1. Nna ebɛn asodzi kɛse na ɔda Jehoash, Uzziah, na Josiah hɔn do?

 FA NO dɛ eyɛ abofra na woesi wo hen wɔ Nyankopɔn no nkorɔfo do! Nkyɛ edze tum a ewɔ no bedzi dwuma dɛn? Bible no ma yehu dɛ Judah ahemfo binom wɔ hɔ a, wobedzii adze no, nna wosuar. Dɛ nhwɛdo no, Jehoash bɛyɛɛ ɔhen no, nna oedzi mfe 7 pɛ. Uzziah so nna oedzi mfe 16, na Josiah so, nna oedzi mfe 8. Ɔbɛyɛ dɛ nna iyi nnyɛ asodzi a ɔda famu koraa! Naaso ne nyina mu no, Jehovah nye nyimpa binom boaa hɔn ma wotumii dzii ɔhaw a wohyiae no do na wɔyɛɛ edwuma a nna ɔhyɛ hɔn nsa no.

2. Ebɛnadze ntsi na no ho hia dɛ yesua dza Jehoash, Uzziah, na Josiah yɛe no ho adze?

² Hɛndze, yɛnnyɛ ahemfo anaa ahembaa, naaso yebotum esua ndzɛmba pii efi dɛm ahemfo baasa yi hɔ. Yebotum esua biribi efi gyinae pa nye gyinae bɔn a wosisii no mu. Dza wɔyɛe no ma yehu paa dɛ no ho hia dɛ yɛfa nyɛnko pa, yɛkɔ do brɛ hɛnho adze, na yɛkɔ do hwehwɛ Jehovah hɔ akwankyerɛ.

3. Ɔhen Jehoash yɛɛ n’adze dɛn wɔ nkyerɛkyerɛ a Sɔfopanyin Jehoiada dze maa no no ho?

³ Suasua Jehoash na sisi gyinae pa. Ɔhen Jehoash ne papa wui aber a osuar no. Ntsi Sɔfopanyin Jehoiada na ɔtsetsee no, na ɔkyerɛkyerɛɛ no Jehovah ho adze. Jehoash dze dza Jehoiada kyerɛkyerɛɛ no no yɛɛ edwuma. Iyi boaa no ma ɔsoom Jehovah na ɔboaa afofor so ma wɔyɛɛ dɛmara. Ɔhwɛɛ mpo ma wosiesiee Jehovah n’asɔrfi no.—2 Mber. 24:​1, 2, 4, 13, 14.

4. Sɛ yetsie Jehovah ne mbra na yɛdze bɔ hɛn bra a, ɔboa hɛn dɛn? (Mbɛbusɛm 2:​1, 10-12)

⁴ Sɛ eyɛ ɔbabun a w’awofo anaa obi roboa wo ma aadɔ Jehovah na edze ne mbra abɔ wo bra a, ɔnodze, akyɛdze a ɔsom bo paa na wɔdze rema wo no. (Kenkan Mbɛbusɛm 2:​1, 10-12.) Awofo botum afa akwan pii do akyerɛkyerɛ hɔn mba. Ma yɛnhwɛ  dza akyerɛbaa bi a wɔfrɛ no Katya ne papa yɛe dze boaa no ma otumii sisii gyinae pa. Da biara sɛ nna ne papa nye no rokɔ skuul a, nna ɔnye no yɛ daa asɛm no. Ɔkaa dɛ: “Nna daa asɛm a me papa nye me yɛ no boa me ma sɛ mihyia ɔhaw bi a mutum gyina ano.” Ɔtɔ da a, bi a ebɛtse nka dɛ akwankyerɛ a w’awofo nam Bible do dze ma wo no yɛ dzen dodo na ɔmma nntum nnyɛ dza epɛ. Sɛ ɔba no dɛm a, ebɛnadze na ibotum ayɛ ama aagye ato mu na edze ayɛ edwuma? Akyerɛbaa bi a wɔfrɛ no Anastasia kaa dɛ, sɛ nna n’awofo ma no mbra bi a, nna wɔgye ber kyerɛkyerɛ mu kyerɛ no siantsir a wɔahyɛ mbra a ɔtse dɛm. Ɔkaa dɛ, “Dɛm a wɔyɛe no boaa me ma muhun siantsir a murunntum nnyɛ ndzɛmba ahorow bi. Afei so, ɔmaa muhun dɛ wɔdɔ me na wɔpɛ dɛ wɔbɔ moho ban na nnyɛ dɛ wɔrehyehyɛ mbra dze akyekyer me.”

