1-2. Ebɛnadze na ɔma Nyankopɔn n’asomfo enyi gye? (James 1:​22-25)

 JEHOVAH na no Dɔba no pɛ dɛ hɛn enyi gye. Ɔdwontofo a ɔkyerɛɛw Ndwom 119:2 no kaa dɛ: ‘Enyigye nye hɔn a wodzi ne mbrasɛm do, hɔn a wɔdze hɔn akoma nyina hwehwɛ no no.’ Jesus so sii dɛm asɛm yi do dua na ɔkaa dɛ: “Enyigye nye hɔn a wotsie Nyankopɔn n’asɛm na wɔdze yɛ edwuma!” —Luke 11:28.

² Hɛn Jehovah n’asomfo dze, hɛn enyi gye. Ebɛnadze ntsi a? Siantsir a hɛn enyi gye no dze ɔdɔɔ so. Naaso adze tsitsir a ɔma hɛn enyi gye nye dɛ, yɛkenkan Nyankopɔn n’Asɛm no da biara, na yɛbɔ mbɔdzen dze dza yesua fi mu no bɔ hɛn bra.—Kenkan James 1:​22-25.

3. Sɛ yɛdze dza yesua fi Nyankopɔn n’Asɛm mu no bɔ hɛn bra a, ebɛn mfaso na yenya?

³ Sɛ yɛyɛ “asɛm no ayɛfo” a, ɔboa hɛn wɔ akwan ahorow pii do. Nokwasɛm nye dɛ, sɛ yɛdze dza yesua fi Nyankopɔn n’Asɛm mu no bɔ hɛn bra a, ɔma yɛsɔ Jehovah n’enyi, na iyi ma hɛnankasa so hɛn enyi gye. (Ɔsɛnk. 12:13) Afei so, sɛ yɛdze dza yesua fi Nyankopɔn n’Asɛm no mu no yɛ edwuma a, ɔma yɛnye hɛn ebusuafo nye hɛn nuanom Christianfo tsena kamakama. Bi a wankasa mpo ehu dɛ dɛm asɛm yi yɛ nokwar. Bio so, ɔhaw ahorow a hɔn a wɔmmfa Jehovah ne mbra nnyɛ hwee hyia no, no mu pii wɔ hɔ a, yennhyia bi. Aber a Ɔhen David kaa Jehovah ne mbra, n’ahyɛdze, nye n’atsɛmbu ho asɛm wɔ ndwom bi mu wiei no, ɔkaa asɛm bi, na yɛnye no yɛ adwen paa. Ɔkaa dɛ: “Hɔn ndzido mu wɔ akatua kɛse.”—Ndw. 19:​7-11.

4. Ebɛnadze ntsi na ɔnnda famu dɛ yɛbɛyɛ Nyankopɔn n’Asɛm no ayɛfo?

 ⁴ Hom mma yɛnka, ɔnnyɛ aber nyina na ɔyɛ mberɛw ma hɛn dɛ yɛbɛyɛ Nyankopɔn n’Asɛm no ayɛfo. Ɔwɔ mu dɛ yennyi adagyer dze, naaso sɛ yɛpɛ dɛ yɛtse dza Jehovah pɛ dɛ yɛyɛ no ase yie a, ɔsɛ dɛ yɛgye ber kenkan Bible no na yɛdwendwen dza yɛkenkan no ho. Yɛbɔhwɛ nyansahyɛ ahorow bi a ɔbɔboa hɛn ma yaakenkan Bible no da biara wɔ adzesua yi mu. Afei so, yɛbɔhwɛ dza yɛyɛ a ɔbɔboa hɛn ma yaadwendwen dza yɛkenkan wɔ Bible mu no ho, nye mbrɛ yɛdze dza yesua fi mu no bɔbɔ hɛn bra.

