ADZESUA ASƐM 40
‘Wɔdze Nyimpa Piinara Bɔkɔ Tsenenee Mu’
‘Hɔn a wɔdze nyimpa piinara kɔ tsenenee mu no, wɔbɛhyerɛn dɛ nworaba afebɔɔ.’—DAN. 12:3.
NDWOM 151 Ɔbɛfrɛ
DZA YERUBOSUSU HO a
1. Ebɛn enyigyesɛm na yɛrohwɛ kwan dɛ obesi wɔ Mfrenhyia Apem Tumdzi no mu?
CHRIST ne Mfrenhyia Apem Tumdzi no mu na owusoɛr no bɛhyɛ ase. Dɛm da no dze, ɔsɛ w’enyi! Hɔn a hɔn adɔfo ewuwu no nyina yamu a nkyɛ dɛm ber no aso ma woehu hɔn adɔfo no bio. Na Jehovah so, ne yamu a nkyɛ dɛm ber no aba. (Job 14:15) Ɔwodze, dwendwen ho hwɛ dɛ yɛnye hɛn adɔfo a woewuwu no ehyia bio! Ah, enyigye a ɔbɛba asaase do dɛm aber no dze, wɔnnka. Dɛ mbrɛ yehunii wɔ adzesua a odzi iyi enyim mu no, “hɔn a wɔtsen” a wɔakyerɛw hɔn dzin wɔ nkwa nwoma no mu no bɔkɔ ‘nkwa wusoɛr’ mu. (Andw. 24:15; John 5:29) Hɔn a wobedzi kan enyan hɔn aba asaase do no, obotum aba dɛ hɔn mu pii bɛyɛ hɛn adɔfo. b Iyi da nkyɛn a, “hɔn a wɔnntsen,” anaa, nyimpa a woennya hokwan annsom Jehovah yie ansaana woruwu no so, wobenyan hɔn akɔ ‘atsɛmbu wusoɛr’ mu.
2-3. (a) Dɛ mbrɛ wɔaka wɔ Isaiah 11:9, 10 no, ebɛn nkyerɛkyerɛ edwuma kɛse na ɔbɔkɔ do? (b) Ebɛnadze na yebosusu ho wɔ adzesua yi mu?
2 Hɔn a wobenyan hɔn aba asaase do no, no ho behia dɛ wɔkyerɛkyerɛ hɔn nyina. (Isa. 26:9; 61:11) Ntsi, nkyerɛkyerɛ edwuma kɛse bi a wɔnnyɛɛ bi da wɔ nyimpa abakɔsɛm mu no bɔkɔ do. (Kenkan Isaiah 11:9, 10.) Ebɛnadze ntsi a? Dza ɔwɔ mu nye dɛ, ɔsɛ dɛ hɔn a wɔnntsen a wobenyan hɔn no nyina sua Jesus Christ, Nyankopɔn n’Ahendzi, nye Jesus no werdam afɔrbɔ no ho adze. Afei so, Satan asɛɛ Jehovah ne dzin na ɔse Jehovah mmfata dɛ odzi tum wɔ abɔdze nyina do. Iyi ntsi, ɔsɛ dɛ dɛm nkorɔfo yi hu nokwasɛm a ɔwɔ asɛm yi mu. Hɔn a wɔtsen a wobenyan hɔn no mpo, ɔsɛ dɛ wɔboa hɔn ma wohu kwan a Jehovah dze no nkakrankakra ama n’asomfo ehu siantsir a ɔbɔɔ asaase no. Siantsir no nye dɛ, dɛm anokwafo yi mu bi wuwui koraa ansaana wɔrekyerɛw Bible no ewie. Asɛm no ara nye dɛ, hɔn a wɔtsen nye hɔn a wɔnntsen a wobenyan hɔn no nyina wɔ pii sua.
