Enuanom a wɔwɔ Bethel no dze bɔbor afe sii WBBR radio stehyɛn a ɔwɔ Staten Island, New York no. Wodzii kan bubuu ndua a nna ɔwɔ asaase no do no. Wowiei no, wosii dan kɛse bi a nna edwumayɛfo no bɛtsena mu. Afei, wosii dan fofor bi so a nna wɔdze mfir a wɔdze bɛyɛ edwuma no bogu mu. Aber a wowiee dɛm ndwuma ahorow yi no, wɔhyɛɛ ase hyehyɛɛ mfir ahorow bi mbrɛ ɔbɛyɛ a radio stehyɛn no bɛhyɛ ase ayɛ edwuma. Naaso wohyiaa ɔhaw ahorow pii a nna ɔsɛ dɛ wodzi ho dwuma.

Nna ɔsɛ dɛ enuanom no dze ndua ebien a no mu biara ne tsentsen yɛ mita 61 (anamɔn 200) sisi hɔ, na wɔdze antenna so a ne tsentsen yɛ mita 91 (anamɔn 300) sɛn dɛm ndua ebien no ntamu. Nna ɔyɛ dzen ma enuanom no dɛ wɔbɛyɛ biribi a ɔtse dɛm. Aber a odzi kan a wɔyɛe no dze, wɔannyɛ yie. Naaso osiandɛ wɔdze hɔnho too Jehovah do ntsi, ewiei koraa no, ɔyɛɛ yie. Onua bi a wɔfrɛ no Calvin Prosser a ɔka ho bi ma wɔyɛɛ dɛm edwuma no kaa dɛ: “Sɛ yɛyɛɛ no aber a odzi kan no ara na ɔyɛɛ yie a, nkyɛ yɛdze botu hɛnho na yɛdze hɛn nsa esi hɛn bo aka dɛ, ‘Hɛnara na yɛyɛe!’” Enuanom no dze dza wotumii yɛe nyinara ho enyimnyam maa Jehovah. Naaso nna hɔn haw no tun nntwae.

Nna afei na radio stehyɛn edwuma no aba fofor. Ntsi nna ɔnnda famu dɛ obi botum enya mfir ahorow dze ayɛ radio stehyɛn edwuma. Ntsi obi nedze dadaw bi na enuanom no kɔtɔe. Afei so, wɔannkɔtɔ akasamu fofor, mbom wɔdze akasamu a ɔhyɛ tɛlefon bi mu na wɔdze yɛɛ edwuma. Da kor anafua bi wɔ February mu no, enuanom no yɛɛ dɛ wɔbɔhwɛ dɛ hɔn mfir no nyinara yɛ edwuma a. Nna ɔsɛ dɛ enuanom no yɛ biribi dze hyɛ hɔn radio stehyɛn edwuma no ase, ntsi wɔtow Ahendzi ndwom.  Onua Ernest Lowe kaa aserewsɛm bi a osii aber a nna wɔrotow ndwom no. Dɛm aber no, nna Ɔtsɛmbuafo Rutherford b wɔ Brooklyn. Nna ofi hɔ rokɔ beebi a radio stehyɛn no wɔ no yɛ bɛyɛ kilomita 25 (akwansin 15).

Aber a Onua Rutherford tsee dɛ wɔrotow Ahendzi ndwom wɔ radio stehyɛn no do no, ɔfrɛɛ hɔn na ɔkaa dɛ: “Hom nngyaa dede no a hom reyɛ no. Hom ndze dɛ ngyinambowa bi a worusu.” Asɛm a ɔkae no maa enuanom no enyi wui, na iyi maa wogyaa ndwom no tow. Naaso ɔno maa wohun dɛ seseiara dze biribiara atotɔ mu, ntsi wobotum ahyɛ ase ayɛ dwumadzi wɔ radio stehyɛn no do.

Wɔyɛɛ dwumadzi a odzi kan no wɔ February 24, 1924 mu. Dɛm aber no, Onua Rutherford hyiraa radio stehyɛn no do na ɔkaa dɛ wɔdze bɛyɛ edwuma a hɔn Hen Christ dze ahyɛ hɔn nsa dɛ wɔnyɛ no. Ɔdze kaa ho dɛ, siantsir a wosii radio stehyɛn no nye dɛ, “wɔdze bɔboa nkorɔfo ma wɔaatse Bible no ase ɔmmfa ho ɔsom a wɔwɔ mu. Afei so, wɔdze bɔboa hɔn ma woeehu dza Bible no ka fa mber a yɛtse mu yi ho.”

