1. Ho kwan a yɛwɔ dɛ yɛnye nkorɔfo bɛyɛ Bible adzesua ma woeekowie esubɔ mu no, ebɛn kwan do na 2 Corinthfo 3:1-3 no boa hɛn ma hɛn enyi sɔ? (Hwɛ mfonyin a ɔwɔ Ɔweɔn-Aban yi enyim no.)

SƐ IHU dɛ Bible suanyi bi a ɔnye hom asafo no bɔ abɔ esu a, etse nka dɛn? Ekyingye biara nnyi ho dɛ ɔma w’enyi gye papaapa. (Matt. 28:19) Na sɛ ɔwo na enye no sũaa adze a, hwɛ enyigye ara a ibenya ber a ehu dɛ ɔrobɔ esu no! (1 Thess. 2:19, 20) Esuafo afofor a wɔabɔ esu no, wɔtse dɛ “ayɛyinwoma” anaa adasedzi nwoma a odzi mũ ma hɔn a wɔnye hɔn sũaa adze no nye asafo mũ no nyina.​—Kenkan 2 Corinthfo 3:1-3.

2. (a) Ebɛn asɛm a no ho hia na ɔsɛ dɛ yebisa hɛnho, na ebɛnadze ntsi a? (b) Ebɛnadze nye Bible adzesua? (Hwɛ ase hɔ asɛm no.)

² Nkontaabu da no edzi dɛ wɔ mfe anan a woetwa mu no, sɛ wɔkyekyɛ mu pɛpɛɛpɛr a yɛyɛ Bible adzesua * bɛyɛ 10,000,000 bosoom biara wɔ wiadze nyina. Iyi ka akoma papaapa. Dɛm mfe anan no mu no, sɛ wɔkyekyɛ mu pɛpɛɛpɛr a afe biara nna nyimpa bɔbor 280,000 bɔ esu dɛ Jehovah Adasefo na wɔbɛyɛ Jesus Christ n’esuafo. Hɛn Bible esuafo ɔpepem pii a wɔaka no, yebesi dɛn aboa hɔn mu dodowara ma wɔaabɔ esu? Jehovah esie abotar na ɔama nyimpa piinara mber nye ho kwan dɛ wɔmbɛyɛ Christ n’esuafo, ntsi yɛpɛ dɛ yɛyɛ dza yebotum nyina dze boa hɔn ma wɔper du esubɔ ho ntsɛm. Osiandɛ woetwa mber no tsia!​—1 Cor. 7:29a; 1 Pet. 4:7.

3. Ɔdze fa Bible adzesua a yɛbɛyɛ ho no, ebɛnadze na yebosusu ho wɔ adzesua yi mu?

 ³ Osiandɛ no ho hia dɛ ndɛ yɛbɛyɛ nkorɔfo esuafo ntsi, Akwankyerɛ Kuw no bisaa edwumayɛbea nkorbata ahorow no kwan a yebotum afa do aboa hɛn Bible esuafo no mu piinara ma woeetum abɔ esu. Adzesua yi nye dza odzi hɔ no mu no, yɛbɔhwɛ dza yebotum esũa efi akwampaaefo, asɛmpatserɛwfo, nye amansin do ahwɛfo a hɔnho akokwaa hɔ. * (Mbɛ. 11:14; 15:22) Adzesua ebien no bɛkyerɛkyerɛ hɛn ma yeehu dza Bible akyerɛkyerɛfo nye hɔn esuafo botum ayɛ ama adzesua no eetu mpon. Adzesua yi mu no, yɛbɔhwɛ ndzɛmba enum a ɔsɛ dɛ osuanyi biara yɛ ama oeetum etu mpon wɔ Bible adzesua a wɔnye no yɛ no mu na ɔaabɔ esu.