5. Sɛ edze Bible mu afotu bɔ wo bra a, ɔbɛma w’awofo na Jehovah atse nka dɛn? (Mbɛbusɛm 22:6; 23:​15, 24, 25)

⁵ Mbabun, sɛ hom dze Bible mu afotu a hom awofo dze rema hom no bɔ hom bra a, ɔbɛma hɔn enyi agye paa. Na dza ɔkyɛn ne nyina no, hom bɛma Nyankopɔn n’enyi agye na hom nye no enya ebusuabɔ daa. (Kenkan Mbɛbusɛm 22:6; 23:​15, 24, 25.) Iyi ma yehu dɛ no ho hia paa dɛ yesuasua dza Jehoash yɛe aber a nna osuar no.

6. Aber Jehoiada wui ekyir no, woananom hɔn afotu na Jehoash tsiei, na ebɛnadze na ofii mu bae? (2 Mbermunsɛm 24:​17, 18)

⁶ Sua biribi fi gyinae bɔn a Jehoash sisii no mu. Aber a Jehoiada wui no, Jehoash dze noho kɔbɔɔ anyɛnkofo bɔn ho. (Kenkan 2 Mbermunsɛm 24:​17, 18.) Otsiee afotu a Judah mbapɔmba a wɔnndɔ Jehovah no dze maa no no. Innhu dɛ nkyɛ ɔsɛ dɛ Jehoash twe noho fi nkorɔfo a wɔtse dɛm no ho anaa? (Mbɛ. 1:10) Jehoash annyɛ dɛm, mbom otsiee hɔn a wɔayɛ hɔnho dɛ n’anyɛnkofo no afotu bɔn no. Dza ɔyɛ awerɛhow mpo nye dɛ aber a Jehoash ne papa no nua basia ne ba Zechariah yɛɛ dɛ ɔrotwe n’adwen esi dza ɔreyɛ no do no, ɔmaa wokum no. (2 Mber. 24:​20, 21; Matt. 23:35) Woara hwɛ etsirmɔdzensɛm a ɔtse dɛm! Ahyɛse no dze, nna Jehoash yɛ ɔhen pa, naaso ekyir yi ɔtwee noho fii Jehovah ho na ɔbɛyɛɛ owudzifo. Owiee ase no, nankasa no nkowaa kum no. (2 Mber. 24:​22-25) Sɛ ɔkɔr do tsiee Jehovah nye hɔn a wɔdɔ Jehovah a, nkyɛ n’abrabɔ ennwie no dɛm! Ebɛnadze na isua fi dza ɔyɛe no mu?

7. Woananom na ɔsɛ dɛ efa hɔn nyɛnko? (Hwɛ mfonyin no so.)

⁷ Adze kor a yebotum esua efi gyinae bɔn a Jehoash sii no mu nye dɛ, ɔsɛ dɛ yɛfa hɔn a wɔdɔ Jehovah na wɔpɛ dɛ wɔyɛ dza ɔbɛma  n’enyi agye no nyɛnko. Anyɛnkofo a wɔtse dɛm no bɔboa hɛn ma yaayɛ dza Jehovah pɛ. Nnyɛ hɛn etsipɛmfo nkotsee na ɔsɛ dɛ yɛfa hɔn nyɛnko. Kaa dɛ nna Jehoiada enyin kyɛn Jehoash koraa. Hwɛ anyɛnkofo a ewɔ no na bisa woho dɛ: ‘Wɔboa me ma menye Jehovah ntamu ebusuabɔ no mu yɛ dzen anaa? Wɔhyɛ me nkuran dɛ memfa Nyankopɔn ne mbra mbɔ me bra? Sɛ wɔrobɔ nkɔmbɔ a, ana wɔka Jehovah nye Bible mu nokwar a ɔsom bo no ho asɛm? Hɔn enyi gye ho dɛ wɔdze Nyankopɔn ne mbra bɔbɔ hɔn bra? Sɛ midzi mfomdo a, wonya akokodur ka ho asɛm kyerɛ me anaa?’ (Mbɛ. 27:​5, 6, 17) Asɛm no ara nye dɛ, sɛ w’anyɛnkofo nndɔ Jehovah a, worunntum mmboa wo, ntsi twe woho fi hɔnho. Naaso sɛ ewɔ anyɛnkofo a wɔdɔ Jehovah a, ɔno dze mma nntwe woho mmfi hɔnho da, osiandɛ hɔn na wobotum aboa wo ma aayɛ dza Jehovah pɛ!—Mbɛ. 13:20.

