ADZESUA ASƐM 42
NDWOM 103 Ahwɛfo—Wɔyɛ Akyɛdze
Kyerɛ Dɛ W’enyi Sɔ ‘Akyɛdze A Wɔdze Ama Nyimpa’ No
‘Ɔfowee kɔr sor no, ɔmaa nyimpa akyɛdze.’—EPH. 4:8.
DZA YEBOSUA
Yɛbɔhwɛ mbrɛ asafo mu asomfo, asafo mu mpanyimfo, nye amansin do ahwɛfo si boa hɛn. Afei so, yɛbɔhwɛ dza yebotum ayɛ dze akyerɛ dɛ hɛn enyi sɔ dza dɛm mbarimba anokwafo yi yɛ ma hɛn no.
1. Ndzɛmba a Jesus dze akyɛ hɛn no, bi nye dza ɔwɔ hen?
NYIMPA biara nnyi hɔ a ne yamu ye kyɛn Jesus. Aber a Jesus wɔ asaase yi do no, ofii n’akoma mu dze tum a ɔwɔ no yɛɛ anwanwadze dze boaa afofor. (Luke 9:12-17) Akyɛdze a ɔkyɛn biara a ɔdze maa hɛn nye no nkwa a ɔdze too hɔ maa hɛn no. (John 15:13) Ofitsi aber a wonyaan Jesus no, ɔakɔ do ara ada ayamuyie edzi akyerɛ nyimpa. Jesus hyɛɛ bɔ dɛ, ɔbɛserɛ Jehovah ma ɔdze no sunsum krɔnkrɔn no ama hɛn mbrɛ ɔbɛyɛ a sunsum krɔnkrɔn no bɛkyerɛkyerɛ hɛn na wɔaakyekye hɛn werɛ. Na dɛm pɛpɛɛpɛ so na ɔayɛ. (John 14:16, 17; 16:13) Afei so, sɛ yɛkɔ asafo nhyiamu a, Jesus tsetse hɛn ma yetum ka asɛmpa no kyerɛ nyimpa a wɔwɔ wiadze nyina na yɛboa hɔn ma wɔbɛyɛ n’esuafo.—Matt. 28:18-20.
2. ‘Akyɛdze a wɔdze ama nyimpa’ a Ephesusfo 4:7, 8 ka hɔn ho asɛm no, hɔn mu bi nye woananom?
2 Hom mma yɛnhwɛ adze fofor bi so a Jesus dze akyɛ hɛn. Ɔsomafo Paul kaa dɛ, aber a Jesus fowee kɔr sor no, “ɔmaa nyimpa akyɛdze.” (Kenkan Ephesusfo 4:7, 8.) Paul kyerɛkyerɛɛ mu dɛ, Jesus dze dɛm akyɛdze yi mae dɛ wɔmboa asafo no wɔ akwan ahorow pii do. (Eph. 1:22, 23; 4:11-13) Ndɛ, dɛm ‘akyɛdze a wɔdze ama nyimpa’ yi mu bi nye asafo mu asomfo, asafo mu mpanyimfo, nye amansin do ahwɛfo. a Ɔyɛ nokwar, bɔn wɔ dɛm mbarimba yi ho, ntsi ɔtɔ da a wodzi mfom. (Jas. 3:2) Naaso hɛn Ewuradze Jesus Christ nam hɔn do boa hɛn. Ntsi wɔyɛ akyɛdze a ɔdze ama hɛn.