Dwumadzi a odzi kan a wɔyɛe no kɔr yie paa. Ahyehyɛdze no dze WBBR bɔɔ Ahendzi ho asɛmpa no ho dawur mfe 33.

July 1924 mu no, Bible Esuafo no yɛɛ ehyiadzi bi wɔ Columbus, Ohio. Bible Esuafo a wofifi wiadze nyina baa bi na wɔmaa ɔkasa ahorow no wɔ Arabic, Borɔfo, French, German, Greek, Hungary, Italy, Lithuania, Polish, Russia, Scandinavia kasa ahorow mu, na Ukraine kasa mu. Nkorɔfo tsiee ɔkasa ahorow no bi wɔ radio do. Afei so dza nna ɔkɔ do da biara wɔ ehyiadzi no ase no, enuanom no maa dawurbɔ krataa bi a wɔfrɛ no Ohio State Journal no dze ho amandzɛɛbɔ too gua.

Yawda, July 24 no, enuanom bɔbor 5,000 a wɔkɔr ehyiadzi no bi no kɛkaa asɛmpa no wɔ kurow a nna wɔreyɛ ehyiadzi wɔ mu no mu. Wɔdze nwoma bɛyɛ 30,000 maa nkorɔfo, na wɔhyɛɛ Bible adzesua mpempem pii ase. Ɔweɔn-Aban bi kaa da a wɔkɔr asɛnka no ho asɛm dɛ, ɔyɛ “ehyiadzi no ne fa a enuanom enyi gyee paa.”

Fida, July 25 no, biribi tsitsir bi so kɔr do wɔ ehyiadzi no ase. Onua Rutherford dze akokodur kenkaan krataa bi dze bɔɔ asɔfo no hɔn ekyir. Asɛm a ɔkae nye dɛ, Nyankopɔn n’Ahendzi a ɔnam  do behyira adasamba ma woeenya daa nkwa no, amanyɛfo, nyamesom mu mpanyimfo, nye eguadzi mu mpanyimfo mmpɛ dɛ nkorɔfo tse ho asɛm. Ɔsanee so kaa dɛ, dɛm mpanyimfo no agye Amanaman Apam no ato mu na wɔse ɔno nye “kwan a Nyankopɔn refa do edzi tum wɔ asaase yi do.” Nna obehia dɛ Bible Esuafo no nya akokodur ana woetum aka dɛm asɛm yi akyerɛ nkorɔfo.

Ɔweɔn-Aban no kaa mbrɛ ehyiadzi no boaa enuanom no ho asɛm dɛ: “Ewuradze n’asogyafo kakraabi a wobehyiaa mu wɔ ehyiadzi a wɔyɛe wɔ Columbus n’ase no, aber a worifi hɔ akɔ hɔn efie no, nna hɔn gyedzi ayɛ dzen. Afei dze, nna woenya akokodur a wɔdze begyina ɔsoɛrtsia biara a hɔn atamfo dze bɛba hɔn do no ano.” Onua Leo Claus a ɔkɔr dɛm ehyiadzi no bi no kaa dɛ: “Aber a yerifi ehyiadzi no ase no, nna hɛnho per hɛn dɛ yɛbɔkɔ akɛka asɛm a Onua Rutherford kae no akyerɛ nkorɔfo wɔ hɛn asaasesin mu.”

Wɔdze nsɛm a Onua Rutherford kae wɔ ehyiadzi no ase no yɛɛ krataaba bi, na wɔtoo no dzin Ecclesiastics Indicted. October mu no, enuanom hyɛɛ ase kyekyɛɛ dɛm krataaba no. Kurow kakraba bi a wɔfrɛ no Cleveland a ɔwɔ Oklahoma mu no, Onua Frank Johnson kyekyɛɛ krataaba no bi wɔ n’asaasesin mu. Owiei no, nna ɔsɛ dɛ ɔtweɔn minitsi 20 ansaana enuanom bi abɛfa no. Naaso nna orunntum nntweɔn wɔ beebi a nkorɔfo bohu no. Siantsir nye dɛ, nna asɛnka edwuma a ɔreyɛ no ahyɛ mbarimba a wɔwɔ kurow no mu hɔ no ebufuw, ntsi nna wɔrohwehwɛ no akyer no. Dɛm ntsi Onua Johnson kosumaa asɔrdan bi mu. Aber a ohun dɛ obiara nnyi hɔ no, ɔdze Ecclesiastics Indicted krataaba no bi hyɛɛ sɔfo no ne Bible mu na ɔdze bi so totoo egua biara do. Owiei ara na opuei fii hɔ ntsɛmara. Naaso nna enuanom a wɔrebɛfa no no mbae, ntsi nna ɔda ho ara wɔ mber kakra. Ntsi ɔkɔr asɔrdan ebien bi so mu na ɔdze krataaba no bi kɔtotoo hɔ.