3 Yebosusu nsɛmbisa ahorow yi ho wɔ adzesua yi mu: Dɛm nkyerɛkyerɛ edwuma kɛse yi, wɔbɛyɛ no dɛn? Mbrɛ nkorɔfo besi ayɛ hɔn adze wɔ nkyerɛkyerɛ yi ho no, aso ɔno na ɔbɛkyerɛ dɛ wɔbɛkyerɛw hɔn dzin korakora wɔ nkwa nwoma no mu anaa? Ɔsɛ dɛ yɛma dɛm nsɛmbisa yi ho mbuae ho hia hɛn ndɛ. Ntsi, yɛbɔhwɛ nkɔnhyɛ ahorow bi a ɔyɛ enyika paa. Dɛm nkɔnhyɛ ahorow yi wɔ Daniel nye Nyikyerɛ nwoma no mu. Dza ɔbɔkɔ do wɔ owusoɛr no ekyir no, dɛm nkɔnhyɛ ahorow no bɔboa hɛn ma yaatse ase yie paa. Hom mma yendzi kan nhwɛ enyikasɛm ahorow bi a wɔaka ho asɛm wɔ Daniel 12:1, 2.
‘HƆN A WƆADEDA WƆ DƐTSE MU NO BENYAN’
4-5. Ebɛnadze na Daniel 12:1 ma yehu fa nda a odzi ekyir no ho?
4 Kenkan Daniel 12:1. Daniel nwoma no ma yehu enyigyesɛm bi a ɔbɔtoatoa do aba wɔ nda a odzi ekyir no mu. No mu kor nye asɛm a ɔwɔ Daniel 12:1 no. Hɔ ma yehu dɛ, Michael a ɔnoara nye Jesus Christ, “bɔsoɛr egyina” ama Nyankopɔn no nkorɔfo. Jesus hyɛɛ ase dɛ origyina ama Nyankopɔn no nkorɔfo aber a wɔdze no sii Nyankopɔn n’Ahendzi no do Hen wɔ sor wɔ 1914 mu no.
5 Naaso, wɔsan so kaa kyerɛɛ Daniel dɛ Jesus “bɔsoɛr egyina” wɔ ‘ahohiaber a ofitsi dɛ aman bɔbɔɔ adze besi dɛm ber no bi mmbaa da’ no mu. Dɛm “ahohiaber” yi yɛ ebɛn aber? Ɔno nye “ahohiahia kɛse” a wɔaka ho asɛm wɔ Matthew 24:21 no. Ntsi, sɛ ahohiahia kɛse no ba ewiei a, Jesus bɔsoɛr egyina, anaadɛ ɔbɛyɛ biribi dze abɔ Nyankopɔn no nkorɔfo ho ban wɔ Har-Magedon. Hɔn a Jesus bɛgye hɔn no, Nyikyerɛ nwoma no frɛ hɔn ‘nyimpadodow kɛse a wofi ahohia kɛse no mu.’—Nyi. 7:9, 14.
6. Sɛ nyimpadodow kɛse no fi ahohiahia kɛse no mu a, ebɛn asɛm na obesi? Kyerɛkyerɛ mu. (Ibotum so ahwɛ “Nsɛm A Akenkamfo Bisa” a ɔwɔ Ɔweɔn-Aban yi mu a ɔfa hɔn a wobenyan hɔn aba asaase do ho no.)
6 Kenkan Daniel 12:2. Sɛ nyimpadodow kɛse no fi dɛm ahohiahia kɛse no mu a, ebɛn asɛm na obesi? Afe 1918 no, Nyankopɔn n’atamfo soɛree tsiaa asɛnka edwuma no. Ɔno ekyir no, asɛnka edwuma no nyaa nkɔenyim paa. Mber bi a etwa mu no, nna yesusu dɛ dɛm nkɔenyim yi na Daniel 12:2 reka ho asɛm no. Naaso seseiara dze, yɛabɛtse ase dɛ ɔyɛ ewufo a wobenyan hɔn wɔ wiadze fofor no mu no ho asɛm na ɔreka. c Ebɛnadze ntsi na yɛreka dɛm? Kasafua a wɔkyerɛɛ ase “dɛtse” wɔ ha no, wɔsan kyerɛɛ ase “huntuma” wɔ Job 17:16. Na sɛ ehwɛ dza Job 17:16 reka ho asɛm no a, ɔma yehu dɛ ogyina hɔ ma adakamona. Dɛm asɛm yi ma yehu dɛ, ɔyɛ owusoɛr ankasa a ɔbɔkɔ do wɔ nda a odzi ekyir no n’ewiei nye Har-Magedon ko no ekyir no na Daniel 12:2 no reka ho asɛm.