3. Hɛn mu biara besi dɛn aboa edwuma a ‘akyɛdze a wɔdze ama nyimpa’ yɛ no? Fa mfatoho kyerɛkyerɛ mu.
3 Jesus dze ahyɛ ‘akyɛdze a ɔdze ama nyimpa’ yi nsa dɛ wɔnhyɛ asafo no dzen. (Eph. 4:12) Naaso hɛn nyina botum ayɛ biribi dze aboa hɔn ma woeetum ayɛ edwuma a no ho hia a wɔdze ahyɛ hɔn nsa yi. Dɛ mfatoho no: Sɛ worisi Ahendzi Asa bi a, hɛn mu binom ka ho bi ma wosi. Naaso enuanom afofor so yɛ edziban, kaar ho nhyehyɛɛ, nye ndzɛmba afofor dze boa edwuma no. Dɛmara na hɛn nyina so, yebotum aka nsɛm bi anaa yaayɛ biribi dze aboa asafo mu asomfo, asafo mu mpanyimfo nye amansin do ahwɛfo. Hom mma yɛnhwɛ mbrɛ yesi nya edwumadzen a wɔyɛ no do mfaso, nye dza yebotum ayɛ dze akyerɛ ho enyisɔ. Afei so, Jesus a ɔdze dɛm mbarimba yi akyɛ hɛn no, yɛbɔhwɛ mbrɛ yebesi akyerɛ dza ɔayɛ ama hɛn no ho enyisɔ.
ASAFO MU ASOMFO YƐ NDZƐMBA AHOROW BI DZE ‘BOA’ HƐN
4. Ndzɛmba a asafo mu asomfo yɛe dze boaa nkorɔfo wɔ asomafo no aber do no, bi nye dɛn?
4 Asomafo no aber do no, woyii enuanom mbarimba bi dɛ wɔnsom dɛ asafo mu asomfo. (1 Tim. 3:8) Ɔbɛyɛ dɛ dɛm asafo mu asomfo yi na Paul kaa hɔn ho asɛm dɛ wɔyɛ ndzɛmba bi dze ‘boa’ nkorɔfo no. (1 Cor. 12:28) Obotum aba dɛ, asafo mu asomfo yɛɛ ndwuma ahorow bi a no ho hia mbrɛ ɔbɛyɛ a asafo mu mpanyimfo benya ber dze akyerɛkyerɛ Nyankopɔn no nguan no na wɔaahwɛ hɔn yie. Dɛ mfatoho no, bi a asafo mu asomfo hwɛɛ Kyerɛwnsɛm a nna ɔwɔ hɔ no do kyerɛɛw bi, anaa wɔtotɔɔ ndzɛmba a ɔbɔboa hɔn ma woeetum ayɛ dɛm.
5. Ndɛ, ebɛn ndwuma ahorow na asafo mu asomfo yɛ dze boa enuanom?
5 Ɔwodze hwɛ ndzɛmba ahorow bi a asafo mu asomfo yɛ dze boa enuanom wɔ asafo no mu. (1 Pet. 4:10) Wotum ma wɔhwɛ asafo a wɔwɔ mu no ne sikasɛm anaa asaasesin a wɔyɛ mu edwuma no do. Afei so, wotum dze hyɛ hɔn nsa dɛ wɔnkra asafo nwoma mma enuanom, wɔnhwɛ mfir a wɔdze bɔ ndwom na wɔdze yi video no do, wɔnyɛ attendant, anaa wɔmboa ma wonsiesie Ahendzi Asa do. Dɛm ndwuma ahorow yi ho hia ama biribiara aakɔ do kamakama wɔ asafo no mu. (1 Cor. 14:40) Yɛdze dɛm ndwuma yi to nkyɛn a, asafo mu asomfo binom yɛ dwumadzi ahorow wɔ Asɛnka Nye Asetsena Nhyiamu no ase, na wɔma bagua mu ɔkasa so. Wotum so ma asafo mu somfo bi boa asɛnka kuw do hwɛfo bi. Ɔtɔ da so a, wɔma asafo mu asomfo a wɔfata ka asafo mu mpanyimfo ho ma wɔkɛserasera enuanom hyɛ hɔn nkuran.
