1. Ebɛn gyinae na odzi mũ kyɛn gyinae biara a obi besi wɔ n’asetsena mu?

MPƐN pii no, dza ofi gyinae ahorow a awofo sisi mu ba no ka hɔn mba ber tsentsen bi. Sɛ awofo sisi gyinae bɔn a obotum ama hɔn mba no ehyia ɔhaw ahorow. Naaso, sɛ wosisi gyinae papa a, obotum ama hɔn mba enya asetsena a enyigye nye akomatɔyamu wɔ mu. Mbrɛ ɔtse biara, ɔwɔ dɛ mbofra no so sisi gyinae pa. Gyinae a odzi mũ kyɛn gyinae biara a obi besi wɔ n’asetsena mu nye dɛ ɔbɔsom Jehovah, hɛn sor Egya a ɔwɔ ɔdɔ no.​—Ndw. 73:28.

2. Ebɛn gyinae pa na Jesus nye n’awofo sisii?

² Jesus n’awofo sii hɔn bo dɛ wɔbɔboa hɔn mba ma wɔaasom Jehovah. Gyinae ahorow a wosisii no daa no edzi dɛ nna iyi nye botae a osi hɔn enyi do. (Luke 2:40, 41, 52) Dɛmara na Jesus so sisii gyinae pa. Gyinae pa a osisii no boaa no ma otumii yɛɛ dza nna Jehovah rohwɛ kwan dɛ ɔbɛyɛ no. (Matt. 4:1-10) Jesus nyinii bɛyɛɛ obi a ne yamu ye, odzi nokwar na ɔwɔ akokodur. Awofo a wɔdɔ Jehovah nyinara, hɔn enyi bɛgye na wɔdze bɔhoahoa hɔnho dɛ wɔwɔ ɔba a ɔtse dɛm.

3. Ebɛn nsɛmbisa na yebenya ho mbuae wɔ adzesua yi mu?

³ Adzesua yi mu no, yebosusu nsɛmbisa a odzidzi do yi ho: Ebɛn gyinae pa na Jehovah sisii wɔ Jesus ho? Ebɛnadze na awofo a wɔyɛ Christianfo no botum esũa efi gyinae ahorow a Joseph na Mary sisii no mu? Na ebɛnadze na mbabun a wɔyɛ Christianfo no botum esũa efi gyinae ahorow a Jesus sisii no mu?

4. Ebɛn gyinae a no ho hia na Jehovah sii wɔ ne Ba no ho?

⁴ Jehovah paaw awofo pa maa Jesus. (Matt. 1:18-23; Luke 1:26-38) Mary n’akoma mu nsɛm a wɔakyerɛw wɔ Bible mu no da no edzi dɛ nna ɔdɔ Jehovah nye n’Asɛm no. (Luke 1:46-55) Afei,  mbrɛ Joseph so sii yɛɛ n’adze wɔ Jehovah n’akwankyerɛ ho no ma yehu dɛ nna osuro Nyankopɔn na ɔpɛ dɛ ɔsɔ n’enyi.​—Matt. 1:24.

5-6. Ebɛn nsɛndzendzen na Jehovah maa kwan ma ne Ba no hyiae?

⁵ Hyɛ no nsew dɛ awofo a Jehovah pawee maa Jesus no, nna wɔnnyɛ esikafo. Afɔr a Joseph na Mary bɔe ber a wɔwoo Jesus no da no edzi dɛ nna wɔyɛ ehiafo. (Luke 2:24) Obotum aba dɛ, nna Joseph wɔ kapentafo dan kakraba bi a ɔbɛn ne fie wɔ Nazareth a ɔyɛ n’edwuma no wɔ mu. Obotum aba dɛ wɔmaa hɔn asetsena baa famu, nkanka ber a hɔn ebusua no yɛɛ kɛse no. Annyɛ yie koraa no, nna wɔwɔ mba beesuon.​—Matt. 13:55, 56.

