1. Aber a nna wɔaka kakra ma Peter ewu no, ebɛnadze na Jehovah maa ɔyɛe?

 ƆSOMAFO Peter dze nokwardzi soom Jehovah mfe pii. Dɛm aber no, ɔnye Jesus yɛɛ asɛnka edwuma no, ɔhyɛɛ ase kaa asɛmpa no kyerɛɛ hɔn a wɔnnyɛ Jewfo, na ekyir yi ɔsoom dɛ akwankyerɛ kuw no munyi. Naaso nna Peter nnwiei. Aber a nna onyim dɛ ɔrennkyɛr biara ma oeewu mpo no, nna Jehovah wɔ edwuma pii ma no. Bɛyɛ afe 62-64 H.B. no, Jehovah maa ɔkyerɛɛw Bible mu nwoma ebien; ɔno nye Peter nwoma a odzi kan na dza otsia ebien no. Nna Peter ne mpaabɔ ara nye dɛ nsɛm a ɔkyerɛwee no bɔboa no nuanom Christianfo wɔ no wu ekyir.—2 Pet. 1:​12-15.

2. Ebɛnadze ntsi na yebotum aka dɛ Peter kyerɛɛw ne nkrataa no wɔ ber a ɔfata mu?

² Jehovah maa Peter kyerɛɛw ne nkrataa no wɔ ber a nna no nuanom Christianfo no rihyia “sɔhwɛ horow pii.” (1 Pet. 1:6) Nna ator Christianfo binom pɛ dɛ wɔdze ator nkyerɛkyerɛ na ndzeyɛɛ ahorow bi a no ho nntsew ba Christianfo asafo no mu. (2 Pet. 2:​1, 2, 14) Ɔnnyɛ ɔno nko, nna ɔrennkyɛr koraa na ‘ndzɛmba nyina aba ewiei’ ama Christianfo a wɔtse Jerusalem no. Kyerɛ dɛ, nna ɔrennkyɛr na Rome nsordaafo no asɛɛ Jerusalem nye n’asɔrfi no. (1 Pet. 4:7) Ekyingye biara nnyi ho dɛ nkrataa a Peter kyerɛwee no boaa Christianfo a wɔwɔ hɔ no ma wohun dza wɔbɛyɛ dze egyina ɔhaw a nna worihyia no ano. Bio so, ɔboaa hɔn ma wosiesiee hɔnho maa nsɔhwɛ a nna ɔda hɔn enyim no mpo. b

3. Ebɛnadze ntsi na ɔsɛ dɛ yɛkenkan nkrataa a Peter kyerɛwee no?

 ³ Ɔwɔ mu dɛ Peter kyerɛɛw ne nkrataa no kɛmaa tsetse Christianfo no dze, naaso Jehovah maa wɔdze kaa Bible no ho. Ntsi hɛn so, yebotum akenkan na yeenya do mfaso. (Rom. 15:4) Tse dɛ tsetse Christianfo no, yɛtse wiadze a ɔhyɛ ndzeyɛɛ a no ho nntsew ho nkuran, ntsi ɔyɛ a ɔyɛ dzen ma hɛn dɛ yɛbɔkɔ do asom Jehovah. Afei so, ɔrennkyɛr biara yebehyia ahohiahia kɛse a ɔkyɛn dza ɔbaa Jewfo hɔn aber do no. Afotusɛm bi wɔ Peter ne nkrataa ebien no mu a ɔbɔboa hɛn ma yaahwɛ Jehovah ne da no kwan, yeedzi nyimpa ho suro do, na yaadodɔ hɛnho dzendzenndzen. Nsɛm a ɔkae no botum aboa asafo mu mpanyimfo so ma woeetum edzi asodzi a ɔhyɛ hɔn nsa dɛ wɔnhwɛ Nyankopɔn no nguan no ho dwuma yie.

