1-2. (a) Aber a ɔsomafo Paul kyerɛɛw krataa kɛmaa Hebrewfo no, nna ndzɛmba tse dɛn wɔ Judea? (b) Ebɛnadze ntsi na yebotum aka dɛ Hebrewfo no nsa kaa dɛm krataa no wɔ ber a ɔfata mu?

 JESUS no wu ekyir no, Christianfo a nna wɔyɛ Hebrewfo a wɔtse Jerusalem na Judea no hyiaa ɔhaw ahorow. Dɛ mfatoho no, aber a wɔtseew Christianfo asafo no fofor no, wɔannkyɛr koraa na nkorɔfo hyɛɛ ase taan Christianfo no enyi dzendzenndzen. (Andw. 8:1) Afei bɛyɛ mfe 20 ekyir no, Christianfo no hɔn sikasɛm yɛɛ basaa, na obotum aba dɛ ɔkɔm bi a osii no na ɔmaa ɔbaa no dɛm. (Andw. 11:​27-30) Naaso bɛyɛ afe 61 H.B. no mu no, Christianfo no asomu dwee hɔn kakra. Naaso, nna dɛm asomdwee yi renntsena hɔ afebɔɔ. Dɛm aber no mu ara so na Jehovah maa ɔsomafo Paul kyerɛɛw krataa bi kɛmaa Hebrewfo no. Nokwasɛm nye dɛ, hɔn nsa kaa krataa no wɔ ber a ɔfata mu paa.

² Hebrewfo no nsa kaa krataa no wɔ ber a ɔfata mu paa osiandɛ nna asomdwee a woenya no renntsena hɔ daa. Krataa no mu no, Paul maa hɔn afotu kamakama bi. Nna dɛm afotu no botum aboa hɔn ma woeemia hɔn enyi egyina ɔhaw ahorow a nna ɔrennkyɛr wobehyia no ano. Mbrɛ ɔtse nye dɛ, nkɔm a Jesus hyɛɛ dɛ wɔbɛsɛɛ Jerusalem no, nna ɔrennkyɛr na wɔaaba mu. (Luke 21:20) Ɔwɔ mu, nna Paul anaa Christianfo a wɔwɔ Judea no nnyim ber pɔtsee a dɛm asɛm no besi. Naaso, nna Christianfo a wɔyɛ Jewfo no botum dze ber a wɔaka no ahyɛ hɔn gyedzi mu dzen ama woeetum emia hɔn enyi egyina ɔhaw a nna woribehyia no ano.—Heb. 10:25; 12:​1, 2.

3. Ebɛnadze ntsi na ɔsɛ dɛ Christianfo ma krataa a wɔkyerɛwee kɛmaa Hebrewfo no ho hia hɔn ndɛ?

³ Hɛn so, yenyim dɛ ɔrennkyɛr ahohiahia kɛse bi bɛba. Naaso dza yɛrohwɛ kwan no dze, ɔbɛkyɛn dza Christianfo a nna wɔyɛ Hebrewfo no hyiae no koraa. (Matt. 24:21; Nyi. 16:​14, 16) Asɛm  no nye dɛ, afotu a Jehovah dze maa dɛm Christianfo no, hɛn so, yebotum enya do mfaso. Dɛm ntsi hom mma yensusu no mu bi ho.

