1. Ebɛnadze na obi yɛ a ɔbɛma nkorɔfo agye no edzi?

 SƐ OBI ka nokwar na odzi no bɔhyɛ do a, nkorɔfo gye no dzi. (Ndw. 15:4) Yebotum dze hɛnho ato nyimpa a ɔtse dɛm do. Yɛpɛ dɛ hɛn nuanom gye hɛn dzi na wonya hɛn mu ahotodo so. Ebɛnadze na ɔsɛ dɛ yɛyɛ ama hɛn nuanom aagye hɛn edzi?

2. Yebesi dɛn ama afofor agye hɛn edzi?

² Yerunntum nnhyɛ obi dɛ ɔngye hɛn ndzi. Ɔsɛ dɛ yɛyɛ ndzɛmba a ɔbɛma hɛn nuanom agye hɛn edzi. Yebotum dze gye a obi bɛgye hɛn edzi no atoto sika ho. Sika ne nya yɛ dzen, naaso ɔnnyɛ dzen dɛ obefi hɛn nsa. Jehovah ayɛ ndzɛmba pii a ɔma yɛgye no dzi. Yebotum agye no edzi aber nyina, osiandɛ no “ndwuma nyinara” kyerɛ dɛ ɔyɛ ‘ɔnokwafo.’ (Ndw. 33:4) Jehovah pɛ dɛ yesuasua no. (Eph. 5:1) Hom mma yɛnhwɛ Jehovah n’asomfo binom a wosuasuaa hɛn sor Egya no, na wɔyɛɛ ndzɛmba a ɔbɛma afofor agye hɔn edzi. Yɛbɛsan so ahwɛ su ahorow enum bi a sɛ yɛda no edzi a ɔbɛma afofor agye hɛn edzi.

3-4. Ebɛn kwan do na nkɔnhyɛnyi Daniel daa no edzi dɛ afofor botum agye no edzi, na ebɛn nsɛm na ɔwɔ dɛ iyi ma yebisa hɛnho?

³ Nkɔnhyɛnyi Daniel yɛ obi a ɔyɛɛ ndzɛmba a nna ɔbɛma afofor agye no edzi. Ɔwɔ mu dɛ nna ɔwɔ nkowaasom mu wɔ Babylon dze, naaso ɔdaa no edzi dɛ ɔyɛ obi a wobotum agye no edzi na woenya no mu ahotodo so. Jehovah boaa no ma ɔkyerɛɛ Babylonhen Nebuchadnezzar ne daa ase. Iyi maa nkorɔfo gyee no dzii paa. Da kor bi, nna ɔwɔ dɛ Daniel ka kyerɛ  Ɔhen Nebuchadnezzar dɛ ɔayɛ adze a Jehovah mmpɛ. Nna iyi yɛ asɛm a ɔhen biara mmpɛ dɛ ɔbɛtse. Nna ɔgye akokodur ana Daniel eetum ayɛ dɛm, osiandɛ nna Nebuchadnezzar yɛ obi a ɔnnkyɛr na no bo efuw. (Dan. 2:12; 4:20-22, 25) Mfe pii ekyir no, Daniel sanee daa no edzi dɛ ɔyɛ obi a wobotum agye no edzi. Nsa a hwee nndze mu kyerɛɛw nsɛm bi a n’asetse yɛ dzen guu Babylon ahemfie fasu ho. Daniel nye obi a otumii kyerɛɛ nsɛm no ase. (Dan. 5:5, 25-29) Ekyir yi, Medianyi Darius nye ne mpanyimfo no so hun dɛ ‘sunsum bi a ɔkyɛn do’ wɔ Daniel no do. Bio so, wohun dɛ Daniel dzi ‘nokwar na woennhu mfom anaa bɔn biara’ wɔ no ho. (Dan. 6:3, 4) Ampaara, ahemfo a wɔsom abosom mpo bohun dɛ wobotum agye Jehovah no somfo yi edzi!

⁴ Daniel no nhwɛdo no wɔ hɛn adwen mu yi, ɔsɛ dɛ yebisa hɛnho dɛ: ‘Hɔn a wɔnnyɛ Jehovah Adasefo no, wohu me dɛn? Aso wonyim me dɛ meyɛ obi a midzi m’asodzii ho dwuma na nkorɔfo botum agye me edzi?’ Ebɛnadze ntsi na ohia dɛ yebisa hɛnho nsɛm a ɔtse dɛm? Siantsir nye dɛ, sɛ nkorɔfo gye hɛn dzi a, ɔhyɛ Jehovah enyimnyam.

