1-2. Ebɛnadze ntsi na no ho hia dɛ yesua kyerɛwtohɔ a ɔfa Samson ho no?

 SƐ ETSE Samson ne dzin a, ebɛnadze na ɔba w’adwen mu? Bi a dza ɔba w’adwen mu nye banyin bi a nna ɔwɔ ahoɔdzen soronko. Ampa nna noho yɛ dzen ankasa. Naaso osii gyinae bɔn bi ma ɔberɛɛ paa. Ne nyina ekyir no, Jehovah dze n’adwen sii ndzɛmba ahorow a Samson yɛe dze kyerɛɛ dɛ ɔdɔ no no do, na ɔmaa wɔkyerɛwee wɔ Bible mu mbrɛ ɔbɛyɛ a yebotum esua biribi efi mu.

² Jehovah nam Samson no do yɛɛ ndzɛmba akɛse dze boaa Israelfo a nna oeyi hɔn dɛ ne man no. Mfe ɔhaha pii wɔ Samson no wu ekyir no, aber a nna ɔsomafo Paul robobɔ Nyankopɔn n’asomfo a wɔdaa gyedzi kɛse edzi hɔn dzin no, Jehovah maa ɔbɔɔ Samson ne dzin kaa ho. (Heb. 11:​32-34) Dza Samson yɛe no botum ahyɛ hɛn nkuran paa. Ɔdze noho too Jehovah do aber mpo a nna ndzɛmba mu ayɛ dzen no. Hom mma yɛnhwɛ mbrɛ n’asɛm no botum ahyɛ hɛn nkuran, na yensua biribi mfi dza ɔyɛe no mu.

3. Ebɛn edwuma na Jehovah dze hyɛɛ Samson ne nsa?

³ Aber a wɔwoo Samson no, nna Philistiafo no dzi Israelfo no do, na wɔtseetsee hɔn paa. (Atsɛ. 13:1) Atseetsee a wɔdze Israelfo no faa mu no maa wohun amandze. Dɛm ntsi, Jehovah yii Samson dɛ ɔno na obedzi enyim “agye Israel efi Philistiafo nsamu.” (Atsɛ. 13:5) Nna iyi bɛyɛ edwumadzen ankasa! Sɛ nna Samson botum ayɛ edwuma a ɔtse dɛm a, nna ɔsɛ dɛ ɔdze noho to Jehovah do.

4. Ebɛn kwan do na Jehovah boaa Samson ma ɔgyee noho fii Philistiafo no nsamu? (Atsɛmbuafo 15:​14-16)

⁴ Ma yɛnhwɛ nhwɛdo a ɔkyerɛ dɛ Samson dze noho too Jehovah do, na onyaa no mu awerɛhyɛmu dɛ ɔbɔboa no. Ber bi,  Philistiafo nsordaafo bi kɔr Lehi a ɔbɛyɛ dɛ ɔwɔ Judah no dɛ wɔrekɛkyer Samson. Ɔbaa no dɛm no, nna Judah mbarimba no suro. Dɛm ntsi wɔyɛɛ dɛ wobeyi Samson ahyɛ atamfo no nsa. Samson nankasa no nkorɔfo no dze ahoma fofor ebien kyekyeer no pampee na wɔdze no kɛhyɛɛ Philistiafo no nsa. (Atsɛ. 15:​9-13) Naaso, ‘Jehovah no sunsum baa’ Samson no do dzendzenndzen na ahoma a ɔkyekeyer ne nsa no fii ne nsa ho gui. Afei ‘ohun asoaso pɔnkɔ n’adadaw fofor bi,’ na oyii dze kunkum Philistiafo mbarimba 1,000!—Kenkan Atsɛmbuafo 15:​14-16.

5. Asoaso pɔnkɔ n’adadaw a Samson dze dzii dwuma no ma yehu dɛ nna ɔwɔ Jehovah no mu ahotodo. Ebɛnadze ntsi na yebotum aka no dɛm?

⁵ Ma yembisa dɛ, ebɛnadze ntsi na Samson dze asoaso pɔnkɔ n’adadaw no dzii ako? Sɛ yɛbɛka a, nna ɔnnyɛ biribi a wɔdze dzi ako! Naaso, nna Samson nyim dɛ Jehovah na ɔbɔboa no ma oeedzi n’atamfo no do konyim na ɔnnyɛ akodze no. Nokwasɛm nye dɛ, dza Samson ne nsa kaa no na ɔdze yɛɛ edwuma mbrɛ ɔbɛyɛ a dza Jehovah pɛ no bɛba mu. Ɔda edzi pefee dɛ Samson dze noho too Jehovah do, na ɔboaa no ma odzii konyim kɛse wɔ n’atamfo no do.