HOM MMA “YƐMPER NKƆ KAN” WƆ GYEDZI NO MU

4. Ebɛn ɔhaw ahorow na Christianfo a nna wɔyɛ Jewfo no hyiae? (Hwɛ mfonyin no so.)

⁴ Christianfo a nna wɔyɛ Jewfo no hyiaa ɔhaw kɛse bi. Dza ɔwɔ mu nye dɛ, mber bi a abɛsen kɔ no, nna Jewfo no yɛ nkorɔfo a Jehovah agye hɔn ato mu. Afei so, ahemfo a nna wogyina Jehovah n’ananmu dzi tum no, nna Jerusalem na wɔtse. Bio so, sɛ nna obi pɛ dɛ ɔsom Jehovah a, nna ɔsɛ dɛ ɔkɔ asɔrfie a ɔwɔ Jerusalem no. Nna Jewfo anokwafo no nyina dzi Moses Mbra no do. Afei so, nna wɔdze dza Jewsom mu mpanyimfo no dze kyerɛkyerɛ hɔn no bɔ hɔn bra. Edziban a nna ɔsɛ dɛ wodzi, twatsiatwa, nye mbrɛ nna ɔsɛ dɛ wɔnye hɔn a wɔnnyɛ Jewfo no dzi nyina, nna wɔahyehyɛ ho mbra. Naaso Jesus no wu ekyir no, nna Jehovah nngye afɔr ahorow a Jewfo no bɔ no nnto mu bio. Nokwasɛm nye yi, nna ɔnnda famu mma Jewfo a wɔabɛyɛ Christianfo no dɛ wɔbɛgye ato mu dɛ ndzɛmba asesa. Osiandɛ nna Moses Mbra no ara na wɔdze ayɛ edwuma ebesi dɛm aber no. (Heb. 10:​1, 4, 10) Ɔsomafo Peter nye Christianfo afofor a nna hɔnho akokwaa no mpo, nna ɔnnda famu mma hɔn wɔbɛgye nsesa ahorow no bi ato mu. (Andw. 10:​9-14; Gal. 2:​11-14) Osian nkyerɛkyerɛ afofor a nna Jewfo a wɔabɛyɛ Christianfo no abɛgye edzi ntsi, Jewsom mu mpanyimfo no tuu hɔn enyi sii hɔnho.

5. Nna ebɛnadze na ɔsɛ dɛ Christianfo no hwɛ hɔnho yie wɔ ho?

⁵ Nna ekuw ebien na wɔrosoɛr etsia Christianfo a nna wɔyɛ Hebrewfo no. Nna hɔn mu kor nye Jewsom mu mpanyimfo no. Nna dɛm mpanyimfo yi bu Christianfo no dɛ wɔyɛ awaafo. Nna kuw a otsia ebien no nye nkorɔfo a hɔnara wɔse wɔyɛ Christianfo no. Nna dɛm nkorɔfo yi agye egyina mu dɛ, kyenkyen ara ɔsɛ dɛ Christianfo no kɔ do dzi Moses Mbra no do. Bi a nna wosusu dɛ sɛ wɔyɛ dɛm a, wɔrenntan hɔn enyi. (Gal. 6:12) Ntsi nna ebɛnadze koraa na obotum aboa Christianfo no ma wɔaakɔ do edzi Jehovah nokwar?

6. Ebɛnadze na Paul hyɛɛ ne mfɛfo Christianfo no nkuran dɛ wɔnyɛ? (Hebrewfo 5:14–6:1)

 ⁶ Krataa a Paul kyerɛwee kɛmaa Hebrewfo no mu no, ɔhyɛɛ ne mfɛfo Christianfo no nkuran dɛ wɔmpɛnsapɛnsa Nyankopɔn n’Asɛm no mu. (Kenkan Hebrewfo 5:14–6:1.) Paul dze Hebrew Kyerɛwnsɛm no boaa no nuanom no ma wohun siantsir a kwan a Christianfo no fa do som Jehovah no yɛ papa koraa kyɛn Jewfo no hɔndze no. a Nna Paul nyim dɛ, sɛ Jewfo a nna wɔabɛyɛ Christianfo no tse nokwar no ase yie a, ɔbɔboa hɔn paa. Nna ɔbɛma wɔahyɛ nkyerɛkyerɛ ahorow a ɔnnyɛ nokwar no nsew, na wɔaatwe hɔnho efi ho amma wɔaanndaadaa hɔn.