6. Siantsir a hɛn enyi sɔ edwumadzen a asafo mu asomfo yɛ no, no mu bi nye dɛn?
6 Ndwuma ahorow a asafo mu asomfo yɛ no si dɛn boa asafo no? Akyerɛbaa bi a wɔfrɛ no Beberly b a ɔwɔ Bolivia no kaa dɛ: “Meda asafo mu asomfo ase paa, osiandɛ wɔma sɛ mokɔ asafo nhyiamu a m’enyi gye paa. Osian ndwuma ahorow a wɔyɛ wɔ asafo no mu ntsi, mutum tow ndwom, mema mbuae, mitsie ɔkasa ahorow, na mutum so nya video na mfonyin ahorow a yɛhwɛ no do mfaso. Afei so, wɔbɔ hɛn ho ban aber a yɛwɔ asafo nhyiamu ase no, na wɔyɛ ntotoe biara so a ohia ama enuanom a wɔwɔ video kɔnferɛns do no so etum enya asafo nhyiamu no do mfaso. Sɛ yɛpon asafo nhyiamu a, wodzi enyim ma yesiesie Ahendzi Asa no do, wɔhwɛ asafo no ne sikasɛm do, na wɔhwɛ ma hɛn nsa ka asafo nwoma a yehia. Asafo mu asomfo dze, sɛ yeennya hɔn a, nkyɛ ɔnnyɛ!” Leslie so yɛ akyerɛbaa bi a ɔtse Colombia, na no kun yɛ asafo mu panyin. Asɛm a ɔkae nye dɛ: “Asafo mu asomfo boa mo kun ma otum yɛ dwumadzi ahorow a ɔhyehyɛ ne nsa no. Sɛ ɔnnyɛ asafo mu asomfo a, nkyɛ mo kun nnyi adagyer koraa wɔ n’abrabɔ mu. Ntsi m’enyi sɔ paa dɛ wofi hɔn pɛ mu dze nsi nye ahokeka yɛ dza wɔdze ahyɛ hɔn nsa no.” Yɛgye dzi paa dɛ, woara so w’enyi sɔ edwumadzen a asafo mu asomfo yɛ no.—1 Tim. 3:13.
7. Ebɛnadze na yebotum ayɛ dze akyerɛ dɛ hɛn enyi sɔ dza asafo mu asomfo yɛ no? (Hwɛ mfonyin no so.)
7 Ɔwɔ mu dɛ hɛn enyi sɔ dza asafo mu asomfo yɛ no dze, naaso Bible no hyɛ hɛn nkuran dɛ, yɛnyɛ nyimpa a yɛkyerɛ ndzɛmba ho enyisɔ. (Col. 3:15) Asafo mu panyin bi a wɔfrɛ no Krzysztof a ɔwɔ Finland no yɛ biribi dze kyerɛ dɛ n’enyi sɔ dza asafo mu asomfo yɛ no. Ɔkaa dɛ: “Mekyerɛw nsɛm bi gu kaad do anaa mesɛnd tɛst mɛsegye kɛma asafo mu somfo bi. Ɔyɛ a medze kyerɛwsɛm bi ka ho, na mema ohu kwan pɔtsee bi a ɔafa do ahyɛ me nkuran anaa siantsir a m’enyi sɔ dza ɔyɛ no.” Pascal na Jael yɛ awarfo a wɔtse New Caledonia. Hɔn dze, wɔtaa bɔ mpaa ma asafo mu asomfo. Pascal kaa dɛ: “Ndaansa yi dze, sɛ yɛrobɔ mpaa a, yɛda Jehovah ase dɛ ɔdze dɛm enuanom yi ama hɛn ma wɔrosom hɛn, na yɛserɛ no dɛ ɔnka hɔn ho na ɔmboa hɔn.” Jehovah tsie mpaabɔ a ɔtsetse dɛm, na asafo mu no nyina so nya do mfaso.—2 Cor. 1:11.
ASAFO MU MPANYIMFO ‘YƐ EDWUMADZEN WƆ HƐN MU’
8. Asafo mu mpanyimfo a nna wɔwɔ asomafo no aber do no, ebɛnadze ntsi na Paul kaa dɛ ‘wɔyɛ edwumadzen’ no? (1 Thessalonicafo 5:12, 13)
8 Asafo mu mpanyimfo a nna wɔwɔ asomafo no aber do no yɛɛ edwumadzen wɔ asafo no mu. (Kenkan 1 Thessalonicafo 5:12, 13; 1 Tim. 5:17) Nna ‘wodzi asafo no enyim,’ kyerɛ dɛ, wodzi enyim ma wɔyɛ asafo nhyiamu, na wosisi gyinae ahorow so a ɔbɔboa asafo no. Afei so, nna “wɔkasa kyerɛ” enuanom mbarimba na mbaa a wɔwɔ asafo no mu no. Nna wɔdɔ enuanom no, ntsi wɔmaa hɔn akwankyerɛ ahorow dze bɔɔ hɔn ho ban. (1 Thess. 2:11, 12; 2 Tim. 4:2) Ber kor no ara so, nna dɛm mbarimba yi san yɛ edwumadzen dze hwɛ hɔn mbusua, na nna wɔyɛ ndzɛmba so a ɔboa hɔn ma wɔnye Jehovah ntamu anyɛnkofa no mu yɛ dzen.—1 Tim. 3:2, 4; Titus 1:6-9.