4. Ebɛnadze na ɔsɛ dɛ ɔtsena hɛn adwen mu wɔ Bible adzesua a wɔyɛ wɔ abow ano no ho?

⁴ Hɛn nuanom mbarimba na mbaa piinara yɛ Bible adzesua wɔ nkorɔfo hɔn abow ano. Ɔwɔ mu dɛ iyi yɛ kwan pa a yebotum afa do ekenyan Bible no ho enyigye dze, naaso mpɛn pii no nkɔmbɔ a ɔtse dɛm no yɛ tsiabaa na bi mpo a nkɔmbɔ no nnkotum akɔ do dapɛn biara. Mbrɛ ɔbɛyɛ a enyigye a fiewura bi enya wɔ asɛm no ho bɛyɛ kɛse no, dza adawurbɔfo binom yɛ nye dɛ, wobisa fiewura a ɔakyerɛ asɛm no ho enyigye no no fon nɔmba. Ɔno ekyir no wɔbɔ mbɔdzen dɛ wɔbɛfrɛ no anaadɛ wɔdze tɛst mɛsegye bɔmona no na wɔnye no eesusu Bible mu asɛm bi ho wɔ ber tsiabaa bi mu ansaana wɔasan akɔ ne nkyɛn. Obotum aba dɛ nkɔmbɔ tsiabaa a ɔtse dɛm a ɔnnyɛ Bible adzesua no botum akɔ do abosoom dodow bi. Sɛ osuanyi no nnyi adzesua no ho adagyer na ɔnnyer noho * wɔ Nyankopɔn n’Asɛm a orusũa no ho a, ana obotum aper akɔ n’enyim dɛ obehyira noho do na ɔaabɔ esu? Iyi runntum nnyɛ yie.

5. Dɛ mbrɛ asɛm a ɔwɔ Luke 14:27-33 ma yehu no, ebɛnadze na Jesus sii do dua a obotum aboa hɛn wɔ esuafoyɛ edwuma no mu?

⁵ Mber bi, Jesus dze mfatoho bi kyerɛɛ dza ɔsɛ dɛ obi yɛ ana oeetum abɛyɛ no suanyi. Nna mfatoho no fa nyimpa bi a ɔpɛ dɛ ɔtow abantsentsen nye ɔhen bi a ɔpɛ dɛ ɔkɔ ɔkõ ho. Jesus kãa dɛ, nyia ɔpɛ dɛ ɔtow abantsentsen no, ɔsɛ dɛ ‘odzi kan tsena ase, na obu ho nkontaa’ ama oeetum esi abantsentsen no ewie. Afei, ɔsɛ dɛ ɔhen no so ‘dzi kan tsena ase na ɔfa apam’ ama oeehu dɛ no nsordaafo no botum edzi konyim a. (Kenkan Luke 14:27-33.) Nna Jesus so nyim dɛ, sɛ obi pɛ dɛ ɔbɛyɛ no suanyi a, ɔsɛ  dɛ ɔtsena ase na osusu osuanyi a ɔbɛyɛ no ho yie. Dɛm ntsi, no ho hia dɛ yɛhyɛ hɛn Bible esuafo no nkuran na wɔma yɛnye hɔn sũa adze dapɛn biara. Yebesi dɛn ayɛ dɛm?

6. Sɛ yɛpɛ dɛ yɛyɛ adzesua a otu mpon a, ebɛnadze na bi a yebotum ayɛ?

⁶ Dza ibotum ayɛ dze ahyɛ ase nye yi: Ber a edze yɛ abow ano adzesua no, fa bi ka ho. Aber biara a ebɔkɔ akɛsera nyimpa no, bi a ibotum nye no akan Kyerɛwnsɛm ebien na hom eesusu ho. Afei, sɛ fiewura no gye ber tsentsen a enye no bɔ nkɔmbɔ no to mu a, bisa no dɛ obotum enya beebi a hom bɛtsena atoa nkɔmbɔ no do a. Mbuae a fiewura no dze bɛma wo no bɛma ehu n’ahokekã wɔ Bible adzesua no ho. Mbrɛ ɔbɛyɛ a ibotum aboa osuanyi no ma oeenya nkɔenyim no, ber rokɔ do no, ibotum ebisa no dɛ n’enyi bɛgye ho dɛ hom bosũa adze mpɛn ebien dapɛn biara. Naaso nnyɛ pɛnkor anaa mpɛn ebien a dapɛn biara enye no bosũa adze no nye asɛm no, piinara wɔ hɔ a ɔsɛ dɛ eyɛ ka ho.