7. (a) Ebɛn kwan do na wobenyan nyimpa binom akɔ “daa nkwa mu”? (b) Ebɛnadze ntsi na iyi bɛyɛ “owusoɛr a oye kyɛn” hɔn a wonyaan hɔn wɔ tsetse mber mu no?
7 Daniel 12:2 ne fa bi ka dɛ wobenyan nyimpa binom akɔ “daa nkwa mu.” Dɛm asɛm yi kyerɛ dɛn? Dza ɔkyerɛ nye dɛ, hɔn a wobenyan hɔn na wobosua anaa wɔbɔkɔ do esua Jehovah na Jesus ho adze na woeetsie hɔn wɔ mfrenhyia 1,000 no mu no, wobenya daa nkwa. (John 17:3) Iyi bɛyɛ “owusoɛr a oye kyɛn” hɔn a wonyaan hɔn wɔ tsetse mber mu no. (Heb. 11:35) Ebɛnadze ntsi a? Osiandɛ hɔn a wonyaan hɔn wɔ tsetse mber mu no, wɔsanee wuwui.
8. Ebɛn kwan do na wobenyan ‘binom akɔ enyimguase na daa enyimtsiabu’ mu?
8 Naaso, nnyɛ hɔn a wobenyan hɔn no nyina na wɔbɛma kwan ma Jehovah akyerɛkyerɛ hɔn. Daniel nkɔnhyɛ no ka dɛ wobenyan ‘binom akɔ enyimguase na daa enyimtsiabu’ mu. Dɛm nkorɔfo yi bɛtsew etua, dɛm ntsi, wɔrennkyerɛw hɔn dzin wɔ nkwa nwoma no mu, na worinnya daa nkwa so. Mbom wobobu hɔn enyimtsia daa, anaadɛ wɔbɛsɛɛ hɔn. Ntsi, dza ewiei koraa ɔbɔto hɔn a wobenyan hɔn aba asaase do wɔ hɔn wusoɛr no ekyir no na Daniel 12:2 no reka ho asɛm. d (Nyi. 20:12) Binom benya daa nkwa, na binom so rinnya.
‘WƆDZE NYIMPA PIINARA BƆKƆ TSENENEE MU’
9-10. Ebɛn asɛm bio na obesi wɔ ahohiahia kɛse no ekyir? Woananom na “wɔbɛhyerɛn dɛ [mbrɛ] wimu hyerɛn” no?
9 Kenkan Daniel 12:3. Ebɛn asɛm bio na obesi wɔ “ahohiaber” a ɔreba no ekyir? Sɛ yɛdze asɛm a ɔwɔ Daniel 12:2 no to nkyɛn a, nyiyimu 3 no so ka biribi fofor a obesi wɔ ahohiahia kɛse no ekyir ho asɛm.
10 Woananom na “wɔbɛhyerɛn dɛ [mbrɛ] wimu hyerɛn” no? Asɛm a Jesus kae wɔ Matthew 13:43 no ma yehu hɔn a wɔreka hɔnho asɛm no. Ɔkaa dɛ dɛm aber no, “atseneneefo bɛhyerɛn dɛ ewia wɔ hɔn Egya ahenman mu.” Sɛ yɛhwɛ Jesus n’asɛm yi mu a, yehu dɛ nna “ahenman no ne mba” ho asɛm na ɔreka. Iyinom nye no nuanom a wɔasera hɔn a wɔnye no bedzi adze wɔ sor Ahendzi no mu no. (Matt. 13:38) Dɛm ntsi, dza Daniel 12:3 reka ho asɛm no fa hɔn a wɔasera hɔn nye edwuma a wɔbɛyɛ wɔ Mfrenhyia Apem Tumdzi no mu no ho.
Mfrenhyia 1,000 no mu no, 144,000 no nye Jesus Christ bɔbɔ mu ayɛ edwuma na wɔaahwɛ ma nkyerɛkyerɛ edwuma a wɔbɛyɛ wɔ asaase do no aakɔ do (Hwɛ nkyekyɛmu 11)
11-12. Ebɛn edwuma na 144,000 no bɛyɛ wɔ mfrenhyia 1,000 no mu?