9. Dwuma ahorow a asafo mu mpanyimfo dzi no ndɛ no, bi nye dɛn?
9 Ndɛ, asafo mu mpanyimfo nnyi adagyer koraa. Wɔyɛ asɛmpakafo. (2 Tim. 4:5) Wɔdze nsi na ahokeka dzi asɛnka edwuma no enyim, wɔyɛ nhyehyɛɛ ma yetum ka asɛmpa no wɔ hɛn asaasesin mu, na wɔtsetse hɛn ma yetum yɛ asɛnka na ɔkyerɛkyerɛ edwuma no yie. Afei so, wɔsom dɛ atsɛmbuafo. Na mbrɛ ɔtse nye dɛ, wɔnnyɛ atsɛmbuafo a wɔyɛ enyimhwɛ, mbom wɔda ehumbɔbɔr edzi. Sɛ Christiannyi bi yɛ bɔn kɛse a, asafo mu mpanyimfo yɛ dza wobotum biara boa no ma osiesie ɔnye Jehovah ntamu ma ɔsan yɛ kama. Ber kor no ara so, wɔhwɛ dɛ wɔbɛma asafo no ho atsew. (1 Cor. 5:12, 13; Gal. 6:1) Edwuma tsitsir a asafo mu mpanyimfo yɛ nye dɛ wɔhwɛ Nyankopɔn no nguan. (1 Pet. 5:1-3) Wɔgye ber siesie hɔnho ma ɔkasa ahorow a ogyina Bible do, wɔbɔ mbɔdzen dɛ wobohu obiara a ɔwɔ asafo no mu no yie, na wɔserasera hɔn hyɛ hɔn nkuran. Asafo mu mpanyimfo binom so boa ma wosisi Ahendzi Asa ahorow na wɔboa ma wosiesie bi so. Binom so boa ma wɔyɛ ehyiadzi ahorow ho ntotoe. Hɔn mu binom so ka Ayarsabea Ntamu Nkitahodzi Egyinatukuw no nye Ayarfo Nserahwɛ Kuw no ho. Iyinom nyina da nkyɛn a, wɔsan yɛ ndwuma afofor so. Hom mma yɛnka na asafo mu mpanyimfo yɛ edwumadzen dze boa hɛn paa!
10. Siantsir a hɛn enyi sɔ edwumadzen a asafo mu mpanyimfo yɛ no, bi nye dɛn?
10 Jehovah kae too hɔ dɛ, ɔbɛma hɛn ahwɛfo a wɔbɔhwɛ hɛn do yie, na sɛ ɔba no dɛm a, ‘yerunnsuro bio, na yɛrommbɔ hu.’ (Jer. 23:4) Johanna yɛ hɛn akyerɛbaa bi a ɔwɔ Finland. Aber a yarba bi a no mu yɛ dzen bɔɔ ne maame no, ohun dɛ dɛm asɛm yi yɛ nokwar. Ɔkaa dɛ: “Ɔwɔ mu dɛ ɔyɛ dzen ma me dɛ mebɛma nkorɔfo ehu mbrɛ misi tse nka dze, naaso asafo mu panyin bi a nna minnyim no yie nyaa mo ho abotar. Ɔnye me bɔɔ mpaa, na ɔmaa muhun dɛ Jehovah dɔ me paa. Sɛ mese mekaa nsɛm pɔtsee a ɔkae a, nna moboa. Naaso dza ɔyɛe no maa m’akoma tɔɔ me yamu paa. Megye dzi paa dɛ Jehovah na ɔsomaa no dɛ ɔmbɔboa me, na ɔbae wɔ ber a ɔsɛ mu so.” Ebɛnadze na w’asafo mu mpanyimfo ayɛ dze aboa wo?
