1. Sɛ wotu hɛn dɔfo bi fi asafo no mu a, obotum aka hɛn dɛn?

ASO woetu wo dɔfo bi efi asafo no mu? Iyi botum ayɛ ahomtsew papaapa! Hɛn akyerɛbaa bi a wɔfrɛ no Hilda kãa dɛ, “Mowaree no, mfe 41 ekyir na mo kun wui. * Nna metse nka dɛ, biribiara nnyi hɔ a ɔyɛ yaw sen dɛm. Naaso dza otwaa mo nson mu kɛse koraa nye ber a me babanyin no fii asafo no mu, na ogyaa ne yer nye ne mba hɔ no.”

2-3. Dɛ mbrɛ Ndwom 78:40, 41 kyerɛ no, Jehovah tse nka dɛn ber a no somfo bi efi asafo no mu no?

² Ɔwodze susu yaw ara a Jehovah dzii ber a n’abɔfoe no bi tseew etũa tsiaa no no ho hwɛ! (Jude 6) Afei so, susu awerɛhow a Jehovah dzii ber a Israelman a ɔdɔ hɔn no tseew etũa tsiaa no mpɛn pii no ho. (Kenkan Ndwom 78:40, 41.) Sɛ wo dɔfo bi fi asafo no mu a, nya awerɛhyɛmu dɛ hɛn sor Egya a ɔwɔ ɔdɔ no so dzi yaw. Ɔtse yaw a iridzi no ase. Obefi ayamuyie mu ama wo nkuranhyɛ nye mboa a ihia no.

³ Adzesua yi mu no, yɛbɔhwɛ dza yebotum ayɛ ama yeenya Jehovah no mboa ber a hɛn dɔfo bi efi asafo no mu no. Afei so, yɛbɔhwɛ mbrɛ yebesi aboa enuanom a wɔwɔ asafo no mu a worihyia ɔhaw a ɔtse dɛm no. Naaso, odzi kan no, hom mma yɛnhwɛ nsusui bɔn bi a ɔwɔ dɛ yekwetsir.

4. Sɛ awofo binom hɔn ba bi fi asafo no mu a, wɔtse nka dɛn?

⁴ Sɛ awofo hɔn dɔba bi fi asafo no mu a, mpɛn pii no wodzi yaw tse nka dɛ nkyɛ ɔwɔ dɛ wɔyɛ pii boa hɔn ba no ma ɔkɔ do som Jehovah. Aber a wotuu onua bi a wɔfrɛ no Luke ne ba fii asafo no mu no, ɔkãa dɛ: “Metsee nka dɛ mara na mayɛ. Nna mososo ho daa bɔn mpo. Ɔtɔ da a, nna musũ dzi awerɛhow pii.”  Akyerɛbaa bi a wɔfrɛ no Elizabeth so hyiaa tsebea a ɔtse dɛm. Obisaa noho dɛ: “Dɛ ɔbaatan no, ebɛnadze na annkɔ yie wɔ m’afamu? Metsee nka dɛ menntum ammfa nokwar no enndua me babanyin no mu.”

5. Sɛ obi fi asafo no mu a, woana na ɔayɛ?

⁵ Ɔwɔ dɛ yɛma ɔtsena hɛn adwen mu dɛ, Jehovah dze obiara ne pɛ ama no dɛ ɔmpaw dza ɔpɛ. Iyi kyerɛ dɛ yebotum esi gyinae dɛ yɛbɛyɛ setsie ama no anaa yɛnnkɛyɛ. Mbofra binom wɔ hɔ a, hɔn awofo annyɛ nhwɛdo pa. Naaso, dɛm mbofra yi rosom Jehovah na wɔkɔ do dzi no nokwar. Binom so wɔ hɔ a, hɔn awofo yɛɛ dza wobotum biara dze Kyerɛwnsɛm mu ngyinadonsɛm duaa hɔn mu. Naaso, ber a hɔn enyi firii no, wofii asafo no mu. Iyi ma yehu dɛ, ɔwɔ dɛ hɛn mu biara si gyinae dɛ ɔbɔsom Jehovah. (Josh. 24:15) Ntsi, awofo a hom mba efi asafo no mu ma hom ridzi awerɛhow no, mma hom nntse nka dɛ hom na hom ayɛ!