11 Ebɛnadze na hɔn a wɔasera hɔn no bɛyɛ dze ‘nyimpa piinara akɔ tsenenee mu’? Mfrenhyia 1,000 no mu no, wɔnye Jesus Christ bɔbɔ mu ayɛ edwuma na wɔaahwɛ ma nkyerɛkyerɛ edwuma a wɔbɛyɛ wɔ asaase do no aakɔ do. Nyimpa 144,000 a wɔbɔkɔ sor no, wɔrennyɛ ahemfo nko na mbom, wɔbɛyɛ asɔfo so. (Nyi. 1:6; 5:10; 20:6) Dɛm ntsi, wɔbɔboa ma ‘wɔaasa amanaman no yarba,’ na wɔbɔboa adasamba nkakrankakra ma wɔaayɛ nyimpa a bɔn biara nnyi hɔnho. (Nyi. 22:1, 2; Ezek. 47:12) Dɛm edwuma yi bɛma hɔn a wɔasera hɔn no enyi agye paa!
12 Woananom na wɔbɛka nyimpa “piinara” a wɔdze hɔn bɔkɔ tsenenee mu no ho? Hɔn mu bi nye hɔn a wobenyan hɔn, hɔn a wobotwa Har-Magedon, nye mbofra a bi a wɔbɔwo hɔn wɔ wiadze fofor no mu no. Mfrenhyia 1,000 no mbra n’ewiei no, nna hɔn a wɔwɔ asaase do nyina abɛyɛ nyimpa a bɔn biara nnyi hɔnho. Ntsi, ebɛn aber na wɔbɛkyerɛw hɔn dzin korakora wɔ nkwa nwoma no mu?
NSƆHWƐ A OTWA TUN
13-14. Ebɛnadze na ɔwɔ dɛ nyimpa a bɔn biara nnyi hɔnho wɔ asaase do no yɛ ansaana woenya daa nkwa?
13 Ɔsɛ dɛ yɛma ɔtsena hɛn adwen mu dɛ, sɛ bɔn nnyi obi ho a, ɔno nnkyerɛ dɛ mbrɛ ɔtse biara no, nyimpa no benya onnyiewiei nkwa. Hom mma yɛmfa Adam na Eve dɛ nhwɛdo. Wɔbɔɔ hɔn no, nna bɔn biara nnyi hɔnho. Naaso, sɛ nna wɔbɔkɔ do atsena ase daa a, nna ɔwɔ dɛ wotsie Jehovah Nyankopɔn n’asɛm. Naaso awerɛhosɛm nye dɛ, woenntsie n’asɛm.—Rom. 5:12.
14 Sɛ mfrenhyia 1,000 no ba ewiei a, hɔn a wɔtse asaase do no tsebea bɛyɛ dɛn? Dɛm aber no, nna hɔn nyina abɛyɛ nyimpa a bɔn biara nnyi hɔnho. Naaso yembisa dɛ, aso hɔn nyina bɛbrɛ hɔnho adze ahyɛ Jehovah no tumdzi ase daa? Anaa hɔn mu binom bɛyɛ hɔn adze tse dɛ Adam na Eve a ɔmmfa ho dɛ nna bɔn nnyi hɔnho no, woenndzi Jehovah nokwar no? Ɔwɔ dɛ yenya dɛm nsɛmbisa yi ho mbuae. Naaso, yebesi dɛn enya?
15-16. (a) Ebɛn aber na nyimpa nyina benya hokwan dze akyerɛ dɛ wɔtaa Jehovah n’ekyir? (b) Ebɛnadze na obefi nsɔhwɛ a otwa tun no mu aba?
15 Mfrenhyia 1,000 no mu no, wɔdze Satan bɔto efiadze. Dɛm aber no, orunntum nndaadaa obiara. Naaso, sɛ mfrenhyia 1,000 no ba ewiei a, wobeyi no efi efiadze. Sɛ opue bɔto nyimpa a bɔn biara nnyi hɔnho no a, ɔbɛyɛ dza obotum biara dze adaadaa hɔn. Dɛm aber no, nyimpa a wɔtsetse asaase do a bɔn nnyi hɔnho no benya hokwan dze akyerɛ dɛ, wɔgye to mu dɛ ɔnnsɛ dɛ obiara sɛɛ Jehovah ne dzin na nankotsee so na ɔfata dɛ odzi abɔdze nyina do tum anaadɛ wɔnngye nnto mu. (Nyi. 20:7-10) Dza obiara bɛyɛ dɛm aber no na ɔbɛkyerɛ dɛ wɔbɛkyerɛw ne dzin korakora wɔ nkwa nwoma no mu anaa wɔrennkyerɛw.