11. Yebesi dɛn akyerɛ dɛ hɛn enyi sɔ edwumadzen a asafo mu mpanyimfo yɛ no? (Hwɛ mfonyin no so.)
11 Jehovah pɛ dɛ yɛkyerɛ dɛ hɛn enyi sɔ asafo mu mpanyimfo “osian hɔn edwuma no ntsi.” (1 Thess. 5:12, 13) Akyerɛbaa bi a wɔfrɛ no Henrietta a noara so wɔ Finland no kaa dɛ: “Asafo mu mpanyimfo fi hɔn pɛ mu boa nkorɔfo. Naaso iyi nnkyerɛ dɛ wonnyi biribiara yɛ, wɔyɛ edwuma a wɔmmberɛ, anaadɛ wonnyi ɔhaw biara wɔ hɔn asetsena mu. Ɔtɔ da a, mutum ka kyerɛ asafo mu panyin bi dɛ: ‘Inyim biribi a? Mepɛ dɛ ihu dɛ ebɔ wo ho mbɔdzen paa.’” Akyerɛbaa bi a wɔfrɛ no Sera a ɔwɔ Türkiye c no kaa dɛ: “Asafo mu mpanyimfo hia nkuranhyɛ ama woeetum akɔ do ayɛ dwumadzi ahorow a ɔhyehyɛ hɔn nsa no. Yebotum akyerɛw nsɛm bi egu kaad do akɛma hɔn, anaa yaato nsa afrɛ hɔn na yɛnye hɔn aabɔ mu edzidzi. Yebotum so nye hɔn abɔ mu akɔ asɛnka.” Inyim asafo mu panyin bi a ɔrobɔ noho mbɔdzen wɔ w’asafo no mu anaa? Sɛ dɛm a, nna ɔno yɛ biribi ma onhu dɛ w’enyi sɔ dza ɔreyɛ no paa.—1 Cor. 16:18.
Yebotum ayɛ ndzɛmba ahorow bi dze ahyɛ asafo mu asomfo, asafo mu mpanyimfo nye amansin do ahwɛfo nkuran ama woeetum akɔ do ayɛ edwuma a ɔhyehyɛ hɔn nsa no (Hwɛ nkyekyɛmu 7, 11, 15)
AMANSIN DO AHWƐFO HYƐ HƐN DZEN
12. Asomafo no aber do no, nna ebɛn nhyehyɛɛ na ɔwɔ hɔ a wɔdze hyɛ asafo ahorow no dzen? (1 Thessalonicafo 2:7, 8)
12 Christ Jesus dze hyɛɛ mbarimba binom so nsa dɛ wɔmboa asafo no wɔ kwan fofor do. Jesus maa asafo mu mpanyimfo a nna wɔwɔ Jerusalem no somaa Paul, Barnabas, nye enuanom afofor dɛ wɔnserasera asafo ahorow no dɛ ahwɛfo akwantufo. (Andw. 11:22) Ebɛnadze ntsi a? Nna asafo mu asomfo nye asafo mu mpanyimfo hyɛ asafo ahorow no dzen. Nna dɛm edwuma yi ara so na ahwɛfo akwantufo no bɛyɛ. (Andw. 15:40, 41) Dɛm mbarimba yi dze ndzɛmba pii bɔɔ afɔr. Nna ɔtɔ da mpo a wɔdze hɔn nkwa to esian mu mbrɛ ɔbɛyɛ a wɔbɛkyerɛkyerɛ afofor na wɔaahyɛ hɔn nkuran.—Kenkan 1 Thessalonicafo 2:7, 8.
13. Dwuma ahorow a amansin do ahwɛfo dzi no, no mu bi nye dɛn?
13 Amansin do ahwɛfo nntsena fakor. Hɔn mu binom twa kwan tsentsenntsen ansaana woetum akɛsera asafo ahorow no. Dapɛn biara amansin do ahwɛfo ma ɔkasa ahorow, wɔkɛserasera enuanom no hyɛ hɔn nkuran, wɔnye akwampaafo yɛ nhyiamu, wɔnye asafo mu mpanyimfo so yɛ nhyiamu, na wɔyɛ asɛnka nhyiamu so. Afei so, wosua ɔkasa ahorow a wɔbɛma no yie, na wɔyɛ ɔmansin na ɔmantɔw ehyiadzi ahorow so ho ntotoe. Bio so, wɔkyerɛ adze wɔ akwampaafo skuul, na wɔyɛ nhyiamu tsitsir bi ma akwampaafo a wɔwɔ hɔn mansin no mu no. Bethel dze dwumadzi ahorow bi so hyehyɛ hɔn nsa, na ɔtɔ da a ɔsɛ dɛ wodzi bi ho dwuma ntsɛm.