6. Sɛ ɔwofo bi fi nokwar no mu a, obotum aka ne mba dɛn?

⁶ Ɔtɔ da a, ɔwofo bi befi nokwar no mu na oeegya n’ebusua mpo hɔ. (Ndw. 27:10) Iyi botum ayɛ awerɛhosɛm ama mbofra a worusũasua ɔwofo a ɔtse dɛm no. Akyerɛbaa bi a wɔfrɛ no Esther a wotuu ne papa fii asafo no mu kãa dɛ: “Nna musũ mpɛn pii, osiandɛ mubohun dɛ ɔnnyɛ dɛ nna ɔrotwe noho efi asafo no ho kɛkɛ. Mbom, nna oesi n’adwen pi dɛ ɔronnsom Jehovah bio koraa. Modɔ me papa, ntsi ber a wotuu no no, nna metaa dwen noho paa. Ɔwɔ hɔ ara mpo a, nna me yamu ahye me.”

7. Abofra a woetu n’awofo efi asafo no mu no, Jehovah tse nka dɛn ma no?

⁷ Mbofra, sɛ woetu hom awofo mu kor efi asafo no mu a, yɛtse nka ma hom papaapa! Hom nnya awerɛhyɛmu dɛ Jehovah so nyim yaw a hom refa mu no papaapa. Ɔdɔ hom na n’enyi sɔ nokwar a hom dzi ma no no. Na hɛn so yɛdɔ hom, na hɛn enyi sɔ hom nokwardzi no. Afei so, hom mma ɔntsena hom adwen mu dɛ, ɔnnyɛ hom mfom dɛ hom awofo esi gyinae a ɔtse dɛm. Dɛ mbrɛ yeedzi kan ehu no, Jehovah dze obiara ne pɛ ama no. Ntsi, obiara a oehyira noho do na woenuma no no “bɔsoa nankasa n’adzesoa.”​—Gal. 6:5.

8. Aber a ebusuafo a wodzi nokwar no rotweɔn dɛ hɔn dɔfo bi bɛsan aba asafo no mu no, ebɛnadze na wobotum ayɛ? (Hwɛ adakaba a wɔato dzin “ San Bra Jehovah Nkyɛn” no so.)

⁸ Sɛ wo dɔfo bi fi asafo no mu, na ewɔ enyidado dɛ daakye bi ɔbɛsan aba a, ntseasee wɔ mu. Naaso seseiara a ɔmmbae yi, ebɛnadze na ibotum ayɛ? Yɛ dza ibotum biara dɛ ebɛma wo gyedzi akɔ do ayɛ dzen. Sɛ eyɛ dɛm a, ɔbɛyɛ nhwɛdo pa ama ebusuafo nkaa no, nye nyia woetu no no mpo. Dɛm a ebɛyɛ no botum aboa wo ma eegyina yaw a iridzi no ano. Ma yɛnhwɛ ndzɛmba ahorow a ibotum ayɛ no bi.

9. Ebɛn akwan na ibotum afa do ahyɛ Jehovah mu gyedzi a ewɔ no mu dzen? (Hwɛ adakaba a wɔato dzin “ Sɛ Wo Dɔfo Bi Efi Asafo No Mu A, Kyerɛwnsɛm Yi Botum Akyekye Wo Werɛ” no so.)

⁹ Kɔ do yɛ ndzɛmba a ɔbɛma wo gyedzi ayɛ dzen. No ho hia dɛ ebɔkɔ do ahyɛ wo gyedzi nye ebusuafo nkaa no so hɔn gyedzi dzen. Ibesi dɛn ayɛ dɛm? Kɔ do kenkan Nyankopɔn n’Asɛm daa na dwendwen ho. Afei so kɔ Christianfo nhyiamu daa. Yɛ iyinom fa hyɛ Jehovah  mu gyedzi a ewɔ no mu dzen. Joanna yɛ hɛn akyerɛbaa a n’egya nye no nuabaa fii asafo no mu. Ɔkãa dɛ: “Sɛ mekenkan nyimpa binom tse dɛ Abigail, Esther, Job, Joseph, na Jesus hɔnho nsɛm a, ɔma m’akoma tɔ me yamu. Hɔn nhwɛdo pa no hyɛ me nkuran na ɔboa me ma minya tsebea a mowɔ mu no ho adwen pa. Nkyii so, hɛn ndwom ahorow a ommfi hɛn ndwom nwoma mu no hyɛ me nkuran.”