16 Nyimpa binom a yennyim hɔn dodow bɛyɛ hɔn adze tse dɛ Adam na Eve. Wɔremmbrɛ hɔnho adze nnhyɛ Jehovah no tumdzi ase. Ebɛn asɛm na ɔbɔto dɛm nkorɔfo no? Nyikyerɛ 20:15 ka dɛ: “Na obiara a woennhu dɛ wɔakyerɛw ne dzin wɔ nkwa nwoma no mu no, wɔtoow no kyeen ogya nsutaae no mu.” (Baebor) Ampaara, wɔbɛsɛɛ dɛm etuatsewfo yi korakora. Naaso, nyimpa a bɔn nnyi hɔnho no mu dodow no ara botwa nsɔhwɛ a otwa tun no. Iyi ekyir no, wɔbɛkyerɛw hɔn dzin korakora wɔ nkwa nwoma no mu.
DZA ƆBƆKƆ DO WƆ “EWIEI BER” NO MU
17. Ebɛn asɛm na ɔbɔfo bi kaa kyerɛɛ Daniel dɛ obesi wɔ hɛn aber yi do? (Daniel 12:4, 8-10)
17 Sɛ yɛdwendwen nsɛm a daakye a obesisi no ho a, ɔma hɛn enyi gye paa! Naaso, “ewiei ber” a sesei yɛtse mu so, ɔbɔfo bi kaa ho asɛm bi a ohia paa kyerɛɛ Daniel. (Kenkan Daniel 12:4, 8-10; 2 Tim. 3:1-5) Ɔbɔfo no kaa kyerɛɛ Daniel dɛ, ewiei ber no mu no, nokwar ‘nyimdzee bɔdɔɔ so.’ Ɔyɛ ampa, Nyankopɔn n’asomfo bɛtse nkɔnhyɛsɛm a ɔwɔ Daniel nwoma no mu no ase yie. Ɔbɔfo no dze kaa ho dɛ, wɔ dɛm ewiei ber yi mu no, “emumuyɛfo bɛyɛ emumuyɛ; na emumuyɛfo biara renntse ase.”
18. Ebɛn asɛm na ɔbɔto ndzebɔnyɛfo ndaansa yi ara?
18 Ndɛ, sɛ ehwɛ ndzɛmba bɔn a ndzebɔnyɛfo reyɛ no a, w’adwen botum ayɛ wo dɛ wɔafa hɔnho edzi. (Mal. 3:14, 15) Naaso ɔrennkyɛr, Jesus bobu hɔn a wɔka hɔnho asɛm dɛ wɔyɛ mpɔnkye no atsɛn, na ɔaatsew hɔn efi nyimpa a wɔka hɔnho asɛm dɛ wɔyɛ nguan no ho. (Matt. 25:31-33) Dɛm ndzebɔnyɛfo yi rinnya hɔn tsir nndzidzi mu wɔ ahohiahia kɛse no mu. Dɛmara so na worinnyan hɔn mmba wiadze fofor no mu. Afei so “nkaa nwoma” a wɔaka ho asɛm wɔ Malachi 3:16 no, wɔrennkyerɛw hɔn dzin wɔ mu.
19. Ndɛ nye ber a ɔwɔ dɛ yɛyɛ dɛn, na ebɛnadze ntsi na ɔwɔ dɛ yɛyɛ dɛm? (Malachi 3:16-18)
19 Ndɛ nye ber a ɔwɔ dɛ yɛdze hɛn ndzeyɛɛ kyerɛ dɛ yɛnnka ndzebɔnyɛfo ho. (Kenkan Malachi 3:16-18.) Jehovah roboaboa hɔn a obu hɔn dɛ wɔyɛ “akoradze soronko” anaa egyapadze tsitsir ano. Dɛm nkorɔfo no da Jehovah n’akoma do paa, na yɛpɛ dɛ yɛka hɔnho.