8. Sɛ yɛdze sohyial media dzi dwuma a, ebɛn ahwɛyie na ɔsɛ dɛ yɛyɛ?

⁸ Sohyial media botum ayɛ kwan kor a ɔyɛ mberɛw a yɛfa do nye hɛn ebusuafo nye hɛn anyɛnkofo dzi nkitaho. Naaso nyimpa binom tuw hɔnho wɔ sohyial media do. Wɔtaa dze biribi fofor a wɔatɔ anaa woetum ayɛ ho mfonyin anaa video to hɔ mbrɛ ɔbɛyɛ a afofor bohu. Ntsi sɛ edze sohyial media dzi dwuma a, bisa woho dɛ: ‘Ebɛnadze ntsi na medze mfonyin anaa video ahorow a ɔtse dɛm no gu hɔ? Aso adwen a medze yɛ dɛm nye dɛ mebɛhyɛ afofor nkuran anaa mepɛ dɛ afofor bɔ gye me do? Aso mbrɛ modwen, mekasa na meyɛ m’adze no kyerɛ dɛ murusuasua hɔn a mihyia hɔn wɔ sohyial media do no?’ Onua Nathan Knorr a nna ɔyɛ Akwankyerɛ Kuw no munyi no dze afotu bi mae dɛ: “Mma mmbɔ mbɔdzen dɛ ebɔsɔ nyimpa enyi. Sɛ eyɛ dɛ ebɔsɔ nyimpa enyi a, ekyir yi ibohu dɛ enntum annsɔ obiara n’enyi. Yɛ dza ɔsɔ Jehovah n’enyi na ɔno bɛma asɔ hɔn a wɔdɔ Jehovah no so enyi.”

9. Ebɛnadze na Jehovah boaa Uzziah ma otumii yɛe? (2 Mbermunsɛm 26:​1-5)

⁹ Suasua Uzziah na sisi gyinae pa. Aber a Ɔhen Uzziah yɛ abofra no nna ɔbrɛ noho adze. Nna osuro nokwar Nyankopɔn no. Ɔtsenaa ase mfe 68, na Jehovah hyiraa no ne mfe dodow no ara mu. (Kenkan 2 Mbermunsɛm 26:​1-5.) Uzziah dzii Judahfo hɔn atamfo pii do konyim na ɔbɔɔ Jerusalem kurow no ho ban. (2 Mber. 26:​6-15) Ɔda edzi pefee dɛ Uzziah n’enyi gyee dza Nyankopɔn boaa no ma otumii yɛe no ho.—Ɔsɛnk. 3:​12, 13.

10. Ebɛn asɛm too Uzziah?

¹⁰ Sua biribi fi gyinae bɔn a Uzziah sisii no mu. Nna Ɔhen Uzziah taa kyerɛ afofor dza wɔnyɛ. Bi a iyi maa ɔtsee nka dɛ obotum ayɛ dza ɔpɛ biara. Dɛ nhwɛdo no, da kor bi, ɔpeer noho kɔr Jehovah n’asɔrfi hɔ dɛ ɔrekɛhyew eduhuam wɔ afɔrmbukyia no do. Nna iyi yɛ biribi a ahemfo nnyi hokwan dɛ wɔyɛ. (2 Mber. 26:​16-18) Ɔbaa no dɛm no, Sɔfopanyin Azariah bɔɔ mbɔdzen dɛ obesiw no kwan, naaso Uzziah no bo fuuw paa. Ɔwɔ mu dɛ nna Uzziah edzi Jehovah nokwar mfe pii dze, naaso awerɛhosɛm nye dɛ, oenndzi no nokwar ennkesi ase, na Jehovah maa kwata yɛɛ no. (2 Mber. 26:​19-21) Sɛ Uzziah kɔr do brɛɛ noho adze a, nkyɛ tsebea a ɔtse dɛm annto no!