5. Nna ebɛnadze ntsi na afofor wɔ Hananiah no mu ahotodo?

⁵ Ambrado Nehemiah toow Jerusalem fasu no wiei wɔ afe 455 A.H.B. Iyi ekyir no, ɔhwehwɛɛ mbarimba a nkorɔfo wɔ hɔn mu ahotodo a wobotum ahwɛ kurow no do yie. Ɔpaaw mbarimba bi tse dɛ Hananiah a ɔyɛ Abankɛse mu panyin no. Bible no ka Hananiah ho asɛm dɛ “ɔyɛ ɔbarimba nokwafo, na osuro Nyankopɔn sen dodowara.” (Neh. 7:2) Nna ɔdɔ  Jehovah na ɔmmpɛ dɛ ɔbɛyɛ biribi a Jehovah mmpɛ. Iyi maa ɔyeer noho yɛɛ edwuma biara a wɔdze hyɛɛ ne nsa no. Su a ɔtse dɛm no botum aboa hɛn ma afofor eenya hɛn mu ahotodo wɔ Jehovah no som mu.

6. Ebɛn kwan do na Tychicus daa no edzi dɛ ɔyɛ nyɛnko a Paul botum agye no edzi?

⁶ Hom mma yɛnhwɛ nhwɛdo a Tychicus so yɛe. Nna ɔyɛ ɔsomafo Paul ne nyɛnko a ɔgye no dzi. Aber a nna Paul da efiadze wɔ nankasa ne fie no, ɔdze noho too Tychicus do na ɔkaa noho asɛm dɛ ɔyɛ “somfo nokwafo.” (Eph. 6:21, 22) Dɛm ntsi, nna Paul gye dzi dɛ ne nkrataa a ɔakyerɛw no, Tychicus dze bɔkɔ akɛma enuanom a wɔwɔ Ephesus na Colossae no. Nnyɛ ɔno nko, nna ɔgye dzi so dɛ Tychicus bɛhyɛ dɛm enuanom no nkuran na ɔaahyɛ hɔn gyedzi dzen. Tychicus ma yɛkaa mbarimba anokwafo a wɔwɔ hɛn aber yi do a wɔma yenya nkyerɛkyerɛ a ɔma yɛtwe bɛn Nyankopɔn no.​—Col. 4:7-9.

7. Dza asafo mu mpanyimfo na asomfo yɛ ma ntsi yɛwɔ hɔn mu gyedzi no, ebɛnadze na ibotum esua efi mu?

⁷ Ndɛ so hɛn enyi sɔ asafo mu mpanyimfo na asomfo anokwafo a yɛwɔ hɔn mu ahotodo no. Dɛm mbarimba yi yɛ hɔn adze tse dɛ Daniel, Hananiah, na Tychicus. Wɔyer hɔnho yɛ edwuma a ɔhyɛ hɔn nsa no. Dɛ nhwɛdo no, sɛ yɛkɔ asafo nhyiamu a yɛyɛ no dapɛn finimfin no a, yehu dɛ wɔdze dwumadzi a ɔbɔkɔ do no nyina ahyehyɛ enuanom binom nsa kamakama. Sɛ enuanom mbarimba na mbaa a wɔdze dwumadzi ahyehyɛ hɔn nsa no siesie hɔnho yie na wɔbɛyɛ a, asafo mu mpanyimfo no enyi sɔ paa! Dɛmara so na sɛ yɛroto nsa afrɛ hɛn Bible esuafo dɛ wɔmbra dapɛn ewiei nhyiamu a yɛyɛ no a, yennsuro dɛ annhwɛ a wɔbɛba no nna yennhu obi a ɔbɛma bagua mu ɔkasa dɛm da no. Afei so, yɛwɔ awerɛhyɛmu dɛ aber nyina hɛn nsa bɛka nwoma a yebehia dze akɔ asɛnka no. Dɛm mbarimba anokwafo yi ma hɛn nsa ka dza yehia. Yɛda Jehovah ase paa dɛ ɔama hɛn mbarimba anokwafo a wɔtse dɛm! Naaso ebɛn ndzɛmba na sɛ yɛyɛ a ɔbɛma afofor agye hɛn edzi?