⁶ Jehovah bɔɔ Jesus noho ban fii esian ahorow bi ho, naaso nsɛndzendzen a ohyiae no, ɔammbɔ noho ban emmfi ne nyina ho. (Matt. 2:13-15) Dɛ nhwɛdo no, nna Jesus n’ebusuafo no nngye no nndzi, ntsi nna ɔsɛ dɛ ogyina dɛm ɔhaw yi ano. Ahyɛse no, nna Jesus n’ebusuafo no nngye no nndzi dɛ ɔno nye Messiah no. Hwɛ mbrɛ nna iyi besi ebu Jesus n’abaw mu. (Mark 3:21; John 7:5) Afei so, obotum aba dɛ ber a Joseph wui no nna Jesus da ho ara yɛ abofra, ntsi nna iyi bɛma oedzi yaw papaapa. Osiandɛ Joseph wui ntsi, obotum aba dɛ nna ɔsɛ dɛ Jesus a ɔyɛ abakan no hwɛ edwuma a ebusua no yɛ no do. (Mark 6:3) Aber a Jesus nyinii no, nna ɔno na ɔhwɛ n’ebusua no nyina. Obotum aba dɛ nna ɔsɛ dɛ ɔyɛ edwumadzen mbrɛ ɔbɛyɛ a ebusua no benya hɔn ehiadze. Ntsi sɛ wɔkã dɛ obi ayɛ edwuma ma ɔaberɛ a, nna Jesus nyim mbrɛ ɔtse.

7. (a) Ebɛn nsɛmbisa na ɔbɔboa awarfo ma woeetum atsetse hɔn mba? (b) Ebɛn kwan do na Mbɛbusɛm 2:1-6 no botum aboa awofo ma wɔaatsetse hɔn mba?

⁷ Sɛ hom yɛ awarfo a hom pɛ dɛ hom wo mba a, hom mbisa homho dɛm asɛm yi: ‘Sɛ Jehovah rohwehwɛ awarfo a wɔbrɛ hɔnho adze na wɔdɔ no ma wɔaahwɛ abofra bi a ɔsom bo a, nkyɛ ɔbɛpaw hɛn anaa?’ (Ndw. 127:3, 4) Sɛ eyɛ ɔwofo a, bisa woho dɛ: ‘Ana mekyerɛ me mba mfaso a ɔwɔ edwumadzen do?’ (Ɔsɛnk. 3:12, 13) ‘Ana meyɛ dza mubotum nyina dze bɔ me mba ho ban fi honam afamu na abrabɔ afamu esian a wobotum ehyia wɔ Satan no wiadze yi mu no ho?’ (Mbɛ. 22:3) Ɔwɔ mu, ɔhaw a bi a wo mba behyia no, irunntum mmbɔ hɔnho ban mmfi ne nyina ho. Etwe wo mu tann mpo a innkotum ayɛ. Naaso, nkakrankakra ibotum efi ɔdɔ mu esiesie wo mba ama woeehu ɔhaw a wobotum ehyia wɔ asetsena mu no. Ibotum ayɛ dɛm dze nam  kyerɛ a ebɛkyerɛkyerɛ hɔn ma woeehu mbrɛ wobesi akɔhwehwɛ afotu efi Nyankopɔn n’Asɛm no mu no do. (Kenkan Mbɛbusɛm 2:1-6.) Dɛ nhwɛdo no, sɛ obusuanyi bi gyaa Jehovah no som a, boa wo mba no ma wonhu wɔ Nyankopɔn n’Asɛm no mu siantsir a no ho hia papaapa dɛ wɔkɔ do dzi Jehovah nokwar. (Ndw. 31:23) Anaadɛ sɛ wo dɔfo bi wu a, kyerɛ wo mba no Bible mu nsɛm a obotum aboa hɔn ma woeenya awerɛkyekyer nye asomdwee.​—2 Cor. 1:3, 4; 2 Tim. 3:16.

8. Dɛ mbrɛ Deuteronomy 6:6, 7 kyerɛ no, nna ebɛnadze na ɔwɔ dɛ Joseph na Mary yɛ?

⁸ Osiandɛ Joseph na Mary dze akwankyerɛ a Jehovah dze maa awofo no yɛɛ edwuma ntsi, wotumii tsetsee Jesus ma onyinii bɛyɛɛ obi a ɔwɔ Nyankopɔn n’enyimpa. (Kenkan Deuteronomy 6:6, 7.) Nna Joseph na Mary dɔ Jehovah papaapa, ntsi nna dza ohia hɔn kɛse nye dɛ wɔbɛtsetse hɔn mba no ma woeenya ɔdɔ a ɔtse dɛmara ama Jehovah.