11. Ebɛn ndzɛmba na yɛyɛ a ɔkyerɛ dɛ yɛbrɛ hɛnho adze? (Hwɛ mfonyin no so.)

¹¹ Uzziah bɛyɛɛ dzen no, no werɛ fiir dɛ Jehovah na ɔdze tum a ɔtse dɛm ama no, na oehyira no ma ndzɛmba rokɔ yie. Ebɛnadze na yebotum esua efi mu? Ɔsɛ dɛ yɛkaa dɛ, nhyira nye ɔsom hokwan biara a hɛn nsa aka no, Jehovah na ɔdze ama hɛn. Ɔnnsɛ dɛ yɛdze dza yetum yɛ no tuw hɛnho, mbom ɔsɛ dɛ yɛdze ho enyimnyamhyɛ nyina ma Jehovah. b (1 Cor. 4:7) Ɔsɛ dɛ yɛbrɛ  hɛnho adze na yɛgye to mu dɛ bɔn wɔ hɛnho ntsi ɔtɔ da a, no ho behia dɛ wɔtsen hɛn do. Onua bi a ɔwɔ ne mfe 60 mu kaa dɛ: “Sɛ midzi mfomdo na wɔka ho asɛm kyerɛ me a, memma m’abaw mu mmbu. Sɛ ɔtɔ da na midzi mbofrasɛm bi na wɔtsea me a, meyɛ dza mubotum biara dɛ merennyɛ adze a ɔtse dɛm bio, na meyer moho dɛ mebɛyɛ pii wɔ Jehovah no som mu.” Nokwasɛm nye dɛ, sɛ yetsie Jehovah na yɛkɔ do brɛ hɛnho adze a, obesi hɛn yie.—Mbɛ. 22:4.

12. Aber a Josiah yɛ abofra no, ebɛnadze na ɔyɛe dze hwehwɛɛ Jehovah n’ekyir kwan? (2 Mbermunsɛm 34:​1-3)

¹² Suasua Josiah na sisi gyinae pa. Aber a Josiah dzii mfe 16 no na ɔhyɛɛ ase dɛ ɔrohwehwɛ Jehovah n’ekyir kwan. Nna ɔpɛ dɛ osua Jehovah ho adze na ɔyɛ dza ɔpɛ. Naaso nna ndzɛmba mu nnyɛ bɛtɛɛ mma no. Dɛm aber no, nna nyimpa pii som abosom, ntsi nna ɔsɛ dɛ Josiah nya akokodur ama oeetum etu abosonsɔr ase efi ɔman no mu. Na ampaara so, ɔdaa akokodur edzi! Josiah enndzi mfe 20 mpo na ɔhyɛɛ ase dɛ orutu abosonsɔr ase efi ɔman no mu.—Kenkan 2 Mbermunsɛm 34:​1-3.

13. Sɛ ihyira woho do ma Jehovah a, ɔbɛka mbrɛ ebɔ wo bra no dɛn?

¹³ Sɛ eyɛ abofra koraa mpo a, ibotum esuasua Josiah na ahwehwɛ Jehovah n’ekyir kwan na esua no su ahorow a ɔyɛ ahomka no ho adze. Sɛ eyɛ dɛm a, obekenyan wo ma eehyira woho do ama no. Sɛ ihyira woho do ma Jehovah a, ɔbɛka mbrɛ ebɔ wo bra no dɛn? Onua bi a wɔfrɛ no Luke bɔɔ esu no, nna oedzi mfe 14. Ɔkaa dɛ, “Ofi ndɛ rokɔ, Jehovah no som na medze bedzi kan wɔ m’asetsena mu, na mebɛyɛ dza mubotum biara ama n’enyi agye.” (Mark 12:30) Ekyingye biara nnyi ho dɛ, sɛ woara so bɔ mbɔdzen dɛ ebɛyɛ dɛm a, w’enyi bɛgye paa!