7. Bible kyerɛkyerɛfo besi dɛn esiesie noho yie ama Bible adzesua biara a ɔbɛyɛ no?

⁷ Ɔwo a eyɛ Bible kyerɛkyerɛfo no, ɔsɛ dɛ isiesie woho ma Bible adzesua biara. Ibotum edzi kan akenkan dza hom bosũa no na aahwɛ kyerɛwnsɛm a ɔwɔ adzesua no mu no. Nsɛntsitsir a ɔwɔ adzesua no mu no, bɔ mbɔdzen tse ase. Adzesua no n’asɛntsir, nsɛntsir nkakraba, adzesua no mu nsɛmbisa, kyerɛwnsɛm a wɔakyerɛw ho “kenkan,” mfonyin, nye video biara a ɔbɛkyerɛkyerɛ asɛm no mu no, ɔsɛ dɛ edwendwen ho. Afei susu wo suanyi no ho, na dzi kan hwehwɛ kwan tsiabaa a ibotum afa do akyerɛkyerɛ asɛm no mu ama wo suanyi no eetum atse ase yie na ɔdze aayɛ edwuma.​—Neh. 8:8; Mbɛ. 15:28a.

8. Ebɛnadze na ɔsomafo Paul n’asɛm a ɔwɔ Colossaefo 1:9, 10 no kyerɛkyerɛ hɛn fa mpaa a yɛbɔbɔ ama hɛn Bible esuafo no ho?

⁸ Ber a irisiesie woho akɛyɛ adzesua no, bɔ mpaa ma osuanyi no na kã n’ehiadze ho asɛm kyerɛ Jehovah. Kã kyerɛ Jehovah ma ɔmboa wo ama eetum dze Bible no akyerɛkyerɛ wo suanyi no ma wɔaaka n’akoma. (Kenkan Colossaefo 1:9, 10.) Dzi kan dwen biribiara a bi a ɔbɛyɛ dzen ama osuanyi no dɛ ɔbɛtse ase anaa ɔbɛgye ato mu no ho. Ma ɔntsena w’adwen mu dɛ wo botae nye dɛ ebɔboa osuanyi no ma ɔaabɔ esu.

9. Ebɛn kwan do na Bible kyerɛkyerɛfo botum aboa no suanyi ma oeesiesie noho ama adzesua no? Kyerɛkyerɛ mu.

⁹ Yɛwɔ awerɛhyɛmu dɛ ɔnam Bible adzesua a yɛbɛyɛ no daa do no, osuanyi no botum enya  enyisɔ ama dza Jehovah na Jesus ayɛ no, na oeenya ɔpɛ dɛ obosũa pii aka ho. (Matt. 5:3, 6) Sɛ Bible suanyi no botum enya adzesua no do mfaso kɛse a, ɔsɛ dɛ ɔdze n’adwen si dza orusũa no do. Mbrɛ ɔbɛyɛ a ibotum aboa no ma ɔaayɛ dɛm no, kyerɛkyerɛ no ma onhu hia a ohia dɛ osiesie noho ma adzesua biara. Ma ondzi kan nkenkan adzesua no mu nsɛm no, na ɔndwendwen mbrɛ adzesua no si fa noho no ho. Ibesi dɛn aboa no? Enye no mbɔ mu nsiesie homho mma adzesua kor bi na kyerɛ no mbrɛ wosi yɛ no. * Kyerɛkyerɛ no ma onhu mbrɛ obesi ehu asɛmbisa no ho mbuae wɔ akenkan no mu. Nkyii so, kyerɛ no ma onhu dɛ sɛ otwitwa nsɛmfua etsitsir bi ase a, ɔbɔboa no ma ɔaakaa mbuae no. Afei boa no ma ɔmfa nankasa ne nsɛm mma mbuae no. Sɛ ɔyɛ dɛm a, ɔno botum aboa wo ma eehu mbrɛ oesi atse adzesua no ase. Naaso biribi fofor so wɔ hɔ a ibotum ahyɛ wo suanyi no nkuran dɛ ɔnyɛ.

