, na otwitwaa Asherim no gui.” (2 Mber. 14:3, 5) Ne nana Maacah mpo, otuu no adze do dɛ ɔhembaa wɔ ahendzi no mu. Ebɛnadze ntsi a? Osiandɛ, nna ɔhyɛ nkorɔfo nkuran ma wɔsom abosom.​—1 Ahe. 15:11-13.

3. Ebɛnadze na yerubosusu ho wɔ adzesua yi mu?

³ Nnyɛ abosonsɔr nko na Asa tuu ase, mbom ɔboaa Judahman no ma wɔsoom Jehovah bio. Jehovah maa Asa na Judahman no nyaa asomdwee. * Ntsi mfrenhyia du wɔ Asa n’ahendzi  mu no, “asaase no do dwee.” (2 Mber. 14:1, 4, 6) Adzesua yi mu no, yɛbɔhwɛ mbrɛ Asa yɛɛ n’adze wɔ asomdwee ber a ɔtse dɛm mu. Ɔno ekyir no, yɛbɔhwɛ tsetse Christianfo no so. Dɛ mbrɛ Asa yɛe no, hɔn so wɔyɛɛ hɔn adze nyansa mu ber a nna wɔwɔ asomdwee ber mu no. Dza otwa tun no, yebenya asɛmbisa yi ho mbuae: Ɔman a etse mu no, sɛ aban no mmfaa ne nsa nntoo Jehovah Adasefo som do a, ibesi dɛn dze mber a ɔtse dɛm edzi dwuma nyansa mu?

4. Dɛ mbrɛ 2 Mbermunsɛm 14:2, 6, 7 kyerɛ no, ebɛn kwan do na Asa dze asomdwee ber a onyae no dzii dwuma yie?

⁴ Kenkan 2 Mbermunsɛm 14:2, 6, 7. Asa kãa kyerɛɛ Judahman no dɛ ɔyɛ Jehovah na ɔama hɔn “ahomgye wɔ afã nyinara.” Naaso, ɔanntse nka dɛ asomdwee ber a ɔtse dɛm no yɛ ber a ɔsɛ dɛ ɔdwedwe noho. Mbom, ɔkyekyeer Judah nkurow no, yeyɛɛ afasu, aban atsentsen, na mbobotsen. Ɔkãa kyerɛɛ Judahman no dɛ: “Asaase no da ho wɔ hɛn enyim.” Nna Asa repɛ akyerɛ dɛn? Nna ɔrekyerɛ dɛ, ɔman no botum akɔ do edzi hɔn dwuma wɔ asaase a Nyankopɔn dze ama hɔn no do, wɔaakyekyer hɔn kurow no, na atamfo runntum nnsiw hɔn kwan. Ɔhyɛɛ nkorɔfo no nkuran dɛ wɔmfa asomdwee ber a wɔwɔ no ndzi dwuma yie.

5. Ebɛnadze ntsi na Asa boaboaa nsordaafo nye akodze akɛse ano?

⁵ Afei so, Asa dze ber a ɔtse dɛm no boaboaa nsordaafo nye akodze akɛse ano. (2 Mber. 14:8) Aso iyi kyerɛ dɛ ɔammfa noho annto Jehovah do? Oho. Nna Asa nyim dɛ, dɛ ɔhen no, ɔyɛ n’asodzii dɛ ɔbɛhyɛ ɔman no dzen ama tsebea biara a daakye wobotum ehyia. Afei so, nna onyim dɛ asomdwee a Judahman no enya no, bi a, ɔrenntsena hɔ afebɔɔ. Ampaara so, asomdwee no anntsena hɔ afebɔɔ.

6. Ebɛnadze na tsetse Christianfo no yɛe wɔ asomdwee mber a wonyae no mu?

⁶ Ɔwɔ mu dɛ tsetse Christianfo no hyiaa ɔsoɛrtsia mpɛn pii dze, naaso wonyaa asomdwee wɔ mber ahorow bi mu. Ebɛnadze na esuafo yi yɛe wɔ asomdwee mber a wonyae no mu? Dɛm mbarimba na mbaa anokwafo yi kãa asɛm no a woenngyaa. Kyerɛwtohɔ a ɔwɔ Asomafo Ndwuma kã dɛ ‘wɔnantsewee wɔ Jehovah no suro mu.’ Wɔkɔr do kãa asɛmpa no, na dza ofii mu bae nye dɛ, wɔkɔr do “dɔree.” Mbɔdzen a wɔbɔe dze kãa asɛm no wɔ asomdwee mber a wonyae mu no, Jehovah hyiraa do.​—Andw. 9:26-31.