4. Dɛ mbrɛ 2 Peter 3:​3, 4 ma yehu no, ebɛnadze na obotum ama hɛn gyedzi ehinhim?

⁴ Nyimpa pii nngye dza Bible no ka fa daakye ho no nndzi. Bi a hɔn a wɔmmpɛ hɛn asɛm no bɛserew hɛn dɛ yɛdze mfe pii aka dɛ wiadze yi reba n’ewiei. Hɔn a wɔnngye Bible no nndzi mpo dze, wɔka dɛ ɔremmba da. (Kenkan 2 Peter 3:​3, 4.) Sɛ yɛtse nsɛm a ɔtse dɛm no bi fi hɔn a yɛka asɛm no kyerɛ hɔn, hɛn edwumamufo anaa hɛn ebusuafo hɔ a, obotum ama hɛn gyedzi eehinhim. Sɛ yehyia tsebea a ɔtse dɛm a, nsɛm a ɔsomafo Peter kyerɛwee wɔ ne nkrataa no mu no botum aboa hɛn.

5. Ebɛnadze na obotum aboa hɛn ma yɛdze abotar atweɔn Jehovah ne da no? (2 Peter 3:​8, 9)

⁵ Binom botum enya adwen dɛ Jehovah akyɛr dodo dɛ ɔbɛsɛɛ dɛm wiadze bɔn yi. Naaso nsɛm a Peter kae no botum aboa hɛn ma yeehu dɛ, dɛ mbrɛ nyimpa bu mber no, ɔnnyɛ dɛm na Jehovah bu mber koraa. (Kenkan 2 Peter 3:​8, 9.) Jehovah n’enyi do no, mfe apem yɛ no da kor. Oenya hɛnho abotar siantsir nye dɛ ɔmmpɛ dɛ obiara bɛsɛɛ. Naaso sɛ ne mber so a, ɔremma ɔmmpa ho da kor mpo. Sesei dze, hom mma yɛmfa mber kakra a wɔaka no nka asɛmpa no nkyerɛ nyimpa a wɔwɔ wiadze nyina.

6. Ebɛnadze na ɔsɛ dɛ yɛyɛ ama Jehovah ne da a ɔreba no atsena hɛn adwen mu? (2 Peter 3:​11, 12)

⁶ Peter tuu hɛn fo dɛ yɛmma Jehovah ne da a ɔreba no ntsena hɛn adwen mu. (Kenkan 2 Peter 3:​11, 12.) Yebesi dɛn ayɛ dɛm? Sɛ ɔbɛyɛ yie a, ɔsɛ dɛ yɛdwendwen nhyira a yebenya wɔ wiadze fofor no mu no ho da biara. Ɔwodze, twa ho mfonyin dɛ ewɔ wiadze fofor no mu. Mframa pa robɔ fa woho, iridzi edziban a ahoɔdzen wɔ mu, erema w’adɔfo a woenyan hɔn no akɔaba, na erekyerɛkyerɛ hɔn a wɔtsenaa ase mfe ɔhaha pii a etwa mu no Bible nkɔnhyɛ ahorow a ɔbaa mu no. Sɛ edwendwen ndzɛmba a ɔtse dɛm ho a, ɔbɔboa wo ma edze w’adwen esi Jehovah ne da a ɔreba no do. Afei so, ɔbɔbɔ woho ban ma annyɛ w’adze tse dɛ mbrɛ hɔn a wɔnngye nndzi dɛ wiadze yi bɛba n’ewiei no yɛ no. Sɛ yedzi kan hu “iyinom” fa hɛn daakye ho a, ɔremma ator Christianfo mmfa hɔn nkyerɛkyerɛ “mmpra hɛn nnkɔ.”—2 Pet. 3:17.

7. Nyimpa ho suro botum aka hɛn ma yaayɛ dɛn?

⁷ Sɛ yɛma Jehovah ne da no tsena hɛn adwen mu a, obekenyan hɛn ma yaaka asɛmpa no akyerɛ afofor. Naaso ɔtɔ da a, yɛbɔ hu dɛ yɛbɛka asɛmpa no. Ebɛnadze ntsi a? Siantsir nye dɛ nyimpa ho suro tum bɔ hɛn hu. Tsebea a ɔtse dɛm bi too Peter. Anafua a wɔkyeer Jesus no, nna Peter suro dɛ ɔbɛda noho edzi dɛ ɔyɛ Jesus no suanyi, na ɔkaa no mpɛn ebiasa mpo dɛ onnyim no wɔ beebiara. (Matt. 26:​69-75) Naaso ekyir yi, ɔsomafo Peter tumii dzii nyimpa ho suro do na ɔdze ahotodo kaa dɛ: “Mma hom nnsuro hɔn ho hu, na mma hom akoma nntu.” (1 Pet. 3:14) Asɛm a Peter kae yi ma yehu dɛ, ampa yebotum edzi nyimpa ho suro do.