8. Ɔwɔ mu dɛ yɛdwen hɛn nuanom hɔn eyiedzi ho, naaso ebɛnadze ntsi na ɔsɛ dɛ yɛyɛ ahwɛyie na yaammbɔ hɔn kukua mu nsɛm ho dawur? (Mbɛbusɛm 11:13)

⁸ Yɛdɔ hɛn nuanom na yɛdwen hɔn eyiedzi ho. Naaso ɔsɛ dɛ yɛyɛ ahwɛyie na yaammbɔ hɔn kukua mu nsɛm ho dawur annkyerɛ nkorɔfo. Tsetse Christianfo asafo no mu no, nna enuanom binom wɔ hɔ a, ‘wɔyɛ anobɛrbɛr na wɔdze hɔnho gyegye nkorɔfo nsɛm mu, keka nsɛm a ɔnnsɛ dɛ wɔka.’ (1 Tim. 5:13) Yɛmmpɛ dɛ yesuasua suban bɔn a ɔtse dɛm. Naaso fa no dɛ onua bi abɛka n’asɛm akyerɛ wo na ɔaka akyerɛ wo dɛ mma nnka ho asɛm nnkyerɛ obiara. Dɛ nhwɛdo no, akyerɛbaa bi botum abɛka yarba bi a ɔrehaw no anaa ɔhaw bi a orihyia ho asɛm akyerɛ wo na ɔabɔ w’ano dɛ mma nnka ho asɛm nnkyerɛ obiara. Sɛ ɔba dɛm a, ɔsɛ dɛ idzi dza ɔaka no do. b (Kenkan Mbɛbusɛm 11:13.) Dze besi ha yi, hom mma yɛnhwɛ tsebea afofor a no ho behia dɛ yɛkora enuanom hɔn kukua mu nsɛm do.

9. Ebɛnadze na ɔsɛ dɛ ebusua no munyi biara yɛ ama wɔaagye no edzi?

⁹ Yɛ obi a w’ebusua gye wo dzi. Ebusua mu nsɛm bi wɔ hɔ a, ɔnnsɛ dɛ ɔkɔ abowano. Ntsi ɔyɛ obusuanyi biara n’asodzii dɛ ɔkora nsɛm a ɔtsetse dɛm do. Nhwɛdo bi nye yi. Obotum aba dɛ akyerɛbaa bi wɔ biribi a ɔyɛ a ɔma no kun serew no. Ana okun no bɛka ho asɛm akyerɛ afofor ama ne yer n’enyi eewu?  Oho, ɔnnsɛ dɛ ɔyɛ dɛm koraa! Okun a ɔdɔ ne yer no, ɔrennyɛ biribiara a ɔbɛhaw ne yer da. (Eph. 5:33) Mbabun hwɛ kwan dɛ wɔdze enyidzi a ɔfata bɛma hɔn. Ɔsɛ dɛ awofo ma iyi tsena hɔn adwen mu. Ɔnnsɛ dɛ wɔka mfom a mbofra no dzi no ho asɛm kyerɛ afofor dze gu hɔn enyim ase. (Col. 3:21) Ɔsɛ dɛ mbofra no so yɛ hɔn adze nyansa mu. Nsɛm a obotum egu ebusua no mufo binom hɔn enyim ase no, ɔnnsɛ dɛ wɔka kyerɛ afofor. (Deut. 5:16) Ebusua mu nsɛm bi a ɔnnsɛ dɛ ɔkɔ abowano no, sɛ obusuanyi biara yɛ n’afamudze kora nsɛm a ɔtsetse dɛm do a, ebusuabɔ a ɔwɔ hɔn ntamu no bɛyɛ dzen.