14. Ebɛnadze na mbabun binom ayɛ dze esuasua Ɔhen Josiah?

¹⁴ Sɛ eyɛ ɔbabun a erosom Jehovah a, ebɛn ɔhaw na ibotum ehyia? Johan bɔɔ esu no, nna oedzi mfe 12. Ɔkaa dɛ, no skuulfo hyɛɛ no dɛ ɔnnom elɛktrɔnek sigarɛt, dza wɔfrɛ no vaping no. Dza ɔboaa Johan ma otumii gyinaa nhyɛdo no ano nye dɛ, ɔmaa ɔtsenaa n’adwen mu dɛ, sɛ ɔnom biribi a ɔtse dɛm a, obotum abɔ no yarba na ɔbɛsɛɛ ɔnye Jehovah ntamu ebusuabɔ no so. Rachel so bɔɔ esu no, nna oedzi mfe 14. Ɔno so  kaa dza ɔboaa no ma ogyinaa ɔhaw a ohyiae wɔ skuul no ano. Ɔkaa dɛ: “Biribiara a obesi wɔ skuul no, mobɔ mbɔdzen dɛ mubohu dza Bible no ka fa ho. Dɛ nhwɛdo no, sɛ yerusua abakɔsɛm ho adze a, mekaa Bible mu asɛm anaa nkɔnhyɛ bi. Anaa sɛ menye obi robɔ nkɔmbɔ a, ɔma mekaa kyerɛwsɛm bi a ɔfa dza yɛreka no ho a mubotum nye no esusu ho.” Bi a ɔhaw a irihyia no nntse dɛ dza Ɔhen Josiah hyiae no dze, naaso ibotum esi gyinae pa, na akɔ do edzi Jehovah nokwar dɛ mbrɛ ɔyɛe no. Dɛ ɔbabun no, sɛ itum gyina ɔhaw a ihyia no ano a, ɔbɔboa wo ma eetum egyina dza ibehyia no daakye no so ano.

15. Ebɛnadze na ɔboaa Josiah ma otumii soom Jehovah nokwar mu? (2 Mbermunsɛm 34:​14, 18-21)

¹⁵ Ɔhen Josiah dzii mfe 26 no, ɔyɛɛ nhyehyɛɛ ma wɔhyɛɛ ase siesiee asɔrfi no. Aber a wɔreyɛ edwuma no, wohun Jehovah “ne Mbra nwoma no a wɔdze nam Moses do mae no.” Wɔkenkaan nwoma no mu asɛm kyerɛɛ ɔhen no, dza ɔtsee no kenyaan no ma ɔyɛɛ dza nna wɔakyerɛw wɔ Mbra no mu no. (Kenkan 2 Mbermunsɛm 34:​14, 18-21.) Ana w’enyi gye ho dɛ ebɛkenkan Bible no dabaa? Sɛ dɛm a, ɔrokɔ dɛn? Sɛ erekenkan na ihu asɛm bi a obotum aboa wo a, ana ehyɛ no nsew? Dza Luke a yeedzi kan aka noho asɛm yɛ nye dɛ, sɛ ɔrekenkan Bible na ohu asɛm bi a obotum aboa no a, ɔyɛ a, ɔkyerɛw to hɔ. Sɛ woara so yɛ dɛm a, obotum aboa wo ma aakaa kyerɛwnsɛm ahorow nye dza esua efi mu no. Sɛ ema w’enyi gye Bible no ho na ekɔ do kenkan a, ɔbɔboa wo ma aasom Jehovah. Na dɛ mbrɛ Nyankopɔn n’Asɛm no boaa Ɔhen Josiah ma ɔyɛɛ dza ɔtsen no, dɛmara na ɔbɔboa wo so.