6. Sɛ yeridzi dwuma bi a ɔhyɛ hɛn nsa wɔ Nyankopɔn no som mu a, ebɛnadze na yebotum esua efi Samson n’asɛm no mu?

⁶ Hɛn so, Jehovah botum aboa hɛn ma dwumadzi biara a ɔhyɛ hɛn nsa wɔ no som mu no yeetum ayɛ. Sɛ ɔyɛ dzen dɛn ara mpo a obotum aboa hɛn. Nyankopɔn botum aboa hɛn wɔ kwan bi do ma wɔaayɛ hɛn nwanwa. Nya awerɛhyɛmu dɛ, sɛ ekɔ do dze woho to Jehovah do a ɔbɔboa wo ma aayɛ dza ɔpɛ, dɛ mbrɛ ɔboaa Samson no.—Mbɛ. 16:3.

7. Ebɛn nhwɛdo na ɔma yehu dɛ no ho hia paa dɛ yɛhwehwɛ Jehovah hɔ akwankyerɛ?

⁷ Enuanom pii a wɔboa ma wosisi asafo adan ahorow no akyerɛ dɛ wɔwɔ Jehovah no mu ahotodo. Mber bi etwa mu no, nna Ahendzi Asa nye asafo adan a wosisi no mu pii wɔ hɔ a, enuanom binom na wɔdorɔw no ho plan no na wɔhwɛ ma wosisi. Naaso ekyir yi, osiandɛ nna Jehovah n’ahyehyɛdze no rinya nkɔenyim ntsi, nna no ho ebehia dɛ wɔyɛ nsesa ahorow bi. Enuanom a wodzi ndzɛmba enyim  no bɔɔ Jehovah mpaa dze hwehwɛɛ no hɔ akwankyerɛ. Afei so, wɔhwehwɛɛ akwan ahorow a wobotum afa do edzi tsebea no ho dwuma. Bi nye dɛ wɔbɔtɔ adan na woesiesie. Onua bi a wɔfrɛ no Robert a mfe kakra nye yi ɔaboa ma woesisi asafo adan pii wɔ wiadze n’afa ahorow no kaa asɛm bi. Ɔkaa dɛ: “Ahyɛse no dze, nna ɔnnda famu dɛ enuanom binom bɛgye dɛm kwan fofor yi ato mu.” Ɔdze kaa ho dɛ: “Nna iyi nntse dɛ mbrɛ nna yɛyɛ no mfe pii a etwa mu no. Naaso nna enuanom no ayɛ krado dɛ wɔbɛyɛ nsesa biara a no ho hia no. Wɔabɛda edzi pefee dɛ Jehovah rihyira nsesa fofor a asafo no yɛe no do.” Dza yɛaka ho asɛm yi yɛ nhwɛdo kor pɛ a ɔboa hɛn ma yehu dɛ Jehovah rekyerɛ no nkorɔfo kwan ama dza ɔpɛ aba mu. Ntsi, sɛ ɔwɔ mu ara a, ɔsɛ dɛ yebisa hɛnho dɛ, ‘Ana mohwehwɛ Jehovah hɔ akwankyerɛ na mayɛ krado dɛ mebɛgye nsesa biara a n’ahyehyɛdze no bɛyɛ no ato mu?’

8. Aber bi a nna nsukɔm dze Samson no, ebɛnadze na ɔyɛe?

⁸ Bi a akenkan ndzɛmba afofor a ɔyɛ nwanwa a Samson yɛe no ho asɛm. Nankotsee nye gyata bi koe na okum no. Ekyir yi so, ɔkɔr Ashkelon kurow no mu na okunkum Philistiafo mbarimba 30. (Atsɛ. 14:​5, 6, 19) Nna Samson nyim dɛ sɛ Jehovah nnka noho a, nkyɛ orunntum nnyɛ dza ɔyɛe no mu biara. Iyi yɛ nokwar paa osiandɛ mber bi, Samson kokunkum Philistiafo 1,000 na ɔno ekyir no nsukɔm dzee no paa. Ebɛnadze na ɔyɛe? Nankasa annkɔhwehwɛ nsu annom, mbom ɔbɔɔ mpaa serɛɛ Jehovah dɛ ɔmboa no ma onnya nsu nnom.—Atsɛ. 15:18.