7-8. Ber a Paul na Christianfo binom nyaa ho kwan bi no, ebɛnadze na wɔyɛe? Kyerɛkyerɛ mu.

⁷ Tsetse Christianfo no dze ho kwan biara a wonyae no kãa asɛmpa no. Dɛ nhwɛdo no, ber a nna ɔsomafo Paul wɔ Ephesus no, ohun dɛ dwumadzi kɛse bi no pon ebue ama no. Ɔdze dɛm ho kwan no kãa asɛm no na onyaa esuafo wɔ kurow no mu.​—1 Cor. 16:8, 9.

⁸ Ber a twatsiatwa ho asɛm soɛree na wosiesiee no wɔ afe 49 H.B. no, ho kwan fofor buei maa Paul na Christianfo binom. (Andw. 15:23-29) Ber a wɔdze asɛm yi a woesiesie no ho amandzɛɛbɔ kɛmaa asafo ahorow no, esuafo no yeer hɔnho kãa ‘Jehovah ho asɛmpa’ no. (Andw. 15:30-35) Ebɛnadze na ofii mu bae? Bible no kã dɛ asafo ahorow no “yɛɛ dzen wɔ gyedzi no mu, na hɔn dodow yɛɛ kɛse daa.”​—Andw. 16:4, 5.

9. Ebɛnadze na Jehovah n’asomfo tum yɛ wɔ aman pii do ndɛ, na ebɛn asɛm na yebotum ebisa hɛnho?

⁹ Ndɛ, yetum kã asɛmpa no wɔ aman ahorow pii do a yennhyia ɔsoɛrtsia. Ɔman a etse mu no, ana ɔmamfo wɔ ɔsom mu fahodzi? Sɛ dɛm a, bisa woho dɛ, ‘Ebɛn kwan do na medze fahodzi yi reyɛ edwuma?’ Nda a odzi ekyir yi mu no, Jehovah n’ahyehyɛdze no reyɛ asɛnka na ɔkyerɛkyerɛ edwuma a wɔnnyɛɛ bi da wɔ wiadze yi mu. (Mark 13:10) Ho kwan pii ebue ama Jehovah no nkorɔfo.

10. Ebɛnadze na 2 Timothy 4:2 hyɛ hɛn nkuran dɛ yɛnyɛ?

¹⁰ Ebɛyɛ w’adze dɛn wɔ asomdwee ber mu? (Kenkan 2 Timothy 4:2.) Susu ho hwɛ dɛ ɔwo anaa w’ebusua no munyi bi botum ayɛ nsesa wɔ n’asetsena mu na ɔaayɛ pii wɔ asɛnka edwuma no mu a. Bi mpo a, ɔwo anaa dɛm obusuanyi no botum ayɛ akwampaae edwuma no. Ndɛ nnyɛ ber a ɔwɔ dɛ yɛboaboa ahodze pii ano, osiandɛ ɔyɛ ndzɛmba a yerunntum mmfa nntwa ahohiahia kɛse no.​—Mbɛ. 11:4; Matt. 6:31-33; 1 John 2:15-17.

11. Mbrɛ ɔbɛyɛ a adawurbɔfo binom botum akã asɛmpa no akyerɛ nyimpa beberee ntsi, ebɛnadze na wɔayɛ?

¹¹ Adawurbɔfo piinara na woesũa kasa fofor mbrɛ ɔbɛyɛ a wobotum aboa afofor ma woeesũa Jehovah ho adze. Jehovah n’ahyehyɛdze no ayɛ edwindadze ahorow a ɔboa hɛn ma yetum kã asɛmpa no wɔ kasa ahorow pii mu. Dɛ nhwɛdo no, wɔ afe 2010 mu no, nna yɛwɔ hɛn nwoma ahorow no wɔ kasa bɛyɛ 500 mu. Naaso ndɛ, kasa no dodow no akɔ sor ekodu 1,000 na no mboree!