16. Ebɛnadze na ɔmaa Josiah sii gyinae bɔn bi, na ebɛnadze na yesua fi mu?

¹⁶ Sua biribi fi gyinae bɔn a Josiah sii no mu. Aber a Josiah dzii bɛyɛ mfe 39 no, osii gyinae bɔn bi, na ɔno dze no kɔr owu mu. Dza ɔyɛe nye dɛ ɔannhwehwɛ Jehovah hɔ akwankyerɛ na mbom ɔdze noho too nankasa noho do. (2 Mber. 35:​20-25) Ebɛnadze na yebotum esua efi mu? Ɔmmfa ho mfe a yeedzi anaa mfe  dodow a yɛdze esua Bible no, ɔsɛ dɛ yɛkɔ do hwehwɛ Jehovah. Iyi kyerɛ dɛ ɔsɛ dɛ yɛbɔ mpaa hwehwɛ Jehovah hɔ akwankyerɛ aber nyina, yesua Bible no, na yetsie afotu a enuanom a wɔasom akyɛr dze bɛma hɛn no. Sɛ yɛyɛ dɛm a, obotum aboa hɛn amma yeennsisi gyinae bɔn, na iyi botum ama hɛn enyi agye.—Jas. 1:25.

17. Ebɛnadze na yeesua efi Judah ahemfo baasa no hɔn asɛm no mu?

¹⁷ Sɛ eyɛ ɔbabun a, ndzɛmba pii na ibotum ayɛ a ɔbɛma w’enyi agye. Jehoash, Uzziah, nye Josiah hɔn asɛm a yeesusu ho no ma yehu dɛ mbabun botum esisi gyinae pa na wɔaayɛ ndzɛmba a ɔbɛma Jehovah n’enyi agye. Ɔwɔ mu, ahemfo baasa a yeesusu hɔnho yi sii gyinae bɔn bi a ɔmaa owiee hɔn bɔn. Naaso hɛn dze, yebotum esua biribi efi ndzɛmba papa a wɔyɛe no mu na yeekwetsir dɛ yebedzi mfom a wodzii no bi. Sɛ yɛyɛ dɛm a, yebotum ahwɛ kwan dɛ ndzɛmba bɔkɔ yie ama hɛn.

18. Ebɛn Bible mu nhwɛdo na ɔma ihu dɛ obotum esi wo yie? (Hwɛ mfonyin no so.)

¹⁸ Sɛ yɛhwɛ Kyerɛwnsɛm no mu a, yehu mbabun afofor so a wɔyɛɛ dza Jehovah pɛ. Jehovah so gyee hɔn too mu na osii hɔn yie. Dɛm mbabun yi mu kor nye David. Aber a ɔyɛ abofra no, osii gyinae dɛ ɔbɔsom Nyankopɔn na ekyir yi ɔbɛyɛɛ ɔhen a odzi Jehovah nokwar. Ɔwɔ mu dɛ odzii mfomdo ahorow dze, naaso Jehovah hun David dɛ ɔyɛ nokwafo. (1 Ahe. 3:6; 9:​4, 5; 14:8) Sɛ isua David no nokwardzi nye n’asetsena ho adze a, obotum ahyɛ wo nkuran na woekenyan wo wɔ Jehovah no som mu. Anaadɛ ibotum dze esi w’enyi do na esua dza Mark anaa Timothy yɛe no ho adze. Sɛ eyɛ dɛm a, ibohu dɛ wofi hɔn mbofrase na wɔhyɛɛ ase dɛ wɔrosom Jehovah na wɔyɛɛ dɛm araa kesii ase. Gyinae a wosii dɛ wɔbɔsom Jehovah no maa Jehovah n’enyi gyee, na hɔnankasa so enyi gyee.

19. Ebɛn asetsena na ibotum enya?

¹⁹ Dza edze w’abrabɔ bɛyɛ no ndɛ no na ɔbɛkyerɛ dɛ obesi wo yie anaa orinnsi wo yie. Sɛ ammfa woho annto w’ankasa wo ntseasee do na mbom edze woho to Jehovah do a, ɔbɔboa wo ma eesisi gyinae pa. (Mbɛ. 20:24) Ibotum enya asetsena a enyigye na akomatɔyamu wɔ mu. Mma wo werɛ mmfir da dɛ, dza eyɛ ma Jehovah biara no, ohu na n’enyi sɔ. Biribiara nnyi hɔ a ɔsom bo kyɛn dɛ edze wo nkwa bɔsom hɛn sor Egya Jehovah a ɔwɔ ɔdɔ no!