10. Ebɛn kwan do na Ndwom 32:6-8 boa hɛn ber a ɔhaw bi ahyɛ hɛn do no?

¹⁰ Bɔ Jehovah mpaa na kã biribiara a ɔhaw wo no ho asɛm kyerɛ no. Sɛ ɔhaw no hyɛ wo do dɛn ara mpo a, mma nngyaa mpaa bɔ. Serɛ hɛn Nyankopɔn a ɔwɔ ɔdɔ no ma ɔmboa wo ma hu tsebea no dɛ mbrɛ noara so hu no no. Afei so, serɛ no ma ɔmboa wo ma hu ɔkwan a ɔsɛ dɛ efa do no. (Kenkan Ndwom 32:6-8.) Nokwasɛm nye dɛ, obotum ayɛ dzen ama wo dɛ ebɛkã mbrɛ isi tse nka ankasa no ho asɛm akyerɛ Jehovah. Naaso, Jehovah nyim ɔhaw a erefa mu nyina. Ɔdɔ wo papaapa na ɔhyɛ wo nkuran dɛ kã w’akoma mu asɛm kyerɛ no.​—Ex. 34:6; Ndw. 62:7, 8.

11. Dɛ mbrɛ Hebrewfo 12:11 kyerɛ no, ebɛnadze ntsi na ɔwɔ dɛ yɛgye ntsẽa a Jehovah fi ɔdɔ mu dze ma no to mu? (Hwɛ adakaba a wɔato dzin “ Tu A Wotu Obi​—Ntsẽa A Ɔdɔ Wɔ Mu A Jehovah Dze Ma” no so.)

¹¹ Gye gyinae a mpanyimfo no esi no to mu. Tu a wotu obi fi asafo no mu no ka Jehovah ne nhyehyɛɛ ho. Ntsẽa a ɔdɔ wɔ mu a ɔdze ma no boa obiara a nyia ɔayɛ bɔn no so ka ho. (Kenkan Hebrewfo 12:11.) Bi a enuanom binom bɛkasa etsia gyinae a asafo mu mpanyimfo sii tuu obi fii asafo no mu no. Naaso, kaa dɛ mpɛn pii no, enuanom a wɔtse dɛm no rennkã bɔn a nyimpa no yɛe no ho asɛm. Yennyim nokwasɛm a ɔwɔ asɛm no mu. Ntsi, nyansa wɔ mu dɛ yɛbɛgye edzi dɛ mpanyimfo a wodzii asɛm no yɛɛ dza wobotum biara dɛ wɔdze Kyerɛwnsɛm mu ngyinadonsɛm bɛyɛ edwuma, na woeebu ‘atsɛn ama Jehovah.’​—2 Mber. 19:6.

12. Osiandɛ enuanom binom taa ntsẽa a Jehovah dze ma no ekyir ntsi, ebɛn mfaso na woenya efi mu?

 ¹² Sɛ asafo mu mpanyimfo tu wo dɔfo bi fi asafo no mu, na egye gyinaesi no to mu a, ebɔboa no ma ɔaasan aba asafo no mu. Elizabeth a yeedzi kan akã noho asɛm no kãa dɛ, “Nna ɔyɛ dzen ma hɛn papaapa dɛ yɛnye hɛn babanyin panyin no botwa ebusuabɔ mu. Naaso ber a hɛn babanyin no sanee baa asafo no mu no, nankasa gyee too mu dɛ ɔfata dɛ wotuu no. Ekyir yi, nankasa kãa dɛ oesũa ndzɛmba pii efi tu a wotuu no no mu. Iyi maa muhun mfaso a ɔwɔ ntsẽa a Jehovah dze ma no do. No kun Mark so dze kaa ho dɛ: “Osiandɛ yɛnye hɛn babanyin no ammbɔ ntsi, mfe bi ekyir no, ɔkãa dɛ ɔpɛ dɛ ɔsan ba asafo no mu. M’enyi agye papaapa dɛ Jehovah boaa hɛn ma yɛyɛɛ setsie.”

13. Ebɛnadze na obotum aboa wo ma eegyina yaw a iridzi no ano?

¹³ Enye enuanom a wɔtse wo tsebea no ase no mbɔ nkɔmbɔ. Enye enuanom a hɔnho akokwaa a wobotum aboa wo ma eenya wo tsebea no ho adwen pa no mbɔ. (Mbɛ. 12:25; 17:17) Joanna a yeedzi kan akã noho asɛm no kãa dɛ: “Nna metse nka dɛ mayɛ ankonam. Naaso, aber a menye enuanom a mowɔ hɔn mu ahotodo bɔe no, wɔboaa me papaapa.” Na sɛ ɔkɛba dɛ enuanom binom a wɔwɔ asafo no mu kekã nsɛm a obu w’abaw mu so ɛ?