12. Sɛ nkorɔfo tse Ahendzi no ho asɛmpa no wɔ hɔnankasa hɔn kasaa mu a, ɔka hɔn dɛn? Ma ho nhwɛdo.

¹² Sɛ nkorɔfo tse Bible mu nokwasɛm no wɔ hɔnankasa hɔn kasaa mu a, ɔka hɔn dɛn? Susu akyerɛbaa bi a ɔkã Kinyarwanda kasa no suahu yi ho hwɛ. Ɔkɔr ɔmantɔw ehyiadzi bi a wɔyɛe wɔ Memphis, Tennessee, U.S.A. Wɔyɛɛ ehyiadzi no wɔ Kinyarwanda kasa mu. Kinyarwanda yɛ kasa tsitsir a wɔkã wɔ Rwanda, Congo (Kinshasa), na Uganda. Wowiee ehyiadzi no, ɔkãa dɛ: “Mebaa United States mfe 17 nye  yi, naaso iyi nye ber a odzi kan a matse ehyiadzi bi no mu nsɛm ase yie.” Nsɛm a akyerɛbaa yi kãe no ma ɔda edzi dɛ, ehyiadzi no a wɔyɛe wɔ no kurow mu kasa mu no kaa n’akoma papaapa. Sɛ wo nsɛm tsebea bɛma wo kwan a, ana ibotum esũa kasa fofor bi ama eetum akã asɛmpa no akyerɛ binom a bi a, wɔnnkã wo kasaa wɔ w’asaasesin mu no? Sɛ eyɛ dɛm a, enngye nndzi dɛ ɔno bɛka hɔn ma woeetsie asɛm a edze nam no? Sɛ itum yɛ dɛm a, hwɛ enyigye ara a ibenya!

13. Ebɛn kwan do na hɛn nuanom a wɔwɔ Russia no dze asomdwee ber a wonyae no yɛɛ edwuma?

¹³ Nnyɛ hɛn nuanom nyinara na wotum nya ho kwan yɛ asɛnka edwuma no wɔ beebi a wɔwɔ no. Aman ahorow bi mu no, osiandɛ aban dze ne nsa ato hɛn asɛnka edwuma no do ntsi, hɛn nuanom nntum nnkã asɛm no ma hɔnho mmbaa hɔn. Dɛ nhwɛdo no, ma yensusu hɛn nuanom a wɔwɔ Russia no ho nhwɛ. Aban no soɛree tsiaa hɔn mfe pii, naaso wɔ March afe 1991 no, aban no gyee hɛn som no too mu. Dɛm aber no, nna Ahendzi adawurbɔfo bɛyɛ 16,000 na wɔwɔ Russia. Mfe eduonu ekyir no, hɔn dodow kɔr sor kodur 160,000 na no mboree! Ɔda edzi kofee dɛ, hɛn nuanom no yɛɛ hɔn adze nyansa mu ber a wonyaa ho kwan kãa asɛm no a obiara annsoɛr enntsia hɔn no. Asomdwee ber a wonyae no anntsena hɔ annkyɛr. Ɔmmfa ho dɛ ndɛ ndzɛmba asesa wɔ ɔman no mu no, wɔda ho ara dze nsi rosom Jehovah. Wɔyɛ dza wobotum biara som no.

14-15. Ebɛn kwan do na Jehovah dze no tum boaa Asa?

¹⁴ Asa n’aber do no, asomdwee ber a wonyae no baa ewiei. Nsordaafo dɔm kɛse a hɔn dodow bor ɔpepem kor fi Ethiopia baa hɔn do. Nna wɔfrɛ ɔsahen a ɔda hɔn ano no Zerah.  Nna ɔgye dzi papaapa dɛ ɔnye no nsordaafo dɔm no botum edzi Judahman no do konyim. Naaso, Ɔhen Asa ammfa noho annto nsordaafo dɔm a ɔwɔ no do, mbom ɔdze noho too Jehovah, ne Nyankopɔn do. Asa bɔɔ mpaa dɛ: “[Jehovah] hɛn Nyankopɔn e, boa hɛn; na ɔwoara na yɛtwer wo, na wo dzin mu na yɛaba ribehyia nyimpadodow yi.”​—2 Mber. 14:11

¹⁵ Ethiopiafo nsordaafo dɔm no, nna hɔn dodow yɛ bɛyɛ Asa no nsordaafo dɔm no mbɔho ebien. Naaso, nna Asa nyim dɛ Jehovah wɔ tum, na ɔbɔkõ ama no nkorɔfo. Ampaara, Jehovah amma ne nsa ennsi famu. Ethiopiafo nsordaafo dɔm no dzii ɔkogu pɔtɔɔ.​—2 Mber. 14:8-13.

16. Yesi dɛn hu dɛ asomdwee ber a yɛwɔ mu ndɛ no nnkɛtsena hɔ afebɔɔ?

¹⁶ Yennyim adze pɔtsee a daakye ɔbɔto hɛn mu biara dze, naaso yenyim dɛ asomdwee ber a ndɛ Jehovah n’asomfo wɔ mu no, ɔnnkɛtsena hɔ afebɔɔ. Nokwasɛm nye dɛ, Jesus kãe too hɔ dɛ, wɔ nda a odzi ekyir mu no, “amanaman nyina bɛtan” n’esuafo. (Matt. 24:9) Dɛmara so na ɔsomafo Paul kãa dɛ “hɔn a wɔpɛ dɛ wɔdze nyamesompa tsena ase wɔ Christ Jesus mu nyina bɔsɔw ahohia.” (2 Tim. 3:12) Satan afa “ebufuw kɛse,” ntsi sɛ yɛyɛ hɛn adwen dɛ ɔremmfa n’asɛm mmba hɛn do a, nna yɛredaadaa hɛnho.​—Nyi. 12:12.

