Esua adze ma iwiei no nna ennkaa dza esua no anaa? Sɛ dɛm dze a, nna ɔno ka wʼakoma to wo yamu, osiandɛ asɛm a ɔtse dɛm to hɛn nyina. Ebɛnadze na eyɛ a obotum aboa wo ma aakaa dza esua no? Ɔno nye dɛ ebɔbobɔ nsɛntsitsir a esua no do.

Sɛ irusua adze a, ɔyɛ a gyina kakra na hwɛ dɛ ibotum akaa nsɛntsitsir a esua no anaa. Ɔwodze hwɛ dza ɔsomafo Paul yɛe aber a ɔkyerɛɛw krataa kɛmaa no nuanom Christianfo no. Mbrɛ ɔbɛyɛ a wobohu nsɛntsitsir a ɔwɔ ne krataa no mu no, ɔkyerɛɛw dɛ: “Na nsɛm . . . no mu tsitsir nye yi.” (Heb. 8:1) Asɛm a Paul kae yi boaa enuanom no ma wɔtsee dza nna ɔpɛ dɛ ɔkyerɛ no ase, na ɔmaa wohun mbrɛ nsɛm a nna ɔreka no foa nsɛntsitsir a nna ɔwɔ ne krataa no mu no do.

Sɛ isua adze wie a, bi a ibotum dze bɛyɛ minitsi du ayɛ mbobɔdo dze ahwɛ dɛ ibotum akaa nsɛntsitsir a isuae no anaa. Sɛ enntum annkaa dza esua no a, ibotum asan ahwɛ nsɛntsir nkakraba a ɔwɔ adzesua no mu no bio anaa ibotum ahwɛ asɛntɔw a odzi kan a ɔhyɛ nkyekyɛmu biara ase no. Afei so, sɛ isuaa biribi fofor a, bɔ mbɔdzen dɛ edze wankasa wo nsɛm bɛkyerɛkyerɛ mu. Sɛ isua adze wie na ebɔ mbɔdzen dɛ ebɔbobɔ dza esua no do a, ɔrennyɛ dzen dɛ dza isuae no bɛka wo tsirmu. Afei so, ɔbɔboa wo ma aatse dza esua no ase yie na eehu mbrɛ ibesi dze abɔ wo bra.