9. Ebɛnadze na Jehovah yɛe wɔ Samson n’adzeserɛdze no ho? (Atsɛmbuafo 15:19)

⁹ Jehovah tsiee Samson n’adzeserɛ no na ɔyɛɛ anwanwadze ma onyaa nsu. Aber a Samson noom nsu no, “no sunsum sanee bae na onyaa nkwa.” (Kenkan Atsɛmbuafo 15:19.) Iyi ekyir mfe pii no, aber a Nyankopɔn maa nkɔnhyɛnyi Samuel kyerɛɛw Atsɛmbuafo nwoma no, ɔbɛyɛ dɛ nna dɛm nsu no da ho ara wɔ hɔ. Israelfo a wɔbɔtoo dɛm nsu no, ɔbɛyɛ dɛ ɔmaa wohun dɛ sɛ Jehovah no nokwar asomfo ho kyer hɔn na wosu frɛ no a, ɔboa hɔn.

10. Sɛ Jehovah bɔboa hɛn a, ebɛnadze na ɔsɛ dɛ yɛyɛ? (Hwɛ mfonyin no so.)

¹⁰ Hɛn so, sɛ yɛwɔ adomakyɛdze bi anaa yeetum ayɛ biribi wɔ Jehovah no som mu mpo a, ɔsɛ dɛ yɛhwehwɛ Jehovah hɔ mboa aber nyina. Ɔsɛ dɛ yɛbrɛ hɛnho adze na yɛgye to mu dɛ sɛ yebotum ayɛ biribi yie a, Jehovah nkotsee na obotum aboa hɛn na nnyɛ hɛn ahoɔdzen. Samson nyaa ahoɔdzen aber a ɔnoom nsu a Jehovah maa ne nsa kae no. Dɛmara na hɛn so, sɛ hɛn gyedzi botum ayɛ dzen a ɔnnsɛ dɛ yebu hɛn enyi gu ndzɛmba ahorow a Jehovah dze ma hɛn ama yɛnye ne ntamu ebusuabɔ no mu ayɛ dzen no do.—Matt. 11:28.

11. Ebɛnadze na yebotum ayɛ dze akyerɛ dɛ yɛgye mboa a Jehovah dze ma hɛn no to mu? Ma ho nhwɛdo.

¹¹ Hom mma yɛnhwɛ hɛn nua bi a wɔfrɛ no Aleksey a ɔwɔ Russia. Ɔka enuanom a worihyia ɔsoɛrtsia a no mu yɛ dzen no ho. Ebɛnadze na aboa no ma oetum egyina ɔhaw a ɔtse dɛm ano? Ɔnye ne yer bɔ mbɔdzen dɛ wɔronntoto ndzɛmba a wɔyɛ wɔ Jehovah no som mu no ase koraa. Ɔkaa dɛ: “Mobɔ mbɔdzen dɛ mubosua adze na maakenkan Bible no da biara. Anapa biara menye me yer yɛ daa asɛm no na yɛbɔ mu bɔ mpaa.” Ebɛnadze na yesua fi n’asɛm no mu? Ɔnye dɛ ɔnnsɛ dɛ yɛdze hɛnho to hɛn ahoɔdzen do, mbom ɔsɛ dɛ yɛdze hɛnho to Jehovah do. Yebesi dɛn ayɛ dɛm? Yebotum ayɛ dɛm dze nam Bible a yebosua, mpaa a yɛbɔbɔ,  asafo nhyiamu a yɛbɔkɔ nye asɛnka edwuma a yɛdze hɛnho bɛhyɛ mu no do. Sɛ yɛyɛ dɛm a, Jehovah so behyira mbɔdzen a yɛbɔ dɛ yɛbɔsom no no do. Dɛ mbrɛ Jehovah hyɛɛ Samson dzen no, dɛmara na obotum ahyɛ hɛn so dzen.