17. Ebɛn akwan ahorow do na bi a wɔbɔsɔ hɛn gyedzi ahwɛ?

¹⁷ Ɔnnkɛkyɛr biara, hɛn nyina behyia hɛn gyedzi ho nsɔhwɛ. Ɔnnkɛkyɛr, ‘ahohiahia kɛse a ofitsi wiadze ahyɛse dze bodu aber no ɔmmbaa da bɛba.’ (Matt. 24:21) Dɛm ber no, bi a hɛn ebusuafo bɔsoɛr etsia hɛn, na aban dze ne nsa bɔto hɛn edwuma no do. (Matt. 10:35, 36) Aso hɛn mu biara bɛyɛ n’adze tse dɛ Asa na oeenya Jehovah no mu gyedzi dɛ ɔbɔboa no na ɔaabɔ noho ban?

18. Dɛ mbrɛ Hebrewfo 10:38, 39 kyerɛ no, ebɛnadze na ɔbɔboa hɛn ma yeesiesie hɛn adwen ama dza daakye ɔbɔto hɛn no?

¹⁸ Jehovah risiesie hɛn ama dza daakye ɔbɔto hɛn no. Ɔnam “akowaa nokwafo nye nyansafo” no do ma hɛn “edziban wɔ ber a ɔsɛ mu,” mbrɛ ɔbɛyɛ a yɛbɔkɔ do egyina pintsinn wɔ ɔsom a yɛdze ma Jehovah no mu. (Matt. 24:45) Naaso, ɔsɛ dɛ hɛn mu biara yɛ n’afamu dze na onya gyedzi a no mu yɛ dzen wɔ Jehovah mu.​—Kenkan Hebrewfo 10:38, 39.

19-20. Sɛ yɛhwɛ asɛm a ɔwɔ 1 Mbermunsɛm 28:9 no a, ebɛn nsɛm na ɔwɔ dɛ yebisa hɛnho, na ebɛnadze ntsi na ɔwɔ dɛ yebisa nsɛm a ɔtse dɛm?

 ¹⁹ Dɛ mbrɛ Ɔhen Asa yɛe no, ɔsɛ dɛ hɛn so ‘yɛhwehwɛ Jehovah.’ (2 Mber. 14:4; 15:1, 2) Yɛhyɛ ase hwehwɛ Jehovah ber a yesũa noho adze na wonuma hɛn no. Yɛdze ho kwan biara a yenya no hyɛ ɔdɔ a yɛwɔ ma Jehovah no mu dzen. Ntsi, yebotum ebisa hɛnho dɛ, ‘Ana mokɔ asafo nhyiamu daa?’ Nhyiamu a ɔtse dɛm ase no, yenya ahoɔdzen dze kɔ do som Jehovah na yenya nkuranhyɛ so fi hɛn nuanom mbarimba na mbaa hɔ. (Matt. 11:28) Yebotum so ebisa hɛnho dɛ, ‘Ana musũa Bible no daa?’ Sɛ enye w’ebusua tse a, ana hom eyi ber esi hɔ a hom dze yɛ ebusua som dapɛn biara? Sɛ wankotsee na etse a, ana eyi ber esi hɔ a dapɛn biara edze yɛ ankorankor adzesua? Afei so, ana edze woho nyina hyɛ asɛnka na esuafoyɛ edwuma no mu?

²⁰ Ebɛnadze ntsi na ɔwɔ dɛ yebisa hɛnho nsɛm yi? Bible no ma yehu dɛ Jehovah hwehwɛ hɛn adwen nye hɛn akoma mu, ntsi ɔwɔ dɛ hɛn so yɛyɛ dɛm. (Kenkan 1 Mbermunsɛm 28:9.) Sɛ yehu dɛ ɔsɛ dɛ yɛyɛ nsesa bi wɔ botae a osi hɛn enyi do, anaa hɛn nsusui mu a, ɔsɛ dɛ yɛserɛ Jehovah na ɔboa hɛn ma yɛyɛ nsesa a ɔtse dɛm. Ndɛ nye ber a ɔwɔ dɛ yesiesie hɛnho ma nsɔhwɛ a ɔda hɛn enyim no. Mma biribiara nnsiw wo kwan dɛ ebɛyɛ w’adze nyansa mu wɔ asomdwee ber a yɛwɔ mu ndɛ no mu!