Hwɛ mbrɛ Bible no si bua dɛm nsɛmbisa yi.

Asomafo Ndwuma 24:15 ka dɛ wobenyan “hɔn a wɔtsen nye hɔn a wɔnntsen” efi ewufo mu. Hɔn a wɔtsen no nye nyimpa a wɔyɛɛ setsie maa Nyankopɔn ber a wɔtse ase no. Wɔakyerɛw dɛm nkorɔfo yi dzin wɔ nkwa nwoma no mu. (Mal. 3:16) Nyimpa binom so wɔ hɔ a woennya hokwan pii ennsua Jehovah ho adze ana woruwu, dɛm ntsi wɔannkyerɛw hɔn dzin wɔ nkwa nwoma no mu. Dɛm nkorɔfo yi ka hɔn a wɔnntsen no ho.

Nyimpakuw ebien a Asomafo Ndwuma 24:15 ka hɔnho asɛm no, hɔnara so na John 5:28, 29 ka hɔnho asɛm no. Jesus kaa dɛ ‘hɔn a wɔyɛɛ papa no’ befir edzi ‘akɔ nkwa wusoɛr mu, na hɔn a wɔyɛɛ dza omuo no akɔ atsɛmbu wusoɛr mu.’ Hɔn a wɔtsen no yɛɛ ndzɛmba papa ana woruwu. Osiandɛ hɔn dzin da ho ara wɔ nkwa nwoma no mu ntsi, wobefir edzi akɔ nkwa wusoɛr mu. Naaso hɔn a wɔnntsen no dze, wɔyɛɛ dza omuo ana woruwu, ntsi wobefir edzi akɔ atsɛmbu wusoɛr mu. Hɔn dzin nnyi nkwa nwoma no mu, naaso sɛ wonyan hɔn a, wɔdze enyi bedzi hɔn ndzeyɛɛ ekyir ahwɛ dɛ wɔfata dɛ wɔtsena ase anaa wɔmmfata. Dɛm aber no, wobenya hokwan esua Jehovah ho adze, na sɛ wɔyɛ dza ɔtsen a, hɔn dzin bɔkɔ nkwa nwoma no mu.

Nyikyerɛ 20:12, 13 ka dɛ hɔn a wobenyan hɔn no, ɔsɛ dɛ hɔn nyina dzi “dza wɔakyerɛw wɔ nwoma [mbobɔwee] no mu no do.” Iyi yɛ mbra fofor a Jehovah dze bɛma hɛn wɔ wiadze fofor no mu. Hɔn a wonnkedzi mbra yi do no, Jehovah bɛsɛɛ hɔn.​—Isa. 65:20.

Daniel 12:2 kae too hɔ dɛ, nyimpa a woewuwu no, ‘wobenyan binom akɔ daa nkwa mu, na binom so akɔ enyimguase na daa enyimtsiabu’ mu. Dɛm kyerɛwsɛm yi ma yehu dza ewiei koraa no ɔbɔto hɔn a wobenyan hɔn no. Wobenya “daa nkwa” anaa wobobu hɔn enyimtsia daa. Ntsi wɔ mfrenhyia 1,000 no n’ewiei no, binom benya onnyiewiei nkwa na binom so dze wɔbɛsɛɛ hɔn korakora.​—Nyi. 20:15; 21:3, 4.

Ma yɛnyɛ mfatoho bi. Yebotum dze ekuw ebien a wobenyan hɔn yi atoto ahɔho a wɔpɛ dɛ wɔtsena ɔman fofor bi do no ho. Hɔn a wɔtsen no, wɔtse dɛ ahɔho a ɔama hɔn tum dɛ wobotum ayɛ edwuma anaa wɔatsena ɔman no mu. Dɛm nkorɔfo yi, ɔman no gye hɔn to mu, na wonya fahodzi dze yɛ ndzɛmba ahorow bi. Naaso hɔn a wɔnntsen no dze, wɔtse dɛ ahɔho a ɔama hɔn tum dɛ wobotum atsena ɔman no mu ber tsiabaa bi. Ɔsɛ dɛ wodzi ɔman no ne mbra do ana wɔaama hɔn kwan ma wɔaakɔ do atsena ɔman no mu. Dɛmara so na hɔn a wɔnntsen a wobenyan hɔn no, ɔsɛ dɛ wodzi Jehovah ne mbra do na wɔda hɔnho edzi dɛ wɔyɛ atseneneefo ana wɔaatsena Paradise. Ɔmmfa ho tum krataa a ahɔho yi mu biara dze baa ɔman no mu no, ewiei koraa no, binom botum enya hokwan atsena ɔman no mu korakora. Binom so dze bi a wɔbɔbɔ hɔn asan. Suban a wɔbɛda no edzi wɔ ɔman no mu no na ɔbɛkyerɛ dza ɔbɔto hɔn. Dɛmara so na hɔn a wobenyan hɔn no, hɔn nokwar a wobedzi na dza wɔbɛyɛ wɔ wiadze fofor no mu no na ɔbɛkyerɛ dza ɔbɔto hɔn.

Yenyim dɛ Jehovah yɛ ɔdɔ Nyankopɔn. Naaso nnyɛ ɔno nko, ɔsan yɛ atsɛntsenenee Nyankopɔn. (Deut. 32:4; Ndw. 33:5) Obenyan hɔn a wɔtsen na hɔn a wɔnntsen aba nkwa mu dze akyerɛ dɛ ɔwɔ ɔdɔ ampa. Naaso ɔhwɛ kwan dɛ hɔn a obenyan hɔn no bedzi ne mbra a ɔfa papa na bɔn ho no do. Hɔn a wɔbɛkyerɛ dɛ wɔdɔ Jehovah na woeedzi ne mbra do no nkotsee na ɔbɛma wɔakɔ do atsena wiadze fofor no mu.