10. Ebɛnadze ntsi na no ho hia dɛ osuanyi no bɛkenkan Bible no da biara? Ebɛnadze na ɔwɔ dɛ ɔyɛ ama oeenya Bible akenkan no do mfaso kɛse?

¹⁰ Sɛ yɛdze adzesua a hom bɛyɛ no dapɛn biara no to nkyɛn a, ndzɛmba ahorow bi a osuanyi no nankasa bɛyɛ no da biara no bɔboa no papaapa. Ɔsɛ dɛ ɔnye Jehovah dzi nkitaho. Ebɛn kwan do? Obotum ayɛ dɛm dze nam Jehovah a obetsie no na ɔnye no aakasa no do. Da biara da Bible akenkan no botum aboa no ama oeetsie Nyankopɔn. (Josh. 1:8; Ndw. 1:1-3) Kyerɛ no mbrɛ obesi dze “Bible Akenkan Ho Nhyehyɛɛ” a ɔwɔ jw.org * do no edzi dwuma. Naaso, sɛ ibotum aboa no ma oeenya Bible akenkan no do mfaso kɛse a, hyɛ no nkuran dɛ ɔndwendwen dza Bible no ma ohu fa Jehovah ho no ho. Afei so, ma onhu kwan a ɔbɛfa do dze dza orusũa no ayɛ edwuma wɔ nankasa n’abrabɔ mu.​—Andw. 17:11; Jas. 1:25.

11. Bible suanyi bi besi dɛn esũa mbrɛ wosi bɔ mpaa yie, na ebɛnadze ntsi na ohia dɛ ɔtaa bɔ Jehovah mpaa?

¹¹ Hyɛ wo suanyi no nkuran ma ɔnye Jehovah nkasa dze nam mpaa a ɔbɔbɔ no da biara da no do. Aber biara a hom bosũa adze no, fi w’akoma mu bɔ mpaa hyɛ adzesua no ase na fa wie. Enye wo suanyi no mbɔ mpaa na kã noho asɛm wɔ mpaabɔ no mu. Sɛ otsie mbrɛ isi bɔ mpaa no a, obohu dɛ ɔsɛ dɛ ofi n’akoma mu bɔ Jehovah Nyankopɔn mpaa na ɔdze fa Jesus Christ ne dzin mu. (Matt. 6:9; John 15:16) Hwɛ mbrɛ Bible a wo suanyi no bɛkenkan no da biara da (Jehovah a obetsie no) nye mpaabɔ (Jehovah a ɔnye no bɛkasa) no besi aboa no ma ɔaatwe abɛn Jehovah kɛse! (Jas. 4:8) Sɛ wo  suanyi no yɛ dɛm da biara a, obotum aboa no ma oeehyira noho do na ɔaabɔ esu. Ebɛnadze bio na ɔbɔboa no?