10. Sɛ wɔka dɛ obi yɛ nyɛnko berɛbo a, ɔkyerɛ dɛn? (Mbɛbusɛm 17:17)

¹⁰ Yɛ obi a w’anyɛnkofo gye wo dzi. Ɔtɔ da a, yɛpɛ dɛ yɛka mbrɛ yɛtse nka ho asɛm kyerɛ hɛn nyɛnko a yɛbɛn no paa. Naaso ɔnnyɛ aber nyina na iyi da famu. Bi a nna ɔnnyɛ hɛn su dɛ yɛbɛka mbrɛ yesi tse nka ankasa ho asɛm akyerɛ obi. Dɛm ntsi sɛ yɛka hɛn asɛm kyerɛ hɛn nyɛnko na ɔno so bɔ no dawur a, nna ɔahaw hɛn paa. Naaso sɛ yɛka hɛn kukua mu asɛm kyerɛ obi na ɔaannka annkyerɛ obiara a, hɛn enyi sɔ paa! Yebu nyimpa a ɔtse dɛm no dɛ ɔyɛ ‘nyɛnko berɛbo.’​—Kenkan Mbɛbusɛm 17:17.

11. (a) Ebɛnadze na asafo mu mpanyimfo nye hɔn yernom yɛ dze kyerɛ dɛ enuanom botum agye hɔn edzi? (b) Asafo mu panyin bi ekedzi kukua mu asɛm bi ho dwuma na ɔaba fie ma ɔnye n’ebusua ehyia. Ebɛnadze na yebotum esua efi dza ɔyɛe no mu? (Hwɛ mfonyin no.)

¹¹ Yɛ obi a enuanom a wɔwɔ asafo no mu no gye wo dzi. Asafo mu mpanyimfo a wɔkora kukua mu nsɛm do no, wɔtse dɛ “huntsabea wɔ mframa ano, na guandɔbea wɔ ehum ano” ma hɔn nuanom. (Isa. 32:2) Yenyim dɛ yebotum nye hɔn akasa a yennsuro, osiandɛ yɛwɔ ahotodo dɛ sɛ yɛka hɛn kukua mu nsɛm kyerɛ hɔn a, wɔrennka ho asɛm nnkyerɛ obiara. Ɔnnsɛ dɛ yɛhyɛ asafo mu mpanyimfo dɛ wɔnka enuanom hɔn kukua mu nsɛm nkyerɛ hɛn. Iyi da nkyɛn a, hɛn enyi sɔ mbɔdzen a asafo mu mpanyimfo hɔn yernom bɔ no. Wɔnnyɛ  biribi a ɔbɛma hɔn kunnom aka enuanom hɔn kukua mu nsɛm akyerɛ hɔn. Nokwasɛm nye dɛ ɔyɛ papa dɛ asafo mu panyin rennka enuanom hɔn kukua mu nsɛm nnkyerɛ ne yer. Asafo mu panyin bi ne yer kaa dɛ: “M’enyi gye ho paa dɛ mo kun nnka hɔn a ɔkɔ hɔn hɔ mpanyimfo nserahwɛ nye hɔn a wohia mpanyimfo mboa no hɔnho asɛm nnkyerɛ me. Ɔmmbɔ hɔn edzin mpo na meehu hɔn. Ɔyɛ me dɛw paa so dɛ mo kun nnka nsɛm a ɔtse dɛm nnkyerɛ me, osiandɛ sɛ metse mpo a, murunntum nnyɛ ho hwee, mbom ɔbɛyɛ dadwen ama me. Dɛm a ɔyɛ no boa me ma mutum nye enuanom a wɔwɔ asafo no mu nyina bɔ. Afei so, megye dzi dɛ sɛ meka m’asɛm anaa me haw bi kyerɛ mo kun a, ɔrennka nnkyerɛ obiara.” Nokwasɛm nye dɛ, hɛn nyina yɛpɛ dɛ afofor gye hɛn dzi. Ebɛn su na sɛ yɛda no edzi a ɔbɛma afofor agye hɛn edzi? Hom mma yensusu no mu enum ho.

12. Ebɛnadze ntsi na sɛ yɛda ɔdɔ edzi a, ɔbɛma afofor agye hɛn edzi? Ma ho nhwɛdo.

¹² Ɔdɔ a yɛbɛda no edzi no nye adze tsitsir a ɔbɛma afofor agye hɛn edzi. Jesus kyerɛɛ dɛ ahyɛdze ebien a ɔyɛ kɛse paa nye dɛ yɛbɔdɔ Jehovah na yaadɔ hɛn nyɛnko nyimpa. (Matt. 22:37-39) Jehovah ayɛ ndzɛmba a ɔma yɛgye no dzi. Yɛdɔ no, dɛm ntsi yɛpɛ dɛ yesuasua no. Dɛ nhwɛdo no, ɔdɔ a yɛwɔ ma hɛn nuanom ntsi, yɛnnka hɔn kukua mu nsɛm nnkyerɛ afofor. Nsɛm a ɔfa hɛn nuanom ho a sɛ yɛka kyerɛ afofor a ɔbɛhaw hɛn nuanom, ɔbɛma hɔn enyim egu ase anaa ɔbɛma woedzi yaw no, ɔnnsɛ dɛ yɛka.​—John 15:12.