GYE BER KENKAN NYANKOPƆN N’ASƐM NO

5. Ebɛn ndzɛmba ahorow na ɔgye hɛn ber pii?

⁵ Jehovah n’asomfo pii nnyi adagyer. Yɛdze hɛn mber pii yɛ ndzɛmba a ohia a Bible no ka dɛ ɔsɛ dɛ yɛyɛ no. Dɛ mfatoho no, hɛn mu beberee yɛ edwuma dze hwɛ hɛnho nye hɛn mbusua. (1 Tim. 5:8) Hɛn mu pii so hwɛ hɛn ebusuafo a wɔyar anaa hɔn enyi efir no. Afei so, ɔsɛ dɛ hɛn nyina hwɛ hɛn apɔwmudzen yie, na iyi so gye hɛn ber no bi. Sɛ yɛdze dza yɛaka yi nyina to nkyɛn a, yɛsan so wɔ ndzɛmba ahorow bi a ohia paa a ɔsɛ dɛ yɛyɛ wɔ asafo no mu. Dɛm ndzɛmba no mu bi nye dɛ yɛbɛyer hɛnho ayɛ asɛnka edwuma no. Naaso ɔmmfa ho dɛ ɔsɛ dɛ idzi dwuma ahorow yi nyina no, ibesi dɛn agye ber dze akenkan Bible no da biara, adwendwen dza ekenkan no ho, na edze dza isua no abɔ wo bra?

6. Ebɛnadze na ɔbɔboa wo ma eetum akenkan Bible no da biara? (Hwɛ mfonyin no so.)

⁶ Hɛn Christianfo dze, yɛgye to mu dɛ ‘ndzɛmba a ohia paa no,’ no mu kor nye dɛ yɛbɛkenkan Bible no, ntsi ɔnnsɛ dɛ yɛdze dzi agor koraa. (Phil. 1:10) Ndwom nwoma no ka nyimpa a ɔwɔ enyigye no ho asɛm dɛ: “N’enyi gye [Jehovah] ne mbra ho, na ɔdwen ho adzekyee na adzesaa.” (Ndw. 1:​1, 2) Iyi ma ɔda edzi pefee dɛ, ɔsɛ dɛ yɛgye ber kenkan Bible no. Ehwɛ a, ebɛn aber na oye paa a yebotum dze akenkan Bible no? Asɛm no nye dɛ, obiara na ber a obeye ama no. Naaso ɔsɛ dɛ ɔyɛ ber a ibotum dze akenkan Bible no da  biara. Onua bi a wɔfrɛ no Victor kaa dɛ: “M’enyi gye ho dɛ mebɛkenkan Bible no anapa. Ɔwɔ mu, m’enyi nnhyɛ da ara nngye ho dɛ mobɔsoɛr anapatutuutu. Naaso mebohu dɛ, sɛ mekenkan Bible no dɛm aber no a, ndzɛmba pii nntwetwe m’adwen. Afei so, sɛ musua adze dɛm aber no a, ɔboa me ma mutum dze m’adwen si dza musua no do yie.” Woara so ɛ? Sɛ ekenkan Bible no anapa a, ɔboa wo anaa? Bisa woho dɛ, ‘Ebɛn aber paa na mubotum dze akenkan Bible no?

DWENDWEN DZA AKENKAN NO HO

7-8. Ebɛnadze na obotum ama aayɛ dzen dɛ yebenya dza yɛkenkan no do mfaso? Fa mfatoho kyerɛkyerɛ mu.

⁷ Nokwasɛm nye dɛ, obotum aba dɛ yɛbɛkenkan nsɛm pii dze, naaso yɛrennhyɛ da ara nngye ber nndwendwen dza yɛakenkan no ho. Akenkan biribi ma ber kakraabi ekyir no nna nnkaa dza akenkan no a? Biribi a ɔtse dɛm ato hɛn nyina pɛn. Awerɛhosɛm nye dɛ, sɛ yɛannhwɛ no yie a, dɛmara na hɛn Bible akenkan so bɛyɛ. Bi a yɛdze besi hɛn enyi do dɛ yɛbɛkenkan tsir ahorow bi da biara. Sɛ yɛwɔ nhyehyɛɛ a ɔbɛma yeetum dze ayɛ dɛm dze a, nna ɔno yɛfata nkamfo paa. Adze yi ara wɔhyɛ hɛn nkuran dɛ, ɔsɛ dɛ yɛdze botae ahorow bi sisi hɛn enyi do na yɛbɔ mbɔdzen du ho. (1 Cor. 9:26) Naaso, sɛ yɛkenkan Bible no a, nna yennwiei. Ɔsɛ dɛ yɛyɛ ndzɛmba ahorow bi so ama yeetum enya Nyankopɔn n’Asɛm no do mfaso kɛse.