7. Ebɛn ɔhaw ahorow na yehyia no ndɛ?

⁷ Hɛn asɛm akɛyɛ tse dɛ Christianfo a nna wɔyɛ Hebrewfo no. Siantsir nye dɛ, nsɛm a da biara da yɛtse no, ɔnye dza Jehovah pɛ dɛ yɛyɛ no nnhyia koraa. Bible no ma yehu dɛ, banyin na basia a wɔawar nkotsee na ɔsɛ dɛ wɔnye hɔnho da. Osiandɛ yɛdze dɛm asɛm yi yɛ edwuma ntsi, hɛn atamfo se yɛnntse asɛm ase na hɛn tsirmu so yɛ dzen paa. Awerɛhosɛm nye dɛ, adze rekye a adze resa yi, adwen a nkorɔfo pii wɔ nye mbrɛ wosi bɔ hɔn bra no, nna man ara na ɔreman efi mbrɛ Nyankopɔn si dwen ndzɛmba ho no ho. (Mbɛ. 17:15) Dɛm ntsi, atorsɛm a hɛn atamfo keka mbrɛ ɔbɛyɛ a hɛn abaw mu bobu anaa ɔbɛma yɛaman efi nokwar no ho no, ɔsɛ dɛ yɛbɔ mbɔdzen hyɛ no nsew na yɛtwe hɛnho fi ho.—Heb. 13:9.

8. Ebɛnadze na ɔbɔboa hɛn ma yaaper akɔ kan wɔ gyedzi no mu?

⁸ Afotu a Paul dze maa Christianfo a nna wɔyɛ Hebrewfo no dɛ wɔmper nkɔ kan wɔ gyedzi no mu no, hɛn so ɔsɛ dɛ yɛbɔ mbɔdzen dze yɛ edwuma. Dza yebotum ayɛ no bi nye dɛ, yɛbɛgye ber esua Bible no na yeehu Jehovah yie, na yeenya adwen a ɔwɔ wɔ ndzɛmba ho no bi. Sɛ yehyira hɛnho do ma Jehovah na wonuma hɛn mpo a, ɔsɛ dɛ yɛkɔ do ara yɛ dɛm. Sɛ yɛbaa nokwar no mu akyɛr oo, sɛ ɔnnkyɛree oo, ɔsɛ dɛ yɛkɔ do ara sua Nyankopɔn n’Asɛm no da biara da. (Ndw. 1:2) Krataa a Paul kyerɛwee kɛmaa Hebrewfo no ma yehu dɛ ɔsɛ dɛ yenya gyedzi. Naaso sɛ yɛpɛ dɛ yenya gyedzi a ɔkaa ho asɛm no bi a, nna ɔno ɔsɛ dɛ yeyi ber si hɔ dze sua adze da biara na yɛdwendwen dza yesua no ho.—Heb. 11:​1, 6.

‘YƐGYE DZI DZE GYE HƐN KRA NKWA’

9. Nna ebɛnadze ntsi na ɔsɛ dɛ Christianfo a wɔtse Judea no nya gyedzi kɛse?

⁹ Nna ɔsɛ dɛ Christianfo a wɔtse Judea no nya gyedzi kɛse ama woeetum enya nkwa wɔ ahohiahia a nna ɔrobobɔ ba no mu. (Heb. 10:​37-39) Jesus bɔɔ n’ekyirdzifo no kɔkɔ dɛ, sɛ wohu dɛ asogyafo etwa Jerusalem ho ehyia a, ɔsɛ dɛ woguan fi hɔ. Nna ɔsɛ dɛ Christianfo a wɔtse Jerusalem nye hɔn a wɔtsetse nkuraase no nyina dze Jesus n’afotu yi yɛ edwuma. (Luke 21:​20-24) Naaso dɛm aber no, sɛ nna asogyafo kɔto hyɛ nkuraase bi do a, nna amamfo no taa guan kɔ nkurow a wɔatow ɔfasu etwa ho ehyia mu mbrɛ ɔbɛyɛ a wobenya bambɔ. Nna Jerusalem so yɛ kurow a wɔatow ɔfasu etwa ho ehyia. Dɛm ntsi, nna ɔtse dɛ mbrɛ ntseasee nnyi mu dɛ Christianfo no boguan akɔ mbepɔw do. Ntsi sɛ nna wobotum dze Jesus n’asɛm no ayɛ edwuma a, nna obehia dɛ wonya gyedzi kɛse.