12. Ebɛn gyinae bɔn na Samson sii, na ebɛn kwan do na dɛm gyinae no nntse dɛ dza nna oedzi kan esisi no?

¹² Ɔtɔ da a nna Samson sisi gyinae bɔn, osiandɛ nna bɔn wɔ noho tse dɛ hɛnara. Dɛm gyinae no mu kor kɛfaa ɔhaw pii bae. Aber a nna Samson da ho ara rosom dɛ ɔtsɛmbuafo wɔ Israel no, “ɔdɔɔ ɔbaa bi wɔ Sorek ɔbɔn mu a ne dzin dze Delilah.” (Atsɛ. 16:4) Ansaana Samson rebɛtsew ahwe Delilah no dɔ mu no, nna oedzi kan awar Philistianyi baa bi. Nna iyi ‘fir Jehovah, osiandɛ nna ɔrohwehwɛ kwan bi wɔ Philistiafo no ho’ dze asɛɛ hɔn. Ekyir yi, Samson kɔr ɔbaa huhunyi bi ne fie wɔ Philistiafo hɔn kurow Gaza mu. Dɛm aber no, Nyankopɔn maa Samson ahoɔdzen ma ɔdze tutuu kurow no mbobow no na ɔsoae kɔree. Iyi maa kurow no bambɔ ho asɛm kɔr famu. (Atsɛ. 14:​1-4; 16:​1-3) Naaso wɔ Delilah n’afamu dze, ɔbɛyɛ dɛ nna ɔnntse dɛm, osiandɛ obotum aba no dɛ nna ɔyɛ Israelnyi. Ntsi nna Samson rinnya hokwan biara nnko nntsia Philistiafo no.

13. Ebɛnadze na Delilah yɛe dze daadaa Samson ma ɔkɔr ɔhaw mu?

¹³ Delilah gyee sika kɛse bi fii Philistiafo no hɔ mbrɛ ɔbɛyɛ a obeyi Samson ama hɔn. Aso nna Samson gye Delilah dzi dodow anaa ɔmaa noho dɔ furaa n’enyi araa ma oennhu dza nna ɔpɛ dɛ ɔyɛ no? Yerunntum nnkyerɛ, naaso dza yenyim nye dɛ Delilah kɔr do hyɛɛ Samson dɛ ɔnkyerɛ no beebi a n’ahoɔdzen no fi. Delilah yɛɛ araa ma Samson kaa kyerɛɛ no. Awerɛhosɛm nye dɛ, Samson gyaa noho ma Delilah yɛe ma n’ahoɔdzen no fii ne nsa, na ɔhweer  Jehovah n’enyim adom kesii ber bi.—Atsɛ. 16:​16-20.

14. Osiandɛ Samson dze noho too Delilah do ntsi, ebɛn asɛm too no?

¹⁴ Samson hyiaa ɔhaw paa osiandɛ ɔammfa noho annto Jehovah do, mbom ɔdze noho too Delilah do. Philistiafo no kyeer no na wotutuu n’enyiwa. Afei, wɔdze no kɔtoo efiadze wɔ Gaza dɛ akowaa a ɔyam ewu. Dɛm kurow yi so na mber bi ɔkɔree kɛsɛɛ hɔ no. Ekyir yi, aber a Philistiafo no hyiaa mu dɛ woridzi hɔn afahyɛ no, wɔsomae ma wɔkɛfaa Samson bae dɛ ombeyi hɔn paserew. Wɔbɔɔ afɔr kɛse maa hɔn bosom Dagon tse dɛ mbrɛ ɔno na oeyi Samson ahyɛ hɔn nsa. Wokeyii Samson fii efiadze hɔ dɛ ombeyi hɔn “paserew” na wondzi noho agor.—Atsɛ. 16:​21-25.

15. Ebɛnadze na Samson yɛe dze kyerɛɛ dɛ nna ɔda ho ara dze noho to Jehovah do? (Atsɛmbuafo 16:​28-30) (Hwɛ mfonyin a ɔwɔ Ɔweɔn-Aban yi enyim.)

¹⁵ Ɔwɔ mu dɛ Samson dzii mfomdo kɛse dze, naaso ɔammpa abaw, mbom ɔkɔr do soom Jehovah. Ɔhwehwɛɛ hokwan a obotum dze asɛɛ Philistiafo no osiandɛ nna dɛm na Jehovah pɛ dɛ ɔyɛ. (Kenkan Atsɛmbuafo 16:​28-30.) Samson bɔɔ mpaa serɛɛ Jehovah dɛ: ‘Ma mindzi m’enyiwa ebien yi mu kor ho wer prɛko wɔ Philistiafo no do.’ Nokwar Nyankopɔn no tsiee Samson n’adzeserɛ no, na ɔsanee maa no ahoɔdzen soronko. Iyi ntsi, Samson kunkum Philistiafo pii dɛm aber no. Hɔn a okunkum hɔn no dɔɔ so kyɛn hɔn a nna oedzi kan eku hɔn no.