Afei, ɔyɛɛ ntsɛm kɔr beebi a enuanom no bɛba abɛfa no no. Okosumaa petrol stehyɛn bi n’ekyir, na ɔhwɛɛ mbarimba a nna wɔrepɛ no akyer no no. Wobotwaa mu faa beebi a nna oekosuma no, naaso woennhu no. Mbarimba no botwaa mu kɔree ara pɛr na enuanom a nna wɔnye Frank reyɛ asɛnka edwuma wɔ hɔ no dze kaar bɛfaa no kɔree.

Onua kor kaa dɛ: “Aber a nna yerifi kurow no mu akɔ no, yɛkɛfaa beebi a nna asɔrdan ebiasa no wɔ no. Nna nkorɔfo bɛyɛ 50 gyinagyina asɔrdan no mu biara enyim. Nna hɔn mu binom rekenkan krataaba no, na binom so dze krataaba no rekyerɛ hɔn sɔfo. Mese sɛ yemmfi hɔ ntsɛm a nkyɛ asɛm too hɛn. Yɛdaa hɛn Nyankopɔn Jehovah ase dɛ ɔbɔɔ hɛnho ban na ɔmaa hɛn nyansa ma yɛdze yɛɛ asɛnka edwuma no a hɛn atamfo no annkyer hɛn.”

Bible Esuafo a nna wɔwɔ aman afofor do no so dze akokodur kaa asɛmpa no. France n’etsifi afamu no, Onua Józef Krett kaa asɛmpa no kyerɛɛ nkorɔfo bi a wofi Poland. Nna wotu coal a wɔdze yɛ coal tar no. Nna onua no rebɛma ɔkasa bi a n’asɛntsir nye “Ɔrennkyɛr Wobenyan Ewufo.” Aber a enuanom dze nsato krataa maa kurow no mufo no dɛ wombetsie ɔkasa no bi no, sɔfo bi bɔɔ n’asɔrmba kɔkɔ dɛ mma wonnketsie. Naaso dza ɔyɛe no ennkesi hwee. Nkorɔfo bɔbor 5,000 ketsie ɔkasa no bi, na sɔfo no mpo ketsie bi! Onua Krett kaa kyerɛɛ sɔfo no dɛ ɔmbra mbɛkyerɛkyerɛ ne gyedzi mu nkyerɛ etsiefo no, naaso ɔannyɛ. Onua Krett hun dɛ nkorɔfo a nna woritsie ne kasa no, nna Nyankopɔn n’Asɛm ho nsukɔm dze hɔn. Ntsi ɔdze nwoma na nwomaba a nna ɔwɔ noho no nyinara maa hɔn.—Amos 8:11.

Onua Claude Brown dze asɛmpa no kɔr Africa man bi a nna wɔfrɛ no Gold Coast mu. Ndɛ, wɔfrɛ dɛm ɔman no Ghana. Ɔkasa ahorow a Onua Brown mae, nye nwoma na nwomaba ahorow a ɔkyekyɛe no maa nokwar no tserɛw ntsɛntsɛm wɔ ɔman no  mu. John Blankson a nna orusua ndur ho adze no ketsie Onua Brown ne kasa no mu kor. Ntsɛmara na ɔgyee too mu dɛ oehu nokwar no. John kaa dɛ: “M’enyi gyee paa dɛ muhun nokwar no, ntsi mekaa ho asɛm kyerɛɛ nkorɔfo a nna wɔwɔ mo skuul no.”

Nna John ebohu wɔ Bible no mu dɛ Nyankopɔn nnyɛ Baasakor. Ntsi da kor bi ɔkɔr Anglican asɔrdan bi mu, na okebisaa sɔfo no nsɛm bi a ɔfa Baasakor nkyerɛkyerɛ ho. Naaso sɔfo no kekaa mu guu no do na ɔkaa kyerɛɛ no dɛ: “Ennyɛ Christiannyi mbom eyɛ Abɔnsam ne ba. Fi ha kɔ!”