10. Sɛ nna Christianfo no nya gyedzi kɛse a, nna ɔbɛma wɔayɛ dɛn? (Hebrewfo 13:17)

¹⁰ Afei so, hɔn a nna Jesus nam hɔn do dze akwankyerɛ ma asafo no, nna ɔsɛ dɛ Christianfo a wɔyɛ Hebrewfo no gye hɔn dzi. Obotum aba dɛ, hɔn a nna wodzi ndzɛmba enyim no  dze akwankyerɛ ahorow bi maa Christianfo no mbrɛ ɔbɛyɛ a wobohu ber a nna ɔsɛ dɛ woguan nye mbrɛ wobesi ayɛ dɛm amma ndzɛmba annyɛ basaa. (Kenkan Hebrewfo 13:17.) Greek kasafua a wɔdze dzii dwuma wɔ Hebrewfo 13:17 a wɔakyerɛ ase “hom ntsie” no, dza ɔkyerɛ nye dɛ obi dze akwankyerɛ a obi fofor dze bɛma no no bɛyɛ edwuma osiandɛ ɔgye dɛm nyimpa kor no dzi ntsi, na ɔnnyɛ dɛ dɛm nyimpa no wɔ tum ara ntsi a. Dɛm ntsi, nna ɔsɛ dɛ Christianfo a wɔyɛ Hebrewfo no gye mpanyimfo a wodzi ndzɛmba enyim no dzi ansaana ahohiahia no aba. Sɛ wotsie mpanyimfo no aber a hɔn asomu adwe hɔn kakra yi a, nna ɔrennyɛ dzen mma hɔn dɛ wobetsie hɔn aber a ndzɛmba mu ayɛ dzen no.

11. Ebɛnadze ntsi na ɔsɛ dɛ Christianfo nya gyedzi kɛse ndɛ?

¹¹ Nna ɔsɛ dɛ Christianfo a nna wɔyɛ Hebrewfo no nya gyedzi, na dɛmara so na ɔsɛ dɛ hɛn so yenya gyedzi. Bible no ma yehu dɛ, ɔrennkyɛr wɔbɛsɛɛ dɛm wiadze bɔn yi. Naaso, nyimpa pii nngye dɛm asɛm yi nndzi, na wɔserew hɔn a wɔgye dzi no mpo. (2 Pet. 3:​3, 4) Ɔwɔ mu, Bible no ma yehu ndzɛmba ahorow bi a obesisi wɔ ahohiahia kɛse no mu, naaso ndzɛmba pii so wɔ hɔ a yennyim. Naaso ɔsɛ dɛ yenya gyedzi kɛse dɛ ɔnyɛ dɛn ara a dɛm wiadze bɔn yi bɛba n’ewiei wɔ ber a Jehovah ahyɛ mu pɛpɛɛpɛ; minitsi kor mpo rommbɔtɔ do. Afei so, ɔsɛ dɛ yenya awerɛhyɛmu dɛ ɔmmfa ho dza obesi biara no, Jehovah bɔhwɛ hɛn dɛm aber no.—Hab. 2:3.

12. Ebɛnadze na ɔbɔboa hɛn ma yeenya nkwa wɔ ahohiahia kɛse no mu?

¹² Afei so, ɔsɛ dɛ yɛgye dzi paa dɛ, ndɛ Jehovah nam “akowaa nokwafo nye nyansafo” no do na ɔdze akwankyerɛ ma hɛn. (Matt. 24:45) Aber a Romefo asogyafo no botwaa Jerusalem ho hyiae no, Christianfo a nna wɔyɛ Hebrewfo no nsa kaa akwankyerɛ ahorow bi. Hɛn so, sɛ ahohiahia kɛse no hyɛ ase a, bi a wɔbɛma hɛn akwankyerɛ pɔtsee bi a ɔbɛgye hɛn nkwa. Dɛm ntsi, akwankyerɛ a hɔn a wodzi ndzɛmba enyim wɔ Jehovah n’ahyehyɛdze no mu no dze ma hɛn no, ndɛ paa nye ber a ɔsɛ dɛ yenya mu ahotodo kɛse. Sɛ ɔyɛ dzen ma hɛn dɛ yebetsie akwankyerɛ a wɔdze ma hɛn ndɛ no a, ɔno dze ɔbɛyɛ dzen ama hɛn dɛ yebetsie akwankyerɛ a wɔdze bɛma hɛn wɔ ahohiahia kɛse no mu no.