⁸ Ma yɛnyɛ dɛm ntotoho yi: Ndua hia nsu ama woeetum enyin yie. Naaso, sɛ nsu tɔ kɛse wɔ mber kakraabi ntamu a, ndua nnya do mfaso papa biara. Osiandɛ nsu no nntum nnwura asaase no mu. Dɛm ntsi, sɛ nsu tɔ nkakrankakra mbom a, oye. Siantsir nye dɛ, sɛ ɔba no dɛm a, nsu no kɔ asaase no mu ma ndua tum twe bi dze nyin. Dɛmara na hɛn so, ɔnnsɛ dɛ yɛdze hɛn Bible akenkan no tu mbirika. Sɛ yɛdze tu mbirika a, yerunntum nndwendwen asɛm no ho yie ma onnwura hɛn mu. Afei so, sɛ yɛyɛ dɛm a, obowie ase no nna yɛnnkaa dza yaakenkan no mpo.—Jas. 1:24.

9. Sɛ yɛtaa dze hɛn Bible akenkan tu mbirika a, ebɛnadze na ɔsɛ dɛ yɛyɛ?

⁹ Edze wo Bible akenkan etu mbirika da  anaa? Sɛ dɛm a, nna ɔno ebɛnadze na ɔsɛ dɛ eyɛ? Ɔsɛ dɛ eto wo bo. Iyi bɔboa wo ma eetum adwendwen dza akenkan no ho. Nkyɛ ɔrennyɛ dzen mma wo dɛ ebɛyɛ dɛm bi a? Mber a edze sua Bible no so, ibotum dze bi aka ho, mbrɛ ɔbɛyɛ a ibenya ber dze adwendwen dza ekenkan no ho. Anaadɛ, ibotum akenkan nyiyimu kakraabi, na edze ber a wɔaka no adwendwen ho. Victor a yeedzi kan aka no ho asɛm no kaa dɛ: “Memma me Bible akenkan no nnyɛ tsentsenntsen. Ɔtɔ da mpo a, mekenkan tsir kor pɛ. Osiandɛ mekenkan Bible no anapatutuutu ntsi, ɔma mutum dwendwen dza makenkan no ho da mu no nyina.” Ibotum akenkan tsir anaa nyiyimu dodow biara a epɛ, naaso dza ohia nye dɛ ebɔto wo bo ase akenkan ama eetum enya dza akenkan no do mfaso kɛse.—Ndw. 119:97; hwɛ adakaba a wɔato dzin “ Nsɛm Bi A Ibotum Ebisa Woho” no.

10. Ibesi dɛn dze dza esua efi Bible mu no ayɛ edwuma? Ma ho mfatoho. (1 Thessalonicafo 5:​17, 18)

¹⁰ Ɔmmfa ho ber a edze kenkan Bible no anaa mber dodow a edze kenkan no, bɔ mbɔdzen fa dza ekenkan no bɔ wo bra. Sɛ ekenkan Nyankopɔn n’Asɛm no a, bisa woho dɛ: ‘Mibesi dɛn dze dza makenkan yi ayɛ edwuma ndɛ anaa daakye bi?’ Ɔwodze ma yɛmfa no dɛ erekenkan asɛm a ɔwɔ 1 Thessalonicafo 5:​17, 18. (Kenkan.) Sɛ ekenkan wie a, ibotum egyina kakra, na adwendwen mpɛn dodow a ebɔ mpaa nye nsɛm a eka wɔ wo mpaabɔ mu no ho. Afei so, ibotum adwendwen ndzɛmba a Jehovah ayɛ ama wo a w’enyi sɔ no ho. Ibotum mpo dze esi w’enyi do dɛ, ebɛda Jehovah ase wɔ ndzɛmba ebiasa bi a ɔayɛ ama wo no ho. Dza ɔwɔ mu nye dɛ, sɛ edze ber kakraabi mpo dwendwen dza akenkan no ho a, ɔbɛma ayɛ Nyankopɔn n’Asɛm no tsiefo nye ne yɛfo. Na sɛ da biara ekenkan Bible no, edwendwen ho, na edze dza isua fi mu no yɛ edwuma a, ɔbɛma asom Nyankopɔn yie. Naaso sɛ ekenkan Bible no, na ihu dɛ ɔsɛ dɛ eyɛ nsesa pii wɔ w’asetsena mu so ɛ, ebɛnadze na ibotum ayɛ?