Aber a John dur fie no, ɔkyerɛɛw krataa kɛmaa sɔfo no, na ɔkaa kyerɛɛ no dɛ ɔmma wɔmbɔ ngua na ɔnkyerɛkyerɛ Baasakor nkyerɛkyerɛ no mu. Dza sɔfo no so kaa kyerɛɛ John nye dɛ onkohu kyerɛkyerɛnyi panyin a ɔwɔ no skuul hɔ no. Ɔkɔree no, kyerɛkyerɛnyi panyin no bisaa no dɛ, ɔyɛ ampa dɛ ɔno na ɔkyerɛɛw krataa kɛmaa sɔfo no a.

John kaa dɛ: “Nyew, mara na mekyerɛwee.”

Kyerɛkyerɛnyi no kaa kyerɛɛ John dɛ ɔnkyerɛw krataa nkɛpa sɔfo no kyɛw. Ntsi John kyerɛwee dɛ:

“Owura, me kyerɛkyerɛnyi no se menkyerɛw krataa mbɛpa wo kyɛw. Naaso sɛ mebɛkyerɛw dɛm krataa no a, gyedɛ egye to mu dɛ ekyerɛkyerɛ atorsɛm.”

Krataa no mu nsɛm no yɛɛ kyerɛkyerɛnyi no nwanwa, ntsi obisaa John dɛ: “Blankson, ntsi dɛm asɛm yi na epɛ dɛ ekyerɛw a?”

“Nyew, Kyerɛkyerɛnyi. Dɛm asɛm yi ara na mubotum akyerɛw.”

“Wobeyi wo edzi. Osiandɛ irunntum nnkɔ do ara nntsena skuul ha na ennkasa nntsia sɔfo a aban no agye no ato mu no.”

“Kyerɛkyerɛnyi, . . . nkyɛ sɛ ekyerɛ hɛn adze na yɛnntse ase a yetum bisa wo nsɛm bi a, anaa?”

“Nyew, ɔyɛ a hom bisa.”

“Ntsi kyerɛkyerɛnyi, dza meyɛe ara nye no. Nna owura no rekyerɛkyerɛ hɛn Bible no mu, nna mibisaa no asɛm. Ntsi sɛ oenntum ennyi m’asɛmbisa no ano a, ebɛnadze ntsi na ɔsɛ dɛ mekyerɛw krataa kɛpa no kyɛw?”

Woennyi Blankson edzi na ɔannkyerɛw krataa biara so annkɛpa sɔfo no kyɛw.

Ɔweɔn-Aban no reka dza ɔkɔr do wɔ dɛm afe no mu no ho asɛm no, ɔkaa dɛ: “Ɔhen David kaa asɛm bi na yɛnye no yɛ adwen. Ɔkaa dɛ: ‘Ɔwo na edze ahoɔdzen abɔ me do ama akodzi no.’ (Ndwom 18:39) Yeenya nkuranhyɛ paa wɔ dɛm afe yi mu, osiandɛ yeehu Ewuradze ne nsa wɔ edwuma no mu . . . N’asomfo a wodzi no nokwar no . . . dze enyigye reka asɛmpa no.”

Aber a nna afe no rokɔ n’ewiei no, enuanom no yɛɛ dɛ wobenya radio stehyɛn fofor aka dza nna wɔwɔ no ho. Ntsi wosii radio stehyɛn fofor wɔ beebi a ɔbɛn Chicago. Wɔtoo dɛm radio stehyɛn fofor yi dzin ASƐM. Mfir a nna wɔdze dzi dwuma wɔ dɛm radio stehyɛn fofor yi mu no dze, nna ɔyɛ kama paa. Ntsi nna hɔn a wɔwɔ ekyirekyir tse dɛ Canada n’etsifi afamu no mpo botum atse Ahendzi ho asɛmpa no bi.

Afe 1925 mu no, Jehovah boaa Bible Esuafo no ma wɔtsee asɛm a ɔwɔ Nyikyerɛ tsir 12 no ase yie. Osian dɛm nkyerɛkyerɛmu fofor yi ntsi, binom gyaa Jehovah som. Naaso binom so enyi gyee, osiandɛ ɔmaa wɔtsee nsɛm bi a osisii wɔ sor no ase yie. Afei so ɔmaa wohun mbrɛ dɛm nsɛm no kaa Nyankopɔn n’asomfo wɔ asaase yi do.