9. Ebɛn gyinae pa na Joseph na Mary sisii?

⁹ Joseph na Mary sii gyinae dɛ wɔnye hɔn mba bɔsom Jehovah dabaa. Ɔnnyɛ nwanwa dɛ nna dapɛn biara wɔkɔ nhyiamudan mu wɔ Nazareth. Afei so, afe biara nna wokedzi Apaho afahyɛ no wɔ Jerusalem. (Luke 2:41; 4:16) Bi a nna wɔdze ber tsentsen a wɔdze twa kwan kɔ Jerusalem no kyerɛkyerɛ Jesus nye no nuanom no abakɔsɛm a ɔfa Jehovah no nkorɔfo ho. Obotum aba dɛ nna wɔkɔ kɔhwɛ mbea ahorow a wɔakã ho asɛm wɔ Kyerɛwnsɛm mu no. Aber a hɔn ebusua no yɛɛ kɛse no, obotum aba dɛ nna ɔnnda famu mma Joseph na Mary dɛ wɔbɔkɔ do asom Jehovah dabaa. Naaso hwɛ nhyira ara a Jehovah maa wonyae! Osiandɛ wɔdze Jehovah no som dzii kan ntsi, hɔn ebusua no nye Jehovah nyaa ebusuabɔ a no mu yɛ dzen.

10. Ebɛnadze na awofo a wɔyɛ Christianfo no botum esũa efi Joseph na Mary hɔ?

¹⁰ Ebɛnadze na awofo a wosuro Nyankopɔn no botum esũa efi Joseph na Mary hɔ? Adze a ohia papaapa a ɔsɛ dɛ hom yɛ nye dɛ, hom dze hom ndzeyɛɛ nye hom nsɛm bɛkyerɛ hom mba dɛ hom dɔ Jehovah papaapa. Hom nhyɛ no nsew dɛ, akyɛdze kɛse a hom botum dze ama hom mba nye dɛ hom bɔboa hɔn ma wɔaadɔ Jehovah. Afei so, esuadze a ɔsom bo papaapa a hom botum dze ama hom mba no, no mu kor nye dɛ hom bɛkyerɛ hɔn mbrɛ wobesi akenkan  Bible no, abɔ mpaa, akɔ asafo nhyiamu na wɔdze hɔnho ahyɛ asɛnka edwuma no mu dabaa. (1 Tim. 6:6) Ɔwɔ mu, ɔsɛ dɛ hom dze honam afamu ndzɛmba a hom mba hia no ma hɔn. (1 Tim. 5:8) Naaso hom nkaa dɛ, sɛ Satan no wiadze yi ba n’ewiei a, nnyɛ honam afamu ndzɛmba a hom mba wɔ no na ɔbɛma woenya nkwa akɔ Nyankopɔn no wiadze fofor no mu. Mbom no, ɔyɛ ebusuabɔ a no mu yɛ dzen a wɔnye Jehovah wɔ no na ɔbɛma woenya nkwa. *​—Ezek. 7:19; 1 Tim. 4:8.

11. (a) Ebɛn kwan do na afotu a ɔwɔ 1 Timothy 6:17-19 no botum aboa awofo ma woeesisi gyinae pa ber a wɔretsetse hɔn mba no? (b) Ebɛn botae na bi a hom ebusua no botum esusu ho, na ebɛn nhyira na obotum efi botae a ɔtsetse dɛm mu aba? (Hwɛ adakaba a wɔato dzin “ Ebɛn Botae Ahorow Na Hom Dze Besisi Hom Enyi Do?”)

¹¹ Sɛ yehu dɛ awofo pii a wɔyɛ Christianfo no esisi gyinae pa afa hɔn mbusua ho ama woeetum atwe abɛn Jehovah a, ɔka hɛn akoma papaapa! Dabaa wɔnye hɔn mbusua no bɔ mu som. Wɔkɔ asafo nhyiamu nye ehyiadzi ahorow. Wɔnye hɔn mbusua bɔ mu yɛ asɛnka edwuma no. Mbusua binom mpo tum kɛyɛ asɛnka edwuma no wɔ asaasesin a wɔnntaa nnyɛ mu edwuma mu. Binom so kɛsera Bethel anaadɛ wɔboa ma wosisi asafo adan ahorow. Mbusua a wɔpaw dɛ wɔbɛyɛ dɛm ndwuma ahorow yi no, hɔnankasa hɔn sika na wɔdze hwɛ hɔnho, na obotum aba dɛ wobehyia nsɛndzendzen wɔ hɔn asetsena mu. Naaso Jehovah behyira hɔn piinara wɔ mbɔdzen a ɔtse dɛm ho. (Kenkan 1 Timothy 6:17-19.) Mbofra a wɔtsetse hɔn wɔ mbusua a ɔtse dɛm mu no kɔ do ara da suban pa a ɔtse dɛm edzi ber a wɔayɛ mpanyimfo no. Na wonnkonu hɔnho da dɛ hɔn awofo tsetsee hɔn wɔ dɛm kwan no do! *​—Mbɛ. 10:22.