16. Ebɛnadze na yebotum esua efi mfomdo a Samson dzii no mu?

¹⁶ Gyinae a Samson sii no maa ohyiaa ɔhaw dze, naaso ɔno amma oenngyaa dɛ ɔbɛyɛ dza Jehovah pɛ. Sɛ yedzi mfomdo ma wɔka hɛn enyim anaa ɔsom hokwan bi fi hɛn nsa mpo a, ɔsɛ dɛ yɛkɔ do som Jehovah. Ɔsɛ dɛ yɛkaa dɛ, Jehovah mmpa abaw wɔ hɛnho. (Ndw. 103:​8-10) Sɛ yedzi mfomdo mpo a, Jehovah botum akɔ do dze hɛn ayɛ edwuma dɛ mbrɛ ɔdze Samson yɛɛ edwuma no.

17-18. Ebɛnadze na w’enyi gye ho wɔ Michael n’asɛm no ho? (Hwɛ mfonyin no so.)

¹⁷ Hom mma yensusu onua aberantsɛ bi a wɔfrɛ no Michael ho nhwɛ. Nna ɔbɔ noho mbɔdzen wɔ Jehovah no som mu, na ɔsom dɛ asafo mu somfo nye daa kwampaafo. Naaso awerɛhosɛm nye dɛ odzii mfomdo bi ma hokwan ahorow a ɔwɔ wɔ asafo no mu no fii ne nsa. Ɔkaa dɛ: “Ansaana dɛm asɛm no robɔto me no, nna biribiara rokɔ do kamakama ma me wɔ  Jehovah no som. Naaso ber a asɛm no sii no, metsee nka dɛ biribiara nnyi hɔ a mubotum ayɛ wɔ Jehovah no som mu. Nna onnyi m’adwen mu dɛ Jehovah bɔpow me, naaso nna modwen ho dɛ mubotum asan nye no enya ebusuabɔ pa bio anaa. Afei so, nna modwen ho dɛ mubotum enya hokwan bio asom wɔ asafo no mu dɛ mbrɛ nna meyɛ no mber bi a etwa mu no anaa.”

¹⁸ Enyigyesɛm nye dɛ, Michael ammpa abaw. Ɔkaa dɛ: “Medze m’adwen sii menye Jehovah ntamu ebusuabɔ a mibesiesie no do. Nna metaa fi m’akoma mu bɔ mpaa, musua Bible no na modwendwen ho.” Ber kɔr do no, Michael ne nsa sanee kaa hokwan ahorow a nna ɔwɔ wɔ asafo no mu no. Sesei ɔsom dɛ asafo mu panyin nye daa kwampaafo. Ɔtoaa n’asɛm no do dɛ: “Mboa na nkuranhyɛsɛm a minyae fii enuanom no hɔ, nkanka asafo mu mpanyimfo no hɔ no boaa me ma muhun dɛ Jehovah da ho ara dɔ me. Sesei mowɔ tsibowa pa na medze enyigye rosom wɔ m’asafo mu. Dza ɔtoo me yi ama mehu dɛ sɛ obi yɛ bɔn na onu noho ampaara a, Jehovah dze bɛkyɛ no.” Yebotum enya awerɛhyɛmu dɛ, sɛ yeedzi mfomdo mpo a, Jehovah dze hɛn bɛyɛ edwuma na oehyira hɛn. Naaso dza ohia paa dɛ yɛyɛ nye dɛ yɛbɛsesa hɛn akwan na yaakɔ do dze hɛnho ato no do.—Ndw. 86:5; Mbɛ. 28:13.

19. Ebɛn kwan do na Samson n’asɛm no ahyɛ wo gyedzi dzen?

¹⁹ Nsɛm ahorow a osisii wɔ Samson n’asetsena mu no, yeesusu no mu bi ho wɔ adzesua yi mu. Nna bɔn wɔ noho, naaso aber a Delilah hyɛɛ no ma odzii mfomdo mpo no, ɔammpa abaw, mbom ɔkɔr do soom Jehovah. Jehovah so ammpa abaw wɔ noho. Ɔsanee maa no ahoɔdzen ma okunkum Philistiafo pii ansaana oruwu. Nna Jehovah bu no dɛ ɔka n’asomfo a wɔdaa gyedzi kɛse edzi no ho. Dɛm ntsi ɔmaa wɔdze no kaa anokwafo a wɔabobɔ hɔn dzin wɔ Hebrewfo tsir 11 no ho. Yenyim dɛ hɛn Nyankopɔn a yɛsom no no enyi gye ho paa dɛ ɔbɛhyɛ hɛn dzen nkanka aber a yɛayɛ mberɛw no, na iyi ma hɛn enyi gye ankasa! Dɛm ntsi, hom mma yɛnkɔ do nsuasua Samson, na yɛmbɔ Jehovah mpaa dɛ: “Meserɛ wo, kaa me, na hyɛ me dzen.”—Atsɛ. 16:28.