14. Siantsir a hɛn enyi sɔ edwumadzen a amansin do ahwɛfo yɛ no, bi nye dɛn?
14 Edwuma a amansin do ahwɛfo yɛ no, ebɛn mfaso na enuanom no nya wɔ do? Aber a onua bi a ɔwɔ Türkiye no reka amansin do ahwɛfo hɔn nserahwɛ ho asɛm no, ɔkaa dɛ: “Aber biara a wɔbɛba abɛsera hɛn no, wokenyan me ma medze me mber pii boa enuanom. Amansin do ahwɛfo a minyim hɔn no dze, beberee kwa. Naaso, hɔn mu kor mpo nnyi hɔ a ɔmaa metsee nka dɛ onnyi adagyer anaa murunntum mmbɛn no.” Johanna a yeedzi kan aka no ho asɛm no nye ɔmansin do hwɛfo bi kɔr asɛnka, naaso wɔannkɔto obiara wɔ fie. Ɔkaa dɛ: “Mo werɛ rimmfir dɛm da no da. Nna mo nuanom mbasiafo beenu no etu akɛtsena beebi fofor, ntsi nna mafe hɔn paa. Naaso ɔmansin do hwɛfo no hyɛɛ me nkuran na ɔboaa me ma mubohun dɛ, seseiara dze bi a osian beebi a hɛn ebusuafo nye hɛn anyɛnkofo tse ntsi, yɛrenntaa nnhu hɔn. Naaso sɛ yɛkɔ wiadze fofor no mu a, yebenya mber pii nye hɔn abɔ.” Hɛn mu pii wɔ hɔ a, dza amansin do ahwɛfo binom yɛe dze boaa hɛn no maa hɛn enyi gyee, ntsi wɔama yɛpɛ hɔn asɛm.—Andw. 20:37–21:1.
15. (a) Dɛ mbrɛ 3 John 5-8 ma yehu no, yebesi dɛn akyerɛ dɛ hɛn enyi sɔ dza amansin do ahwɛfo yɛ no? (Hwɛ mfonyin no so.) (b) Enuanom a wɔreyɛ edwumadzen wɔ asafo no mu no, ebɛnadze ntsi na ɔsɛ dɛ yɛkyerɛ dza hɔn yernom yɛ no ho enyisɔ, na yebesi dɛn ayɛ dɛm? (Hwɛ adakaba a wɔato dzin “ Kaa Hɔn Yernom” no.)
15 Ɔsomafo John kaa kyerɛɛ Gaius dɛ, enuanom mbarimba a wɔserasera asafo ahorow hyɛ hɔn dzen no, ɔnsom hɔn ahɔho na ‘ongya hɔn kwan dɛ mbrɛ ɔsɛ wɔ Nyankopɔn enyim.’ (Kenkan 3 John 5-8.) Hɛn so, kwan kor a yebotum afa do ayɛ dɛm nye dɛ yɛbɔto nsa afrɛ amansin do ahwɛfo na yɛnye hɔn aabɔ mu edzidzi. Adze fofor so a yebotum ayɛ nye dɛ, sɛ wɔbɛsera hɛn asafo no a, yɛdze hɛnho bɛhyɛ asɛnka edwuma no mu. Leslie a yeedzi kan aka no ho asɛm no yɛ ndzɛmba ahorow bi dze kyerɛ dɛ n’enyi sɔ dza amansin do ahwɛfo yɛ no. Ɔkaa dɛ: “Mobɔ mpaa dɛ Jehovah mma hɔn nsa nka dza wohia. Menye mo kun kyerɛw nkrataa kɛma hɔn, na yɛma wohu mbrɛ hɔn nserahwɛ no esi aboa hɛn.” Kaa dɛ, amansin do ahwɛfo so yɛ nyimpa tse dɛ hɛnara. Ntsi hɔn so ɔtɔ da a wɔyar, dadwen tum hyɛ hɔn do, anaa hɔn abaw mu mpo tum bu. Ibotum aka nsɛm bi a ɔhyɛ nkuran akyerɛ wo mansin do hwɛfo anaa atɔ biribi dze akɛkyɛ no. Bi a nna Jehovah nam wo do rubua wo mansin do hwɛfo no ne mpaabɔ!—Mbɛ. 12:25.