13. Sɛ yɛbrɛ hɛnho adze a, ebɛn kwan do na ɔbɛma afofor agye hɛn edzi?

¹³ Sɛ yɛbrɛ hɛnho adze a, ɔbɛma afofor agye hɛn edzi. Christiannyi a ɔbrɛ noho adze no, ɔremmper noho dɛ ɔbɛka kukua mu asɛm bi akyerɛ afofor dze apɛ hɔn enyim enyimnyam na ɔaka dɛ ɔno na odzii kan kaa ho asɛm. (Phil. 2:3) Afei so, ɔnnyɛ biribi a ɔbɛma afofor enya adwen dɛ onyim kukua mu nsɛm bi a ɔnnsɛ dɛ ɔka ho asɛm kyerɛ obiara. Sɛ yɛbrɛ hɛnho adze a, ɔno so remma yɛnntserɛw nsɛm bi a Bible no anaa asafo nwoma nnkaa ho asɛm mu.

14. Sɛ yɛda nhumu edzi a, ebɛn kwan do na ɔbɛma afofor agye hɛn edzi?

¹⁴ Sɛ yɛda nhumu edzi a, ɔbɔboa hɛn ma yeehu ‘aber a ɔwɔ dɛ yɛyɛ komm, na aber a ɔwɔ dɛ yɛkasa.’ (Ɔsɛnk. 3:7) Amambra bi mu no, wɔka dɛ nyia ɔka n’ano to mu no, wobu no onyansafo. Kwan bi do no, aber bi wɔ hɔ a, ɔbɛyɛ papa dɛ yɛbɛyɛ dzinn kyɛn dɛ yɛbɛkasa. Dɛm ntsi, Mbɛbusɛm 11:12 ka dɛ: ‘Nyimpa a ɔwɔ nhumu dze, omua n’ano.’ Nhwɛdo bi nye yi. Wɔtaa ma asafo mu panyin bi a ɔdze nokwardzi asom mfe pii kɔboa asafo ahorow bi ma wodzi ɔhaw ahorow bi ho dwuma. Hom mma yɛnhwɛ dza asafo mu panyin bi kae faa noho. Ɔkaa dɛ: “Irinnya no da dɛ ɔbɛka asafo fofor bi no kukua mu nsɛm akyerɛ obi.” Mbrɛ dɛm asafo mu panyin yi yɛ n’adze no ma mpanyimfo a ɔnye hɔn som no bu no paa. Wɔgye no dzi paa dɛ ɔrennka hɔn kukua mu nsɛm nnkyerɛ obiara.

15. Sɛ yedzi nokwar a, afofor bɛgye hɛn edzi. Ma nhwɛdo a ɔkyerɛ dɛ iyi yɛ nokwar.

¹⁵ Sɛ yedzi nokwar a, ɔno so bɛma afofor agye hɛn edzi. Sɛ obi dzi nokwar a yɛgye no dzi, osiandɛ yenyim dɛ aber nyina ɔbɛka nokwasɛm a ɔwɔ asɛm bi mu akyerɛ hɛn. (Eph. 4:25; Heb. 13:18) Fa no dɛ epɛ dɛ eyɛ ɔkyerɛkyerɛfo pa. Dɛm ntsi epɛ dɛ eka kyerɛ obi dɛ sɛ ereyɛ wo dwumadzi a, ontsie na ɔmma wo nyansahyɛ a ɔbɔboa wo ma aayɛ ɔkyerɛkyerɛfo pa. Woana na egye dzi dɛ obotum ama wo afotu pa? Ana ɔyɛ obi a ɔbɛka dza epɛ dɛ etse ho asɛm akyerɛ wo anaa obi a obefi n’akoma  mu aka nokwar no akyerɛ wo? Iyi dze inyim mbuae no dada. Bible no ka dɛ: “Enyimka petee oye sen ɔdɔ a ohuntsa. Ɔnyɛnko n’epirakur yɛ nokwar.” (Mbɛ. 27:5, 6) Obi a odzi nokwar no, ɔbɛka nokwar no akyerɛ wo. Bi a ahyɛse no ɔbɛyɛ wo yaw dze, naaso sɛ edze yɛ edwuma a, ɔbɔboa wo paa.