12. Bible kyerɛkyerɛfo besi dɛn aboa no suanyi ama oeetum nye Jehovah enya ebusuabɔ?

¹² Dza osuanyi bi sũa ber a wɔnye no rusũa Bible no, ɔsɛ dɛ ɔka no nsusui nye n’akoma. Ebɛnadze ntsi a? Hɛn akoma, kyerɛ dɛ, ndzɛmba a yɛpɛ nye mbrɛ yesi tse nka no, kenyan hɛn ma yetu biribi ho anamɔn. Jesus nye nkorɔfo susuu nsɛm ho ma wɔtsee ase. Nnyɛ ɔno nko, nkorɔfo dzii n’ekyir osiandɛ ne nkyerɛkyerɛ no kaa hɔn akoma. (Luke 24:15, 27, 32) Ɔsɛ dɛ wo suanyi no hu dɛ Jehovah yɛ Obi a ɔwɔ hɔ a obotum nye no enya ebusuabɔ, na ohu no dɛ n’Egya, ne Nyankopɔn nye ne Nyɛnko. (Ndw. 25:4, 5) Twe adwen si hɛn Nyankopɔn no su ahorow no do ber a enye no reyɛ Bible adzesua no. (Ex. 34:5, 6; 1 Pet. 5:6, 7) Ɔmmfa ho asɛm a enye no rususu ho no, twe adwen si Onyii a Jehovah yɛ no do. Boa osuanyi no ma ɔnkyerɛ Jehovah no su ahorow a ɔyɛ ahomka no ho enyisɔ. No su no bi nye ɔdɔ, ayamuyie nye ayamuhyehye. Jesus kãa dɛ “mbra no mu asɛm a odzi kan, na ɔsõ” nye dɛ ‘dɔ Jehovah wo Nyankopɔn.’ (Matt. 22:37, 38) Bɔ mbɔdzen dɛ ebɛma wo suanyi no enya Nyankopɔn noho dɔ kɛse wɔ n’akoma mu.

13. Ma nhwɛdo fa kyerɛ mbrɛ yebesi aboa osuanyi bi ma oeehu mbrɛ obesi esũa Jehovah no su ahorow ho adze.

¹³ Sɛ enye osuanyi no robɔ nkɔmbɔ a, ɔyɛ a kã siantsir a edɔ Jehovah no ho asɛm kyerɛ no. Dɛm a ebɛyɛ no bɔboa osuanyi no ma oeehu dɛ ɔsɛ dɛ nankasa so nye Nyankopɔn nya ebusuabɔ a no mu yɛ dzen. (Ndw. 73:28) Dɛ nhwɛdo no, ana asɛmfua bi wɔ nwoma a hom rusũa no mu anaa kyerɛwsɛm bi mu a ɔma yehu Jehovah no dɔ, ne nyansaa, n’atsɛntsenenee anaa no tum a ɔka w’akoma? Sɛ dɛm a, kã ho asɛm kyerɛ wo suanyi no, na ma onhu dɛ siantsir a edɔ hɛn sor Egya no, no mu kor nye no. Naaso, adze fofor bi so wɔ hɔ a no ho hia dɛ Bible suanyi biara yɛ ama oeetum abɔ esu.

14. Ebɛnadze na Hebrewfo 10:24, 25 ma yehu fa asafo nhyiamu ho a obotum aboa Bible suanyi bi ma oeenya nkɔenyim?

¹⁴ Hɛn nyina pɛ dɛ hɛn esuafo yer hɔnho ama woeetum abɔ esu. Kwan tsitsir kor a yebotum afa do aboa hɔn nye dɛ yɛbɛhyɛ hɔn nkuran dɛ wɔnkɔ asafo nhyiamu. Bible akyerɛkyerɛfo a hɔnho akokwaa no kã dɛ esuafo a wɔnnkyɛr na wɔahyɛ ase dɛ wɔrokɔ asafo nhyiamu no, wonya nkɔenyim ntsɛntsɛm. (Ndw. 111:1) Bible akyerɛkyerɛfo binom kã kyerɛ hɔn esuafo no dɛ, sɛ wobotum esũa pii aka dza worusũa no ho a, ohia dɛ wɔkɔ asafo nhyiamu so. Kenkan Hebrewfo  10:24, 25 kyerɛ wo suanyi no, afei kyerɛkyerɛ mfaso a sɛ ɔba asafo nhyiamu a obenya no mu kyerɛ no. Nkyii so, yi video a wɔato dzin Ebɛnadze na Ɔkɔ do wɔ Hɛn Ahendzi Asa Do? * no kyerɛ no. Boa wo suanyi no ma onhu dɛ asafo nhyiamu a ɔbɔkɔ no dapɛn biara no ho hia, na ɔnnsɛ dɛ ɔma nhyiamu no bi pa ne tsir do.