FA BOTAE A IBOTUM EDU HO SISI W’ENYI DO

11. Ebɛnadze na obotum ebu w’abaw mu? Ma ho mfatoho.

¹¹ Sɛ ekenkan Bible no, na ihu dɛ ɔsɛ dɛ eyɛ nsesa pii wɔ w’abrabɔ mu a, annhwɛ a w’abaw mu bobu. Dɛ mfatoho no, fa no dɛ da kor bi, aber a ekenkaan Bible no, isuaa dɛ ɔnnsɛ dɛ eyɛ enyimhwɛ. (Jas. 2:​1-8) Afei ihun dɛ ɔsɛ dɛ ebɔ mbɔdzen na enye afofor dzi no yie, ntsi edze sii w’enyi do dɛ ebɛyɛ dɛm. Ayɛ adze paa! Adze kyee a ekenkaan Bible no, isuaa dɛ ɔsɛ dɛ ehwɛ w’ano kasa yie. (Jas. 3:​1-12) Hɔ ara na ekaa dɛ, mber bi mpo ekaa asɛm bi a ɔnnhyɛ nkuran kyerɛɛ obi. Ntsi isii wo bo dɛ, ebɛma w’anomu kasa ahyɛ afofor nkuran. Adze kyee bio a esanee kenkaan Bible no,  isuaa dɛ ɔnnsɛ dɛ efa hɔn a wɔnndɔ Jehovah no nyɛnko. (Jas. 4:​4-12) Afei ihun dɛ, ɔsɛ dɛ ehwɛ yie na aammfa biribi a ɔmmfata anngyegye w’enyi. Obodu da a otsia anan no, bi a ebɛtse nka dɛ nsesa a ɔsɛ dɛ eyɛ no wɔ w’asetsena mu no ayɛ pii ma innhu beebi mpo a enhyɛ ase mfi.

12. Sɛ ekenkan Bible no na ihu dɛ ɔsɛ dɛ eyɛ nsesa ahorow bi a, ebɛnadze ntsi na ɔnnsɛ dɛ ema obu w’abaw mu? (Hwɛ ase hɔ asɛm no so.)

¹² Sɛ ihu dɛ ɔsɛ dɛ eyɛ nsesa ahorow bi wɔ w’asetsena mu a, mma mma w’abaw mu mmbu. Iyi mpo kyerɛ dɛ, ebrɛ woho adze na ewɔ akoma pa. Siantsir a yɛreka dɛm nye dɛ, obi a ɔbrɛ noho adze no, ɔkenkan Kyerɛwnsɛm no mbrɛ ɔbɛyɛ a obohu nsesa ahorow bi a ɔsɛ dɛ ɔyɛ wɔ n’asetsena mu. a Afei so kaa dɛ, ‘suban fofor’ a ɔsɛ dɛ yɛhyɛ no, ɔnnyɛ da kor asɛm. (Col. 3:10; fa toto asɛm “reyɛ no fofor” no ho nkyerɛkyerɛmu no ho.) Naaso ebɛnadze na ɔbɔboa wo ma aakɔ do ayɛ Nyankopɔn n’Asɛm no yɛfo?

13. Ibesi dɛn dze dza esua no ayɛ edwuma nkakrankakra? (Hwɛ mfonyin no so.)

¹³ Dɛ nkyɛ edze dza esua no nyina bɛyɛ edwuma prɛko pɛr no, yɛ no nkakrankakra mbom. (Mbɛ. 11:2) Ibotum dze dɛm nyansahyɛ yi ayɛ edwuma: Kyerɛw nsesa ahorow a epɛ dɛ eyɛ no nyina to hɔ. Afei fa no mu kor anaa ebien bi na yɛ ho edwuma. Ekyir yi nna ayɛ dza wɔaka no. Ebɛn nsesa ahorow na ibotum ahyɛ ase ayɛ?