13. Nna ebɛnadze ntsi na afotu a ɔwɔ Hebrewfo 13:5 no ho hia?

¹³ Aber a nna Christianfo a wɔyɛ Hebrewfo no rotweɔn dɛ wobohu asɛnkyerɛdze a ɔkyerɛ dɛ ber aso dɛ woguan no, nna ɔsɛ dɛ wɔdze Jehovah no som dzi kan wɔ hɔn asetsena mu. Afei so, nna ɔnnsɛ dɛ wɔma ‘sikanyiber ba hɔn abrabɔ mu.’ (Kenkan Hebrewfo 13:5.) Nna Christianfo no bi wɔ hɔ a, ɔkɔm adze hɔn pɛn, na woedzi hia so da. (Heb. 10:​32-34) Ɔwɔ mu dɛ mber bi nna wɔayɛ krado dɛ sɛ asɛmpa no ntsi wohyia ɔhaw mpo a wobemia hɔn enyi egyina ano, naaso nna binom so ahyɛ ase rinya adwen dɛ wohia sika pii mbrɛ ɔbɛyɛ a ɔbɔbɔ hɔnho ban. Naaso sɛ nna obi wɔ sika pii mpo a, nna orunntum nngye no nkwa aber a wɔasɛɛ Jerusalem no. (Jas. 5:3) Nokwasɛm nye dɛ, nna ɔbɛyɛ dzen paa ama obiara a n’enyi ber sika no dɛ obegya ne fie na n’egyapadze hɔ na woeeguan.

14. Sɛ hɛn gyedzi mu yɛ dzen paa a, yɛbɛyɛ hɛn adze dɛn wɔ ahonyadze ho?

¹⁴ Sɛ yɛgye dzi paa dɛ wiadze yi n’ewiei abɛn a, yɛremma sika anaa ahonyadze nnyɛ adze tsitsir wɔ hɛn asetsena mu. Ahohiahia kɛse no mu no, nkorɔfo ‘bɔtow hɔn dwetɛ egu abrɔn mu’ osiandɛ wobohu dɛ “hɔn dwetɛ na hɔn sika runntum nngye hɔn wɔ [Jehovah] n’ebufuw da no mu.” (Ezek. 7:19) Dɛ nkyɛ yɛdze hɛn adwen besi sika pii a yebenya do no, ɔsɛ dɛ yesisi gyinae a ɔbɔboa hɛn ma yeetum ahwɛ hɛnho nye hɛn ebusua, na ber kor no ara so yeetum asom Jehovah. Sɛ yebotum ayɛ  dɛm a, ɔsɛ dɛ yɛhwɛ yie na yaannyɛ atotɔatotɔ anaa yaannsɛɛ hɛn ber pii ammfa annhwɛ ndzɛmba a yɛwɔ no do. Afei so, ɔsɛ dɛ yɛhwɛ yie na ndzɛmba a yɛwɔ no aammbɛyɛ adze a no ho hia hɛn paa wɔ hɛn asetsena mu. (Matt. 6:​19, 24) Aber a yɛrotweɔn dɛ wiadze bɔn yi bɛba n’ewiei no, ɔsɛ dɛ yɛma ɔtsena hɛn adwen mu dɛ ahonyadze anaa ndzɛmba afofor botum asɔ hɛn gyedzi ahwɛ.