15. Ebɛnadze na yebotum ayɛ dze ahyɛ Bible suanyi bi nkuran ama ɔaakɔ asafo nhyiamu dabaa?

¹⁵ Sɛ wo suanyi no nnhyɛɛ ase dɛ ɔrokɔ asafo nhyiamu anaa ɔnntaa nnkɔ asafo nhyiamu a, ebɛnadze na ibotum ayɛ? Ndzɛmba bi a esũa wɔ asafo nhyiamu ase ndaansa yi ara no, fa enyigye kã ho asɛm kyerɛ no, na ɔno botum ekenyan no kɛse akyɛn dɛ ebɔto nsa afrɛ no dɛ ɔmbra asafo nhyiamu. Ɔweɔn-Aban anaa Asɛnka Nye Asetsena Nhyiamu Dwumadzi Nwoma a yerusũa wɔ asafo nhyiamu ase no, ma no bi. Kyerɛ no dza yebosusu ho wɔ dapɛn a odzi hɔ no mu. Afei, bisa no ɔfã a n’enyi bɛgye ho papaapa wɔ dza yebosusu ho no ho. Da a odzi kan a wo suanyi no bɛba asafo nhyiamu no, dza obohu nye dza ɔbɛtse no bɛma n’enyi agye kɛse. Nkyii so, obohu dɛ iyi yɛ soronko koraa fi dza ɔatse na oehu wɔ ɔsom afofor bi hɔn nhyiamu ase no ho. (1 Cor. 14:24, 25) Wo suanyi no bohu nyimpa afofor a wɔyɛ nhwɛdo pa a obotum esũasua hɔn. Nyimpa a wɔtse dɛm no botum aboa no ma ɔaabɔ esu.

16. Sɛ yebotum ayɛ Bible adzesua ma woeekowie esubɔ mu a, ebɛnadze na ɔsɛ dɛ yɛyɛ? Ebɛnadze na yebosusu ho wɔ adzesua a odzi hɔ no mu?

¹⁶ Yebesi dɛn ayɛ Bible adzesua ma woeekowie esubɔ mu? Yebotum ahyɛ osuanyi biara nkuran ma oeesũa adze dapɛn biara na oeesiesie noho ama adzesua biara a yɛnye no bɛyɛ no. Sɛ yɛyɛ dɛm a yebotum aboa Bible suanyi biara ma ɔaafa dza orusũa no enyibersɛm. Bio so, ɔsɛ dɛ yɛhyɛ no nkuran dɛ ɔnye Jehovah ndzi nkitaho da biara na ɔnye no nnya ebusuabɔ pa. Nkyii so, ɔsɛ dɛ yɛhyɛ no nkuran dɛ ɔnkɔ asafo nhyiamu. (Hwɛ adakaba a wɔato dzin “ Dza Ɔsɛ Dɛ Bible Esuafo Yɛ Ama Woeetum Abɔ Esu” a ɔwɔ krataafa 12 no.) Naaso, ndzɛmba afofor enum bi so wɔ hɔ a Bible akyerɛkyerɛfo nyina botum ayɛ ama hɔn esuafo eetum abɔ esu. Yebosusu dɛm ndzɛmba enum no ho wɔ adzesua a odzi hɔ no mu.