YEHIA ‘AKYƐDZE A WƆDZE AMA NYIMPA’ NO
16. Dɛ mbrɛ Mbɛbusɛm 3:27 ma yehu no, ebɛn nsɛm na enuanom mbarimba botum ebisa hɔnho?
16 Yehia mbarimba pii ma wɔaasom dɛ ‘akyɛdze a wɔdze ama nyimpa’ wɔ wiadze nyina. Sɛ eyɛ onuabanyin a woenuma wo a, ibotum aboa wɔ dɛm kwan yi do anaa? (Kenkan Mbɛbusɛm 3:27.) Epɛ dɛ ebɛyɛ asafo mu somfo anaa? Sɛ eyɛ asafo mu somfo a, ibotum ayer woho abɛyɛ asafo mu panyin mbrɛ ɔbɛyɛ a ibotum aboa enuanom anaa? d Ibotum ayɛ nsesa ahorow bi wɔ w’asetsena mu ama eetum akɔ Ahendzi Asɛmpakafo Skuul no bi anaa? Dɛm skuul yi bɔboa wo ma Jesus eetum nye wo edzi dwuma pii wɔ asafo no mu. Sɛ etse nka dɛ irunntum nnyɛ dza yɛaka ho asɛm yi a, bɔ Jehovah mpaa. Serɛ no dɛ ɔmfa no sunsum krɔnkrɔn no mboa wo ama eetum ayɛ dwumadzi biara a wɔdze bɛhyɛ wo nsa no yie.—Luke 11:13; Andw. 20:28.
17. Mbarimba a hɛn Hen Christ Jesus dze hɔn akyɛ hɛn no, ebɛnadze na ɔma yehu fa no ho?
17 Enuanom mbarimba a Jesus dze hɔn ama hɛn dɛ “akyɛdze” no yɛ adanse a ɔkyerɛ dɛ ɔno na odzi hɛn enyim wɔ ewiei mber yi mu. (Matt. 28:20) Hɛn Hen Jesus dɔ hɛn, na ne yamu so ye, ntsi na ɔama hɛn mbarimba a wɔhwɛ ma hɛn nsa ka dza yehia no. Hɛn enyi sɔ paa dɛ ɔayɛ biribi a ɔtse dɛm ama hɛn. Ntsi hwehwɛ hokwan ahorow fa kyerɛ dɛ w’enyi sɔ edwumadzen a dɛm mbarimba yi reyɛ no. Na mma wo werɛ mmfir da so dɛ ebɛda Jehovah ase, osiandɛ “akyɛdze pa nye adom adze a odzi mu nyina” fi no hɔ.—Jas. 1:17.
NDWOM 99 Enuanom Mpempem Beberee
a Asafo mu mpanyimfo a wɔyɛ Akwankyerɛ Kuw no mufo, Akwankyerɛ Kuw no hɔn aboafo, Nkorbata Egyinatukuw no mufo, nye hɔn a dwumadzi afofor hyehyɛ hɔn nsa no nyina yɛ ‘akyɛdze a wɔdze ama nyimpa.’
b Wɔasesa edzin ahorow no bi.
c Nna wɔfrɛ dɛm ɔman yi Turkey.
d Sɛ epɛ dɛ ihu dza ɔsɛ dɛ eyɛ ama eetum asom dɛ asafo mu somfo anaa asafo mu panyin a, hwɛ adzesua nsɛm a wɔato dzin “Enuanom Mbarimba—Hom Pɛ Dɛ Hom Bɛyɛ Asafo Mu Asomfo?” nye “Enuanom Mbarimba—Hom Pɛ Dɛ Hom Bɛyɛ Asafo Mu Mpanyimfo?” Ɔwɔ November 2024 Ɔweɔn-Aban no mu.