16. Ebɛn kwan do na Mbɛbusɛm 10:19 ma yehu dɛ ohia dɛ yɛhyɛ hɛnho do?

¹⁶ Sɛ nkorɔfo bɛgye hɛn edzi a, no ho hia paa dɛ yɛhyɛ hɛnho do. Sɛ biribi gyegye hɛn dɛ yɛnka kukua mu asɛm bi nkyerɛ obi a, ahohyɛdo bɔboa hɛn ma yaaka hɛn ano apaa do. (Kenkan Mbɛbusɛm 10:19.) Ber a obotum ayɛ dzen ama hɛn dɛ yɛbɛhyɛ hɛnho do nye ber a yɛwɔ sohyial media do no. Sɛ yɛannhwɛ yie a, yebotum aka kukua mu nsɛm bi akyerɛ nyimpa pii aber a hɛn enyi nnda. Sɛ yɛka asɛm a ɔtse dɛm wɔ sohyial media do a, yerunntum nnyɛ ho hwee bio. Beebi a asɛm no bɔkɔ ekodu nye ɔhaw a obotum dze aba no, yerunntum nnyɛ ho hwee. Sɛ hɔn a wɔsoɛr tsia hɛn no fa kwan bi do daadaa hɛn dɛ yɛnka kukua mu asɛm bi a obotum akɛfa ɔhaw abrɛ hɛn nuanom a, ahohyɛdo bɛma yɛaka hɛn ano ato mu. Ɔman a yɛtse mu no, sɛ wɔabra hɛn anaa wɔdze nsa ato hɛn dwumadzi ahorow bi do a, aporisifo botum afa kwan bi do adaadaa hɛn ma yaada kukua mu nsɛm bi edzi. Sɛ yehyia tsebea ɔtse dɛm anaa tsebea fofor biara a, ɔsɛ dɛ yɛdze Bible mu afotusɛm a ɔka dɛ ‘yɛmfa ewur nto hɛn ano’ no yɛ edwuma. (Ndw. 39:1) Dɛ yɛnye hɛn ebusua ridzi o, hɛn anyɛnkofo o, hɛn nuanom o, obi biara o, ɔsɛ dɛ yɛyɛ ndzɛmba a ɔbɛma wɔagye hɛn edzi. Na sɛ wobotum agye hɛn edzi so a, ɔsɛ dɛ yetum hyɛ hɛnho do.

17. Ebɛn ndzɛmba na sɛ yɛyɛ a, ɔbɛma hɛn nuanom agye hɛn edzi?

¹⁷ Jehovah dze hɛn abɛka enuayɛkuw bi ho. No mufo dodɔ hɔnho na wɔyɛ ndzɛmba a ɔma nkorɔfo gye hɔn dzi. Yɛda Jehovah ase paa dɛ ɔdze hɛn abɛka enuayɛkuw a ɔtse dɛm ho! Hɛn nyina wɔ asodzi dɛ yɛyɛ ndzɛmba a ɔbɛma hɛn nuanom agye hɛn edzi. Sɛ hɛn mu biara yer noho da ɔdɔ, ahobrɛadze, nhumu, nokwardzi, na ahohyɛdo edzi a, ɔbɛma hɛn nuanom agye hɛn edzi. Sɛ hɛn nuanom bɔkɔ do agye hɛn edzi a, ɔnnyɛ da kor adzeyɛ. Ɔwɔ dɛ yɛkɔ do yɛ ndzɛmba a ɔbɛma wɔakɔ do agye hɛn edzi. Ɔmbra dɛ yɛbɔkɔ do esuasua hɛn Nyankopɔn Jehovah, na yaakɔ do ayɛ ndzɛmba a ɔbɛma nkorɔfo agye hɛn edzi.