Sɛ yehu dɛ Daniel, hɛn adɔfo, nye nyimpa pii a wowuwui no ‘asoɛr’ wɔ wiadze fofor no mu a, hɛn enyi bɛgye paa! (Hwɛ nkyekyɛmu 20)
20. Asɛm a otwa tun a Jehovah kaa kyerɛɛ Daniel nye dɛn? Ebɛnadze ntsi na ehwɛ kwan dɛ dɛm asɛm yi bɛba mu?
20 Nokwasɛm nye dɛ, mber a yɛtse mu yi yɛ enyika paa. Naaso ɔrennkyɛr biara, nsɛm a ɔyɛ ahomka koraa kyɛn dza yehu no ribesisi. Wobeyi nsɛmbɔndzi nye emumuyɛsɛm nyina efi asaase do ndaansa yi ara. Ɔno ekyir no, yebohu dɛ asɛm bi a Jehovah kaa kyerɛɛ Daniel no aba mu. Jehovah kaa dɛ: “Ebɔsoɛr ekenya wo kyɛfa wɔ nda no ewiei.” (Dan. 12:13, Baebor) Ana edze enyigye rohwɛ ber a Jehovah bɛma Daniel nye w’adɔfo a woewuwu no ‘asoɛr’ no kwan? Sɛ dɛm a, yɛ dza ibotum biara dzi Jehovah nokwar ndɛ. Sɛ eyɛ dɛm a, ibotum enya enyidado dɛ wo dzin rimmfi Jehovah no nkwa nwoma no mu.
NDWOM 80 “Hom Nka Nhwɛ Na Hom Nhu Dɛ Jehovah Ye”
a Daniel 12:2, 3 ka nkyerɛkyerɛ edwuma kɛse bi a ɔbɔkɔ do ho asɛm. Adzesua yi bɛma yeehu ntseasee fofor a yeenya wɔ iyi ho. Yɛbɔhwɛ ber a dɛm edwuma yi bɔkɔ do nye hɔn a wɔbɛyɛ bi. Afei so, yɛbɔhwɛ mbrɛ nkyerɛkyerɛ edwuma yi bɔboa hɔn a wɔbɛtsena asaase do no ama woeetum egyina nsɔhwɛ a otwa tun no ano wɔ Christ ne Mfrenhyia Apem Tumdzi no n’ewiei.
b Owusoɛr a ɔbɔkɔ do no, bi a ɔbɛyɛ ntoatoado ntoatoado. Bi a wobedzi kan enyan Jehovah n’asomfo a wodzii no nokwar wɔ nda a odzi ekyir no mu ana woruwu no, ansaana ɔno ekyir no, woenyan hɔn a wowuwui ana nda a odzi ekyir no rehyɛ ase. Ntsi, bi a sɛ wonyan nyimpa bi a wɔtsenaa ase wɔ mber bi mu no wie a, nna woenyan nyimpakuw fofor so a wɔtsenaa ase wɔ mber pɔtsee bi mu no so atoa do. Sɛ dɛmara na ɔbɛyɛ ampaara dze a, ɔno obiara benya kwan ama no dɔfo bi a owui gyaa no hɔ no akɔaba. Mbrɛ obesi biara no, Kyerɛwnsɛm no ma yehu dɛ hɔn a wobenyan hɔn akɔ sor no, wobenyan hɔn ndzidzido ndzidzido. Ntsi dɛmara na bi a asaase do dze no so bɛyɛ.—1 Cor. 14:33; 15:23.
c Iyi yɛ ntseasee fofor a yeenya wɔ asɛm a ɔwɔ Tie Daniel Nkɔnhyɛ! nwoma no tsir 17, nye July 1, 1987 Ɔweɔn-Aban no, nkr. 21-25 mu no ho.
d Nsɛmfua “hɔn a wɔtsen” na “hɔn a wɔnntsen” a ɔwɔ Asomafo Ndwuma 24:15 nye nsɛmfua ‘hɔn a wɔyɛɛ papa’ nye ‘hɔn a wɔyɛɛ dza omuo’ a ɔwɔ John 5:29 no, ɔtwe adwen si bra a hɔn a wobenyan hɔn no bɔe ansaana woruwu no do. Nsonsonee wɔ ɔno nye dza yɛreka wɔ nkyekyɛmu yi mu no mu.