‘OHIA DƐ HOM DZE ENYIMIA GYINA MU’

15. Nna ebɛnadze ntsi na ohia paa dɛ Christianfo no mia hɔn enyi gyina ɔhaw ano?

¹⁵ Nna ndzɛmba sɛɛ ara na ɔresɛɛ wɔ Judea, ntsi nna ɔsɛ dɛ Christianfo a wɔyɛ Hebrewfo no mia hɔn enyi gyina ɔhaw biara a nna wobehyia no ano. (Heb. 10:36) Mbrɛ ɔtse nye dɛ, Christianfo a wɔyɛ Hebrewfo no, nna wɔatan hɔn mu binom enyi paa, naaso nna hɔn mu beberee so wɔ hɔ a wonnhyiaa ɔsoɛrtsia a ɔtse dɛm da. Dɛm ntsi Paul kaa dɛ, ɔwɔ mu dɛ nna woemia hɔn enyi egyina nsɔhwɛ a no mu yɛ dzen ano dze, naaso nna wonnhyiaa ɔhaw a Jesus faa mu no bi. Ntsi nna ɔsɛ dɛ wɔyɛ krado dɛ sɛ wohyia ɔhaw a ɔtse dɛm a, wobedzi nokwar ekesi owu mu. (Heb. 12:4) Osiandɛ nna nkorɔfo pii rebɛyɛ Christianfo ntsi, ɔmaa Jewfo no hɔn bo fuuw paa na wɔsoɛree tsiaa hɔn dzendzenndzen. Mfe kakraabi a nna abɛsen kɔ no mpo, nkorɔfo bi too hyɛɛ Paul do aber a ɔkɔr Jerusalem no. Jewfo bɔbor 40 “kekaa ntam dɛ worinndzidzi, eso wɔronnom, gyedɛ woeku Paul ansaana.” (Andw. 22:22; 23:​12-14) Ɔmmfa ho dɛ nna wɔretan hɔn enyi dzendzenndzen no, nna ɔsɛ dɛ Jewfo a wɔabɛyɛ Christianfo no kɔ do hyia mu som Jehovah, wɔka asɛmpa no, na wɔkɔ do yɛ ndzɛmba ahorow bi a ɔbɛhyɛ hɔn gyedzi dzen.

16. Ebɛn kwan do na krataa a wɔkyerɛwee kɛmaa Hebrewfo no botum aboa hɛn ma yeenya ɔsoɛrtsia ho adwen pa? (Hebrewfo 12:7)

¹⁶ Nna ebɛnadze na ɔbɔboa Christianfo a wɔyɛ Hebrewfo no ma woeegyina ɔsoɛrtsia a nna worihyia no ano? Nna Paul nyim dɛ, dza ɔbɔboa hɔn nye dɛ wobenya nsɔhwɛ a worihyia no ho adwen pa. Dɛm ntsi ɔmaa wohun dɛ, bi a Nyankopɔn bɛma kwan ma Christiannyi bi ehyia nsɔhwɛ mbrɛ ɔbɛyɛ a ɔdze bɛtsetse no.  (Kenkan Hebrewfo 12:7.) Ntsetsee a ɔtse dɛm no botum aboa Christiannyi bi ma oeenya suban pa. Christianfo a wɔyɛ Hebrewfo no, sɛ nna wɔdze hɔn adwen si ndzɛmba pa a obotum efi nsɔhwɛ a wobehyia no mu no aba no do a, nna ɔbɛma ayɛ mberɛw ama hɔn dɛ wobegyina ano.—Heb. 12:11.