8. Ebɛnadze na obotum aboa hɛn ma yeedzi nyimpa ho suro do? (1 Peter 3:15)

 ⁸ Ebɛnadze na obotum aboa hɛn ma yeedzi nyimpa ho suro do? Peter kaa dɛ: “Hom mbu Ewuradze Christ krɔnkrɔn wɔ hom akoma mu.” (Kenkan 1 Peter 3:15.) Ndzɛmba a yebotum ayɛ dze akyerɛ dɛm no bi nye dɛ yɛbɛkaa dɛ hɛn Ewuradze Christ Jesus yɛ Ɔhen na ɔwɔ tum kɛse. Ntsi sɛ hokwan bi bue ma wo dɛ ka asɛmpa no kyerɛ obi naaso isuro a, kaa dɛ Jesus yɛ hɛn Hen. Twa ho mfonyin hwɛ dɛ oridzi hen wɔ sor na abɔfo mpempem pii etwa noho ehyia. Mma wo werɛ mmfir dɛ “wɔdze ɔsor nye asaase do tum nyina ama” no, na ‘ɔnye wo wɔ hɔ daa dze kesi wiadze yi ewiei.’ (Matt. 28:​18-20) Peter tuu hɛn fo dɛ, ‘yensiesie hɛnho daa’ dɛ yɛbɛka hɛn gyedzi ho asɛm. Ana w’enyi gye ho dɛ ebɛka asɛmpa no wɔ skuul, edwuma mu, anaa ber a hokwan bi ebue no? Sɛ dɛm a, dzi kan fa w’adwen bu hokwan a ibotum enya dze aka asɛmpa no, na dwendwen dza ebɛka no ho. Afei, bɔ mpaa serɛ Jehovah dɛ ɔmma wo akokodur, na nya awerɛhyɛmu dɛ ɔbɔboa wo ma edzi nyimpa ho suro do.—Andw. 4:29.

9. Ber bi, ebɛnadze na Peter yɛe a ɔkyerɛ dɛ ɔannda ɔdɔ edzi? (Hwɛ mfonyin no so.)

⁹ Peter hun mbrɛ obesi ada ɔdɔ edzi. Aber a Jesus kaa dɛ: “Mbrasɛm fofor na medze mema hom, dɛ hom ndodɔ homho nkorkor: dɛ mbrɛ  madɔ hom no, hom so ndodɔ homho dɛmara” no, nna Peter wɔ hɔ bi. (John 13:34) Ɔwɔ mu dɛ nna Peter nyim dɛm asɛm yi dze, naaso ekyir yi, nyimpa ho suro ntsi nna ɔmmpɛ dɛ ɔnye enuanom a wɔnnyɛ Jewfo no bedzidzi. Ɔsomafo Paul twuuw Peter n’enyim na ɔkaa dza ɔyɛe no ho asɛm dɛ ɔyɛ “ndabraba” anaa nyaatwem. (Gal. 2:​11-14) Peter gyee no mfom too mu na osuaa biribi fii mu. Nkrataa ebien a Peter kyerɛwee mu no, osii do dua dɛ ɔnnsɛ dɛ yɛdze hɛn ano kɛkɛ ka dɛ yɛdɔ hɛn nuanom, mbom ɔsɛ dɛ yɛdze hɛn ndzeyɛɛ so kyerɛ dɛm.