12. Aber a Jesus nyinii no, nna ebɛnadze na ɔsɛ dɛ ɔyɛ?

¹² Jesus no sor Egya no sisi gyinae pa aber biara na dɛmara so na Joseph na Mary sisii gyinae a nyansa wɔ mu. Naaso, aber a Jesus nyinii no, nna ɔwɔ dɛ nankasa so sisi gyinae ahorow. (Gal. 6:5) Dɛ mbrɛ yetum fi hɛn pɛ mu yɛ adze no, nna Jesus so wɔ ho kwan a ɔtse dɛm. Nkyɛ obotum dze dza ohia no no edzi kan wɔ n’asetsena mu. Naaso, ɔpaaw dɛ ɔbɛhyɛ ebusuabɔ a ɔnye Jehovah wɔ no mu dzen. (John 8:29) Ebɛn kwan do na no nhwɛdo no botum aboa mbabun a wɔwɔ hɔ ndɛ?

13. Ber a Jesus yɛ abofra no, ebɛn gyinae pa na osii?

¹³ Ber a Jesus yɛ abofra no, ɔbrɛɛ noho adze hyɛɛ n’awofo ase. Nkyɛ obotum enya adwen dɛ onyim ndzɛmba pii kyɛn n’awofo ma ntsi ɔbɔpow akwankyerɛ a wɔdze bɛma no no, naaso ɔannyɛ dɛm da. Mbom no, “ɔbrɛɛ noho adze maa hɔn.” (Luke 2:51) Ekyingye biara nnyi ho dɛ Jesus faa asodzi a nna ɔda no do dɛ abakan no enyibersɛm. Ɔyeer noho sũaa kapenta  edwuma no fii Joseph hɔ ama oeetum aboa n’ebusua no ma woeenya sika dze ahwɛ hɔnho.

14. Yesi dɛn hu dɛ nna Jesus yɛ obi a osũa Nyankopɔn n’Asɛm no yie?

¹⁴ Obotum aba dɛ Joseph na Mary kãa mbrɛ Jesus n’awoo no si yɛ nwanwa no ho asɛm kyerɛɛ no. Afei so obotum aba dɛ nsɛm a Nyankopɔn n’asomafo kãe faa Jesus ho nyina no, wɔkãa no so kyerɛɛ no. (Luke 2:8-19, 25-38) Jesus amma nsɛm a wɔkãa kyerɛɛ no no annso hɔ ara, mbom nankasa so sũaa Kyerɛwnsɛm no. Yesi dɛn hu dɛ nna Jesus yɛ obi a osũa Nyankopɔn n’Asɛm no yie? Osiandɛ, ber a nna ɔda ho ara yɛ abofra no, akyerɛkyerɛfo a nna wɔwɔ Jerusalem no, “ne ntseasee ɔnye ne mbuae yɛɛ hɔn nwanwa.” (Luke 2:46, 47) Ber a Jesus dzii mfe 12 pɛr no, nna onyim dada dɛ n’Egya nye Jehovah.​—Luke 2:42, 43, 49.

15. Ebɛn kwan do na Jesus maa ɔdaa edzi dɛ ɔpaaw dɛ ɔbɛyɛ Jehovah n’apɛdze?

¹⁵ Ber a Jesus hun dza Jehovah pɛ dɛ ɔyɛ no, ɔpaaw dɛ ɔbɛyɛ Jehovah n’apɛdze. (John 6:38) Nna onyim dɛ nyimpa piinara bɛtan no, ntsi obotum aba dɛ iyi gyaa no adwendwen. Naaso, ɔpaaw dɛ ɔbɛbrɛ noho adze ama Jehovah. Ber a Jesus bɔɔ esu wɔ afe 29 H.B. no, nna adze a no ho hia no kɛse papaapa nye dɛ ɔbɛyɛ dza Jehovah rohwehwɛ efi no hɔ. (Heb. 10:5-7) Afei, ber mpo a nna Jesus sɛn asɛndua no do a oruwu no, ɔkɔr do sii no bo dɛ ɔbɛyɛ n’Egya n’apɛdze.​—John 19:30.