17. Nna ebɛnadze na Paul esua efi ɔsoɛrtsia a ogyinaa ano no mu?

¹⁷ Paul hyɛɛ Christianfo a wɔyɛ Hebrewfo no nkuran dɛ, sɛ worihyia nsɔhwɛ a, wommia hɔn enyi mfa akokodur ngyina ano. Nna Paul botum dze dɛm afotu no ama hɔn, osiandɛ ansaana ɔrebɛyɛ Christiannyi no nna ɔsoɛr tsia Christianfo no, ntsi nna onyim ɔhaw a wobotum ehyia. Afei so, ɔbɛyɛɛ Christiannyi no, wɔsoɛree tsiaa no paa, ntsi nna onyim mbrɛ wosi gyina ɔsoɛrtsia ano. (2 Cor. 11:​23-25) Dɛm ntsi, sɛ nna Paul reka dza ɔbɔboa hɔn ma woeegyina ɔsoɛrtsia ano a, nna onyim dza ɔreka paa. Ɔmaa Jewfo a wɔabɛyɛ Christianfo no hun dɛ, sɛ worihyia nsɔhwɛ a, ɔnnsɛ dɛ wɔdze hɔnho to hɔnankasa hɔnho do, mbom ɔsɛ dɛ wɔdze hɔnho to Jehovah do. Ntsi nna Paul botum dze akokodur aka dɛ: “[Jehovah] nye mo boafo; murunnsuro.”—Heb. 13:6.

18. Ebɛnadze na yenyim a ɔbɔboa hɛn ma yeegyina ɔsoɛrtsia ano?

¹⁸ Yɛrekasa yi, wɔrosoɛr etsia hɛn nuanom binom dzendzenndzen. Ebɛnadze na yebotum ayɛ dze akyerɛ dɛ yɛdɔ hɔn? Yebotum abɔ mpaa ama hɔn. Ɔtɔ da so a, yebotum ayɛ ndzɛmba ahorow bi dze aboa hɔn. (Heb. 10:33) Bible no ma yehu no pefee dɛ: “Hɔn a wɔpɛ dɛ wɔdze nyamesompa tsena ase wɔ Christ Jesus mu nyina bɔsɔw ahohia.” (2 Tim. 3:12) Dɛm ntsi, ɔsɛ dɛ hɛn nyina siesie hɛnho ma mber a no mu yɛ dzen a ɔreba no. Hom mma yɛnkɔ do mfa hɛnho nto Jehovah do, na yennya awerɛhyɛmu dɛ, ɔmmfa ho ɔhaw biara a yebehyia no ɔbɔboa hɛn ma yeegyina ano. Nokwasɛm nye dɛ, Jehovah ne mber pa mu no, ɔbɛma n’asomfo anokwafo nyina ho atɔ hɔn.—2 Thess. 1:​7, 8.

19. Ebɛn ndzɛmba na yebotum ayɛ dze esiesie hɛnho ama ahohiahia kɛse a ɔda hɛn enyim no? (Hwɛ mfonyin no so.)

¹⁹ Yebotum aka dɛ, krataa a Paul kyerɛwee kɛmaa Hebrewfo no boaa hɔn ma wosiesiee hɔnho maa ahohiahia a nna ɔrobobɔ ba no. Paul hyɛɛ no nuanom no nkuran dɛ, wɔngye ber nsua Kyerɛwnsɛm no ama wɔaatse ase yie. Sɛ wɔyɛ dɛm a, nna ɔbɛma wɔahyɛ nkyerɛkyerɛ a obotum ama hɔn gyedzi aayɛ mberɛw no nsew, na wɔaatwe hɔnho efi ho. Afei so ɔhyɛɛ hɔn nkuran dɛ, wɔnhyɛ hɔn gyedzi mu dzen, mbrɛ ɔbɛyɛ a wɔdze Jesus nye hɔn a wodzi ndzɛmba enyim no hɔn akwankyerɛ bɛyɛ edwuma ntsɛm. Bio so ɔmaa wohun dɛ, sɛ wobu nsɔhwɛ a wohyia no dɛ ɔyɛ kwan a hɔn Egya a ɔdɔ hɔn no refa do dze atsetse hɔn a, ɔbɛma woemia hɔn enyi egyina ano. Hom mma yɛmfa afotu a ofi Bible mu yi nyɛ edwuma. Sɛ yɛyɛ dɛm a, ɔbɛma yeemia hɛn enyi egyina ɔhaw ahorow ano dze ekodu ewiei.—Heb. 3:14.