10. Ebɛnadze na yɛyɛ a ɔbɛma yɛada “onuadɔ a ndaadaa nnyi mu” edzi akyerɛ hɛn nuanom? (1 Peter 1:22)

¹⁰ Peter tuu hɛn fo dɛ ɔsɛ dɛ yenya “onuadɔ a ndaadaa nnyi mu” ma hɛn nuanom. (Kenkan 1 Peter 1:22.) Sɛ yebotum ada ɔdɔ a ɔtse dɛm edzi a, ɔsɛ dɛ yɛdze nokwar a wɔdze kyerɛkyerɛ hɛn no yɛ edwuma. Dɛm nokwar no mu bi nye dɛ “Nyankopɔn nnhwɛ nyimpa enyim.” (Andw. 10:​34, 35) Yerunntum nnka dɛ yeridzi Jesus ne mbra a ɔnye dɛ yɛndodɔ hɛnho no do aber a yɛda ɔdɔ edzi kyerɛ nyimpa binom nkotsee wɔ asafo no mu no. Nokwasɛm nye dɛ, tse dɛ Jesus no, obotum aba no dɛ yɛbɛbɛn enuanom binom akyɛn afofor. (John 13:23; 20:2) Naaso Peter tuu hɛn fo dɛ yɛmbɔ mbɔdzen dɛ ‘yɛbɔdɔ hɛn nuanom’ nyina, osiandɛ wɔyɛ hɛn ebusuafo na wɔka hɛn wiadze nyina enuayɛkuw no ho.—1 Pet. 2:17.

11. Sɛ yebotum ‘efi hɛn akoma mu adodɔ hɛnho dzendzenndzen’ a, ebɛnadze na ɔhwehwɛ dɛ yɛyɛ?

¹¹ Peter tuu hɛn fo dɛ ‘yemfi hɛn akoma mu ndodɔ hɛnho dzendzenndzen.’ Sɛ yɛhwɛ afotu a Peter dze mae no a, hɛn nuanom a yɛbɔdɔ hɔn ‘dzendzenndzen’ no kyerɛ dɛ yɛbɛda ɔdɔ edzi akyerɛ hɔn aber mpo a ɔyɛ dzen ma hɛn dɛ yɛbɛyɛ dɛm no. Dɛ nhwɛdo no, sɛ onua bi yɛ adze ma ɔhye wo anaa ɔhaw wo a, eyɛ w’adze dɛn? Annhwɛ a dɛm aber no erennda ɔdɔ edzi nnkyerɛ no, mbom dza ebɛyɛ ara nye dɛ ebɛyɛ bi etua no kaw. Naaso adze kor a Peter suae fii Jesus hɔ nye dɛ, sɛ obi yɛ wo adze na eyɛ bi tua no kaw a, Nyankopɔn n’enyi nngye ho. (John 18:​10, 11) Peter kaa dɛ: “Mma hom mmfa bɔn nntua bɔn kaw, ɔyaw nntua ɔyaw kaw; na mbom hom nhyira.” (1 Pet. 3:9) Ntsi, hɔn a wɔafom wo no mpo, ma ɔdɔ a no mu yɛ dzen a ewɔ ma wo nuanom no nkenyan wo ma nya hɔnho abotar na enye hɔn ndzi no yie.

12. (a) Sɛ yenya ɔdɔ a no mu yɛ dzen ma hɛn nuanom a, ɔbɔboa hɛn ma yaayɛ dɛn? (b) Aber a ehwɛɛ video a wɔato dzin Bɔ Koryɛ A Ɔwɔ Hɛn Mu No Ho Ban—Ɔyɛ Akyɛdze A Ɔsom Bo no, ebɛnadze na esi wo bo dɛ ebɛyɛ?

¹² Aber a Peter kaa dɛ yɛndodɔ hɛnho dzendzenndzen wɔ ne krataa a odzi kan no mu no, ɔsanee kaa dɛ yennya “ɔdɔ a no mu yɛ dzen” mma hɛnho. Siantsir nye dɛ ɔdɔ a ɔtse dɛm nnkata bɔn kakraabi do, mbom “ɔkata bɔn pii do.” (1 Pet. 4:8) Ɔbɛyɛ dɛ Peter kaa nsɛm a Jesus kaa kyerɛɛ no faa bɔnfakyɛ ho mfe bi a nna woetwa mu no. Dɛm aber no, nna Peter n’adwen yɛ no dɛ, sɛ no nua bi yɛ no bɔn na ɔdze kyɛ no “mpɛn esuon” a, ɔayɛ adze araa ma. Naaso Jesus maa ohun dɛ ɔsɛ dɛ ɔdze bɔn kyɛ mpɛn 77, kyerɛ dɛ, nna ɔsɛ dɛ ɔdze bɔn kyɛ aber nyinara. Asɛm yi kɔ ma hɛn so. (Matt. 18:​21, 22) Sɛ ɔyɛ dzen ma wo dɛ edze afotu yi bɛyɛ edwuma a, mma w’abaw mu mmbu ae! Yɛyɛ Jehovah n’asomfo a bɔn wɔ hɛnho yi ara dze, ɔtɔ da a ɔbɛyɛ dzen ama hɛn dɛ yɛdze hɛn nua bi no bɔn bɛkyɛ no. Naaso dza no ho hia paa nye dɛ yɛbɛyɛ dza yebotum biara dze hɛn nua no bɔn akyɛ no na yɛnye no atsena asomdwee mu. c