14. Ebɛnadze ntsi na ɔwɔ dɛ ‘yɛkɔ do tsetse ma hɛnho, na yɛdze kyekyɛ hɛnho nkorkor’?

¹⁴ Nya wo nuanom ho abotar. Ɔwɔ dɛ etse ase dɛ ɔnnyɛ aber nyina na wo nuanom bɛyɛ hɔn adze yie dɛ mbrɛ ehwɛ kwan. (Jas. 3:2) Hɛn nyina yenndzi mũ, dɛm ntsi sɛ ɔba no dɛ enuanom binom nnhu asɛm a wɔnkã nkyerɛ wo anaa wɔkã asɛm bi ma ɔyɛ wo yaw aber a wɔannhyɛ da ara a, mma ɔnnyɛ wo nwanwa. Hom mma afotu a ɔsomafo Paul dze mae no ntsena hɛn adwen mu. Ɔkãa dɛ: “Sɛ obi wɔ obi ho asɛm bi a, hom ntsetse mma homho, na hom mfa nkyekyɛ homho nkorkor.” (Col. 3:13) Hɛn akyerɛbaa bi a wotuu no busuanyi kãa dɛ: “Enuanom binom wɔ hɔ a nna wɔpɛ dɛ wɔkyekye mo werɛ. Naaso owiee ase no, wɔkãa nsɛm ma ɔhaaw me. Ne nyina mu no, Jehovah boaa me ma medze hɔn mfom kyɛɛ hɔn.” Ebɛnadze na enuanom a wɔwɔ asafo no mu botum ayɛ aboa ebusuafo a wodzi nokwar no?

15. Ebusuafo a ndaansa yi ara woetu hɔn dɔfo bi efi asafo no mu no, ebɛnadze na yebotum ayɛ aboa hɔn?

¹⁵ Da ayamuyie nye anyɛnkofa su edzi kyerɛ ebusuafo a wɔkɔ do dzi nokwar no. Hɛn akyerɛbaa bi a wɔfrɛ no Miriam kãa dɛ aber a wotuu no nuabanyin fii asafo no mu no, nna n’enyi nngye dɛ ɔbɔkɔ asafo nhyiamu. Ɔkãa dɛ: “Nna musuro dɛ mobɔkɔ, osiandɛ nna minnyim nsɛm a enuanom bɛkekã. Naaso, mokɔree no, muhun enuanom pii a hɔn so, mo nua no n’asɛm no yɛ hɔn awerɛhow, na wɔannkã noho asɛmbɔn biara. M’enyi sɔɔ dza enuanom yɛe no, osiandɛ wɔamma maanntse nka dɛ meyɛ ankonam.” Akyerɛbaa fofor bi so kãa dɛ: “Aber a wotuu hɛn babanyin no, enuanom bɛkyekyee hɛn werɛ. Binom mpo kãa dɛ nna  wonnhu dza wɔnnkã. Wɔnye me bɔɔ mu sũi, na wɔkyerɛɛw nsɛm a ɔhyɛ nkuran wɔ kaad do maa me. Dza wɔyɛe no boaa me papaapa!”

16. Hɔn a woetu hɔn busuanyi bi no, asafo no besi dɛn akɔ do aboa hɔn na wɔaahyɛ hɔn nkuran?

¹⁶ Kɔ do boa ebusuafo a wodzi nokwar no. Dɛm aber yi paa na ɔsɛ dɛ eda ɔdɔ edzi kyerɛ hɔn na ehyɛ hɔn nkuran. (Heb. 10:24, 25) Ɔtɔ da a, ebusuafo a wɔtse dɛm no botum atse nka dɛ enuanom binom eyi hɔn baako ahyɛ hɔn nsa. Ɔnnsɛ dɛ yɛyɛ biribi a ɔbɛma ebusuafo no atse nka dɛm! Mbofra a hɔn awofo efi asafo no mu no, hɔn paa na ɔsɛ dɛ yɛkamfo hɔn na yɛhyɛ hɔn nkuran. Aber a wotuu Maria no kun fii asafo no mu na ogyaa n’ebusua hɔ no, Maria kãa dɛ: “Nna enuanom binom ba me fie ma yɛyɛ edziban, na wɔboa me ma menye me mba no sũa adze. Nna wɔtse me tsebea no ase, na wɔnye me bɔɔ mu sui. Ber mpo a afofor kãa nsɛm a ɔnnyɛ nokwar faa moho no, wɔkãa bi maa me. Dza wɔyɛe no hyɛɛ me nkuran papaapa!”​—Rom. 12:13, 15.