14. Ebɛn botae ahorow na ibotum ahyɛ ase dze esisi w’enyi do?

¹⁴ Nsesa a ɔbɛyɛ mberɛw ama wo dɛ ebɛyɛ no, ibotum dze ɔno mbom ahyɛ ase. Anaadɛ ibotum dze esi w’enyi do dɛ, ebɛyɛ nsesa bi a ehwɛ a ohia paa no. Sɛ ihu nsesa a ɔsɛ dɛ eyɛ  no a, yɛ ho nhwehwɛmu wɔ asafo nwoma ahorow bi mu. Ibotum dze Watch Tower Publications Index anaa Buukuu A Jehovah Adasefo Dze Yɛ Nhwehwɛmu ayɛ dɛm. Afei bɔ dza epɛ dɛ eyɛ no ho mpaa, na serɛ Jehovah dɛ ɔmma nya ‘ɔpɛ na tum a edze bɛyɛ dza ɔsɔ n’enyi.’ (Phil. 2:​13, Ahyɛmu Fofor.) Afei bɔ mbɔdzen fa dza esua no yɛ edwuma. Mbrɛ ɔtse nye dɛ, sɛ edze botae bi si w’enyi do na itum du ho a, okenyan wo ma edze botae afofor so sisi w’enyi do. Ntsi sɛ ebɔ mbɔdzen nya suban pa bi a, obekenyan wo ma aayer woho enya suban pa afofor so.

MA NYANKOPƆN N’ASƐM NO ‘NYƐ WO MU EDWUMA’

15. Ebɛn nsonsonee na ɔda Jehovah n’asomfo nye nkorɔfo pii a wɔkenkan Bible no ntamu? (1 Thessalonicafo 2:13)

¹⁵ Binom se wɔakenkan Bible no mpɛn pii. Naaso awerɛhosɛm nye dɛ, dza Bible no ka no mpo wɔnngye nndzi na akantam wɔdze abɔ hɔn bra. Naaso hɛn Jehovah n’asomfo dze, yɛnntse dɛm koraa! Yɛgye dzi paa dɛ Bible no yɛ “Nyankopɔn asɛm, na dɛmara so na ɔtse ampa,” dɛ mbrɛ Christianfo a wɔtsenaa ase wɔ asomafo no aber do no so gyee dzii no. Afei so, yɛbɔ mbɔdzen dze afotusɛm a ɔwɔ Bible mu no bɔ hɛn bra.—Kenkan 1 Thessalonicafo 2:13.

16. Ebɛnadze na obotum aboa hɛn ma yaayɛ Asɛm no ayɛfo?

¹⁶ Ɔnnyɛ aber nyina na ɔyɛ mberɛw dɛ yɛbɛkenkan Nyankopɔn n’Asɛm no na yɛdze no mu nsɛm no aabɔ hɛn bra. Bi a ɔyɛ dzen ma hɛn dɛ yɛbɛgye ber akenkan Bible no. Anaa bi a yɛdze hɛn Bible akenkan no tu mbirika ma ɔno ntsi yenntum nndwendwen dza yɛkenkan no ho yie. Anaadɛ bi a nsesa a ɔsɛ dɛ yɛyɛ no dɔɔ so ma yennhu beebi mpo a yɛnhyɛ ase mfi. Enyigyesɛm nye dɛ, ɔmmfa ho dza ɔma ɔyɛ dzen ma wo dɛ ibenya Bible no do mfaso biara no, ibotum ayɛ ho biribi. Jehovah botum aboa wo ma eedzi dɛm haw no do. Ntsi hom mma yensi hɛn bo dɛ, yɛbɛma no kwan ma ɔaaboa hɛn. Sɛ yɛyɛ dɛm a, ɔremma yɛnnyɛ etsiefo awerɛfirfo, mbom yɛdze Nyankopɔn n’Asɛm no bɛyɛ edwuma. Asɛm no nye dɛ, sɛ yɛkenkan Nyankopɔn n’Asɛm no, na yɛdze no mu nsɛm no bɔ hɛn bra a, hɛn enyi bɛgye paa.—Jas. 1:25.