13. Ebɛnadze ntsi na obotum ayɛ dzen ama asafo mu mpanyimfo dɛ wobenya ber ahyɛ hɔn nuanom nkuran?

¹³ Jesus no wusoɛr ekyir no, ɔkaa kyerɛɛ Peter dɛ: “Hwɛ mo nguan.” Ɔda edzi dɛ Peter no werɛ  emmfir dɛm asɛm yi da. (John 21:16) Sɛ eyɛ asafo mu panyin a, inyim dɛ dɛm asɛm yi kɔ ma woara so. Naaso obotum ayɛ dzen ama asafo mu panyin bi dɛ obenya ber dze edzi asodzi a no ho hia yi ho dwuma. Ɔsɛ dɛ asafo mu mpanyimfo dzi kan hwɛ hɔn mbusua. Ɔsɛ dɛ wɔdze dza hɔn mbusua hia no ma hɔn, wɔdɔ hɔn na wɔboa hɔn ma wɔnye Jehovah nya ebusuabɔ a no mu yɛ dzen. Afei so, wodzi asɛnka edwuma no enyim, na wosiesie hɔnho ma dwumadzi ahorow a wɔdze hyɛ hɔn nsa wɔ asafo nhyiamu, ɔmansin nye ɔmantɔw ehyiadzi ahorow ase no. Asafo mu mpanyimfo binom so som dɛ Ayarsabea Ntamu Nkitahodzi Egyinatukuw mufo anaa wɔboa Local Design/Construction Department. Wɔmma yɛnka, asafo mu mpanyimfo yɛ edwumadzen paa!

14. Ebɛnadze na obotum ekenyan asafo mu mpanyimfo ma wɔaahyɛ hɔn nuanom nkuran? (1 Peter 5:​1-4)

¹⁴ Peter tuu ne mfɛfo asafo mu mpanyimfo fo dɛ ‘wɔnyɛn Nyankopɔn nguankuw no.’ (Kenkan 1 Peter 5:​1-4.) Sɛ eyɛ asafo mu panyin a, yenyim dɛ edɔ wo nuanom na epɛ paa dɛ ehyɛ hɔn nkuran. Naaso ɔtɔ da a nna aberɛ, anaa otum mpo ba no dɛ innyi adagyer koraa a edze bedzi asodzi yi ho dwuma. Sɛ ɔba no dɛm a, ebɛnadze na ibotum ayɛ? Ɔyɛ a ka mbrɛ isi tse nka no ho asɛm kyerɛ Jehovah. Peter kaa dɛ: ‘Sɛ obi som a, ma ɔmfa noho nto ahoɔdzen a Nyankopɔn dze ma no do.’ (1 Pet. 4:11) Obotum aba dɛ wo nuanom rihyia ɔhaw ahorow bi a wɔ ndɛ wiadze yi mu dze, orimmfi hɔ korakora. Naaso kaa dɛ Jesus Christ a ɔyɛ “oguanhwɛfo panyin no” dze, obotum ayɛ hɔn haw no ho biribi. Dza irunntum nnyɛ no, ɔno dze obotum ayɛ ma wɔaabor do. Obotum aboa hɔn ndɛ ma woeegyina ɔhaw no ano, na wiadze fofor no mu so obeyi ɔhaw no efi hɔ koraa. Ntsi dza Nyankopɔn hwɛ kwan dɛ asafo mu mpanyimfo bɛyɛ ara nye dɛ wɔbɔdɔ hɔn nuanom, wɔbɛhyɛ hɔn nkuran, na wɔaayɛ nhwɛdo ‘ama nguankuw no.’