17. Ebɛnadze na asafo mu mpanyimfo botum ayɛ aboa enuanom a hɔn werɛ ahow no?

¹⁷ Asafo mu mpanyimfo, hom mfa ho kwan biara a hom benya no nhyɛ ebusuafo a wɔkɔ do dzi nokwar no dzen. Ɔyɛ hom asodzii tsitsir dɛ hom bɛkyekye enuanom a hɔn ebusuafo efi asafo no mu no werɛ. (1 Thess. 5:14) Hom nye hɔn mbɔ nkɔmbɔ ansaana asafo nhyiamu ahyɛ ase nye ber a hom apon no. Hom nkɛsera hɔn wɔ hɔn efie mu na hom nye hɔn mbɔ mpaa. Hom nye hɔn mbɔ mu nkɔ asɛnka, na ɔtɔ da a, hom nto nsa mfrɛ hɔn wɔ hom ebusua som ase. Ɔsɛ dɛ asafo mu mpanyimfo da ayamuhyehye nye ɔdɔ edzi kyerɛ Jehovah no nguan a wodzi awerɛhow no, na wɔkyerɛ dɛ wɔdwen hɔnho.​—1 Thess. 2:7, 8.

18. Dɛ mbrɛ 2 Peter 3:9 kyerɛ no, ebɛnadze na Nyankopɔn pɛ dɛ nyimpa ndzebɔnyɛfo yɛ?

¹⁸ Jehovah mmpɛ “dɛ obiara bɛhera, na mbom ɔpɛ dɛ hɔn nyina bɛba mfehoekyir mu.” (Kenkan 2 Peter 3:9.) Sɛ obi yɛ bɔn a no mu yɛ dur mpo a, no nkwa dze, Nyankopɔn bu no dɛ ɔsom bo. Kaa dɛ Jehovah dze no Dɔba no no nkwa a ɔsom bo no maa dɛ werdam maa nyimpa  ndzebɔnyɛfo. Jehovah fi ɔdɔ mu kã kyerɛ hɔn a woetu hɔn no dɛ wɔnsan mbra ne nkyɛn. Dɛ mbrɛ Jesus ne mfatoho a ɔfa ɔba a ɔyewee no ho no ma yehu no, Jehovah rohwɛ kwan dɛ hɔn a wɔtse dɛm no bɛsan aba. (Luke 15:11-32) Hɔn a wofii asafo no mu no pii wɔ hɔ a, ekyir yi wɔsanee baa hɔn sor Egya a ɔwɔ ɔdɔ no nkyɛn. Na enuanom a wɔwɔ asafo no mu so gyee hɔn fɛw do. Elizabeth a yeedzi kan akã noho asɛm no, n’enyi gyee ber a wɔgyee ne babanyin a wotuu no no. Ɔkãa dɛ: “M’enyi sɔ enuanom a wɔhyɛɛ hɛn nkuran dɛ hɛn dɔfo a woetu no no bɛsan aba no.”

19. Ebɛnadze ntsi na yebotum dze hɛnho ato Jehovah do aber nyina?

¹⁹ Yebotum dze hɛnho ato Jehovah do aber nyina. Ɔmma hɛn akwankyerɛ a obepira hɛn da. Ɔyɛ Egya a ne yamu ye, na ɔwɔ ayamuhyehye, na ɔwɔ ɔdɔ kɛse ma hɔn a wɔdɔ no na wɔsom no no nyina. Nya awerɛhyɛmu dɛ Jehovah remmpa wo wɔ w’ahohia ber mu. (Heb. 13:5, 6) Mark a yeedzi kan akã noho asɛm no kãa dɛ, “Jehovah nnyi hɛn tokyen da. Ɔwɔ hɛn nkyɛn aber nyina dɛ bɔboa hɛn ma yeegyina hɛn nsɛndzendzen ano.” Jehovah bɔkɔ do ama wo “tum no ne kɛseyɛ a ɔtra do no.” (2 Cor. 4:7) Nokwasɛm nye dɛ, sɛ wo busuanyi bi fi nokwar no mu a, ibotum akɔ do edzi Jehovah nokwar na eenya awerɛhyɛmu dɛ ɔbɛsan aba.