16. Ebɛnadze kor na mbofra botum esũa efi Jesus hɔ?

¹⁶ Yɛ setsie ma w’awofo. Dɛ mbrɛ nna Joseph na Mary tɔ sin no, dɛmara na w’awofo so tse. Naaso, Jehovah dze ahyɛ w’awofo hɔn nsa dɛ wɔmbɔ woho ban, wɔntsetse wo, na wɔmma wo akwankyerɛ. Sɛ itsie hɔn afotu na eda no edzi dɛ ibu tum a wɔwɔ no a, ‘obowie wo yie.’​—Eph. 6:1-4.

17. Dɛ mbrɛ Joshua 24:15 kyerɛ no, ebɛn gyinae na ɔwɔ dɛ mbabun ankasa si?

¹⁷ Paw nyia ebɔsom no. Ɔwɔ dɛ wankasa hu onyii a Jehovah yɛ. Afei so, ɔwɔ dɛ ihu n’apɛdze nye mbrɛ ibesi ayɛ n’apɛdze no wɔ w’asetsena mu. (Rom. 12:2) Sɛ eyɛ dɛm a, ibotum esi gyinae a no ho hia kyɛn gyinae biara wɔ w’asetsena mu; gyinae a ibesi dɛ ebɔsom Jehovah. (Kenkan Joshua 24:15; Ɔsɛnk. 12:1) Sɛ idzi da biara da Bible akenkan nye adzesua ho nhyehyɛɛ a ayɛ no do a, ɔdɔ a ewɔ ma Jehovah no bɔkɔ do ayɛ kɛse. Nkyii so, gyedzi a ewɔ wɔ no mu no bɛyɛ dzen.

18. Ebɛn gyinae na ɔwɔ dɛ mbabun si, na ebɛnadze na obefi mu aba?

 ¹⁸ Si gyinae dɛ edze Jehovah n’apɛdze bedzi kan wɔ w’asetsena mu. Satan no wiadze no kamfo kyerɛ dɛ, sɛ edze adomakyɛdze ewɔ no yɛ dza woara epɛ a, ibenya enyigye wɔ asetsena mu. Nokwasɛm nye dɛ, hɔn a wɔdze si hɔn enyi do dɛ wobenya honam afamu ndzɛmba no, wɔdze ‘yaw pii wowɔ hɔnho.’ (1 Tim. 6:9, 10) Naaso, sɛ itsie Jehovah na edze n’apɛdze dzi kan wɔ w’asetsena mu a, w’asetsena besi wo yie na “ibenya no yie.”​—Josh. 1:8.

19. Ebɛnadze na ɔwɔ dɛ awofo ma ɔtsena hɔn adwen mu?

¹⁹ Awofo, hom nyɛ dza hom botum biara mboa hom mba ma wɔnsom Jehovah. Hom mfa homho nto no do na ɔbɔboa hom ma hom eetum esisi gyinae a nyansa wɔ mu. (Mbɛ. 3:5, 6) Hom mma ɔntsena hom adwen mu dɛ, hom ndzeyɛɛ benya hom mba do nkantando kɛse akyɛn nsɛm a hom bɛkã akyerɛ hɔn no. Ntsi, hom nsisi gyinae a ɔbɛma hom mba etum enya Jehovah n’enyimpa.

20. Sɛ mbabun si gyinae dɛ wɔbɔsom Jehovah a, ebɛn nhyira na wobenya?

²⁰ Mbabun, hom awofo botum aboa hom ma hom eesisi gyinae ahorow a nyansa wɔ mu wɔ asetsena mu. Naaso, homara na ɔsɛ dɛ hom sisi dɛm gyinae no ama hom aasɔ Nyankopɔn n’enyi. Ntsi, hom nsũasua Jesus na hom nsi gyinae dɛ hom bɔsom hom sor Egya a ɔwɔ ɔdɔ no. Sɛ hom yɛ dɛm a, hom benya asetsena a akomatɔyamu nye enyigye wɔ mu ndɛ. (1 Tim. 4:16) Nkyii so, hom benya asetsena a ahotɔ wɔ mu kyɛn biara daakye!