15. Ebɛnadze na asafo mu panyin bi yɛ dze hyɛ no nuanom nkuran? (Hwɛ mfonyin no so.)

¹⁵ Onua bi a wɔfrɛ no William dze mfe pii asom dɛ asafo mu panyin, na ɔmmfa no nuanom a ɔbɛhyɛ hɔn nkuran no nndzi agor koraa. Aber a COVID-19 yii ne tsir no, ɔnye ne mfɛfo asafo mu mpanyimfo no dze sii hɔn enyi do dɛ dapɛn biara, wɔbɛfrɛ onua biara a ɔwɔ hɔn asɛnka kuw mu no. Ɔkaa siantsir a wɔyɛɛ dɛm no ho asɛm dɛ: “Enuanom no pii wɔ hɔ a, nna wɔaka hɔn nkotsee wɔ fie, na nkyɛ iyi mpo botum ama  adwen bi a ɔmmfata aba hɔn tsirmu.” Dza William yɛ nye dɛ, sɛ onua bi rihyia ɔhaw bi na ɔreka ho asɛm akyerɛ no a, ɔyɛ dzinn tsie no ama oeehu dza ohia nye dza obotum ayɛ dze aboa no. Afei ɔpɛ asɛm bi anaa video bi a ɔfa ɔhaw a onua no rihyia no ho na ɔdze ahyɛ no nkuran. Ɔkaa dɛ: “Ndɛ paa nye ber a ɔsɛ dɛ mpanyimfo serasera hɔn nuanom na wɔhyɛ hɔn nkuran. Yɛyer hɛnho paa yɛ asɛnka edwuma no ama yeenya nkorɔfo ma wɔaabɔsom Jehovah, na ɔsɛ dɛ yɛyer hɛnho dɛmara hyɛ hɛn nuanom a yɛnye hɔn som no so nkuran, ama wɔaakɔ do asom Jehovah.”

16. Yɛbɛyɛ dɛn dze esuadze a ɔwɔ Peter ne nkrataa ebien no mu no ayɛ edwuma?

¹⁶ Esuadze a ɔwɔ nkrataa ebien a Peter kyerɛwee no mu no, yeesusu no mu kakraabi ho. Bi a dza yeesusu ho no ama ehu beebi a etɔ sin a ɔsɛ dɛ eyɛ ho edwuma. Dɛ nhwɛdo no, ana ebɛpɛ dɛ etaa dwendwen nhyira a ibenya wɔ wiadze fofor no mu no ho? Ana edze esi w’enyi do dɛ ebɛka asɛmpa no wɔ skuul, edwuma mu, anaa ber a hokwan bi ebue no? Ehwɛ a, akwan fofor bi wɔ hɔ a ibotum afa do ada ɔdɔ a no mu yɛ dzen edzi akyerɛ wo nuanom akyɛn dza ereyɛ no sesei no? Asafo mu mpanyimfo, ana hom esi hom bo dɛ hom befi hom akoma mu ahwɛ Jehovah no nguan no? Sɛ yɛgye ber yɛ hɛn mu nhwehwɛmu a, bi a yebohu dɛ yɛtɔ sin wɔ beebi. Naaso ɔnnsɛ dɛ yɛma hɛn abaw mu bu. ‘Ewuradze ne yamu ye’ na ɔbɔboa hɛn ma yeetum ayɛ ho edwuma. (1 Pet. 2:3) Peter maa hɛn awerɛhyɛmu dɛ: ‘Nyankopɔn nankasa bɛma hom edzi mu, egyina pintsinn, ɔbɛhyɛ hom dzen, na obesi hom pi.’—1 Pet. 5:10.

17. Sɛ yɛammpa abaw na yɛma kwan ma Jehovah tsetse hɛn a, ebɛn akatua na yebenya?

¹⁷ Mber bi, nna Peter tse nka dɛ ɔmmfata dɛ ɔbɛbɛn Nyankopɔn ne Ba no. (Luke 5:8) Naaso Jehovah na Jesus daa ɔdɔ edzi kyerɛɛ no, na wɔboaa no ma ɔkɔr do dzii Christ n’ekyir. Iyi maa onyaa hokwan kɔr “hɛn Ewuradze nye hɛn Agyenkwa Jesus Christ ahendzi a onnyi ewiei no mu.” (2 Pet. 1:11) Hwɛ akatua kɛse ara a onyae! Ntsi, sɛ woara so ammpa abaw tse dɛ Peter na ema kwan ma Jehovah tsetse wo a, ibenya daa nkwa. Ibenya ‘wo gyedzi ho akatua, kyerɛ, wo kra nkwagye no.’—1 Pet. 1:9.